Guwahati a thingnoi kiloikhomna 8 a kon cadre 644 in galmanchah koilha;...

Guwahati a thingnoi kiloikhomna 8 a kon cadre 644 in galmanchah koilha; sorkar henga kipedoh tau

704
0
SHARE

Guwahati a thingnoi kiloikhomna 8 a kon cadre 644 in galmanchah koilha; sorkar henga kipedoh tau

Guwahati, Jan 23: Assam gam a thingnoi kiloikhomna get (8) a kon agom a thingnoimi 664 in Thursday jingkah a galmanchah akoilha uvin chule amaho ‘rehabilitation’ a dinga kigong government scheme a panlah dinga kitepna anei uvin ahi.

Assam gam a kum 40 lhing thingnoi jeh a boina auma kon thingnoi dalha a sorkar khut a kipehlutna kin kibolna alenpen ahitai. Thingnoimi 644 holah a United Liberation Front of Asom (Independent), National Democratic Front of Bodoland (Saoraigwra), CPI (Maoist), National Liberation Front of Bengali (301), National Santhal Liberation Army (87), Adivasi Dragon Fighters (178) leh Rabha National Liberation Front a lamkai luboh phabep jong apang uvin ahi.

Thingnoi atamjo hin gam kinaipi Myanmar a kichuhna aneiyu ahi’in, kum masa a India gam a kon thingnoi ho douna a operation akibol jouva hungdoh u ahi. Thingnoi kiloikhom hon kipehdohna kin abol nauva Assam Chief Minister Sarbananda Sonowal henga galmanchah apedoh uvin ahi. B Saoraigwra lamkaina NDFB(S) in Centre chule Assam sorkar toh Suspension of agreement (SoA) soi akai jou ahi’in, sorkar in faction adang thum tohjong kinoptona soi akai ding ginchat ahi.

Kin gon a Chief Minister Sarbananda Sonowal in ahoulimna’a, “BJP in sorkar ahin sem’a hi Assam gam thingnoi beina gam hisah ding, gamdang mi beina gam a sem ding tupna anei ahi”, ati. Gamsunga chamna pohlut ding akhohsahna thu aseiyin chule chamna det aumna dinga mijousen pan alah a, khantou machalna natohna a pan alah diuvin temna aneibe in ahi.

Centre in aboipi Act East Policy noiya Northeast hi South-East Asian gam ho dinga ‘gateway’ ahi’in, sorkar tohgon phatchomna gamsung mihon akilah dinga temna aneiyin ahi. “Ka sopi thal choi hon lunggel leh lungthim hi gamsung khantou machalna dinga asemtoh dinga temna kanei ahi. PM Modi lamkaina noiya gam khangtou khat a kisem uhite”, ati.

Gamsunga kichepi Swavalamban scheme thu aseiyin, hiche scheme noiya thingnoi sorkar khut a kipedoh hon thepna chom chom a kichuhna amu ahi. Assam Chief Secretary Kumar Sanjoy Krishna injong ahoulimna’a, “Thingnoi hon lampi dih aho a, chamna ahol teng ule Assam gam gangtah a machal ding ahi. State sorkar in galmanchah koilha a thingnoimi ho ‘rehabilitation’ peh nadinga scheme tamtah akoi ahi”, tin aseiyin ahi.

Additional Chief secretary Jishnu Baruah in jong houlimna aneiyin, state leh centre a kon thingnoi ho dinga scheme lhingset um ahi’in, ahivanga koi tobang thingnoi natohna a panla a thingnoimi aum akihetdoh a ahileh ‘full settlement scheme’ a kon kikah ding ahi, tin gihna aneiyin ahi. Assam DGP Bhaskarjyoti Mahanta in nikho hi Assam gam a dinga thusim a seithei nikho ahi, tin aseiyin ahi.

Centre in kum masa a thingnoi akipedoh ho dinga grant ho velvetna aneiya, dangka lakh khat a kon lakh 4 a akalsah a chule lhaseh’a kipe stipend hi kum thum sunga dinga dangka 3,500 a kon 6,000 a akalsah ahi. Revised policy a hi vocational training, rehabilitation camp sahna ding fun chule surrenderee ho dinga Aadhaar biometric registration (compulsory) jong pang ahi.

