Gamsung in World Environment Day 2020 mang; Mihem in joh hinna dinga...

Gamsung in World Environment Day 2020 mang; Mihem in joh hinna dinga gam le go angaichat ahi, tia CM in sei

53
0
SHARE

Gamsung in World Environment Day 2020 mang; Mihem in joh hinna dinga gam le go angaichat ahi, tia CM in sei

Imphal, June 5(ET): Gamsung mun chom chom a World Environment Day 2020 akiman toh kilhon a Chief Minister N Biren Singh lamkaina a Samadhi, Maharaj Gambhir Singh, Bir Tikendrajit Park le Rani Gaidinliu Park a thingnou atu uvin ahi.

Chief Minister in ahoulimna a World Environment Day kiman athupi dan aseiyin, gam le go huhbit a mihem hinkho huhdoh nading ahi, ati. Global warming, climate change, natural disaster le adang dang hohi  gam le go akisuhset jeh ahi, tin aseiyin chule mihem in hin nadinga nature angaichat ahi’in, nature in eiho eingachat u ahipoi, tin aseibe in ahi.

Gammang chule gam thil ventup angaidan thu jong aseiyin, leiset huhna dinga angaicha ho bol ding ahi, ati. Sorkar in Green Manipur Mission apohdoh hi, gamsunga a forest area ventup nading ahi. Gamsung mun chom chom a ‘plantation drive’ chelha jing ahi, tin aseiyin chule mission lolhin nadinga gamsung miho temna jong aneiyin ahi.

Covid 19 pandemic thu a CM in natna hi hoilai mun hijong le ikiven louva ahile mi jouse atohkhah thei ahijeh a WHO, Health Ministry le Medical Expert hon asodoh guidelines le protocol ho jui ding ahi, ati. India mun chom chom a kon gamsung mi 35,000 val hung kile ahitan, state sorkar in Covid 19 natna akilahson to louna dinga kivenna thei chan a pan alah ahi, tin aseiyin chule nat douna a panla a frontline worker, CSO, local volunteer ho apachatna thu aseiyin ahi.

Mipi tosotna jal a tuchan a community transmission case khatcha um loulai ahi, tin aseibe in ahi. Gamdang a kon hung kile hon SOP le sorkar in asodoh guideline ajui diuvin temna aneiyin, pan lahkhom hibou nat douna ding ahi, ati.

Kin gon a Forest and Environment Minister Awangbow Newmai, CAD&PD Minister Karam Shyam, Deputy Speaker, Manipur Legislative Assembly  K. Robindro, Chairman, LDA   L. Susindro, Chairman, Manipur Building and Other Construction Workers’ Welfare Board H. Dingo, Advisor to CM   K. Leishiyo, MLA  Th. Satyabrata Singh, Addl. Chief Secretary (Forest)  M.H. Khan le adang dang jong apang uvin ahi.

State Level World Environment Day 2020 hi Directorate of Environment and Climate Change in ‘Biodiversity’ kiti thupi a agon ahi.

MGNREGS fund alhasam pon, sorkar in Dk. Cr 222 sodoh kit dinga kigotna anei ahi: Minister Bishwajit

Imphal, Jun 6(UNA): Bishnupur le Thoubal district a MGNREGS kichepi nadinga RD &PR department a official chule agency hon Friday nikhon ‘interaction programme’ anei uvin ahi.

Hiche hi district sunga MGNREGS natoh kichepi ho vetkol nading ahi. Panchayat Resource Centre, Mini Secretariat Bishnupur a kihouna anei nauva RD & PR Minister Th Bishwajit in COVID 19 jeh a mipi amoh umlou ding, sum le pai a ichang a dinthei nadinga natoh akhohsah diuvin kouna aneiyin ahi.

Achesa phat ho a hi MGNREGS natoh ahoilou jeh a state in tha man hi atam thei pen a amu theilou ahi. Hijongle tua sorkar in pan sangtah alah jouva 2019-2020 kum a natoh nikho 48 apeh jou ahi’in, district phabep a 56 kipe jou ahi, ati. MGNREGS hi ‘demand based scheme’ ahi, tin Minister pa in aseiyin, natoh dungjuiya scheme noiya fund kithum be thei ahi, ati.

