Gamsung’a diesel auto 25,000 electric engine a kikhel ding, April 7 a...

Gamsung’a diesel auto 25,000 electric engine a kikhel ding, April 7 a kon Imphal-Mandalay bus service kipan ding ahi, tia Chief Minister in sei

298
0
SHARE

Gamsung’a diesel auto 25,000 electric engine a kikhel ding, April 7 a kon Imphal-Mandalay bus service kipan ding ahi, tia Chief Minister in sei

Imphal, Feb 18(ET): Khopi sunga kon gari gih/len ho alhai nading ring road, elevated highway ni, khopi sunga diesel auto ho phal louding, ‘automated multi-level parking’ sah ding hohi sorkar in traffic aboi suhlhap nadinga tohgon anei phabep ahi, tin Chief Minister N Biren in Tuesday nikhon House a aseiyin ahi.

MLA K Ranjit leh MLA Kh Joykishan in Demand No 6 (transport department) thu toh kisiaya ‘cut motion’ abol adonbutna a asei ahi. Traffic anoh suhlhap nadinga lamlen kikehletna leh mipi lunghanna soh hohi gari atamcheh cheh jeh leh lamlen parking a akiman jeh a aboi jing kisuhlhap na a apang dehpoi, tia K Ranjit in asei ahi’in chule hiche chungchang a traffic system alolhing poi, tia ngohna jong anei ahi.

CM in adonbutna a lamlen ‘one-way a akisem, no parking zone akikoi, foot bridge kisa a, Naga nulla hop a parking space kikoi ho tilouva sorkar in ring road project jong abol vahding ahitai, ati. Hiche a dinga Imphal a kon Canchipur chule Imphal a kon Airport a elevated roadways ni kigong ahi, ati. Chule khopi sunga diesel auto ho alut ding phal louding chule diesel auto rickshaw 25000 vel hi electrical engine a retrofit bol dinga jong proposal um ahi, tin aseiyin ahi.

Hiche teni pan akilah a ahileh air pollution ichan gei hamkhat a vettup hiding chule traffic aboi jong sangtah a ol ding ahi. Sorkar in khopi sunga dinga e-bus 26 hi lha gup sunga choh dinga tohgon jong anei ahi, ati.

Aseibena achun State government leh Asian Development Bank (ADB) hontoh ring road project bolding in kinoptona anei thu asei in ahi. ADB in ngehna abol bang uvin Kangchup-Tamenglong lampi semna a lutding dk crore 8.4 jong akiphatsah tan chule hiche ring road siemna ding ahin mi chenna gam ho ahithei channa kiha tohkhah louding in jong asei in ahi.

CM pan aseikitna achun traffic suhlhom nading in Elevated highway 2 jong semding ahithu asei in khat chu Koirengei apat Canchipur jotpa a Imphal khopi sung lutding chule khat chu Imphal khopi sung apat Airport chan hiding ahi. Smart city project a parking system jong jaotha ahi jeh in Imphal khopi sung a parking kituptah neilou akhoh dan asei in hiche parking kituptah siemna ding munthum asei in Keishampat electricity office mai, Johnstone higher secondary school nung chule athum channa chu Lamlai a hiding in adeisah thu asei in ahi.

Imphal-Dimapur bus service jong akinthei pen a vetphat kitding in asei in chule Ccpur district sung a um Thanlon leh Parbung a Helicopter service koiding chule Ukhrul district sung a um Jessami a jong koi ding in asei in ahi. Hiche nading ahin Helicopter ki ngah nading mun Tamenglong, Moreh, Parbung, Thanlon leh Jiribam a sahdohna ding in dk core 39 jong Ministry akon sanction akibol tin asei in ahi.

Keishampat power station, M sector, Speakers quarter anahi, Koirengei leh adang dang a ‘automated multi level parking lot’ sah dinga tohgon um ahi, tin CM Biren in aseiyin ahi.

Imphal-Dimapur bus service akipat kit thu phondohna aneiyin, April nisim 7 a kon Imphal-Mandalay bus service kipan ding ahitai, tin aphongdoh in ahi. Sorkar in Parbung, Thanlon leh adang dang a helicopter service pat dinga tohgon anei ahi, tin aseiyin chule transport sector hi sorkar in agelkhoh jing ahi, ati.

