Gamsung in 73rd Independence Day nit; Gamsung mihon dan dihlouva gamdang mi...

Gamsung in 73rd Independence Day nit; Gamsung mihon dan dihlouva gamdang mi ahin puilut lou diuva CM in kouna nei Nuclear Bomb a mi bulu masat loudi ti kichepi hi akhoh dungjuija kikhel di ahi tia India Defence minister in sei Manipur akon Eimi mi 4 Shillong a khamnathei toh kimat tha Thepmona neilou pasal 3 nasatah’a kivoh thu’a TKSU in demna sangtah nei; Bandh akou phat chomkhat a dia vohai SI Shominthang Kipgen in Gallantry Award mu Anti AFSPA Lhangsam’a pang Pebam Chittaranjan thi nikho’a geldohna kin kimang Manipur Rifles Jamedar Khat Dk. Crore 4 man WY tablet toh kimattha Minister Jayantakumar in ADC 5 adia Dk. 57,50000 pehdoh na nei Manipur Assembly, Monsoon Session nikho 2 hiding Mipa khat in achapa ana jeplih

299
0
SHARE

Gamsung in 73rd Independence Day nit; Gamsung mihon dan dihlouva gamdang mi ahin puilut lou diuva CM in kouna nei

Imphal, August 15 (ET): Gamsung mun chom chom a banga Manipur injong 73rd Independence Day amang in, Chief Minister N Biren Singh in 1st Battalion, Manipur Rifles lentol a National Anthem kilha sunga ponlap (tricolor) hondohna aneiyin ahi.

Chief Minister in ‘guard of honour’ vetlhahna aneiyin, BSF, CRPF, Mizoram Police, civil police, India Reserve Battalion, Manipur Fire Service, Home Guards leh VDF personnel, NCC and Scout Cadets, government department chom chom a natong ho, college leh school simlai chule adang dang contingent 57 in march-past abol na jana pehna aneiyin ahi. Government Dance College, Kabui Naga Dramatic Union chule Lamhil Kuki Cultural Research Centre panna a cultural troupe thum injong pan ala uvin ahi. Assistant Director, Manipur Police Training College (MPTC) Sarangthem Asana, MP parade commander a apang in, chule March past a Home Guards leh Sainik School panna a sepai band platoon 9 injong pan ala uvin ahi.

Chief Minister Biren in ahoulimna a Rohingya gammi ho Aadhar card kipeh ahetdoh alungkhampi na thu aseiyin, gamsung mihon pan alah lou hileh hiche hi hithei louding ahi, ati. Gamsung mi dihtah ho lungmong tah a achenkhom dinga CM in temna aneiyin, tohgon phalou ho dalhah a gamsung khonung suboi thei natoh ho pailhah dinga kouna aneiyin ahi.

Muslim Women (Protection of Rights on Marriage) Bill, 2019 kiti ‘Triple Talaq Bill tia kihe minthang akiphatsah thu chule tu naicha Article 370 leh 35A kisuhmang hin tukum Independence Day hi aloupi sah cheh ahi, tin jong aseiyin ahi. Sorkar natoh hi thusim kisemdoh na ahi’in, chule ‘Triple Talaq Bill’ hi Muslim numei ho tha kipehna leh athaneina (rights) ho amanchah thei nadiu ahi, ati. Alangkhat a Article 370 leh 35A kisuhmang hi Jammu and Kashmir gam khantou nading ahi, tin aseibe in ahi.

Scheme chom chom akichepi toh kilhon a India khangtou cheh cheh ahi, tin CM in aseiyin, Swachh Bharat Mission jeh a gamsung theng a, Ayushman Bharat- Pradhan Mantri Jan Arogya Yojana hin vaicha genthei ho adammo nauva sangtah a akithopi ahi, ati. Ayushman Bharat scheme alolhin ding hi tamtah in atil a ana tahsan lou ahi’in, PM Modi lamkaina sorkar in kitahna aneijeh a tua hi kithang ahi. PM Kisan scheme noiya jong loubol mi gam leiset hectare ni chan nei hon kum khat a dangka 6000 chan sum muna anei ahi. India sorkar in gamsung athahat na dinga thal choi sepai jong athahat sah cheh ahi’in, tu naicha Chandrayan-II lolhingtah a launch akibol hin gamsung Science and Technology akhantou dan vannoi mutheiya akoi ahi, tin CM in aseiyin ahi.

