‘Ganja lei’ kibol hatsah ding sorkar in angaito ahi’in, akichepi a ahileh...

‘Ganja lei’ kibol hatsah ding sorkar in angaito ahi’in, akichepi a ahileh hiche hi gamsung revenue kibe nading chule lou a bou manding ahi, tia Chief Minister in sei; UPF-KNO leh sorkar in SoO kinoptona asem lha gup kisuh sao be; IPS office nu in ngohna asemkhum AR sepai pa Moreh police station a Feb 27 nikho a dinga kouna kinei ahi: Chief Minister; MU VC Prof. Pandey apanmun akon kiladoh ta

282
0
SHARE

‘Ganja lei’ kibol hatsah ding sorkar in angaito ahi’in, akichepi a ahileh hiche hi gamsung revenue kibe nading chule lou a bou manding ahi, tia Chief Minister in sei

Imphal, February 21 (ET): 11th Manipur Legislative Assembly session 10 channa ni 6 lhinni a Chief Minister N Biren Singh in State GST (SGST) collection hi apha in, tukum January lha chan a agom a 640.74 crore ahitan chule dangka crore 861.87 target hi kimu teiding ahi, ati.

Government in ganja tu dinga tohgon aneihi tuchan in photchen ahipon, akitu ding jongle lou le ai a chule industrial purpose ho abou kimang ding ahi tin Chief Minister pan aseiyin ahi. Hiche hi tuni assembly toukhomna a Thangmeiband Constituency, MLA Kh Joykisan thudoh donbutna aneina a asei ahi.

State sorkar in Ganja lei bol ding dan phalna hisah dinga angaito laitah ahi, tin aseiyin chule gamsunga khamnathei douna dinga sorkar in pan dettah a alah ahi, ati. Question Hour sunga Opposition MLA O Surjakumar Singh thusei Biren in adonbut na a, kum masa a state sorkar in target 662.09 anei ahi’in, 694.70 crore amu jou ahi, ati. Centre sorkar a kon state in compensation ijat amu em tia adoh uchun CM in Centre a kon compensation ima akimupon chule ‘pending’ a um sum jong aumpoi, ati.

MLA Kh Joykishan Singh thudoh adonbutna a House lamkai leh CM in ‘Ganja lei’ kibol hatsah ding sorkar in angaito ahi’in, akichepi a ahileh hiche hi gamsung revenue kibe nading chule lou a bou manding (medicinal purpose) ahi, tin aseiyin, hijong leh hiche chungchang a sorkar in gangtah a thulhuhna anei louding, aphatna leh asetna phatah a avettoh masat ding ahi, ati.

MLA Joykisan in tuchan na kani lei kisuhset jing vanga  atu ho chunga gotna kipehlou na chung changa thudoh ananei  Chief Minister pan adonbutna ah September 2019 a kon February 16, 2020 sunga district sagi a acre 1952 a kani lei kibol police leh agency dang dang hon asuse uvin chule case 32 jihlut ahitai, tin asei in ahi. Government in NGO phabep toh kitho a Kaani lei bolho dinga kivahna dang angaito ahidan jong Chief Minister pan hetsah na ana nei in ahi. MLA Joykisan in phaicham  a ju joh ho a dinga jong kivahna dang government in asem dinga hetsah na ananeina a chu Club phabep toh kitho a natoh akipat tah dan Chief Minister pan hetsah na jong ana nei in ahi.

UPF-KNO leh sorkar in SoO kinoptona asem lha gup kisuh sao be

Imphal, Feb 21(ET): India sorkar, state sorkar chule Kuki thingnoi kiloikhomna ni- United People’s Front (UPF) leh Kuki National Organization (KNO) in Suspension of Operation (SoO) kinoptona asem Friday nikhon New Delhi khopi a lha gup aphat asuhsao be tauvin ahi.

UPF leh KNO in sorkar to SoO kinoptona asem hi February 29, 2020 chan a ding ahi’in, ahivanga lha gup- August 31, 2020 chan a dinga aphat kisuh saobe ahi. India sorkar thalheng a Satyendra Garg, Joint Secretary (NE), Ministry of Home Affairs chule state sorkar thalheng a K Radheshyam Singh, Special Secretary (Home), in SoO suh saobe na a soi kaina anei ahi.