MAHUD Minister Th Shyamkumar in Okram Surjakuman Singh ‘cut motion’ adonbutna a Ima Market a thenna chule don ding twitheng angaichat thu aseiyin, kailhang a ATM water kikoi ding ahi, ati. MLA Surjakumar in thil joh ho khohsahna jal a Tombisana market gangtah a sah jou dinga temna aneiyin, Minister pa injong aganna thei pen a sah jou dinga kitepna aneiyin ahi.

 

CMHT card nei mi 6,95,601 alhingtan, 2018-19 kum a hiche scheme noiya Dk. cr. 10 kisumang ahi: L Jayantakumar

Imphal, Feb 18(ET):  Manipur Legislative Assembly Budget Session a MLA K Ranjit Singh in thudoh anei Health and Family Welfare Minister L Jayantakumar in adonbutna’a Chief Ministergi Hakshelgi Tengbang (CMHT) leh AYUSMAN Bharat card neiya hi 6,95,601 leh 2,14,121 alhing tan, chule state sorkar in CMHT noiya 2018-19 kum a dangka crore 10 asuhmang ahi, ati.

CMHT Scheme noiya card neiho hi kum khat a dammo na chunga akijen nau dangka lakh ni chan kithopina kipe ahi. Advanced Specialty Hospital and Research Institute, Iboyaima Hospital and Research Centre, Jivan Hospital, Maipakpi Maternity and Child Hospital, Raj Medicity, Shija Hospital and Research Institute leh Sky Hospital and Research Centre Pvt Ltd kiti gamsunga um private hospital chule Guwahati khopi a um Narayana Super Speciality Hospital ho a jong card neiho hiche scheme noiya kijen thei ahi.

Tuchan in gamsunga Coronavirus case aumpon, ginmo case 2 a result kingah ahi, tia Health Minister in sei

Imphal, Feb 18(ET): Manipur gamsung hi Myanmar toh gamgi akikop na chule China toh akinai jeh a Coronavirus (2019nCoV) natna lhunna thei ahijeh a natna hi gamsung alhun louna dinga kiginna chom chom um ahi.

Congress MLA Okram Surjakumar in ‘question hour’ sunga thudoh anei Health Minister L Jayantakumar in adonbutna’a, natna akisei pat a kon China gam a natong ahilouleh lekhasim a che gamsung mi 248 hi February nisim 17 ni a hung kile ahitai, ati. Mi 248 lah a mi 9 hi natna nei hidinga ginmo ahi’in, ahivanga February nisim 14 nikho a sample kithot holah a mi 7 a hi ‘negative’ ahi ti hetdoh ahi. February nisim 17 ni a kithot case 2 hi result kimu loulai ahi, tin Health Minister in aseiyin ahi.

Natna douna dinga kigotna umho thudoh anei uchun L Jayantakumar in Medical Directorate a Coronavirus thu a kijenna dinga budget akicheh aumpoi, tin aseiyin chule hiche a akisumang hohi head office/contingency/office expenditure a kon kimang ding ahi, ati.

January nisim 18 nikho a kon Imphal Airport a passenger ho screening kipan ahitan chule Indo-Myanmar gamgi a um Moreh town a jong Medical team ho akiginna diuva thuhilna um’a, mopohna nei department hon Myanmar a kon kipo nehthei thil ho chan a akha ahi, ati. RIMS leh JNIMS hospital a isolation ward leh ventilator kikoi ahi’in chule sample kilahna leh test hi India sorkar in asem ‘standard operating procedure’ dungjuiya kibol ahi, tin jong aseiyin ahi.

District leh state level a Rapid Response Team ho kiging jinga um’a chule Directorate of Health Services in Print leh electronic media jong aman a pan alah ahi, ati. Ahivanga media education hi Imphal khopi a um nilhah thuso in amu khah loulai ahi.

House in Dk. crore 1050.8 lhing Demands for Grant 6 phatsahna neita

Imphal, Feb 18(ET): 11th Manipur Legislative Assembly 10th session nithum channi a House in kilungtoh tah in dangka 1050,80,35,000 lhing Demands for Grants 6 phatsahna anei tauvin ahi.

