Healthcare worker ho thet bol lou dinga CM in avel a sei...

Healthcare worker ho thet bol lou dinga CM in avel a sei kit

87
0
SHARE

Healthcare worker ho thet bol lou dinga CM in avel a sei kit

Imphal, August 25 (ET): Chief Minister N. Biren Singh in Chief Minister’s Secretariat a Tuesday nikho a pandemic sunga mihem hinkho huhdoh nadinga ahinkho boina thei dinmun a koiya pan la a healthcare worker ho thet bol a bungkhen lou dinga gamsung miho henga temna aneiyin ahi.

Sorkar in natna a kon mihem hinkho huhdoh ding hi agel khoh pen ahi, tin CM in aseiyin, dinmun hi vetkol jou ahi, tin gamsung miho amoh kichat lou diuvin aseiyin ahi. Vaccine akisem doh kah a virus toh hinkhom je het ngai ahi, tin aseiyin chule gamsung mihon sorkar in asodoh guidelines leh SOP ho ajui diuvin ngehna aneiyin ahi. Chule ‘asymptomatic patient’ ho abon uva doctor supervise noiya ‘home isolation’ a umthei dinga sorkar in order asodoh ahitai, tin jong aseiyin ahi.

Sorkar in kivenna leh kiginna dinga pan alah toh kilhon a gamsunga Covid-19 natna achal jing hi asuhnem thei ding ahi, ati in chule CSO, police, health worker chule nat douna dinga tosotna pe a gamsung miho chunga kipathu aseiyin ahi. Private hospital ho panna a sorkar in adamlou kivetsah a che ho hospital a admit akibol masang uva Covid-19 test abol thei nading uva Rapid Antigen Testing kit sorkar in hospital ho apeh ahitai, tin jong hetsahna aneiyin ahi.

Manipur a active case 1608 lah a case 800 vel hi paramilitary personnel ahi in chule case 800 vel hi milham ahi, tin CM in aseiyin ahi. Chule gamsunga recovery rate hi 70% vel hi ahitan, state chule national average sanga sang jo ahi. Natna jeh a thi hi gamsunga 0.4% ahi in, national average a 1.9% ahi, tin aseibe in ahi.

Gamsunga paramilitary personnel ho lah a case akal cheh cheh chungchang a thudoh Chief Minister in adonbut na a, jing nikho teng leh CAPF a lamkai luboh ho toh kihouna kanei uva, amaho unit in sepai ho lah a natna achal lou nadinga itobang pan alah uvem tiho velvetna umding ahi, ati. Union Home Minister in phat chomkhat sung hi gamsunga CAPF transfer leh posting akhongai dinga state sorkar in ngehna anei ahi, tin adonbut in ahi. Chule inter-state leh intra-state a lhai gari chule miho dinga SOP kisodoh ding ahi, tin jong aseibe in ahi.

Xxxxxxxx

Myanmar gam a pansa thingnoi hotoh India sorkar in SoO soi akai vohhai dinga Haomee Federation in thumna nei

Imphal, Aug 24(ET): Federation of Haomee in Monday nikhon gamdang a um thingnoi kiloikhom hotoh Suspension of Operation (SoO) soi kaiya Manipur gam hi gamdang miho kul a Congress sorkar masa in asemdoh ahi, tin ngohna aneiyin ahi.

Federation of Haomee in thuso anei nauva, Congress sorkar in Myanmar gam a um chule Myanmar gam mi ho lamkaina KNA/ZRA thingnoi kiloikhom hotoh SoO soi akai jouva Myanmar gam a kon Maynmarese ho gamsunga hunglut uva, thinglhang mun chom chom a cheng u ahi in, gamsung mi dihtah ho hinkho boina thei dinmun a akoi ahi, tin ngohna aneiyin ahi.

KNO President PS Haokip hi Molnoi, Saigang Sub-division, Myanmar a kon ahi in, hiche jouva Kukidalong, Nagaland a um a, SoO soi kaina aum jouva hiche hi phat gomkom a aman a Churachandpur, Manipur a cheng ahi, ati.

Ipijeh a Congress sorkar masa in KNF/KNO/UPF/ZRO/ZRA leh Myanmar gam mi dang dang lamkaina Myanmar a pansa thingnoimi ho toh SoO soi akai uham, ti tua sorkar in akhol dinga asei uvin ahi. Gamdang thingnoi hotoh SoO soi kaina aum jouva Manipur hi 2nd Golden Triangle a kisemdoh ahitan, tua sorkar in SoO hi suspend abol ding ahi, tin thuso a aseibe uvin ahi.

Myanmar gam mi ho Manipur politics a akikum adei lounau thu asei uvin ahi. “Amaho hin lhangphong tah a eiho mun theng Thangjing leh Koubru hi kagam u ahi, tia asei pan uva chule Manipur thusim thah jih a thusim masa suhset ding agot u ahi. Anglo Kuki War (1917-1919) toh kisaina neiya I leng u Taothingmang hi Kuki leng aso u ahitai”, tin Haomee Federation thuson aseiyin, Myanmar gam a pansa thingnoimi hotoh SoO kisem avohhai uva chule gamsunga cheng gamdang miho sorkar in akholdoh a, agam a anungsol dinga thumna aneibe uvin ahi.

xxxxxxxxxxx

Chief Minister N. Biren Singh New Delhi a kon Amit Shah toh kimuto louva hung kile ta; Bihar election toh by-election bol khom dinga sei

Imphal, Aug 24(ET): Chief Minister N. Biren Singh Monday nikhon Union Home Minister Amit Shah toh kimuto talouva New Delhi a kon ahung kile tan, ahin, nilhah nidan 3 don a Bir Tikendrajit International Airport a kon ahungdoh a chun lungkham louhel a aumin ahi.

