Gamsunga Covid-19 natna nei masapen nu nivei channa dinga test result negative...

Gamsunga Covid-19 natna nei masapen nu nivei channa dinga test result negative hita; Virus a kon damdoh ahitai, tia Health Minister in sei

95
0
SHARE

Gamsunga Covid-19 natna nei masapen nu nivei channa dinga test result negative hita; Virus a kon damdoh ahitai, tia Health Minister in sei

Imphal, April 6(ET): Manipur gam a Covid-19 case kisei masapen, Imphal West a kon kum 23 a upa numeinu Monday nikho a anivei channa coronavirus test abol nauva ‘negative’ ahitai.

Health Minister L Jayantakumar Singh in asei dungjuiya, numei nu hi COVID-19 virus a kon damtheng ahitai. “Medical department jouse, adeh a JNIMS a doctor le staff ho dinga lolhinna sangtah ahi”, tin Minister pa in ama Facebook page a aseiyin ahi. Igamsung uva Covid-19 suhmang soh nadinga pan lajom uhite, tin aseibe in ahi.

JNIMS Director Dr. Th Bhimo in Covid 19 positive nu panna a natna nei dinga ginmo mi 9 sample kila a tuni a test kibol ahi, ati. Numeinu test result negative ahitan, atahsa adam tai. An le tui jong adu thei tan ahi. Symptoms ho aman a, result negative ahi hi kitoh lheh ahi. Hijong le nidan 24 jouteng test kibol kit ding chule Hospital in clinical check ho abol jouteng discharge bol ding le bol louding thu aseikhom ding ahi, tia asei ahi.

April nisim 4 hi gamsunga dinga thusim a seithei ahi, tin director pa in Chief Minister, Health Minister, health care worker le adang dang ho pachanna aneiyin ahi. Thulhut dungjuiya, tua state sorkar in numeinu hospital a kon discharge bol nading thu seikhom dinga committee asemdoh u ahi’in, hospital a kon discharge vah ding ahitai.

Vimi hi gamsunga Covid-19 positive masapen ahi’in, achesa March 23 a kon JNIMS isolation ward a umpan ahitai. London a kon March nisim 21 nikho a hunglhung a, ajing nikho a test akibol sah pai ahi. March 23 ni a result soh a, positive ahi akihetdoh jouva JNIMS a umpan ahitai. Kolkata a kon ahin kilhonpi anaopa hi test abol nauva ‘negative’ hi ahi.

State Medical department in thuso anei dungjuiya Manipur gam a positive case hi ni hijing nalai ahi. Gamsunga um government quarantine facility chom chom a agom a mi 282 quarantined kibol ahi. Achesa Saturday nikho a sample 22 lab test bol dinga athot u ahi’in chule tuni a sample 22 kithot ho panna a agom a sample 136 hi negative hi ahitai.

Test kibol sample 136 lah a 16 hi April nisim 4 chan a ginmo hi a, nat achal louna dinga hospital a kikoiyu ahi. Imphal Airport panna a gamsung lutna jouse a agom a mi 18,7488 screend kibol a, hiche lah a mi 486 ‘home surveillance’ a kikoiya, mi 371 hi ‘surveillance’ a akikoina phat lhing ahitai. Chule government quarantine centre a um mi 5 jong ni 14 lhing um u ahitai.

Alangkhat a, Nizamuddin kikhopna a kon hung kile a, coronavirus positive hi a mipa jong tu le tu a hi atahsa hat jing ahi.

April 14 jou a jong COVID-19 hotspots mun ho a Lockdown kikoi nalai maithei ahi: Govt. source

New Delhi, April 6: Coronavirus natna pun be nalou ding a mipi che le vah le kikhah jing chu ahunglhungding April nisim 14 jou a jong chenalai ding in govt akon thuso kimu chun asei in ahi. Coronavirusnatna pun jing nale khoh seh na gam ho tilou a lockdown vang kilah doh ding ahitai akiti.

Cabinet Secretary Rajeev Gauba in kal masa lam a lockdown suh sao be ding tohgon um lou thu ana sei vang in state phabep in suh sao be ding a hetsah na ananei utoh lhon a hitabang natoh na hi hung kinei be go ahi. Hetthei khat chu covid-19 natna nei hi achesa kal sung a India sung a nasatah a hung khang ahi.