Achesa 1998 kum a kon Northeast gam a ‘surrender-cum-rehabilitation policy’ kichepi pan ahitan, velvetna anei uva sum akalsah uhi lampi dih jot dinga thingnoi akou nau ahi. ULFA (I), KLO leh adang thingnoi tamtah tu dinmun a hi ‘peace talk’ a panglou ahi.

Sorkar khut a kipelut a thingnoimi hon agom a galmanchah 177 akoi uvin, hiche lah a hi ‘explosive’ kg 1.93, grenade 52, bomb 71, rocket launcher cell 3, meichang 58, khukuri 17, RT set 2 leh detonator 306 pang ahi. Thursday nikho a sorkar henga kipelut a NDFB thingnoimi hohi hemkham neiya NDFB S, Saoraigwara, Bidai ahilouleh Batha faction toh kisaina nei ahi pouve, tin police hon thuso miho henga hetsahna anei uvin ahi.

Achesa 2012 kum a jong thingnoi kiloikhomna chom chom 9 (koh) a pang thingnoimi 1855 in galmanchah ana koilhah ahi.

Republic Day kigotna achelhah jing laiya Imphal khopi sung’a bomb pohkeh; numei chapang khat kisukha

Imphal, Jan 23 (ET): Ahunglhung ding Republic Day a ding’a kigotna nasatah achelhah jing’a Police/CDO hon muntin a operation aboljing laiyin Thursday jingkah nidan 4.55 don a Imphal khopi a bomb hattah khat apohkeh in, thilsoh a kum 10 a upa numei chapang khat akisukha in ahi.

RIMS Road, S3 Coaching Center kom a bomb pohkeh ahi. Mel hetlou hon bomb asuhpoh nauva dukan nga se a chule chapang nu hi bomb hu in asuhkeh glass in asekhah a kisukha ahi. Bomb hi electric post noiya kikoi ahi’in, tahsan umtah thulhut in asei dungjuiya, hiche mun a kon Maruti car khat speed hattah a RIMS Hospital lang jon a alhaidoh ‘minute’ phabep jouva bomb pohkeh ahi.

Imphal West Superintendent of Police K Meghachandra leh police official adang hon Manipur police bomb disposal squad team chule forensic team hotoh thilso namun adel lut uvin ahi. Alangkhat a Imphal West Police commando hon bomb apokeh jouva khopi sung mun chom chom a operation abol uvin ahi.

Bomb apokeh jouva Manipur police hon Naga nullah a kon remote-control devise khat amudoh uvin, hiche manchah hi bomb suhpoh na a kimang hidinga tahsan ahi. Tuchan a thilsoh toh kisaiya kiloikhomna koiman kiphonna anei loulai ahi.

January nisim 26 nikho a um Republic Day hi gamkaiya um thingnoi kiloikhomna atamjo in boycott abol’a chule gamkai pumpi a nidan 12 bandh umdinga thuphon aneiyu ahitan, Republic Day parade a dinga gamsung in rehearsal abol pet a bomb pohkeh ahi.

Alangkhat’a, Nagamapal a cheng ho chule dukan bol hon RIMS Road, Nagamapal Imphal a bomb kisuhpoh demna a toumun kiphinna abol uvin ahi. Kiphinna a pang Dr. Ningthoujam Sajana in thuso miho akimupi na’a, Nagamapal RIMS road lamlen hi Imphal khopi a lamlen thupi loi khat ahivanga, street lamp umlou ahi, tin aseiyin chule gamkaiya bomb kisuhpoh demna sangtah aneiyin ahi.

Galguh bol kiloikhomna 6 in Republic Day ni le nidan 12 sung bandh bol dia phongdoh

Imphal, Jan 23(ET): India in Republic Day 71st channa January 26 nia aman ni le WESEA tia kiloikhom North East gamkai a kon galguh 6 in jingkah nidan 6 a pat nilhah nidan 6 agom a nidan 12 sung total shut down koudin aphongdoh tan ahi.

