Gampam a kon Manipur hunglhung mi 25 Covid-19 positive kimudoh be; natna...

Gampam a kon Manipur hunglhung mi 25 Covid-19 positive kimudoh be; natna nei agom a 157 lhingta

60
0
SHARE

Gampam a kon Manipur hunglhung mi 25 Covid-19 positive kimudoh be; natna nei agom a 157 lhingta

Imphal, Jun 6(ET): Manipur a achesa nidan 24 sunga COVID 19 positive case 25 akimudoh be in, hiche toh kilhon a gamsunga natna neiya agom a 157 alhingtai, tin state Health Department in Saturday nikhon aseiyin ahi.

Covid 19 positive hi a mi 11 adamdoh be kit toh kilhon a gamsunga natna a kon damdoh mi 52 alhing tan, recovery rate hi 36.36 percent ahi, tin official thulhut in aseiyin ahi. State Health Department in COVID 19 thu a report apehna a, RIMS VRDL a agom a sample 1,150 lhing hi achesa nidan 24 sunga test abol uva chule JNIMS VRDL a sample 563 test kibol ahi’in, agom a test kibol jat hi 15,779 lhing ahitai.

Natna nei mi 157 lah a active case 105 um a chule mi 52 dam doh ahitai. Case athah kihetdoh be mi 25 holah a 14 hi Kangpokpi district a kon ahiuvin, Delhi a kon special train a hung kile, pasal ngen hiu ahi, tin COVID 19 Common Control Room in aseiyin ahi. Test result hi tuni a kimu ahi’in, COVID Care Facility, JNIMS a achon u ahitai.

Mi 11 result (numei 9 le pasal 2) hi Friday jan agei nung a kimu ahi’in, hiche lah a mithum hi Pherzawl district a kon ahiuvin chule adang se hi Churachandpur district a kon hiu ahi. Abon uva Mumbai a kon train a hung kileu ahi. Amaho hi VRDL, JNIMS a test abol u ahi’in, tua hi COVID 19 care facility, JNIMS a kijen dinga achon u ahitai.

Chule tuni a natna a kon kijen dam a kisoldoh mi 11 holah a mi 5 hi numei ahi’in adang se pasal ahi. Mi 4 hi Imphal West district mi, Ukhrul le Thoubal district mi 2 cheh chule Bishnupur, Noney le Tamenglong district a kon mikhat cheh hiu ahi.

Kangpokpi district hopsung President College IQ Centre, Motbung a Covid 19 positive case athah 14 akimudoh toh kilhon a Kangpokpi District Magistrate, Somorjit Salam, IAS in ‘The Manipur Epidemic Diesease COVID 19 Regulation, 2020’ noiya Presidency College building jouse, chule tho kigetna sunga um jouse ‘containment zone’ a phondohna anei tan ahi. Dan dungjuiya hiche mun a kon alut le apot kiphal louding, akimvel a gari lhai kikhah ding, school chule kikhopna ho kiphal louding ahi. Koi tobang dan palkeh a aumle Indian Penal Code Section 188 noiya achunga action kila ding ahi, tin thuso chun aseibe in ahi.

Alangkhat a, Covid 19 lockdown jeh a gampam a tangden gamsung mi agom a 446 tunin gamsung ahung lhung tauvin ahi. Amaho lah a mi 401 hi lenna a kon hung kile ahi’in, mi 37 hi Mao gate a kon chule mi 7 hi Jiribam gate langa kon hung lhung u ahi.

Frontline worker – doctor, nurse, paramedic, truck/bus driver, police le media personnel, sanitation worker le volunteer jouse chule adang dang hohi COVID 19 pandemic douna a pan sangtah la ahiuvin, amaho hi natna kilah nathei dinmun a pang uva, choltil neilouva na atoh u ahi. State Psychological support team in amaho dinga ‘Dedicated Psychological support helpline for the front liners’ kiti asemdoh u ahi’in, Mental health professional ho phone number 87874567035 le 9402751364 a hi aphat tin (24X7) a kihoupi thei dinga agon u ahi.

