Gam dang’a tangden ho ama gam cheh’a akile diu Sorkar in phalpeh...

Gam dang’a tangden ho ama gam cheh’a akile diu Sorkar in phalpeh ta; ajui diu dan phabep sempeh

67
0
SHARE

Gam dang’a tangden ho ama gam cheh’a akile diu Sorkar in phalpeh ta; ajui diu dan phabep sempeh

New Delhi, Apr 29 (PTI): Migrant worker, tourist chule gamdang dang a tangden simlai le adang dang ho Wednesday nikho a ama ama gam a akile nading uva phalna ape tauvin, hahsatna toh ho dinga lung olna ahi.

Union Home Secretary Ajay Bhalla in order asodoh na a, gamdang a tangden ho pohna a bus kimang ding chule gari hohi ‘sanitised’ kibol a, touna a ‘social distancing’ kijui ding ahi, ati. Home Ministry order chun mikhat ahiloule insung khat private gari a ache ding kiphal ding ham, ti aseichen pon ahi. “Lockdown jeh a gamdang a natong ding ache, pilgrim, tourist, simlai le adang dang a tangden ho achediu kiphal diu ahitai”, ati.

State le Union territory jousen ama ama nodal authority alhen ding chule atangden nungpui nading dan asem diuvin Ministry in thupeh aneiyin ahi. Ama ama gam a atangden ho nodal authority hon register abol diu ahi. Chule atangden koi tobang state khat a kon state khat a che ding aumle ahin soldoh ho le alhunna ding mun ho kihoutoh a kinoptona aneidiu ahi.

Ache le ho screen kibol ding chule symptoms neilou ho kichejom sah ding ahi. Ajot nau mun alhun teng ule local health authority hon akhol diu, ngaichat ahi loule institutional quarantine hilouva ‘home quarantine’ abol diu ahi. Mijousen ‘Aarogya Setu’ app aman dinga tilkhouna anei uvin ahi. Union Home Secretary in Disaster Management Act noiya National Executive Committee chairperson hina a order asodoh ahi.

Centre sorkar in hitobang thulhuhna anei hi gamdang dang a tangden natong ding ache, simlai, tourist le adang dang lakh a sim dinga lung olna sangtah ahi. Uttar Pradesh, Uttarakhand, Gujarat, Punjab, Assam, Chhattisgarh le Rajasthan gam panna a state tamtah in agam mi mun chom chom a tangden asang a sim bus a apuiyu ahitan, ahivanga tamtah tangden nalai ahi.

Uttar Pradesh, Uttarakhand, Punjab, Assam, Gujarat le Chhattisgarh in Kota, Rajasthan, Punjab a kon simlai atangden ho anungpui ahitai. Rajasthan gam a tangden mi 360 jong Assam gam a kon apuiyu ahitai. Surat, Gujarat gam a tu naicha migrant worker hon kiphinna abol nau thilsoh thumvei um ahitan, agam a anungsol diuva thumna aneiyu ahi.

Bandra, Mumbai a tu masanga jong mihem aja a sim agam a kile dinga ana kikhom u ahi’in, in ajot nadiu train lhaipan ding ahitai, ti thulamleng ajah jeh u ahi. Ahivanga Bihar sorkar in lockdown khoutah a chepi dinga thumna aneiya, miho aum aumnau mun a aumden diuva asei ahi. PM Modi in lockdown aphondoh na a, mipi aum aumna mun a phatah a aum diuva asei ahi.

Lockdown masa a mi tamtah Delhi, Mumbai le Hyderabad kiti khopi ho a kon agam a kile dinga keng a anache uva, hiche jeh a Home Ministry in migrant ho chedoh ding phalpeh loudinga thuhilna aneiya, amaho dinga ‘shelter’ agonpeh uva chule neh le chah apeh dinga thuhilna anei ahi. State hon hiche a dinga National Disaster Response Fund amanthei dinga jong phalna apeh u ahi. Maharashtra gam a truck container sunga Telangana a kon Rajasthan jon jong umlo ahi.