Phatsahna kipe a demand hohi State legislature a dangka 122,43,54,000, Council of Ministers a dangka 6,50,84,000, Secretariat a dangka 100,74,59,000, Transport a dangka 20,66,41,000, MAHUD (Municipal Administration, Housing and Urban Development) a dangka 723,55,08,000 chule Relief and Disaster Management a dangka 76,89,89,000 ahi.

Tua sorkar in Imphal Smart City project noiya ‘automated multi-layer parking system’ asah got ahi’in, hiche a dinga amun kilheng a project kipan ahitai, tin Chief Minister in aseiyin ahi. Chule Imphal leh thinglhang gamlha tah tah ho kijot to nading helicopter service kipan vahding ahitan, tua aumsa ho chunga kigong ahi’in, adeh a Churachandpur, Ukhrul leh thinglhang district ho a ahi, ati.

Imphal-Dimapur flight service hi tua niseh a um ding ahitan chule April lha a kon Imphal-Madalay bus service jong kipan ding ahitai, tin aseibe in ahi. MAHUD Minister Th Shyamkumar Singh in MLA K Meghachandra leh Okram Surjakumar Singh thudoh adonbutna a, ‘drinking water-ATM’ hi Khwairamband Ima Keithel mun phabep a kikoi vahding ahitai, tin aseiyin ahi. Chule Tombishana Market kisa hi aganna thei pen a kijou a mipi dinga pehdohna umding ahi, ati. Tender masa kisumang a athah a tender process kibol ahi, tin jong aseiyin ahi.

House in The Kangla Fort (Amendment) Bill, 2020, The Manipur University of Culture (Amendment) Bill, 2020, The Bir Tikendrajit University, Mnaipur Bill, 2020 chule The Manipur Sewerage Bill, 2020 jong seikhom dinga apodoh uvin ahi.

 

CCpur District a 2018-19 sunga naosen peng 1000 lah’a numei 909 hi; HMIS in CCpur Dist. sung’a naosen peng jat thu’a Data lahkhomna velvetna nei

B.Lalboi Gangte

CCpur. Feb 18 (ET): Dr. Vumchinpau Tonsing, Chief Medical Officer (CMO) Churachandpur lamkai nanoi in tunin Office chamber mun’a CCpur District sung’a naosen damsel’a peng numei atam joh nachung’a meeting anachelha in ahi.

Hiche meeting hi Health Management Information System (HMIS) chung chon’a District apat naosen tahsa dam’a peng holah’a numei atam joh jeh’a Deputy Commissioner in avetsui ding’a thupeh ahi dungjui’a chelha ahi. Meeting achun Dr. Jamthianlal DFWO/RCS, Dr. Lalzuitluangi, Medical Superintendent, District Hospital, Lamsanglian, District Program Manager, NHM, Seiboi Mate, District Data Manager, NHM, Vungmary, District  Community Mobilizer chuleh Ccpur District sung’a medical block 6 tichu Samulamlan Block, Henglep Block, Thanlon Block, Tipaimukh Block, Singngat Block leh Town sung’a Data Entry Operator ho jouse in pan anala uvin ahi. Data alahkhom nao’a naosen peng numei leh pasal jih lut ding dan toh kisai seikhom na anei uvin chuleh Kum 2018-2019 sung in Churachandpur District  sung’a naosen peng pasal 1000 lah’a numei 909 alhing in ahi.

Hiche hi jalhang’a numei suhnem na District ahi lou jeh’a nao peng ding numei hi jeh’a nao sulha atam jeh hi ding’a ginmo hilouvin naosen peng  numei leh pasal jih lut ahi teng suhkhel umkha hi ding’a ginchat ahi jeh’a Data Entry lang toh kisai’a mopoh nanei hotoh kihoukhom na chelha ahi.

Hiche toh lhon’a CCpur District sung’a naosen peng lah’a numei atamjoh toh kisai’a Churachandpur District hi Beti Bachao Beti Padhao (BBBP) program kiman na District ahitoh lhon in Government lam jong apoimo lheh in ajeh chu numei peng tamjo hinam ahilou leh data jih lutna lang dihlou hiding ham ti hetchet ahithei na ding’a data lahkhom na lang ding-chang ding in seikhomna anei uvin ahi.