Hiche thudol a (Sainkupar Nongtraw) General Secretary, Hynniutrep National liberation Council (HNLC), (N. Oken) Chairman, Kanglei Yawol Kanna Lup (KYKL), (Ksh. Laba Meitei) President, Kangleipak Communist Party (KCP), (H. Uastwng Borok) President, National Liberation Front of Twipra (NLFT), (Jiban Singh Koch) Chairman, Kamatapur Liberation Organization (KLO) le (J.K. Lijang) Chairman, People’s Democratic Council of Karbi Longri (PDCK) hon lekha asodoh a chu hitobang kingon a panla lou dia North East gamsung mipi temna anei un ahinla emergency service le hou le beh toh kimat kingon ho vang lha kang din aphongdoh un ahi.

North east mipi ho Republic manding phalpeh hilou a North East state government ho makaina Republic Day man dia tohgon achelhah hi kichehsel a semthu le hunam mang a mipi tuhchahna WESEA in adoujing chu ahi e, ati.

Chule anina in themjilna le economic lam mang in adihlou in thusim hei kon le in mipi jong apuikhel un, media jong adihlou bou phonna in amang cha un, athum channa in social, economic le political dinmun jong ama ho deilam in abol un achaina kei in mipi jong akitomo sah kit un, hiti a kichepna ho tuhtang a umthei nading a North East gamkai a Republic Day hi man lou ding ahi e tin galguh kiloikhom ho thuphon chun aseiye.

Non-SoO Kuki thingnoi SDFK leh KIA/KIO in Republic Day boycott bol dinga thuphon nei

Imphal, Jan 23(ET): KNF-N ban a SoO neilou Kuki thingnoi kiloikhomna Socialist Democratic Front of Kukiland (SDFK) leh Kuki Independent Army/Kuki Independent Organisation (KIA/KIO) in jong Kuki chenna mun jouse a Republic Day boycott bol dinga thuphon anei uvin ahi.

Information and Publicity Secretary, S Kuki in thuso aneina’a, achesa 1760 kum a kon Kuki hon pupa gam huhna ding leh achandiu atha neinau huhna dinga British ho chan anadou ahi’in, hiche hi ‘Anglo-Kuki War’ tia kihe ahi, ati. Dan toh kitoh a kiloikhomna in Kukiland athum chule Chamlhat gam (Sovereign state) hetpehna nei dinga vannoi henga temna anei ahi, ati.

(Grierson, GA (1904) ‘Linguistic Survey of India,’ Vol 111, Part 111) leh ‘The Encyclopaedia Britannica” (1962, Vol.  XIII, pp511) a Kuki hon mol apang ni – Assam leh Bengal gam Burma a kon akikhenna, Namtaleik vadung south lang alo kipe ahi. Kuki ho chenna gam hi Naga Hills a kon Sandoway District, Burma chan chule Myittha vadunga kon Bay of Bengal nailam chan ahi, tia Grierson (1904) a kipe ahi.

Dr George Abraham Grierson, Superintendent, Department of Linguistic Survey of India (1904) in record abol dungjuiya Kukiland hi India, Myanmar leh Bangladesh gam in dan dihlouva alo’a, tuni chan a atoupha ahi’in, World War-II kichaiya kon Chamlhatna ahen gah ahi, tin jong aseiyin ahi. Pathen in eipeh u Kuki ho chenna gam, pupa khanga kon igam anahi ho lo kit nadinga SDFK in abolthei chan abol ding ahi, tin S Kuki in aseibe in ahi.

Kuki Independent Army/Kuki Independent Organisation (KIA/KIO) in jong ahung lhun ding Jan nisim 26, 2020 India Republic Day boycott abol toh lhon’a Jan 25 nilhah nidan 6:00 apat Jan 26 nilhah lang chan Manipur State leh National Highway a gari lhai theilou ding ahi tin thupeh anei in ahi. Hiche phat kitep sung’a jalhang akon leh mimal akon sum kolvei naho leh che leh vah leh jong koiman abol lou ding ahin emergency alhai Press/Media, houbung kin, dam mo nachung, thina chung ho vang kilhakang ding ahi ati. Mipin India Republic Day boycott kibol jana apeh uva agelkhoh ding uvin jong ngeh leh temna anei in ahi. Kuki min’a kiloikhom naho jouse in hiche nikho kingon’a pan alah lou ding uvin jong hetsah na nei in ijem tia akisei nahsah lou aum leh aman mo akipoh ding’u ahi tinjong John Khongsai Secretary & Information Publicity KIA/KIO GHQ in hetsah na anei in ahi.