Kinoptona asem nauva ST Thangboi Kipgen, Chairman UPF, Calvin H, Secretary UPF, Sanga Hmar, Chairman HPC(D), Jacob Haokip, Convenor JMG leh Ketheos Zomi in UPF thalheng a soi akai uvin chule David Hangshing, Vice President KNO, Tongpu Haokip, Kopham Khaling leh Laltanpui Hmar in KNO thalheng a soi akai ahi.

Kinoptona kisem dungjuiya ‘ground rules’ ho kikhel louding ahi. Kihouna a ST. Thangboi Kipgen, Chairman UPF, Aaron Kipgen, spokesperson UPF, Calvin H, Secretary UPF, Sanga Hmar, Chairman HPC (D), Jacob Haokip, Convenor JMG, David Chongloi, President KRA (U) leh Ketheos Zomi UPF thalheng a pang a chule Satyendra Garg, Joint Secretary (NE) lamkaina a kihouna a Seilen Haokip, spokesperson KNO, T. Samuel, Home Secretary, KNO, David Hangshing, Vice President, KNO, Tongpu Haokip, Kopham Khaling le Laltanpui Hmar KNO thalheng a apang uvin ahi.

UPF leh KNO in Union Home Minister Amit Shah henga thakhat a memorandum ana peh thu ujong asei uvin ahi. ZRO vice president anahi Calvin H toh kitoh lou Thanglianpao, President ZRO in thu suhboi na thil abol e tia ngohna um thu ahi’in, India sorkar in jong SoO kinoptona kisem akikehlet be na a Thanglianpao signatory a apan ding akhah uvin, MHA in achungthu akhol ahi’in, case akisuhlhap kahse a SoO toh kisai ahilouleh political dialogue a ‘signatory’ a pang louding ahi, tin aseibe uvin ahi.

St Thangboi, Chairman UPF leh PS Haokip, President KNO in soi akaina UPF leh KNO in memorandum apeh nauva Thanglianpao hi India gam mi ahipoi, tia aseiyu ahi. Thanglianpao hi Pangmual kiti Indo-Myanmar gamgi a um kho a peng ahi’in, National League for Democracy, Burma in MP dinga alhendoh ahijeh a India sorkar leh state sorkar in chamna thu aseina a apan nading tha aneipoi, atiu ahi.

Ama tohgon jeh a 2018 kum kichai lang a ZRO president anahi Calvin toh kihetkhel na um ahi. Calvin hin chamna adel jinga chule ZRA Eastern Command (Myanmar Branch) kisem adoudal ahi. Athunun jou Dr DK Mang lamkaina Paite Tribe Council kisem hin assembly president dinga kilhengdoh K Suanthang atuh gah ahi. Chule United Zou Organization (UZO) president dinga kilhengdoh hi Chinlunthang ahi’in ahivanga Thanglianpao in ZRA thahatna a Zomi ho alhenchom a UZO President dinga Hangkhanpao atosot ahi’in, Zou ho group ni a kikhen lo ahi, tin jong asei uvin ahi.

Zomi Defence Colunteer (ZDV) hi KNO constituency ahi’in, Thanglianpao in ZDV faction atosot a chule Zou haosa ho hunam a Zomi tosotna ding soi akaisah ahi. Anatoh hin Hmar People’s Convention (HPC) ho sangtah a alungnat sah ahi. HPC(D) Mizoram leh Mizoram sorkar in 2018 kum a kinoptona asem’a, boina adalhah uva, gal manchah akoi uva chule thingnoimi ho ‘rehabilitation’ apat u ahitai.

Thanglianpao in athah a group asemkit a LK Hmar lamkaina a HPC(D) group thah ho galmanchah leh fund apeh u ahi’in, Sanga Hmar lamkaina a HPC(D) Manipur hi UPF noiya um ahi’in, sorkar toh SoO kisemna a HPC(D) thingnoi a register kibol jong hilou LK Hmar lamkaina HPC(D) douna a boina a kon kikangse ahi.

