Health Director in Coronavirus thu’a case photchenna kinei aumpon mipi akichat angaipoi...

Health Director in Coronavirus thu’a case photchenna kinei aumpon mipi akichat angaipoi tia temna nei; Indo-Myanmar gamgi kha dinga community worker hon ngaidan sei

392
0
SHARE

Health Director in Coronavirus thu’a case photchenna kinei aumpon mipi akichat angaipoi tia temna nei; Indo-Myanmar gamgi kha dinga community worker hon ngaidan sei

Imphal, Jan 29(ET): Health Director Dr. K Rajo in gamsung a Coronavirus aum’e ti case photchenna kinei aumpon, mipi alungkham angaipoi, tin aseiyin ahi.

“India gam a athu kikhol hohi ginmo mai mai ahi’in, virus po a photchenna umlou ahi”, tin Dr Rajo in aseiyin chule state department in natna venna dinga kiginna anei ahijeh a mipi alungkham angaipoi, tin Lamphel Sana Keithel a kingon a pang dinga Director pa achena a thuso miho henga aseiyin ahi.

Centre in thuhilna anei toh kilhon a Imphal airport a kholjin ho hi achesa January nisim 6 nikho a kon infrared thermometer a kholna kineiya chule kholjin ho thusim leh thuchen record kibol ahi. Natna hi itih phat hijong leh adouna dinga department in angaicha lou chule manchah- mask ho gonsa akoi ahi, ati.

Alangkhat’a, community worker Rajit Sharma in coronavirus natna vettup ahitai tia akisei kah, phat phabep sung Border gate ho state sorkar in akha ding hi pha ding ahi, tin aseiyin ahi. Rajit Sharma hi tu naicha Myanmar gam a che ahi’in, Myanmar hi China toh kinai chule medical facility lhahsamna ahi’in, virus po a mi um maithei ahijeh a kiven ding hi kijen sanga pha jo ahi, tin aseibe in ahi.

Gamsung lutna mun jouse a Manipur Health Department in kiginna anei ahi. “Mao Gate, Jiribam, Behiang leh Moreh a screening centre kihongdoh ahitai”, tin Additional Director (Public Health) Dr L Arke Singh in aseiyin chule Rapid Response team hojong angaichat na a man dinga kisemdoh ahitai, ati.

Mao gate hi Manipur-Nagaland gamgi ahi’in, Jiribam hi Manipur-Assam gamgi chule Behiang leh Moreh hi Indo-Myanmar International border juiya um ahi. Moreh leh Behiang a Manipur Health department in medical officer ho asol ahitan, India gam mi chule gamdang mi abon a kholna aneiyu ahi. January nisim 8 nikho a kon Imphal International airport mun a jong pan lahthei chan alah u ahi, tin Dr Arke in aseiyin, Union Health Ministry thuhil masanga kon kiginna um ahitai, ati.

Rapid response team hi state leh district level a kisemdoh ahi’in, chule RIMS leh JNIMS hospital a Isolation ward kikoi ahi, ati. Mipi amoh lungkham loudinga Health Department official hon temna anei uvin, tahsa thengjing a umjing ding a thuhilna anei uvin ahi. Tisat hi nat kihetna apipen ahi’in, natna nei phabep hin hai hahsatna jong anei ahi.

China gam a kon hung kile a natna lah a um hiding ginmo mi 4 tua hi Kasturba Hospital, North Mumbai a kijen ahi. India gam a observation a kikoi hi agom a 16 lhing ahitan, mi thum hi Hyderabad, 7 hi Kerala, 4 Mumbai a chule mikhat hi Bengaluru a observation a akoiyu ahi.

Nat kipatna Wuhan leh China a um khopi 12 hi China authority hon natna vettup ahithei nading a apumpi a akha u ahitan, Wuhan a hi India gam mi simlai 250-300 kikah umden hidinga thulhut in asei ahi. Coronavirus hi tuchan a gam (country) 18 a kisei ahitan, Germany, Australia leh US gam jong pang ahi. Natna jeh a China gam a mi 136 thi a chule hiche case kisei tam cheh cheh ahi.

Gam 18 a case 6056 kisei ahitan, China in pan sangtah alah vanga tuchan a natna avettup jou loulai ahi.

