Gamdang akon Manipur gamsung vil ding a hunglut mi 60,000 tobang kholchilna...

Gamdang akon Manipur gamsung vil ding a hunglut mi 60,000 tobang kholchilna akinei tai, tia Manipur Health Director in sei

355
0
SHARE

Gamdang akon Manipur gamsung vil ding a hunglut mi 60,000 tobang kholchilna akinei tai, tia Manipur Health Director in sei

Imphal, Mar 1(ET): Wuhan a COVID-19 (coronavirus) tia kihe natna tijat umtam mudoh ahi akipat gamsung mun chom chom a hiche natna hi akhanbe louna ding leh avei mi apunbe louna ding a kiventup thei dan dan a gamsung government in pan alah jing toh lhon in gampam akon Manipur gamsung hunglut ding ho jong kholchilna (screening) akibol jing in tuni chan in mi 60,000 screen akibol in hiche natna vei hiding a ginmo mi 10 thisan test akibol in report 9 ahung pot in negative ahisoh kei in chule khat hi result ngajing ahi nalai in chule midang 377 ho chu vetlhah in aum jing nalai uve tin Manipur Health & Family Welfare Director, K Rajo in asei in ahi. Hiche thu hi Directorate of Family Welfare Conference Hall a Intensified Mission Indradhanush phase IV hondohna kin leh media sensitization programme kimanna kingon a asei ahi.

Hiche natna vei ho manipur gamsung ahunglut lou nading in border area mun 5 ah check post akihong in chule Imphal International Airport ajong checking akibol jing e ati. Tu leh tu dinmun hin hiche natna jendam theina ding lou aki semdoh naipon adamdoi phapen chu aveiho gamsung a lungsah louding chule ginmo kaiho akinthei pen a jen ding ahi jeng e ati.

Health & Family Welfare Director, Dr K Rajo in aseibena ah ningkum December lha a kipat tukum February lha chanchun Intensified Mission Indradhanush phase thumna chan lolhing tah’in akibolchai tan, alivei channa hi jing nikho’a kon’a kipan ding ahi ati. Jing nikho tengle Tengnoupal, Chandel leh Noney District ho’a normal immunization program anakibolna a lou anakikap manlou kum 2 noilang naosen holeh numei naovop ho loukapna kipan ding ahi. Loukapna program hi 90% tobang alolhin teiding’in Director pan akinepna jong aphong in ahi.

Kingon a chun Dr. T Nadakishore leh Additional Director Md Salamat Ullah teni jong apang lhon in ahi.

Indo-Myanmar gamgi a Coronavirus  screening kibol jing

Tengnoupal, Mar 1(ET) Indo-Myanmar gamgi a medical staff ho in ahung lut ho coronavirus natna nei um em ti in vetlhah na anei jing uvin ahi.

Gate ho a medical staff ho keu hilou in police ho in jong kithopina an ape uvin, mi che le vah le ho ana vechil jing uvin ahi.  Gate no 2 a jong medical staff 4 jaona in police ho in mi vetlhah na ana nei uvin ahi.

Nampalong bazaar a thil cho a che ho jong ahung kile teng ule natna ahin kipoh uvem tin vetchil na ana nei jiu vin ahi.

SCERT joint director apanmun a kon lahdoh dinga Manipur High Court in thupeh nei

Imphal, March 1(ET): State sorkar in State Council of Educational Research and Training (SCERT) joint direct apet pet a alahdoh a chule ama kilhenna hi ‘constitution’ toh kitohlou ahi, tin Manipur High Court in thupeh aneiyin ahi.

Justice MV Muralidaran lamkaina bench in SCERT Joint Director pa lahdoh dinga state sorkar, Director, SCERT, Commissioner leh MPSC Secretary thuhilna apeh ahi. February nisim 28 nikho a ‘single bench’ in thutanna anei hi joint director pa in apanmun hi ‘law authority’ beiya atuh ahi tia mopohna nei official hon apanmun a kon alahdoh nading uva writ petition apeh jouvu ahi.

SCERT a director hi a Jim Golden hin government higher secondary school a lecturer panmun atuh a chule Ramlal Paul Higher Secondary School a posting hi ahi, tia writ petition a kisei ahi. 1999 kum a SCERT joint director a kimangcha ahi. 2002 kum a joint direct pa le ama post hi SCERT grade pay a 1999 kum a kon kila ahi’in, ahivanga state sorkar in 2002 kum a producer post dinga recruitment rules published abolna a lecturer, project officer, SCERT post a kum 5 regular service a umding chule kum 7 regular service a producer post a promotion kipe thei dinga asei ahi.

