Gamsung in Janata Curfew nit; Gamsung district jouse a Section 144 CrPC...

Gamsung in Janata Curfew nit; Gamsung district jouse a Section 144 CrPC koi ding’a CM in sei

197
0
SHARE

Gamsung in Janata Curfew nit; Gamsung district jouse a Section 144 CrPC koi ding’a CM in sei

Imphal,Mar 22(ET): Sunday nikho a Manipur gam injong ‘Janata Curfew’ anit toh kilhon a lamlen athip chet in, sorkar in coronavirus nat douna dinga mipi umtup dinga thuso anei toh kilhon a gamsung miho ama ama inmun a aum tup uvin ahi.

India gam a nat achal douna dinga gamsung jousen jingkah nidan 7 a kon jan nidan 9 chan nidan 14 lhing Janata Curfew akoi ahi’in, nidan 12 chan hui a ahing jouve, tia expert hon aseiyu virus cycle suhkeh thei nading ahi. “Janata curfew noiya vengsung hijongle koima kikhom theilou ding, inmun a umtup ding chule kin khohtah neiho bou che doh thei ding ahi”, tia PM Modi in Thursday nikho a TV a thuso ananei ahi.

Nilhah nidan 5 teng mipi ama ama kot, window le balcony ho a adin uva, boina asan pet laitah a jong mipi dinga pan la jing ho chunga kipa vetsahna a khutbeh ging ding chule aging thei thei suhging dinga PM in gamsung miho henga temna anei ahi.

Alangkhat a Manipur gam a district jouse a CrPC 144 tua kon um dinga thuso aumtan, mi li kalval kikhom thei talou ding ahi. Inter-stat bus service le passenger bus hojong notice akiso kit kah a lhai louding ahitai, tia Chief Minister N Biren Singh in social media- Facebook a Sunday nikhon thuso aneiyin ahi.

Vengsung neocha a dukan khat le ni tilou Ema market, Khwairamband bazar, shopping mall, business centre, private le government office, school le college hojong akikhah in ahi. Lamlen a private gari lhomcha bou akimu in, chule social le hou thu a kikhopna hojong avohai uvin ahi.

City Police hon Khwairamband kailhang leh akimvel ah phenyl leh bleaching powder ho athe uvin ahi.  Hiche a chun Khwairamband a um Ima Market thum, Thanggal Bazar leh Paona Bazar chuleh Punshi kailhang dung jong suthengna nei uvin ahi. Ngari Galli a um Thangal kailhang leh Punshi kailhang jong asutheng uvin ahi.

City Police OC M Sudhirkumar in aseina ah tuhin corinavirus natna a kon kivenna ding’in ichan gei hamkhatin kivenna leh bolthei chan akibol tan, kibolbe nalai ding ahi ati. IMA lamkaina noiyin Ima market leh akimvel lah jong lou ho akap uvin ahi. Hiche natna doudalna dia amitakip pan lahkhom ding’in City Police OC M Sudhirkumar in temna aneiyin, aphat tin’a eima chang kiveng jing ding’in jong aseikit’e. Alangkhat ah koitobang hiche natna toh kisaiya koitobang medical emergency nei aumle kithopina kipe jingding ahi tin aseiben ahi.

Tuni Janata Curfew jeh’in Bishnupur District hopsung’a um kailhang jouse akikhah in lamlen leh kholai dung’ah koima avahthang akimupon ahi.

Tamenglong leh Noney District teni a kailhang jouse jong akikhah sohkeiyin, sumkol veina mun holeh dukan hojong akikhah sohkeiyin Impal-Jiri lamlen jong akikhah in ahi.

Jiribam District jong tunin koima avahthang akimupon, muntin athip chet jeng’in ahi. Passenger po gari khatcha alhaipon, dukan jouse jong akikhah sohkeiyin ahi. Imphal-Jiri lampi NH-37 a lhai passenger gari ho khatcha jong alhai pouvin ahi. Alangkhat a Assam a kipat Jiribam hinjon a hung gari ho koima alutsah pouvin, Jiribam District Police hotoh kithon Doctor hon Jiribam Screening Camp ah miho screening abol uvin ahi. COVID-19 a kon kivenna ding’in Jiribam Municipal Council a Executive Officer M Surjit vetkolna noiyin Jiribam kailhang leh JMC area vel ah fire tender ho mangchan muntin suhthengna jong aneiyuvin ahi.