MGNREG act a natoh nikho 100 akipeh vanga, state khatcha in achepi lou ahi. Hijong le state sorkar in tukum hi ni 100 natoh ding tupna anei ahi, tin Minister in aseiyin chule state sorkar lungtup molso nadinga PRI functionary hon pan alah ngai ahi, ati. Gamsung miho Covid 19 jeh a moh umthim louva natoh akhohsah diuvin temna aneiyin, centre kithopina a state sorkar in gamsung miho neh le chah apeh ahi, ati.

Sorkar inbou mipi ngaichat abulhit theilou ding ahi’in, mipi achanga adin theiding hi tua ngaichat ahi. State account a kon ama ama BDO a fund akithot vanga tha man hi job card neiho account a lut loulai ahi’in, hiche hi natoh akichai loujeh chule work site a Logos akikoidoh loujeh ahi, ati. ZP member, Pradhan ho le ward member hon angaicha ho abol diuvin temna jong aneiyin ahi.

MGNREGS fund alhahsam na aumpoi, tin Minister pa in aseiyin, state sorkar in dangka crore 720 asodoh jouva scheme a dinga dangka crore 222 sodoh be dinga kigotna anei ahi, ati. Chule natong lou card neiho account a sum kithot louding ahi, tin gihna jong aneiyin ahi. Kikhopna a MLA Tongbram Robindro, L Radhakishore, S Bira, Bishnupur Adhyaksha, Dr L Romabati, DR & PR Deputy Director Lolruboul Fimate jong apang uvin ahi.

Manipur a Covid-19 case 132 phata; Mi 41 kijendam

Imphal, June 5(ET): Friday nikho a case 8 aki hetdoh be toh lhon in Manipur gamsung a covid-19 natna veikha mi 132 aphatan chule active case 91 aum in ahi. Aki mudoh thah hochu pasal 5 le numei 3 ahiuvin  mi 4 hi Kamjong district akon ahiuvin Mumbai akon hung kinungle ho ahiuvin chule midang 2 chu Imphal west ho ahiuvin khat chu Ukhrul honahiuvin Delhi akon hung kinungle ho ahiuve. Midang ni chu Jiribam le Imphal West District ho ahiuvin Bengaluru akon hung kinungle ho ahiuve.

Alangkhat ah RIMS a um mithum result negative ahitoh lhon in hospital akon discharged akibol tan tuhin adamdoh mi 41 aphatan ahi. Train a hung hon aumnau quarantine centre a mopo ho heng a Travel history, date, ahung kipatdoh nau, train min, coach nos, seat nos, chule jiribam akon imphal chan atounau bus min ho kicheh sel a apehlut ding un thulhut chun asei in ahi.

CCpur dist a Covid-19 case 30 phata

B.Lalboi Gangte

CCpur. June 5 (ET): CCpur District a tunin Covid-19 Positive 5 mudohbe ahin amaho lah a mi 3 hi JNV Tuinom CQC akon ahin mi 2 hi St. Paul QC ahin tu le tu hin Ccpur district a Covid-19 Positive 30 aphatan ahi.

Churachandpur District sung’a Coronavirus (COVID-19) dou dalna a sample collection dia team kisemdoh hon achesa  May 27, 2020  nikho a kipat Quarantine Centre a um ho Sample alah khom u achelhah jing toh kilhon in  tunin jong Sample Collection team khat in  Churachandpur Govt. College Cente a mi-146 sample alauvin, Hotel Asiatic Centre a 10, Dawn School a volunteers 14, Medical staffs  2, Close Contacts sample  8, District Hospital a 27 alakhom uvin ahi.

CCpur District Administration/Chairman DDMA, Pawan Yadev IAS in thuso aneina a Pune akon hung CCpur District mi tuibong Sub-division sunga um Numei khat Zenghang Lamka hopsung Young Learners School Quarantine Centre a um khat Covid-19 positive ahi mudoh ahitoh kilhon in kivena dinging hiche Area sung Containment zone a aphongdoh in ahi.