India sung a covid-19 case hin Monday ni jingkah a 4000 akhel ahitan ahi. Monday ni jingkah chan in mi 109 lam in hiche natna akon tina atoh tai tia health ministry in hetsah na ahin nei u ahi. Hiche thina pun be jing hi US asang  a hatah a anem joh vang in Asiaa gam aum na Japan le Singapore ho sang a nsatah a khang ahi tan ahi.  Govt akon thuso kimu dungjui in gampumpi vang kikhah talouding hinlah natna tamna ho bou ki khah ding ahi akiti. Thuso kimu dungjui in lockdown chung chang ahi Prime Minister pa in cabinet meeting akou ding ahi akiti. Lockdown toh kisao a mipi tamtah in genthei na ato toh lhon a lahdoh ding a Prime Minister pa in ana sei ahi.

Lockdown akilahdoh leh mitamtah in thina atobe ding ahi tia KCR in PM heng a hetsah

Hyderabad, Apr 6: Telangana Chief Minister K Chandrashekhar Rao in PM Narendra Modi heng a ngehna abolna achun Covid-19 jeh a kibol lockdown hi tu dinmun a akilahdoh leh athijat kalbe ding ahi in hijeh chun susao be ding in ngehna anei  in ahi. Tua lockdown kibol hi Apirl 14 leh kichai ding ahi in aban aki koibe loule natna vei hetmanlou kah a khang ding chule thina toh jng kibe ding ahi ati. Aseibena achun gamsung economy chu semphat kitthei ahi in hinlah hiche natjeh a thina toh ho kinung kou kit theilou ding ahi ati.

Uttar Pradesh gamsung a bureaucrat hon jong Apirl 14 nikho a lockdown kibol hi a state sung uva kiladoh louding in temna anei uvin chule Telangana gamsung ahin Covid-19 vei mi 334 aphatan, akijen dam mi 33 chule thina toh mi 11 aphatan ahi.

Thinglhang district a kitepna bangin thil akihom poi tia ATRPFM in sei; Kithopina thil ho dihtah a ahop diuva temna jong nei

Imphal, April 6(ET): Social media panna a tahsan umtah thulhut chom chom a kon Chief Minister N Biren Singh in kitepna anei vanga thinglhang district a angaicha anchang, dal, thao chule neh le chah adang dang ho phatah a akihom poi, ti thu hetdoh ahi, tin All Tribal Rights Protection Forum Manipur (ATRPFM) in thuso anei uvin ahi.

Chief Minister in mikhat cheh anchang kg 4 hop peh ding a kitepna anei ahi’in, achuti a ahile insung khat a mi 5 umna ho in lhakhat a anchang kg 20 chule dal, thao, hawai, chini le adang dang amu diu tina ahi. Ahivanga mopohna nei MLA, ADC, ration agent le authority dang dang hon gamsung miho achan diu lom thil apeh louvu ahi, tin ATRPFM in aseiyin ahi.

Covid 19 jeh a gamsung pumpi a lockdown akikoi sunga angaicha ho kithopi nadinga fund Union government (PM CARES chule institution, organization le changval) a kon amu ahitan, Chief Minister’s COVID-19 Relief Fund a dangka lakh a sim kithopina pe tamtah um ahi. Tua hi state sorkar le thinglhang constituency a MLA ho henga ATRPFM in thudoh anei nom ahi’in, kitepna anei hou hoiya um hitam?

Anchang kg lhomcha a hi  phat hahsat pet a gamsung miho bulhing joulou ahi. Thinglhang miho hi genthei ahi’in chule kikholdoh sum anei louvu ahi. Communication facility lhasam a chule tuchan geiya anchang kg lhomcha cha a akihop tilouva neh le chah adang ho supply jong lhung theilou ahi’in, hiche a hi kilhing joulou ahi.

Supply abol louva, che le va le na aumthei louding gammang a kingam thinglhang miho dinga sorkar hibou kingapna a aneiyu ahi. Ahivanga kithopina a kihom thil hohi chang kingailutna neiya lamkai phabep in alam louva aman toh aki louvin, achang dinga lom ho henga lhung lou ahi. Hiche hi phatah a kholtoh ngai ahi.

Christian hi a mi phabep in adih louva na atoh a ahile chonsetna ahi. Chule Christian ahao hole houbung in angaicha ho tu dinmun a jong kithopina apehlou hi hou chule tahsan toh kitohlou ahi, tin jong asei uvin ahi.

Chief Minister, MLA ho, ADC, agent chule mopohna nei authority hon hiche thu avetlhah uva chule kithopina thil kihom hohi achang dinga lom ho heng alhun nadinga pan alah diuvin ATRPFM in temna aneiyin ahi. Mopohna nei authority hon neh le chah ho akigong banga aganna thei pen a ahop diu chule thil kihop dan phatah a avetkol diuvin temna anei uvin, achuti louva ahile ATRPFM in themmona neiya officer, agent le changval ho chunga action alah ding ahi, tin gihnajong anei uvin ahi.