Ukhrul district deputy commissioner Joseph Pauline Kamson in keng a town avil in ahi. “Ukhrul district administration, police le fire station in nilhah nidan 5 teng ‘minute 5’ lhing siren agin sah ding ahi’in, houbung lamkai honjong houbung dah asuhging diuva temna kanei ahi”, ati. Ukhrul headquarter in Sunday kaikhom jong avoh hai ahitai.

Kwakeithel Police station a um personnel hon tuni Janata Curfew ahitoh kilhon in koitobang area sung ah lampi a hung potdoh ho akham uvin a-inn uvah ana kinungle sah uvin ahi. Airport lang’a hung gari hojong akinungle sah uvin, airport a kon’a ama tahsa tah’a hung kinungle holeh medical emergency ho tailou koima lampi ah alamlhah sah pouvin ahi.

Chief Minister Nongthombam Biren Singh in gamsung mihon public curfew anit cheh diuva Friday nikho a temna anei ahi. Gamsung ahung lhung naipoi, tia nahsah louva koiding ahipoi, tin Biren in aseiyin chule state sorkar in achesa January nisim 18 nikho a kon COVID-19 douna dinga kivenna a pan alah pan ahitan, ahung lhung ding kal ni le thum sung hi eiho jouse dinga thupi tah ahijeh a kitosot to a nat douna dinga pan lahkhom ding ahi, ati. Mipi kikhopna a pan louding chule adeh a atehlang hon ahithei chan a kal phabep sung inmun adalhah da uva, insunga aum tup diuvin jong temna aneibe in ahi.

Manipur gamsung jouse a March 31 chan a dia Section 144 CrPC kikoi ta

Imphal, Mar 22(ET): Manipur gamsung a corona natna alutlou tei nading a kiven na in tuni chun district 16 a DC hon march 31 chan district cheh uva 144 CrPC umding in thuphon abol tauvin ahi. Hin dan kikoi sung a hin mi 4 kalval a kipunkhom phal ahipon hiche nikho sung a hi hou lamthu hihen lang ipi kipunkhomna hijong le bolding phal ahipon hinla alou theilou medical service hihen chule bol lou theilou dinmun ho vang kilha kol ding ahi ati.

Alangkhat ah Principal Secretary Transport, GoM in thuphon abolna achun thuso aumkit masang se Manipur gamsung passenger po a lhaile autos, wingers, Tata magic chule adang dang hon jong angah diuvin ahetsah in ahi.

 

District phabep in Covid-19 natna a kon kivenna dinga CrPC 144 phongdoh ta

Imphal, Mar 22(ET): India gamsung state chom chom a Novel Corona Virus (COVID-19) natna akhoh toh kilhon a Kangpokpi district injong apet pet a kivenna aneiya, nat kilason suhnem nadinga milah a ahithei chan a lha lou ding chule mihem dinga boina thei ahijeh a mi li kalval kikhop theilou dinga thuso anei tauvin ahi.

Kangpokpi District Magistrate Lalithambigai in Section 144, CrPC 1973 noiya athaneina amanchah a district sunga section 144 phondohna aneiyin, hiche dungjuiya mi 4 kalval kilhon khom/kikhom theilou ding chule March 22 a kon March 31 chan gamsung miho ama ama in a aumtup diuva dan kikoi ahitai.

Order hi police, medical le health service a natong government agency ho chunga kichepi louding ahi. Tohgon um auma ahijongle District Magistrate, Kangpokpi phalna beiya chelha theilou ding ahi, tin District Magistrate in thuso aneiyin ahi.

Churachandpur: Churachandpur district a jong District Magistrate Pawan Yadav in March nisim 31 chan district pumpi a Section 144 phondohna anei tan ahi. Law and order, Public Health chule service khoh tah tah a natong agency ho tilou adang mipi jouse chunga hiche dan kichepi ding ahi, tin Pawan Yadav in Sunday nikhon thuso aneiyin ahi.

Imphal East: State sorkar in Coronavirus douna dinga bol thei chan abol toh kilhon a Imphal East District Magistrate Dr Rangitabali Waikhom in Section 144, CrPC phondohna anei tan ahi. India gam a natna nei atam cheh cheh toh kilhon a gamsung in kivenna a pan sangtah alah ahi’in, district dang a banga mi 4 kalval kikhom in pam a kikhom theilou ding, hou, chon le khan, politics ahiloule kikhopna kin gon jouse phalna beiya chelha theilou ding ahi.

