Gamsung in National Girl Child Day mang Sorkar in ‘Gender budget’...

Gamsung in National Girl Child Day mang Sorkar in ‘Gender budget’ agon dia Governor in sei; Naosen sulha, numei naosen sumang a pang medical staff ho gotna pehdia daan khoutah kisem ding ahi tia Chief Minister in sei

84
0
SHARE

Gamsung in National Girl Child Day mang

Sorkar in ‘Gender budget’ agon dia Governor in sei; Naosen sulha, numei naosen sumang a pang medical staff ho gotna pehdia daan khoutah kisem ding ahi tia Chief Minister in sei

Imphal, January 24(ET): Gamsung in City Convention Centre, Imphal khopi a National Girl Child Day 2020 amang in, kin gon a Chief Guest a pang Governor Dr Najma Heptulla in, gamsung a adeh a numei ho dinga state sorkar in ‘gender budget allocation’ agel dinga aseiyin ahi.

‘Beti Bachao Beti Padhao’ hi slogan bou ahipon, numei chapang ho themjilna peh a, gamsung mi pha ahina ding chule huhdoh ding gelkhohna ding ahi, tin Dr Najma Heptulla in aseiyin chule numei hon boltheina sangtah aneiyu suboi a numei kimusit na lunggel doudal dinga kouna jong aneiyin ahi. Tukhang a numei hon ima jouse abolthei ahi, ati.

“Numei ho athep nauva tosot dinga kipehna neiyu hite”, tin aseiyin chule government agency, NGO leh CSO hon pan alahkhom a society a hahsatna toh numei chapang ho kithopi dinga temna aneiyin ahi.

Kin neipa a pang Chief Minister in ahoulimna a, achesa kum thum sunga mipi hahsatna leh boina ho aphatcha akisuhlhap jeh a chamna leh lungmonna aum’e, tin aseiyin chule gamsung kikhelna dinga apha a kikhelna sem ngai ahi, ati.

Gamsunga ‘sex ratio’ chule naobu a kijil naosen numei kisuhmangna thilsoh alhom suh e, tin CM in aseiyin chule hitobang thu a thilse bol ho chunga dan khoutah sem angaiye, ati. Doctor, nurse leh private clinic hon adih louva thil abol louding chule adih louva na kitohna angah diuvin temna aneiyin, dan dihlouva natong aumleh doctor, clinic leh diagnostic centre ho license lahpeh nading dan umding ahi. Gamsung’a Clinic hihenlang Doctor chuleh nurse ho hijongle koitobang naosen suhlhahna leh numei naosen suhmangna lampang’a kipeho chung’a asangpen’a gotna pehdia daan khat kisemding ahi jong ati. Hitobang dan chepi vah nadinga legal expert ho dohna umding ahi, tin jong aseiyin ahi.

Sector chom chom a numei lamkai tamtah aumin, MSME business a dinga Manipur gamsung hi numei atamna pen ahi. MSME business hop 50 hi Manipur gam mi numei hon abol ahi, ati. Social Welfare Minister Nemcha Kipgen in National Girl Child kiman hi gamsung mihon numei leh pasal kibungkhenna, kithetna society a umho ahet nadiuva thuhilna ahi, tin aseiyin ahi.

Campaign tamtah aumvanga numei sanga cha pasal deiya atam in, cha numei apen teng miho akilhem lungmong uvin, pasal apen teng akipah uve, ati. Gamsunga naobu a kijil naosen numei kisuhmang atam hi numei jouse dinga pohnat umtah ahi, tin Minister nu in aseiyin, adouna a pan lah dinga temna aneiyin ahi.

Health and Family Welfare Minister L Jayantakumar Singh, Chief Secretary Dr. J Suresh Babu, Principal Secretary (Social Welfare) V Vumlunmang injong houlimna anei uvin ahi. Society a pan sangtah la a numei 15 kin gon a anatoh hetpehna anei uvin chule Department of Social Welfare, Manipur government in produce abol ‘Beti Bachao Beti Padhao’ promotional video jong hondohna anei uvin ahi. Program akipat masanga jin a kikou hon department chom chom in dukan ahon ho vetlhahna aneiyu ahi.

 

Biren lamkaina sorkar hi ‘Photo government’ ahi, tia CM lui Ibobi in sorkar demna nei

Imphal, Jan 24(ET): Chief minister anahi leh CLP lamkai Okram Ibobi in BJP sorkar demna aneiyin, thuso mangcha a khantouna ding natoh tong louva propaganda lhem leh photo kiseithang na a thepna neiya ‘photo government’ ahi, ati.