Para 12 “The Manipur Epidemic Diseases, Covid-19 Regulation 2020, noiya Young Learners School hi Containment Zone a phondoh doh ahitoh kilhon’a hiche Quarantine Centre kim vel a Dukan, anche me joh phal hilou, Containment Area sung’a koima pot leh lut umtheilou ding, mipi kikhop khom na kiti hiche Area sung’a kham ahi naban’a Gari lheile umthei louding ahi ati.

Delimitation Process hi 2001 census report dungjui’a bol lou ding ahi: UPF

Imphal, Jun 6(UNA): United Peoples’ Front (UPF), Manipur in 2001 census report dungjuiya ‘Delimitation’ pat lou dinga sorkar henga thumna anei uvin ahi. Census report kitup tah a akilah jou chule dihtah a akisem jouteng le delimitation process bol ding ahi’in, hiche jouteng delimitation hi sorkar in phalna apeh ding ahi. Indian Constitution dungjuiya Delimitation hi kum 10 jou seh a bol ding ahi, tin asei uvin ahi.

Assistant Secretary, Publicity, M Sunil in soi akaina UPF, Manipur thuso a chun ‘Delimitation’ hi India in chamlhatna amu jouva kon alivei channa ahi, tin aseiyin ahi. Delimitation masapen hi 1952 kum a kibol a, anivei na hi 1963 chule athumvei na hi 1973 kum a ahi. 2001 census dungjuiya hiche bol ding hi IPF, Manipur in sangtah a demna anei ahi, tin thuso chun asei uvin ahi. 2001 census a hi Imphal West le Imphal East district a population hi 15-19 kal ahi’in, mi tam louna thinglhang gam a 41-69 percent ahi. Hiche jeh a hiche census hi census report dihtah ahi loujeh a kisang louding ahi, ati.

Hiche toh lhon’a 2001 census data a hi Delimitation  Act 2001 noiya Delimitation Commission of India in state le union territory adang dang a delimitation process hi 2008 kum a ajo ahitan, North east gam li- Manipur, Nagaland, Arunachal Pradesh le Assam gam a hi 2026 chan India President anahi in law and order asuhboi thi ahi tia akhongai sah ahi. Ahivang’a hetman louva Covid 19 boi laitah a President in Northeast gam li ho a Delimitation process pat dinga Gazette notification asodoh a, MLA 5 le MP 2 panna a Delimitation Commission jong kisem ahitai.

Joint Committee on COVID-19 in Kangpokpi vil, CSO chom chom toh ‘Interaction program’ neiyu

Kangpokpi, Jun 5(UNA): Civil Society organization chom chom panna a kisemdoh Joint Committee for Public Awareness on COVID-19 in Kangpokpi avil uvin, Covid 19 pandemic douna a pan la ho chule adang dang akihoulimpi uvin ahi.

Interaction programme hi Kuki Inpi Kangpokpi District in KSO Sadar Hills office a agon ahi’in, Kangpokpi DM/DC, ADM/ADC Kangpokpi, Addl. SP, Kangpokpi panna a agon u ahi. Kikhopna a Kuki Inpi Kangpokpi district, Kangpokpi Town Committee, KSO Sadar Hills, KWU Sadar Hills, KWWO, KYU le CSO lamkai dang dang jong apang uvin ahi.

President, KIM le Joint Committee member jong hi a Khaimang Chongloi lamkaina a Joint Committee on COVID-19 a hi Yaiskul MLA Th Satyabrata Singh (Convenor), K Robindro Singh, Deputy Speaker (Co-convenor), Sekmai MLA H Dingko Singh, Sunil Karam, President UCM (Member), Jeetendra Ningombam, President CCSK (Member) le member dang dang jong pang ahi.

Civil society organization hon program sunga hahsatna chom chom ato hou thu asei uvin chule District Administration, Medical Department le frontline worker dang dang ho tilouva nam mihon natna douna a pachat umtah a pan alah dan thu jong asei uvin ahi.