Moreh-Myanmar border gate a Coronavirus Screening kibol panta

Tengnoupal, Jan 29 (ET): Moreh-Myanmar border gate no 1 leh 2 mun a Wednesday nikhon Moreh Hospital team hon ‘coronavirus screening’ apan tauvin ahi.

Ahin, team hohin infrared thermometer ni bou aman jeh uvin hahsatna atoh uvin ahi. Tamu Hospital, Myanmar team injong gamgi a hi Manipur a kon hung ho screening abol pan u ahitai. Indo-Myanmar Friendship Bridge leh Namphalong gate mun a Manipur in tisat neiho hetdoh nadinga infrared thermometer aman ahi.

Ahivanga gamgi a che mi tamtah ahijeh a manchah ni seh a natna akhol uhi hahsatna lentah khat ahi. Alangkhat a Myanmar medical team hon mikhat vetna dinga manchah thum aman u ahi.

 

RIMS a Corona Virus natna nei aumpoi: Medical Superintendent

Imphal, Jan 29(ET): Novel Corona Virus Manipur hung lhun loulai toh lhon a social media Facebook le Whatsapp ho a  RIMS a Coronas Virus natna nei khat  kijen thu toh kisai a thulamleng thang na chung ah Cyber Crime in hiche thu kitah na page le group ho a suhmang ding uvin RIMS Medical Superintendent in police ang a hetsah na ana nei in ahi.

Hetthei khat chu Social media lah dung’a Manipur gamsung’a jong Coronavirus case hiding’a ginmo umkhat tuhin RIMS hospital a vetkol ahi tai tia ana kisei ahi. Natna neiya kiseinu chu Thangmeiband Khomdram Selungba leikai akon Moirangthem Roshini Devi, D/o Moirangthemm Lokeshor Singh ahin amahi Hongkong, China a kholjin January 20, 2020 nikho a Manipur hunglhung a kisei ahi.

Tripura Khangthah pasal khat Coronavirus natna jeh a thi

Agartala, Jan 29: Northeast gam Tripura a kon kum 23 a upa khangthah pasal khat coronavirus a anat akihetdoh jouva Malaysia hospital a athi’e, tin thulhut in aseiyin ahi.

Malaysia gam a restaurant a natong Manir Hossain hi Tuesday jan a thi ahi. Hossain apu in thuso miho akimupi na’a, Wednesday jingkah a Malaysia authority hon Hossain athi thu eihetsah u ahi, ati. Hossain hi 2016 kum a jinei a chule 2018 kum a Malaysia che ahi’in, hiche a kon restaurant khat a na atoh jing ahi.

Hossain hi coronavirus a thi Northeast gam mi amasapen ahi. Manir thilong inn a ahin pui nading uva sorkar henga insung miten ngehna aneiding ahi, tin apu in aseibe in ahi.

“Operation Lamka” chelha jing toh lhon’a khamnathei ne leh joh ho kimatbe jing

B.Lalboi Gangte

CCpur, Jan 29 (ET): Churachandpur District hopsung Lamka khopi sung’a khamnathei ne leh gucha ho zalen tah’a aum ding’u deilou na jeh in YPA GHQ panla na’a “Operation Lamka” akipatdoh toh lhon’a gucha leh khamnathei joh’a sumkol vei amandoh jing uvin ahi. Operation Lamka toh molso na ding’a duty bol honkhat in New Bazar kimvel’a khamnathei joh leh khamnathei ne anamandoh uvin ahi. Matdoh’a um ho chu H. Lunsat (49) S/o (L) Kamkhogin of District Hqtr Tuibong, Manngaihlian (21) W/o Songkhansiam of Dorcas veng, New Lamka leh Niangneu (56) D/o (L) Thongsuan of Lunmual ahi.

Hiche toh lhon’a Niangneu akon in No.4 pieces 48, WY tablet 19; Manngaihlian akon in No.4 pieces 16 leh Khaini bom kimkhat chuleh Lunsat akon in No.4 piece 3 anamandoh uvin ahi. Matdoh’a um mi 3 hochu thuhil na hoitah aneipeh jou nung uvin a insung mite khut’a anapedoh tauvin ahi.

