Gamdang’a tangden gamsung miho dinga govt in special train gonpeh; Lockdown khoutah...

Gamdang’a tangden gamsung miho dinga govt in special train gonpeh; Lockdown khoutah a kichepi ding ahi tia Chief Secretary in sei

621
0
SHARE

Gamdang’a tangden gamsung miho dinga govt in special train gonpeh; Lockdown khoutah a kichepi ding ahi tia Chief Secretary in sei

Imphal, May 7(ET): State sorkar in Covid-19 pandemic gamsunga vettup nading a pan lahthei chan a alah ahi’in, ‘Lockdown’ hi khoutah a kichepi ding ahi, tin Chief Secretary Dr. J. Suresh Babu in Thursday nikhon Conference Hall, Old Secretariat, Imphal a press conference abolna a aseiyin ahi.

Ministry of Home Affairs in nisim 25.03.2020 nikho a thuhilna apeh dungjuiya sorkar in gamsunga Lockdown akoi ahi, tin Chief Secretary in aseiyin chule aphat dungjuiya Lockdown phat kisuhsao be na chule ‘relaxation’ ho thuphon um ahi, ati. Manipur gamsung hi Green Zone hijong le Northeast gam phabep a Covid case tam cheh cheh ahi’in chule gam chom chom a tangden gamsung miho hung kile jing ahijeh a State Cabinet in May nisim 6 nikho a ‘relaxation’ asuhlhom a chule angaicha khoh a kigel ‘order’ ho asodoh ahi, ati.

Chief Minister le Cabinet Minister hon aphat dungjuiya dinmun velvetna aneiyu ahi, ati. Chief Minister Chairman hina a Minister, MLA, gamsung mi hetthei umtah tah le official ho panna a State Consultative Committee kisemdoh ahi’in, State Task Force in Chief Secretary Chairman hina a niseh a dinmun ho vetlhahna meeting aneiya chule ajing nikho a dinga tohgon tohgon asem ahi’in, State Task Force thulhuhna hohi District Level Committee hon achepi nadinga meeting anei ahi.

State Home Department, Health Department, Police Department, Transport department chule ‘essential service a um department adang jousen achesa lha ni sung pontho tah a na atoh u ahi. Medical team hon Covid-19 positive ni ajen dam a chule agency dang dang hotoh case teni achal louna dinga lolhing tah a pan alah u ahi.

Chief Secretary, Addl. Chief Secretary (Relief), Principal Secretary (Health), ADGP (L&O), Commissioner Works chule adang dang panna senior officer team hon Thursday nikhon Jiribam avil uvin, phat chomkhat manthei ding mandap (pandal), toilet, screening area, passenger ho kipohna bus 40 kingah nading, le adang dang a angaicha ho vetlhahna anei uvin ahi.

Sorkar in gampam a umden ho damsel a gamsung hin puilhung ding agelkhoh ahi, tin Chief Secretary in aseiyin chule ‘special train’ a hung nom a gampam a tangden hon website www.tengbang.in a register akibol diuvin aseiyin ahi. Bangalore a kon atangden ho kipohna train masapen hi Saturday ahiloule Sunday nikho teng kipan doh maithei ahi’in, mi 1200 apoh diu ahi.

JNIMS le RIMS a lupna 100 umna Covid-19 treatment block ni akisem doh in, hiche a hi ICU a dinga lupna 20 pang ahi. District jouse chule Moreh a Isolation ward kisemdoh a, hiche mun jouse a hi Flu Clinic jong kisemdoh ahi. District jouse a Surveillance team le Rapid Response Team 40 kipe ahi, tin Chief Secretary in Covid-19 a dinga kigotna chungchang thu aseiyin ahi.

Gamsung in niseh a angaichat ho pohna dinga gamdang a kon truck 250 val hung ahi’in, sorkar in ngaichat khoh ho alhahsam louna dinga pan alah ahi. State dang dang a Chief Secretary hotoh truck boina beiya alhai thei nadinga kihoutohna um ahi. May lha a dinga anchang kila pan ahitan, aphatcha akilah theina dinga state sorkar in tu naicha Corpus fund dangka crore 5.00 (revolving fund) CAF&PD department toh asem ahi. Dan khoutah a chepi nadinga Deputy Commissioner ho mopohna kipe ahi’in, anchang jong aning lhing a aum’e, tin aseibe in ahi.