Hiche toh lhon’a India Republic Day boycott kibol hi KIA/KIO in ama tha leh jung’a hiche nikho hi Manipur thinglhang District ho’a boycott kibol ahi. KIA/KIO in Manipur Government leh Centre Government in “Kuki State” semdoh na ding’a lungthim leh tha’a lampi asem doh tokah se’a KIA/KIO in India Republic Day, Independent Day kiti ho  kum seh’a boycott kibol kinga lou ding ahi ati. Kuki Nam mi tehi mikang (British) vaihop sung’a Kuki te gam chu gambeh thum tichu  India, Myanmar / Burma leh Bangladesh gamho’a anahop khen uva hiche gambeh thum’a sekhen’a um ahi ti vannoi in ahet ahi tah jeh’a Kuki hi Nam neo pen kisoh, Nam khangtou te kisoh ahi. British hon anakhen telsa Kuki gam tundoh kit nading’a mima sahon 1987 kum akipat Kuki pasal mi tamtah in hem-le-thal ana dom pan tauvin ahi.

105 Indian Science Congress a sum che dan MU vaipo hon adih louva apeh, thuso mihon sosal; MU authority hon RTI Act jana neilou

Imphal, Jan 23(ET): Achesa March nisim 16 a kon March 20, 2018 kum a Manipur University a 105 Indian Science Congress kimanna a kisumang sum ho chungchang Right to Information Act, 2015 a kon activist khat in athu akholna a T Santikumar Singh (Deputy Registrar) MU a CPIO in information dihlou ape in ahi.

November nisim 18, 2019 kum a activist pa thudoh adonbut na’a Indian Science Congress a catering service (nehna) leh delegate ho lhunna (accommodation) a akisumang ho pehthei dinga aseiyin ahi. Aman asei dungjuiya MU Administration in January nisim 1 nikho a M/S Babina Health Care & Hospitality Pvt Ltd. Imphal henga ‘electronic transfer’ a dangka 5,07,231 apeh u ahi. Accomodation a dinga dangka 53,77,94 hi M/S Gazal Caterers, Faridabad henga March nisim 19 nikho a ‘electronic money transfer’ mangcha a kipe ahi, ati ahi.

Information hi jihtho a Novemebr 18, 2019 ni a apeh ahi’in, MU administration in expenditure adang a document aneipoi, tia asei ahi. Imphal Times special team hon athu akhol nauva Manipur University a CPIO in RTI activist pa donbutna dihtah apehlou hetdohna aneiyu ahi.

IT in akholdoh dungjuiya catering, decoration, lighting, stage leh adang dang a dinga agom a company 13 apeh uhi dangka 10,40,89,174.60) lhing ahi. Agom a akisumang jat lah a hop 30 (1,93,56,509) hi March 1, 2018 ni a sanction kibol ahi’in, Indian Science Congress Purchase & Works Committee in February nisim 28, 2018 ni a meeting abol nauva phatsahna apeh jouvu ahi. Committee in natoh chom chom bol dinga company 13 ngansena peh dinga aphatsah ahi.

Company 13 lah a M/S Gazal Caterer hi dangka 2,47,80000.00 peh dinga aphatsah u ahi’in, CPIO in donbutna apeh na a dangka 25,00,000 akipe’e tia asei toh kitohlou ahi. Donbutna hi Sandhayarani NIngthoujam, Finance Officer MU leh Heigrujam Medha Devi, Project Cashier, MU hetpehna a kipe ahi.

Accommodation a dinga M/S Babina Health Care & Hospitality Pvt. Ltd, Imphal dangka 53,77,945 akipe e, tia CPIO in asei hi Central Information Commission jouthu kiseipeh ahi, ajeh chu 105 Indian Science Congress in aphatsah company list 13 holah a M/S Babina Health Care & Hospitality Pvt. Ltd panglou ahi. Manipur University authority hon jouthu apeh uhi Central Information Commission angol bol nau ahi, tin thuso chun aseibe in ahi.

UTPCM in thinglhang district a office ho vilding; office kailou ho gotna peh dia gihna nei

Imphal, Jan 23(ET): United Tribal People’s Council Manipur (UTPCM) in Amity Hall, Adimjati, Chingmeirong mun a kilolna ananei utoh lhon in thinglhang district ho a office ho aban nei cha a vetlhah ding in phondoh na ahin nei uvin ahi.

