Guwahati akon hung kum 40 a upa khat Quarantine Centre a thi;...

Guwahati akon hung kum 40 a upa khat Quarantine Centre a thi; Covid positive hidinga ginmo um

52
0
SHARE

Guwahati akon hung kum 40 a upa khat Quarantine Centre a thi; Covid positive hidinga ginmo um

Imphal, July 14: Guwahati a achesa kum 7 cheng, Nambol mi kum 40 a upa pasal khat Monday ni a lenna a kon ahung kile jouva aumna Nambol High School Community Quarantine Centre a janni jan a athi in ahi.

Athi pa hin viral infection ananei chule ‘multiple organ failure’ history jong anei ahi in, Guwahati a hospital a kijen ahi. Quarantine centre alhun jouva atahsa alhahsam jeh a District Surveillance Officer Bishnupur, Dr L Raichandra Singh chule Dr. L Kuber Singh, MO I/C CHC Nambol in avet kol lhon ahi in, ahivanga jan nidan 11.18 don a thi ahi.

Thilong ambulance a apoh uva, lhahna kin aneiyu ahitai. Quarantine centre a um medical team hon SOP dungjuiya test result negative ahi amu kah uva amahi COVID positive hidinga akoiyu ahi. Thi lhahna kin anei nauva kivenna dinga bol ding jouse abol uva, kin kichaiteng amun disinfect jong abol diu ahi, tin thulhut in aseiyin ahi.

Vangsetna toh pa toh lenna a hung kile ajinu sample jong test bol dinga athot u ahitai. Result positive ahileh ama chule amani toh kimuto ho abon uva quarantined abol diu ahi.

Alangkhat a, VRDL, JNIMS a test kibol sample 17 Covid 19 positive ahi, tin Covid 19 Common Control Room in janni a thuso anei nauva asei uvin ahi. Gamsunga covid positive case hi 1626 lhing ahitan, hiche lah a active case 656 chule natna a kon kijen dam 970 lhing ahi.

Manipur a Covid-19 case 46 kimu be, natna nei agom a 1672 lhingta

Imphal, July 14(ET): Achesa nidan 24 sunga Manipur a pasal 33 leh numei 13 panna a mi 46 Covid 19 positive case ahi akihetdoh be in, hiche lah a mi 30 hi VRDL, RIMS a test kibol a, JNIMS a mi 12 chule SDH Lab, Jiribam a mi 4 test kibol ahi.

Natna nei hohi Churachandpur district mi 3, Imphal East mi 4, Imphal West mi 6, Jiribam mi 4, Kangpokpi mi 5, Tamenglong mi 11, Thoubal mi 3 chule Ukhrul district mi 10 ahi in, abon uva gamdang a kon hung kile ho ahi. Abon uva Covid Care facility a akichon tan chule ‘containment’ leh ‘contact tracing’ ho kivenna dinga chelha ahi.

Chule achesa nidan 24 sunga RT PCR test akibol jouva Covid 19 natna a kon damdoh a mi 50 akijen nau mun a kon discharged abol tauvin ahi. CCCs, Meitram a kijen mi 26, Churachandpur a kijen mi 4, Tamenglong a mi 4, Thoubal mi 2, Senapati mi khat, Ukhrul mi 2 chule Covid Care Facility, JNIMS a kijen mi 11 natna a kon adamdoh jouva ‘home quarantined’ bol dinga asoldoh u ahitai.

Manipur gam a positive case hi agom a 1672 lhing ahitan, active case leh natna a kon damdoh mi 652 leh 1020 cheh ahi. Recovery rate hi gamsunga 61.00 percent lhing ahitai. Alangkhat a, Chief Minister Biren in website khat hondohna aneiyin, www.manipurcovidstories.org a hi Covid 19 toh kisai thusim kitilkhou na thei ho volunteer hon atahdoh ahi.

Alangkhat a IDSP in status update abol na a, RIMS Covid Care Centre, JNIMS Covid Care Centre, Bishnupur District Hospital, UNACCO school, Meitram, TK Woodland Resort, Tamenglong Higher Secondary School, CCC/IO Ward Churachandpur, CCC Senapati, Ukhrul District Hospital, Thoubal District Hospital, IGTU Makhan, CCC Kakching leh District QCs a Covid active case 712 aume, tin status update abol uvin ahi.