Producer recruitment rules semphatna dinga proposal adang kikoibe ahi’in, lecturer post, higher secondary school transfer kibol a SCERT a kilalut a chule grade a kum 5 regular service hi, audio ahiloule visual education a experience nei jong hiche post a promotion peh nadinga proposal kikoibe ahi. Chomkhat jouva producer post hi avel a joint director a akhel u ahi.

Court in asei dungjuiya Higher secondary school a lecturer post hi a itih a producer dinga ‘feeder post’ hikha lou ahi. Sorkar in post hi lecturer ahilouleh project officer, SCERT Department tia amin athah a akhelna order umlou chule joint director promotion kipehna order thu a ima kisei ginglou ahi’in, official hon kihouna phatah a anei jouva SCERT Joint director post a dinga joint director pa akilhenna thu jong ima kimu lou ahi. Hiche jeh a court in dan toh kitohlou ahi, tia amu ahi, ati.

Hitobang government post lentah khat hi dan a kipe dungjui hilouva koima kilheng theilou ding ahi, tin thutanna chun aseiyin ahi. Jim Galden Thingujam hi Joint Director, SCERT post a promotion kipe ahi’in, Higher Secondary School a lecturer panmun atuh hi joint director a promotion amu nading a ‘feeder post’ ahipoi, tin aseibe uvin ahi.

 

Assam, Nagaland, Manipur leh Arunachal Pradesh gam a ‘Delimitation exercise’ kipan kit tading

Guwahati, Mar 1: Northeast gam li a ‘delimitation exercise’ pat kit nadinga kigotna aumtah, Centre sorkar in Friday nikhon Assam, Nagaland, Manipur leh Arunachal Pradesh gam a ‘delimitation’ ana kivohchon na notification avohai/asumang tan ahi.

Delimitation exercise hin thingnoi hatna state li ho a Assembly leh Lok Sabha constituency a gamgi (boundary) athah kai ding ahi. Dinmun masa akichepi tahlou jeh a exercise tua chepi dinga sorkar in asei ahi.

Legislative Department of Law Ministry in ‘order’ asodoh na a chun, “Assam, Manipur, Arunachal Pradesh leh Nagaland gam a ‘demilitation exercise’ akivohhai na dinmun hi aum tapon, hiche jeh a Delimitation Act, 2002 noiya constituency a delimitation exercise kipan kit thei ahitai”, tin aseiyin ahi. President in dinmun lunglhaina aneijeh a February nisim 8, 2008 a notification lahdohna anei ahitai, ati. Delimitation Act, 2002 noiya state leh union territory division semtoh nadinga Delimitation Commission kisemdoh ahi, tin order chun aseiyin chule 2001 census figure dungjuiya Lok Sabha leh state assembly election a ding ahi. Commission in ‘delimitation exercise’ ajo ahitan, akisei state li ho tilouva state jouse a Delimitation Order, 2008 ajo ahitai, ati.

President in chamna leh lungmonna chule India kipunkhomna suboi thei dinmun aume ti hetchenna aneijeh a ‘delimitation exercise’ ana vohchon ahi. “India gam a hitobang Delimitation Commission hi li vei kisemdoh ahitai. 1952 kum a Delimitation Commission Act, 1952 noi, 1963 kum a Delimitation Commission Act, 1962, 1973 kum a Delimitation Act, 1972 chule 2002 kum a Delimitation Act, 2002 noiya Delimitation Commission li vei kisemdoh ahi”, tin aseibe in ahi.

 

State Assembly Legislative in Rajya Sabha member dinga hetna nei lamkai alhen dinga MPDF in ngehna nei

Imphal, Mar 1(UNA): Manipur Peoples’ Democratic Front (MPDF) in Sunday nikhon ahunglhung ding March 26, 2020 ni a Rajya Sabha MP 55 kilhenna election umding a hi State Assembly Legislative hon Member of Parliament panmun tuh dinga kilomtah alhendoh diuvin temna anei uvin ahi. Tua MP 55 ho term hi April 9, 2020 teng kichai ding ahitai.

Secretary, MPDF Sapam Samungou in Manipur Press Club a thuso miho akihoupi na a thuso anei ahi. Parliament House a MP representative sol ding hi thil hahsatah ahi, tin Secretary Sapam Samungou in aseiyin chule democracy thu, India Constitution Article 1-395 (scheduled 1-14) phatah a hetna neiya chule opposition le ruling party khenchomna neilou,  gamsung mi dinga natoh ding lunggel nei Parliament a MP a asol diuvin temna aneibe in ahi.