Kiloikhomna in department tin a office ho phate cha a na kitong naam tia a vetsui na anei diu dan jong hetsah na ahin nei uvin ahi.

Hiche vilna kinei na a natong office kai lou aum le akisai pi vaipo ho ang a hetsah na kinei a daan toh kitoh  a gotna akipeh ding dan jong tahlang na ahin nei uvin ahi. Dammo kivetsah na mun, themjil na mun le telecom ho adeh  a akiha vetchil ding dan tahlang na ahin nei uvin ahi. Mipi sum kilah a mip na toh lou kiti hi daan toh kitoh lou ahin hiche toh lhon a kiloikhomna in kimoh vet talou ding ahi ati.

Manipur High Court in State govt. heng a Home guard ho lhakhat sung a alhom pen a Dk. 18,689 apehding a thupeh nei

Imphal, Jan 23(ET): Supreme court thulhuh in achesa 2015 kum achu home guard ho lhalo state police ho atoh kibang ding a thulhuhna anei vang uvin tuni chan in thulhuhna bang in achelha pon tuni chun Manipur High Court Justice MV Muralidaran single bench panna in state government heng ah home guard ho lhakhat lo aniem pen a state police ho lhalo toh kibang a dk. 18,689 siempeh ding in thupeh aneiin chule hiche pay in tukum Janunary lha apat hiding ahi in hiche hi hapta giet sung a apehdoh tei ding un jong thupeh anei uvin ahi.

Hiche tobang court thupeh aum kit masang achun state government in home guard ho heng ah dk. 7,730 lhalo ape uvin hiche chu Manipur Home Guard Employee Welfare Association (MHGEWA) lunglhailou in Manipur High Court heng ah chouna ana bol un ahi. Tuni a order kiso in aseina achun, Home guard ho natoh hi Traffic police ahilou le regular police force natoh hotoh kibang ahi in amauho hi Chief Minister umna, Civil/secretariat office ho, Minister’s office le inmun ho chule mithupi dang dang chenna inho a kimangcha ahiuvin anatoh uhi koi niemlou ding ahi ati. Duty allowance a dk. 5000 akipeh tha vang a anatoh uhi police constable ho natoh toh kibang ahi ati.

Deputy secretary, Home in affidavit filed abolna achun home guard ho lhalo hi contract a kila ho dk. 7730 ading a kibolpeh ahi in chule allowance reimbursement guard khat a dk. 6000 kibolding peh in state in abolthei tapon chule gamsung a sumle pai dinmun ahoilou jeh a pehding dol kipetheilou ahi ati. Hinlah Home Ministry in 18,689 hi anatoh dan uh vet a pehding dol a kibol peh ahi in state in apehtei ding dol ahidan jong asei in ahi.

Court in thupeh aneibe na achun, tuleh tu dinmun a home guard ding lahlutbe tahlouva aumsa ho hi kichuhna (training) peh a ahetnau khansah be ding in jong asei in chule tui lampang a kichuhna jong peh a apoileh leh fire station a jong koithei ahidan jong asei in ahi.

 

BJP lamkaina Govt. hi Democratic ahipoi; Gaurav Gogoi

Imphal, Jan 23 (ET): Congress Bhawan mun’a tuni CLP lamkai Okram Ibobi in thuso miho toh akihoulim na’a tule tu’a Government hi natoh boldoh neilou chuleh athusei dungjui’a chonlou leh panna bei’a muntin’a lim lentah tah tahdoh lampang’a bou kisalel Government khat ahi tin anaseiyin ahi. Chuleh Opposition kihi jong leh mipite ding gelkhoh naleh mipite phatchomna  ding’a natoh kibol jing ding hiche nachung chon’a Government lhinlel naho leh panna bei’a Newspaper dung’a headline ho’a lim lentah tah tahdoh sang’a toh le tham ho phate’a atoh joh ding uvin temna aneiyin ahi.

Hiche toh lhon’a BJP lamkaina Government suhkhel hohi mipite ang’a tahlang ngai ahi tin Gaurav Gogoi in tuni Congress Bhawan mun’a jong chun anasei in ahi. Chuleh Minister khat atohmun akon kahlhah ding hi State Assembly in jong ajo mama ahi in ahin hiche thu Supreme Court alhun hin  avetsah chu BJP lamkaina Government hi democratic ahilou dan atahlang na ahi ati.