Lilong Block Congress committee in abol Interaction program a CM anahi Ibobi in ahoulimna’a, gamsunga government department khatcha in PM Narendra Modi  leh Home Minister Amit Shah phalna beiya na atoh theilou ahi, tin aseiyin ahi. Natoh bol a department hi PMO office bou ahi’in, anatoh hi jouthu thethang ding ahi. Chief Minister N Biren lamkaina state BJP sorkar injong hiche khonung ajui ahi’in, sorkar in mipi dinga natong louva jouthu athethang a, media mangcha a lim atah le ahi, ati.

PM Narendra Modi, Home Minister Amit Shah leh CM Biren in gamsung suhset nadinga campaign phaloutah apat u ahi’in, gamsung pumpi a institution jouse ‘saffronised’ abol got u ahi. Supreme Court, Constitution leh Election Commission chan asuhgim u ahi. Lungmong a chenkhom nading a tua BJP sorkar in pan ima alahlou ahi’in, gamsung khonung hi sorkar tohgon phalou hojeh a boi dinga um ahi.

Hijong leh adouding a Congress party aumin, BJP in gamsung asuhset theilou ding ahi, tin Ibobi in aseiyin chule BJP a kon Congress inbou gamsung ahuhthei ahi, ati. “BJP in gamsung suhset ding agot hi Congress doudah uhite. BJP douna dinga mopohna neipe uvin”, tin Ibobi in aseiyin chule gamsung khonung ding hi mipi khut a bou um ahi, ati.

BJP hi houthu a politics bol ahi’in, Mahatma Gandhi, Jawaharlal Nehru, Maulana Abdul Kalam Azad leh BR Ambedkar in India kipunkhom semna dinga lungtup anei asuh kehsoh u ahi, tin ngohna aneiyin ahi. Moirang Phurit Mandap mun a jong Moirang block Congress committee in hitobang kin ma agong uvin ahi.

Minister Th Shyamkumar ‘disqualify’ bol dinga tu naciah Supreme Court in state Assembly Speaker mopohna apeh hi BJP amai kibeh peh ahi, tin Ibobi in aseiyin, Congress hon Speaker pa in pan alah loujeh a Supreme Court heng ajot ahi, ati. Party a kon MLA phabep party dang a alut hi Congress in alungkhampi ahipoi. Amaho potdoh hin party asuhdet jo a mipi tahsanna chang jo ahi, tin jong aseiyin ahi.

Kin gon a pang AICC general secretary (NE in Charge) Gaurav Gogoi in, Chief Minister N Biren lamkaina state sorkar in gamsung miho angol bola hi, tin aseiyin ahi. Prime Minister Narendra Modi in state khohsahna aneipon, Modi sorkar aum laise a gamsung a boina leh thunoh umjing ding ahi, ati.

Saikul a ‘pride run’ kibol

Kpi, Jan 24(ET): Ahunglhungding Repulic Day toh kisai in Assam Rifles in ‘Pride Run 2020: Run for the republic’ kiti ana bol uvin ahi.

Hiche kingon chu Saikul Hill town mun a anakibol ahi. Hiche lhai kitetna chu Jwalamukhi Battalion Assam Rifles in KSO-Saikul, Inside Northeast le KWU, Saikul in kitho a abol ahi. Brig. RAVOOP siNGH, Col Naithani chuleh Kangpokpi DC Lalthambigai Kalidas in lhadoh na ana nei u ahi. Hiche lhai kitetna achun mi 2500 lam in panlah na ana nei uvin ahi.

Hiche lhai kitetna a lhai ho jouse chu t shirt ana kihop peh soh kei in ahi. Kingon toh kisai in flag march jong ana kibol in, slogan chom chom sap na jong ana kinei  in ahi. Mipi ho chun Indian flag choi in kholhang sap najong ana nei uvin ahi.  Kangpokpi DC Kalidas in ahou limna a mihem khat lungthim le tahsa a khantou sah ding itile kichep golseh lam a thanop sah ding ahi ati.