Covid-19 test bol nadinga Mobile Testing Kit akigong e: Health Minister

Imphal, June 6(ET): Health & Family Welfare Minister Langpoklakpam Jayantakumar lamkaina a Ministerial team hon Saturday nikhon Senapati district a um quarantine centre chom chom avil uvin ahi.

Minister pa in Social Welfare Minister Nemcha Kipgen toh Kangpokpi a um District Hospital jong avil in, office in boina ato ho thu aseikhom uvin ahi. Ache holah a hi TA & Hills Minister N Kayasii, PHED Minister Loshi Dikho, Senapati DC Lalithambigai Kalidas, ADC Senapati Chairman le ADC member ho, Senapati District Administration official hole Health department official hojong pang ahi.

Minister pa lamkaina team hon Senapati a quarantine centre chom chom avil jou uva ADC Senapati Office complex a meeting anei uvin, Covid 19 test kibol thu a boina suhlhap nadinga Health Department in Mobile Testing Kit launch bol dinga thulhuhna anei ahi’in, hiche hi aganna thei pen a manchah dinga kigong ahi, ati. Hiche pan kilah hin sample lahna a natohna chule phat kisulut ho asuhnem ding ahi’in, thinglhang gamkaiya Covid test ngaicha ho deh a dinga phachom tah hiding ahi, ati.

Gamsunga pandemic douna dinga manchah (medical equipment) le staff alhinpon, hiche jeh a Cabinet meeting um a, cabinet in aganna thei pen a doctor 300 lah dinga phatsahna anei ahi. National Health Mission noiya staff nurse 106 lah ding kiti jong pandemic jeh a khongai ahi’in, hiche jong kisulham ding ahi. Staff nurse lhahsam jeh a boina a olsah ding ahi, tin aseiyin ahi.

COVID 19 test kibol hi igam uva tua hi 1000 chunglang ahi’in, ahivanga gamsunga hung kile ho dinga lhing joulou ahi. Hiche jeh a tua sanga testing kit hi kalsah ding sorkar in aboipi ahi, ati. Novel Corona virus hi a ‘strand’ kikhel jing ahi’in, WHO, ICMR le Health Expert hon dan asem ho ijuiyu ngai ahi, tin Jayantakumar in aseiyin chule mijousen thenna hinkho aman diuvin temna aneiyin, sorkar in aphat dungjuiya SoP asodoh ho mipina jui dinga temna aneibe in ahi.

Minister pa in Senapati district a CSO ho toh jong kihouna aneiyin ahi. Pandemic douna dinga frontline a pang volunteer ho ding gelna a Minister pa in ADC Senapati a kon sum a kithopina jong aneiyin ahi. Ahung kile langa Health Minister pa le Social Welfare Minister Nemcha Kipgen in District Hospital, Kangpokpi avil in, Kangpokpi DC Somorjit Salam panna a hospital in angaichat ho thu aseikhom uvin ahi.

Manipur Governor anahi Ved Marwah Goa a mollem

Imphal, June 6(ET): Manipur, Mizoram le Jharkhand Governor anahi Ved Marwah Friday jan nidan 8.30 don a Goa a athi tan, athi a hi kum 87 lhing ahitai.

Thulhut dungjuiya, Asilo Hospital, Mapusa town, North Goa a thi ahi. Goa a achenna inmun a adammo jouva achesa kal thum sung hi hospital a kijen ahi. Saturday nikhon Manipur Chief Minister N Biren Singh in Twitter a alunghempi na thu aseiyin ahi.

“Manipur, Jharkhand le Mizoram governor anahi le IPS Ved Marwah athi thu kajah hi nommo kasa lheh e. Mipi dinga pan sangtah alahna ho kageldoh jing diu, Manipur in Governor phatah khat amansah ahi”, tin aseiyin ahi. Manipur Governor Najma Heptulla injong apohnatna thu aseiyin ahi. “Manipur governor anahi le Delhi CP Ved Marwah thi hi pohnat umtah ahi. Insung mite taonan kagel doh e”, tin aseiyin ahi.