Alangkhat’a Congress Bhawan mun ma ma tuni chun chamlhat gaalsat’a anapang Netaji Subhashchandra Bose penkal kum 123 lhinna anamang uvin ahi. Kingon chu MPCC in agon ahin hiche achun Assam MP chuleh AICC General Secretary Manipur (in-charge) Gaurav Gogoi, CLP lamkai O Ibobi, MPCC President M Okendro, MPCC President masa Gaikhangam, Congress MLA masa holeh tule tua MLA ho chuleh party worker hon pan anala uvin ahi. Kingon kimantoh lhon in Subhashchandra Bose lim chung’a pahcha ho anathe uvin ahi.

 

2030 kum kah a Hepatitis natna suhmang dinga bidoi um ahi: Health Minister Jayantakumar

Imphal, Jan 23(ET): Health Minister L. Jayantakumar Singh in 2030 kum kah a Hepatitis natna suhmang dinga sorkar in tohgon anei ahi, tin JNIMS Conference hall mun a Empathy Campaign cum Awarness Programme of Viral Hepatitis (free vaccination) kin kibolna a aseiyin ahi.

National Viral Hepatitis Control Programme hi 2018 kum a Health and Family Welfare Ministry, India government in hondohna anei ahi’in, Hepatitis natna chom chom ho manbeiya screening kibolna ding, test, nat hetdohna leh kijen nading bidoi neiya hondohna aneiyu ahi, tin Minister Jayantakumar in aseiyin ahi.

Tu le tua gamsunga centre ni um ahi’in, khat RIMS chule khat JNIMS a um ahi. Sorkar in district adang sagi- Thoubal,   Bishnupur, Chandel, Churachandpur, Ukhrul, Tamenglong leh Senapati district a kong Hepatitis Testing laboratory leh treatment centre ahondoh ahitan, district sagi a hi manbeiya nat test kibolna jong kipan ahitai, ati.

Natna hi igam uva kon suhmang ding lungtup ahi, tin aseiyin chule pan akilahkhom a ahile bou natna kijou ding ahi, ati. Airport Authority of India, National Health Mission, Manipur, JNIMS Authority chule ILPS, India apachatna thu jong aseiyin ahi.

Ukhrul district Kamjong a mithum athi ahetpehna thu Minister pa in aseiyin, action akilah theina dinga amun a thukhol dinga medical expert team ho akisol’e, tin aseiyin chule hiche chungchang a Health Minister, India government toh jong kihouna kanei ahi, ati. Empathy Campaign cum awareness programme of Viral Hepatitis with Free Vaccination kin hi Airport Authority of India, National Health Mission, Manipur, JNIMS Authority leh ILPS, India in agon ahi.

JNIMS Director Dr Th Bhimo Singh, Medical Superintendent, Dr Jitendra Singh, Director, Airport Authority of India, Imphal leh adang dang jong program a apang uvin ahi.

NSCN-IM Army Chief anahi Phungting Shimrang kihouna a apanlou hi NSCN-IM hon phatah a akisem tohgon hidinga kisei

Guwahati, Jan 23: NSCN-IM in sorkar toh kihouna anei aseilhah kon lang ahitan, kihouna a thingnoi lamkai luboh ho apanlou hi tamtah dinga lungdonna ahi.

NSCN-IM commander-in-chief anahi Phungting Shimrang hi kihouna jouse a member panla pen khat ahi’in, kum masa October lha a kihouna achaina (final round) asem nauva panglou ahi, tin thulhut in aseiyin ahi. Kihouna achaina pen hi India Interlocutor RN Ravi in October 31, 2019 kah a ‘peace process’ josoh nadinga ana phondoh ahijeh a thupi ahi.

New Delhi tohgon chunga Phungting Shimrang alunglhai loujeh a Yunnan province, China gam a atahsan tah lieutenant ni toh che ahi, tia thuso phabep in asei ahi. Phungting Shimrang, hi NSCN-IM Steering Committee member ahi’in, India douna a gal asat nauva China vaipo hon akithopi diuva ngehna nei dinga che ahi, tia thulhut in asei ahi.