Sorkar in ‘industrial activity’ ho phal dinga phatsahna anei ahitan, mall, restaurant, ju kijohna, parlour ho tilou thil khoh kijohna dukan hojong thinglhang gam a hon dinga aphal ahitai. Lockdown hi PM Modi in March 24 nikho a aphondoh a, May nisim 3 chan asuhsaobe u ahi.

Manipur Bhawan Guwahati a tangden ho puidoh ding a Bus kisol

Imphal, April 29(ET): Additional Director & Spokesperson Health Department, Manipur in aseina achun Manipur Bhawan Guwahati a tangden mi 84 ho puidoh dingin tuni chun Imphal akon Bus 4 aki soldoh tai ati.

Amaho chu May 1 leh Imphal hung lhung ding ahiuvin Mao a checking kibol ding ahi in natna vei hiding a ginmo ho chu RIMS ahiloule JNIMS a kisol lutpai jeng ding ahi ati. Chule adang ho chu Govt. in Quarantine centre a agon namun a test bolding a kipui ding ahi in Negative ho chu Home Quarantine ding akisoldoh bep ding ahi ati.

Thunei vaihom them phabep in Chingkheiching Reserved Forest lo ding go

Imphal, April 29(ET): Thunei vaihomna choiya mi phabep in Sawombung Range, Central Forest Division noiya um Chingkheiching Reserved Forest, Tera Chingphei a mun phabep jingkah a alhou theng uvin ahi.

Thulhut dungjuiya, hiche bol hohi thunei vaihom chule boltheina neiho ahiuvin, Reserved Forest gam a mol hi tractor a alho uva, me lei bolna dinga asem u ahi. Top Dusara Gram Panchayat a kon 2018 kum a ‘plantation’ natoh ana bol hou vetsahna/tahlangna anei uva, det tah a akisem u ahi. Forest Department thulhut dungjuiya, achesa phat ho a mi phabep in Chingkheiching Reserved Forest hiche kahlah a hi lamlen sah ding agot uva, Reserved Forest gam phabep hi lahdoh a lamlen a asem got u ahi.

Ahivanga vengsung club le Forest field staff hon aphatcha pan alah jeh a, dan dihlouva hitobang tohgon umho asuhtang u ahi. Forest Department, Manipur government in Chief Minister lamkaina chule local NGO, gam ngailutna nei ho, club le civil organization chom chom tosotna a Reserved Forest, Protected Forest chule gamsunga um gammang ho huhna dinga pan sangtah anei laitah uva, thunei vaihom a mi phabep in hitobang a dan dihlouva na atoh jom hi vangset umtah ahi.

Reserved Forest hi gamsung mipi a ahi’in, adih lou bol hon amin a akisem doh nading uva Revenue Department a field staff phabep in akithopi got uva, government record amaho phatchomna a khel got uhi dan dihlou le vangset umtah thilsoh ahi. Range Officer Office, Sawombung Range a hiche toh kisaiya case jihlut ahitan chule dan dihlouva thil bol ho akihetdoh nading chule dan dungjuiya ‘book’ bol nadinga thukholna kipan ahitai.

Imphal khopi sunga Inn bahara a umhon State government in bahara apeh peh diuva ngeh-u

Imphal, April 29(ET): Hill Tribal Tenants’ Committee Imphal (HTTCI) hon Chief Minister heng a Memorandum apehlut nauva chun phaicham sung a in bahara a umho a innei ten umman pehding a ano jeh uvin gentheina akibelap in chule lockdown sung a na kitong theilou ahitoh sum muna jong duhdah lou chule nehleh chah ding jong kisuto nah nah ahijeh in gentheina lentah ato thu asei uvin hiche hi state government in thinglhang mi phaicham a in bahara a umho March leh April lha umman apehpih diuvin ngehna abol uvin ahi. Hiche memorandum chu Chief Secretary, Additional Chief Secretary of Relief & Disaster Management, Additional Chief Secretary of Tribal Affairs & Hills, Government of Manipur heng ajong apelut uvin ahi. HTTCI ho seidan in imphal khopi sung a thinglhangmi bahara a cheng 28-04-2020 chan a record umdan in chenna in 5552 tobang um ahidan asei uvin ahi.