 

Haomee Federation in thinglhang mi ho anchang kilhom pehna chunga thudoh nei

Imphal, April 6(ET): Tu letua government in mipiho anchang ahop peh na chung a thinglhang mi ho ahi ding bang a achan na lou chung a Federation of Haomee  in chief minister pa ang ah thudoh ana nei uvin ahi. Kiloikhomna in thudoh ana nein a uva mi khat in iti anchang kg 2 a lha khat hinkho aman ding ham tin ana sei uvin ahi.  Federation of Haomee president Sapamcha Jadumani in asei na a kg 50 a gih anchang bag 248, Tangkhul kho 18 a aki hom in, hiche kho ho ahi agom a inn 1562 lam aum ahin, hiche ihop le mi khat kg keh bep chang jou ahi ati. Thayong kho a kg khat le akeh insung khat a ana kihom in chuleh Purum Khullen, Purum Likli, Ngakha Pat le Lairok Kom kho ho a kg 8 cheh insung khat a ana kihom in ahi tin Jadumani chun tahlang na ananei in ahi. Phungyar AC sung a jong Thawai kho inn 399 lam um na a anchang bag 80 bou ana kipeh dan jong tahlangna ana kinei in ahi. Riha kho a inn 200 lam umna a anchang bag 59 bou ana kihop daan jong tahlang na ana kinei in ahi. New Canaan kho a inn 401 umna a anchang bag 74 bou ana kihom in, Litan Sareikhong a Tangkhul inn 53 umna a tu chan in anchang achang hih lai uvin ahi akiti.

Tadubi AC sung a kho jouse a in son a anchang kg 13 cheh anakihop na a Chawangkining a ana kihop loud an thu jong tahlang na ana kinei in ahi. Tu channa Senapati district sung a um New Eden le Katomei kho chuleh Mao AC noi a um Chawainu le Punanamei kho ho a tu channa achang kihop loudan jong hetsah na ana kinei in ahi.  Tamenglong sung kho a insona kg 6 chehkipeh dan le Chandel khosung ho a inson a kg 2 bou kip eh dan thu jong kiloikhomnain hetsah na ahin nei uvin ahi. Govt natoh chung a kiloikhomna in kipa thusei na ahin nei vang uvin hitabang a achan ding dol chang lou ho vetsui ahi na ding in kiloikhomna in chief minister pang ang a vetsui nakinei na ding in hetsah na ana nei uvin ahi.

Khoutah a gamsung kha dinga thupeh aum jouva ‘lockdown’ palkeh mi sangval gotna kipe

Imphal, April 6(ET): Monday nikho a Manipur gamsunga COVID-19 nat douna dinga lockdown kikoi palkeh a aja a sim Manipur police hon gotna ape uvin ahi.

State sorkar in kal khat sung, April nisim 12 nikho chan hi ‘lockdown’ khoutah a jui dinga thuphon anei ahi. State sorkar thuhilna dungjuiya district jouse a district magistrate hon Sunday nikho a nat douna dinga dan akikhou sah thu a order asodoh u ahi. Kailhang a dukan chule an me kijohna ho jong April 12 chan kikhah ding ahitan, lockdown khoutah a achelhah thei nading ahi.

Ahivanga, lockdown sunga hi lou kijohna pharmacy, bongnoi kijohna chule thuso ho kilha ong ding ahi. COVID -19 natna vetkol jou nadinga hitobang a kivenna kinei ahi’in, sangtah a pan kila ahi, tin official thulhut in aseiyin ahi. Achesa March nisim 24 nikho a kon gamsung pumpi a curfew kikoi ahitan, police hon lockdown palkeh aumlou nadinga muntin a pan sangtah ala uvin ahi.

District headquarter chom chom a kon report kimu dungjuiya, police hon niseh ngaichat thil chule an me kijohna dukan jingkah a ana kihong hojong hunam a akhasah uvin ahi. Police hon dan palkeh a aja a sim aman uvin, ama ama magistrate a apui uvin chule aleusah uve, tin police thulhut in aseiyin ahi.

Senapati district a curfew palkeh a lamlen a hungdoh mi ni lamlen a police hon uphoh chop atho sah uvin ahi. Mun dang dang a jong lockdown kikoi palkeh ho hitobang ma a gotna apeh u thulhut jong um ahi. Sunday ni le tuni a drive abol nauva lockdown palkeh a agom a mi 1036 aman uvin chule gari 722 jong amat tha uvin ahi. Akiman ho ama ama Magistrate a apui uva, dangka 80,000 aleusah u ahi.