Hiche lhai kitetna a Saikul mipi tamtah in panlah na ahung nein a chung uva DC in kipa thu phon na jong ana nei in ahi. KSO Saikul President Lamgouthang Chongloi in ahoulimna a Saikul lhangsung hi thilphalou lam ngen a kithang ahi toh lhon a lhangsung a thil jouse a infrastructure vat ahi dan le kithopina ngaichat ahi toh lhon a alhang sung a khangthah ho man thei ahung hi sohkei na ding uvin temna ahin nei in ahi. Kingon toh kisai in Kuki Inpi, Kuki Women Union, KSO Saikul le InSIDE northeast ho in kihoukhomna ana nei uvin ahi. Kiloikhomna ho inAssam Rifles lamkai pa le DC nu ang a lhangsung a avat ho vetsui pehna ahin nei lhonding dan hetsah na kiloikhomna ho ang a ana nei lhon in ahi.

Kuki Inpi Churachandpur, IAS Association leh IFS Association Manipur Chapter in Khudengthabi thilsoh demna nei

Imphal, Jan 24(ET): Achesa January nisim 19 nikho a Khudengthabi PVCP mun a 12 Assam Rifles Rifleman RK Pandey, D Company in Anupam, IPS, SDPO, Yairipok amai hi lunghan umtah ahi, tin Kuki Inpi Churachandpur (KIC) in demna thuso anei uvin ahi.

Assam Rile sepai pa umchan hi mihem kinoise she hilouva PVCP Khudengthabi a posting hi a Assam Rile ho lungput kivetsah ahi’in, amaho hin khatvei bou hilouva avel vel a thukhol dan a kisa uva mipi asuhgim jing ahi, ati. IPS officer khat in ahina akiphon jouva jong hitobang jumna ato theilou milham, kholjin chule sumkolvei neo neo hiche lampi a lamlha hon ichan ato ding ham, ati.

Khudengthabi PVCP hi tu naicha minsetna thei thu ngen a thuso a kisei jing ahi’in, hiche mun a um sepai hon dan apalkehna, umchan hoilou athona kisei jing ahi. January nisim 19 thilsoh hi thilsoh chombeh ahipoi, ati. Khudengthabi PVCP  mun a numei adang chule themmona neilou hon jumna ato kit masanga Khudengthabi PVCP hi mopohna nei authority hon alahdoh diuva Kuki Inpi Churachandpur in pha asahna lunggel anei ahi, tin aseibe uvin ahi.

Indian Forest Service (IFS) Association, Manipur Chapter injong Assam Rifles Check post mun a IPS officer nu chunga thilsoh lhung demna sangtah anei uvin ahi. IFS Association in hiche chungchang thu a thukholna dihtah a achelhah ding akinep nao thu asei uvin, thutah kihedoh ding chule thudih a thutanna umding ahi, tin aseibe uvin ahi.

Department chom chom noiya sorkar natong koiman hitobang vangsetna thilsoh ato be louna dinga authority hon akilomtah level a athu apohdoh diuvin IAS Association in aseiyin, chule thilsoh demna anei uvin ahi. Achesa January 19 thilsoh a vangsetna toh IPS officer nu IAS Association, Manipur Chapter in adinpi na thu jong aseibe uvin ahi. Thilsoh demna sangtah anei uvin chule hiche thu a pang jousen thukhol na phatah a atosot diuvin jong asei uvin ahi.

MHGEWA in govt heng’a court order chesah ding a temna nei

Imphal, Jan 24(UNA): Manipur Home Guard Employees Welfare Association in state government ang a High court in thupeh ana nei achesah ding uvin hetsah na ahin nei uvin ahi. Hiche court order chu akisai pi vai po ho ang a hetsah na le thupeh nei ding a kiloikhomna in temna ahin nei u ahi.  Kiloikhomna lamkai  Y Mangi Singh in tuni a Manipur Press Club munna thuso miho toh akihou limna ah Home Gurad ho lha lo alhom pen a pehding chu High Court muna lha a dangka 18,688 tu lha apat ahi na ding a thupeh anakinei ahin, govt in agan na thei pen a akisai pi vai po ho anga hiche thupeh juiding a hetsah na anei ding in temna ahin nei in ahi. Kiloikhomna in High Court Justice  MV Muralidaran ang a kum nga lam hung boi hiche thu seilhah na an a nein a chung a kipa thuseina ana nei in ahi.  Advocate M Hemchandra Singh in jong hitabang case a panlah na nasatah a ahin neina chung a kiloikhomna in kipa thu phon na ahin nei uvin ahi.  Lha lo thah hung kisem hi state govt in agan na thei penna chesah na anei ding uvin jong temna kiloikhomna lamkai pa in ahin nei in ahi. Battalion commandant in duty hung lou home guard ho lo anoi a mi phabep toh kihop na anei jing na thu a govt in vetsui anei ding a ngehna anei vang uva tu channa don a akikoi loudan u hetsah na jong ahin nei in ahi. Home department in hitabang natoh na ho hi vetsui na ahin nei uva mi phabep in hitabang a kichep na phalou ho hi anei lou na ding uvin temna jong kiloikhomna in temna ahin nei uvin ahi.