Achesa nidan 24 sunga, RIMS a sample 360 test abol nauva 30 positive ahi in, JNIMS a sample 508 test kibol ho 12 tailou adang se negative hi ahi. Jiribam DH a sample 157 test kibol lah a sample 4 positive hi ahi.

Khamnathei a kivei ho koi hijong leh kingaidam louding ahi: CM

Imphal,  Jul 14(ET): Khamnathei douna a gal kibol jom ding ahi, tin Chief Minister N Biren in aseiyin chule khamnathei a kivei hohi insungmi hihen, loi leh gol, party member ahilouleh official ho hijong leh sorkar in angaidam louding ahi, ati.

Planning Department Manipur in CM Bungalow a Start-up scheme beneficiary ho cheque hopdoh na kin aneina a CM in thuso miho akimupi na a asei ahi. Sorkar in gamsunga khamnathei suhmang ding, chule tua khangthah ho khamnathei a kon huhdoh ding hi akhohsah jing ahi, ati. Khamnathei a kivei a kiman chule police hon court henga charge sheet asem hohi sorkar thuhilna dungjui ahi. Charge sheet akipeh lut teng leh, court in case chungchang a thulhuhna aneiding hi amopohna ahi in, sorkar kikum theilou ahi, tin thudoh donbutna aneiyin ahi.

MPS officer Th Brinda in thuso aneiya, chule Manipur High Court henga Monday ni a affidavit apehlut na a, khamnathei toh kimat Lhukhosei Zou case a Chief Minister min apat thu a thudoh anei nauva Biren in, tua hitobang thuso kinei hi ‘contempt’ hiham hilou ham ti legal expert ho dohna kaneiyin, court in thulhuhna aneiding ahi, ati.

Gamsung mihon adeisah banga, sorkar in khamnathei po ho gotna khoutah peh nading dan semding angaito ahi in, Law department dohna kinei ahi, ati. 2001 census dungjuiya Delimitation exercise bol lou dinga CSO chom chom in thumna anei chungchang a CM in, centre henga delimitation hi census dihtah a akibol nadinga state sorkar injong ngehna anei ahi, ati. All political party meeting ana um a, hiche thu kisei ahi in, centre in census data dih dungjuiya delimitation process achepi dinga memorandum kipelut ahitai, tin aseibe in ahi.

Zil vadung in alhoh Ginminlun Kipgen longdamsa ni 8 chan ni a kimuta; Saikul CSO in mipi chung’a kipathu phong

Mangneo Touthang

Saikul, July 14(ET): Achesa July 7, 2020 nikho a Phailen leh Lhungtin kikah a Zil vadung a akisilna a kon Twijin ana lhoh Simlai Chapang Ginminlun Kipgen@ Mangmingou S/o Thehminlal Kipgen of Khaotah Phailen Village Churachandpur District chu twijin alhoh jou Ni sagi jou tuni (14 July) sun nidan 12:00 vel’in alongdamsa chu Lhungtin leh K.S. Mollen kikah Vadung chung ah ahung kilepdoh toh kilhon in mudoh ana hitan ahi.

Ama hi Twijin alhoh nikho a kipat Saikul Gamsung a kho jousen inson a mikhat cheh kipe doh uva Lhungtin apat Pukhao, Dolaithabi Dam changei Kuki Inpi Saikul, KSO Saikul, Govt. Side a kon Saikul Police, Relief & Disaster Team leh SDO Saikul hotoh kithoa ana hol jing u ahi.  Chapang pa longdamsa chu Lhungtin leh Mollen kikah a chapang hon twilah a ahinmu doh u ahin, akho mun na um Manga Vaiphei leh aloi hon vadung akon analahdoh u ahi. Hichetoh lhon chun Khosung Haosa chuleh ahin khanletsah/ahinsin apute toh kihoulhahna dungjui jin alongdamsa chung’a seiding leh bol dinga lom jouse Kuki custom dungjui ja seichai ahi jouvin insung mi ho pehdoh ana hin, chujouvin achen na kho Haotah Phailen ccpur lam a Vuidin anapo tauvin nilhah mama a vuina kin kibol ding ahi akiti.