Mipin thuhilna chule sorkar in guidelines asodoh ho phatah a ajui diuvin Police Department in temna aneiyin, eima kivenna le kihuhna dinga insunga umding ahi, ati. Ahung lhung ding nikho sunga jong police department in ‘lockdown’ khoutah a ache jom pi ding ahi.

 

COVID-19 douna dinga MP ho lo 30% kah dinga sorkar in thulhuhna nei; Kum ni sunga dinga MPLAD Fund jong PM-Cares Fund a kikoi ding

Imphal, April 6(ET): India gam in muthei lou melma coronavirus nat adou alolhin tei nadinga Union government in MP le Minister ho lo suhnem dinga kilolna anei tauvin ahi.

Union Cabinet in tuni a Member of Parliament (MP) ho lha lo hi kum khat sung hop 30 kah dinga ordinance phatsahna anei ahitai, tin Union Minister Prakash Javadekar in aseiyin chule thulhuhna hi gamsung in coronavirus pandemic adou thei nadinga kila ahi, ati. Cabinet in Salary, Allowances and Pension of Members of Parliament Act, 1954 velvetna aneiya ordinance kisem phatsahna anei ahi.

April nisim 1, 2020 a kon kum khat sung amaho lo le pension hi hop 30 kikah ding ahi. Chule President, Vice President leh state Governor honjong lo hop 30 kah ding nopna aneiyu thu aseiyu ahitai, tin Javadekar in aseiyin ahi.

Sorkar in Members of Parliament Local Area Development Scheme (MPLAD) fund jong kum 2 suspend bol dinga thulhuhna anei ahitai. MPLAD fund a kon dangka crore 10 cheh hi Consolidated Fund of India a lut ding ahi. Consolidated Fund hi 7,900 crore lhing ding ahi.

MPLAD Fund hi 2021 le 2022 kum a Consolidated Fund of India a kipe ding ahi. PMLADS fund hohi MP constituency a khantou machalna natohna a kimang ahi. Prime Minister Narendra Modi in Sunday jan nidan 9 a ‘minute 9’ lhing coronavirus nat douna dinga light tha a candle, torch le adang dang ho vah dinga kouna anei jouva thulhuhna aneiyu ahi.

India gam a coronavirus case 4,000 val ahitan chule tuchan geiya natna jeh a thi 109 lhing ahitai. Chule vannoi pumpi a covid-19 case 1.3 million lhing vahding ahitan, natna jeh a thi jong 70,000 val ahitai.

 

Lenna a kuwa na po ho chunga dan dungjuiya action kila ding ahi: CM

Imphal, April 6(ET): Covid-19 natna jeh a gamsung aboi laitah a Air Cargo a kuwa nah in po ho chunga dan dungjuiya action kila ding ahi, tin Chief Minister N. Biren Singh in gamsung miho henga kitepna aneiyin ahi.

Chief Minister’s Secretariat a kon video message athotna a CM in hiche thu asei ahi. State sorkar in order asodoh dungjuiya, gamsunga lockdown aum sunga ama ama Deputy Commissioner ho henga phalna kila masa louva angaicha khoh hilou thil ho kipo theilou ding ahi, tia thupeh um ahi’in, airport pam a koiman kuwa na apohdoh thei louding ahi, tin CM in hetsahna aneiyin ahi.

Kuwa na a sumkol vein a hi dan in akha ahipoi. Hijong le tu dinmun a Covid-19 jeh a gamsung miho alungkham chule aboi laitah le lockdown akikoi laiya angaicha louhel kuwa na thil kipohna lenna huikong a ahin pohlhung uhi gamsung miho dinga lunghanna thei ahi, tihi sorkar in jong hetthemna anei ahi, ati.

Sorkar in Imphal Airport a thil kikoi ho phatah a avetkol ahi. Airport a posting hi a police ho khol dinga surveillance team jong kikoi ahi, tin aseiyin chule gamsung mihon sorkar atahsan uva atosot diuvin temna aneiyin, sorkar in dan toh kitoh louva na atoh louding ahi, ati. Hiche thu a thuthah hojong media mangcha a sorkar in mipi ahetsah jom ding ahi, tin aseibe in ahi.

Covid-19 douna a pan lahkhom dinga Chief Minister in temna aneiyin, gamsung miho inmun a aum tup uva, social distancing dan ajui diuvin ngehna aneiyin ahi. Union government thuhilna dungjuiya gamsunga tuchan geiya hi Indian Air Force lenna, Indigo chule adang dang a medical thil chule PPE, hand sanitizer, face mask le adang dang panna a ngaichat khoh ho thil thumvei ahin pohlhung u ahitai, tin aseibe in ahi.

