Gamdang mi in gam achoh theiloudi ti (Hitobang ILP kadeipoi tipan kit...

Gamdang mi in gam achoh theiloudi ti (Hitobang ILP kadeipoi tipan kit u)

88
0
SHARE

Gamdang mi in gam achoh theiloudi ti
(Hitobang ILP kadeipoi tipan kit u)
Athum u akipehlou jeh a kiphin jing hojong athil thum u akipeh vang’a lunglhai dehlou kiti hi Manipur’a ILPS (Inner Line Permit System) thuum (demand) bol’a lamkai Joint Committee on ILPS (JCLIPS) ho ahiuve. Home Minister Amit Shah in achesa December 8 (2019) ni’a Parliament Lok Sabha a CAB apohdoh a pass kibolto lhon’a Manipur’a jong ILP kichesah di ahitai tia anaphondoh jouvin Manipur’a kipa thanopna’a dim’a alopna’a  nikhat govt holiday/Suti jong kilha toh CM N Biren kipapi diloi toh ana chohlha jeng ahi. Ahin ILP delna’a lamkai JCILPS hon ILPS umsa ho akideipoi, ijeh inem itileh hitobang ILP hin gampam mi hoa kon Manipur mi le gam leiset ahuhbit dehloudi ahi ahinti kit taove. Hiche chet hi hilai mun’a anakiseisa ahi. JCILPS hon adei u chu “cut off year” 1951 hihen ti ahi. Hichu 1951 jouva Manipur hunglut, hung kichaolut hosese gampam mi ahi tia nodohdi ti ahi. Achutileh Manipur in Statehood hi 1972 kum’a ana mubep ahijeh in Manipur Statehood mu musang’a ana chengsa mi tamtah jong Manipur mi ahipoi titheina hung hidi ahi. Alangkhatna, ILP chena State leh Sixth Schedule noija kivaipohna hoa CAB cheloudi akitivang’a CAB thua “cut off year” hi 2014 bou ahi. Hichu achesa kum 4 kum 5 masang’a India a hung kichaolut hosese India mi’a sumthei tina ahijeh in India gampam’a kon hung jamlut/hung kichaolut tamtah in CAB noija Indian Citizenship amudi tina ahi. CAB hi asuh atung’in kiseijongleh North East a Hindu te tamtah chensah a “Hindu Vote bank” semdhdi ti hi abol hon atuppen ahidan Assam Finance minister milun Himanta Biswas injong ana imjoulouva lhangphong’a anaseidohsa ahi. CAB in bolchah dia atup jong amin’a hou le tahsan dangdang jui ho akiphahpoh vang’a Muslim ho hipen ahikitdan jong lhangphong thuguh ahi. Bangladesh a kon Muslim ho North East state ho, adeh a Assam gam dimlha ahitaovin kum phabep masang’a MLA, MP ana kaidohjoulou chu tua adondon’a umdoh saosao u ahitai. Manipur jeng’a jong Jiribam a Meilhei pao tholou/helou Muslim khat kaidohpan ahitan Imphal phaicham le akimvel’a jong MLA thum le li umdoh jingthei u ahitai.
Hiche hojeh hi JCILPS hon ILP kichesah maimaija agam mi dihtah hodia agam u bitna ahidehpoi atiu jong thukhat set hithou ahi. JCILPS hon ahasei ukhat kit chu gampam mi hon gam, inmun loumun achoh theilou na diu daan umna ILPS kisemhoi joh hile atiu ahi. Ahin koiman koima gam hunam’a achoh kiti hi umlou ahin ajoh hon ajoh jeh a midang hon achoh thei ahipa hi hejongleu kihetmosah u tina ahi. Thinglhang mi lah a chenkhompi Naga lang hon midang kom’a gam joh kiti malah amahole amaho kah geija jong gam leiset, inmun kijohto hi abolbehlou u khat ahi. Alangkhatna Kuki group langho hin jatdang namdang kom’a inmun loumun le gampheng joh jong khoh anasahlou u khat anahi. Tulang’a khahdohna themkhat ahung umtah jeh a jatdang kom’a gam joh aumtahlou (alhomtah) vang’a khat le khat kom’a gam kijohto, kho (village) pumpi’a kijoh kiti umjing thou ahi. ILP hihen CAB chele chedaleh igam huhbitna dia aphapen hi namdang kom’a johlou hi ahipen hijengdi ahi.