 Press conference a Principal Secretary (Health), Vumlunmang Vualnam jong pang ahi.

June-July lha teng India gam a Covid-19 case hatah a kal ding ahi: AIIMS Director

New Delhi, May 7: India in Covid-19 pandemic douna dinga bol thei chan abol a, case suhnem ding agot jing vanga All India Institute of Medical Sciences (AIIMS) Director Randeep Guleria in Thursday nikhon gamsunga Covid-19 case hi June le July lha teng hatah a kal ding ahi’in, akhohset nading nikho hunglhung loulai ahi, tin aseiyin ahi.

Ahunglhung ding lha ho a hi positive case tam cheh cheh ding ahi, tin Guleria in aseiyin chule lha ni lha thum jou ahiloule ‘peak months’ jouteng le bou case hi hung kemsuh ding ahi, ati. Sorkar in COVID-19 Quarantine le testing centre akalsah angaiyin chule hotspot area/zone ho a hi dan khoutah a koiding ahi, ati.

Coronavirus douna gal hi mipi a ahi’in, social distancing, sanitizer man ding, khut sop ding kiti hohi mipin ajui ngai ahi. Pandemic douna a gal kisatna hi sottah um nalai ding ahi. Mijouse hinkho man kikhel ding ahi. Social distancing le mask bol ding kiti hohi shopping mall le movie theatre a che ho dinga dan ngaina athah hung hiding ahi, tin jong aseiyin ahi.

Union Health Ministry Harsh Vardhan lamkaina meeting aumjou ahi. “Gamsunga ‘testing capacity’ hi kal ahi’in, nikhat a 95,000 test a kal a chule government laboratory 327 le private laboratory 118 um ahi. Tuchan geiya Covid-19 test 13,57,442 kibol ahitan, May nisim 7 chan a agom a case 52,952 kiseiya, hiche lah a mi 15,266 damdoh a chule mi 1,783 thi ahitai.

Achesa nidan 24 sunga case athah 3561 kiseibe ahi’in chule damlou 1084 damdoh ahi. India gam a thina toh hi 3.3 percent ahi’in, adamdoh hi 28.83 percent ahi’in, gamdang dang toh tekah dinga gamsung dinmun hi pha ahi. ICU a adamlou 4.8 percent um a, ventilator a 1.1 percent chule oxygen kipe 3.3 percent um ahi.

Achesa nikho 7 sunga district 180 a case athah kiseibe talou chule ni 7-13 sunga case thah kisei louna district 180 um a, nikho 14-20 sunga case thah umlouna district 164 um ahi’in chule achesa ni 21-28 sunga case thah akisei be louna district 136 um ahi, ati. Achesa nidan 24 sunga case athah akiseibe louna State le UT 13 hohi- Andaman and Nicobar Islands, Arunachal Pradesh, Chhattisgarh, Goa, Jharkhand, Himachal Pradesh, Jammu & Kashmir UT, Kerala, Ladakh, Manipur, Meghalaya, Mizoram leh Odisha gam ahi’in, chule Daman & Diu, Sikkim, Nagaland le Lakshadweep a hi tuni chan a Covid-19 case kisei loulai ahi, tin Harsh Vardhan in aseiyin ahi.

India gam a ‘hotspot district’ 130, non-hotspot district 284 chule non-affected district 319 um ahi, tin Union Minister in aseiyin chule tu le tua Covid hospital a dinga kipedoh hospital 821 um a, lupna 1,50,059 (ICU bed-17,840 le Isolation bed 1,32,219) um ahi Chule Covid Health Centre 1,898 (Isolation bed 1,09,286 le ICU bed 9,823) um a, chule Quarantine centre 7,569 um ahi, tin aseibe in ahi.

Visakhapatnam a ‘gas leak’ jeh a thi mi 11 lhingta, mi 1,000 val hospital kilhut; Athi ho Dk. Crore 1 cheh compensation peh dia CM in phongdoh

Visakhapatnam, May 7:  Andhra Pradesh gamsung Visakhapatnam district noiya um RR Venkatapuram kho a um chemical plant khat a kon ‘gas leak’ ahijeh a tuchan geiyin mi 11 athi tan chule mi 1000 val hospital tan ahi.