Ima kailhang kimvel a koima thil ana kijoh sah talou

Imphal, Jan 29 (ET): Khwairambang Kailhang kimvel’a tou nupi hon Government heng’a dukan touna ding mun ahinsem ding’a ngehna ananei jing’u toh lhon janhi (Jan 28) akon in Ima kailhang 3 kimvel ho’a koima thil ana johsah tapouvin chuleh koima sumkol jong aveisah tapouvin ahi tin thulhut chun aseiye. Hiche kailhang’a tou nupi hon jingkah’a kon chun lamlen pam dung’ah thil joh koima atousah pouvin chuleh koitobang lamlen pang’a thiljoh aum jong leh ana nungsol uvin ahi.

Alangkhat’a Police hon jong jingkah’a kon chun Khwairamband kailhang kimvel leh lamlen pam dung’a koima thil ajohsah pon ahi. Hetthei khat chu authority in achesa Jan. nisim 17 nikho’a kon Khwairamband kailhang kimvel’a koima tou ding aphal tah lou toh lhon’a Police ho leh lamlen pam’a thiljoh nupi ho nasatah in ana kinoto uvin ahi. Hiche achun Police hon nupi thiljoh ho nocheh nading in smoke bomb jong anakap uvin ahi.

Hiche toh lhon’a thil joh na ding mun kitup aum lou jeh hiche kiphinna kibol ho phat sottah ahung che tan ahi. Government masa leh tule tu’a Government  in jong athu asufel jou lhon pon chuleh hiti ho jeh hin thiljoh leh thiljoh ho akinah lo jing uvin ahi. Government in agan nathei lam’a boina ho ahin suhlhap ding in lamlen pam’a thil joh nupi hon ngehna anei uvin ahi.

UFBU in Jan 31 nikho a kon India pumpi a ni 2 bank strike bol ding

Guwahati, Jan 29: United Forum of Bank Union (UFBU) in January nisim 31 nikho a kon February nisim 1 chan ni 2 gamsung pumpi a strike abol ding ahi’in, bank natong chule officer ho Wage Revision Settlement panna a thumna umho Indian Banks’ Association (IBA) in abulhit nadinga thumna aneidiu ahi.

AIBEA, AIBOC, NCBE, AIBOA, BEFI, INBEF, INBOC, NOBW leh NOBO bank union 9 a natong leh officer ho kiloikhomna UFBU in January nisim 31 leh February nisim 1 (ni-2) bandh bol dinga kouna anei ahi’in, hiche tilou March nisim 11, 12 leh 13 (nithum) strike abol diu, April nisim 1 nikho a kon phat teplou strike abol diu ahi.

Hiche toh kisaiyin tunin MG Avenue a um SBI Main Branch ah thuso mihotoh kihoukhomna khat abol uvin hiche a chun United forum of Bank Union Manipur State Branch a Chairman Soram Bijoy in achesa 2017 kum’a konchun bank employee hodia kum 5 sehleh pay revision kibolji chu tuchan in kikhelna imacha aumpoi tin aseiyin ahi. Bank staff hohin amaho basic pay, special allowance holeh pension scheme hojong ahiding bang’in amupouve ati. Natoh phatsung jong akitup theipon, natoh dan leh sum kimudan hojong akitohpon chuleh Contract employee hon lhalo jong kitup tah’in amu pouve tin aseiben ahi. Gamdang ho’a aphat dungjui in recession umjongle India gam’ah vang bank employee ho pottho jal’in imacha kikhelna aumpoi ati.

Thuso mihotoh kihoukhomna a chun Union Manipur State Committee a Convener L Meipak, AIBOC Manipur State a dia General Secretary Ch Lilabanta, Senior Executive Member, M Nimai, AIBOC Women Wing a Central Executive Member Jessica Tonsing hojong apang uvin ahi.

Thumna anei holah a hi Wage Revision Settlement 20% kalsah ding, 5 Day Banking, Special Allowance holeh Basic Pay Merge bol ding, New Pension Scheme (NPS) kah ding, Pension Updation, Family Pension semhoi ding, Ceiling umlouva Retiral benefit Income tax ngaijang ding, Uniform business hour, lunch hour, Leave Bank pohdoh ding, contract natong/business correspondent ho natoh kibang a lo kibang peh ding leh adang dang pang ahi.

UFBU in Tuesday nikho a thuso anei dungjuiya, IBA in May 2018 chan lo kalsah nading offer abol lou ahi. Achesa lha 30 kihouna phabep achelhah jouva IBA in 12.25% kalsah dinga offer abol ahi. “Kum phabep sunga thil man nasatah a kal a bank natoh jong tam cheh cheh ahi’in, hiche jeh a bank staff hon kilomtah a lo akal ding hi adei ahi. IBA in tua offer abol hi lunglhai umlou tah ahi”, tin thuso chun aseiyin ahi.

