Henglep Constituency chan ding Project ho kichondoh kapohnat jeh a resign kakibol...

Henglep Constituency chan ding Project ho kichondoh kapohnat jeh a resign kakibol ahi tia T. T Haokip in sei

56
0
SHARE

Henglep Constituency chan ding Project ho kichondoh kapohnat jeh a resign kakibol ahi tia T. T Haokip in sei

CM kheldoh nadin camping kanabol uvin hinlah Minister mi 3 ho resign bol ding anoplou jeh uva ana kilosam kha ahi

Mangneo Touthang

Imphal, June 23(ET): Henglep Constituency mipin BJP ticket a gamsung natong dia MLA ding’a eina lhendoh u ahin, hinla MLA kahung kai a kipat gamsung mipi hahsat gentheina kapohnat pen Henglep to Churachandpur lampi Life Line semphat ding bou hi katup pipen chu ahin, Lampi semphat  ding thu Assembly Session masapen nikhon Zero Hour a niveijen kana podoh in, hinlah donbutna ana umpoi tin T. Thangzalam HaokipHenglep A/C Ex MLA in tunin Patsoi Congress Camp a BJP Primary Membership leh MLA akon resign akibol le Secular Progressive Party (SPF) ajop thu’a Press Confidence abolna a aseiyin ahi.

Kum masa lang’a Henglep gamsung a Natgol ana umlai chun henglep Lampi set thuleh hiche Natgol thu chu Newspaper tampin ahinso tauvin, vangphat umtah in Sugnu MLA K Ranjit in Calling attention ana bol in ahi. Chule Ex CM Ibobi in kum 15 vai ana poh sung’a Henglep lampi ana semlou thu’a akiphatlam nathu kakom a aseijin, chule koiman Henglep lampi semding thu asei loudan jong aseiye ati.

Thangzalam Haokip in aseibe na a Achesa September 13, 2017 nikho in Churachandpur m a Hon’ble CM reception ana kibol ni chun Henglep Lampi semna ding in Dk. Crore 58 Package peh dingin mipi masang’a CM pan ana phongdoh in phat chomkhat jouvin lampi semding thu’a CM toh kaki hou uvin Calcutta a kon Company khat ahung in survey kaga bol uvin lhathum jouvin Detailed project Report achai uvin Estimated Cost Rs 157 Crore avaljeh in hiche DPR chu NRC Shillong leh DONER Delhi a athot uvin ahile approve ahin bol tauvin, Lampi min din “Henglep-Thingkeu Road 31.5 KMS” akitin PWD Chief Enginner pan April 2018 a sempat ding’a ana sei ahi.

Hinlah vangset umtah in “Henglep lampi NEC leh DONER in Approve abol ahin kisem thou thou ding ahi” tia CM pan eina tipeh chu Community khat lungholna a Constituency chom a kichon doh a chuleh Congress Govt. Phatlaija Project ana kibolsa Henglep AC leh Churachandpur AC aum ding Rain Water Harvesting Projet jong Khoirentak Khuman Village, Ukhrul District  Chingai A/C a kichon doh ahin, chiche  thu jong Chief Enginner pa kadoh leh CM pan eichondoh sah ahi ana tin ahi.

Hiche thu’a kenjong NEC Shillong leh DONER Delhi veltampi kana phan chu’a kon thil umdan kahet chet jouvin MLA kachan khompi hotoh CM kheldoh nadin camping kanabol tauvin hinlah Minister mi 3 ho resign bol ding anoplou jeh uvin kanalosap tan ahi.

Hitia Henglep MLA la kahi ngal in hinlah gamsung khantou machalna dia toh ding ho eikilah peh jing hi kagel leh gamsung mipi ahethem lou tampin ei oimo pan tauvin, hitia eiki joulhep jing sanga tia khonung a kei a dingleh gamsung adia phajo ding ham tia BJP leh MLA kadalhah a Congress Lead SPF Govt. Semdoh na ding joh kana support ahi ati.

CM pahi jatle nam khentum nei ahidan kicheh tah in kamun hijeh achu ama nung jui sang’a BJP a ka-hai keu hilouva MLA geija Resign kaki bol chu kei leh ka Constituency mite dia khonung a phajo ding ahitia Resignation kana kibol ahin, BJP Party bou kadalhah a ka MLA hina kaki sipchah kheh’a ahileh Disqualified eibol thou thou diu ahin, Disqualified kibol sang’a Resignation kibol chu kei adia phajo ahi ati.