PM Modi in lamlen akhohsah in, Imphal-Jiribam leh Imphal-Moreg lamlen hi ‘four-lane highway’ a sem ding kigelkhoh ahi. Makru leh Barak lei jong kisachai kon ahitan alangkhat a Moreh, Jiribam leh Tamenglong a helicopter service athah a kipan kit vahding ahi, ati. Moreh leh Jiribam a ‘trial landing’ ho kibol jou ahitai, tin hetsahna jong aneiyin ahi. India mun tamtah a akhantou vanga gamsung sum dinmun, lamlen, kijahmat to na, chapang leh numei ho dinmun a pan sangtah lah ngai nalai ahi, tin aseiyin chule thinglhang leh phaicham mun jouse a khantouna kibanga kibol ding ahi, ati.

State sorkar in asei jeh a Union DoNER Ministry in Hill Area Development Fund gamsunga dinga ana pohdoh ahi’in, Tamenglong district hi India in scheme noiya alhendoh district masa 82 holah a pang’a, district hin fund dangka crore 90 amu ahitai, ati. DoNER Secretary in hill district jouse HADF noiya apansah dinga ngehna kinei ahi, tin aseiyin chule District-wise DPR ho DoNER Ministry henga pehlut dinga kigongtoh ahi, ati. Thinglhang district a banking leh communication facility hojong kikhantou sah ahitai, tin aseibe in ahi.

Chandel tilou thinglhang district ho a hondohna kinei Nute Kailhang hi kipan pan ahitan, tua hi twi hah jeh a boina suhlhap nadinga sorkar in go twi kholtup ding hi aboipi ahi. Mun chom chom a ‘Rain water harvesting project’ jong kipan ahitai, ati. Sorkar in gamsung miho hahsatna ahetpeh angaijeh a state sorkar in ‘Go to Hill’ leh ‘Go to Village’ mission apohdoh ahi’in, mipin ngaidan apehlut dungjuiya ‘School Fagathansi’ kiti mission thah government school ho akhantou nadinga kipan ahi, ati. Mission noiya akilhengdoh school 60 ho angaicha pehbe nadinga foundation stone aban ban a August 17 a kon hondohna umding ahi, tin aseiyin chule Imphal khopi mun teh lai laiya um government school ho gangtah a chon angai dan thu jong aseiyin ahi.

Chief Minister in kin gon a sorkar natong, milham, sepai ho medal, commendation certificate leh trophy jong hopdohna aneiyin ahi. Thaimei Gaipuiril Kabui (retired MPS leh 8th IR (CDO) Bn. CO anahi) in President’s Police Medal for Distinguished Service asang in, 6th IRB Assistant Commandant Loitongbam Ranjit Singh, Havildar Narengbam Kumar Singh, 7th MR leh Havildar Longjam Deben Singh, 1st MR in Police Medal for Meritorious Service asang in ahi. Union Home Minister’s Medal for Excellence in Police Training mu holah a Dy SP Manipur Police Training College (MPTC) Songlianthang Vaiphei, MPS leh Havildar Yumnam Manglemjao, MPTC apang in ahi.

Assistant Jailor, Manipur Central Jail, Sajiwa K. Abung R/Naga, Female Head Warder, Manipur Central Jail, Imphal, Kh. Mema Devi, Warder, Manipur Central Jail, Imphal, Th. Nabakumar Meitei, leh Warder, Manipur Central Jail, Sajiwa S. Unnikrishnan in President’s Correctional Service Medals for Meritorious Service of Jail Personnel amu uvin chule Kakching SP Victoria Yengkhom, Inspector Ng. Anthony Suresh,  Churachandpur Police Station leh Constable T.M. Simala Begum in Chief Minister’s Trophy for Community Service amu uvin ahi.