Tuivai lei a ‘Welcome to Zoland’ tia banner lentah kitah hi mijouse ding gelna ahipoi. Achesa Novermber 25 ni a ‘Zoland Territorial Council’ thumna a Churachandpur leh New Delhi a mipin kijotna anei ahi. Kuki, Chin, Mizo lah a Zo noiya kipunkhomna tosot nadinga Zo-Re Unification Organization GHQ leh Zo-Re Unification Northern Zone hi 2018 kum a Vairengte, Mizoram gam a kisemdoh a chule ‘Zo KutPui’ man ding lunggel jong kisem ahi.

Tukum (2020) a Zo-Re Unification Organization GHQ leh Zo-Re Unification Northern Zone ho dohna umlouva Thanglianpao in Churachandpur a ‘ZoKutPui’ anagon ahi. Hiche hi Zo Reunification Northern Zone leh Kuki Inpi Manipur in adoudal na thu asei ahi.  Thanglianpao natoh hohi Kuki nam neo dinga setna chule kibungkhenna thei ahibou ahipon, Meilhei sopi honjong demna aneiyu ahi, tin memorandum a aseibe uvin ahi.

Hiche jeh a February 14 ni a UPF leh KNO in ‘emergency meeting’ abol nauva Thanglianpao hi SoO a pan sah lou ding chule kum phabep masanga ahung kon na Myanmar gam a nungsol kit nadinga sorkar henga ngehna nei dinga kihouna a aseilhah u ahi, ati. National League for Democracy, Burma a member hina a lamkai them dinga tamtah in tahsanna anei ahi’in, ahivanga Churachandpur a aum sunga akimanchah na hohin lungchom na, chule chang vaipoh ding adeina asosal ahitai, ati.

Manipur gam, adeh a Churachandpur a kon Thanglianpao achedoh a ahileh lungmong a chenkhomna chule gamsung miho khantou nading lampi kisemna a boina ho umlou ding ahi, tin aseiyun chule Memorandum of Settlement (MoS) a Thanglianpao hi SoO group adang ho banga soi kai thei dinmun a aumpoi, tihi kiche ahitai, tin memorandum a aseibe uvin ahi.

 

IPS office nu in ngohna asemkhum AR sepai pa Moreh police station a Feb 27 nikho a dinga kouna kinei ahi: Chief Minister

Imphal, Feb 21(ET): Home portfolio jong tuh a Chief Minister N Biren Singh in 12 Assam Rifles, Khudengthabi a tou PK Pandey Moreh police station a kouna anei uvin, IPS officer numei khat khut akilha khum e, tia ngohna aum thu toh kisai ahi.

CrPC section 160 noiya AR sepai pa kouna apeh u ahi. Opposition MLA Kh Joykishan in thudoh anei Chief Minister in adonbut na a Khudengthabi check post mun a IPS officer nu civil dress a security escort hotoh Moreh a kon ahung kile nau thilsoh ahi, tin aseiyin, officer nu in January 19 ni a Moreh police station a ‘physical assault, molestation’ case asem a FIR kijihlut ahi.

Ngohna kisem khum AR sepai pa mat dinga police ho avel vel a akigot uva, AR camp alut vang uva Central Para military force hohi Section 45 CrPC noiya venna kipe ahijeh a lolhing jou louvu ahi. IO in Assam Rifle show cause notice thumvei apeh ahitan, AR authority hon amasapen asan loujeh a, anivei channa a kouna apeh ule 12 Assam Rifles Post Commander in thingnoi hatna lah a ngohna kisemkhum sepai pa posting ahijeh a police station a hung thei louding ahi, tia adonbut ahi. Athumvei channa a notice apeh kit uva jong post commander in sepai pa ‘court martial’ kibol lai ahijeh a kahin sol theilou diu ahi, tia aseikit ahi.

Thilsoh umchan state cabinet in aseikhom jouva Union Home Ministry in action alah nadinga ngehna nei dinga asei uvin ahi. Officer nu hin jouthu a AR sepai pa hehna asemkhum louding ahi tihi sorkar in aginchat jeh a FIR kisem ahi, tin CM in aseibe in ahi.