Chief Labour Commissioner, Ministry of Labour, India sorkar in pan alah a January nisim 27 nikho a Delhi office mun a meeting agon ahi’in, meeting a IBA in alunggel akhel dehlou jeh a aphatchomna umlou ahi. Union ho akilhending ima akipeh lou jeh a UFBU in thumna tahlang nadinga kiphinna agon ahi, ati.

Bank customer hon strike sunga service achelhah theilou ding jeh a hetthemna anei diuvin thuso chun temna aneibe in ahi.

 

Kani lei kisuhset na chung’a ZRO in hilchetna nei

Ccpur, Jan 29(ET): Churachandpur district sung Lungthul(D) le Kangkap kho ho a Zomi Youth Association makai na noi le Assam Rifles, Churachandpur police kithopina noi a ‘Kani Free Zogam Mission’ kibol na chung a ZRO in kipa thu seina ahin nei uvin ahi. Hiche kani lei vaat ngim na ding a khangthah 250 lam in panlah na ahung neina chung uva kiloikhomna in achung uva kipa thu seina jong ahin nei uvin ahi. ZRO in achesa phat ho a mipi ho ang a kanai lei bol lou ding a avel vel a temna ana nei utoh lhon a hitabang natoh na kinei na chung a kipa thu phondoh na ahi nei utoh lhon in kani lei kibol na ding a haosa koima in agam pehdoh na anei na lou ding uvin jong kiloikhomna in hetsah na ahin nei uvin ahi.

 

PMAY beneficiary lunglhai lou hon Minister quarter nokhum, EO chunga action lah dinga thumna neiyu

Imphal, Jan 29(UNA): PMAY-Housing for all scheme a natoh akichai nunga jong fund akihop doh loujeh a lunghang Lamlai beneficiary hon Wednesday nikhon MAHUD Minister Th Shyamkumar quarter anokhum uvin, Executive officer, Lamlai Municipal Council chunga action alah dinga thumna anei uvin ahi.

Thil umdan chunga lunglhai lou beneficiary hon placard akidop uvin, sun nidan 2 don a Minister Th Shyamkumar umna Kanglapark Imphal a quarter lang ajon uvin, ahin, gate alhun uva police hon alamtin uvin, chomkhat jouva mi phabep akimupi ding aphal peh uvin ahi. Ahin, Minister pa aumlou jeh a PRO pa akimupi uvin, PRO in kiphinna bol ho thumna phone a minister pa henga aseipeh son ahi.

Beneficiary phabep in loi le gol chule insung kinaipi ho henga sum bat a alah uva PMAY-Housing noiya in asah u ahi, tin kiphinna bol a pang Y Santa Singh, Chalou kho in thuso miho henga aseiyin ahi. Ahivanga Lamlai Municipal Council EO in beneficiary ho dinga fund sanction abol loujeh a agenthei sa beneficiary hon hahsatna sangtah ato ahi, ati.

Beneficiary hon hahsatna ato hohi mopohna nei minister in asuhlhap peh ding temna neiya kahung u ahi. Minister in EO douna a action lah dinga kitepna anei toh kilhon a kiphinna kigong kivohai ahitai, tin aseibe in ahi.

Ukhrul a hapta khat sung a thumvei channa meikah gimnei tah um

Ukhrul, Jan 29: Hapta khat sung a thumvei channa in tunichun Ukhrul district ah meikah gimnei tah asohdoh kit e. Thil le lo tamtah akahmang vang in, akisukha athi amang vang aumpoi tin thulhut chun asei in ahi. Hiche meikah hi Autonomous District Council (ADC) Ukhrul office toh kinai  Phungreitang mun a mi imutnop lai jingkah nidan 3 a soh ahi in, workshop le bakery pum a avel a dukan 9 tobang akahchai kei ahi. Thulhut in athi amang aumlou vang in mei in akahchai thil le lo chu crore val tei dia khotdoh ahi e, ati.  Horthing Kapai in ama dukan sung a ahtui le thilchom chom Dk. Lakh 3 man um chu akachai in ahi ati.

