Govt boi jeh a boina umlou! (Nagaland gam mi dihtah kiholgo)

Govt boi jeh a boina umlou! (Nagaland gam mi dihtah kiholgo)

340
0
SHARE

Govt boi jeh a boina umlou!
(Nagaland gam mi dihtah kiholgo)
Kumsehleh phaicham’a mipi kiphinna khoh khat umjina hi June-July lha a State Assembly toukhomna (monsoon session) um dikon leh achelhahlai ahiji. ILP thu ham, Naga Framework Agreement thu ham, thildang khat thu ham’a phaicham’a kiphinna khohlai umji chu tukum MP election kichai jouva pat BJP Coalition govt sung’a lamkai leh Cabinet post kichuna a boina jeh in kiphinna bolnom, bolgo ho jong thip dan’in aum uve. Ajeh chu govt akisuhlouleh kon ipi kiphinna neijongleh kihoupi di leh ajoldi umtheilou ahi. District thah kisem thua UNC (Naga) leh State govt kihou kitna di jong July lha sung’a um dia kinop tona ana um ahin tua hi State govt kisuhlou cheh chuh a aum jeh a hiche kihouna di jong umtheilou di ahi. Hiche district thah thu malah Centre leh NSCN-IM kihouna jong achaina lang kiseivah di ahitai kiti vang’a gamla cheh cheh bep hinalai di ahi. Tulah Indian Army holeh IM ho kikah a athua kiboltona athah beh a hung kipan kit ahi. IM hon chamna thua kihouna jana leh gelkhohna aneipoi tia Indian Army hon ngohna ahinnei ujong IM ho chouna tobang ahi. IM ho dia akhohna lotlot nin Nagaland govt nin ‘Registration of Indigenous Inhabitants of Nagaland’ (RIIN) kiti Nagaland gam mi dihtah ho holdoh a minkhumna boldi (register)  ti tohgon ahinnei kit  ahi. Hiche RIIN hi Nagaland state govt nin ahincepi tahbahleh Nagaland sung’a kol le vai ho titah louva Manipur Naga Nagaland sung’a kichaolut ho gei agam mi dihtah (indigenous) ahipoi tia nodoh di hung nailam di ahi. Hiche jeh a IM hon hitobang RIIN tohgon hi adeimodan uleh apomloudan u ahinseipai jeng u ahi. Naga jouse chu achen chen nauva agam mi dihtah ahijeng jeh un koima agam mi dihtah leh ahilou loi aumdehpoi ti hi IM ho sei ahi. Naga ho chenna gam jouse kivaipohna khat nuoija umdi hi IM ho Naga politics chepi thupipen ahivang’a thil hahsa ahina di chu Manipur, Assam leh Arunachal State ho hiche thua kikamdet jeng’u ahi.
Alangkhatna KNO leh UPF hon Territorial Council thua govt toh kihouna ahinnei uleh Manipur a Naga thingnoi thingchung kitilou hung lung linglao uva Naga te pupa gam kitongkha theilou di ahi tia hung aolah lah jeng’u ahi. Manipur Naga hon jong ainnheng louheng u lah a Kuki te hi kidoupipi sang’a kihoutohpi a phajo diham ti ahin hetdoh un ahung kilang thimtai. Koi chu hoilai gam’a kon hoilai gam’a kichaolut, chenglut hijongleh Kukite Manipur gam mi dihtah ahipoi tin kipeng peng jongleh aphchom di ahipoi ti khahdohna jong um hijeptadan’in akilang’e. Kukite beh toh kihoutohna khat umlouva Manipur Naga hon Centre toh kihou lhahna aneidi ahitheilouna di chu meilhei ten Manipur gambeh neokhat jong Manipur govt kivaipohna pam’a aumdi tin le ha thoa doudi atijingsau hi ahi. Tua Nagaland Naga (govt) nin RIIN tohgon ahinnei uhi Manipur Naga ho Nagaland gam mi dihtah nahipouve tina dia kibol ahikit khah nahlaileh Naga Movement kongtol a kisei hohi akiheina lang lang’u khoubang bokha hung bang jeng thei u ahi. Eima hinna dia khat thina di lunggel natoh nei hi akuoi kuoi hileh gelda a hingkhom uhitin chengkhom uhite ti hi kichepi chehleh chamna jong umdi, mijouse dia jong machalna hidi ahi.

SHARE
Previous articleThusoh chom chom
Next articleThusoh chom chom
Editor at Eimi Times.