Gamsung in ILP chepi pan ta; Nikho masapen ni a mi 163...

Gamsung in ILP chepi pan ta; Nikho masapen ni a mi 163 permit kipe

143
0
SHARE

Gamsung in ILP chepi pan ta; Nikho masapen ni a mi 163 permit kipe

Imphal, Jan 3(ET): Arunachal Pradesh, Mizoram leh Nagaland gam ban a Manipur gamsunga January 1, 2020 nikho a konin Inner Line Permit System (ILP) official tah a akichepi pan tan, Northeast gamkaiya ILP umna gam li channa a apang tan ahi.

December nisim 31 nia state sorkar in gazette notification asodoh dungjuiya Manipur Inner Line Permit Guidelines, 2019 hi gamsung pumpi a kichepi ding ahi. Bengal Eastern Frontier Regulation, 1873 noiya ILP hi gamsung mi dihtah ho huhna ding chule gamdang mi dan dihlouva hunglut ho vettupna hiding ahi.

Gamsung mi hilou ahiloule gamsunga chengdet hilou hon gamsung hunglut nadinga ‘Inner Line Permit’ kiti phalna akilah diu ahi, tia gazette notification a kisei ahi. Thulhut dungjuiya aphat masanga application form 330 amu uva chule system kichepi nikho kipat ni a permit 163 asodoh u ahi’in, Bir Tikendrajit International Airport, Mao Gate (Senapati district), Moreh (Tengnoupal district) leh Jiribam panna a gamsung ning li a permit 163 apehdoh u ahitai.

‘Temporary permit’ hi Deputy commissioner ho, deputy resident commissioner, Manipur Bhawan, New Delhi, Kolkata leh Guwahati, sub-division officer, Jiribam, Songsong, Jessami, Singhat leh Moreh chule Mao, Jiribam, Moreh, Behiang, Sinjowl leh Imphal Airport a OC hon ni 15 sunga dunga apeh diu, hiche hi renewal abol u ngaiding ahi.

Notification a hi ILP jat chom chom li- Special category permit, regular permit, temporary permit leh labour permit kipe ahi. Special category permit hi home department in kum thum a dinga apehding ahi. Hiche category noiya permit thum hohin amasapen a fee dangka 5,000 apeh diu chule renewal a hi dangka 10,000 apehdiu ahi.

Regular permit hi ama ama district a DC ho ahilouleh state sorkar in tha apeh agency dang dang hon asodiu ahi’in, lha gup sunga ding ahi. Amasapen a permit mu nadinga dangka 500 apeh diu, chule renewal seh a dangka 1,000 apeh diu ahi.

Temporary permit hi ni 15 sunga ding ahi’in, ‘travel document’ hi ama ama district a DC ho, Deputy resident Commissioner ahilouleh OSD, Manipur Bhawan (New Delhi, Kolkata leh Guwahati), SDO leh Officer in-charge (Police Station), Imphal Airport ahilouleh state sorkar in tha apeh agency hon asodoh diu ahi. Hiche category a permit thum hon amasapen a dangka 100 apeh diu chule renewal seh a dangka 200 apehdiu ahi.

Labour permit hi Deputy Labour Commissioner ahilouleh state sorkar noiya um mopohna nei authority hon contractor ahilouleh company ahilouleh natohna mun a dinga mi hin pui ho lha gup a dinga apeh diu ahi’in, hiche hi lha gup aphat kisuhsao be thei ahi, tin thulhut in aseiyin ahi.

Sorkar in ILP guideline asodoh chunga JCILPS lunglhai lou; Gamdang miho kholna ‘drive’ pat dinga sei

Imphal, Jan 3(ET): Achesa December nisim 31 ni a state Gazette a kisodoh Manipur Inner Line Permit guidelines a hi gamsung mi dihtah ho kiseichet na leh gam leiset huhna ding dan (provision) aumpoi, tin Joint Committee on Inner Line Permit System (JCILPS) in aseiyin chule state sorkar in agelphat a chule guidelines asemphat diuvin thumna anei uvin ahi.

