‘Green zone’ a kiphongdoh Manipur a COVID-19 case thah kimudoh

‘Green zone’ a kiphongdoh Manipur a COVID-19 case thah kimudoh

61
0
SHARE

‘Green zone’ a kiphongdoh Manipur a COVID-19 case thah kimudoh

Imphal, May 14(ET): Mumbai a kon hung kile Imphal East district a cheng kum 31 a upa pasal khat Thursday nikhon Covid-19 positive ahi hetdoh ahi, tin official thulhut in aseiyin ahi.

Covid-19 positive pa hi Wednesday nikho a cancer a damlou apa toh Manipur gam hung kile lhung ahi’in, JNIMS laboratory a ama sample test abol u ahi. Mipa hi tua Imphal East district a um Jamia Halima aziz Girls School, Community Quarantine centre a akoiyu ahitan, JNIMS Isolation ward a achon diu ahi. Manipur gam a Covid-19 positive case athum channa ahi. Case masa teni hi damdoh a hospital a kon kisoldoh ahitan, hiche jouva Manipur gamsung hi Centre sorkar in ‘Green zone’ tia phondohna anei ahi.

Kum 31 a upa natna neipa hi tu naicha Mumbai a anu Covid-19 positive ahi akihetdoh jou, May nisim 5 nikho a hospital a thi ahi. Kivenna dinga, District Rapid Response Teams (RRTs) le Surveillance Team hi district jouse a kisemdoh ahi’in, district jouse a sub-surveillance team 40 jong um ahi. JNIMS le RIMS a Covid natna neiho kijenna ding Block jong gonsa um ahi.

Covid-19 positive case pa hi Khurai Hekru Makhong/Kairang Khomidok Umang Leikai a cheng ahi’in, Mumbai a apa damlou jen dinga cheu ahi. Mumbai a kon Imphal khopi chan Creta a hung u ahi. Tu chan geiya amahi anatna soh loulai (asymptomatic) hi ahi. Natna a kon kivenna dinga ahung kile jouse ni 14 ‘quarantine’ bol ding chule mi jousen social distancing ajui dinga kisei ahi’in, gamsung huhna dinga mijousen pan alahkhom dinga temna kinei ahi.

Achesa March nisim 24 nikho a UK gam a kon hung kile kum 23 a upa numei khat positive ahi kihedoh ahi. Case masapen nu hi JNIMS a akijen jou April 12 nikho a adamdoh toh kilhon a in a asol u ahitai. Hiche jou April nisim 2 nikho a Delhi khopi a Tablighi Jamaat khoppi a pang kum 53 a upa pasal khat positive ahi kihedoh kit ahi in, ama jong RIMS a akijen adamdoh jou April 19 nikho a discharge abol u ahitai.

Punjab a kon gamsung mi 932 kipohna train tuni hung lhung ding; Bangalore a kon train khat jong hung kipandoh

Imphal, May 14(ET): Mi 932 kipohna Punjab gam a kon hung kipan doh Shramik Special Train May nisim 15 sun nidan 1.30 don teng Jiribam Railway Station hunglhung dinga tahsan ahi.

Medical screening le angaicha dang dang abol jouteng ule Jiribam Higher Secondary School mai Jiri Tipaimukh Road a Transport department in akoi bus 74 in ahung kile ho ama ama district a um ‘quarantine centre’ chan apoh diu ahi. Hiche toh kisaiya Jitibam district Deputy Commissioner, W Malemnganba Chenglei in tuni sun nidan 11.30 chun office chamber mun a meeting alamkaiyin chule train a hunglhung passenger ho vetkol ding dan aseikhom uvin ahi.

Ahung lhung ding passenger hon mask akibol uva, social distancing ajui diu, hand glove le dustbin aman uva chule WHO guidelines ajui diuvin DC Jiribam in temna aneiyin ahi. Civil society organization chom chom, Department le Corporation thalheng hon janni nikho a Chennai a kon hung kile passenger ho vetkol na a district administration tosotna lhingset apeh jeh uvin kipathu asei uvin ahi.

Jiribam district administration noiya state police force, CMO, Transport department, Jiribam Municipal Council, PWD, PHED, Electricity department le District Head hon anatoh nau khoutah a achepi u ahi. Meeting a Jiribam SP M Mubi Singh le stakeholder chom chom jong apang uvin ahi.

Hetthei khat chu Shramik Special Train hi May nisim 13 nikho a Sirhind (Punjab) gam a kon hung kipan doh ahitai. North East Students’ Organisation Jalandhar representative, Rinlungso ZAS in thuso miho akimupi na’a, state sorkar in gamdang a atangden, atamjo simlai panna a gamsung miho phat hahsat pet a anungpui jeh a kipathu aseiyin ahi.

