Govt to kihouna thua IM ho lunglhai talou

Govt to kihouna thua IM ho lunglhai talou

149
0
SHARE

Govt to kihouna thua IM ho lunglhai talou

                                   Centre govt leh Naga thingnoi NSCN-IM kikah a kihouna palai (interlocutor) a anapang Milun RN Ravi Nagaland Governor a ahung kipansah chu mitam tah in Naga Peace Talk (kihouna) machal lheh inte tia kipah tah a analamto ahi. Ahin ipi ti hitam RN Ravi in Nagaland Governor panmun ahinluo jou-jouva Centre leh IM ho kihouna ana um chu IM ho lunglhaina ahitapoi tin alungnopmo dan’u thuphon ahinnei kit taove. IM hon jong ipi chet alunglhailou piu ham aseideh pouvin hinlah agel uleh akinepnao tobang’a kihouna hi machal lou tina ahi. IM hon aning akah aseidohlou vang’un Naga ho kikah a kikhen telna ki umsahgot thu akideipoi atiu hi ipi chet akihetlou vang’in tu naicha a Nagaland State govt nin Nagaland State gam mi dihtah ho kholchilna neija Naga mi hijongleh Nagaland state mi hilou ho Nagaland sung’a ima chanvou aneitheilou di ti thu jong alunglhaimo piu ahidi jong ginchat thei tah ahi. MP leh MLA Election dikon sehleh Naga political boina thua kihouna kichaivah di ahitai tia political party hon asei chohjeju jiu chu election akichai teng koi seichai, kihouchai malah gamla tultul tobang’a ahung umji jong IM ho lunglhai louna jeh khat hitei di ahi. Centre govt lunggel leh tohgondan hi ipi policy hitam koima pouvin amoh matphah vang hiloudi ahi. Tupet tah a hi India sung’a chamlhat del galguhbol umna leh gam boina khucheng Jamu & Kashmir State hi Centre govt nin akicheh khat boldoh di ati hidan’a kilang ahijeh in North East gam’a thingnoi boina hi chutitah a gah haboipi dia akoilou jong hidi ahi. Jamu & Kashmir boina akisuhthip teng North East a thingnoi boina hi sepai thahat jong hilouva aseithoa suhthip thei di bepma Centre in agel jong hidi ahi. Koi thingnoi group hileh kihoupipi’a achimdeh teng uleh iseisei nomding kiti tobang ahidem ti jong tahsan nailamji ahi. Ajeh chu achaina khat seilhah di ti govt nin agel mongleh aboljeng thei ahi. Ahin aboina khat kit hi govt nin hiti hin kihouchai taote tijongleh akihoupi nam mi holah a anomlouloi hung umkit thei ahijeh a “nangho kah a bon kinoptona umlou” tia hiti che chepi di ti jong navahna himaithei ahi.

                           Govt toh kihouna thua IM hon kalung lhaipoi ativang uva ahitipehleh hichi khuchi kigel ding, kibol ding ahi ti aseidehlou u ahi. Hitia keiho deibang’a kihoulhahna aumlouleh thingnoija kile chekit di ahi ti hi govt to kihouna nei thingnoi hon apat til langleh aseiji vang uva asotval jou langleh aphahpoh ngamjilou u ti thei ahi. IM honjong kihouna kipat til lang’a akisuhthimlou tobang’a ahingelji teng uleh thingnoija kile umkit di ahi tia govt gihna ananeiji ahi. Kum 20 val lang chamna umjouleh kihouna chelhah jouva kihouna suhtan ahileh ipi hungsoh di hitam ti datmo um ahi. Thingnoi lang’a alamkai langho sevang gari a lhailea ichan ham’a nop ahet u ahitah jeh a gamlah thingnoija gele’a hahsat genthei thoh kitdi ngapcha talou tamdi ahi. Chuleh govt nin akho aveng ain alou abon’a ahetdi ahitah jeh in govt dia bailam cheh kitdi tina jong ahi. Chamna thua kihouna leh hemkham (ceasefire) hung kibolpatna jong hi lamkai phabep hung kimat jeh anahi nalai ahi. North East thingnoi lah a Centre govt toh kihouna nei hi Naga ho keu hilou, Kuki hojong ahijeh in khat tobon kihou chaina aumthei louleh adang toh kihouna ipi ahung tidem ti jong ngaito theiset ahi.