Gamsung’a ani channa dia Nizamuddin Markaz a pang khat COVID-19 positive photchen...

Gamsung’a ani channa dia Nizamuddin Markaz a pang khat COVID-19 positive photchen hi; Inn a umtupchet a midang toh kinailou hi nat douna lampi phapen ahi, tia CM in sei

131
0
SHARE

Gamsung’a ani channa dia Nizamuddin Markaz a pang khat COVID-19 positive photchen hi; Inn a umtupchet a midang toh kinailou hi nat douna lampi phapen ahi, tia CM in sei

Imphal, April 2(ET): Manipur gam a COVID-19 positive case khat akiseibe kit toh kilhon a gamsunga coronavirus natna neiya kiphotchen a ni (2) alhingtan ahi.

Lilong a cheng kum 65 a upa pasal khat April nisim 1 nikho a COVID-19 positive ahi hetdoh ahi’in, tua hi RIMS Hospital a kijen ahi, tin Dr Kh Sasheekumar, Additional Director, Medical Directorate in soi akaina COVID Common Control Room thuson aseiyin ahi.  Lilong a kon mipa hi gamsunga COVID 19 positive ani channa ahitai.

“New Delhi khopi, Nizamuddin Markaz mun a Tablighi Jamaat in khompi abolna a pang ahi, tin thulhut in aseibe in ahi. Union Home Ministry a kon thulhut kimu dungjuiya Nizamuddin a kikhopna a pang ahiloule amun toh kinai vel a che a Manipur gam mi 105 alhing e, ti thu akimu in, ahivanga thukholna akinei be a hi kikhopna a mi 10 pang a chule apam a um mi 35 hi koi ahi kihedoh ahitai”, tin Chief Minister N Biren Singh in thuso aneiyin ahi.

Tablighi Jamaat Congregration, Delhi a pang gamsung mi 10 lah a mi ni hi natna nei dinga ginmo ahi’in, mi ni lah a JNIMS a kijen mikhat hi test akibol na a ‘negative’ ahi. Adang mi 8 hojong test kibolna a ‘negative’ ahiuvin, ahivanga alhompen a ni 14 ‘quarantine’ kibol ding ahi. Mikhat hi COVID 19 positive hi ahi, tin CM in aseiyin ahi.

“Kum 23 a upa numei khat positive ahi akihetdoh a chun lungkhamna sangtah akineiyin, ahivanga a insung mi jouse test kibol ‘negative’ ahi a chule ama dinmun jong a ol cheh cheh a, ama a kon natna lason aumlou jeh a lungmonna aume”, tin CM in aseiyin chule Nijamuddin, Delhi a hou thu a kikhopna a Manipur gam mi ho apang e, ti thu akijah kit a hi lungkhamna sang cheh ahi, ati. Ani channa a COVID 19 positive photchenna kinei mipa insung mite jouse RIMS a ‘quarantine’ bol dinga akipui tai, tin aseibe in ahi.

Virus hi achal louna dinga mopohna nei authority hon pan alah u ahi’in, gamsung mihon gamdang a akholjin nau ho asel guh lou diuvin temna aneiyin ahi, ajeh chu natna hi gangtah chule bailam tah a kilason to thei ahi, ati. Gamsung miho inmun a aumtup uva chule midang toh akinai loudiu hi gamsunga COVID 19 nat douna dinga lampi phapen ahi, tin temna jong aneiyin ahi.

Mihem hinkho huhdoh nadinga ‘lockdown’ bol ngai ahi’in, gamsung mihon gamsung pumpi akikha na hi atosot diuvin temna aneiyin chule World Health Organization (WHO), Health and Family Welfare Ministry, India government chule medical expert ho thuhilna abon a jui dinga aseibe in ahi. Lockdown aum jeh a koiman kel athoh louding ahi, tin jong kitepna aneiyin ahi. “Insung jousen neh le chah amu nadinga pan kila ding ahi”, ati.

