Govt dia gam mohpeh (Medical College sahna dia Compensation ngeh lou)

Govt dia gam mohpeh (Medical College sahna dia Compensation ngeh lou)

61
0
SHARE

Govt dia gam mohpeh
(Medical College sahna dia Compensation ngeh lou)

Agam mipi mama phatchomna di govt nin ipiham khat abolgotleh gam man ‘Compensation’ tamtah tah thumjeh a natoh kisuboiji kiti dimna gam’a Churachanpur district Mata kho haosapun Medical college sahna dia akho agam todoh (donate) dia akipehdoh hi datmo umleu kihongphalna khat ahi. Compensation thua kiboina jeh a tuchan’a Manipur phaicham’a Railway lamlen semna natoh jong ahididol’a chal theilou, Imphal-Jiribam lamlen’a lei (bridge) thupi cheh kisa hojong aphat achanga chaithei louva um ahi. Gari lamlen leh Rail lamlen kisem jeh a gam kitongkha ho beh hi inn le lou ho atohkhah, asuhset hile thukhat ahi. Imacha bolna’a pang jong hilou, inn le hon themkhat beh asuhset jong  hilou gam ho kisan thua compensation tamtah tah ki ngeh (demand) hi govt nin sum aneinan inop jatjat thumthei ahi ti jeh ahi. Mipi dia phatchomna thei thil kibolgotna khat gam chu govt nin agam nei ho nople da’a alah jeng thei, ahia inn le lou kisuse ho aman kito chetna govt nin jong compensation apehdi ti jong ahisa ahi. Compensation mudi galdotna’a Railway le Highway (lamlen) hung kilhung lut di ahi kitina mun ho man tamtah a kichoh loi jong umji ahi. Imphal khopi pam’a  Railway Station hung kilhunlutna di mun phailei jao ho inmun dia kichoh loi jong um’a kisei ahi. Inn kisah a chenna di ti hilouva Rail lamlen ahung kilhunlut teng agam man compensation tamtah munadi ti ahi. Imphal-Moreh kikah lamlen kehletbena (expansion) leh compensation thu jong mipi tapkong kihoulimna khat anahikha ahi. Sports University kisahna mun thua kiboina beitheilou jong hi thil dang dang umjongleh Compensation deina jong lut tei di ahi. Govt nin ipi ham khat abolgot kiti hi agam mipi phatchomna di ahijeh a gam onglai ahipouleh compensation thu umlou didol ahi. Chuche malah Compensation hijaja eikipeh louleh tiloi, ipi ham khat kisahpan jouva jong compensation eikipeh chai masat louleh kisajom thei ponte tia natoh kisuhboina tam ahi.

Hitobang lah a Mata haosapun Medical college sahna dia akho agam moh she a todoh, pehdoh di ati hi tahsan ummo leu ahijeh a akam’a moh a pehdoh ativanga asunglanga ichan hamkhat kinop tona um hidia jong ginmo theileu ahi. Ajeh chu haosa thaneina le gampu hina gam chu govt nin moh a alah di ti jong tahsan umlou, compensation tam le lhomleh ijat hamkhat kipeteidi ahijeh a haosapun kho chaga ho ima homlouva compensation mudi jouse akisiptum di ti policy jong hithei dia gel loi jong um ahi. Churachanpur town sung laitah a kon Km 7 vel bep gamla kho/gam khatna Acre 20 lang gampheng mohseh a govt pehdoh di kiti hi agam neipan sum le paija phatchomna kilah hihjongleh govt service hoto kilheh di ti beh vang aumdi ginchat thei ahin ahitahbah jongleh akoi dia pha thou thou ahi. Churachanpur, Chandel leh Thoubal a Medical College khat cheh sahbe di ti tohgon um ahijeh a Chandel le Thoubal a hiche college kisahna di mun agam neihon free a ahinpeh diu vang tahsan umlou khat ahi. Govt nin thilkhat sahna dim un ahinhol teng manbeijin amun tohdoh inge ti umji, natoh ahung kipat teng compensation hinseipan kiti jong umdalou ahijeh in abul’a pat kicheh tah a sei phajo di ahi.