“Punjab a cheng Northeast simlai ho Lovely Professional University (LPU) in angailutna jal a sangtah a kipana anei uvin chule atangden ho train station chan apui uva neh le chah apeh u ahi”, ati. Thursday sun nidan 12.30 a Manipur gam mi ho hungtou na train hi Bihar gam lhung ahi. Hiche a kon West Bengal, Assam le Nagaland ajot pa uva, chuting le Jiribam, Manipur hunglhung diu ahi.

Alangkhat a, Bengaluru a kon passenger 1,450  (shortlist kibol) ho Tripura Vasini White Pearls, Armane Nagar a train atouna ding uva screening abol uvin ahi. Hiche train hi Covid-19 test abol jouvu Thursday nilhah teng Jiribam jon a hung kipan doh ding ahi, tia thulhut in asei ahi. Chief Secretary J Suresh Babu in asei dungjuiya, sorkar in Chennai a kon train khat chule Vadodara a kon a jong train khat a gamsung miho nungpui dinga tohgon anei ahi.

Train a hunglhung hohi Jiribam railway station a official luboh ho umna a screened abol u ahi’in, natna achal louna dinga vetsuina aneiyu ahi. Bus le private gari a hung kile hojong Mao Gate, Senapati district le Jiribam gate a screened kibol a, chule ama ama district a nikho 14 ‘institutional quarantine’ kibol ahi, ati.

Chennai khopi a kon Wednesday nikho a hung kile train a tou mi 1,141 tilouva tuchan geiya gamsunga mi 3,220 hi bus le private gari a gampam a kon hung lut ahi, tin state official report in aseiyin ahi.

Gamdang a kon gamsung miho puidoh nadinga pan kila jing ahi, tia Chief Secretary in mipin sorkar atosot dinga temna nei

Imphal, May 14(ET): Chief Secretary Dr. J. Suresh Babu in Wednesday nikho a Chennai, Tamil Nadu a kon special Shramik Train a passenger 1081 ahung lhung tauve, tin Thursday nikhon aseiyin ahi.

Passenger jouse abon uva ‘routine medical check up’ abol jou uva ama ama district level Quarantine centre a kichon ahitai, tin aseiyin chule passenger ho lolhing tah a nungpui nadinga pan la a department official ho chunga kipathu aseiyin ahi. Conference Hall, Secretary a thuso miho akihoupi na’a Chief Secretary in social media a kisei banga coach no S3 leh S18 a tou passenger ho thu a lungkhamna ding aumpoi, tin aseiyin ahi.

Passenger ho Imphal a ‘quarantine’ kibol ahi’in, phatah a test kibol ding ahi, ati. Chule Mao le Jiribam lamlen a kon hung kile a gamsung mi 300-450 vel ahi, tin Chief Secretary in hetsahna aneiyin ahi. Amaho hi alhun nadiu district a mopohna neiho hetsahna kipe masa a chule Quarantine centre’ a kipui ding ahi. Sorkar in oil tanker le passenger gari in ajot pa jing na Mao a ‘facility’ akoi be ding chule anohphah louna dinga achombeh a ‘screened’ abol diu ahi, ati.

Bengaluru, Karnakata a kon mi 1400 val touna train tuni a hung kipan doh ding ahi’in, May 17 sun kah a Jiribam ahung lhun ding tahsan ahi. Punjab, Chandigarh le Himachal Pradesh a cheng ho kipohna train jong Punjab a kon hung kipan doh ahitan, Friday sun nidan 1.30 vel le Jiribam hunglhung dinga ginchat ahi. Train dang khat jong Vadodara, Gujarat a kon hung kipan doh ding ahi’in, hiche train a hi Manipur gam mi bou hilouva Northeast gam dang dang jong hung diu ahi.

Dr J Suresh Babu in 100% test bolna dinga Health Department toh kihouna anei thu aseiyin, mikhat chu ‘negative’ ahile Quarantine centre a koi angaipon, chule ‘negative’ hi hohi inmun a ‘Home Quarantine’ kibol theiding ahi, ati.

Sorkar in jo chan a pan alah ahi, tin Chief Secretary in gamsung miho henga temna aneiyin, ahunglhung ding nikho a, ahung kile atam cheh cheh ding toh kilhon a mipin sorkar atosot diuvin jong temna aneiyin ahi. Press conference a Special Secretary (Home) H Gyan Prakash jong pang ahi.

CM Biren in gamdang a kon hung kile hon akholjin nau ho aselguh lou diuva temna nei

Imphal, May 14(ET): Chief Minister N Biren Singh in gamdang dang a kon hung kile a gamsung mihon health personnel ho henga akhol jin nau chule information dang dang aselguh lou diuvin temna aneiyin ahi.