Thuso a kisei hohi Thuingaleng Muivah, ato-kilonser (Prime minister), NSCN-IM in photchenna jong aneilou chule adihpoi, tia suhthengna jong aneilou ahi. Kinoptona a kisei ho kichen tah a akipeh loulai vanga Manipur leh Arunachal Pradesh gam a Naga ho ‘autonomy’ peh ding a NSCN-IM in athum hi asanpeh tauve, tia kisei ahi.

Flag leh constitution achombeh a athum uhi kitahso lou maithei ahi’in, Muivah in ‘Peace agreement’ sem nadinga New Delhi toh kihouna a kot ahon jing ahi. January nisim 18 nikho a Muivah leh NSCN-IM lamkai hon Police Complex, Chumukedima a RN Ravi akimupi uva, ‘competencies’ leh ‘Naga integration map’ apehlut u ahi.

Muivah in New Delhi tohgon ajuiya ahileh ipijeh a Phungting Shimrang panlah na thu a thipbeh a umham, tihi Nagaland a chamna ngailu hon aboipi pen thudoh khat ahi. Muivah in alampi akihon nahlai ahi, tia lunggel nei um ahi. Muivah hi Northeast a politics langa lhoh hoipen khat a Nagaland mihon atahsan ahi’in, 1975 kum a Shillong Accord soikaina um alolhin lou hi kihilna a anei ahi.

Phizo in ana suhkhel tobang abol kit louding ahi. Muivah, Isak Chisi Swu leh SS Khaplang in Shillong Accord jouva Phizo hi ‘traitor’ ahi, tia anaseiyu ahi. Phungting Shimrang hi ‘peace talk’ a apan tahlou jom a ahileh Muivah in ‘NSCN-IM hardliner’ ho alunglhai poi, tia New Delhi henga asei thei ahi’in, chule Shimrang hi ‘hardliner’ group ahileh kihouna jana pehthei hihih jong leh Muivah hi ‘traitor’ tia kisei louding ahi. Alangkhat a China in pan alah teng leh New Delhi hi lungjing ji ahi.

Phungting in April, 2017 kum a The Week a interview abolna’a, amaho movement hi asunga boi ahi, tia asei ahi.  Kum 23 lhing chamna thu asei nauva NSCN-IM hon China toh kiloikhomna anei aselguh jing ahi. January 25, 2011 ni a Wang Qing, kiti China spy khat TV reporter banga akisem na a kimandoh ahi’in, Nagaland gam a NSCN-IM headquarter mun avil jouva amat uva agam a anungsol u ahitai.

Qing hi People’s Security Bureau kiti Chinese intelligence agency a dinga thuguh khol ahi’in, Thuingaleng Muivah toh nidan li lhing kot kikha a kihouna anei ahi. October 2010 kum a NSCN-IM commander-in-chief Anthony Shimray ana mat u ahi’in, China agency toh kiloikhomna phatah anei ahi. Muivah in China intelligence official ho henga lekhathot apeh’a, China gam a NSCN-IM permanent representative dinga Kholose Swu Sumi alhen diuva asei ahi, tia Shimray in ana seidoh ahi.

Thulhut dungjuiya Muivah hi China gam a thumvei che ahitan, New Delhi douna a China thu hi amanchah jing ahi. Alangkhat a NIA honjong Pungting Shimrang @ James Jamir douna a ‘terror-funding case’ gangtah a akholdoh uva, December nisim 17 nia Pungting Shimrang jinu Alemla Jamir Domestice Airport (T-1), New Delhi a kon dangka lakh 72 toh amat tha u ahi.

Muivah jinu Icrak Muivah thuhil dungjuiya sum hi Nagaland gam a kapoh ahi, tia Alemla Jamir in NIA ho henga aseidoh ahi. NIA team hon New Delhi, Dimapur leh Imphal mun chom chom kholna anei uva, thil tamtah jong amat u ahi.

Alangkhat a NSCN-IM commander Hangshi Ramson Tangkhul tuhin Somra Tracts, Myanmar a um camp a thingnoimi 400 vel toh akisel’e, tin thulhut in aseiyin ahi. Tangkhul hi Somra a gal manchah polut dinga mopohna apeh u ahi’in, NIA honjong mat dinga ahol jing ahi.