State gazette a kisodoh ILP guideline adihpon, apanna aumpoi ajeh chu thukhoh pen ni- gam leiset huhna ding chule gamsung mi dihtah kiseichen nadinga ‘cut off base year/ permanent resident’ umlou ahi, ati. Gazette hi gamsunga hung chenglut gamdang mi ho permanent resident a akibol na ding ahi, tin JCILPS convenor YK Dhiren in Kwakeithel office mun a thuso miho henga aseiyin ahi.

Gamsunga gamdang mi hunglut atam cheh cheh vettup nadinga gamsung mihon ILP chepi dinga thumna anei ahi. JCILPS leh gamsung mihon Bengal Eastern Frontier Regulation Act 1873 noiya gamsunga ILPS center sorkar in akehlet a hi kipana sangtah anei ahi. State sorkar in tukum January 1 a kon ILPS achepi jeh a JCILPS in kipana sangtah aneiyin, ahivanga vangset umtah a BEFR 1873 noiya hi thukhoh ni panglou ahi, tin aseiyin chule ILPS guideline hi abulhing joupon, apha poi, tin aseibe in ahi.

BEFR 1873 Section 7 noiya gam leiset gamdang mihon mopohna nei sorkar phatsahna beiya achoh theilou ahi. Hiche jeh a gamsung mi dihtah ho kicheh tah a seichen ngai ahi. Ahivanga hiche hi state gazette a kiseichen lou ahi, ati. ILPS guideline hin gamsung mi dihtah ho bulhit set a avettup theilou ding ahi, tin state sorkar in ILPS guideline semphatna aneiya, gamsung mi dihtah aseichen a, base year asuhtup a chule gam dang mihon gam leiset achoh theilou nading dan akoi diuvin thumna aneiyin ahi.

ILPS hi thupi tah ahi’in, khonung khang tamtah seilha ding ahi, tin JCILPS lamkai pa in kitah tah a pan lading state sorkar temna aneiyin ahi. ILPS akichepi toh kilhon a gamdang miho gamsunga ‘pass’ (phalna) pum a hunglut pan ahitan, sorkar in gamdang miho hi phatah a kholna aneiya Aadhaar card kiti document ho akholtoh chet ngai ahi.

Sorkar in gamsunga aumsa gamdang miho ILP pass apeh dinga thumna aneiyin chule gamdang mi gamsunga umhon ILP permit anei aneilou February lha a kon JCILP in akholna a ‘drive’ apat ding ahi, ati. Permit neilou gamdang miho kiman a BEFR 1873 noiya achungthu sei ding mopohna nei authority ho henga kipedoh ding ahi, tin aseibe in ahi.

BEFR dungjuiya permit neilou gamdang miho hi kum khat jail a umthei chule dangka 1000 leuthei ahi, ati. Gamdang mihon tulha sunga ILP permit akilah diuvin temna aneibe in ahi.

Kani lei kibol le khantou machal tohgon hojeh in gammang in ahiding bang in ga asotam thei poi: Minister Shyamkumar

Imphal, January 2(ET): Indian State of Forest Report (ISFR) 2019 in 499 sq km a len Manipur gammang lahlou soh dan a thulhut apehchu Forest and Environment Minister Thounaojam Shyamkumar in Kanglapat official quarter a thuso miho kom ah ISFR thulhut hi October 2017 a pat February 2018 phatsung a ahivang in thulhut kipe hi achesa 2016-17 phatsung a ahibouve tin tunichun hilchenna abol tan ahi.

Hiche thulhut hi December 30, 2019 nia chu Union Environment, Forest and Climate Change Minister Prakash Javadekar in asodoh ahi.