CCpur police in numei chapang khat huhdoh

Ccpur, Feb 18 (ET): Superintendent of Police Km. Amrita Sinha, IPS makai nanoi in Churachandpur District Police in tunin numei chapang khat District Child Welfare Committee khut’a anapelut tan ahi. SP Amrita Sinha in hiche chung thu aseina’a Tedim Road,Hiangtam Lamka akon Meera Dey (38) in achanu kum 12 achesa Feb. nisim 15 jingkah lam nidan 8:00 vel’a inn akon anapotdoh ahung kile lou  District Police in achesa Feb. nisim 16 nikho chun missing report anakimu in ahi. Hiche report akimu toh lhon in Police in hiche numei chapang nu holdoh nading in aloi agol chuleh Zion Street kimvel, New Lamka a CCTV footage umho vetchil na anakinei in ahi ati.

Hiche toh kilhon in numei chapang chu Thengra Leirak a classmate nu inn a janhi (Feb. 17) nilhah lam nidan 7:00 vel’a anamudoh’u ahidan SP chun atahlang in ahi. Chuleh chapang nu chung’a formalitie bol ding’a kilom ho jouse akibol jou nung in Child Welfare Committee, Churachandpur khut’a akipelut tan ahi tinjong aseibei.

VPC (Eastern Block) President S. Lamzagou Vaiphei Police hon anahuhdoh

Imphal, Feb 18 (ET): Vaiphei Peoples Council (Eastern Block) President S. Lamzagou Vaiphei (44) chu tuni CCpur. PS hopsung’a um S. Kotlian khomun’a thi-op na kingon na achena in USRA cadre 2 leh 3 vel in nidan 12:30 vel in anapuimang uvin ahi tin thulhut chun aseiyin ahi. Hetthei khat chu S. Lamzagou Vaiphei hi Salampatong kho akon S. Thangkhotual Vaiphei chapa ahi.

Hiche thilsoh chung thu’a Ksh. Shivakanta Singh Addl. SP (Ops), BPR makai nanoi in CDO-BPR, Phougakchao Ikhai PS leh CCpur – PS kithokhom nanoi in S. Kotlian kho sung kholchil na ananei nao in Lamzagou Vaiphei chu anahuhdoh tauvin ahi. Ahin mi puimang USSR cadre ho chu anajam doh mang uvin ahi tinjong thulhut chun aseibei.

Doctor khat demand kibol thu’a mi khat kimandoh

Imphal, Feb. 18 (ET) : Non- SoO UG LTT (Liberation Tiger of Tribals) in Nazareth Hospital leh JP Selection mun’a head letter mangcha’a James Bone Kuki min’a kai-le-don anapeh nao chung’a FIR No. 10(2) 2020CCP PS u/s 384/400 and 34 IPC & 25 (1-C) Arms Act noi’a FIR registered anakibol tan ahi. FIR anakibol toh lhon in District Police in hiche lekha pe hi koi hi ding ham ti’a kholchil na aneinao’a tunin kai-le-don lekha anape Khongjanglok, Henglep Sub-Division akon Ngampao Haokip chapa Kamkholal Haokip (33) anamandoh tauvin ahi. Hetthei khat chu amahi FIR No. 56(04)2019, U/S 387/400/506/120-B IPC noi’a phat masalam’a anakimasa khat jong anahi.

Hiche toh lhon’a Police hon daan dungjui in achung thu kholchil na anei jing lai ahi. District Police Churanchandpur hin gamsung’a chamna leh lungmon na aum thei nading’a pan nasatah in ala jing uvin ahi.

 

Manipur gam panna a state 5 in ‘Community Kitchen’ fine apehlou jeh a Dk. lakh 10 apeh diuva Supreme Court in sei

Imphal, Feb 18(ET): Supreme Court in Monday nikhon Manipur, Delhi, Maharashtra, Odisha leh Goa gam in ‘community kitchen scheme’ semna dinga affidavit peh dinga kal masa a kisei dangka lakh 5 cheh apehlou jeh a dangka lakh 10 cheh apehbe diuvin aseiyin ahi.