Wednesday nikho a gamsung mi 1,140 val Chennai khopi a kon ‘special train’ a gamsung hung lhung uva chule amaho hi nikho 14 lhing ‘institutional quarantine’ a akoiyu ahi. “Kholjinna/che na thu akisel guh a ahile mijouse dinga manna le mahthahna hithei ahi”, tin Singh in video message a aseiyin ahi. Manipur gam mi 1,100 val gamdang a kon ahung kile toh kilhon a gamsung vaipo hon Covid-19 nat douna dinga phase thah ato u ahi’in, sorkar in ‘economy’ a lhahsamna gam ahi vanga thil aumdan dungjuiya vetkolna anei ahi, ati.

Hijong le, gamdang a umhon hahsatna ato kigel peh a administration in Punjab, Bengaluru le Hyderabad chule adang dang a kon gamsung miho puidoh nadinga jong pan alah ding ahi, tin CM in aseiyin ahi. “Quarantine centre chungchang a ahung kile ho lunglhai louna umding ahi, hijongle administration in apha pen peh nadinga bolthei chan abol ahi”, ati.

Tu dinmun a hotel nomtah tah a umding hi aphat ahipon, hinkho huhdoh ding hi khohsah ding ahi, tin aseiyin chule social media a ‘Quarantine centre’ umdan mikhat in demna anei thu CM in adonbutna’a, tu dinmun a hitobang demna thu kisei hi mipi kipuikhelna hithei ahi’in, ahung lhung ding ni 10-20 sunga sorkar panlahna mijousen athoh dinga temna aneibe in ahi.

COVID-19 douna a pan kilahna hi thi le hin thu ahi, tin CM in aseiyin chule party khenna umlouva MLA jouse panna a mijousen pan alahkhom phat ahi, ati.

Ukhrul district in ‘Quarantine period’ ni 28 a susao ding; Centre a umho thanopna ding thil chom chom gon peh u

Imphal, May 14: Ukhrul district in coronavirus nat venna dinga gamdang a kon hung kile ho ‘quarantine period’ hi nikho 28 a suhsaobe dinga thulhuhna anei uvin chule ‘quarantine center’ a lha lhung a umding ho nopsah nading lampi thah thah agong uvin ahi.

District mihon quarantine a umho hi la, thupi, houlimna le adang dang (audio system) a athanop na diu bol dinga thulhuhna aneiyu ahi. Khosung jouse a Quarantine center 180 vel kigong ding chule angaicha hohi insung miho, village authority, MLA chule adang dang in ‘quarantine period’ sunga apeh ding ahi.

Convenor, Tangkhul Forum on COVID-19, Tuisem Kamkara in ‘Quarantine center’ hohi khosunga umding ahi. Ni 28 lhing umdiu ahijeh a akhop louna diu chule nom asah dom nading uva thil chom chom bol dinga thulhuhna kinei ahi. Amaho hin ato hou (experience) thu aseina diu phat kipe ding, insung mite tilkhouna thu sei dinga kikou ding, pastor le chapang hon Pathen thu aseiya, la asah peh diu ahi, tin aseiyin ahi.

Centre a aumsung uva Bible le history lekhabu ho asim diuva kipe ding chule nikho kichai ni le kitetna (competition) kigong ding ahi. Chule social distancing dan ajui uva amaho a ding thei le anche ho akilah diu jong kiphal ding ahi’in, hiche hi environment’ athupi dan hilna jong ahi, ati. Alangkhat a police le medical team hon quarantine center a dan kijui nam ti vetlhahna anei jing diu ahi.

Quarantine center jouse a service akisemhoi be nadinga Control Room jong kisemdoh ahitai.

Andro a ‘by-election’ toh kisaiya boina aumjeh a CM in pan alah dinga khosung mihon temna nei

Imphal, May 14: Chief Minister N Biren Singh in aumding constituency ‘by-election’ jeh a politics a boina umho thu a pan alah dinga Andro constituency mihon temna anei uvin ahi.

Andro a cheng Sagolsem Chaoren kiti mikhat in, hiche thu a CM in angaicha action alah loule thil tuh lel hiding ahi, tin aseiyin ahi. “Wednesday nikho chun akihelou group hon mithum aman uvin, amit akan peh uvin, gari lhai sunga avo uve”, tin aseiyin ahi. Akikaimang mithum hohi Ningthoujam Okendro, Andro Awang Leikai a cheng, Chingakham Shyamkishore, Andro Sanapat a cheng chule Chaoren (aseipa) ahi.