Manipur Legislative Assembly leh Congress party a kon Congress MLA adang 5 toh haina neiya Abdul Nasir hi lamkai adang 5 ho tobanga BJP a alut lou vanga, ama jong CM pa hung kile na lenna ma ma a tou ahi. Chule state Congress party in party a kon anodoh MLA RK Imo jong hiche lenna ma ma a tou ahi.

Chief Minister N Biren Singh in thuso miho akihoulim pi na a, party sunga kihetkhel na jouse suhlhap ahitai, tin aseiyin chule BJP in by-election tet dinga kigotna anei ahi, ati. BJP a lut hon by-election tet nadinga BJP ticket amu diuham, tia thudoh anei uchun CM in party ticket koi peh ding ham tihi Centre a lamkai ho khut a kingam ahi, tin adonbut in ahi.

Congress MLA a kon haina nei ho hi Centre a lamkai ho toh kihet to sah a chule lunglen tah a pan alah u party lamkai ho hetsah dinga kache ahi, ati. Chule MLA hon haina anei jouva a ong a um assembly constituency a by-election hi Bihar gam a umding election toh thakhat a kibol ding ahi, tin jong CM in aseiyin ahi.

Alangkhat a, Congress party a kon haina neiya MLA anahi Abdul Nasir hin Independent candidate a election atet ding tahsan ahi. MLA a kon haina neiya adang 5 ho tobanga BJP a alut louvanga Chief Minister tosotna amu louding tina ahipoi, tin political observer hon asei uvin ahi. Hijong leh election atet ding dan hi Lilong Assembly constituency a ama worker ho thulhuhna dungjui hiding ahi.

Chule Congress party a kon kinodoh MLA RK Imo in political party adang ajop ding thu asei doh lou ahi. Hijong leh, Chief Minister Biren hi ajinu pa (father-in-law) ahijeh a BJP a lut ding ahi, tia thulamleng tamtah kisei ahi.

Xxxxxxxx

India sorkar in NSCN-IM toh kihoulhah na anei masanga gamsung miho ngaidan alah masat ding ahi: UCM

Imphal, Aug 25(ET): United Committee Manipur (UCM) in NSCN-IM toh India sorkar in ‘peace agreement’ asem hin Manipur gam atohkhah a ahileh thulhuhna anei masang uva Manipur gam mi ho dohna anei masat ding uva India sorkar henga temna anei uvin ahi.

“Tuchan geiya gamsung a cheng khom nam chom chom ho ngaidan kila loulai ahi. Hiche jeh a Manipur gam akitohkhah na aum dinga ahileh thulhuhna anei masang uva gamsung miho lunggel doh ngai ahi. Kihoulhah na anei jou uva Manipur mi ho ahet sah tho uva ahileh gamsung mihon asan louding ahi”, tin UCM in aseiyin ahi.

Achesa 2001 kum a mipin kiphinna sangtah anei jouva India sorkar in NSCN-IM toh hemkham kinoptona soi akaina a ‘territorial limit umlou’ kiti thucheng hi alahdoh ahi. Manipur governor anahi Ved Maruah leh Home Minister anahi LK Advani in Manipur gam mi ho henga hemkham kinoptona hi Nagaland gam a bou ahi, tia hiche phat laiya ana sei ahi.

NSCN-IM toh India sorkar in ‘Framework Agreement’ soi akai na NSCN-IM hon mipi het dinga asei nauva hi Manipur gam hilouva Nagaland gam kiti ahi. Chamna sem nadinga India sorkar in NNC leh NSCN-IM toh kinoptona asem a, Nagaland thu bou aseiyu ahi in, Manipur gam kisei lou ahi. Hiche ho jouse jeh a kihouna chaina asem nauva ‘Manipur’ gam hi itobang lampang hijong leh apan a ahileh gamsung miho hetsahna nei masat a chule ngaidan doh masat ding ahi, tin UCM thuson aseiyin ahi.

Naga hon ‘unique history’ aneiye tia aseiyu hi ipi kiseina ham India sorkar in suhthengna anei dinga UCM in temna jong aneiyin ahi. “India sorkar in avel vel a Naga thusim achombeh ahidan aseijing hi hilchenna aneidiu ahi”, ati. Chule Manipur gamsung (integrity) leh gamsung kipunkhomna akitohkhah na aumle thilse soh ding ahi, tin aseiyun chule gamsung huh nadinga state sorkar in pan sangtah alah louva ahileh gamsunga sorkar nei lo umlou ding ahi, tin aseibe uvin ahi.

Xxxxxxxxxx

State Home Department in ‘Unlock’ a Guidelines 3 jui jom dinga order so; Mipi kikhopna kin-goun ho kikhah jom ding

IMPHAL, Aug. 25(ET): Manipur Home Department in ‘Unlock’ order asodoh in, hiche order a hi achesa July nisim 29 nikho a guidelines kisodoh 3 a akikhah ho che jom pi dinga kisei ahi. Social, politics, sports, entertainment, cultural, hou thu chule mipi tamtah kikhop na kin gon ho kikhah jom dinga Tuesday nikhon asei uvin ahi.

