Govt leh Tribal MLA ho khangdoh hitale kilom

Govt leh Tribal MLA ho khangdoh hitale kilom

931
0
SHARE

  Tuchung State Assembly toukhomna ni 2 bou kibol, hijong chu amasa ni’a nidan keh khat(half an hour) bou toukhomna ana um in ahi. Tuchung toukhomna’a Bill pass kibol hohi kinielna thei aumlou jeh in ningkum tu phat a Bill pass anakibol ho tobang akibol kit tahlou jeh in ningkum’a bang anung gu boina umloudidan ahinai. Ahin abul’a pat JCILPS hon ningkum’a Anti-Tribal Bill pass kibolpen akichelhahsah tahlou jeh-a akinaipi Bill dang khat tuchung Assembly toukhomna’a pass bolsah kit teidi anati chu akiboltahlou jeh a boina lentah hihih jongleh JCILPS hohin ning kitel umtah khat a kiphinna aboljingdiu tina ahi. Ahin JCILPS (sopi phaigam miho) hin ahetlou ukhat hi State Assembly in Bill pass abol jouse moh chelhah lhah jengdi dan’a agel u, hijong chu athu ala dih le dihlou thu jong umlouva asei ukhat chu mipi kiphin husan’a moh bolsah jengdi ti ahi. Hitia anabol nalam uva tugeiya kichai theilou boina jat khat aumjing jong henasa’a aphut tultul kit jeng u ahi. Ahin State govt hi “Jong in athina akicha-e” kiti bang’in kitomona thei Bill pass akimoh bolbol leh boina sangjo asohtheiye ti ahet jeh-a tuchung vang Bill thah Manipur Regulation of Non-Local People Bill 2016 (MRNLP Bill 2016) hi abul’a Assembly toukhom teng pohdoh a ahitheileh pass bol dia anasei vang’a Tribal hon apomdehlou u ahet jeh a bolloudi ahinti anahi-e. JCILPS hon hiche thua lung phatmo vetsahna leh ahitheileh September 5 nikho’a tuchung’a dia Assembly toukhomna nukhahpen’a hiche Bill podoh a pass bol ahiteina dia September 4 jaan a mipi kijotna khucheng’a anabol uva police hoto kinotona sangtah jong ana umkit ahi. Ipi hileh ningkum kum masa lang’a sang’a tuchung Assembly toukhomna chu chomcha a kibol’a Student ho lotna’a niseh mipi kiphinna ana umji’a Assembly buluho ana umjing chu tuchung’in vang athipdom tai. Tua hi Winter Assembly toukhom teng pohdoh dia Chief Minister in aphondoh ahitan ipi hungti diham aphat dungjuiya hung kihedi ahitai.

  JCILPS hon tuchung’a khucheng’a kiphinna aneitheilounao jeh khat jong hi Police Recruitment thua BJP vs Congress (government) kiboltona tobang ahungsodoh jeh a ILP thu hi dailha jep ti thei ahi. Ningkum’a chu ILP thua Assembly nokhumdi ti anahin tuchung’a hi Police Recruitment thua nokhumdi tiloi jong aumphatna mipi akon’a Assembly suhboidi kiti hi hatmolo ti thei ahi. Assembly toukhom sung’a thingnoimi Surrender kibol hon bandh anakou u chu ahatlou vang’in govt dia aphatjohna umdi ahi. Ajeh chu bandh akitileh School ho jong kikhah jeng ahijeh-a Assembly nokhumdia School chapang ho School a kimutaloudi ahi. Tuchung’a ILP tobang Bill dang khat pass kibollouna jong hi Tribal MLA hon ningkum thilsoh akon’a khahdohna khat anei jeh uva hitobang Bill akipohdoh kitleh daan dungjuiya Hill Area Committee (HAC) a pohdoh masatdi atiu ahi.