Nagamapal a bomb pohkeh thu’a KEDO, WUM member 4 kiman;  Bomb poh deilou jeh a mejoh nupi hon toumun kiphinna nei  

Imphal, Jan 24 (ET): RIMS lampi a bomb poh deilou vetsahna in tuni chun Imphal khopisung  kailhang a mejoh leh thil dang dang joh nupi hon toumun kiphinna RIMS jotlutna bul Nagamapal ah tuni chun abol uvin ahi. Police hon hiche bomb poh toh kimat chun janhi chun Kanglei Economic Development Organisaton (KEDO) akon member thum chule Workers Union Manipur (WUM) akon member khat amandoh uvin amauho akon remote control khat police hon amatdoh jeh uva RIMS lampi a bomb chu amauho suhpoh hiding a ginmona jong um ahidan thulhut chun aseiyin ahi.

KEDO member kiman ho chu Soibam Kumarjit (54), Soibam Narendra (28), Haorokpam Rabichandra (26), abon uva Loitang Sandum akon ahiuvin chule WUM member chu Nongpok Heirok akon Kayenpaibam Torongkhomba (32) ahi. Mili kiman lah ahin tuni

chun ni akilhadoh tan hinlah Soibam Narendra leh Torongkhomba chu police custody ah aum nalai uve tin thulhut chun asei in ahi.

Punshi Keithel woman Vendors a President Yengkhom Landhoni in thuso miho heng a aseina achun, police hon khopi sung kitup sel a aven tuplou man uvin ngoh lou ding ding ngoh da uh henlang WUM leh KEDO a member kiman ho chu thule la seitam ulou vin hinlhadoh soh u henlang achutilou le nupi mejoh hon kiphinna kipan tah tah ding ahi in chule remote control jong chu amauho akon kimudoh hipon tin bomb supoh hon atohding dol abolchai uva adalhah uh hiding ahi ati. Aseibena achun police hon nagamapal lampi pang a nupi mejohna mun kisemdoh hojong suhset ding asei uvin hiche hi bolda uhen ajeh chu hiche akon minu hon a insung uh nehmat nading a sumholna mun a aman uh ahi in hiche in neucha kisahon asuhset imacha aumpoi ati.

Mizoram in service cadre tum ngehna nei

Aizawl, Jan 24: Centre in Mizoram state a dinga achombeh a IAS, IPS leh IFS officer cadre asempeh diuvin Mizoram sorkar in avel a Centre sorkar henga ngehna aneikit in ahi.

Chief Minister Zoramthanga in New Delhi khopi a Thursday nilhah a Prime Minister Narendra Modi kouna aneiya, chule Mizoram gam a service cadre achom a asemdoh peh diuva ngehna anei ahi, tin official hon asei uvin ahi. Tu leh tu a Mizoram hi AGMUT cadre a kon IAS leh IPS officer hon avetkol ahi’in, AGMUT hi Arunachal Pradesh, Goa, Mizoram leh Union Territory a dinga common cadre ahi.

AGMUT civil service officer hohi angaiya state khat a kon state dang khat a kum phabep aum jouteng ule kichon jiu ahi’in,  aumnau gamsung boina leh society ngaichat ho hetthemna anei masang uva kichon jiu ahitai, tin Zoramthanga in Modi henga aseiye, ati. Kivaipohna leh tohgon chom chom a lhahsamna umho semtoh nadinga Mizoram gam a ding All India service officer achom a agonpeh diu ngaicha asah dan thu jong Zoramthanga in aseibe in ahi.

Kum masa December lha a jong Zoramthanga in hiche thu hi Prime Minister henga anasei ahi. Thursday nikho a Zoramthanga in PM akimupi na’a, gamdang mi ho kihetdoh nathei ding ‘The Mizoram Maintenance of Household Register Bill, 2019’ phatsahna apeh dinga jong ngehna aneiyin ahi.

Bill hi Zoramthanga in apohdoh ahi’in, kum masa March nisim 18 nikho a state legislature in phatsahna apeh’a, Governor in phatsahna apeh ding anga nahlaiyu ahi.