Chief Minister’s Trophy for Anti-Drug campaign a Narcotics and Affairs of Border S.P. W. Basu, Sub-Inspector N. Minakumari Devi, 9th IR (Mahila) Battalion (attached to NAB) leh Head Constable R. Salouni Reubin apang uvin ahi. Kamjong district noiya um Ramrei khosung mi 4 in achesa April 28 ni a Mapithel Dam a twiya lhum ho thilong lahdoh nading leh hinkho huhdoh nadinga hangsan tah a pan alah jeh uvin Chief Minister’s Medal for Bravery (Civil) award ape uvin ahi. Medal mu hohi LM Raingam, Jims Jajo, MK Joshua leh Vr Abel ahi’in, abon uva Ramrei kho mi ahiuve.

Swachh Survekshan 2019 prize jong CM in hopdohna aneiyin, Thoubal Municipal Council in North East Zone a (lakh khat noi chenna) a Cleanest Town prize amu in, Wangjing Lamding Muncipal Council leh Kakching Municipal Council in hiche category a second leh third prize amu in ahi. Mayang Imphal Municipal Council in North East Zone (25,000 population noilang) a Cleanest Town prize amu in, Lamlai Municipal Council in North East Zone (25,000 noilang) a Best Citi in Citizen feedback leh Best Practice amu in ahi.

3rd State Level Swachhata Award, 2019 prize jong hopdohna anei uvin, Ukhrul, Tamenglong leh Churachandpur district first, second leh third (hill district) a apang in chule Kakching, Jiribam leh Thoubal in Cleanest District headquarter (Valley district) prize asang in ahi. Manipur State Co-operative Bank (MSCB) Managing Director A. Subhash in Certification of Appreciation amu in, angaicha ho loan apeh chule MSCB semphatna a pan alah hetpehna anei uvin ahi.

Inspector General of Police (IGP) Elangbam Priyokumar Singh leh 6th IRB Subedar Moirangthem Ibobi Singh hi tukum President’s Police Medal for Distinguished Service dinga phondohna anei uvin, 4th IRB Subedar M Dimartan Singh, CID (SB) SI Tuanjahau Simte, 6th IRB Havildar Rongshong Leiyah, MPTC Havildar Lukram Lenin Meetei, MPTC Havildar AS Mayungkhul Zimik, 1st Bn. MR Havildar Sanabam Bishorjit Singh leh 1st IRB Rifleman Md Shahid Ahamed hi tukum Police Medal for Meritorious Service dinga phondohna anei uvin ahi.

Kin gon a Minister ho, MLA ho, civil leh police chule military officer ho, sorkar natong chule mipi tamtah jong apang uvin ahi.

Nuclear Bomb a mi bulu masat loudi ti kichepi hi akhoh dungjuija kikhel di ahi tia India Defence minister in sei

New Delhi, Aug 16: Tulaiya gamsung dinmun ahoilou jeh in amun le amol toh kitoh a  ‘No First Use’ policy hi hung ki nungsun maithei ahi tin  defence minister Rajnath Singh in aseiyin, Army Chief Bipin Rawat in jong tosot na anei in ahi

Gah hetthei khat chu ‘No First Use’ policy kiti hi India in ajui dan ahi, Dan noiya kiphatsah na chu ahileh, India in nuclear galmanchah anei hohi moh man louding, amavang gam chom khat in India douna a ahung cha valleh  India in nuclear galmanchah apat theibep ding ahi.

Prime Minister Narendra Modi, 2014 Lok Sabha election in jong , nuclear weapon hohi gamsung venbitna ding bou ahitin asei nai chule  NFU doctrine hin civil nuclear technology lamdoh ma ape nai ati. Lamkai lui phabep in jong policy chungchanga khel ding tia sei jong aumdapoi,  defence minister, masa Manohar Parrikar, November 2016 kumma chu NFU kimandan hi kheldia phatsah na anei ahi tin aseibei.