Akiphal/aki lha ong hi golvah na a mipi kikhopna chule thi vuina kin ho bou ahi in, ahivanga kin a pang ding hi ajat kisem a chule Covid-19 management in jui dinga asei ho khoutah a jui ding ahi, ati. Manipur gam a cluster transmission aum jeh a Covid-19 nat achal louna dinga hitobang kikhopna hohi kichat um ahi.

Disaster Management Act, 2005 section 20(2) noiya State Executive Committee Chairperson, State Disaster Management authority a tha kipe dungjuiya Chief Secretary Rajesh Kumar in avel a ‘ban’ kibol ho phondohna anei kit ahi in, golvah na kin a atam pen a mi 40 akikhop ding ti louva akisei masa kin goun dang dang ho kikhah ahi.

Deputy Commissioner/SP hon guidelines ho akipal keh louna dinga phatah a avet kol diuvin thuhilna aneiyin, koi tobang dan palkeh aumleh Manipur Epidemic Diseases Enforcement of Covid 19 Guidelines regulation 2020 toh kitoh a gotna kipe ding ahi, ati. Dan dungjuiya akiphal jat kalval a mipi akikhop a ahileh dangka 10,000 leu ding (got man) chule mipi lah a face mask kibol lou leh social distancing jui lou ho dangka 200 leu ding chule guidelines dang dang palkeh ho dangka 1000 leu ding ahi.

Chuleh dan kipal keh na hohi media/social media leh adang dang a notice kipe a, kilom tah a action kila ding ahi, tin Chief Secretary leh Chairperson, State Executive Committee, Dr Rajesh Kumar in aseibe in ahi.

Cxxxxxxxx

Manipur a Covid-19 natna nei mi 2 thi be, natna a thi mi 24 lhingta

Imphal, Aug 25(ET): Manipur a Tuesday nikhon coronavirus natna nei numei ni athi be kit in, hiche toh kilhon a gamsunga Covid-19 positive thi na toh mi 24 lhing ahitai.

Athi teni hi kum 41 leh kum 73 a upa ahi lhon in, Regional Institute of Medical Sciences (RIMS) Hospital COVID 19 Facility, Imphal a kijen lhon ahi. Tuchan geiya Manipur a Covid-19 jeh a thi kisei ho lah a Imphal West district mi 8, Thoubal mi 5, Imphal East mi 3, Kangpokpi district mi 3, Chandel district mi 3 chule Churachandpur leh Bishnupur district mi 1 cheh pang ahi.

Achesa nidan 24 sunga Manipur a Covid-19 positive case 82 akimu be in, hiche lah a mi 9 hi CAPF personnel hi a chule adang 74 hi milham ahi. Covid-19 positive case tuchan a 5,444 lhing ahitan, hiche lah a milham 4,013 leh CAPF 1,431 pang ahi.

Natna nei kihet be milham 74 ho lah a Churachandpur 1, Bishnupur 2 leh Chandel mi 1, agom a mi 4 hi bou gamdang a kon hung kile ho ahi, tin Additional Health Director Dr K Sasheekumar Mangang in aseiyin ahi. State dang a kholjin hilou adang mi 70 ho lah a Imphal West 38, Imphal East 7, Thoubal 10, Bishnupur 11, Churachandpur 3 chule Chandel district mi 1 pang ahi.

August nisim 25 nikho chan a gamsunga recovery rate hi 70.02 percent lhing a chule achesa nidan 24 sunga Covid-19 natna nei mi 99 dam doh ahi. Gamsunga natna a kon damdoh jat hi tua 3,812 lhing a chule active case 1,608 um ahi.

Alangkhat a, Unlock 3 a dinga thupeh (directive) thah kisodoh dungjuiya, social, political, sports, entertainment, religious, academic leh cultural toh kisai kin goun ho kikhah nalai ding ahi. Golvah leh thi lhahna kin bou kiphal ahi in, ahivanga mi atampen a 40 kal kikhom theilou dinga dan kisem ahi. Dan palkeh ho dangka 10,000 leu ding chule face mask bol louva, social distancing jui lou ho dangka 200 leuding, guidelines dang dang palkeh ho dangka 1,000 leu dinga order kisodoh ahi.

Xxxxxxxxxxxxxxx

Transport Ministry in December 31, 2020 chan gari document ho validity ‘extend’ bol dinga thuso nei

Imphal, Aug 25(ET): Road Transport and Highways Ministry in Covid-19 pandemic jeh a February 1 a expired hi a angaicha motor vehicle document ho athum vei channa dinga aphat asuhsao be in ahi.

“Fitness validity, permit, licence, registration leh Motor Vehicles Act, 1988 leh Central Motor Vehicle Rules, 1989 noiya document adang dang ho validity Road Transport and Highways Ministry in December 31, 2020 chan man thei dinga aphat suhsao be na thulhuhna anei ahi”, tin thuso aneiyin ahi.

Ministry in tu masanga Motor Vehicles Act, 1988 leh Central Motor Vehicle Rules, 1989 toh kisai document validity hohi achesa March nisim 30 chule aban a June nisim 9 nikho a validity kichai hohi September nisim 30 chan extend bol dinga Covid-19 pandemic jeh a thuso ananei ahi.