KNF-N ho ngohna thuso KLO/KLA in suhthengna nei

Kangpokpi, Jan 24(UNA): India sorkar toh Kuki National Organization (KNO) noiya kihouna a pang Kuki Liberation Organization/Kuki Liberation Army (KLO/KLA) in niseh thuso phabep a KNF-N chunga ngohna thu kisei ho suhthengna anei uvin ahi.

Kiloikhomna Information and Publicity Secretary, Kennedy Kuki in, Kuki National Front- Nehlun hi SoO a pang thingnoi kiloikhomna hilou ahi’in chule Hengjang kho haosapu leh atupa kithana thilsoh a KLO/KLA in pan ala’e, tia ngohna anei hi jouthu chule abul umlou ahi, tin nelkalna thuso aneiyin ahi.

Mi ni kitha na thilsoh a KLO/KLA in pan alahlou thu hi tu masanga jong suhthengna um ahitai, tin aseiyin chule KNO noiya KLO/KLA hi sorkar toh kihouna sem a pang ahi’in, SoO ground rules in phatah a ajui ahi, ati. Tolthana thilsoh a Chalwa kho, IT Road a cheng Haogoulen @ Jalen Khongsai hi Kangpokpi Town Commander ahi’in, toltha na thilsoh a pang ahi, tia KNF-N in ngohna anei jong semthu thusim, abul umlou ahi, tin suhthengna jong aneiyin ahi.

Haogoulen @ Jalen Khongsai in Hengjang haosapu leh atupa kitha na pan ima alahlou chule amahi KNF-N hon ngohna asem nauva Kangpokpi Town Commander a asei ujong hi hilou ahi, ati. Khonung a kihetkhelna aum nathei ding hitobang jouthu ho KNF-N in asem angah diuvin kiloikhomna in temna anei uvin, society a lungmonna leh chamna kiboipi jing hi sangtah a atohkhah thei ahi, ati.

 

KIA/KIO in suhthengna anei KNF (N) in pom peh lou

Imphal, Jan 24(ET): KIA/KIO KNF(N) Organisation min leh Fake letter head/Fake ID, Seal mangcha a Dampi kho a Brick field nei Lalboi Lhungdim  Dk. Lakh 50 demand abol u akihetdoh jouva suhthengna aneiyu aki pompeh poi tin Kuki National Front-Nehlun (KNF-N) Information & Publicity Gou@Kuki in thuphon aneiyin chule KNF-N in Finance Secy. Amos @ Kuki akineiyin hinlah Jonathan Kuki, Finance Secy. kiti akinei khapon, he jong akihe khapoi ati.

KNF-N in hitobang ‘Barbaric Act’ hi nampi sunga ki pailha a, nam mipite toh chamdel le lungmong a umkhom ding ti lungput kinei ahin, hinlah ginchat phah lou hel a KIA/KIO in hitobang a thil abol uva, kisel nading le ajum u kilhao nading a KNF-N in nisom 10 sung a ngaidam athum ding atiu jong organisation in akipom peh pouvin, ngaidam kithum nading jong a lampi aum poi tin aseiben ahi.

Lalboi Lhungdim heng a Dk. Lakh 50 demand bol KIA/KIO ahi dan photchetna (Evidence) jong akinei in, aki koitup chet in chule KIA/KIO in organisation teni kah a chamna ding adei uleh, thu kipe bang’a aboldiu lom akibol diuvin hetsah na avel in ahung kinei kit e jong ati.

KIA/KIO in akisei bol louva aum’a ahileh organisation teni kikah a thu ki-im guh jouse KNF(N) in tampi hung kisei doh ding, chuteng leh KIA/KIO organisation in jumna sang tah ahinto ding jong akigel doh u angaiye tin a thulhut chun aseiben ahi.

 

Director General Assam Rifles in Manipur hungvil

Imphal, Jan 24 (ET): Tuni chun Director General Assam Rifles a Lieutenant General Sukhdeep Sangwan, SM in Manipur gamsung mun chom chom a AR umho dinmun vetlhahna neiding in Imphal khopi sung ahung lhun toh lhon in Major General KP Singh, YSM, Inspector General Assam Rifles (South) hon lemna anei uvin ahi.

General officer pa in aseina achun, Indo-Myanmar border a guard ho chung ah kipathu asei in India gamsung adeh a Manipur gamsung a khamnathei hung kipolut a khangthah hinkho tamtah suchavai thei ho hiche border a mandoh a aum jing toh lhon a gamsung phatna leh hoina ding deina jeh a panla sepai ho chung ah kipathu aphong in chule agamsung mipi hotoh kitoh tah a na tohkhom jing a lungmong tah a mipi ho umsah jing ding in jong temna anei in ahi. North east gamsung a Manipur gamsung jong tourist spot khat ahipatna naicha ahitoh lhon a agam government in law and order asemhoi jeh in jong apachat thu aphong in ahi.