Shyamkumar in gammang lahlou soh a kisei lah a 491 sq km gammang chu Churachandpur, Tamenglong, Senapati, Chandel le Ukhrul gam a um ahi in, hiche lah a 250 sq km gammang lahlou so na gam chu Churachandpur ahi in chule adeh a Churachandpur le Tamenglong hi meikah so jing nagam ahijeh a jong thingkeh ho chai a gam leiset in ga atamso lou ahi, ati.

Chuleh Pradhan Mantri Gram Sadak Yojana (PMGSY) noi a thinglhang gam a lampi kisem, Railways lampi kisem chujongle thinglhang loulho ho jong hi gammang manthahna khat ahi e tin Shyamkumar chun aseiye.

Shyamkumar in 14th Finance Commission in Forest Department natoh nading sum le pai ana gonpih pon ahinla unclassed forest area ho Wildlife (Protection) Act, 1972 dannoi a Community Reserve a heidoh nading in forest department in mipi thuhilna ape jing e, ati.

Chuleh kani kituna gam leiset NAB le police hon asuh mang mun ho a mipi dia phachom kihinsona thei muchi tuthei ding jong holkhom ahiban a thingkeh tuhlhuh khel a an hon na manchah ding in PM Ujjwala Yojana noi a manchah ding in forest department in LPG jong mipi ahop pih e tin Shyamkumar chun aseiye.

Shyamkumar in aseikit na ah thingpoh thei na lekha lhem choi a thing a kivei ho matdoh nading in  department in online portal asem hoi be ban a  Forest Department, Assam Rifles le Police Department kithokhom a kon gammang thing aguh a kipodoh ho akimandoh jing thei tai, ati.

Chule valley district a 8 sq km gammang hi Imphal le Thoubal district a leiset ha lahdoh a kon se ahi in hiche tuhtang nading a Forest le Revenue Department akithokhom a patta nei ho vetchilna anei angai in chule thinglhang gam leiset hi kani lei bol atam jeh a se ahi e tin Shyamkumar chun asei e.

Minister Shyamkumar in asei kit na ah gammang thing aguh a lahdoh tuhtang hi department a dia hahsatna lenpen field staff ho galmanchah choisah ding a ngehna jong government khut a seilhah lou a tang den nalai ahi e, ati.

Minister Shyamkumar in an hon nading le chek sem nading a thing kiman jeh a jong thinglhang gam a gammang hi hatah a chai lo ahi e, ati.

Shyamkumar in aseikit na ah dandihlou a leiset lah jong tuhtang thei nading in department in Chingkhei Ching (Nongmaiching) Reserved Forest le dandihlou a Langol Reserved Forests a cheng ho vetlhahna jong anei uvin, district tin a phat bitep sung a Central Forest Division noi a mobile patrolling lom ho vetkol nanoi a leiset lahthei nading dan semdoh ding jong tohgon aum e, ati.

Department in hiche mun hohi drone camera mang a kholchilna anei ahi dan jong Shyamkumar chun aseiyin ahi.

Chuleh gammang meikah vendoh nadia panla khomi ho kipaman le manchah pehding jong government in tohgon a anei ban a mipi thuhil na jong department in aphat phat in anei jing e, ati.

Achaina kei in Forest Minister Shyamkumar in gammang a cheng ho nodohna jong tulha sung a kipan ding ahitolhon a government tohgon tosot cheh ding in mipi temna jong aneiyin ahi.

Gamsung ‘law and order’ aphatou in, ahivanga AFSPA lahdoh nathei dinmun ahihih laiye tia CM Biren in sei

IMPHAL | January 2: Chief Minister N Biren Singh in gamsung a ‘law and order’ dinmun hi kum phabep sunga apha cheh cheh in, ahivanga Armed Forces (Special Powers) Act lahdoh nathei dinmun ahihih laiye, tin aseiyin ahi.

Achesa kum thum sunga thingnoi natoh toh kisai thilsoh akemsuh tai, tin Singh in aseiyin chule dinmun aphat cheh cheh hi Union Home Ministry henga hetsahna kanei ahitai, ati. “Law and order hi masanga tobang ahi tapon, apha tou cheh cheh tai. Ahivanga AFSPA akilahdoh thei nadinga dinmun aphat cheh ding nga angai nalaiye”, tin CM in aseiyin ahi.