Justice NV Ramana umna bench in state nga hohin dangka lakh 5 apehbe diuva asei ahi. Chule state tamtah in fine ngaijang dinga ngehna aneijong asan peh tapouvin ahi. Centre sorkar injong hiche thu a affidavit peh dinga asei ahi.

Kal masa a Supreme Court in State leh Union Territory sagi inbou ‘food security and community kitchen a affidavit apeh ahi, tia asei ahi’in, apelut a gam hohi Andaman and Nicobar Island, Karnataka, Punjab, Uttarakhadn, Jharkhand, Nagaland leh Jammu chule Kashmir ahi.

Court in hiche thu a April nisim 8 teng ngehna aban agnailhah ding ahi. State sorkar hon nidan 24 sunga affidavit apeh louva ahileh dangka lakh khat apeh diu chule reply file bol lou hon dangka lakh 5 apeh diu ahi, tia anasei ahi. Ngehna kisemna a hi kum nga noilang chapang tamtah niseh a kel leh neh pha lhahsam jeh a athi e, tia ngohna kinei ahi’in, hiche hi right to food and life of citizen panna a Fundamental Rights chom chom kipalkeh na ahi, tia kisei ahi.

PIL hi social activist Anun Dhawan, Ishann Singh leh Kunajan Singh in asem ahi’in, public distribution scheme pam a um ho dinga Centre in ‘national food grid’ asem dinga aseiyu ahi. Tamil Nadu, Andhra Pradesh, Uttarakhand, Odisha, Jharkhand leh Delhi gam a state fund noiya community kitchen ho a neh leh chah manlhom a kipe hi atheng ahi, tia akisei thu a ngehna kisem ahi.

 

India sunga Mizoram gam HIV/AIDS case tamna pen hijing nalai; Govt in nasatah a pan lah dinga kilolna nei

Aizawl, Feb 18: National AIDS Control Organisation (NACO) sei dungjuiya Mizoram gamsung hi HIV/AIDS natna neiya atam na pen gam ahijing nalaiye, tin Mizoram Health Minister Dr. R Lalthangliana in State Legislative Assembly a Tuesday nikhon aseiyin ahi.

Opposition lamkai Lalduhoma leh Dr Vanlaltanpuia (MNF) in thudoh anei Lalthangliana in adonbutna’a, October 1990 a kon December 2019 sunga hi Mizoram gam a HIV natna neiya mi 21,538 ahi’in, India gam a dinga HIV/AIDS natna nei atam na pen ahi, ati. Gamsunga HIV positive case masapen hi October 1990 kum a kihedoh ahi.

HIV case neiya hi khangthah kum 25 leh 34 kikah holah a asangpen in, 42.38 percent lhing ahi, tin jong aseiyin ahi. Minister pa in asei dungjuiya HIV rate hi National Working Group on HIV estimation in United Nations Program on HIV and AIDS (UNAIDS) in asem ‘global software spectrum’ dungjuiya avet (calculate) ahi.

Sorkar in natna achalbe louna dinga pan sangtah alah ahi, tin aseibe in ahi. “Houbung, NGO leh simlai kiloikhom hotoh tu naicha chun meeting kabol uvin, pan lahkhom dinga anop nau thu asei uve”, ati. Chule UN in Mizoram gam a natna achal louna dinga kithopina apeh dinga state sorkar in ngehna anei ahi, tin Lalthangliana in aseiyin ahi.

Tu naicha US leh Delhi a UNAIDS official ho kakimupi in, amahon kithopi dinga kitepna aneiyu ahi, tin aseiyin chule Mizoram State AIDS Control Society (MASCS) thahat sah ding sorkar in angaito ahi, ati. Alangkhat a MSACS project director Lalthlengliani in gamsunga Antiretroviral Therapy (ATR) akipohdoh January 2006 a kon September 2019 sunga AIDS jeh a mi 2,416 athi tai, tin aseiyin ahi.

Mizoram gam a niseh a mi 9 vel HIV natna nei ahi kihedoh ahi, tia kisei ahi’in, agamsung population dungjuiya natna neiya hi mihem hop 2.04 lhing ahi.