Gojuh leh twilet jeh a thi 400 lang lhingta

Gojuh leh twilet jeh a thi 400 lang lhingta

139
0
SHARE

Gojuh leh twilet jeh a thi 400 lang lhingta

                                  Kumsehleh vannoi gam munchom chom’a go hajuh laileh twilet le munchim jeh a thina toh mihem aja aja a sim aumjing’e. Vannoi gamdang thu seidautin tukum India sehseh a tunichan’a gojuh leh twilet jeh a thina toh hi mi jali (400) lang anaitai. Gojuh lai hi kichai loulai ahijeh in ijat ahinphah diham jong seithei hiloulai ahi. Lha masa lang June-July lang chun Bihar leh Assam ah go hajuh jeh a twilet ana kithang’in Bihar a mi jakhat vel anathin, Assam ah mi 40 vel anathi. Tupetna twilet um khohna dehset hi Kerela, Maharastra leh Karnataka ahi. Kerala a tuchan’a athi hi mi 80 avaltan, Karnataka a mi 40 valjep thi, Maharastra a thi mi 50 vel ahi. Kerala dehdeh hi kum ni kijom thel’a twilet jeh a thina leh mi tamtah gentheina soh ahi. Akisei hohi athi jat bou ahin akiholmo jong umnalai ahi. Tuchung Kerala a gojuh a twilet keu hilouvin munchim jeh a thina toh jong hiche mi 80 val lah a jao, munchim khum kilaidohlou, akiholmo jong mi 50 lang umnalai ahi. Mun’in achimkhum ho chu bonnang lah a JCB to kithoa alaidoh got vang uva gojuh toh bonnang toh ahileh alaidoh jong hahsa cheh kit ahi. Athi amang jong thukhat ahitan gojuh jeh a athi ho vuina jong hahsa dehset kit nalai ahi. Mi a-lakh lakh a sim munbit lai hoa Relief Camp a genthei tah a hinkho mang loi um kit ahi. Athi amang bon hija aumleh twilet jeh a inn le lou ijat suhset hidi hitam tijong umnalai kit ahi.

                Kum khat sung’a kum kiheichin (season) 4v lah a asatlai leh chuhlai hi mi tamtah dia thina manna leh gentheina ahijing hi akivenje umlou jeh ham, kivenna lampang khohsah lou jeh ham, inchen louchen’in atolou jeh ham, govt lang’a kon gelkhohna umlou jeh ham, ahilouleh asohdi mong ahi kiti ham kihetalou ahi. Achesa tukum May-June lha lang chun gojuhlou jeh leh nisa hasat jeh in Central India, Western India leh South India lang’ah donding nehding twi jeng jong umlou jeh in mi tamtah in hahsatna sangtah anatoh in ahi. Ahin go ahungjuh kitleh gentheina khohcheh keu hitalouvin thina manna sangtah asolo kitne. Manipur a tukum gojuh nisat umdan hi kumdang bang’a go ahajuhlou jeh a mun phabepma phailei/twilou bolthei talou um ahin aga chu khovei langle hung kihebep di ahi. Ahin ningkum kum masa langleh go hajuh jeh a phaicham’a twilen jia inn le lou kisuse chuleh gentheina thoh kiti hi tu tadi geija dia umloulai ahi. Ahin ima seithei ahiloudan chu October lha lang jongleh go hajuh jeh a phaicham twijin achupna umji ahi.

                Gojuh, nisat, huinundan hohi vannoi pumpia nasatah a kikhel ahijeh a atokhah khahna chu alonaje bei ti dinmun lhung tidi ahitai. Vannoi gamtin muntin’a asat adap kikhel (global climate change) kiti hi akiseijing ‘environment’ kisuhset, kisuhgam jeh hijeng ahi. Gamdapma kihe Europe gam’a tukum asatlai tah a France leh Netherlands a 40 degree Celsius aphah/akhel kiti chu datmo umleu ahi. Asatlaileh asat sehseh hile khohlou chu muchi tuna leh louga asuhboi ahi. Hiche jeh a vannoija neh ding anche louhing leh chang le min hung hah cheh cheh di ahi ti tunaicha a Scientist hon ahinseipat u ahitai. Eiho gam’a kichat umpen hi go hajuh teng munchim hung umdi hi ahi. Ajeh chu thinglhang gam’a thingphung umgam talou ahi.