Manipur Shiv Sena hon Myanmar thil abon a ‘Ban’ bol dinga sorkar henga ngehna nei

Imphal, April 29(ET): Manipur state Shive Sena in Myanmar gam a kon kipo a thil ho abon a ‘Ban’ bol dinga sorkar henga temna anei uvin ahi.

“Myanmar gam a kon hung kipolut thil jouse hi Manipur gam a ‘Ban’ bol ding ahi”, tin Shiv Sena president M Tombi in Imphal khopi a April 29 ni a thuso miho akimupi na a aseiyin ahi. State sorkar in May nisim 3 jouteng Lockdown ‘Relaxation guidelines’ thu seikhom nadinga ‘all party meeting’ bol dinga state sorkar henga temna anei ahi.

Achesa phat ho a gamsung in plastic a kisem anchang, ahtui le mihem adeh a chapang tahsa tongkha thei thil phalou nehthei ho a atokhah ahitai. Thil atamjo hi Myanmar gamgi a kon hung kipolut ahi’in, hiche ho peldoh nadinga Myanmar gam a kon thil kipolut jouse hi kha ding ahi, tin Tombi in aseiyin ahi.

“Dum chep nom aumle India gam a kisem dum chep uhen lang paan ne uhen. Myanmar thil hohi ipijeh a mihon adei ham. Coronavirus achal ding idei louvu le Myanmar gam a kon thil kipolut ho man tahloud ing ahi”, ati. Medical staff chule frontline worker hon pontho tah a pan alahna jal a state sorkar in Manipur gam hi Coronavirus nat beina gam a kiphongdoh ahitai.

Mipi ngaichat bulhit nadinga, state sorkar in May 3 chan hi ‘lockdown’ (partial) achepi ahi’in, May jouteng itobang pan lah ding ham ti sorkar in asem ding ahi, ati. State sorkar in political party jouse toh May nisim 3 jouteng meeting akou dinga temna aneibe in ahi.

Jiribam-Imphal Rail line a ‘Girders’ hondohna neitau

Imphal, April 29: Northeast Frontier Railway (NFR) in Barak vadung a 555m lhing a sao chule 100 m val a sang Rail bridge juiya ‘web steel girder’ lolhingtah a hondohna anei tauvin, Tamenglong district a Jiribam-Imphal Railway line noi ahi.

National project a phondohna um hiche hi Manipur le gam dang dang train a akijot to nathei ding ahi’in, gamsung dinga kalson be na lentah ahi. Hiche toh kilhon a Manipur hi Indian Railway map a pang vahding ahitai. “Manipur le gam dang dang railway network a kijot to nathei ding hi machalna lentah ahi”, tin NFR in aseiyin ahi.

Jiribam-Tupul-Imphal juiya rail line project masapen ‘broad gauge line’, Manipur hi 2008 kum a dangka crore 13,809 lut a kipe ahi’in, Tamenglong district a Barak vadung a kisa rail bridge hi India gam a dinga asang pen ahi. Thulhut dungjuiya, lei hi 141m a sang ahi’in, Delhi khopi a um Qutub Minar sanga ajat ni a sangjo ahi.

Jiribam a kon Imphal kikah 111 k lhing railway line hin thinglhang gam hahsa ajot ding ahijeh a tunnel le lei tamtah ajot pa ding ahi. Railway Ministry in agom a tunnel 52 asah ding, rail line project thah a dinga lei 149 um ahi’in, hiche lah a asaopen hi 10.28 km ahi. National rail transporter in operation phatah a achelhah theina dinga railway station 10 vel asem ding ahi.

Indian Institute of Technology (IIT) thum- IIT Kanpur, IIT Roorkee le IIT Guwahati hi national railway project a ‘technical support’ dinga alah u ahi.