Kangpokpi DC Somorjit Salam, IAS in kihetkhel jeh a social media a hehna chom chom akisodoh vanga Kangpokpi hi district dang ho lah a anatoh pachat umtah hi ahi’in, Social Welfare and Cooperation Minister le Minister in-charge Nemcha Kipgen panlahna jal a natoh phatah a chelha jing a, akipat til a kon nam mi tamtah in pan alah ahi, ati.

‘Service to mankind’ campaign noiya Minister Nemcha Kipgen in dinmun avetlhah jom jinga, frontline worker hon hahsatna chom chom ato ho asuhlhap peh a chule angaicha protective gear hojong lhasam louva apeh ahi, ati. CSO chule nam mihon jong District Administration sangtah a atosot uvin, pachat umtah a CSO, mipi chule houbung in pan alah ahi, ati.

District Administration le civil society organization thahat sah ding chule community participation tosot dinga kilolna anei uvin ahi. State sorkar in security personnel aganna thei pen a apeh a chule SP Kangpokpi a kon twi tanker sanction bol dinga kilolna aneibe uvin ahi.

KSO Sadar Hills in Institutional Quarantine Centre ho a duty po ding Recruit Constable (RC) alhahsam thu aseiyin, centre adang kisem doh be dinga ginchat ahitoh kilhon ngaichat ahi, ati. Senapati in Recruit Constable 230 amu a, hiche lah a 53 hi Kangpokpi a ‘attached’ kibol a, adang Recruit Constable 50 hi ngaicha kit ding ahi, ati.

Tomngai tah a COVID duty bol a VDF personnel ho allowance (special) akipeh thei ding le, tin Joint Committee henga asei uvin chule Medical Officer, Staff nurse le Attendant alhing a apeh diuvin temna aneiyin ahi. COVID fund chule District Administration a sum kithopina a kipe ho dihtah a akiman nadinga KSO Sadar Hills in aseiyin, lockdown jouva Brig M Thomas Ground, district Screening Centre kisem na a kimang ho hetthei ahina dinga asei uvin ahi.

Joint Committee le CSO lamkai hon District Screening Centre, COVID Emergency Food Kiosk, centralized catering centre, Motbung jong avil uvin, kiphalna a natong ho pachatna sangtah anei uvin ahi.

 

‘Disqualification case’ kisemkhum MLA 7 ho chungchang a court in June 8 teng thutanna neiding’a phat tep kit

Imphal, June 5(ET): Manipur High Court in Congress a kon jamdoh a BJP a lut MLA 7 ho chunga kisem ‘disqualification case’ chungchang a thutanna June 8 a dinga aphat atep tauvin ahi.

Congress party in Rajya Sabha election notification akisodoh jouva MLA 7 ho ‘disqualification case’ thu toh kisaiya affidavit (miscellaneous) adang asem kit u ahi. Hearing masa a High Court in June nisim 10 teng hearing umdinga anasei ahi in, ahivanga, Manipur Legislative Assembly Speakers’ Tribunal in MLA 7 ho disqualification case hi asuhtheng diu ahilouleh MLA ho state Assembly a lutsah loudinga thuhilna apeh dinga ni masa ni a Congress party hon miscellaneous case apehlut kit ahi. Hiche case a thutanna hi June 8 teng phondohna aneidiu ahi.

Congress in writ petition asemkhum hohi- MLA Ngamthang Haokip, Saitu assembly constituency, Paonam Brojen, Wangjing Tentha assembly constituency, MLA Y Surchandra, Kakching assembly constituency, MLA Sanasam Bira, Kumbi assembly constituency, MLA O Lukhoi, Wangoi assembly constituency chule MLA Ginsuanhau, Singhat assembly constituency ahi.

Senior advocate Kapil Sibal hi petitioner ho thalheng a ding ahi. Hetthei khat chu Supreme Court in Andro Assembly constituency MLA Th Shyamkumar disqualification case chungchang a Congress MLA ho tosotna a thutanna anei ahijeh Congress hon hiche case a jong goljo dinga kinepna aneiyu ahi. Supreme Court in thuhilna apeh jouva Speaker’s Tribunal in March 28 ni a Shyamkumar disqualify abol ahi.