MLA Kh Joykishan thudoh Chief Minister in adonbutna a gamsunga kani lei kibol phatsah ding a sorkar in lunggel anei thu aseiyin ahi. Kangpokpi, Ukhrul, Senapati, Chandel, Kakching, Thoubal leh Churachandpur district sagi a September 2019 a kon February 16, 2020 kum sunga police leh agency dang dang hon kani lei kibol na gam leiset agom a acre 1952 asuhmang ahitai, tin aseiyin chule case 32 akijihlut e, ati.

India gam panna a mun phabep a Ganja lei hi lou a manchah dinga kiphal ahitai, tin CM in aseiyin, hiche jeh a lou a man ding (medicinal) leh industrial a dinga manchah ding bouva state sorkar in kani lei kibol phatsah ding angaito ahi’in, ahivanga tuchan a hiche thu a thulhuhna umlou lai ahi, ati. Gamsung hi Ganja lei bol nadinga aleiset pha ahi, tin CM in aseiyin chule hiche hi dan phal ahileh state revenue jong kal ding ahi, ati. Jharkhand, Madhya Pradesh leh gam dang dang a kani lei kibol dan ho report state sorkar in alahkhom ahi’in, hijong leh gamsung tonkha thei natoh sorkar in abol louding ahi, ati.

Kani lei kibol jeh a case 32 akijihlut vanga police hon koima amat loulai ahi. Kani lei kivat/kisumang hohi koiman keiya ahi tia asei lou ahi. Kani lei kibol akingah theina dinga sorkar in akhel a alampi adang gon ding angaito jing ahi’in, hiche a dinga khosung mi, CSO leh adang dang hotoh kihoukhomna um ahi, tin CM in aseibe in ahi.

MU VC Prof. Pandey apanmun akon kiladoh ta

Imphal, Feb 21: Government of India Ministry of Human Resource Development Department of Higher Education in Manipur University Vice Chancellor Prof. Adya Prasad Pandey  chu apanmun akon aladoh taovin ahi.  Prof. Pandey chu university sung a simlai le natong ho in administration boina, sum ahi lou lam a chena le anatoh hoi lou na toh kisai a apanmun akon lah doh ding a kiphinna ana nei u ahi.

Hetthei khat chu Vice-Chancellor, Manipur University chung a lunglhai lou na vetsah na a  Manipur University Students’ Union (MUSU) in kiphinna ana pat a chomkhat jou a Manipur University Teachers’ Association (MUTA)  le Manipur University Staff Association (MUSA) ho in ana jop uva kiphinna nasatah a ana nei u ahi. Hichekiphinan toh kisai a Manipur University le college jouse ana boi ahi.

Boina toh kisai a Porf. Pandey chu ni 30 leave anakipe a, Fact Finding Committee, MHRD le UGC akon member ho in ana sem uva kholchil na ana nei u ahi.  Hiche committee kisem na chung a MUSA, MUTA le MUSU  ho in kiphinna ana ngah deh lou utoh lhon a Inquiry Committee khat, T. Nandakumar Singh, former acting Chief Justice, High Court of Meghalaya le Prof M.K. Choudhary, former Vice Chancellor, Tezpur University  jaona a ana kisem kit ahi.

Hiche jou a University angai bang a ahung che kit jou a Prof. Adya Prasad Pandey in apan mun ahin lo kit toh lhon a acham a natoh na ahin nei a, university kiloikhomna  MUTA le MUSA ho ahin kha kit toh lhon a Prof Vishwanath  ahin suspend jeh a university sung hung le boi kit ahi. Hitabang boina hung lhun kit toh lhon a  Prof. Adya Prasad Pandey chu kholchil na kichai tokah a suspend bol ding a thupeh ana kinei ahi. Alangkhat a phat chom khat ading a Manipur University sung vesui ding a Division Bench, High Court of Manipur in Jarnail Singh, IAS(Retired),Manipur chief secretary lui chu university administrator ding a nganse na ana nei ahi. Inquiry Committee a pang teni in report peh lut na ana nei hon toh lhon a achesa September 2019 a Prof. Pandey chu showcause notie ana ki boldan ahi.

Hiche dungjui a Prof. Adya Prasad Pandey in khat cheh a donbut na ana nei toh vang a university adalhah ah a absent na nikho ho chung a lunglhai lou na ana um toh lhon in sum le pai lam a university sung a natoh na ho a jong General Financial Rules (GFRs) ana palkeh a sum le pai aval a akijah mudoh an ahi in ahi. Hitabang ho mudoh ahi toh lhon in tuni in Prof. Pandey atoh mun akon akilah doh tahdan thupeh Surat Singh, Deputy Secretary, Government of India in hetsah na ahin nei in ahi.