“Gamsunga Covid-19 pandemic achal jing jeh a achesa February 1, 2020 a kichai akisei document jouse validity extension hi December nisim 31, 2020 chan ‘valid’ a kila ding ahi. Enforcement authority hon December 31, 2020 chan hiche toh kisai document ho valid a alah diuva thuhilna kinei ahi”, tin Ministry thuso chun aseibe in ahi.

Xxxxxxxxxx

FEGOCTA in 7th Pay order kisodoh kahse a natoh pat lou dinga sei

Imphal, Aug 24(ET): 7th UGC Pay and Regulations, 2018 phatsah dinga Chief Minister, Deputy Chief Minister leh Cabinet Minister dang dang in phatsahna anei Federation of Government College Teachers’ Association Manipur (FEGOCTA) in Tuesday nikhon akipapi na thu aseiyin, employee ho DA panna a boina thu ho asuhlhap a chule 7th UGC Pay and Regulation 2012 chepi dinga order asodoh jouteng leh bou government college teacher hon online class chule themjilna toh kisai natoh ho apat ding ahi, tin asei uvin ahi.

“FEGOCTA, MGSF, MSSA chule Manipur employee association adang dang in lungkhat tah a thulhuhna anei ahi”, ati. 7th UGC Pay and Regulations, 2018 order sodoh a, DA panna a natong ho boina aganna thei pen a asuhlhap diuvin FEGOCTA in temna aneiyin ahi.

NEP, 2020 chungchang a Human Resources Development minister anahi Prakash Javadekar henga ‘feedback’ akipeh lut jouteng federation in ‘NEP 2020 and Manipur’ thu a discussion agon a, recommendation ho centre chule state sorkar henga apehlut ding ahi, tin FEGOCTA in aseibe in ahi.

Xxxxxxxxxx

India a Covid-19 case 60,975 akimu be toh kilhon a natna nei lakh 31 val ta; Natna a thi 58,390 lhingta

New Delhi, Aug 25: India gam a achesa nidan 24 sunga coronavirus case athah 60,975 akimu be jouva Covid-19 positive case agom a 31,67,323 alhing tan, chule natna a kon dam doh 24,04,585 ahi toh kilhon a recovery rate jong 75.92% lhing ahitai, tin Union Health Ministry data in aseiyin ahi.

Nidan 24 sunga mi 848 athi be in, natna a thi agom a mi 58,390 alhingtai, tin jingkah nidan 8 chan a update kibol data in aseiyin ahi. Covid-19 case fatality rate hi tua 1.84 per cent a nem suh ahitai. India gam a agom a coronavirus active case 7,04,348 um ahi in, total caseload lah a 22.24 percent tina ahi.

Achesa August nisim 7 nikho a India gam a Covid-19 positive case hi lakh 20 ana val ahi. ICMR in asei dungjuiya August nisim 24 nikho chan geiya agom a sample 3,68,27,520 test kibol ahitan chule Monday nikho a bou sample 9,25,383 test kibol ahi.

Athah a natna a thi kisei ho lah a Maharashtra gam mi 212, Karnataka 127, Tamil Nadu 97, Andhra Pradesh 86, Uttar Pradesh 61, West Bengal 57, Punjab 43, Jharkhand 18, Madhya Pradesh 17, Delhi leh Gujarat a 13, Rajasthan 12 chule Kerala gam mi 11 pang ahi. Assam, Haryana leh Odisha a mi 10 cheh, Chhattisgarh leh Telangna a mi 9 cheh, J&K leh Uttarakhand a mi 7 cheh, Puducherry leh Tripura a 5 cheh, Goa 4, Bihar 3, Andaman and Nicobar Island a mi 2 cheh jong thi ahi.

Covid-19 positive hi a thi na toh a hop 70 val hi natna dang dang nei khom jeh ahi, tin health ministry in aseiyin ahi.

XXXXXXX

CBI kholchil na kichai masang a MPSC in exam abol got simlai kiloikhomna phabep in demna nei Imphal, Aug 23: Manipur sung akon simlai kiloikhomna thum in CBI kholchil na kichai masang a MPSC in 2016 batch ho main exam bolding tohgon anei demna sangtah anei uvin ahi.

Hiche themvetna kibol kigo hi Manipur High Court in jong phalna ana peh ahi tah lou ahidan jong Democratic Students Alliance Manipur (DESAM), Apunba Ireipak Manipur Sinpanglup (AIMS) le All Naga Students’ Association, Manipur (ANSAM) in thuphon anei uvin ahi. CBI kholchil na kichai masang a hitabang themvetna kinei kigo hi tot na toh akilou in, angai bang a amin mei mei a kibol toh thakhat hiding ahi tin kiloikhomna thum ho akon thuso kimu chun asei in ahi.

August nisim 14 nikho a MPSC in 2016 batch ho main exam ahunglhungding October November lhasung a bolding a thuso ana nei u ahi.  MPSC in kholchil na kichai masang a themvetna boldinga thuso ahin nei uhi thil kidang tah ahi tin kiloikhomna ho chun hetsah na ahin nei uvin ahi. Exam bol na ding a MPSC in angicha ding dol le bol ding a lom jouse abolchai utam tin jong simlai kiloikhomna ho chun thudoh ahin nei uvin ahi.  MPSC in ipi ding a kholchilna kinei ngah doh lou a hitobang tohgon aneiham, hetlou a thanei na kijah na tohgon che ham tin jong thudoh anei uvin ahi. Hetthei khatchu achesa 2016 examination a lolhing ho ana kikah lhah toh lhon a natoh na ana jom mi 82 lam ana toh na akon anakikah lha u ahi.