SPF leh Congress makai CM lui Ibobi Singh in aseina a Floor test ding SPF makaina noiya akiphut toh lhon in Governor in Special Assembly Session akouna ding in Governor henga ngehna akipelut tan, SPF in no confidence motion jo ding aki-kinem in chule Govt. kisemtei ding ahi. Speaker in defected Congress MLA ho chunga dandih loutah a thutanna aneiyin, phabep Rajya Sabha election a vote lhathei loudin disqualified abol in hinlah phabep BJP support dia agel jouse vote lhathei din abol kit in, hiche hi daan toh kikal ahin demna sangtah akineiyin ahi jong ati.

Himanta Biswa Sarma jong Assam State Health Minister khat ahin, i-atile Covid-19 pandemic laitah a Manipur sunga ahung chotlut a COVID-19 SOP jouse palkeh a adeitah a chat thei ham? Chule Congress lamkai 2 hungkholjin ho lah a Paid Quarantine centre a khum ahin chule SOP juisah ahikit hon in ahi tin jong aseiben ahi. Tua BJP Govt. hi minority Govt ahitah toh kilhonna daan toh kitohlou ahitan, hijeh a hi Governor in Special Assembly Session akou tei ngai ahin, ijemtia akoulouva ahile Court a justice kithum ding ahi jong ati.

BJP leh MLA ahina akon resign kibol Samuel Jendai aseina ah BJP hi secular ahilou naban a, Christian sakho dehna a natoh aneijing jeh uva kadalhah ahin chule BJP hi communal party ahi. Christian te dia niloupi December 25 jeng jong Good Governance day tia kheldoh ding agot jingo ahi chule COVID-19 toh kisaiya SOP hi MHA in asem juiding dan ho ahin, i-atile amaho sem mama dan le muol juiding ho chu BJP minister khat in mutheitah a ahung palkeh jeng ham? tin thudoh jong aneiyin ahi.

Dk. cr. 332 lhing fund lamdih louva akiman thu a CBI in CM anahi Ibobi Singh kouna pe

Imphal, June 23(ET): Manipur a COVID 19 pandemic jeh a boina le politics a boina aum laiya CBI hon achesa 2009 le 2017 kum kikah a ‘development fund’ dangka crore 332 lhing alam louva akiman thu toh kisaiya Congress lamkai le Chief minister anahi O Ibobi Singh kouna ape uvin ahi.

Hiche laiya hi Manipur Development Society chairman anahi ahi, tin official hon asei uvin ahi. Central Bureau of Investigation (CBI) team ho Tuesday nikho a gamsung hung lhung u ahi. Official hon CM anahi Ibobi Wednesday nikho teng thudohna anei diu ahi. CBI office, Imphal khopi a akimupi ding uva kouna apeh u ahitai, tin official hon aseibe uvin ahi.

CBI hon achesa November nisim 20, 2019 kum a Singh chule adang dang douna a case ajihlut uva chule Aizawl, Imphal le Gurugram mun 9 jong kholna aneiyu ahi. Thukholna neihon anasei dungjui uva Singh inmun a kon dangka lakh 11.47 sum a chule dangka lakh 36.49 sum lui (demonetized kibol) kikoi amudoh u ahi.

Audi, Mitsubishi, Honda le Hyundai panna a car mantam 8 jong Singh inmun akikholna a kimudoh ahi, tia anaseiyu ahi. Hiche tilouva inmun (house), gam (plot), flat, dukan, car chule bank account chom chom document hojong Singh inmun chule Manipur Development Society a pang IAS officer anahi inmun a kon kimudoh ahi.

Ningthem Singh inmun a kon CBI hon ‘demonetised’ kibol dangka lakh 10 amu a, chule Imphal khopi a inmun ni lekha (document) toh amu u ahi. Poonia Lawmkunga le Nabakishore inmun a kon property le bank document hojong amu u ahi.