 

71st Republic Day a ding’a District chom chom in final rehearsal bol

B.Lalboi Gangte

CCpur. Jan 24 (ET): District Administration, Ccpur tohgon na in ahung lhung ding Jan. nisim 26, 2020 nikho leh Tuibong Peace Ground mun’a The 71st  Republic Day kiman nading toh kisai in tunin Tuibong Peace Ground ah March Past jao ding Contingent hon final rehearsal ananei uvin ahi.

Hiche parade rehearsal phatsung in contingent 27 in pan alah ding chuleh parade contingent ding hochu Category A a BSF STC CCpur, Ex-Servicemen CCpur, Civil Police, Women Police leh VDF; Category B a Rayburn NCC 1st Platoon, Rayburn NCC Girls Contingent Sr. Wing, Rayburn NCC Mixed Contingent, CCpur Govt. High school NCC Junior Division, Ccpur Govt. School NCC Junior Wing leh Bethany Christian College NCC Mixed Contingent;  Category C a JNV Tuinom Senior Boys & Senior Girls, St Mary Hr Secondary School Senior Girls, Rengkai Hr sec School Senior Boys & Senior Girls, Gandhi Memorial High School, Senior Boys & Girls, Tuibong Govt. High School Senior Boys & Senior Girls, New Lamka Upper Primary School Junior Boys & Junior Girls, JNV Tuinom Jr Boys & Jr Girls, St. Teressa School Mixed Contingent leh Bijang Loubuk Mixed Contingent chuleh 1st IRB band party ho hiding ahi.

Hiche toh lhon’a Republic Day kimanchah na’a Parade Commander a E. Lalrinum Pulamte MPS hi ding, Pilot a Riflemen Paudoumuan leh Riflemen Kh. Maipaksana  chuleh Flag hoisting a Jamedar Thangkhankhual Tonsing hiding ahi. The 71st  Republic Day kingon’a India ponlap kai palna leh salute lah na Pawan Yadav IAS DC/CCpur in anei ding chuleh jingkah nidan 9:30 leh Jin-gun in Parade che ding ho inspection anei ding, India ponlap kaipalna leh March Past in ajui ding ahi. Sun nidan 12:00 leh exhibition match um ding hiche match chu DC team leh ADCC team in volleyball match anei ding ahi.  Republic Day phatsung’a award chom chom hopdoh naleh District sung’a officer chom chom heng’a Award pehdoh naleh Special Recognition (Administration) Award, Special recognition Medical award, Special Recognition Police Award, Special Recognition IRB Award, Special Recognition Education Award, Special recognition award in Social Work, Special recognition award in Sports Award, Special Recognition Award in Humanity leh Special recognition Award in Public service jong hopdoh na anei ding ahi.

Kakching Turel sah a um District Sports Association  Kakching playground ah Kakching district administration makai na noi in school chom chom,police, NCC, cultural troupe le department chom chom ho in rehearsal ana bol uvin ahi.  Tuni rehearsal bolna kingon achun DC Kakching Valentina Arambam,  SP Kakching Victoria Yengkhom, police officer ho, staff ho,  club kiloikhomna ho  le midang dang ho in panlah na ana nei uvin ahi.

Thoubal district  Chaoyaima Hr. Sec. school mun a jong Republic Day rehearsal ana kibol in ahi. Hiche republic day parade ahi Dy. SP Thoubal, Keisham Dhananjoy Singh, MPS parade commander a pang ding ahi akiti. Republic Day nikho le Thoubal DC N Bandana in India flag khaidoh na anei ding  ahi.

Tamenglong district headquarter ah jong republic day rehearsal ana kibol in ahi. Rehearsal kibol na achun police, 5th MR, college simlai, ASHA team le adang dang ho in panlah na an anei uvin ahi. Rehearsal veding in alhangsung mipi injong panlah na ana nei uvin ahi akiti. Hetthei khat chu tuchung republic day hi district sung a sub division ho a jong kimang ding ahi. Hiche rehearsal kibol na achun district hospital le Global Shapers Imphal Hub in Sashi Kiran Charitable trust  in kitho in medical camp mini indoor stadium a ana bol uvin ahi.