Goodwill Mission in chamna semna ding’a toukhomna sem

Goodwill Mission in chamna semna ding’a toukhomna sem

173
0
SHARE

Imphal, Dec 21: Gamsung’a cheng nam chom chom’a kon chamna sem ding dei hon nam kikah’a boina suhthip nading’a Wednesday nikhon pan ala uvin, thinglhang leh phaicham’a um civil society organisation chom chom 17 kipunkhomna Goodwill Mission for Peaceful Co-existence hon Wednesday jingkah in Ima Keithel mun’a thinglhang leh phaicham ‘a lamkai ho ngaidan lahna ding’in Get-Together Meeting abol uvin ahi.
Nam kikah’a kingailutna suhdet ding thu houlimna neihon asei uvin ahi. ‘Land of Jewels’ tia kihe’a Manipur gamsung’a kinahna aumjing jeh in boina mun asoh in, gamgi, pupa gam chule khat ngaidan kisei hohi athu umlou ahi’in, hiche jeh’a akichai theilou boina umjing ahi, tin Secretary General, Universal Friendship Organisation, Meiraba Angom in aseiyin ahi. Gamsung’a ama chang kingailu’a atam be cheh cheh in, hiche hin boina asodoh ahi. UNC in abol economic blockade leh counter blockade kibol hi eima chang ikikhoh sah nau vetsahna ahi, tin S Barani, United Christian Mission Manipur in aseiyin chule boina suhlhap nading lampi hol ding’in temna aneiye.
Blockade hi UNC leh state sorkar kikah ahi’in, ahin, hiche hin mipi jouse atohkhah ahi. Nam kibung khenna leh thoh hat louna aumjeh’a hitobang dinmun soh ahi, tin Romeo, All Tribal Community Association in aseiye. Dinmun hi phaicham’a mi kimkhat in phat gomkom in ala in nam kikah’a lunghanna ding tilkhouna thu aseiye, tin Keiruddin Shah, ex-president, All Manipur Muslim Coordinating Body in aseiyin ahi. IPAK president Sapamcha Jadumani in gamsung thu’a Naga thal choi hon pan alah lou diuvin kouna aneiyin ahi.
Houlimna nei jousen state sorkar leh UNC in boina aseilhah ding’in lungkhat tah in asei uvin chule chamna’a chen khom ding’in kouna aneiyui. Goodwill Mission in nam kikah’a boina aumlou nading thu lhangsap ding’in jong kilolna anei uvin ahi. Toukhomna kichaiyin Ningthoucha Lancha, Goodwill Mission Convenor in lamkai chom chom ho ngaidan lahkhom ding’in aseiyin chule aganna thei pen’a boina suhlhap ahina ding’a state leh centre sorkar heng’a sei ding’in jong aseibe in ahi.