Marwah hin achesa 1999 kum a kon 2003 kum chan Manipur Governor panmun atuh ahi’in, hiche jouva Mizoram governor (2000-2001) aban a Jharkhand Governor (2003-2004) panmun  atuh ahi. Ved Marwah hi 1985-1988 kum sunga jong Delhi Police commissioner anahi ahi’in, 1988-1990 kum a National Security Guard a third director general panmun atuh ahi. 1989 kum a Padma Shri award asana hi.

Delhi a Faqir Chand & Sons bookstore hong a Abhinav Bamhi (grand-nephew) in thuso miho henga, “Phalbi teng aji toh Goa a cheng ji ahi’in, in aneilhon ahi. Lockdown jeh a Delhi hung kile theilou ahi. Kum phabep ‘lung’ natna aneiya, ni 10 lhing hospital a um ahitai”, tin aseiyin ahi. Marwah achapa Delhi a lawyer khat jong Marwah athi pet a Goa a um ahi.

Retired IPS officer Dharmendra Kumar in Marwah Commissioner ahi pet a ACP a alut thu chule apachatna thu aseiyin ahi. “Marwah hi boina a lungneo lou ahi. Politician N Katwar Singh in kholjin a hung Russian President motorcade anokhum na thilsoh um a, meithal a akap dehchet u ahi. Marwah in hiche thilsoh a themmo jouse akilah ahi. Force dinga lamkai phatah ahi”, tin aseiyin ahi. Marwah hi kum 30 val IPS officer hi ahi’in, a insung mite hi 1947 kum a Peshawar, Pakistan a kon Delhi a hung kichon lut ahi.

1995 kum a Uncivil Wars: Pathology of Terrorism in India’ kiti lekhabu ajih ahi. Goa in Marwah jana lhingset a lhahna anei ding ahi, tin Goa Police spokesperson in aseiyin ahi.

Hehna kisemkhum MLA 7 hon ‘Objection plea’ apeh Speaker’s Tribunal in san peh lou

Imphal, June 6(ET): Congress party in disqualification case asem khum BJP a lut Congress MLA 7 hon application hi san thei ahipoi, tia ‘miscellaneous objection plea’ apeh u Manipur Speaker’s Tribunal, Manipur Legislative Assembly in asan peh tapon ahi.

Wangoi AC MLA Oinam Lukhoi Singh douna a agom a Disqualification case 15, Lamlai AC MLA Ksh. Biren Singh chunga Disqualification case 3, Wangjing Tentha AC MLA Paonam Brojen Singh chunga Disqualification case 3, Kumbi Assembly constituency MLA Sanasam Bira Singh chunga Disqualification case 3 chule Saitu MLA Ngamthang Haokip, Singhat MLA Ginsuanhau le Kakching MLA Yengkhom Surchandra douna a Disqualification Case khat cheh Tribunal anga kisem ahi’in, Indian Constitution Tenth Schedule noiya ‘disqualify’ bol dinga ngehna um ahi. Respondent hon tunia petitioner hon application apeh adoudal nau petition apehlut u ahi.

Petitioner le respondent ho counsel thusei Speaker’s Tribunal in angailhah jouva, ngehna kipe asan peh lou ahitai. ‘Cause of action’ akipe/akiseidoh pon, ‘relief claimed’ undervalued ahina a Court in phat atep sunga ‘valuation’ suhding dinga asei abol doh louvu ahi. Relief Claimed ‘valued’ ahina a paper stamp lhinglou chule court in phat apeh sunga stamp-paper apeh diuva asei abol louvu ahi, tin asei uvin ahi.

Duplicate a file kibol lou, Plaintiff in Rule 9 ajui lou ahi, tin application apeh u asan pehlou u ajeh apeh nau ho a aseibe uvin ahi. Court in ‘valuation’ asuhdih nading ahiloule angaicha stamp-paper apehlut nadinga phat atep hi ajeh khohtah (exceptional) jeh a plaintiff in abol theilou ahi tia Court in lunglhaina anei loule aphat kisuhsaobe theilou ahi.