 

Class X exam Science subject kibol ni a mi 20 kinodoh

Imphal, Feb 21 (ET): Board of Secondary Education Manipur (BOSEM) saina noiya Class X exam chelhah jinglai ahitoh lhon in tuni ani ni channa in mi exam centre chom chom akon simlai mi 20 akinodoh in ahi. Thulhut in aseina achun simali kinodoh ho chu Tengnoupal High School, VM High School Pallem Bazaar, New Light Public school, Moijing, Sekmai Khumbi High School, Khoirom High School, Khoirom, Dolangkhunou High School, Senapati, St Stephen English School, Hiyangthang, Nambashi High School, Ukhrul, Tangkhul Hundung High School, Emmanuel English School Haipi, Keithelmanbi, INA Memorial High School Ukhatampak, Ideal High School, Pallel chule Pallel High School akon ahiuve ati.

Board of Secondary  Education Manipur (BOSEM) secretary Dr Chithung Mary Thomas in thuso miho heng a aseina achun simlai kinodohna school a Principal ho heng a show cause notice kipe ding ahi in chule mi thakhel a tou 15 ho chung a FIR jong kibol khum ding ahi ati.

Alangkhat ah AMSU hon asei nauva chun simlai hon alamlou tah a exam abol uva athilbol nachung uva phohlou invigilator holeh Principal hon apet pet a suspend bolding in asei uvin ahi. AMSU team hon exam centre villhahna a ache nauva CI College Bishnupur leh Kumbi College a school authority leh police hon ana lutsah nom pouvin hinlah exam centre dang vilna kichelha thou thou ding ahi tin union vice president Laishram Athouba chun thuso miho heng ah asei in ahi.

House in grant ading dangka 4486,19,72,000 phatsah na nei

Imphal, Feb 21(ET): Manipur Legislative Assembly in tuni in grant ading in thumna 6 dangka  4486,19,72,000  lam ana nei uvin ahi. Hiche thumna ho chu Demand No.15 – Consumer Affairs, Food and Public Distribution, dangka 86,29,89,000, Demand No. 18 – Animal Husbandry and Veterinary, Dairy Farming jaona a  dangka  193,42,90,000, Demand No. 20 – Community and Rural Development ading dangka  2713,83,86,000, Demand No. 22 – Public Health Engineering ading dangka  1016,60,98,000, Demand No. 30 – Planning ading dangka 201,14,84,000 le Demand No. 47 – Minorities and Other Backward Classes and Schedule Castes Department ading 274,87,25,000 lam ahi. Hiche demand na ho chung a kihou na achun house leader N. Biren Singh in state government in Vision Document 2030, vaichat na suh lhom ding le thinglhang le phaicham a khantou na kibah na ding doi le tup apohdoh dan tahlang na ana nei in ahi. State sung a per capita income  dangka 41,573 akon  dangka 65,411 chan a ahung kal dan jong chief minister pa in phondoh na ana nei in ahi. Motion for Disapproval of Policy Cut, Minorities le Other backward classes chung chang a Md. Abdul Nasir, MLA  le Md. Fajur Rahim, MLA in thudoh ahin neina hon a chief minister pa in budgetary allocation, Manipur State WAQF Board aneo jeh ahi dan hilchet na ana nei in ahi.  CHieF Minister pa in Board member 5 avat ahunglhungding March sung a suh dim ding ahid an tahlang na ana nei in ahi. CAF & PD noi  a na kitong doh ho thu CAF & PD Minister, Karam Shyam in ana sei na a National Food Security Act 2013 chu achesa April 2016 a state sung a aki chesah pan dan le gamsung mipi ja a som get le sagi ho chung a hiche act lhung jou ding ahi dan ana sei in ahi. Central ministry ang a FCS godown 6 sah be nading a hetsah na akinei dan jong minister pa in phondoh na ana nei in ahi.