Gamsunga ‘license’ neilou hon sa ajoh theilou dinga IMC hon ‘drive’ abol dinga sorkar in thupeh nei

Imphal, April 29(ET): Imphal Municipal Cooperation a Municipal Commission in ‘drive’ abol a, license beiya koiman sa ajoh theilou nadinga pan alah a chule license neina dinga dan kisem ho bukim keiya kijui hinam ti vetup dinga state sorkar in thuhilna aneiyin ahi.

Covid-19 pandemic jeh a state sorkar in dan ho khoutah a akijui tei nadinga pan alah ahi. Principal Secretary (MAHUD) Rakesh Ranjan in thuso aneina a,state sorkar in October 26, 1988 kum a notification asodoh ‘Sale of Meat By-Laws, 1987’ a hi sa joh nom ho license akipeh masanga ajui diu dan phabep kisem ahi.

Sa kijohna dukan hohi bang phatah a get ding, chule thousi thouvai alut theilou nading box ahiloule phatah a kisem thil a koiding a ‘Sale of Meat By-Laws, 1987’ a kisei ahi. Sa kijohna dukan hohi chenna ding mun ahiloule nehthei nehna (akijohna) mun a kimang theilou ding chule atena (scale), chem chule adang dang ho phatah a sop dinga jong kisei ahi.

Natna kilason to thei ahiloule hitobang natna nei vil ho sa kijohna room a natoh sah louding chule dukan sunga midang alut ding (natna nei ahi kihe) ho lutsah loudinga jong dan um ahi. Dukan mun a sa kithat theilou ding chule joh dinga kikoi sa hohi licensed neiya sa kithana mun a kon a bou kila ding chule licensing authority hon apehnau mun a sa kithat hiding, sa hi veterinary department in angaicha ‘fitness certificate’ apeh hiding ahi.

By-Laws noiya um S. 12 a dan kisem hotoh kitoh louva thilbol aumle action kila ding ahi. Akisei dan ho toh kisaiya ‘Action Taken Report’ hohi Monday niseh nilhah nidan 4 kah a thon louva sorkar henga pehlut ding ahi’in, May nisim 4 nikho a kon kipan ding ahi, tin aseibe in ahi.

CAF&PD official ni kibuluna Heibok Oil Pump kha dinga HRI in ngehna nei

Imphal, April 29(ET): Petrol Pump neikhat in ‘inspection duty’ a che CAF & PD official ni avoh nau thilsoh chunga Human Rights Initiative in themmona neiho gotna peh a chule M/S Heibok Oil Pump, Chandranadi Toupokpi kha dinga thumna anei uvin, khonung a hitobang thilsoh alhun kit louna ding ahi, tin asei uvin ahi.

HRI in thuso aneina a, vangsetna toh Haobam Bobby, Civil Supply Inspector le Leimapokpam Ibotombi Singh, Area Officer hi M/S Heibok Oil Pump neipa in achesa April nisim 17 jan nidan 9.30 don a oil pump mun a curfew phatah a kichepi hinam ti khol a che teni ana voh ahi. Counter light akihon mu a official tenin counter sunga umpa- Laishram Surjit in dan ajui dinga temna anei lhon a, chule CAF&PD department a kon kahi, tia aseilhon ahi.

Ahivanga, sei ngai louva Petrol pump neipa anaopa Surjit hin meithal neo akichoiya, counter a kon hungdoh a, ajeh sei louva official teni abulu ahi. Chomkhat jouva pump neipa Laishram Suresh, Chajing Konjeng Leikai jong che a official teni vo a anaopa akithopi joh a, official tenin avel vel a OD proof le lekha dang dang avetsah vanga avoh u ahi.

Thilsoh a H Bobby anah lhong le akeng veiling kisukha a chule L Ibotombi amai le alu akisuhkhah ahi. Bobby hi Padma Medicare, RIMS road a kijen ahi. Thilsoh Human Rights Initiative hon demna sangtah anei uvin, official ho natoh suboiya, lockdown sunga thal kichoi a mi vo a chule gihna neiho gotna peh dinga thumna anei uvin ahi.

