Gam le mipi dia kilep ngen (Khutgoh keuva inn hung kile loi,...

Gam le mipi dia kilep ngen (Khutgoh keuva inn hung kile loi, akitomgo loi)

471
0
SHARE

Gam le mipi dia kilep ngen
(Khutgoh keuva inn hung kile loi, akitomgo loi)
Gamsung thu le la boina ho hi ama chang leh aloi apai ho (party) phatchomna holna a neigo ngen ahiji hi athahbeh ahilou jeh in tupet tah a Manipur lungkhamna leh boinapen thu hoa jong phatchomna holna a neidi ti um thou thou hidan’in akilang’e. Phaicham’a Manipur gam bitna dia panla kahi ti kiloikhoimna jatjat hojong Naga Peace Talk thua gamgi bitna dia panla dan’a akiseivang uva ama phatchomna di kihol ngen, khojin jouleh meisel kidetna lamlen’a kijotna Manipur Kaiba jaroi (Manipur gam kehthei ponte) tia samleji hojong MLA, Minister leh thingnoi thingchung loikhat nin amaho chang phatchomna dia sum themkhat khat apeh uva atildoh jiuva jong kisei ahi. Gamgi keh thei ponte, CAB (Bill) in Manipur tongkha thei ponte tia gam le mipi te phatchomna seidin Delhi lang’a centre govt lamkai ho kom’ah gasei ing’e tiji hojong ama ama chang dinmun kisuhtupna dia lhaile atamjo hiji diu ahi. Tu naicha chun Chief Minister (CM) N Biren lamkaina’n MLA/Minister phabep Delhi lang’ah anacheuvin Naga Peace Talk hin Manipur gamgi atohkhah theiloudi ti agaseigot uchu akimutopinom pen u Prime Minister leh Home Minister kimupilouvin khutgoh keuvin inlang ahung kileuve. Ipi thu ipila hileh BJP Chief Minister khatleh a-cabinet chankhompi hon BJP Prime minister leh Home Minister kimupi dia gamlatah a kon Delhi gacheuva koiman akimupilou kiti chu jachat umtah ahi. PM le HM in Naga Peace Talk thua Manipur gam tongkha ponte ti avelvel’a aseisa ahijeh a aning kitel lhon’a ana kimupilou jong hithei ahi. Koima kimupilouvin kahung kileuve tia mipi het dia kisei kit nalai chu kiseida jeng hileh phajodi ahi.
Hiche hi Opposition Congress hon chouna khatna akigel kit u hitam, keiho Delhi ah gache uleng PM, HM ho kakimupi thei u ahi tia kinepna anei khat tou u hitam, Former Chief Minsier O Ibobi leh anungjui Congress MLA phabep Delhi lang ana chekit un aphachmloudi Congress President Sonia Gandhi holoi akimupiuvin akhohpen PM Modi leh HM Amit Shah chu avel vel’a kimupidi ativang’un koiman akimupi lou u ahi. BJP Chief Minister bon koiman kimupi louva tupetna Centre a thulahlou leh vetda umpen Congress ho konjong ikimupinte kiti mong mong ahidem! Manipur BJP lamkai ho ahiuva Congress lamkai ho ahiuva Delhi lang’a cheji ho hi Manipur gam le mipi te di gelkhohna a gacheji dan’a akiseiji vang uva amaho chang phatchomna dia che ngen hiji diu ahi. MLA kaidoh jou talou Ex MLA lah a RK Anand kitipa’n jong thusomi ho ain’a akouva opposition ho seisei aseija Naga Peace talk thu ah Assembly Session (toukhomna) kikouhen tia akitomgot leujong MLA chajong ahitahlou jeh in kon athu lante ati ahidem datmo umtah ahi. Thusomi ho masang sang’a inopnop seija govt taimona nei chu abaija bai ahi. RK Anand jong hi khatveini velcha a chu NEIDP party anadalhah ahin ipi party a hunglut kitdi hitam kihelou ahi. Gamsung thuboi laboina hoto seichepna ima umlouva jong politics a dinmun kisemthei mama ahi. Hichu gamsung pumpi hihih jongleh Kendra/Constituency sung beh phatchomna dia kipeija dinmun kisem thei ahi.