Official thulhut dungjuiya 2016 kum sunga thingnoi natoh toh kisai thilsoh hi agom a 233 um ahi’in, hiche hi 2017 kum a 167 a nemsuh a chule 2018 kum a 127 a nemsuh kit ahi. November 2018 kum a Chief Minister in AFSPA velvet nap hat ahitai, tia aseiya, ahivanga gamsung hi gamdang (foreign country) toh gamgi kikop ahijeh a security dinmun jong vet ngai ahi, tia aseikit ahi.

Act hi army hon gamsung dan vettup thei nadinga toltha na chan hijong leh tha anei diuva phalna kipehna ahi’in chule ‘warrant’ (phalna) beiya adei lai mun u akhol uva chule mi amat thei nadiu tha kipehbe na jong ahi.

Achesa 1980 kum a gamsunga thingnoi ahat laitah a AFSPA kikoi ahi’in, gamsung pumpi a kon hiche dan lahdoh nadinga kiphinna sangtah aum jouva Imphal Municipality Area hopsung Assembly segment 7 a kon AFSPA kiladoh ahi. Achesa November 2, 2000 kum a Imphal airport kom a Assam Rifles hon milham 10 atha jouva Act kilahdoh ding thumna a social activist Irom Chanu Sharmila in kum 13 val an ngol kiphinna anei ahi.

Jiribam a ILP counter a permit kilah ding mi 1,110 lhing; mi 366 bou permit kiphalpeh

Jiribam, Jan. 3 (ET) : Achesa Jan. nisim 1 nikho’a kipat gamsung pumpi’a Inner Line Permit System (ILP) akichesah toh lhon in Jiribam District Police hon Jiribam District sung’a ILP counter khat ana hongdoh uvin ahi. Hiche nikho achun nikho 15 sung’a temporary permit kilah ding in application seplut mi 1, 110 analhing in hiche lah’a chun mi 366 permit anape uvin ahi. ILP counter a permit apply bol ding in Cachar akon Manipuri tampi leh Imphal hin jon ding passenger gari tampin ana kigol phei uvin ahi.

Alangkhat’a Manipur hunglut nading’a permit angaidan hi Assam Jirighat a um mihon ana hetlou jeh uvin phatchom khat anaboi uvin ahi. Driver hon amaho driving license mangchan ILP kichesah na gam ho’a bailam tah in analut thei uvin ahin passenger ho hin Manipur hunglut na ding in hahsatna akitoh in ahi tin alungkimlou nao aphongdoh uvin ahi. Chuleh permit kilahna lekha ajong photo ajaopon, photo jaolou ahi jeh in mikhat in a permit mansah hen lang michom khat in mangcha taleh anei tah tah pachu ipi tiding hitam tin thudoh jong anei uvin ahi.

Opposition party jouse kipunkhom jongle CAA thu a BJP nungchon louding ahi: Amit Shah

New Delhi, Jan 3: Union Home Minister Amit Shah in Friday nikhon Citizenship Amendment (CAA) hi citizenship kipeh nading ahi’in, akilahmang peh nading ahipoi, tin aseiyin ahi.

Chule Opposition hon demna sangtah nei jong leh CAA chepi nadinga thulhuhna hi sorkar in akhel louding ahi, tin jong aseiyin ahi. Rajasthan gamsung Jodhpur a ‘Citizenship Act’ tosotna a ‘Awareness Programme’ launch abol nau Rally a Amit Shah in asei ahi. “Citizenship Amendment Act a hi koima citizenship kilahpeh nading thu aumpon, hiche hi citizenship peh nading dan ahi”, ati.