Jan Dhan account neiya numei crore 20 in lha kit a kon lhathum sung lha a dangka 500 amu diu ahi, tin CM Biren in aseiyin chule MNREGA noiya insung crore 13.62 in dangka 182 khel a dangka 202 tha man joh amudiu ahi, ati. Senior citizen, meithai chule tahsa tibukimlou  crore 3 vel ex gratia dangka 1000 kipeding ahi. Prime Minister Kisan Yojana scheme noiya sorkar in April kal kipat sunga loubol mi 8.7 crore dangka 2000 apeh ding ahi, ati.

Manipur University, Dhanamanjuri University le local entrepreneur hon hand sanitizer, mask le adang dang asem doh nau chunga CM in akipapina thu jong aseiyin ahi. Alangkhat a, Lilong a kon mikhat COVID 19 positive ahi ti thulhut aum jouva District Administration in Manipur Epidemic Disease, COVID-19 Regulations 2020 noiya gamkai akhah tup tauvin ahi.

Thoubal district Deputy Commissioner, N Bandana Devi in order asodoh na a, Lilong, Thoubal district akhah tan ahi. Akikha na gamkaiya lut le pot ding kikhah ahitan, koima ahiloule gari jong lhai theilou ding, school, office le mipi kikhopna abon a kikhah soh ahitai.

Thulhut chom khat a, natna neipa hi RIMS a test akibol masanga private hospital (Peace Hospital, Porompat, Imphal East) a admit akibol e, tin aseiyin ahi. March nisim 20 a kon nisim 22 sung hospital a um ahi, tin thulhut in aseiyin ahi. Peace Hospital, Porompat, Imphal East a worker 15 ho jong test akibol tan chule hiche phatsung’a Peace Hospital a kijen leh hospital vilna neihon COVID-19 control room phone no 1800-345-3818 akijahmat pi diuvin hetsahna jong anei uvin ahi.

Achesa March nisim 24 nikho a Manipur gam a kum 23 a upa UK gam a kon hung kile numei khat coronavirus natna anei akihetdoh hi gamsunga dinga case masapen ahi.

Achesa March nisim 13 le 15 sunga Nizamuddin a Markaz hi Tablighi Jamaat hon akon ahi’in, Indonesia, Malaysia, Kyrgyzstan le Saudi Arabia gam mi panna a mi 2,000 vel kikhom ahi. Nizamuddin a kikhopna hi ‘coronavirus hotspot’ khat ahi akihetdoh jouva kikhopna a pang COVID 19 natna nei hidinga ginmo nasatah a akhol pan u ahitai.

COVID-19 case 400 hi Tablighi Jamaat cluster akon ahi: Health Ministry

New Delhi, Apr 2: COVID-19 positive case 400 hi Tablighi Jamaat cluster a epidemiological linked ahi hetdoh ahi, tin Health Ministry in Thursday nikhon aseiyin ahi.

Health Ministry Joint Secretary Lav Agrawal in niseh a thuso aneijing ahi’in, Wednesday nikho a kon novel coronavirus case athah 477 aumin chule natna jeh a mi 16 thibe ahitai, ati. India gam a tuchan a coronavirus case 2388 lhing ahitai.

“Cabinet secretary in chief secretary chule DGP hotoh video conferencing aneina a Tablighi Jamaat kin gon a pang ho kijahmat pi a chule nat douna a pan sangtah lah dinga janni a asei ahi”, tin Agrawal in aseiyin ahi. ‘Contact tracing le sampling jouva positive case 400 vel hetdoh ahitan, hiche hohi Tablighi Jamaat cluster a kon ahi, ati.

Hiche lah a hi Tamil Nadu gam a mi mi 174, Rajasthan gam a kon 11, Andaman and Nicobar Island a kon 9, Delhi a 47, Puducherry a 2, Jammu and Kashmir a 22, Telengana a 33, Andhra Pradesh a 67, Assam a 16 chule Manipur le Arunachal Pradesh a 1 cheh um ahi. Ajat hi sample test akibol chan a tam cheh cheh ahi, tin Agrawal in aseibe in ahi.