Imphal West: Health and Family Welfare, India government in March nisim 5 ni chule Secretariat, Home Department, Manipur government in March nisim 12 nikho a COVID 19 nat venna dinga mipi kikhop bol lou dinga thuhilna aneiyu ahi’in, nat kisei na gam dang dang a jong nat akipat til jouteng hatah a adammo akal a chule athi amang atam jong kisei jing ahi.

Hiche jeh a kivenna dinga Imphal West District Magistrate Naorem Praveen Singh in jong district pumpi a tuni, March nisim 22 a kon March 31 chan CrPC 144 phondohna anei tan ahi. Golvah ahiloule thi kin leh adang dang a procession bol nom a aumle Superintendent of Police, Imphal West henga phalna akilah uva, jih tho a phalna amu teng ule bou kijotna anei theidiu ahi. Order copy hi District Magistrate, Imphal West District, Manipur notice board a kitah doh ding chule DIPR le AIR, Imphal a jong copy athot diu ahi.

Tengnoupal: Tengnoupal District Magistrate Mayanglambam Rajkumar injong coronavirus natna a kon mihem hinkho huhdoh nading a Section 144, CrPC 1973 phondohna anei tan ahi. District dang a banga Tengnoupal district a jong tuni nikho a kon March 31 chan Section 144 chelha ding, mipi kikhop chule in pam a mi 4 kalval kiloikhom na kiphal louding ahi.

Thuso Disrrict Magistrate Tengnoupal, SP, Tengnoupal, Additional District Magistrate, Moreh chule Sub-Divisional Magistrate, Tengnoupal district notice board ho a kitah ding ahi.

Thoubal: Thoubal District Magistrate N Bandana Devi, IAS injong district sunga CrPC 144 phondohna anei tan, district dang a banga March 31 chan kichepi ding ahi.

Ukhrul: Ukhrul District Magistrate Joseph Pauline Kamson in jong Section 144, CrPC phondohna anei tan, Ukhrul district pumpi a COVID-19 chain suhkeh nadinga hiche dan March 31 chan chepi dinga thuso anei tan ahi.

Bishnupur: Bishnupur District Magistrate Neeta Arambam in district pumpi a CrPC 144 chepi dinga thuphon aneiyin, inmun pam a mi 4 kalval kikhom theilou ding chule mipi kikhopna, kin gon chom chom ho jong bol lou dinga akhah tauvin ahi.

COVID-19 kiseina gam akon Manipur mi 99 gamsung hung kile

Imphal, March 22 (ET) : Tunai cha chun tulai tah’a kisei thang Coronavirus in atoh khah na gam akon India gammi tichu Manipur akon mi 99 gamsung’a ahung lut kit uvin ahi tin thulhut chun aseiyin ahi. Hiche chung’a Chief Secretary, Manipur in achesa March nisim 19 nikho chun gamsung’a hung kile mi 99 ho min (Name), contact No. leh address ho shared anabol na chung chon’a ama ama District mopoh na neiho heng’a jong March nisim 21 nikho chun amaho detail jong shared anabol tan ahi.

Hiche toh lhon’a maho cheng hi norm dungjui’a phat chomkhat mun chom’a kikoi doh ding ahi in ahin vangset um tah in amaho hi a inn mun cheh in aum uvin ahi ati. Chuleh tu’a hi amaho natna akon vendoh nading’a akikoidoh teng leh a insung mite jouse jong koidoh tha ding ahi tin Chief Secy. Manipur chun aseiyin ahi. Amaho hi Manipur gamsung mun chom chom tichu Imphal – 51, Kakching – 6, Ukhrul – 6, Bishnupur – 4, Kangpokpi – 3, Churachandpur – 10, Thoubal – 13, Tengnoupal – 5 chuleh  Chandel – 1 ahi.

 

COVID-19 jeh a India mi thina toh mi 7 hita; case nei mi 341 lhing ta

Gandhinagar, Mar 22: Gujarat Ministry of Health and Family welfare thuso in aseina achun tuni chun kum 69 a upa khat Surat hospital ah covid-19 natjeh in amuollem in tuhin India gamsung a hiche natjeh a thina toh mi 7 aphatai ati. Vadodara hospital ajong numei khat kum 65 a upa khat jong athi in hinalh hiche natna avei leh veilou result aki hedoh naipon ahi. Gujarat gamsung ah tuni chun natna vei case nga amudoh thah uvin Gandhinagar akon case 2, Gujarat akon case 2 chule Kutch akon case 1 ahi. Gujarat gamsung a hiche natna vei mi 18 aphatan ahi.