Manipur Development Society (MDS) chairman anahi Ibobi hin June 2009 le July 2017 kum sunga midang dang toh kitho a ‘developmental works’ chepi nadinga kigong dangka crore 518 lah a dangka crore 332 vel hi lamdih louva aman u ahi. CBI hon MDS chairman anahi DS Poonia, PC Lawmkunga le O Nabakishore jong amin pat ahi in, bureaucrats hohi abon uva retired hiu ahitai.

CBI hon FIR ajih nauva amin phah u official adang ni hi MDS a project director anahi Y Ningthem Singh chule administrative officer S Ranjit Singh jong pang ahi, tin thulhut in aseibe in ahi. Ngohna kisemkhum adang hojong thudoh dinga kouna apeh vahdiu ahi. Manipur government in ngehna anei jeh a CBI hon case ajih lut ahi.

N Biren Singh lamkaina BJP sorkar a kon MLA phabep in haina aneiya, Ibobi Singh lamkaina noiya sorkar sem dinga Congress hon ‘claim’ abol ni phabep jouva agency in hitobang action alah ahi. Kal masa a Congress in Governor Najma Heptullah henga sorkar douna a ‘no-confidence motion’ pohdoh nading special assembly session bol dinga ngehna anei nau application apeh lut u ahi.

Northeast a BJP vetkolna neiya Assam Health Minister Himanta Biswa Sarma jong Biren Singh lamkaina coalition government aboithei dinga aum sulham dinga Imphal khopi hung ahi in, BJP lamkaina state sorkar aboi nathei ding aumpoi, tia aseiya chule Manipur a politics thu a boina hi ni ni-nithum sunga suhlhap hidinga asei ahi.

Member 60 umna Manipur Legislative Assembly a BJP hi 18 a nemsuh ahitan, lawmaker adang 5 tosotna aneiyu ahi.

Manipur a ‘community transmission’ aumpoi, tia sorkar in sei

Imphal, June 23(ET): Manipur sorkar in gamsunga Covid 19 community transmission aumpoi, tin suhthengna thuso anei uvin ahi.

Additional Director, Public Health, Manipur, Dr L Arke Singh in Tuesday nikho a gamsunga ‘community transmission’ aumpon chule state sorkar in Covid 19 natna achal vetkol nadinga abol thei chan abol ahi, ati. Bishnupur le Churachandpur district a achesa Monday nikho a medical officer ni panna a frontline worker 5 Covid 19 positive ahi e, tia report aum jouva mipi lah a lungkham lungjinna um ahi.

“Covid 19 natna neiho lah a um healthcare worker ho coronavirus positive ahiuve tia thulhut umhi atah ahinai. Ahivanga RIMS le JNIMS a natna nei mi tamtah kijen ahi in, hijong le tuchan geiya hiche hospital ho a natong healthcare worker natna neiya koima kisei lou ahi”, tin Dr Arke in aseiyin ahi.

Tu le tua gamsunga sample 6000 vel test bol dinga um nalai ahi. Health Ministry in test kibol jou loulai sample hohi kal khat sunga bol jou dinga jong kitepna anei ahi. Quarantine centre a um dan juilou ho jeh a case tam cheh cheh ahi, tin Dr Arke in ngohna aneiyin ahi. “Quarantine centre a um mi tamtah hi natna lah a um a chule positive ahiuve ti akihe in ahi. Hijong le atamjo hin sorkar in asem protocol ajui lou ahi”, ati.

Sample kilahna le test kibol thu a Dr Arke in, JNIMS le RIMS a testing capacity hi nikhat a 2000 a kon 2,300 chan test bol thei dinga kikal sah ahitai, ati. Monday ni a agom a sample 2,343 test kibol a, hiche lah a sample 1,221 hi VRDL, RIMS a test kibol a chule sample 1,122 hi VRDL, JNIMS a test kibol ahi. Tuchan geiya sample 38,286 test kibol ahitan, hiche lah a positive case 921 um ahi, tin state surveillance officer Dr L Tomcha Khuman in aseiyin ahi.

Manipur a tua hi active case 663 um a chule natna nei mi 258 kijen dam ahitai. Alangkhat a Tamenglong a case 105 alhin toh kilhon a gamsunga natna akisei tamna pen Churachandpur district (102) akhel ahitai. Chule Jiribam district a Covid 19 case lhom pen nalai ahi.