Mi tamtah in mit peh/nat le hai khoplou aneijeh a hospital apohlut u ahitan, police, fire tender le ambulance jong amun lhung ahitai. Chemical plant kom a um lamlen a mi tamtah kho helouva tol a alup den nau video muthei ahi’in, akithopi hon mask akibol uva pan alah u ahi. Gas hi 1-1.15 km chan lhungjou chule anam hi 2-2.5 km chan kija pha ahi.

RK Meena, CP Visakhapatnam City in FIR akijihlut tai, tin aseiyin ahi. Thulhut dungjuiya LG Polymers a kon leak che a gas hi Styrene ahi, jingkah nidan 2.30 don thilsoh ahi. Gas hi mi aja a sim in akinah lut khat a, kho helouva umloi ahiloule hai khoplou loi um ahi. MoS Home Affairs G Kishan Reddy in thilsoh chungchang a vangsetna toh ho alunghempina thu aseiyin ahi.

Thulhut dungjuiya, chemical plant kom a um khosung 5 a cheng ho apuidoh u ahitan, kho dang dang jong apuidoh jing nahlaiyu ahi. LG Polymers chemical plant, RR Venkatapuram kho a gas leak ahi jouva apet pet a lockdown akoi paiyu ahi. Gas asumang (neutralized) tauvin, ahivanga achedoh man hohin akimvel a um tamtah atohkhah ahi, tin Andhra Pradesh Industries Minister MG Reddy in aseiyin ahi. Plant a company managing ho themmo kichan ding, sorkar in hilchenna apeh uva, itobang dan ajui uva, ipi ajui louvu ham, ti aseidiu ahi, ati.

Andhra Pradesh CM YS Jagan Mohan Reddy jong thilsoh khol dinga Visakhapatnam ana jon adammo ho umna hospital jong agavil in ahi. Chief Minister pa chun hiche thilsoh a thina toh ho Dk. Crore 1 cheh compensation peh ding in aseiyin chule akisukha a hospital kilhutho lah a ventilator a velkol a um ho Dk. Lakh 10 cheh leh serious tah a kisukha louho Dk. Lakh 1 cheh peh ding jong phondohna aneiyin ahi. Chule Hospital kilhut ho discharge kibol jong ijat ham khat aum tai jong ati.

PM Modi injong hiche thu a NDMA official hotoh kihouna aneiyin, kihouna a Amit Shah le Rajnath Singh jong pang ahi.

 

AMHSDA in ‘cease work strike’ bol dinga tohgon anei vohai ta; sorkar chunga kipathu seiyu

Imphal, May 7(UNA): All Manipur Health Services Doctors Association (AMHSDA) in MHS doctor jouse (allopathic) dental doctor le Ayush doctor ho Non Practicing Allowance (NPA) (basic pay a kon 20%) peh dinga thumna aneiyu Cabinet in phatsahna anei toh kilhon a kiphinna bol dinga tohgon aneiyu avohai tauvin ahi.

DA le allowance dang dang kisimna a NPA hi ‘basic pay’ a sim ding chule government doctor hon private a practice abol theilou diuva kisei ahi. Health Directorate, Lamphel mun a General Secretary, AMHSDA L Arke Singh in Thursday nikho a thuso miho akimupi na a, state sorkar in achesa April 27, 2020 nikho a NPA kah dinga order asodoh ahi, ati.

Association in April nisim 29 nikho a ‘order’ cancel abol diuva application apehlut ahi, tin aseiyin ahi. Hiche thu a achesa April nisim 30 nikho a Doctor’s association in ’emergency general body meeting’ abol uva, government order deilou vetsahna a ‘badge’ vom natohna mun a bol dinga meeting a kilolna um ahi, ati. Association in thumna aneiho ni 7 sunga akimu deh louva ahile ‘ceasework strike le adang dang bol dinga kiphatna um ahi, tin aseibe in ahi.