Tuchung Chapang Mangmingou Longdamsa holna kin a kisalel KSO Saikul, Saikul Police, Relief & Disaster team chuleh SDO, Kuki Inpi, KWU leh lhangsung mipi adeh a atoh ding atham ding dalha Vadung a thilong hol a kipe doh jouse leh ladoh a pang ho jouse chung ah  Insung miten kipathu ana seijun ahi.

Chule Ginminlun Kipgen chung’a kisalel lhansung mite jouse chung’a CSO Saikul in kipathu aphong uvin ahi. Ginminlun Kipgen in vangset ato na chunga hi Kuki Inpi, KSO Saikul makaina a gamsung pumpin anahol ahin, gamsung mipi kiseingai na leh vangsetna toh Ginminlun ngailut najal la panla  Govt. Lang a kon SDO, Saikul PS chuleh Relief and Disaster Team ho chung’a jong kipathu aphong uvin ahi.

 

109 Bn, CRPF, Imphal ‘containment zone’ a kiphong

Imphal, July 14(ET): 109 Battalion, CRPF, Mongsangei, Imphal West a um personnel khat Tuesday nikhon Covid 19 positive ahi akihedoh in, sepai pa hi amaho battalion in amaho umna mun a ‘quarantined’ abol ahi.

Hiche thusoh jeh a Imphal West DC Naorem Praveen in Tuesday nikhon battalion leh akimvel ho ‘containment zone’ a phondohna anei tan, hiche dungjuiya, area a mi va le ding kiphal talou ahi. Battalion lutna (North), IVR connection Mongsangei Makha Leikai chule Mayai Lambi lamlen (South), Mongsangei lentol (East) chule Indoor Hall leh battalion Gym (West) hojong akikha na mun in ahop tha ahi.

Containment zone a mi alut leh achedoh ding kikhah a, school, office mun ho kikhah a, chule mipi kikhopna kin gon, gari lhai ding ho kikhah ahitan, containment zone a um jousen Aarogya Setu application aman tei diu chule active surveillance kipan ahitai.

“Koi tobang containment zone a kikoi dan palkeh a aumleh Indian Penal Code, 1860 Section 188 noiya gotna kipe ding ahi”, tin order chun aseibe in ahi.

 

Guwahati jail a um 95% val Covid-19 positive ahi, tia kisei

Guwahati, July 14: Assam gam a um Guwahati Central Jail a um khat in state authority henga lekhathot apeh na a thil tamtah asosal in ahi.

Lekhathot a hi, jail a um hop 95 tobang vel Covid 19 positive ahi, tia kiseiya chule jail sunga coronavirus natna vetkol nadinga natoh ima chelha lou chule kigong lou ahi, ati. Hiche thu hi NIA court in achesa December nisim 22 nikho a Krishak Mukti Sangram Samiti (KMSS) lamkai Akhil Gogoi, Bitu Sonowal leh Dhairrjya Konwar toh kimat tha Satra Mukti Sangram Samiti (SMSS) lamkai Manash Konwar bail a alhadoh jou uva kihedoh ahi.

Monday ni a Manash in bail ngehna anei hi asan peh u ahi in, KMSS a atohkhompi ho Central Jail a kon ama pui dinga cheu ahi. Ahivanga, jail a um atamjo in coronavirus natna anei tah jeh uva jail authority hohin alhadoh nom louvu ahi. Covid 19 positive hi a jail a umho puidoh dinga bus ni ache a hi Dudul Das kiti mikhat in gari a kon lekhathot ase lhah a, hiche lekhathot a kon jail sunga thil umchan ho kihedoh ahi.