Xxxxxxxx

NEP 2020 chungchang kihoukhomna chelha

Imphal, Aug 24(ET): Directorate Conference Hall ah Directorate of University & Higher Education gonna noi in National Education Policy, 2020 chungchang a kihoukhomna chu Education Minister, Dr. Thokchom Radheshyam makaina’n tunichun achelha e.

Minister in thah a kisemdoh education policy hi phatah a gamsung a achelhah thei nadia amasapen a aning akah het them angai e, ati.

Tuni National Education Policy, 2020 chungchang a kihoukhomna hi college principal le hilkung ho ban a higher education ho dia atumbeh a chelha ahi.

Kingon a chun Commissioner Higher & Technical Education M. Harekrishna; Joint Director, University & Higher Education, T. Ojit Singh ho jong apang un ahi.

Dr. Th. Radheshyam in NEP 2020 hi Union Cabinet in July 29, 2020 nia aphatsah a pat gamsung pumpi a ahoipen a chelhahsah nadia kihoukhomna hi chelha jing ahi, ati.

Chule Minister in NEP 2020 hoisel a gamsung a chesah nadia lampi phapen chu toukhom a seikhomna nei jing chu ahipen e, ati.

Tuni kihoukhom sung chun mihil mi 3 a kon NEP 2020 chungchang Power point mang in kihilna jong achelhan ahi.

Xxxxxxxxxxxx

Kikhumtup hi Covid-19 natna chalbe lou nadia kivenna phapen ahi: Dr Santa

Imphal,  Aug 25(UNA): RIMS Director Dr A Santa Singh in patepna manchah a pat natna kichehsel hetdoh ahahsat tolhon a kikhumtup hi natna chalbe lou nadia manchah phapen ahitai tin kikhumtup ho chungchang a dohna khat adonbutna ah aseiye.

Santa in asei be na ah mikhat patepna a natna neilou chu chomkhat jou a patepna a natna nei ana hikit in, manchah hin adihchet apedoh theipon, kikhumtup hi aphapen ahitai, ati.

Santa in aseikit na ah nah le lol a pat natna patepna kibol a natna kive ahi in, akipat til a China ten Wuhan khopi gahtah a akhumtup pai le aphachom in hinla Covid-19 natna in Beijing tongkhalou a America le Italy iti aphahthei ham tin American President Trump in jong kidang ana sa lheh e, ati.

Masang chun henden bou ana kija in kikhumtup thucheng hi atamjo dia akijah masatna pen jong ahinalai e. Abultil a China ten Wuhan khopi akhumtup jeh in akhopi dangse ahoidoh in gamdang bang in China gamsung sum le pai dinmun ase pon ahi.

China in agamsung akhumtup vannoi in ana datmo man in hinla natna umpum in akhosa un aboipouve. Agamsung khumtup louhel hi Sweden ahikit e.

Natna peldoh nadia lha a ijamlut diu hitam, thil hithei ahilou jeh a natna toh hinkhom ngai ahi tia CMC Vellore a agolpa thusei bang a natna pum a hinkhom ding hi lampi khat ahi e tin director chun aseiye.

Director Santa in sensi hi neo a pat natna kihe hijongle khatvei sensi natna neichu avel in sensi nat aneikit poi tia ihet jeh un ikicha pouve. Chule lou kikap hon sensi nat aneikit poi, akiseinom chu natna hise a pat mihem vendoh thei ahi, hichu lou kikap ahi. Hitia chu Edward Jenner in Cow Pox natna lou ana semdoh ahi, ati.

Hiti ho tobang a kon Polio lou jong ana kisemdoh ahikit e. RIMS le JNIMS a Covid-19 natna nei dam a soldoh hiho chu munkhat a umkhom ta le natna chu ahomjal tahlou ding ahi.

Natna nei adamdoh le kihetdoh lou hel a natna nei, chuche lah a 60% lou kikap hochun 40% ho chu natna a pat avendoh thei ahi hichu ‘herd immunity’ concept ahi, ati.

Langkhat a UK louthem hon abultil chun corona hi thupitah in jong ana gelpoi, in a um ding, hospital chelou ding, patepna jong bollou dia ana sei chu athi atam phat in tohgon ana khelkit in, neolai a MMR lou kikap thilpha tah chu tun America in aboltai, ati.

Xxxxxxxxxx

Manipur Chief Minister N Biren in me joh mi 817 ho dia loan homdoh

Imphal, August 25(ET): Natna hise kikhumtup sung a thiljoh thei talou hon tohban ajomthei kit nading in Chief Minister Shri N. Biren Singh in district chom chom a pat me joh mi 817 ho a din tunichun loan ahomdoh pih in ahi.  Lampam a mejoh mi 368 ho chun  Pradhan Mantri Street Vendor’s Atmanirbhar Nidhi – PM SVANidhi noi le thinglhang district a pat mi 14 pum a phalna nei a thiljoh mi 449 ho chu Pradhan Mantri Mudra Yojana (PMMY) – SHISHU noi a pat kithopina peh ahiuve.