PHED Minister Losii Dikho in ahou limna a government in state sung a ahunglhungding 2024 sung a inn tin a twi theng lhun thei na ding a tohgon anei dan hetsah na ana nei in ahi. Hiche na ding a BRICS le NDB hung kijah ding dan jong tahlang na ana nei in ahi.  Veterinary and Animal Husbandry Minister V. Hangkhanlian in department in  gangcha chung a natna ho ahunglhungding 2030 sunga  suhbei na dinga tohgon anei dan u tahlang na ana nei in ahi. House in Kangla Fort (Amendment) Bill, 2020 (Bill No. 5 of 2020) le Manipur University of Culture (Amendment) Bill 2020 (Bill N0. 6 of 2020) jong phatsah na ana nei uvin ahi. Kihou na le grant demand chung a voting kibol na a Opposition MLA K. Ranjit Singh, R.K. Imo Singh, Alfred Kanngam Arthur, Kh. Joykisan Singh, Md. Fajur Rahim, Md. Abdul Nasir, Th. Lokeshwar Singh, K. Govindas, Km. Ak. Mirabai Devi le Surjakumar Okram ho in Dissaproval of policy cut chung motion raise ana bol uvin ahi.

AR hon NSCN-IM ho amat jeh uva mipi sousang hon Imphal-Dimapur lampi khahtan

Senapati, Feb 21(ET): Tuni chun Senapati district hopsung a um Mayangkhang area mipi hotoh AR ho nasatah in ana kiboi uvin AR hon NSCN-IM Major rank khat amat jeh uvin amipi hon akinthei pen a ahin lhadoh diuvin ngehna abol uvin chule senapati HQ sung ajong kiphinna sangtah ana lhung in Imphal-Dimapur lampi ana khahtan uvin ahi. Thulhut khat in aseina achun mipihon NSCN-IM cadre khat AR hon aman uve ti ahin jahdoh phat uvin aki koukhom uvin Mayangkhang a um AR ho gari abulu uvin boina akhoh cheh cheh phat chun AR hon a gari hou adalha uvin chule mipi sousang ho chun nitin kimanchah na ho asuboi uvin dukan ho akha sah uvin nasatah in kiphinna abol uvin ahi.

Tuni a thilsoh chu toh kimat in janhi chun Assam Rifle a Captain rank khat Government of People’s Republic of Nagalim (GPRN) hon athal toh ana man uvin CSO ho kihakum najal in tuni nilhah lam achun AR a captian pa chu athal toh ahin lhadoh kit uvin ahi. Hiche thilsoh chu AR ho ROP abol lai uva Naga thingnoi hotoh ana kisuto uvin hiche a kiboinalah achun AR captain pa chu Naga thingnoi hon ana man uvin hinlah mihiemkhat chung a lungsietna jal in ahin lhadoh uvin chule CSO ho kikum najal in athal jong ahin pedoh kit uvin ahi.

MP Ranjan in athusei suhthengna anei dinga MLA Ranjit in sei

Imphal, Feb 21(ET): Opposition MLA K Ranjit in Ningthoukhong a janni nikho a Meet our MP Programme a MP Dr RK Ranjan in thuso anei suhthengna anei dinga thumna aneiyin ahi.

House Zero Hour sunga MLA pa in athu apohdoh na a, niseh thuso a dangka crore 5 bou MP Development Fund a dinga kipe ahi’in, sum lhomcha a Kendra 32 a khantou machalna natoh toh ding hi thil hahsatah ahi, tia kisei ahi. Akisei sum (dangka crore 5) hi Local MLA Development Fund a dinga kipe ahi’in, hiche jeh a MLA hon ama ama Kendra khantou nadinga bailam tah a aman theiyu ahi. Ja umtah MP in MLA ho kipe a Local Area Development Fund thu ahetlou hi vangset umtah ahi. MP pa hin thu asei masanga agel dinga kaseipeh nom ahi. Tu masanga Local MLA ana kipe a Local Area Development fund hi kum khat a crore khat bou hi ahi’in, sorkar thah akisem jouva hiche hi dangka crore ni a akalsah u ahitai. MP pa thusei hi mipi adih louva apuina ahi’in, hiche jeh a suhthengna anei ding ahi. Achuti louleh dan noiya kihehna ato ding ahi, tin MLA K Ranjit in aseibe in ahi.