Pakistan, Afghanistan leh Bangladesh gam a kon hunglut a gamdang mi Muslim hilou ho citizenship peh nadinga sorkar in Citizenship Act semphatna anei hi opposition party hon sangtah a adoudal u ahi. Hiche chungchang thu a Centre in akigel lhahna inche khat jeng jong akhel louding ahi’in, party ijat kiloikhom henlang kitho jong leh kikhel louding ahi, tin Home Minister in aseiyin ahi.

“Party jouse kipunkhom ujong leh Citizenship Amendment Act a BJP nungchon louding ahi. Jouthu nasei thang nom chan u sei uvin”, ati. CAA thu a Congress in vote holna politics abol’e, tin Amit Shah in party demna thu jong aseiyin ahi. Vote holna a Congress party in Veer Savarkar kiti milentah douna a jong thu asei ahi. Congress hohin athilbol ajachat pi diu ahi”, ati.

Nikho kipat til a West Bengal Chief Minister leh Trinamool lamkai Mamata Banerjee in Centre demna sangtah aneiya, sorkar in hou thu a gamsung akhen ahi, tia ngohna anei ahi. BJP sorkar in keiho thaneina eilahpeh diu hi kaphal louding ahi, ati. “Tohmun umlou chule kel thoh thu kasei ule Pakistan a cheuvin eitiu ahi”, tin Banerjee in Siliguri a ahoulimna a Centre demna thu aseiyin ahi.

BJP lamkaina Centre sorkar in Citizenship Amendment Act provision ho thu a kichatna ho seilhap ding agot jing u ahi. Party lamkai Anil Jain in, CAA chungchang thu hilchenna dinga BJP in inson a campaign apat ahitan, insung crore 3 henga athu kihilchen ding ahi, tin aseiyin ahi.

Private diagnostic laboratory 28 a kon Government hospital hon ‘report’ asan loudinga thuhilna um

Imphal, Jan 3(ET): Medical Directorate in gamsung a registration (valid) beiya kivaipo a private diagnostic laboratories 28 a kon report ho RIMS leh JNIMS in asan lou dinga hospital teni a director ho thuhilna aneiyin ahi.

Private diagnostic laboratories hohin Manipur Nursing Homes and Clinics Registered Act, 1992 (MNHCR Act) and Rules, 1993 noiya register abol tei ngai ahi. Director, Medical & Health Services, Manipur government in thuso anei dungjuiya registration beiya kihong private diagnostic laboratory jouse hi kileusah thei ahilouleh jail a kikoi thei ahi.

“Manipur Nursing Homes and Clinics Registration Act, 1992 Section 3 dungjuiya Act chule Section 6, (Act) noiya register kibol louva kikoiman Nursing home ahilouleh clinic ahon theilou ding ahi. Chule Section 3 toh kitoh louva thilbol hohi dangka sangkhat chan leu thei ahilouleh lha gup chan jail a umthei ahi’in, ahilouleh dangka sangni chan ahilouleh gotna ani a kipe thei ahi”.

RIMS leh JNIMS Director tenin mopohna nei department jousen akisei registration neilou diagnostic laboratory ho a kon investigation report asan louna dinga thuhilna apeh dinga Director, Medical & Health Service in thuso aneina a asei ahi. Private Diagnostic laboratory 28 hohi– Lamphel X-Ray (RIMS road) Public X-Ray (RIMS road), Global Diagnostics (RIMS road), Leima Diagnosis (Porompat), Radical Diagnostics (Porompat), A.M Diagnostic Centre (Porompat Kongkham leikai), Sangai Clinic Diagnostic and Research centre (Khurai Chingangbam Leikai), Siroi Diagnostic Centre, Soibam Leikai Ayangpalli Road), Public X-Ray & Clinical Lab. (RIMS RD), Lifeline Diagnostic Centre (Thangmeiband Polem Leikai), Dudu Diagnostic Centre (RIMS Road0, Toto Diagnostic Centre (Singjamei Parking , Chinga Diagnostic Centre ( Singjamei Chinga Mathak), Supriya Diagnostic Centre (Clinic) (Thoubal Achouba), Sanasam X-Ray and Laboratory (Thoubal, near District Hospital), Seba X-Ray) (Thoubal near district hospital), Public health Clinic & Diagnostic ( Near Bishnupur District Hospital), Tombimacha Diagnostic Centre (Nambol Chingmang), Shine Laboratory Clinic (Moirang, Kumbi Parking), Community Care Centre of Smart (Lab) (Moreh Bazar), Excel Diagnostic Centre ( Churachandpur ), New Clinic ( Churachandpur ), Eden Clinic ( Churachandpur ),Omega Diagnostic Centre ( Churachandpur  IB Road), Royal Diagnostic Centre ( Churachandpur ), Jerusalem Clinic ( Salemveng Lamka , CCP), Unique Diagnostic Centre (I.B. Road near DH, CCP) chule Advance Diagnostics (I.B. Road, CCP Govt. H/S kom) ahi.