Chief Minister in houlim aman na ah achesa March 19, 2020 nia Khwairamband Ima Keithel kahungvil pet a dinmun hung hahsat ding dan ana kisei pet a aphatcha a nu te hon Ima Keithel kha dia thulhuh nanei jeh uva state dang to te kah a Covid-19 dinmun a Manipur hi kipha ahi e, ati.

Lha 5 phatsung a sum le pai hol thei talou a hahsatna nato u akihe in chutolhon a bank toh kihouna kinei a tohban najom thei nadiu gelkhohna a loan hi government hung kigong ahi e tin Biren chun aseiye.

State sung me joh mi 20000 ho loan peh ding hi government tohgon ahi in hitolhon a Union Ministry of Housing and Urban Affairs kom a jong sum kithum ahi, ati.

PM SVANidhi hi kikhumtup phatsung a me joh ho hahsatna sum le pai a kithopi nadia Ministry of Housing and Urban Affairs in June 15, 2020 nia ana hondoh bep, March 2022 gei chelha ding tohgon ahi.

Hiche tohgon noi a me joh khat in tohban ajom thei nadia kum 1 sung a nung sah kit dia Rs 10000 akilah thei diu, phatah le aphatcha a sum nung sah ho lha 3 dan seh le 7% per annum interest Direct Benefit Transfer (DBT) a amukit diu ahi.

Chule kiveimi ho kithopi nadia Prime Minister Narendra Modi in Pradhan Mantri Mudra Yojana (PMMY) – SHISHU hi April 8, 2015 nia ana hondoh ahi. Hiche noi a hi Rs 10000 a pat Rs 150000 chan loan kiveimi hon alah thei diu ahikit e.

Kingon a chun Deputy Chief Minister Shri Y. Joykumar, Health Minister Shri L. Jayantakumar, CAF & PD Minister Shri Karam Shyam, Public Health Engineering Minister Shri L. Dikho, Tribal Affairs and Hills Minister Shri N. Kayisii, Agricultural Minister Shri V. Hangkhanlian, Forest and Environment Minister Shri Awangbow Newmai ban a MLA phachompi jong apang un ahi.

Xxxxxxxxxxxxxxx

MLA ana hisa Khangthuanang in ahunglhung ding election  NPF min a tetding

IMPHAL,  Aug. 25(UNA): 53-Assembly Constituency Tamenglong MLA ana hi  Khangthuanang in ahunglhung ding election hi NPF ticket a tetding ahidan tunichun Namlalong achenna mun ah phondohna anei e.

Khongthuanang in gamsung kikhel nadia angaicha ho komu ding in mipi temna jong anei in, ihamtia by-election achelhah lou khah jong le maban general election tetding ahidan jong aphongdoh kit e.

Government noi a chanvou um ho mipi chansah a khosung le gamsung khantousah ding, lekhathem insung hahsa ho kithopi ding, gamsung kichot mat nadia lampi sem hoi ding le tourism khantousah ding adeisahna jong aphongdoh e.

Aman asei be na ah tuchung hi nga vei MLA election atetna ding ahiban a simlai kiloikhom ho a pat politics hung kipan le tu le tu a NPF Tamenglong Unit mopo jong kahi e, ati.

Xxxxxxxxx

CCpur District a Covid-19 toh kisaia RWUS makai naa Awareness anakibol

B.Lalboi Gangte

CCpur. August 25 (ET): Churachandpur District sung’a Covid-19 natna hit apunbe toh lhon’a Rural Women Upliftment Society (RWUS) lamkai nan tunin CCpur District khopi sung mun chom chom’a Awareness ana um in hiche achun facemask manbei in mipi ho anahoppeh uvin ahi. Rural Women Upliftment Society (RWUS) in jalhang’a khovel’a natna hit Covid-19 toh kisai’a CCpur District a Community Transmission ahung umtoh lhon’a natna akon kivengdoh na ding’a District mipi ho chingthei tah’a akhosah ding leh natna doudalna’a mitakip panmun lentah anei ahidan hettoh sah nading in kholhang sap najong ananei uvin ahi.

Hiche toh lhon’a Awareness chelhah phatsung’a CCpur District sung’a Women Community based organization chom chom tichu Kuki Women Union (KWU), Zomi Mother Association (ZMA GHQ), Hmar Women Association (HWA GHQ) leh Mizo People Convention (MPC Manipur) noi’a Women Wing, District Administration, CCpur Police leh Traffic Control Police hon kithopi najong anape uvin ahi.

Tuni Rural Women Upliftment Society (RWUS) makai na’a Awareness um na mun ho chu Tuibong Bazar, Police Station, New Bazar-red cross Road, New Lamka Traffic junction leh Rengkai bazar ho ahi. Hiche phatsung in Covid-19 akon kivengdoh ding in mipi ho temna anei uvin chule Facemask kibol lou hoheng’a Facemask ape uvin ahi. Rural Women Upliftment Society (RWUS) hin CCpur District a Covid-19 natna toh kisai amaho office, Sielmat ah Awareness leh Seminar anei jing naban’a Covid-19 toh kisai’a Frontline worker, Medical Department, Police Department, ASHA ho tosot na in manchah ding Personal Protective Equipment (PPE), facemask, hand glove chule hand sanitizer ho kithopi nan anape uvin ahi.

xxxxxxxxxxxxxxxxx

Myanmar gammi mi 52 in CCpur District dalhaa agam anajon 

B.Lalboi Gangte

CCpur. August 25 (ET) : Churachandpur  District sung’a busa Myanmar mi 52 chu tunin (Aug. 25) District dalha in agam anajon tauvin ahi. Churachandpur  District hi Myanmar toh gamgi ahi naban’a Myanmar gammi tamtah kum seh in natoh ding chom chom hol in District sung alut jing uvin toh thei chi chom chom tong’a khosa den ahi.