Tuchan geiya Covid-19 jeh a mi 179 dam doh ahitai, ati. “Covid-19 case akaljing vanga vangphat umtah a natna a kon mi 179 adam doh tai. COVID 19 positive ho jen le a doctor lhasam ahi’in, hospital a kivenna dinga dan jui ding hi thupi ahi”, tin aseiyin ahi.

Dharavi COVID 19 positive case thu a Agrawal in adammo pa umna building kikhah a chule dan dungjuiya akisuhto/akimupi ho kikhol a chule sample kichom ahitai, ati. State in district level a coronavirus boina avettup dinga Prime Minister in temna anei ahi, tin Joint Secretary in aseibe in ahi.

Personal protective equipment (PPEs) crore 1.5 choh nadinga order kibol ahitan, supply jong kipan ahitai chule N-95 mask gamsunga akisem na dinga natoh umjing ahi, ati.

Covid-19 natna kipehson nalou dinga Manipur govt. in Lilong area khahtup

Imphal, Apr 2(ET): Lilong a cheng pasal khat Delhi a kikhop khomna a aga jao jouvin tulai a natna kisei minthang covid-19 vei ahi akihetdoh apat in state government in hiche natna hi ama chenna sung Lilong akon ajahdoh louna ding in tuni chun lampi jouse akhahtan uvin ahi.

Thoubal Deputy Commissioner B Bandana Devi in aseina achun North lampang a um Jama Masjid Road, South lampang  aum Nangbu road/Buya Salam road, chule NH 102 leh Imphal vadung a kijotmat theina ho jouse akikhahtai ati. Mipi kipunkhomna mong mong hithei louding chule school leh office ho jong akikhah sohkei in ahi. Hiche natna veipa chenna lhang sung a hi gari khatcha jong lhaitheilou ding dan kipe ho juilou aki matdoh leh achung a dan khaotah kila ding ahi tin thulhut chun aseiye.

Nizamuddin kikhopna jeh a North East a Covid-19 case sang cheh cheh; Case athah 5 kimube

Imphal, April 2(ET): North East state a sorkar jouse tobang in kiginna sangtah anei jinga March 23 chan a COVID-19 positive case aumlou jeh a lungmonna anaum ahi.

Lockdown aum ni 5 channi a Delhi khopi a achesa March 13 a kon 15 sunga Nizamuddin, Delhi a hou thu a kikhopna aumjeh a gamkai abon a natna neithei ding dinmun a aumhi gamkai pumpi in alungkhampi ahi, ajeh chu mobile tracker a kon Manipur gam panna a North East a kon mi 465 hiche kimvel a aum’e, ti kihedoh ahi. Mi 465 lah a Manipur gam mi 85, Meghalaya a kon mi 7 chule Assam mi tamtah kikhopna a pang ahiloule kikhopna kimvel a aum’e, tia kisei ahi.

Arunachal Pradesh in Thursday nikho a agamsunga dinga COVID-19 positive case masapen amudoh ahi’in, natna nei mikhat hi Nizamuddin kikhopna a pang ahi’in chule ‘quarantine’ abol u ahitai. Arunachal Pradesh gam a COVID-19 natna neiya kisei masapen pa hi Lohit district a kon ahi’in, Markaz a pang ahi.

Thulhut dungjuiya Nizamuddin Markaz a Arunachal gam mi 7 pang ahi’in, amaho hi March 19 ni a agam a kileu ahi. Midang 6 hohi Namsai district a kon ahiuvin, amaho jong ‘quarantined’ abol uva, test result anga jing nahlaiyu ahi.

Alangkhat a Manipur Covid 19 common control room in thuso aneina a Lilong a cheng kum 65 a upa Covid 19 positive ahi hetdoh pa jong hi Nizamuddin Conference a pang ahi. Kikhopna a Manipur gam mi 10 apang’e, tia kisei ahi.