State sorkar, adeh a Home Department in duty bol official ho venna apeh a, chule themmona neiho dan dungjuiya gotna apeh dinga organization in temna aneiyin chule Chandranadi Toupokpi a um M/S Heibok Oil Pump kha dinga jong ngehna anei uvin ahi. Gamsung pumpi lockdown akibol sunga hitobang dei umlou thilsoh dang dang jong aume, tin HRI in aseiyin chule sorkar le mopohna nei department hon adih louva thil kibol ho avetkol diuva aseibe uvin ahi.

Akisukha staff ho HRI in apohnat hu nau thu asei uvin chule official teni gangtah a adamdoh ding adeisahna thu jong aseibe uvin ahi.

 

Minister Biswajit in Union Minister Tomar henga NREGA, DDU-GKY lolhinna ho thu sei; kipathu phong

Imphal, April 29(ET): Rural Development and Panchayati Raj Minister Thongam Biswajit Singh in Wednesday nikhon Panchayati Raj in Mahatma Gandhi National Rural Employment Guarantee Scheme noiya aphatcha fund asodoh jeh a kipathu aseiyin ahi.

Government spokesperson jong hi a Minister pa in Rural Development, Panchayati Raj le Agriculture & Farming Welfare Minister Narendra Singh Tomar toh ‘video-conferencing’ a kihouna aneina a kipathu asei ahi. Prime Minister le Chief Minister lamkaina a Manipur gam hi COVID nat beina state hijou ahi, tin aseiyin chule state in dan (guidelines) ho ajuiya thil ho phatah a kipolut thei ahi, ati.

Central Ministry in MGNREGS phatsahna aneiya chule fund ho amat na thei pen a apehdoh thei jeh a Minister pa in kipathu aseiyin, Manipur gam a um district jouse a MGNREGS phatah a kichepi pan kit a, chule centre sorkar in dan asem natohna mun a ‘social distancing’ juiding ati ho panna a dan ho khoutah a ajui ahi, ati.

Achesa 2018-19 kum a gamsung in 100 Person Days, 160 PD amu jou ahi, tin MGNREGS kichepina a lolhinna ho thu aseiyin, 2021-22 kum a 400 PD tupna um ahi, ati. PMAY(G) kichepi chungchang a Biswajit in 2019-20 kum a 8900 unit phatsahna aneiya chule 2020-21 kum a 15824 unit aphatsah ahi, tin aseiyin chule scheme a dinga installation masapen asodoh a, state in aganna thei pen a natoh apat thei nadinga ngehna jong aneiyin ahi.

PMAY(G) noiya unit a dinga registration process jong gamsunga kijou ahitan, state len jo jo adang hotoh tekah dinga gamsunga unit phatsahna kinei hi lhomcha bou ahi’in, Ministry in fund khatvei peh a apeh theidinga ahile state in scheme aganna thei pen a ajoding ahi, tihi tahsanna kaneiyin, hiche hi sorkar tohdoh lentah hiding ahi, ati.

Manipur State Rural Livelihood Mission noiya state in kho 284 hop Gram Panchayat 150 a Self Help Group (SHG) 197 asemdoh a natoh 80 apat ahi, tin Biswajit in aseiyin chule schem noiya agom a in 22,769 um ahi, ati. COVID-19 chungchang a akisei SHG hohin mask semna chule government office le mipi henga ajohna a akithopi u ahi, ati.

Deen Dayal Upadhyaya Grameen Kaushalya Yojana jong kituptah a kichepi ahi, tin Union Minister henga aseiyin, khangthah 10,262 kichuhna peh dinga tupna um ahi, ati. Scheme noiya trade chom chom a khangthah 2,221 kichuhna kipe a, hiche lah a 1347 natoh kipe ahi, tin aseibe in ahi. Video conference a Additional Chief Secretary MH Khan chule RD&PR official hojong apang uvin ahi.

Video conference a hi Goa, Manipur, Meghalaya, Nagaland, Sikkim, Tripura, Uttarakhand, Andaman and Nicobar, Dadar Naga Havelli, Daman and Diu, Lakshwadeep chule Puducherry a mopohna nei Minister hojong pang ahi.