 

 

Chandrakirti Park semding doudal na’a Research and Preservation of the Zo Identities (RPZI) kisemdoh

B.Lalboi Gangte

CCpur. June 6 (ET) : Zo identities huhbit naleh venbit na ding’a kisemdoh Research and Preservation of the Zo Identities (RPZI) chu tunin hondoh naleh lamkai ding ho kitepsah naleh Pathen heng’a lhandoh na kingon  anaum in ahi. Hiche achun Pumdou Chairman Zomi Chief Association (ZCA) in Research and Preservation of the Zo Identities(RPZI) hondoh naleh lamkai ding ho kihahsel na aneisah in chuleh Rev. Retired. V. Khamvum in hondoh’a um Research and Preservation of the Zo Identities (RPZI) Pathen heng’a lhandoh naleh lamkai ho taopeh na ananei in ahi.

Hiche kingon phatsung’a RPZI General Secretary V.Chinkenpau in Research and Preservation of the Zo Identities (RPZI) toh kisai atahlang na’a pu le-pa apat inei’u gam leh go manlu tah tah ho huhbit nading leh venbit na ding gaikhoh nanei mi phabep in achesa April nisim 28, 2020 nikho in kihoukhom na ana kinei dungjui’a Nam sung’a lamkai chom chom akidong in chuleh   gamsung agou ho huhbitna ding leh venbitna ding in May nisi 16, 2020 nikho in The Vine Restaurant, Nghathal mun’a seminar khat ana kigong in ahi ati. Chujou in Jamzachin Inn, Nghathal mun’a gamsung’a pengdoh gou manpha tah huhbit naleh venbitna ding in kiloikhom na khat semdoh lou ding apoimo dan seikhom ahi toh lhon’a kingon’a hung kikhom ho deina bang’a kiloikhom na min ding’a Research and Preservation of the Zo Identities (RPZI) hi thulhuh na anakila ahi ati.

Hiche toh lhon’a Pumdou Chairman, ZCA in houlim na aneina’a Tonjang kho’a Chivu dil mun’a Manipur Govt. in khangthu dihlou tah asemthu naban’a Lushai khangthu toh kitoh lou mangcha’a Chandrakirti Park abol got’u hi thinglhang mite gam leiset chu nading’a abol ahi ati. Chuleh Zomi Chief Association (ZCA) in Press Release abol jong Manipur Chief Minister kom’a akipe in ahin hiche thu hi Zomi Chief Association(ZCA) kalso nabou’a imacha lolhing jou lou ding ti ahi jeh’a Zomi Council kom’a hiche chung thu ngaito ding’a ngehna akibol dungjui’a  Zomi Council injong donbut na anape uvin ahi tinjong aseibei.

Alangkhat’a tuni hondoh’a um Research and Preservation of the Zo Identities (RPZI) a lamkai ding kilhengdoh ho chu Chairman : Khamkhantuam; Vice Chairman : Thangneihkham Guite; Vice Chairman : Khaimuanthang; General Secretary : V. Chinkhenpau; Secretary Org. : SK. Ngaihte; Secretary Finance : Sonvualnam; Secretary Media & Publicity : Ginza Vualzong; Secretary Planning and Strategy m: Shyam Tunglut; Secretary Diplomacy : LT. Ngaihte; Secretary Research : Dr. Thathang Hangshing; Secretary Legal : Songzamang Tombing; Secretary Youth Wing : T. Tuanzakhup leh Secretary Women Wing : Nianglian chuleh Advisory board ding in mi 11 jong ana lhengdoh uvin ahi.

Research and Preservation of the Zo Identities (RPZI) hondoh ahitoh lhon in Tonjang kho’a Singngat Sub Division ah Chivu song adih lou tah’a thucheng kijih toh kisai sudih nading in Chief  Minister of Manipur N. Biren Singh kom’a Memorandum jong anape uvin ahi. Memorandum in achun Superintendent of  Archaeology, Govt. of Manipur in Chivu song a thu cheng kijih Chandrakirti Lengpa in Lushai leng 4 chung’a goljo nachang kho 112 toupha ti’a kijih hi RPZI in akipom pon ahi. Chuleh British General Nuthall lamkai nanoi’a Lushai expedition 1871-1972 phatsung’a Chandrakirti lengpa in Lushai leng 4 chung’a goljo naleh kho 112 atoupha pon ahi ati. Chivu song a khangthu dihlou tah’a kijih hi Zo mipi te lungchang asuna lheh in ahi. Chandrakirti lengpa thunei nanoi in Zo mite aum kha pon chuleh  Chivu dil/chi twi hi Zo chate in pu leh pa khang akon gou lupen tah khat’a anei ahi. Zo mipi ten in hiche chung thu’a boina aum ding akidei pon Government of Manipur in Chivu song ah kijih thucheng avetchil’a asudih ding in Memorandum achun ngehna ananei uvin ahi.