Assamese pao a lekhathot kijih ahi in, lekhathot a hi, Jail sunga um mi atamjo (95%) val in coronavirus natna aneiyin, ahivanga, abon uva test kibol loulai ahi, ati. “Test kakibol nauva positive kahiu hetdoh ahijou nunga jong achesa nidan 40 sunga hi kakijen nadiu ahilouleh diet (neh pha neh nading) ima umlou ahi. Natna nei holeh natna nei lou ho umkhom ahi. Mi 2 hi feet 2 kikah mun ong a lum ahi in, room khat a jail a um mi 50 val kilup khom sah ahi”, tin lekhathot a aseiyin ahi.

Jail authority hon thutah selguh ding agot u ahi, tin jong ngohna aneiyin ahi. Alangkhat a thuso mihon Dasarath Das, Inspector General of Prisons, Assam a kon thutah hetding agot uva athu akhol nauva Das in, antigen test achelha in, Sunday nikho a Covid 19 positive case 51 akimu e, tin aseiyin chule amaho hi kichondoh (transferred) ahitai, ati.

Natna nei ho leh anei louho akikoi khom e, tia kisei hi thudih ahipon, natna nei ho isolation ward a kikoi ahi, tin jong aseiyin ahi. Jail a umho chon nadinga security chungchang a boina anaum sa ahitan, hiche jeh a kihetkhel na um hiding ahi, ati.

“Central leh state government in SOP asodoh jouse Covid 19 natna neiho chungchang a kijuiya, screening kibol jing ahi. Jail a um phabep isolation ward a jong kichon ahitan chule mask bol tei ding dan jong khoutah a kijui ahi”, tin Das in aseibe in ahi.

 

MPS Brinda in Lhukhosei kimat thu a High Court a affidavit apeh Police Department in suhthengna nei; official ho suh minset nading ahi, tia seiyu

Imphal, July 14(ET): July nisim 14 nikho a MPS Brinda in High Court a affidavit file abol thu a Imphal Free Press a article kipe chule Brinda in Drug Kingpin Lhukhosei toh milen milal ho akihetna thu asosal na chungchang thu kisei PRO, Police Department, in suhthengna anei uvin ahi.

CM in Lhukhosei kilhadoh nadinga Brinda hatah a ano ahi, tia July 14 ni a ‘The Morning Bell’ leh thusoh dang dang a kisei W Bashu Singh, MPS, Public Relations Officer, Police Department Manipur, Imphal in thuso aneina a suhthengna anei uvin, Chandel ADC Chairman anahi Lhukhosei Zou kimat thu FIR No. 43(6)2018 NAB-PS U/S 22(b)/22(c)/21 (c)/25/29/60(3) ND&PS Act leh 27 Arms Act a Investigating Office ho akino na, pohgih akipeh na ima aumpoi, tin aseiyin ahi.

Phatah a thukholna aum jouva case charge sheet kisem a, nisim 06.10.2018 ni a kipelut ahi. Manipur Police Department in khamnathei douna a gal asat na a tomngai tah leh kitah tah a na atoh jing ahi in, themmona nei ho akimat a kon charge sheet akipeh lut chan a Department in dan dungjuiya themmona neiya kingoh jouse chunga legal action akilah nadinga angaicha ho abol ahi, ati.

Th. Brinda, MPS in ngohna thu asei, niseh thusoh a kipe hohi abul umlou ahi in, July nisim 14 thusoh a kipe hi thusoh a minchong officer ho suh minset nading ahi. Manipur Police department in kitah tah a na atoh jeh a aphatcha charge sheet kipelut a chule legal action dang dang case toh kisaiya chelha thei ahi, tin Police Department in suhthengna anei uvin ahi.

Manipur Police in gamsunga khamnathei douna a pan alah jom ding ahi, tin thuso chun aseibe in ahi.

 

PHED CCpur Division in insung cheh’a twi theng lutsoh nading gelkhoh na’a natoh chelhah pi jing

B.Lalboi Gangte

CCpur, July 14(ET):  Public Health Engineering Department (PHED) Churachandpur Division in CCpur Khopi sung twipeh dohna Zone-III, Khuga Dam akon mipi atam theipen in aphatchompi thei natei ding’a panlah na natoh achelhah pi jing uvin ahi. Chuleh tulai Service Reservior 14 ah natoh anei jing’u naban’a Service Reservior ding’a twi peh lutna main line Tedim Road-Nehru Marg Junction ah dei bang tah’a twi anachethei  lou jeh in janni (July 13) chun Lalringdik@Dika, Section Officer vetkol nanoi in Department in JCB toh kitho in anasempha uvin ahi. Hiche mun hi semjou sa anahi vang in twi peh na Bijang Line leh Rengkai Line ah deibang abah jou lou jeh’a athah sem kit’u ahi.