Manipur a Covid-19 natna vei case 921 lah a active case 663 um

Imphal, June 23(ET): Covid-19 common control room thulhut khat in aseina achun Manipur a covid-19 natna case 921 umna lah ah active case 663 aum e ati. Tuni chun case thah 23 akimudoh be in amauho chu Senapati akon mi 11, Imphal West akon mi 6, Chandel leh Kangpokpi akon mi 2 cheh, Ccpur leh kakching akon mi 1 cheh ahiuvin ahi. Abon uvin covid-19 care mun a kijen ding in akipolut tauvin ahi. Alangkhat ah Imphal West akon mi 5, Noney akon mi 2 chule Kakching akon mi 1 hon damna anei utoh lhon in discharge ahi tauvin ahi. Manipur gamsung a covid-19 akon damdoh mi 258 aphatan a percent a vet in 28.01 pc ahi.

June 28 teng gamdang a um gamsung miho train a Jiribam Railway station hunglhung kit diu

Imphal, June 23(ET): Ahung lhung ding June nisim 28 nikho a kon gamdang a tangden gamsung miho kipohna train Jiribam Railway station hung lhung pan kit ding ahitai, tin thulhut in aseiyin ahi.

Hetthei khat chu NHIDCL in special train ho ahung lhun nading nikho- June 28 kah a NH 37 juiya munchim na mun ho a lamlen kisem (diversion road) hi kijou manlou ding ahi, tia aseiyu ahi. Jiribam station a lhung train a tou passenger ho pohna dinga Imphal langa kon Jiribam jon a che bus hohi June 28 masanga alhun ngai ahi.

Special train ho ahung lhun masat a chule Imphal a kon mi pohna ding bus ho hunglhun avaigei a ahile gamdang a kon hung kile ho Jiribam a alhun nadiu hi hahsa val ding ahi, tin thulhut in aseiyin ahi.

BJP lamkai ho kimupi ding’a NPP MLA 4 hon Delhi jon tao

Imphal, June 23(ET): BJP lamkaina state sorkar a kon haina nei National People’s Party (NPP) MLA 4 ho Assam Minister Himanta Biswa Sarma toh Tuesday nikhon Centre a BJP lamkai hotoh kimuto din Delhi jon a ache tauvin ahi. Tuchana NPP hon Manipur  BJP support abolnau alahdoh u thua adinmun u akhel lou jeh uva Delhi a kihouna nei dia kipui u ahi tin Himanta Sarma in aseijin chule kiboina hi kiseilham teidi ahi tinjong akinepna thu aseijin ahi. NPP legislator li holah a hi deputy chief minister anahi Y Joykumar Singh jong pang ahi in, Prime Minister Narendra Modi le Home Minister Amit Shah akimupi diu tahsan ahi, tin thulhut in aseiyin ahi. Thulhut dungjuiya, North East Democratic Alliance (NEDA) convener jong hi a Sarma hi Tuesday nikho a Imphal khopi hunglhung ahi in, Manipur politics aboi jouva gamsung ahung na anivei channa ahi.

Achesa Monday nikho a Sarma in Manipur boina hi nithum sunga suhlhap dinga kitepna anei ahi. Government a kikhelna (architectural change) umding ahi, tia asei ahi in, ahivanga itobang kikhelna umding ham ti aseilou ahi. Manipur a tua sorkar huhdohna dinga party ani in lunggel anei thusoh thah in avetsah ahi.

Ahivanga, NPP Manipur unit chief Thangminlien Kipgen in tu masanga thuso miho akihoupi na a, N Biren Singh lamkaina coalition government tosot tahlou dinga party in kigel lhahna anei kikhel louding ahi, tia anasei ahi. Biren lamkaina sorkar hi change vaipo, chule democracy juilou ahi, tia jong ngohna anei ahi.

Manipur a BJP MLA 3 panna a legislator 9 in coalition government kisemna a kon haina anei jouva NPP in BJP lamkaina sorkar tosot tahlou dinga thuphon aneiya, chule SPF noiya Opposition Congress toh kikhut jopna jong anei ahitai. NPP legislator hohin Centre a BJP lamkai hotoh kihouna a pang dinga kouna apeh jouvu, tua hi Ibobi Singh camp adalhah u ahi.