BJP sorkar in vi ahin hop a konna gamsung security dinmun sem hoi nadia pannasatah kila hi, kum 1971 akonna amasapenna dia Pulwama terror attack a jong Indian Air Force ho Pakistan gam ma lenglut ahin, Pakistan in NFU policy anei pon amaho nuclear weapon ho hi India dou nadia kisem ahin, eihon dan khel thei ahitai tin social media Twitter mangchan aseiye.

Manipur akon Eimi mi 4 Shillong a khamnathei toh kimat tha

Shillong, Aug 16(Chongthu News): Khasi Hills SP makei na noi a Anti Narcotic Task Force special team khat in Manipur akon mi 4 akon in khamnathei ana mandoh uvin ahi. Akimandoh mi 4 ho chu Thangcha Khongsai S/o Thanglal Khongsai, Happy Valley, Block -E a um, Kimboi Khongsai, r/o Laitumkhrah, T Lalcha Khongsai (26), S/o Haozakam Khongsai, R/o Happy Valley, block -E  le  Lalhmingliana Khongsai, S/o Thangrina Khongsai, R/o Upper Nongthymai  ahi akiti.

Thuguh kimu dungjui a Manipur akon mi phabep Parkash Hotel, Laitumkhrah a aum e tia ana kimu dungjui in Police in ana dal lut uvin ana kholchil na uva heroin gm 12.97 a gih ana mudoh uvin ahi. Thangcha Khongsai thudoh an akinei toh lhon in team chun Mandariting lhang a T. Lalcha Khongsai inn ana hol le na uva ima cha ana mu pouvin hinlah Khongsai phung a kihop lhah na a khat ahi dan tahlang na ana nei in ahi akiti. Thusoh an akinei be na a  Nongthymai akon  Lalhningliana Khongsai jong hiche kivei lah a ajao hetdoh ana hitoh lhon in a inn aga kikhol chil na a gm 227.56 a gih heroin ana mudoh kit uvin ahi. Thuso kimu dungjui in Madanriting akon  Paojangam Khongsai in jong ana velha in hinlah khamnathei ana kimu doh pon ahi akiti.

Hetthei khat chu hiche khamnathei ho chu Manipur akon Shillong mun a Maruti 800 registration number WB 90 7217 khat a ana kipolut ahi. Hiche khamnathei ho chu Thangcha Khongsai le Kimboi Khongsai in ahin poh lhon a Paojangam Khongsai inn analhut lhon a che akon a adang dang hotoh kihom uhi akiti.

Thepmona neilou pasal 3 nasatah’a kivoh thu’a TKSU in demna sangtah nei; Bandh akou phat chomkhat a dia vohai

B.Lalboi Gangte

CCpur. Aug 16 (ET): Thadou-Kuki Students’ Union (TKSU) General Headquarter in Indefinite Bandh bolding anagot uchu phattep umlou tuni nilhah lam nidan 4:30 in thusoh miho hoheng’a lahdoh ahitai tin hetsahna ananei uvin ahi.  TKSU-GHQ in bandh ana kou got lo nao hi 15 August 2019 nilhah nidan 8:00 lah vel’a Hiangtam Lamka mun’a thepmo na neilou pasal mi thum nasatah’a anavoh nao chung’a amaho lah’a mikhat  serious jeh’a Raj Medicity, Imphal mun’a vetkol’a ana um thisoh nachung’a anakou got’u ahi. Hospital mun’a damlou vetkol aum ho Hiangtam Lamka Village Authority in vilna ananei utoh lhon’a jing (Aug. 17) nikho nilhah nidan 6:00 akipat  phattep umlou’a bandh anaphondoh’u ahi.