Hetthei khat chu hiche natoh nahi janni (July 13) nilhah ah ana jotheng sa’u ahitai. PHED Churachandpur Division hin NESIDS project noi’a achesa July nisim 8 nikho’a Churachandpur Water Supply Distribution Network ana kihongdoh hi avetkol ahi. Hiche project hin insung 73,014  twi don ding apehdoh thei ding tupna ahi naban’a achesa kum 30/40 akon kimang pipe lui ho kheldoh na ding’a pan alah naoban’a New Development Bank in soft loan dan in DK. Crore 3,000 crore jong sanction abol uvin ahin a sum ki releases hih lai jong leh Government in pipe phachom pi achodoh tan ahi.

Hiche toh lhon’a PHED Churachandpur Division in  twi pehdoh na ding Mata, Thingkangphai, Tangnuam, Khominthang, Lamka College, LRRC Compound, Ebenezer Compound, Don Bosco School Compound, Rengkai-Muolhlum, Churachandpur Higher Secondary School, PHE Compound, IB Compound, Sielmat leh Bijang PHE Compound ho’a Service Reservior mangcha’a mipi twi-theng pehdoh ding ti ahi. Alangkhat’a Department in mipi jouse kining lhing tah’a twi-theng pehdoh na ding’a pan nasatah’a alah vang uvin mi 3,500 val in Department hetpeh nalou vin twi gu jong ana um kit in ahi. Hijeh chun Department in insung khosahna hahsa ho gelkhoh najal in twi permit/connection bolman ding Dk. 2,000 Kum khat twi fee hi ding ahi ati.

 

NSCN-IM hon Assam Rifle ho heng a ‘Ceasefire’ chungthu a suhchetna neiding a kal khat teppeh

Kohima, July 14: NSCN-IM thulhut khat in aseina achun25 Sector of Assam Rifles a Commander, Brigadier Vijay Chasar in aseina a Ceasefire hi Nagaland bou a kibol theiahi in Arunachal Pradesh a akibolthei poi tiaasei in akinthei pen a haptakhat sung a suhchetna ahinpeh ding in phat atep peh uvin ahi. Vijay in hiche thu ahin sei jehchu AP state sung a Longding District a NSCN-IM ho tulha July 11 a mi 5 AR hon akaplihna chunguva asei ahi. June 14, 2001 nikho a Bangkok Agreement dungjui chun GoI leh NSCN ho kikah a Ceasefire chu Territorial limit umlou ding a kinoptona ananeiyu ahi. Hiche tohlhon in Arunachal Pradesh a Naga ho chenna sung a ceasefire aumleh umlou thu kicheh tah a donbutna ahinpeh ding in jong asei in ahi.

NSCN-IM thuso in aseibena achun hapta khat kah sung a kichehtaha official tah a dohbutna ahinpeh ding un AR ho ahetsah uvin phat tep sung a donbutna akimu loule khonung a thilsoh ding a themmo achanlou ding uvin jong gihna aneiyu vin ahi.

Hettheikhat chu tukum April lhachun Armed Forces Special Power Act chu Arunachal Pradesh gamsung a disturbed area a September chanakisusaobe in ahi.

 

CM Biren in Idea Start Up noiya beneficiary 146 dangka lakh 1.50 cheh loan pehdohna nei

Imphal, July 14(ET): Chief Minister N Biren Singh in CM’s Secretariat, Babupara, Imphal khopi a Manipur Startup Round II a dinga Idea Stage Start Up noiya beneficiary 146 dangka lakh 1.50 cheh 1st instalment a subsidy grant pehdohna aneiyin ahi.