Tyre repairing workshop bol Vaothing Muinao in manchah le thil le lo Dk. Lakh 60,  mechanical workshop bol Basant Rumthao in ama thil le lo Dk.  80,000 man, gari parts joh Arun Kumar dukan ah Dk. Lakh 15 man thil le lo chule agolpa Krishan Kumar Saha mechanical workshop ah Dk. Lakh 30 man hiche nachung chon’a Kumar in aseikit na’a Madan Prasad spare parts dukan ah Dk. Lakh 30 man thil leh lo jong akachai kei in ahi ati.

Hiche thu kisut chan in meikah kipat dan hetdoh ahinai pon ahi. Chule Viewland Zone 1 ah janni sun jong chun meikah ana um in ahi. Hiche a meikah hi tuisa omna immersion rod a kipan ahi in, akimvel a in ho hoidoh nading in meiphal gari in meikah namun adellut cheh ahi. Hungpung kho a January 25 ni meikah a jong naosen khat in thina ana to ahi. Hitia meikah aso jing tolhon in lhang mipi ho kichatnan alodim un mipi kichih thei nadia seminar gon ding in Ukhrul Fire Brigade ho jong ngehna anei un ahi. Ningkum chun meikah 11 vei ana soh ahi.

NSCN-IM Chief Muivah leh Governor RN Ravi in tuni kihouna neiding

Kohima, Jan 29: Naga peace talk Interlocutor RN Ravi leh chief negotiator Thuingaleng Muivah in Thursday nikho teng Naga Peace talk thu a kihoukhomna anei lhonding ahi. Team hohi ‘ato kilonser’ Th Muivah lamkaina hiding chule Union government thalheng a Ravi pang ding ahi. Meeting hi Police complex, Chumukedima, Dimapur  a sun nidan 11 teng meeting aneidiu ahi. Thulhut dungjuiya achesa January nisim 18 nikho a high-profile meeting anaum’a, NSCN-IM delegate hon ‘competencies’ leh ‘Naga integration map’ apehlut u ahi. Aban a meeting hi Governor RN Ravi in Prime Minister Narendra Modi Naga thu a akimupi jouteng umding ahi, tia thulhut in asei ahi’in, thulhut dungjuiya sum kidon (extortion leh society douna natoh ho thu aseikhom diu ahi.

Hetthei khat chu Ravi in Dimapur-Kohima four lane project velvetna aneina’a, NH-29 a natoh achal theilou hi thingnoi kiloikhom hon sum adon uva, society douna na atoh jeh u ahi, tia anasei ahi. Kum 22 jouva Naga Peace Talk hi khumkhana ding stage chan lhung u ahitai, tia kisei ahi’in, ahivanga pre-condition phabep um ahi. Achesa October nisim 31 nikho a New Delhi khopi a meeting anei nauva Centre thalheng hon NSCN-IM hon thumna aneiyu akhoh ho sanpeh dinga nopna aneiyu ahi. Hiche chungchang a hi centre in dan phabep akoi ahi’in, ahivanga dan kikoi hohi khonung a meeting abol nauva phatah a aseikhom diu ahi, tin thulhut in aseibe in ahi.

Lamjing Maheikol Scheme phatah’a achelhah lou hi Wangoi ZEO le AI themmo ahi: UNLF

Imphal, Jan 29: UNLF Department of Publicity Director M Sak-hen in thuso doh in asei na ah  Lamhei Maheikol scheme hi phatah in tohdoh ahipon Wangoi ZEO le AI themmo chan ahi in, themjilna toh kimat a nehguh bol a dem lou ding in tunichun thuphon abol in ahi. Themjil sem hoi nading a government in tohgon chom chom apohdoh ho minister, MLA le official hon amaho changval phatchomna joh in amang uve, ati.  UNLF in MHRD noi a 2017-18 SSA Manipur State Mission in apohdoh “Lamjing Maheikol” scheme a nehguh um thulhut akimu a pat kholchilna kinei a anoi a nehguh ho kimudoh ahi e, ati.