Hiche chung thu’a Thangboi Haokip, Vice President, TKSU GHQ in atahlang na’a thil-lhung toh kisai’a Hiangtam Lamka in pu-pa chon dan’a khutkhel ahi dan phondoh na anei utoh lhon’a 17 August  nilhah nidan 6:00 akipat phattep umlou’a bandh bol ding’a kigot na ana kinei phatchom khat’a ding in ana vohai tan ahi ati. Hijong leh damlou serious Imphal mun’a vetkol’a um pa ahung damtheng masang’a imacha kihouna pilhing um thei lou ding in  atahlang in ahi. Thil-lhung toh kimat’a suhna ding helou’a Police station mun’a lhailut’a lungkham tah’a aum lai’a Police khat in pistol toh anasuh to nachung’a demna sangtah akichan in ahi. Thunei vaihom hon achung’a action alah lou uleh kiphinna jong pat hiding chuleh thilsoh nachung’a Tuibong Youth Club in jong demna sangtah leh khutlha ho themmo naleh oimo nasangtah akichan in ahi tinjong aseibei.

SI Shominthang Kipgen in Gallantry Award mu

Imphal, Aug 16(ET): Manipur Government in Police Department sung’a hangsantah a natong ho Award apeh jiu Award ho lah’a asangpen Chief Minister’s Award for Gallantry sanglah ah thinglhang mi lah’a akon Churachandpur Police Station akon Sub-Inspector Shominthang Kipgen ana pang in ahi.

Award chu Patriot’s Day nia kihomdoh ahin Manipur Police Department akon mi 13 in award anakisan uvin SI Shominthang hi award sanglah a thinglhang mi amabou ahin Manipur Police Department sunga gal-hangsan ho hetpehna dinga kipe Award ho lah’a asangpen Gallantry Award ana kisan tan ahi.

Hiche Chief Minister’s Award for Gallantry hi Manipur Police Department sunga natongpha dehset ho leh hangsantah le kitahna pum a natongho kipeji ahin, chutolhon a kumdang a kibol jing bang’a tuchung ajong Patriot’s Day a hiche Award hi hopdohna ana um ahi.

Sub-Insptector Shominthang Kipgen hi Manipur Police Department noiya Sub-Inspector (Male/Civil) 2015 Batch a ana lut ahin chule 2016 akon tuni geiya Churachandpur Police Station mun a Investigating Officer panmun tuh pum a kitah tah le hangsantah a na tong khat ahi.

Anti AFSPA Lhangsam’a pang Pebam Chittaranjan thi nikho’a geldohna kin kimang

Imphal Aug16(ET):  Manipur Students’ Federation (MSF) kiloukhom hon Pebam Chittaranjan, thini kum15 lhin nikho’n athahbeh in geldoh na kin DM college Science ground mun’a anei uvin Imphal khopi sung’a ‘silent rally’ jong anei uvin ahi. Athouba Pebam Chittaranjan hi Aug 15, 2004 kumma chu AFSPA deilou vetsah na a mipi anga Bishnupur munna mei’a kihal lih ahi.

Manipur Students Federation President, Ngariyanbam Milan in simlai chapang ho komma ‘right to life’ hinna dia chanvou kinei hi eikilah peh ta a, epi dimga kisim nalai ham tin thudoh aneiyin, Chittaranjan in mohseh a ahinkho ahan lotai tin alhaset na jong aphong doh in chuleh sorkar henga mihem ten chanvou enei hou hi eikilah peh hih hen tin temna aneiye.

Manipur State Human Rights Commission Chairperson Khaidem Mani in jong Chittaranjan in aponat naho loupitah a athipi hi pachat aume tin aseiyin chuleh akikhom khom chapang ho jah din, themle natoh chelhah dan ho ahil lhang le in ahi. Aman simlai kiloikhom ho komma jong, simlai ho hi kiphinna anei masang uva, tup le doi ho hi kicheh tah a hilthem din temna aneiye.

Kin na chun Poirei Leimarol Meira Paibi Apunba lup President Longjam Memchoubi, President of AMUCO Ph. Deban leh MSF President Ng. Milan hon panmun khat cheh alo uvin ahi.