India gam a coronavirus case atam cheh cheh toh kilhon a Indian Railways in Sunday nikhon March 31 chan passenger train jouse vohhai dinga aseitan ahi. Hiche a hi Mail/Express le inter-city train hojong pang ding ahi.

March nisim 22 nilhah nidan 2 masanga kipan doh man a train ho vang ajot nau alhun diu kiphal ding ahi. ‘Goods train’ tilou train adang khatcha March 31 chan lhai louding ahitan, nidan 2400 sung kikhah ahi, tin Railways Ministry in aseiyin ahi. “Hijong le Sunday nikho teng Suburban service le Kolkata metro Rail service lhai jom ding, hiche jouva kon March 31 chan lhai talou ding ahi”, ati.

India gam a coronavirus jeh a thi hi Sunday nikho sun chan a mi 6 lhing ahitan, AIIMS, Patna, Bihar gam a kum 38 a upa pasal khat athi kit toh kilhon a mi 6 lhing ahitai. “Bihar gam a kum 38 a upa khat kidney fail jeh a athi in, amahi Covid 19 positive hi ahi. Munger a kon ahi’in, AIIMS, Patna a janni a thi ahi. Kolkata a kon ni 2 masanga hung kile ahi”, tin Dr Prabhat Kumar Singh, AIIMS Patna, Bihar in aseiyin ahi.

Patna a mikhat athi masang jep a Mumbai, Maharashtra gam a Covid-19 natna neiya kum 63 a upa khat thi ahi. Mumbai a thi pa hi hospital thulhut in asei dungjuiya, coronavirus natna anei ahi’in chule amahi diabetes le high blood pressure chule ischemic heart disease jong anei ahi. Mipa hi March 21 ni a HN Reliance Hospital a apohlut u ahi.

Alangkhat a, Indian Council of Medical Research (ICMR) in Sunday nikhon India gam a coronavirus case 341 alhingtan, case athah 26 akiseiye, ati. March 22 chan a sample 16,999 test bol dinga kila lah a sample 16,109 hi COVID-19 test kibol a chule hiche lah a mi 341 hi positive hi ahitai, tin ICMR in aseiyin ahi.

Kangpokpi in ‘Janata Curfew’ nit; gamsung in health worker ho kipapina kin abolna a panla

KANGPOKPI, Mar 22(UNA): Kangpokpi DHQ in Sunday nikhon Janata Curfew anit in, nidan 14 lhing sorkar tohgon tosotna a lhang miho inmun a aumtup uvin ahi.

Sunday nikho ahivanga houin mun ho athip in, lamlen hojong athip cheh in, District Administration in state sorkar thuhil banga gamkai mihon dan ajui diuvin temna aneiyin ahi. Kangpokpi Town Committee le Kangpokpi Town Churches Fellowship in janni a meeting anei nauva Pathenni kaikhom hojog khongai dinga kilol lhahna anei uva, ahivanga koitobang taona mang nom ho dinga houin kot ahon u ahi.

Jingkah nidan 7 a kon jan nidan 9 chan ‘Janata Curfew’ chelha ahi’in, dukan le kailhang jouse jong akikhah in, nilhah nidan 5 don a, bell avo ging uvin, fire brigade in siren agin sah in, khut abeng uvin, town mihon COVID-19 nat douna dinga panla ho chunga kipana vetsahna anei uvin ahi.

Ama ama inmun a insung mi phabep ading uvin akhut abeng uvin chule phabep in insung a kong le bel ho avo ging uvin, phabep lamlen a khut beng dinga ahungdoh uvin ahi. Alangkhat a sorkar in Covid-19 nat douna dinga thuso anei toh kilhon a Nute Kailhang, Saparmeina bazar, Kalapahar bazar, Motbung bazar le Saikul Town bazar hojong March nisim 21 a kon ni nga sung kikhah ding ahi.

District Magistrate, Kangpokpi in anche kijohna kailhang ho panna a district a lamlen pam a thil kijohna ho kha dinga thuso anei ahi. Deputy Commissioner Kangpokpi in DDMA, Kangpokpi le Committee for Formulation of Preventive and Intervention strategies toh Conference Hall, DC Kangpokpi a natna chungchang a ’emergency meeting’ abol uvin ahi.