Hetthei khat chu 1952 a kon tuni chan a Parliament House a hi tua MP 55 kilhenna ding election a MP thah panna a Manipur gam in MP 15 asol ding ahi. Achesa 1952 kum a kon Parliament thusim a Parliament a gamsung thu a thu nelkal a Manipur MP um em, tin MLA 60 hon thudoh anei uvin ahi.

State representative MP in India gamdang thu chule political history ho ahet louva ahileh Parliament a kinelkal na a iti pan alah ding ham, tin aseiyin chule MPDF thalheng a thepna neiya, itobang thu hijong le seitheiya, nelkalna thu seiding MP sol dinga temna anei uvin ahi. Parliament a tekah na a Article 370 chungchang a kinel kalna umhen lang MP in Article thu hetna nei da le athu iti asei ding ham, tin Samungou in aseibe in ahi.

State Assembly Legislative member hon MP dinga kilomtah, hetna nei alhen uva Parliament a asol diuvin temna aneikit in ahi.

 

Ration card nei hon anchang kihop dan chunga lunglhai loujeh a MHRC henga hehna sem

Imphal, March 1(ET): 21/39- Naoriya Pakhang Lakpa assembly constituency noiya um Lairenjam Makha Leikai a ration card nei hon Manipur Human Rights Commission (MHRC) a hehna asem uvin, akimu ding anchang akimu poi, tin ngohna anei uvin chule state lhin louna hi dan palkehna lentah ahi, tin asei uvin ahi.

National Food Security Act (NFSA) 2013 noiya ‘right to food’ hi ‘human rights’ ahi, tin ration card neihon asei uvin chule hehna asem nauva anchang (gamsung) hi changvoh laiya jong kg a dangka 50 noilang hilou chule superfine hi kg a dangka 30 lhing ahi, ati. Thil man akal jing hi ivet a ahile gamsung mihon kel athoh vahdiu  ahitai, tin hehna asem uvin ahi.

Achesa kum thum sunga lhakhat a anchang kg ni (2) bou eipeh u ahi’in, hiche hi NFSA dan kipalkeh na ahi, tin asei uvin ahi. Card nei hohin inson a lhakhat a anchang kg 5 cheh amu diu ahi’in chule AAY card nei hon anchang kg 35 cheh le hawai ho amu diu ahi, tin asei uvin ahi. “Sorkar in ‘food allowance’ chule NFSA 2013 noiya maternity benefit peh nading a dan semna a lolhing joulou ahi”, tin card neihon ngohna thu aseibe uvin ahi.

State sorkar in hahsatna toh a vengsung mi ho ration card apeh ding chule achesa 2016 kum a kon tuni chan a hawai ho panna a anchang muding dol akimu loulai ho apehsoh diuvin aseibe uvin ahi. Chule sorkar in ‘District Grievance redressal officer’ alhendoh a, State Food Commission asemdoh a, ‘food allowance’ atep a, chule minu jouse maternity benefict peh nading dan asem diuvin jong ngehna aneibe uvin ahi.

 

Assam Rifles hon Dk. Cr. 5 lhing kuwa chang amat Imphal Custom Depot a pelut ta

Imphal, Mar 1(ET): Assam Rifles sepai hon HQ IGAR (South) lamkaina noiya achesa January 28 ni a Makan leh Wanglee kho a aphal lou kuwa chang (Betel nuts) tamtah aman uvin, akiman thil ho February 28 nikhon Department of Customs, Imphal Depot a apelut tauvin ahi.

Achesa January 28 ni a kon Myanmar gam a kon dan in aphal lou kuwa chang hohi gamgi galkaiya tamtah ahin tol lut u ahi’in, Customs Department thalheng chule gari hi thinglhang gamlha tah a um Makan leh Wanglee kho alhun theilou jeh a Assam Rifles hon aphat tin a avetkol ahi. Achaina a Assam Rifles ho kithopina a custom official ho amun a cheuva chule dan in akha thil ho amat u ahi.

Hiche jouva Assam Rifles ho douna a jouthu a ngohna phabep kisem a, akiman thil phabep aselmang uve, ti chan a ngohna kisem khum ahi. Ahivanga Assam Rifles hon amaho minset nadinga ngohna kisem hohi anatoh a asuhthip uva chule ngohna ho atah ahi aphotchen nading uva thudoh jong aneiyu ahi. Assam Rifles hohin Manipur gam a dan in aphal lou natoh umho adoudal jing ahi’in, gamsung ding gelna a hitobang douna a pan alah jom ding ahi.