Kin goun hi Planning Department, Manipur government in agon ahi. CM Biren in ahoulimna a, Manipur Startup scheme hi tohmun neilou gamsung mi tamtah in aphatchompi ahi, tin aseiyin chule sumkolvei na kisem nom a, ahivanga sum dinmun a lhahsam na nei akilhengdoh ho phatchomna dinga kibol ahi, ati. Akilheng doh hohi training apeh uva chule training lolhing tah a jou hobou sorkar in subsidy grant apeh ahi.

Startup scheme a lolhinna nei phabep ho thusim hi mipi hetsah ngai ahi, tin CM in aseibe in ahi. HT Industry Loktak in anatoh hi kum khat a ‘rolling money’ 2.81 crore a natoh apat ahi in, sorkar a kon loan/grant amu jouva kum khat a company hin dangka crore 9.65 amu jou ahi. Hitobang ma a hi M/S Medilane Health Care annual sale transaction jong kum khat a dangka crore 4.17 hi ahi, ati. State in Covid 19 toh kisaiya  Medilane a kon ambulance alah (hired) ahi.

Startup scheme noiya, ompany chom chom in mi sangkhat val natoh apeh ahitan, tu masanga ‘customer outreach hi 70,000 ahi in, tua hi 1.96 lakh lhing ahitai. Chule revenue jong crore 7.41 a kon tua hi 24.60 crore lhing ahitai. Beneficiary ho kipe subsidy hi state economy khantou na jong hiding ahi. Gamsung mihon mopohna anei teng uleh bou society a chamna umding ahi. Kum 3 sunga ‘law and order’ phatah a machal ahi, tin CM in aseiyin ahi.

Covid 19 chungchang jong aseiyin, CM in RIMS leh JNIMS a test kibol thei jat sorkar in akalsah a, pending case um talou ahi. Athah a hung kile ho SOP dungjuiya test kibol a, aphatcha result amu diu ahi, ati. Startup scheme noiya business leh entrepreneurship sorkar in hatah a akhohsah jeh a Manipur business sangtah a machal ahi, tin aseibe in ahi.

Kin-goun a Minister (CAF & PD) Karam Shyam, Minister (Forest & Envt), Awangbow Newmai, Minister (PHED) L. Dikho, Lok Sabha MP Dr. R.K. Ranjan, Rajya Sabha MP (elected) Leishemba Sanajaoba, Dy Speaker K. Robindro, MLA H. Dingo, MLA L. Susindro, MLA Ngamthang Haokip, MLA Vungzagin Valte, MLA Ginsuanhao, MLA O. Lukhoi, MLA S. Rajendro, Additional Chief Secretary (Planning) Dr. Rajesh Kumar leh adang dang jong apang uvin ahi.

Covid-19 vaccine mihem chunga patep na kipanta

New Delhi, July 14: India usng a covid-19 vaccine semdoh na ding a mihem chung a patep na chu tuni in an akinei pan tan ahi. Hiche thu chu Balram Bhargava, Director General of the Indian Council of Medical Research (ICMR) in tuni a phondoh na ana nei ahi.  Hiche vaccine test bolna ding a hung kipedoh chu mi 2 ahi akiti. AHung kipedoh mi sang lam alhin dan jong hetsah na ana nei uvin ahi. Hiche vaccine sem na ding a US, UK le Russia ho in jong kino tah a asem tah dan u tahlang na ahin nei uvin ahi. Hetthei khat chu ICMR  in August lha kim kah a vaccine semdoh na ding a thupeh an anei toh lhon a expert ho le opposition ho in politics toh kimeh beh ahi tia demna ana nei u ahi.

DIG level range jurisdiction kikhel

Imphal, July 14:   Police department sung a DIG level a range jurisdiction kikhel na ahung kinei in ahi.  Thuso kimu dungjui in Range 1 hi Imphal East le Imphal West hiding, range 2 hi Thoubal, Kakching, Chandel le Tengnoupal hiding,  Range 3 hi Bishnupur, Churachandpur,  Pherzawl, Noney le Jiribam hiding chuleh Range 4 hi  Senapati, Kangpokpi, Ukhrul, Kamjong le Tamenglong hiding ahi akiti.