Chomkhat jouva mithum hohi Dhiren @ Bobo kiti mihat achenna Huikap a ainmun a adalhah u ahi’in, hiche a hi Ex-minister anahi Th Shyamkumar naopa Rabi jong um ahi, ati. Rabi le Dhiren in mithum hohi Andro a Covid-19 camp kihonna chan ajuiya, hiche mun a Andro police hon alah uva, Yairipok CHC a ‘first aid’ abol u ahi. Chaoren in constituency a boina umlouva ‘by-election’ bol dinga kouna aneiyin ahi. Alangkhat a, Yairipok Ningthounai, Yambem le Changambi Khul khosung mihon Andro assembly constituency noiya um khosung 3 a chamna le lungmonna hi ex-minister Th Shyamkumar le Imphal East district police hon mock bomb le tear gas akap a, sangtah a asuhboi ahi, tin ngohna anei uvin chule mipi kichat nading hitobang thil khonung a abol lou diuvin temna anei uvin ahi.

Minister Nemcha Kipgen in Kangpokpi district sunga tohgon chom chom vetlhahna nei; Mihem ngailutna neiding hi tu dinmun a athupi pen ahi, tia sei

Kangpokpi, May 14(UNA): Kangpokpi district sunga adeh a district mi gamdang a tangden hung kile ho thu toh kisaiya natoh chom chom nilhum a vetlhahna anei jouva Social Welfare and Cooperation Minister Nemcha Kipgen in gamsung miho apachatna thu aseiyin, society jousen pan alahkhom a ahile Covid-19 nat douna a kikhelna umding ahi, ati.

Kangpokpi district head quarter alhun a Minister nu in amasapen a Kangpokpi assembly constituency sunga um meithai le pagong 290 val LAMPS, Kangpokpi DHQ mun a anchang kg 10, dal kg 2 leh allu ahop peh in ahi. Hiche jouva Minister nu in ADC Sadar Hills in Kangpokpi Women Welfare Organisaton le Kangpokpi Youth Union tosotna (KTC lamkaina) a ahon COVID-19 Emergency Food Kiosk avil in, ADC Chairman Haokholal Hangshing lamkaina a ADC Sadar Hills panlahna chunga akipana thu aseiyin ahi.

Hiche jouva Centralized Arrival Point, Brig. M Thomas Ground a ache in, district mi gamdang a tangden ahunglhung ho lamtona le ama ama quarantine centre a soldoh na aneiyin ahi. Centralized Arrival Point kivaipoh dan, magisterial official, medic, police le adang dang hon duty abol dan chunga Minister nun lunglhaina anei muthei ahi.

Minister nu in hiche jouva DC Kangpokpi, CMO chule SDO a mopohna nei hotoh BITES Centre, Leikop a um Institutional Quarantine Centre avil uvin, angaicha ho vetlhahna aneiyin, centre kibol dan chunga lunglhaina aneiyin ahi. Hiche jouva Centralized Arrival Point, Brig. M Thomas Ground a akile kit in, Thadou Students’ Association ho kithopina a Guwahati a kon hung kile chule Meghalaya gamsung Shillong a kon simlai kiloikhomna chom chom sponsor na a hung kile ho alamto in ahi.

Minister nu amatah in ‘guidelines’ ho vetkolna aneiyin chule ahung kile ho ngailutna neitah a abol in ahi. KWWO le KYU volunteer hon ahung kile jouse district khenchomna neilouva neh le chah COVID-19 Emergency Food Kiosk noiya ape uvin, chule dan phatah a ajui jeh uvin Minister nu alunglhai in, chule Assam Rifles authority hon nisa noiya panla a COVID-19 Emergency Food Kiosk volunteer ho dinga ponbuh (tent) apeh diuvin temna aneiyin, Assam Rifles honjong nikho ni sunga tun doh dinga kitepna anei uvin ahi.

Kangpokpi DHQ a tun doh be ding Community Quarantine Centre a toilet 20 sah be nadinga angaicha thil ho Minister nu in ape in, ahung kile ding 200 val aum nahlai jeh a kigotna aneiyu ahi. Gamsung mi gamdang a tangden tamtah hung kile ding ahijeh a chihthei angaiye, tin Minister nu in aseiyin chule COVID-19 pandemic sunga mihem chonchan athupi aseiyin ahi. 2001-2002 kum a Uganda a Ebola natna akiseithang chule 1918-1919 kum a Spanish Flu pandemic sunga mihem chonchan (behavior) hin natna vettup nadinga pan sangtah alah ahi, ati.

Mijouse khat le khat akitosot to angaiyin, chule akisei ho- inmun a umding, milah a lhat louding, khut sop jing dinga dan kisem ho jui phat ahi’in, hiche hi eima damthei nading bou hilou ahi, ati. Adamlou chule a insung mite hon ‘social distancing, mask bol ding, khut sopding a dan kisei ho ajui diuvin temna aseibe in ahi.

COVID-19 boina hi ichan geiya sang jong le eihon ikimaito pi diu dan hi ‘simple’ tah hiding- kichat louding, khat le khat kilungset to ding, guidelines ho jui ding chule pan lahkhom ding hi ahi.