Assam gam a jong COVID-19 case thum akisei be kit in, Goalpara a kon hiu ahi. Natna neiya agom a mi 16 hi abon uva Tablighi Jamaat in abol Nizamuddin Markaz, Delhi a pang u ahi, tia Health Minister Himanta Biswa Sarma in Thursday (April 2) jingkah nidan 12.15 a update abol ahi.

Nizamuddin Markaz kimvel a mi 547 aum’e tia Assam sorkar in Centre a kon list amu ahi. Hiche lah a mi 134 hi ginmona aumpon chule mi 68 hi gamsunga hung kile loulai ahi. Achuti le mi 347 hi gamsunga um ahi, tin Health Minister in aseiyin ahi. Tuchan geiya mi 230 hi koi ahi chule aumna kihedoh ahitan, koi koi toh kitohkha uvem ti state in aboipi ahi.

 

India in COVID-19 douna a gal abol nam thu a seidoh louding ahi: CPI-M

Imphal, April 2(ET): Polit Bureau, Communist Party of India (Marxist) in Delhi khopi a Tablighi Jamaat in kikhopna lentah agon a, coronavirus nat sangtah a akithe jalna hi Jamaat lamkai ho mopohna neilou acha loh nau ahi ajeh chu mipi tamtah kikhop na bol ding kiphal louna dan um ahitai, tin asei uvin ahi.

Authority hon itidan a March nisim 20-21 a anivei channa a kikhopna asem diu phalna apeh uham, tin jong left party in thudoh aneiyin ahi. CPI(M) in thuso anei nauva nam tupna chule nam thu social media a campaign akibol demna sangtah anei uvin ahi.

Coronavirus in nam chule hou khenna aneilou ahi’in, nam thu a kikhenna semding akigotna hohi pampai ding ahi. Achesa March 13 a kon mi 200 val kikhopna kin bol ding dan in aphal tahlou ahi’in, hiche jouva kon hou thu, politics hihen lang ipi hijong le kikhopna len kibol hohi phatah a khol ding ahi. Kikhopna a pang ho kholdoh a test bol ding ahi. South Korea le Singapore in kin gon len a pang jouse chingthei tah a akholdoh a, test abol a chule ‘community spread aumlou nadinga avetkol dan uhi kihilna a neiding ahi, ati.

India gam a Covid 19 test kibol jat hi hatah a nem ahi’in, South Korea a sanga ajat 241 a nemjo ahi. Hiche hi semphat angaiye, ati. India in COVID-19 douna a gal abol ahi’in, nam thu a kikhenna sem louding, nam thu a heidoh louding ahi. Sorkar in nam thu a kibungkhenna thei natoh ho suhthip nadinga pan alah ding ahi, tin aseiyin chule nat douna dinga kipunkhom a pan lah ding ahi’in, lunghanna ding thu kisei hohi kilhep lhah sahlou ding ahi, tin aseibe in ahi.

 

Chandel ADC member Cecilia Chinneivah Haokip in constituency miho kithopina nei

Imphal, April 2(ET): Gamsung pumpi akikha (lockdown) a coronavirus nat ginna a insung tamtah inmun a aumtup a, curfew tobang dinmun aum jeh a insung tamtah, adeh a Moreh lhang a kon neh le chah lhahsamna sangtah atoh uvin, Chandel Autonomous District Council member Cecilia Chinneivah Haokip in hiche dinmun a gamkai mi kithopina ngaicha ho kithopina aneiyin ahi.

Coronavirus natna jeh a boina sangtah lhung chule neh alhahsam thu ADC member Chinneivah Haokip, Moreh 17 A constituency in hetpehna anei toh kilhon a Thursday nikhon Chinneivah in Shijang Veng, Guite Veng, Muolhoi Veng le Home Guard Veng a cheng inson a dinga anchang, hawai le chi veng lamkai ho pehdohna aneiyin ahi.