Athouba Pebam Chittaranjan Mangang Memorial Complex, Bishnupur munna jong ama geldoh nan songa kisem lim chu pahvui a o peh un chuleh Manbeiya health medical camp leh blood donation camp jong agong un ahi.

Manipur Rifles Jamedar Khat Dk. Crore 4  man WY tablet toh kimattha

Imphal, Aug 16 (ET):  8th Manipur Rifles (MR) noiya um Jemadar Hollal Haokip, kitipa chu piece  lakh 2 val WY tablet Tengnoupal checkpost in matdog ahitai

Kum 46 a upa pa hi Maruti Gypsy akang khat na Imphal jonna hung kitol ahin, Moreh a konna ahin poh louchang hi crore 4 vam man dia ginchat ahin,  janhi nidan 4 valjep chun Tengnoupal police commando hon aman tauvin ahi.

Amahi Superintendent of Police, Tengnoupal district chamber a thudoh anei un, hiche jouchun Tengnoupal Police Station custody a pehlut ahitai.

Minister Jayantakumar in ADC 5 adia Dk. 57,50000 pehdoh na nei

Imphal, Aug 16(ET): Art & Culture Minister L. Jayantakumar Singh in Chandel, Churachandpur, Ukhrul, Tamenglong leh Senapati District, ADC hon amanchah ding, dangka 57,50000 (fifty seven lakhs and fifty thousand), ahop doh peh in ahi. District  khat in dangka 7,00,000 leh dangka  4,50000 cheh amu ding ahin, district cheh a District Library semna dia dangka 7,00,000 lut ding chuleh amoh dangka  4,50000 hi  Art & Culture Department semdoh na leh, chondan enei hou dop sang na dia manchah ding ahi.

Tohgon hi, Art and culture department,Government of Manipur makai na noiya old Secretariat Complex, conference hall a chelha ahin, Milun Jayantakumar in gamsunga sumlepai dinmun hahsa jong le sorkar in chon le khan, pulepa khanga pat hung kipe son hohi mansah louding chuleh koitup ding deisah na jal’a hitobang tohgon ho hi kipodoh ahi tin aseiye.

Director Art & Culture, A. Shivdas Sharma, Joint Director, ShriKesorjit Singh, ADC chom cheh a konna lamkai ho le thuso lakhom ho pan nan kin chu achelha tan ahi.

Manipur Assembly, Monsoon Session nikho 2 hiding

Imphal, Aug 16 (ET): kumseh a chelha jing Manipur Legislative Assembly, monsoon session hi August nisim 26 le nisim 27 sunga chelha ding ahi.  Ni 2 sunga hi Presentation of Business Advisory Committee report, Motion for Election of the Three Financial committee 2019-20, chuleh aphat toh kitoh a thudoh donbutna ho um ding ahi tin M Ramani Devi, Secretary, Manipur Legislative Assembly in thuso miho mangchan hetsah na aneiyin ahi.

Mipa khat in achapa ana jeplih

Imphal, Aug 16(ET): Achesa August nisim 14 nikho in nilhah lam nidan 4:55 vel in Naorem Universe Singh, akum 15  a upa, S/o N.Rajen Singh, konthoujam Mamang Leikai akon chu JNIMS athisa in ana kipolut in ahi. Thuso kimu dungjui in Universe chu  vengsung a mi phalou phabep toh ahung kivop jing toh lhon a anu le asopi nu koma sum athum jing pelou a lekha sim dinga ana tilkhou ji lhon ahi akiti. Hiche thu toh kisai a apa toh ahung kinel na a apa in thingkeh a alubuh ana jep na a ana jeplih khah ahi. Universe chu hospital a hung kipo lut ahin hinlah doctor ho akon thuso kimu dungjui a Universe chu athisa a hung kipolut ahi akiti. Police akon thuso kimu dungju in apa chu akisel mang tan ahi akiti.