 

Inpui, Liangmai, Rongmei leh Zeme Joint Tribe Council in ‘Zeliangrong’ thu suhthengna nei: NSCN/GPRN lamkaina a ‘Framework Agreement’ kisem akitosot e, tia seiyu

Imphal, Mar 1(ET): Joint Tribe Council of Inpui, Liangmai, Rongmei and Zeme in Sunday nikhon ‘Zeliangrong’ min a organization phabep thusei jeh a hetkhen theilouna umho suhtheng nading a mipi dinmun suhtheng ngai asah dan thu asei uvin ahi.

Joint Tribe Council in thuso anei nauva ‘Zeliangrong’ hi kisaina chule akilomlou community ahi, tin asei uvin chule hiche thucheng mangcha a organization le lamkai hohin mipi phatna ding sanga ama chang phatchomna ding aboipi ahi, ati. Joint Council hi Inpui Naga Union (INU), Rongmei Naga Council (RNC), Liangmai Naga Council (LNC) leh Zeme Naga Council (ZNC) in asemdoh ahi.

“Manipur leh Assam gam a um Inpui, Liangmai, Rongmei leh Zeme mihon tu masang chule tua jong NSCN/GPRN lamkaina a Naga political movement chule India sorkar toh August 3, 2015 ni a Framework Agreement soi akai hi atosot ahi”, tin Joint Tribe Council in aseiyin ahi.

NSCN/GPRM lamkaina a Naga political movement tribe li in tahsanna dettah anei hi kho mulouva kibol ahipon, NSCN-IM lamkaina a Naga peace talk hetthemna kineiya tahsanna det kinei ahi, ati. “Kihouna a pang group adang (negotiating group) hohin atil a kon Naga nation concept khohsahna aneilou chule Nagaland gam pam a um Naga ho phatchomna ding hi akhohsah lou ahi tihi thutah ahi”, tin Joint Tribe Council in aseiyin ahi.

Naga khohsahna dihtah aumlou jeh a akihounauva ahat pen a developmental package amu u ahi’in, Naga national movement kisuneo a chule asang a sim martyr chang ho kiphalna hi ‘law and order’ dinmun a kiso ahi, ati.

Achesa October 31, 2019 ni a khumkhana um kihouna a India in Naga history achombeh ahidan hetpehna aneiya chule Naga ho identity, tradition, resource ho asan a chule Naga chenna jouse a Naga ponlap aphal peh ahi, tin Joint Tribe Council in aseiyin ahi. Pan Naga Hohi hi Naga nam kipunkhom nading lunggel bulhit nadinga kalsonna ahi, tin jong asei uvin ahi.

India sorkar in achesa August 3, 2015 kum a NSCN-IM toh Framework Agreement soi kaina anei hi India sorkar in jana apeh a chule Naga chule India alangni in jana apeh thei boina suhlhap nading, chamna det sem nading lampi asemdoh dinga Inpui Naga Union, Rongmei Naga Council, Liangmai Naga Council leh Zeme Naga Council in India sorkar henga ngehna anei ahi, tin Joint Tribe Council in ngehna aneibe uvin ahi.

Tengnoupal Check post a khamnathei Dk. Lakh 55 man vel dingkimandoh

Tengnoupal, Mar 1 (ET): HQ IGAR (South) vetsui nanoi’a um Assam Rifle hon janni (Feb. 9) chun Sita Road Junction kom Tengnoupal Check Post mun’a brown sugar hiding’a ginmo a sum a sei ding’a Dk. Lakh 55 anamandoh uvin ahi.

Hetthei khat chu Assam Rifle hon nilhah lam nidan 2:50 vel’a routine checking anei nao’a ginmo thei tah’a Imphal khopi lam hin jon Maruti Eeco Van (registration No. MN 05J-0907) anakham uvin kholchil na anei nao’a brown sugar 279 grams anamudoh’u ahi.

Chuleh hiche gari ahi Lhungkhojang chapa Jamkhomang Baite (40) in atol in chuleh Thangkhohao Baite (26) toh ahi lhon in ahi. Hiche toh lhon’a akimandoh khamnathei ho Tengnoupal Police Station ho khut’a kholchilbe na anei ding uvin anapelut tauvin ahi.