 

India gamsung a COVID-19 kiseina District 80 kikhah ta; Passenger Trains, Metro Services, Inter-State Bus hojong March 31 chan kikhah

New Delhi, Mar 31: India gamsung a jong Covid-19 natna ahat toh lhon in District 80 kha ahitan Passenger Trains, Metro Services, Inter-State Bus hojong akikhah gamtan ahi. Tuni chan in India gamsung a natna jeh in mi 6 in thina atoh tauvin ahi. Kolkata Metro rail service, passenger train services, mail, express train, passenger train, suburban train ho jong March 22 chan akikhah tan ahi. Hinlah gamsung a nehding aki lhasam louna ding in thil le lou pole a pang trian ho vang akikhah deh pon angai beng a lhai ding ahi. State jouse a chief secretaries, cabinet secretary chule PM Principal secretary hon meeting aneikhom jou uva natna douna ding a khah ding a thulhuhna ana nei uh ahi.

Home ministry official thuso in aseina achun natna douna ding ahin passenger pole a pang gari ho chomkhat kha hiding in jong thuphon aneikit in ahi. Tuni in hiche natna jeh a thina toh India gamsung ah mi ni aum be kit in mi gup in thina atoh tauvin ahi. Bihar gamsung ah hiche natjeh a thina toh masapen chu kum 38 a upa ahi in Qatar akon ahung kinungle jouva hiche natna hi avei ahi in AIIMS hospital patna a vetkol ahi vang in ana damdoh tapon ahi. Maharashtra gamsung ajong kum 63 a upa khat in thina atoh kit in ahi.

 

AMWJU le EGM in journalist hon ajui ding dan phabep sodoh

Imphal, May. 22(ET): All Manipur Working Journalists Union(AMWJU) le The Editors Guild Manipur (EGM) in March nisim 22 nikhon Manipur Press Club a emergency meeting abol uvin ahi.

Covid-19 pandemic thu a meeting a kilolna anei uvin, natna a kon media mi ho jouse huhna ding, chule Manipur Press Club a press meet/conference/mipi kikhopna ho phat chomkhat a dinga kha ding, reporter/correspondent ho koi organization hijong lepress meet a dinga kouna ho a apanlou diuvin jong thuhilna le kilolna anei uvin ahi.

Press release/statement pe nom hon acham uva record abol uva chule email/WhatsApp ho ahiloule WhatsApp number 8974283214 chule email amwjul974@gmail.com a athot diuvin jong asei uvin ahi. Government press communication hon  Directorate of Information and Public Relation (DIPR) ahiloule akipe whatsapp number le email a athot diuvin jong reporter jouse thuhilna anei uvin ahi.

Chule Covid 19 le hiche thu toh kisai a thuso /houlim ding panel member ho government health authority in list apeh dinga Khwairakpam Naoba, General Secretary, AMWJU in thuso aneina a temna aneibe in ahi.

Delhi CM in khopi sung ni 9 kha dinga phondoh

New Delhi, Mar 22:  Delhi govt in khopi sung March nisim 23 jingkah lam nidan 6 akon March nisim 31 jaan kim chan kha ding in phondoh na an anei taovin ahi.

Delhi Chief Minister Arvind Kejriwal in thuso miho toh akihou limna a  hiche thu chu Delhi Lieutenant Governor Anil Baijal jaona a phondoh na an anei ahi. Hiche khopi sung kikha sung ahi DTC bus ho tilou public gari ho jong lhai louding in phondoh na an akinei in ahi. Delhi khopi toh kijot mat na  lampi jouse jong kha hiding ahi tin chief minister pa chun ana sei in ahi.

Hetthei khat chu coronavirus natna nei Delhi sung a hetdoh a ana um  hi mi 27 ahi. Hiche khopi sung khana kinei hi hiche natna pun be nalou ding ahi tin chief minister pa chun ana sei in ahi. India usng a hiche natna nei hi mi 341 lam lhing ahitan ahi. Tuni chan a hiche natna nei ding a ginmo jeh a test kibol hi mi 16,109 lhing ahitan ahi.

KSO Imphal in KBC Office a Relief Centre hongdoh

Imphal, Mar 22(ET): Chassad kho mite vangsetna chunga Kuki Inpi Imphal leh KSO Imphal makaina noiya Imphal khopi sunga dinga Tribal Market, New Checkon a Relief Centre ana kihong chu amun kilemchang tahlou ding jeh in KBC Headquarters, Imphal (opposite DM University) joh’a Relief Centre honding in phatsah ahitai tin KSO Imphal in thuphon aneiyin ahi.