Koide Union a President Solomon khangthah mi gup in bulu

Imphal, June 23(ET): Tuni jingkah 8:30 don chun Koide Union a President Solomon chu Shajouba khusong kom ah khangthah mi 6 in ana bulu uve tin thulhut akimun ahi. Hiche mun chu Tadubi PS akon km 20 a gamlha ahi. Hiche thilso jou chun Khoide khosung mihon Shajouba khosung mi khangthah 2 chu amanden uvin ahi. Hiche thu chu Shajouba khosung mihon ahin het phat un akiman teni chu lhadoh ding in asei uvin khosung teni kikah a boina asohdoh kigo in ahi.

Addl SP Rocky MPS makaina in SDPO Mao leh OC Tadubi in thilsohna mun chu adellut uvin ahi. Athu kholchilna anei dan uchun Biisho a gam behkhat chungthu jeh ahi in kiboina chungthu seiding in NPO Senapati, Paomei Union, Mao Council ho jong amun alhung tauvin ahi. President pa buluna a  lamkai kiman teni jong khosung teni kihetthem najeh in lhadoh ahi lhon in chule gam chungthu chu aban a kihouna a aseiding in akoi uvin ahi. Hiche area vengtup ding in Tadubi PS akon team khat nganse ahi tauvin ahi.

Mizoram a ni thum kijom a ling kihot

Aizawl, June 23: Ni thum kijom in tuni in Mizoram a ling an akihot kit in ahi. Hiche ling chu 3.7 magnitude ahi akiti. Tuni ling kiho chu amsa teni sang in ahat mo jep in tu chan in athi amang um thu akiseipon ahi akiti. Hiche ling chu Serchhip district sung a um Thenzawl mun a hung kipan ahin Aizawl a jong an akihot in ahi akiti. Hiche ling epicentre chu Thenzawl akon km 39 lam a gamla mun a hung kipan ahin, km 25 lam a thuh ahi akiti. Hetthei khat chu achesa ni 2 sung a jong Mizoram sung a ling an akihot a inn tamtah le lampi ho jong asuh set ahi. Muntincrack che toh lhon a chuh lai ahi toh lhon a mun chim hung umding in jong ginmo na akinei in ahi. Champhai a kihot ling chun inn phabep le hou inn 2 jong ana suh set ahi. Alangkhat a thuso kimu dungjui in ahunglhungding ni 5 sung a Mizoram sung a go hatah a ju ding ahi akiti. Go hajuh ding toh lhon a ling in aho set na mun ho mipi ho chingthei tah a aum ding uva hetsah na ana kinei ahi tan ahi.

 

KSO Ccpur in ‘KSO Unity Day’ kingon mang

Ccpur, June 23(ET):  Kuki Student’s Organisation Churachandpur in tuni nilhah lang chun ‘KSO Unity Day’ kingon chu KSO Complex, Tuibong ah amang uvin ahi. Hiche kingon in ana umtalou Haokip Students’ Organisation a President Palal Haokip geldohna a akimang ahi. Hiche kingon achun KSO a executive member hon pan ala uvin Palal Haokip in adamlai a anatoh phatho geldoh thah kitna phat anei uvin chule kitilkhouna phat in amang uvin ahi. KSO Ccpur a President NJ Haoneo Baite in aseina achun simlai kiloikhomna jeng hijong le nampi natong khat a kipehdoh ho ihiuvin lunglha dailou hel a Kuki mipi ho ding a na itoh ding uh ahi in, Inam sung uva kichamna, kihetthem tona, kitosotna chule kideisahna aumtheina ding a pan lading in tilkhouna thucha asei in chule masang a tohding thamding tampi um ahitoh lhon a ki nganse tolou a katoh manlou khah ding ahi ti lunggel put a kithaset louhel a nampi na tongding in asei in ahi. Tuni a kingon achun Covid-19 jeh a dan juiding kipe ho kitupsel a juitoh kop in kingon amang uvin ahi.