Kpi khopi in kumthah  ’20-20: Year of Equality’ kiti thupi noiya mang

Kangpokpi, Jan 3(UNA): Kangpokpi District Headquarter a kum 2020 chu ’20-20 (Twenty Twenty): Year of Equality’ kiti thupi noi in ana mang uvin ahi. Kangpokpi Ward No.14 (Kholmun Veng) Chairman, Thangjangam Lhanghal, Kangpokpi Town Committee member jong hi chun mitoh bang lou, meithai le akum tam ho  mi 20 lam pon sil peh na ana nei in ahi.  Ward Chairman pa in ahou limna a hitabang natoh na hi Pathen mit a mijouse akibang e ti vetsah na a kibol ahi ati.

Kholmun Veng tia jong kihe Kangpokpi ward no 14 hi achesa 1993 kum lam a NSCN-IM makai na Kuki Genocide a vangset na toh a galjam ho umna a an akikoi ahi. Chairman pa in ahou lim be na a hou inn govt kithopina beihel in ksaa uvin, tu le tu in hitabang kumhei man na ding mun ho kanei hih lai uvin hinlah kumthah hi kipah le thanom a ka lem u ahi ati. Mipi ho in akum tam ho akon in kumthah ahi toh lhon in vang boh na jong ana kinei sah uvin ahi.

Alangkhat a Kangpokpi Town Committee le Kangpokpi Youth Union in jong khopi sung a houbung jouse vilna ana nei uvin ahi. Kangpokpi Youth Union President, Haolet Khongsai in ahou limna a Kangpokpi hi masang in khopi neo chakhat an ahi in hinlah tu in khantou na jat chom chom ahung lhun toh lhon in khopi lhingset ahung hi kigo tai ati. Khangthah kiloikhomna in district sung le khopi sung a chamna le lungmonna um jing na ding a panlah na anei jing ding dan u jong tahlang na ana nei in ahi.

Moreh Battalion AR hon khamnathei Dk. Crore 3.75 man anamandoh

Imphal, Jan 3(ET): Moreh Battalion Assam Rifles team in janhi (Jan. 2) chun border pillar 78 kom’a daan in aphallou khamnathei tamtah anamandoh uvin ahi. Thulhut kimu dungjui in Chavangnphai outpost Assam Rifles mun’a tou sepai hon hiche gamkai sung leh gamgi chin ho jouse New Year nikho’a kholchil na anei utoh lhon’a jan lam nidan 9:00 vel in sepai hon Myanmar gammi khat India gamsung hunglut ding anamudoh uvin ahi. Hiche achun AR team hon hiche pa kham ding ago uvin ahileh amapa chu Myanmar gamsung’a ana jamlut in ahin bag khat anadalha in ahi.

Hiche toh lhon’a hiche bag chu AR team hon kholchil na anei uvin ahi. Methamphetamine (ice drug) packet 5 kg 5 vel’a gih hiding leh a sum’a Dk. Crore 3.75 man hiding in akisei in ahi. Hiche khamnathei kimandoh chu daan dungjui’a kholchil na nei ding in Moreh Police Station a anapelut tauvin ahi.