Hijeh chun munchom chom a kon tuchan a vangsetna toh Chassad mite chunga  ngailutna leh gelkhohna neijouse chunga kipathu akiphong in chule maban a jong panlakhom jinga kithokhom jing ding in mipite temna jong aneiyin ahi.

Emergency contact Nos. of KSO Imphal: 9856138205 (President); 8732049655 (General Secretary); 8787303258 (Relief and Rehab. Secy.)

 

Coronavirus nat douna dinga society akikha jeng hi alhing pon, natna neiho hetdoh ngai ahi: WHO

London, Mar 22: World Health Organisation a top emergency expert hon Sunday nikhon gamsung (country) hon coronavirus nat douna dinga society amoh kha jeng theilou ahi, tin asei uvin chule public health measures ngai ahi, ati.

“Gel khoh ding pen hi adamlou ho hetdoh ding, virus nei ho hetdoh a, achom a umsah ding, akimupi, akitohkhah pi ho holdoh a achom a koiding hi ahi”, tin Mike Ryan in BBC Andrew Marr Show a aseiyin ahi. “Tua lockdown kibol hi kichat um ahi. Mipi damthei nading akikhohsah masat louva ahile dan kikoi hohi akilahdoh teng le natna jeh a boina hi hatah a kal ding ahi”, ati.

Europe le United States gam a jong China le Asia gam dang dang a banga inmun a kon natoh ding, school, bar, pub le restaurant ho kha dinga thuso um ahitai. China, Singapore le South Korea in dan akoina chunga natna nei dinga ginmo ho hetdoh nadinga pan sangtah alah hi kihilna thei ahi, tin Mike Ryan in aseiyin ahi.

“Nat kilason akivettup jou teng le virus dou pan ding ahi”, ati. Tua hi Italy gam hi nat kisei khoh na pen gam ahitan, chule UK Prime Minister Boris Johnson injong Britain health system boi thei dinga asei ahi. Vaccine tamtah akisem lai ahi’in, ahivanga United States gam a khat hin bou ‘trial’ apat nahlai ahi, tin Mike in aseiyin chule kum khat ho beh lut nalai ding ahi, ati.

‘Vaccine hung ding ahi, hijong le tua hi ibol thei chan u ibol u ngai ahi’, tin aseibe in ahi.

 

Nagaland gamsung tujan akon kikhah ta

Kohima, March 22: Mipi ho ading gelna in Nagaland government in coronavirus pun nalou ding le gamsung hunglut nalou ding in Nagaland gamsung ana khah taovin ahi. Hiche gamsung khaa na chu tu jaan akon kipan ding ahi akiti.

Hiche gamsung khaana chu thupeh kinei kit tokah a kikhah ding ahi akiti.  Hiche state sung kikhana ahi sumkol veina ho jong jao ding ahi akiti. Hiche kikhana a kikhah louding chu pharmacy, petrol pump le thil le lo nitin hinkho kimanchah na a neh ding le jah na ding kijoh nah o jaolou ding ahi akiti. State sung kikha na ding thupeh chu Nagaland Chief Secretary in ana so ahin, mip po le a pang gari ho jong khat cha lhai louding ahi akiti.

Mipi ho jong akhoh tah kin nei le neh le chah ding cho a hung pot ho bou apolang a vale kiphal ding ahi akiti. State dang toh kijah mat tona lampi ho jong abon cha a akikha ding dan hetsah na ana kinei in ahi. State sung hopa thil le lo p oho, phate a vetsui na akinei jou teng kilut sah ding ahi lou le kihopa sah ding ahi akiti.

Government office ho jong central a hihen state a hijong le District Administration, police, Security Forces, Fire le Emergency Services, Home Department, Medical, Postal Services, NIC, NSDMA, Power, PHED, Food and Civil Supplies, Finance, Treasury  le Accounts, Banks, ATMS, AIR le Doordarshan Kohima  tilou ki khah soh kei ding ahi akiti. Department mopoh na nei ho in natoh ding aum teng boipi ding a mi phabep vang alhendoh ding uvin hetsah na ana kinei in ahi. Hiche state sung kikha sung ahi government natong ho phatseh a kou thei ding a um ding u ahi akiti. Hiche thupeh nitlou a um natong ho gotna pehthei ding u ahi dan jong hetsah na ahung kinei in ahi.