Alangkhat’a Covid-19 natna hit hin gamsung pumpi ahin lokhum  naban’a CCpur District sung’a natna ahunglut toh lhon in sumkol veina inn ho Lockdown, Curfew jeh in kha’a ahung um tah jeh in niseh’a khosa ho nasatah’a ahin asuhkhah phat’a mi tamtah in hahsat na ahin to phat’a Myanmar gammi ho jong agam uva kile’u ahi. Tunin jong Ccpur District aum Myanmar gammi ho District Administration akon phalna amu utoh lhon’a CCpur District dalha’a Myanmar gam ajot thei’u ahi.

Hiche toh lhon’a Myanmar jon ding ho tunin Peace Ground, Tuibong ah aki-report uvin Tata Sumo 3 leh Ecco Van 5 in chapang 3, pilhing pasal 18 leh numei 31 agom’a mi 52 in CCpur dalha in Myanmar anajon uvin ahi. Hetthei khat chu achesa July 2, 2020 nikhon CCpur District aum Myanmar mi chapang 4 leh pilhing 32 in Tata Sumo 2 leh Ecco Van 3 mangcha in  CCpur District dalha in Tamu ana jon uvin ahi.

Xxxxxxxxxxxxx

Naosen vetkol nadinga AB-PMJAY/CMHT Help Desk, District Hospital, CCpur in naosen nu le-pa khut’a CMHT Card pehdoh nanei  

B.Lalboi Gangte

CCpur. August 25 (ET) : Naosen Chinghoihcy vetkol nading’a panlah na achelhah jing toh lhon’a tunin (Aug. 25) AB-PMJAY/CMHT Help Desk, District Hospital, Churachandpur in naosen nu le-pa khut’a CMHT Card pehdohna ananei in ahi. Naosen Chinghoihcy hi New Mata akon Lianmalsawm chanu ahin amahi achesa Feb. 25, 2020 nikho’a District Hospital, Churachandpur a peng ahitoh lhon’a tahsabukim jeh’a Imphal a vetkol ding’a referred ana kibol ahi. Chuleh RIMS Imphal mun’a Neonatal Intensive Care Unit (NICU) a phatsot tah vetkol ahi nung’a operation bol ngai ding ahidan Doctor anasei utoh lhon’a operation bolna ding’a Naosen nu le-pa ten sum asuhto joulou jeh uvin naosen chu inn lam joh’a vetkol ding in anakipohdoh uvin ahi.

Hiche toh lhon’a naosen din mun toh kisai’a panlah na chom chom chung’a Pawan Yadav, IAS, Deputy Commissioner, Churachandpur in jong ahedoh in janni (Aug 24) chun vetlhah na ananei in ahi. Chule Government lam akon panpi  na umthei ho’a kon kithopi na anei ding ahidan hetsah jong anei in ahi.  Naosen kivetkol na’a sum tamtah lut ding ahi jeh in Health card chungchon’a vetkol thei ding ahi dungjui in PMJAY/CMHT Help Desk chungchon’a naosen Nu (Niangngaihkim) min in CMHT Card aboipi uvin hiche achun Help Desk atong ho deisah naleh hapan najal’a Deputy Commissioner in approval abol dungjui’a tuni Thuamkhanlian Ngaihte, District Coordinator, CMHT/PMJAY Churachandpur in CMHT Card pehdohna ananei ahi. Hetthei khat chu hiche naosen Chinghoihcy hi District Hospital apeng jou lha khat vel akivetkol nung’a alu (head) bou len cheh cheh ahi. Hitobang natna hi ‘Hydrocephalus’ (low weight premature birth) kiti ahi.

xxxxxxxxxxxxxxxx

KKL Leimata Block in gamkai mipi damlou ho pole nading’a Dk. Lakh 5 vel man Ambulance thah lhamdoh

B.Lalboi Gangte

CCpur. August 24 (ET):  Kuki Khanglai Lawmpi (KKL Leimata Block) in Ambulance thah tunin Pathen heng’a thenso naleh lhandohna ananei uvin ahi. Kingon achun KKL GHQ leh Leimata Area lhang Haosa ho leh Civil Society Organization (CSO) chom chom akon lamkai leh member hon pan anala uvin ahi. Chuleh Kukimun akon Demsei in tahsa damlou gamkai mipi in anei teng apoimo dungjui’a hiche Ambulance hi manchah thei ding ahidan aphondoh naban’a Pathen heng’a thenso naleh lhandohna jong ananei in ahi.

Hiche toh lhon’a kingon phatsung’a Lalneo Haokip, President KKL Leimata Block in kingon kimanchah na phatsung’a Haosa-upa leh Leimata lhang sung’a hungkhom CSOs ho chung’a kipa nathu aphongdoh in ahi. Kamthang, President KKL GHQ in KKL Leimata Block in damlou poh le-na ding’a Ambulance aneinao chung’a pachat na sangtah anei in chule panpi ngaiho panpi na bol jing ding uvin tilkhou na jong aneiyin ahi. KKL Leimata Block hi hiche Ambulance hi Dk. Lakh 5 vel man’a achoh ahitoh lhon’a kingon a panla ho jouse in kipa na in ankongso khom najong ananei uvin ahi.