Ahin, vangphat umtah a, May nisim 6 nikho a Chief Minister lamkaina a Cabinet in kihouna anei nauva association in thumna anei khoh ho san peh dinga phatsahna um ahitai, tin Arke in aseiyin chule CM N Biren Singh, Health and Family Welfare Minister L Jayantakumar Singh le Cabinet minister jousen doctor ho le mipi gelkhohna jal a thulhuhna anei nau chunga association in kipana sangtah anei thu aseibe in ahi.

Doctor hon ima jouse, adeh a Covid-19 Pandemic sunga sorkar natoh jouse tosotna lhingset peh dinga kitepna anei uvin chule Cabinet in thulhuhna anei hi vaigei louva government in order asodoh dinga jong Arke in temna aneibe in ahi.

Gampam akon hunglut ding ho quarantine centre ding thu’a Tengnoupal district mipin kihouna nei

Tengnoupal, May 7: Tunin Moreh police I.B Complex mun ah Tengnoupal district sung mi gampam  a um inn hung kile ding ho umnaidng quarantine centre hotoh kisai in mipi kihoukhomna khat an aum in ahi. Tuni kihou na achun adeh a Moreh sung a quarantine centre hoding chungchang a kihou na ana nei uvin ahi.

D.Korungthang Local MLA  in ahou limna a Tengnoupal district sung adeh a Moreh khopi a um gampam akon hung lut ding ho chungchang thu asei na a, ahung ding hohin kahung nom uva tia lekha ahin pehlut uva moh hung thei ding u ahipon, eiho state govt le aum na mun cheh u state govt in kihou na anei a, kihou lhah na dung jui a hung ding u ahibou in ahi ati. Eiho mi ahung ding hohi natna nei ahipouvin, hinlah lamkah dung a natna nei ho akon ahung kilah doh u tijat na le hiche akon kivenna ding a Mao le Jiri a gamsung mi ahung lut ding ho test bol ding u ahidan jong MLA pa in hetsah na ana nei in ahi. Hiche test bol namun ho a koitabang a positive aum le hospital a umding chuleh negative hiho chu district administration, ADC le kho haosa ho in phate a avetsui u ngai ahi ati.

Tulai tah a covid-19 natna jeh a gamsung boi ahi toh lhon a koima in guhthim a Myanmar lam akon a sumkol veina anei nalouding in jong MLA pa in temna ahin nei in ahi. Security in gamgi aven bou nganse lou a haosa ho in khosung khangthah ho khosung le gamgi ho avensah ding adeisah dan jong MLA pa in tahlang na ana nei in ahi. Covid-19 natna lou hi tuchanna um nai lou ahi toh lhon a kiven jing, maitom ki bol jing a mitoh kinai a um lou chu alou ahipen in ahi tin MLA pa chun ana sei in ahi.

S.Tongpao Mate, vice  chairman autonomous district council Chandel in ahou limna a district sung a um ho ding a panlah na thei channa panla a mipi ho kithopina anei jing ding dan hetsah na ananei in ahi. M. Rajkumar Singh, D.C.Tengnoupal district in ahou limna a gampam akon hung lut ding district miho hi hunglut thei loudig u ahi akiti thei pon, ahunglut jou teng ule avah thang le umlou a insung miho in phate a avetsui ding uvin temna ana nei in ahi. Tengnoupal district police  S.P. Th. Vikramjit singh in asei na a hiche natna akon kivenna ding a mipi in a inn cheh a kikhum a hinkho aman ding hi aphpen ahi ati.

Tuni kihou khomna achun  D. Korungthang  MLA 42 A/C  Tengnoupal district, M. Rajkumar  D.C Tengnoupal  district, Th. Vikramjit singh S.P.Tengnoupal district police, S. Tongpao Mate  vice chairman autonomous district council Chandel, Autonomous district  council chandel a member J.N. Baite, Chinnevah haokip, Meshil, Mathew  le adang dang ho in panlah na ana nei uvin ahi. Tuni kihou khomna achun Moreh khopi sung a mipi kiloikhomna Meetei council Moreh, All Community development organization Moreh, Hill Tribal Council Moreh, Tamil sangam Moreh, Manipuri Muslim council Moreh, Gorkha samaj samiti Moreh le haosa ho in panlah na ana nei uvin ahi.