 

CCpur Govt. College IQC a Sepai pang khat ana jamdoh

B.Lalboi Gangte

CCpur. June 6 (ET): Coronavirus (Covid-19) jeh’a India gamsung State chom chom’a tangden ho CCpur District ahung lhung utoh lhon’a vetkol na inn Quarantine Centre chom chom lah’a CCpur Government College Institutional Quarantine Centre mun’a vetkol’a um ho lah’a pasal khat Centre akon in janni (June 5) in ana jamdoh in ahin tunin (June 6) ana nung lut kit tan ahi. Hiche thilsoh thu’a tuni mama chun CCpur District Police akon MA Salam, OC, Police Station, CCpur lamkai nan Police team khat in Centre anapha uvin kholchil na ananei uvin ahi. Hetthei khat chu hiche Centre mun’a jamdoh pasal pa hi kum 27 ah upa ahi in amahi India sepai Jammu & Kashmir ah posting a um inn lam jon’a ahung lai’a Delhi ah Covid-19 lockdown in analap khah jeh’a Delhi khopi’a tangden’a Delhi akon special train a hung’a CCpur Government College Institutional Quarantine Centre mun’a vetkol’a um ahi.

Alangkhat’a hiche pa hi Centre akon nilhah nidan 4:00 vel’a ana jamdoh’a a-inn mun’a jan khat gageh’a ajing nikho  June 6 a aum na mun Quarantine Centre a nung lutkit ahi. Hiche thu’a tuni nilhah lam in S. Ginmuan Ngaihte, MCS SDO CCpur leh Hasby Haokip, Additional SP, CCpur tenin Centre vetlhah na ananeilhon in hiche phatsung in Centre ah duty poho leh Doctor ho hetpeh naleh phatsah peh na in ama chu home quarantine ding in anasoldoh tauvin ahi. CCpur Govt. College QC mun’a hin Rajasthan leh Delhi akon hung mi 237 aum in ahi.

 

Minister Nemcha in Kalapahar a anchang kihopna centre le Kangpokpi DHQ a COVID Emergency Food Kihop vil

KANGPOKPI, Jun 6(UNA): Social Welfare and Cooperation Minister Nemcha Kipgen in ama assembly constituency hopsunga PMGKAY le OMSS noiya May lha a dinga anchang kihop na vil (surprised visit) dinga review meeting a anasei toh kilhon a anchang kihopna mun avil in ahi.

Card nei le neilou khenna umlouva mijousen anchang kg 5 cheh amu nading chule anchang kihopna a ‘social distancing’ kijui vetup dinga Minister nu in Kalapahar a anchang kihopna centre avil in ahi. MDC nominee Milan Pradhan toh kilhon a Minister nu in adih louva thil kibol aum louna dinga pan sangtah ala lhonin ahi.

Covid 19 pandemic sunga hi mijousen hahsatna ato soh ahi’in, FPS agent hon adihlouva kichepna umlouva mijouse achan ding dol apeh tei nading uva pan alah diu hi thupi ahi, tin Minister nu in aseiyin chule COVID frontline worker ho banga FPS agent honjong mihem ngailutna a na atoh uva, Pathen natohna ahi tihi ageldoh jing ngai ahi, ati.

Anchang kihopna a adihlou bol FPS agent akimudoh a ahile thuhilna banga action kila ding, akhel kikoi ding ahi, ati. ‘Mask kibol lou kilut sah louding ahi’ tia atah nau gate Kalapahar numei volunteer hon angah uvin, mask kibol lou ho alut ding akhah uvin ahi.