Xxxxxxxx

Assam a AFSPA lha 6 kisuh saobe

Guwhati, Aug 25: Assam government in state sung a Armed Forces (Special Powers) Act, 1958 (AFSPA) lha 6 a suh sao be ahidingdan phondoh na ahin nei uvin ahi. Hiche thupeh hi ahunglhungding August nisim akon kipan ding ahi akiti.

Hetthei khatchu state sung a security force ho kibulu na ana um jing toh lhon a “disturbed area” tia phondoh na ana kinei ahi. Hetthei khat chu state sung ahi daan in aphal lou meipum le meichang muntin a ana kiman doh jing ahi. Hetthei khat chu state sung a kiloikhomna tamtah in AFSPA hi lahdoh ding a kiphinna ahin nei jing u ahi. Hetthei khat chu Assam sung ahi achesa November 1990 akon a hung ki koi a, lha gup she a hung ki suh sao  be jing ahi.

Xxxxxxxxx

Oxford Vaccine mihem chung a patep na tuni Pune a kipan tading

Pune, Aug 25: Oxford University in asem covid vaccine chu tuni in Pune mun a um Bharti Vidyapeeth Medical College ahung lhung tan ahi. Hiche vaccine chu Pune a mihem chung a patep na kinei ding toh lhon a hung polut ahi. Hiche patep na hi jing nikho akon kipan ding ahi akiti.

Hiche patep nahi mun 17 lhendoh na ana kinei na mun ho Serum Institute of India (SII) in vetsui na ana nei namun ho a kibol ding ahi akiti. Hiche patep na kipat ding toh lhon in volunteer 5 ho kibol masa pen ding ahin, antibody tetst ho kibol chai teng kibol ding ahiuvin ahi tin Dr Sanjay Lalwani, Medical Director, Bharti Vidyapeeth’s Medical College and Hospital and Research Centre in hetsah na ahin nei in ahi. Hospital hi volunteer 350 chan podoh ding a nganse na ana kinei ahin, volunteer ho hi akum 19 akon 99 chan hithei ding a ana kisei ahi.

Hospital deputy medical director, Dr Jeetendra Oswal in asei na a volunteer ho chu daan noi a vetsui na kinei ding ahi tin phondoh na ana nei in ahi. Hiche patep na nei ding a lhendoh na ana kinei ho chu B J Medical College Hospital, Pune, AIIMS Delhi, Rajendra Memorial Research Institute of Medical Sciences, Patna, Post Graduate Institute of Medical Education and Research, Chandigarh, Nehru Hospital, Gorakhpur le Andhra Medical College, Visakhapatnam ho ahi. Hetthei khat chu leiset chung a vaccine ha semdoh pen SII hin Jenner Institute of Oxford University in ahin semdoh vaccine hi patep na le joh ding a sem doh na ding a British-Swedish pharma company Astra Zeneca toh kihto ahi.

Xxxxxxxxxxx

Dangka 5.88 Lakh Crore lam man project 8,363, April nisim 20

akon ana kijom ta

New Delhi, Aug 25: Thao le gas industry ho in project 8,363 lam, dangka 5.88 lakh crore lam man chu achesa April nisim 20 akon ana pat u ahitan ahi.

Thuso kimu dunjgui in hiche project jouse hi central public sector enterprises (CPSEs) le joint ventures ahiloule subsidiary sung a refinery projects, bio refineries, exploration and production projects, marketing infrastructure projects, pipelines, city gas distribution projects le drilling and survey activity ho ahi akiti. Hiche thu toh kisai in Petroleum and Natural Gas Minister Dharmendra Pradhan in project jouse velvet na  ana nei in ahi.

Minister pa tohgon noi ahi boina chung a phatchom na nei ding a tohgon kinei ahi akiti. Hiche project jo akon mi tampi in natoh na anei jing dan u jong tahlang na ana kinei in ahi. Hiche project hi dangka 5.88 lakh crore lam man ahin, dangka 33.8 crore lam nikho pehdoh na anei jou in ahi akiti.

Xxxxxxxx

Nagaland a Covid-19 positive case thah 38 kimudoh; agom’a case 3,752 lhing ta

Kohima, Aug 25: Nagaland a Covid +ve case thah tuni 38 akimudoh toh lhon’a agom’a case 3,752 alhing tan chule adamdoh 214 jong aum in ahi. Tuni case thah kimudoh 38 lah’a 31 hi Kohima akon, 3 hi Mon akon chuleh Wokha leh Peren a 2 cheh ahi tin Nagaland Health Minister S Pangnyu Phom chun aseiyin ahi.

Hiche toh lhon’a Health Department akon update kimu dungjui’a case thah kimudoh lah’a 14 hi traced contact akon ( Kohima-11, Mon-3), 10 hi frontline worker (Kohima) ho, 10 hi armed force personnel ho (Kohima-9, Wokha-1) chule 4 hi returnee (Peren-2, Wokha le Kohima 1 cheh) ho ahi akiti. Chuleh tule tu a Covid +ve vei hi armed force personnel mi 1,617, returnees 1,217, traced contact 660 chule frontline workder 258 ahi. Hiche naban’a State recovery rate hi 69.56% ahi.