KSO Sangaikot Block in India-Myanmar gamgi chin’a khosa L. Khaokul kho vilna ananei nao thu’a thuso nei

B.Lalboi Gangte

CCpur, May 7(ET): India leh Myanmar gamgi chin’a um Sangaikot Sub-division akipat km 48 agamlha L. Khaokul Village Border Pillars 47, 48 akon Myanmar gamsung’a India gammi alut leh apot aum jing naban’a Myanmar akon Coronavirus nat vei India gamsung hung lut ding venbit nading in agamkai sung’a kiloikhomna Kuki Students’ Organisation-Sangaikot Block in gamgi kholchil na achesa March nisim  29 leh 30 in ananei uvin ahi. Chujou in KSO-Sangaikot Block makai na in janni (May 6) nikho jong chun District Administration, Medical Dept. Police Department toh kithokhom in India gamgi Myanmar toh kinei cha’a cheng L. Khaokul vilna ananei uvin ahi.

Hiche toh lhon’a KSO-Sangaikot Block in L. Khaokul Kho vilhah na anei nachung thu’a tunin thuso miho heng’a KSO-Sangaikot Block President Boilen Baite in L. Khaokul kho hi India leh Myanmar kikah gamgi Border Pillars No. 47, 48 a um ahin hiche mun hi kilamlhah to nathei mun khat ahitoh lhon’a vannoi leiset in akichat COVID-19 natna hit umlai tah’a hiche gamgi chin’a lut leh pot’a lamlha mi aum jing in ahi tithu akijah jeh’a vetlhah na gakinei ahi. Chuleh hiche vetlhah na akinei phatsung’a chun hiche gamgi akon koima alut leh apot aumlou nading’a gamkai mipi leh khosung mihon pan alah ding uva tohgon kinei ahi naban’a hiche COVID-19 natna akon gamkai mileh State miho anat khah nalou ding’a gamgi’a pot leh lut kikhah ahi ati. Aman aseibena’a hiche Border Pillars No. 47, 48 gamgi’a hi India leh Myanmar Govt. in Fencing jong kailou chu naban’a thi-dai jong kai louva aum jeh in Myanmar lang akon ahung lut nom leh India akon achelut nom jouse bailam tah’a lut leh potthei na khat ahi. Hiche hi Manipur State sung’a cheng mipi ho ding’a kichat umtah ahi naban’a adeh’a Sangaikot gamkai mipi ding’a lungjin umtah khat ahi. Hijeh hin State Govt. in agelkhoh’a COVID-19 natna akon gamsung mipi ahoidoh thei nading’a akinthei lang’a gamgi chin’a lut leh pot mi aum lou nading’a thih-dai beh akai ding in gamsung mipi thalheng’a temna aneiyin ahi.

Alangkhat’a gamgi chin’a gamgi vengbit ding State security force anakikoi khah lou vang in tuchung COVID-19 Epidemic jeh in Sangaikot Police Station akon Police Personal 9 in gamgi chin’a lut leh pot aum thei lou nading in L.Khaokul kho mun’a lamkot ah gate kisem na’a duty apo uvin ahi. Hiche chung thu hi State Govt. in gelkhoh na neihen lang Police Personal koibe henlang chuleh SI khat beh lamkai nanoi’a busa hileu ti adeisah dan thu aphongdoh in ahi. Ajeh chu hiche gamgi kikhen na’a hi fencing, thih-dai kikai lou ahi jeh chun L. Khaokul kho mun joh’a atin vang uvin vadung akon jong beilam tah’a lamlhah thei na ahi jeh chun Myanmar akon natna po khat hunglut kha leh gamsung mipi leh State mipi ding’a boina sangtah hung soh doh thei ding ahi jeh in State Govt. in gelkhoh na neihen lang Myanmar akon India gam hunglut koima aum thei nalou ding in Security Force atam thei pen’a koi ding leh L. Khaokul mun’a jong koi ding in ngehna aneiyin ahi.