Minister nu in Kangpokpi DHQ a COVID Emergency Food Kiosk jong avil in, KWWO le KYU lamkai hotoh phat chomkhat kihoulimna aneiyin ahi. Hahsatna tamtah umjong le ahung kile ho ding gelna a na pha tong jing a volunteer ho apachatna thu aseiyin chule hahsatna vettup jing dinga jong aseibe in ahi. COVID Emergency Food Kiosk a volunteer chule Kangpokpi DHQ le akimvel a um IQC jouse a neh hopna dinga kipedoh a KCC volunteer ho dinga vohsa jong agon peh in ahi. SP Kangpokpi in Screening Centre a ahung kile ho athah le alah na a aman ding diesel barrel peh be dinga kitepna aneiyin ahi. Friday ni a kon tuni jingkah chan a Kangpokpi District Screening Centre a mi 126 hunglhung ahi’in, Nepal a kon hung kile jong pang ahi.

Duty bol a Magistrate le ama team ho, Lalramsang Infimate, MCS, ADM/ADC Kangpokpi vetkolna noiya medical team chule Addl. SP (Ops) Lalminlen Misao, MPS makaina a police personnel hon aphat tin a duty abol uvin, KWWO chule KYU volunteer hotoh official ho panlah na jal a agei nung a hung kile hon jong boina atoh pouvin, kel thoh louva COVID Emergency Food Kiosk a neh le chah amu u ahi.

Indo-Myanmar border a ZRA cadre akon khamnathei Dk. Crore 8.50 man vel kimandoh

Imphal, June 6(ET):  Manipur police le Assam Rifle ho kitho in tuni chun Indo-Myanmar border a khamnathei Dk. 8.50 core manding ana mandoh uvin ahi. Thulhut in aseina achun Manipur police team khat in Friday nilhah chun Van khat Moreh akon Imphal hinjon chu Tengnoupal District police a commando team hon akham guo uvin hinlah khamlou in gari chu ajam pai in Tengnoupal valley lei kom a gari adalha uvin ama ni chu ajam hon in commondo hon mi khat ana mandoh uvin ahi.

Akimandoh pa chu Zomi Revolutionary Army (ZRA) cadre ahi in ahin poh uh WY tablet, brown sugar ho amandoh uvin ahi. Akimandoh pa chu Churachandpur district akon Manghaothang Zou (32) ahi in ama akon WY chang 50,000 chule brown sugar packet 6 amandoh uvin ahi. Akiman pa chule akimandoh khamnathei le ahin pohnau gari chu Tengnoupal police khut a akipedoh tan ahi.

Manipur Class 10 Board Result kiphongvah tading

Imphal, June 6(ET): Manipur Board of Secondary Education thuso khat in aseina achun Class 10 result kiphong vah ding ahitai ati. Ahung kiphon teng manresults.nic.in akon muthei hiding ahi in chule Class 12 vang akichai loulai ahijeh in avat ho chu ahung lhung ding July 6 le 7 nikho a exam umding in thulhut chun asei in ahi. Apirl lha apat chun Class 10 ho answer paper check akibol pan tan March 11 nichun subject jouse a answer key akipedoh tan ahi.

Ningkum chun May 18 nikho in class 10 result chu akiphong in simlai 37,138 holah ah simlai 27,740 hon pachanna amu uvin ahi. Over all pass percent chu 74.69 ahi in chule pass percentang chu 78.93 ahi. Ningkum chun government school akon 53.77 pass percentage akimu in chule private school hon 82.30 percent apha in ahi.

JNIMS Senior resident doctor kilheng doh lah’a Eimi thum pang

Imphal, June 6(ET): JNIMS section board kilol na dungjui in institute a senior resident doctor kum thum ding in doctor phabep lhendoh ana hin, akilhengdoh lah a eimi doctor ho chu Orthopaedics department akon Dr. P Hegin Tungdim le T Pau Siam chuleh Forensic Medicine a  Dr. Paokai Kipgen ahiuve.