Nehguh kimudoh ho chu SSA State Mission in 2017-18 a LM scheme a din block 17 sung a kon  school khat chung’a Dk. 2,15,300 a natoh nadia school 90 lhendoh a umsa chu natoh umlou in ane chai in;  ZEO Wangoi Block noi’a SSA State Mission in alhendoh school 10 ho tichu Chajing Mairenkhong UPS, Haoreibi Jr. HS, Phoubakchao HS, Shamusang Shantipur UPS, Yumnam Huidrom HS, Langthabal Phuramakhong UPS, Sekmaijin HS, Khagemba Jr. HS, Malon Megha HS, Irom Meijrao New PS a natoh nadia sum ki bituh chu Dk. 21,53,000; Wangoi Zone a natoh boipi ding in ZEO makaina a committee semdoh chun mopohna jouse Ojah Brojen apelha in; Sum ki mandoh dan Wangoi ZEO in apehlut le school head a sum kimang doh le na kitoh dan akito lou jong kholchilna a kon kihedoh;  Lekha pohdoh umlou in kamchang bou in AI Brojen in thulhut ape in, school authority chung chang hetdoh thei louva kikoi chuleh  AI Brojen in sum kimanna atahdoh a adihlou mudoh ahijeh in athahbeh a sum kimanna pehsah ahi in, hiche a jong chun adihlou aum nalai in hiche hochu  School 10 a dia bituh kibol Rs 21,53,000 ahivang in Ojha Ranbir mopohna in Dk 5,38,000 akikoi in; Yumnam Huidrom HS lentol suhcham nading a MLA Lukhoi Rs 50000 kipeh jong sum manna thulhut ah akitahdoh in;  Hiche sum bituh akon  “Go To Village” kin’a manchah ding sum ki kaidohna jong akitahdoh in chuleh  aumkhalou beh toukhomna Dk. 1,00,00 gon in aum in ahi. Hitia alamlou a sum kimandoh najouse phat kipe sung a ZEO Hemchandra le AI Brojen in asuhtheng lhon lou a gotna achan khah lhon le koima themmo achan lhon lou ding in UNLF thuphon chun aseiyin ahi.

NSCN noiya bahkai Ceasefire la hon CFSB ho kimupi

Kohima, Jan 29 (ET): Janhi chun NSCN noiya bahkai NSCN-K, NSCN-R chule NSCN-U hon Ceasefire Supersivory Board (CFSB) ho Ceasefire Ground Rules (CFGR) semphat ding deina jeh in akimupi uvin hiche akimupi uhi anivei channa ahitan amasajo chu Ningkum November lha chun akimupi un ahi. Amento V Chophi, deputy kilonser MIP and CFSB member, NSCN-R in thuso miho heng a aseina achun, Security force hon keiho group in member thah lahlut na anei uve tin ngohna eiki semkhum in ahinvang keihon kabol pouvin akibol chu ahile voluntary recruitment ahi in hiche hin CFGR groundrule atongkha poi ati. Chule sum le kai dong thua aseina achun hiche hi masang peh apat kibol jingsa ahitan, koi hetlou jong ahipon, ‘Naga National Movement’ aum laise a kibol ding ahi in Naga hihen hihih jongle contractor ahilou le sumkolvei hon apeh ding dol kisei hou apeh uh ahi ati.

Hiche meeting sung a chu amauho cadres hon Dimapur gamsung a namphu a sum dong aum thu seidoh ahitoh lhon a aman (Chophi) in donbutna chu hiche tobang cadre ho chung ah action akila in chule kivaipohna in hiche tobang danlouva chaloh ho kimoh vetlou ahi dan jong asei in ahi. Hiche meeting ahin Security forces akon top official holeh DGP Nagaland jong apang in ahi. Tuni chun NSCN-IM akon member hon ceasefire ground rule semthah ding in ceasefire body ho akimupi kit uvin ahi.

Washima kitha thu a kisemdoh JAC in kiphinna bol, tolthat dinga ginmo pa police hon court a pui

Imphal, Jan 29 (ET): Mayang Imphal Police station noiya um Irong Salam Macha Fish farm  a nga kul a athisa kimudoh kum 18 a upa Kh Washima chung a thudih a thutanna neiding thumna a kisemdoh Joint Action Committee in Wednesday nikhon Azad Higher Secondary School mai, Yairipok Santa Bazar a toumun kiphinna abol uvin ahi.

Kiphinna a vengsung mi aja a sim in pan ala uvin, themmona neiho akimat a chule gotna peh dinga thumna anei uvin chule nidan 48 kah a thilsoh toh kisai thudih ahung kikholdoh a mona neiho akimatdoh louleh kiphinna khoutah kibolding chuleh General Strike kisan geiya kibol ding ahi tin JAC in thuphon aneiyin ahi.