Kuwa do hinpo lut mi 4 kimandoh ta

Imphal, April 6(ET): Achesa Apirl 4 nikho a Bir Tikendrajit Airport Imphal khopi sung a Cargo vanleng a Kuwa do (betel leaf) phabep pi ahung kipohlut toh lhon in police hon mi li ana mandoh tauvin ahi. Aki mandoh ho chu Laishram Anil alias Chara, 27 S/o L Bino of Changangei Mayai leikai, Irengbam Surjit, 40 S/o (L) Nabakumar of Changangei Mayai Leikai, Chingakham Surchandra, 24 S/o Ningthoujao of Tairenpokpi Awang Leikai chule Laihram Sanangamba, 26 s/o Ingobi of Chagangei Maning Leikai ahiu vin tuni chun court a dindoh sah ahiuvin, ahin pohlut nau ajeh pomthei ding a apeh theilou jeh un judicial custody a umtadi ding in thutanna aneikhum in ahi.

Inspector K Bobby OC Tikendrajit Airport Police Station in April 5 ni chun  Singjamei Police station ah jihtho in lekha apelut in April 4 sun 12 don a Bir Tikendrajit International Airport sung a kwa do kipohlut thu ana hetsah in ahi. Kholchilna akibolna achun kwa do ho chu Thingujam Kamo (48) S/o Tomba of Yumnam Huidrom min a hung lhung ahi in chule hiche a hin Laisharam Anil chun akithopi in ahi. Ahinpo ho hin hiche tobang thil hin pohlut theina ding in akisaipi authority ho heng a jong phalna ala pouvin chule Depurty Commissioner, Imphal West heng akon bou phalna/nopn alahthei ding un asei in ahi. Laishram Anil leh Irengbam Surjit jong aman uvin Singjamei police khut ah apelut uvin chule midang li ho chu janhi chun Maritu van ni toh asung a kwa do phabep ho amandoh uvin ahi. A 4 uvin janlhah chun Court ah dinsah ahiuvin Duty Magistrate in athum nau sanpehna ding in dk 50,000 che fine bolsah a lhadoh ding in asei in hinlah phat kitep sung in jong apeh theilou jeh un Apirl 18 chan Judicial custody a umding a thutan khum ahi tauvin ahi.

Gamsung pumpi lockdown jeh’a lou le ai jong ning lhing jou talou; Pharmacy phabep kikhah ta

B.Lalboi Gangte

Ccpur. April 6 (ET): COVID-19 natna jeh’a lamlhah na jouse khatan ahitoh lhon in Ccpur District sung’a lou (medicine) khat veivei kipolut thei jong leh phat dang ban’a akipohlut thei tah lou jeh in khopi sung’a lou kijoh na Chemists shops/Pharmacies ho’a lou aum gam tapon ahi tin Pharmacy neihon ana aphongdoh uvin ahi. Chuleh lou atam jo Pharmacy dung’a aum tah lou jeh in Pharmacy atamjo akikhah gam tan chuleh tu’a kihong Pharmacy ho’a jong deibang tah lou aum tapon ahi tin thulhut chun aseiyin ahi.

Hiche toh lhon’a Pharmacy jouse in lou anei jouse’u acho nom jouse a ding’a joh akoi ahi naban’a  State Govt. leh Supply stockists hon lou kining lhing tah aum theina ding’a pan alah ding’u hi poimo tah ahi tin Pharmacy neihon anatahlang uvin ahi. Chuleh Imphal khopi sung jeng’a jong lou ahah pan tan adeh in JNIMS Hospital dung’a Chemist shop tamjo ajong lou choh ding kimu jou talou ahi dan aphongdoh uvin ahi.

Quarantine kibol akiholmo Doctor pa mu hita

Imphal, Apr 6(ET): Thulhut khat in aseina achun Porompat a hospital a quarantine kibol doctor khat akiholmo e ati.  Director of Health service K Ranjo Singh in SP Imphal west ahetsahna achun Kshetri Bengoon a cheng Dr. Ayub Khan hi akiholmo in Lilong akon mikhat covid-19 vei mudoh ahitoh lhon peace hospital a ama jen masa a pang medical staff ho ni 14 sung quarantine bolding a thupeh ahi bang uvin abol uvin hinlah janhi chun Dr. Ayub khan chu aumna het ahitapon, akinthei pen a police hon ahin kholdoh gangchel diuva thupeh ahi utoh lhon in tuni chun Dr. Ayub chu amudoh uvin aman aseina achun quarantine ahi lam kaki haimil jeh a in kaga phah ahi ati.