Hetthei khat chu L.Khaokul kho hi T. Khongkhai kho akipat Km 10 vel’a gamlha ahi vang in T. Khongkhai kho’a tou Assam Rifles hon L. Khaokul gamsung a cover joulou’u naban’a Myanmar lam akon Manipur gamvah ho akon suhgimna ana tojing uvin hiche jeh chu dammo veiset, vangset nikho jeng jong leh genthei na sangtah anatoh jing uvin ahi. Chuleh Sangaikot Sub-Division sung hi Saikot PHC vetkol nanoi’a um hi jong leh gamgi chin’a cheng Kho tilou’a Saikot PHC in mopohna alet val jeh in ahi ding bangtah in cover abol jou ji pouvin ahi. Hiche dinmun  ahi jeh chun Sangaikot Sub-division in dammo veiset nikho’a kisasah thei nading leh kingap nathei ding Sangaikot PHC hi State Govt. in gamsung mipi ho ding gelkhohna’a apilhinsah’a chuleh COVID-19 akon gamsung mipi ho avenbit nading’a ngehna jong aneiyin ahi. Chuleh Police Out Post, Sangaikot Police Station ah Police Personal kining lhing sel’a koilut ahi’a gamsung mipi ho COVID-19 natna akon lungmong’a aum thei nading uvin ngehna jong aneikit in ahi.

Kpi police hon Lockdown 3.0 ‘guidelines’ thah khoutah a chepiu

Kangpokpi, May 7(UNA): District Magistrate/DC Kangpokpi in Wednesday nikho a Lockdown 3.0 a juiding ‘guidelines’ athah asodoh hi May nisim 4 nikho a kisodoh khel a kijuiding ahi’in, order thah aumkit ahiloule May 17 chan kijui ding ahi.

Kangpokpi Police hon Officer-in-Charge, Kangpokpi Police Station, Inspector Khogen lamkaina chule SP Kangpokpi, Hemant Pandey, IPS vetkolna noi le Addl. SP Lalminlen Misao panna a District Headquarter a dan thah kisodoh khoutah a achepi uvin ahi. Mopohna nei authority hon ‘pass’ apehlou private gari ho IT Road le Kangpokpi bazar a akham uvin ahi.

Mask kibol thu jong khoutah a avesui uvin, mask kibol louho aman uvin chule Inspector Khogen in ‘guidelines’ athah chule Covid-19 Management directive hole social distancing juiding chule mask bol tei ding thu hilna aneiyin ahi.

Guidelines thah dungjuiya, Lockdown sunga akilha ong hohi ‘A’ tia marked kibol a chule ‘B’ a hi COVID-19 Management chungchang a thuhilna ho kipe a chule ‘C’ a hi social distancing a dinga Standard Operating Procedures (SOP) thu kipe ahi. Pass neiho tilou midang ava le ding kiphal lou ahi’in, ahivanga dammona ahiloule veterinary care toh kisai emergency ho kiphal ahi.

Tu masanga jingkah nidan 6 a kon nilhah nidan 4 chan dukan hon thei dinga phalna anaum jong dan thah dungjuiya, jingkah nidan 6 a kon nidan 2 chan a kikhel ahitai.

Gamsung mi numei khat Mumbai KEM hospital a thi

Mumbai, May 7: Manipur gam mi kum 58 a upa Saya Begum Mumbai khopi a um KEM Hospital a Tuesday jan a athi in, Covid-19 natna neiya ajipa akijenna dinga hospital a ajui ahi.

Begum le ajipa Ali Ahmed hi Kairang Khomibok Maning Leikai a kon ahi’in, achesa ni phabep sung hotel a umlhon ahi. Dr Pravin Bangar, Senior Administrative Medical Officer, KEM Hospital in Saya Begum hi Covid-19 jeh ham, ahiloule natna chom chom aneijeh a thi ham ti kholna aume, tin aseiyin ahi.

Dan dungjuiya, thi lhahna hi anaipen a um kivuina/kigo na a bol ding ahi’in chule kin a mi 5 kalval apan ding kiphal lou ahi. Chule thilong hi akivui tho dinga ahile ‘plastic bag’ a phatah a chun ngai ahi. Plastic bag a thilong kichun hi tahsa amonvah sahlou chule virus kilahson to jong apeldoh ahi.

Thilong hi Mumbai khopi pam a pohding ahile athi nu insung mite hon apohna ding akigon diu, chule Covid-19 natna neiho kivuina dinga dan kisem jouse ajuiyu ngai ahi.