Toumun kiphinna a chun Tulihal Educated Association a member ho, local club, Meira Paibi kiloikhomna, simlai kiloikhomna, Civil Society kiloikhomna ho, Andro leh Wangkhem Assembly Constituency teni’a kon changvel mi tampi jong apang uvin ahi. Kh Wasima jaana vetsahnan minute 2 thipchet in aum uvin, mona neiho kimat dohding thucheng hojong atahlang uvin ahi. JAC member Md Nayajuddin Sayed in thuso mihotoh akihoulimna ah hitobang deilou umtah numei chung’a chonvalna hi sangtah in demna akineiyin, maban’a hitobang umchan ho suhbeina dia mona neiho atotoh uva gotna peh ngai ahi tin aseiyin ahi.

Thilsoh toh kisaiya Yairipok Changamdabi Makha Leikai a cheng Washima dongmapa ahi tia kisei MK Sahid (31) police hon case toh kisaiya amat ahitai.

Thudohna anei nauva amahin athilbol nopna anei ahi, tin thulhut in aseiyin ahi. Sahid car jong police hon aman tauvin, gari sunga Washima thil phabep amudoh uvin ahi. JAC in Chief Minister chule Andro MLA Th Shyamkumar henga hiche thu a memorandum apehlut u ahitan chule Sahid jong District and session judge, Imphal East anga tuni a apuiyu ahi.

Alangkhat a, Manipur Muslim Women Organization Wing in Washima Khullapham, Yairipok Tulihal Mayai Leikai a cheng kitha demna sangtah anei uvin ahi. Washima hi Maharaj Bhodachandra College, Imphal a second semester simlai ahi’in, achesa January nisim 27 jan a hunam a kisuse a chule kithat ahi.

Hatta a organization office mun a spokesperson Yumkhaibam Ongbi Rosi in thuso miho akimupi na’a, Wasima kithana a panla hohi rape-murder case noiya kilading, Hyderabad a Veterinary doctor nu kithana panla ho gotna tobang chet peh ngai ahi tin aseiyin chule hitobang thilse soh ho a authority hon themmona neiho chunga action gangtah a alahlou chule gotna apeh vahlou jeh a hitobang thilsoh hohi tam cheh cheh ahi, tin aseiyin ahi. Themmona neiho dan dungjuiya gotna apeh diuvin temna aneiyin chule JAC tosot dinga jong aseibe in ahi.

Maharaja Bodhachandra College (MBC) Student Union honjong Wasima kitha deilou vetsahnan toumun kiphin abol uvin ahi. WAsima chu hiche College a BA 2nd Semester simlai ahi. Angela Razak in thuso miho toh akihoulimna ah Government in akinthei lam’a mona neiho ahin matdoh ding’in ngehna aneiyin ahi.

Corinavirus natna thu a Nagaland le Meghalaya kiging pan ta

Shillong, Jan 28: China gam a kipan Coronavirus (nCoV) natna thu in Northeastern a kon Meghalaya le Nagaland nasatah in akiging pan tan chutolhon in  Nagaland Directorate of Health and Family Welfare in Rapid Response Teams (RRTs) ho kigingsa um ding in thupeh anei in chujongle  Directorate of Health & Family Welfare, Nagaland National Health Mission a Mission Director Dr. Kevichusa Medikhru in Coronavirus hi Middle East Respiratory Syndrome (MERS) le Severe Acute Respiratory Syndrome (SARS) bang a natna gimnei buhse a kipan, mihem chung a ana lhung khalou natna ahi e, ati.

Hitolhon in Dimapur Airport Authority jong kholjin min semtohsa hin pelut ding a jong hetsah ahi e tin Dr Medikhru in aseiye.

Chule district tin hospital hon pindan chombeh gontohsah akoicheh ding in Medical Superintendent ho hetsahna jong peh ahitai.

Chutobang chun Umroi Airport thunei ho jong kholjin ho tahsa dinmun health department toh agangthei pen a kijamat ding in ahetsah tai.

Hetding chu China gam a tuchan a Coronavirus nat a thina toh jong mi 106 aphatan ahi. Ahin People’s Daily in China gam a tuchan a Coronavirus nat a damlou jong mi 4515 aphatai, ati. Langkhat a China National Health Commission in hiche nat a gim dehset chu mi 976 le hiche nat in atohkhah chu agom a mi 6973 ahi e tin aseiben ahi.