Aumna constituency angailut jeh a ama sakhao a kon kithopina anei ahi’in, nat akidou sunga koiman kel athoh louna dinga pan alah ahi. “Kithopina kipe hi tam hih jong le thilpeh a ka mite ka ngailutna kavetsah nom ahi”, tin Cecilia in aseiyin chule Friday nikho teng Mission Veng, Ngamkhai Veng le Sinai Veng a cheng inson hitobang kithopina peh dinga jong aseibe in ahi. Moreh 17-A constituency a hi alhangpi a insung 1000 vel um ahi. Moreh hi Indo-Myanmar gamgi a um ahijeh a coronavirus nat alhun bailam nathei mun ahi, tin MDC nu in aseiyin chule gamgi kikha jeh le gamsung pumpi kikha jeh a neh lhasam ahi, ati. “Ka mite hon hiche dinmun a kel athoh ding kadei pon, kithopina peh thei chan a kapeh ding ahi”, ati.

Chinneivah Haokip hi Small Town Committee, Moreh a co-convenor jong ahi’in, virus jeh a mipi amoh kichat lou ding, hiche sanga sorkar in dan asem ho phatah a ajui diuvin temna aneiyin ahi. Chule coronavirus toh kisaiya hahsatna toh aumle akijahmat pi diuvin temna aneibe in ahi. “Ka mite boina hi kei boina ahi’in, amaho venbitna kipe hi keima kivenna ahi”, tin Moreh 17-A constituency miho alhamon in ahi.

 

‘Lockdown’ palkeh ho IPC, DM Act dan noiya ‘booked’ bol ding ahi, tia Home Secretary in State jouse thuhilna nei

New Delhi, April 2: Sorkar in Thursday nikhon state le union territory hon lockdown palkeh a ahilouleh jou thu sei ho Indian Penal Code chule Disaster Management Act, 2005 noiya ‘book’ abol dinga thuhilna aneiyin ahi.

State le Union territory chief secretary jouse henga Union Home Secretary Ajay Bhalla in lekhathot apehna a, achesa March nisim 24 nikho a ‘lockdown’ dan akisem na’a, koi tobang dan palkeh ho Disaster Management Act, 2005 section 51-60 chule IPC Section 188 noiya action lahkhom thei ahi, tia kicheh tah a asei ahi.

DM Act le IPC noiya public authority le gamsung miho henga lockdown palkeh ho chunga action lah ding dan hohi phatah a hillhang ding ahi, tin temna jong anei uvin ahi. Lockdown palkeh ho jail a kum 2 chan umthei ahilouleh koi tobang jou thu sei ho kum ni chan jail a umthei chule leu thei ahi, tin Bhalla in DM Act le IPC dan ho hilchenna aneiyin ahi.

Disaster tobang dinmun a sum ahilouleh thil alamlouva mangcha ho kum ni chan jail a umthei chule leu thei ahi, ati. India gam a Thursday nikho chan a Covid-19 case 2536 lhing ahitan, achesa nidan 12 sunga mi 329 in natna anei photchenna um ahi, tin Ministry of Health and Family Welfare in aseiyin ahi. Tuchan geiya natna jeh a mi 69 thi ahitai.

India a top 30 Medical College holah a RIMS pang

Imphal, April 2(ET): Regional Institute of Medical Sciences (RIMS) tu naicha chan a minset thu a thuso a kisei jing ahi’in, ahin, tunin thil akikhel in, gamsung mi adeh a doctor hole state sorkar in coronavirus nat douna a kipana ding anei uvin ahi.

RIMS hi India a Medical College top 30 lah a khat ahi. Institution hi phat atamjo a ajeh hoilou a thuso a kisei jing ahi’in, achesa kum phabep sunga Best Medical College lah a Rank 28 a um ahi. All India Institute of Medical Sciences, New Delhi hi tuchan a top rank hijing nalai ahi’in, Post Graduate Institute of Medical Education and Research, Chandigarh rank 2 channa a pang’a chule Christian Medical College, Vellore rank athum channa a pang ahi.