CCpur Dist. a Covid-19 Positive Case thah 8 kimudoh; Positive Case kihedoh ho podoh louva nidan 24 Centre a kikoi

B.Lalboi Gangte

CCpur. June 23 (ET) : Churachandpur District sung’a nidan 36 sung in Covid-19 positive case thah mi 8 akimudohbe in ahi. Hiche ho lah’a chun District Hospital a natong Nurse 2 jong anajao lhon in ahi. District Hospital a natong Nurse teni hi khat kum 26 leh khat kum 31 ahi in amani hi Grace Bible College, Dorcas Road ah Quarantine aum ahi. Adang hohi St. Mary’s School, Tuibong aum Quarantine akon pasal kum 21 leh kum 29; Bunglon CQC akon kum 1 pasal; JNV Tuinom CQC akon numei kum 29; St. Paul’s Institute IQC akon numei 2 kum 22 cheh ahi. Tuni chan’a CCpur District sung’a positive case 103 alhing tan ahi.

Hiche toh lhon’a CCpur District akipat Positive Case thah 8 kimudoh ho koina ding mun toh kisai anongkai jeh in District Administration leh Medical Dept. lang in angaito nung uvin District Hospital ah Isolation ward ah June 22 jan nidan11:20 chan in mi 8 ho anakoilut tauvin ahi.

Alangkhat’a Quarantine Centre aum returnees kimkhat in asei na’a positive thah mi 8 ho June 21 nilhah’a Positive ahi vang uvin nidan 24 sung apodoh ding Ambulance ahung lou jeh in aum nao Quarantine Centre ah angah den uvin ahin June 22, 2020 jan nidan 11:20 vel in positive patient ho podoh ding ambulance ahung pan bep in ahi ati. District Hospital in CM Biren Singh panlah na noi’a Ambulance hoitah khat anei in chuban’a District Administration in jong NHPC akipat Ambulance khat apoimo dungjui’a mancha ding in jong anepedoh uvin ahi. Hiche Ambulance teni tilou Mortuary van khat jong aum vang in Positive patient ho podoh ding’a Ambulance kining lhing louva aum lamdang asahdan thu aphongdoh uvin ahi. Quarantine vekol Doctor leh Nurse ho kipum pehna chung’a pachat na ape uvin ahi.

Hiche toh lhon’a Covid-19 positive patient khat Isolated hi jong leh nidan  24 val akoi namun ding uva koi’a aumlou hi akisaipi thu nei hon angaisah lou’u ham tijong hi returnees kimkhat in aphongdoh in ahi. Chuleh Positive kimudoh na mun Quarantine Centre aum returnees dang ho ding’a lungthim nop louna alhut lo tan ahi ati.

Sorkar in order asodoh alahdoh dinga UARSom in thumna nei

IMPHAL, June 23: United Association of Recognized Schools of Manipur (UARSom) in gamsunga CBSE le COHSRM affiliate hi a private school a higher secondary class simlai ho enrollment kho ngai sah dinga order kisodoh sorkar in alahdoh dinga thumna anei uvin ahi.

Simlai ho a kon fees lahlou ding ahivanga jingkung ho lha lo peh dinga order kisodoh hi private institution khatcha a hithei lou ahi, tin association in Kindergarten Montessori School, Takyel a Tuesday nikho a press meet abol nauva asei uvin ahi.

UARSom President L Joy Singh in ahoulimna a, sorkar in gamsunga education system a private school ho panlahna hi amu peh lou tobang ahi, tin aseiyin ahi. Private school hohi school khatcha aum louna thinglhang gamlha tah tah a jong um ahi in, private school a kon simlai hetthei umtah tah kisep doh a, government school a kai simlai ho sanga akisem doh tamjo ahi, ati.

Sorkar in kikhopna le kin gon abolna ho a private school authority, jilkung chule simlai hon lockdown sunga hahsatna ato ho suhlhap peh ding go louva alangkhat thu bou asei uve, tin aseibe in ahi. Mopohna nei authority le minister hon private school jouse a student data alahkhom dinga sorkar in thuso anei thudohna anei uvin, admission le registration process akikha jeh a admission le registration one third processing che loulai ahi in, teaching le non teaching staff ho lo pehna a lhahsamna um ahi, ati.

Sorkar in order alahdoh dinga UARSom in temna aneiyin, authority hon school authority, teacher le private school a guardian ho dohna nei masa lou chule kihouna sem louva thulhuhna anei hohi non-applicable ahi, ati. Chule private school panlahna sorkar in hetpehna anei dinga association in temna aneibe uvin ahi.