Gam 193 a Covid-19 case million 2.3 val kisei; Nat a thi...

Gam 193 a Covid-19 case million 2.3 val kisei; Nat a thi agom a 159,033 lhingta; Vangsetna toh atam napen US gam hijing nalai

72
0
SHARE

Gam 193 a Covid-19 case million 2.3 val kisei; Nat a thi agom a 159,033 lhingta; Vangsetna toh atam napen US gam hijing nalai

New Delhi, April 18: Coronavirus Covid-19 jeh a Saturday nikho chan a thina toh hi vannoi pumpi a mi 159,033 alhingtai, tin AFP in official thulhut amu dungjuiya asei uvin ahi.

Gam (country) 193 a hiche case photchenna kinei hi 2,313,897 val ahitan, hiche lah a 591,297 hi kijen dam ahi.

India gam a adamlou 2,463 kijen dam a kisol doh ahitan, gamdang mikhat jong agam a kile a chule mi 521 thi ahi, tia Lav Aggarwal, Joint Secretary, Ministry of Health and Family Welfare in aseiya chule COVID-19 mortality rate hi India gam a 3.3 per cent ahi, ati ahi.

“Akum dungjuiya lhekhen dinga kum 0-45 kikah 14.4 per cent thi a, kum 45-60 kikah vel mi 10.3 percent in thina ato a, kum 60 le 75 kikah mithi hi 33.1 percent hiya chule kum 75 le achunglang mi 42.2 percent thi ahi”, ati.

Defence Minister Rajnath Singh lamkaina a Group of Ministers (GoM) in meeting abol nauva gamsung miho hahsatna suh ol nading lampi aseikhom uvin ahi. GoM in mopohna nei ministry hon April 20 a kon ‘non-hotspot zone’ ho a ‘economic activity’ phabep lha ong ding agot thu ujong velvetna anei uvin ahi. Defence Minister lamkaina a GoM meeting nga vei channa ahitai.

Vannoi pumpi a coronavirus jeh a thi Friday nikho a 1,50,000 val ahitan, alangkhat a China in natna chungchang a thu aselguh aume tia US President Donald Trump in ngohna anei ahi. “Mihem billion 4.5  val inmun a vahdoh louva aumjeh a natna achal hi kivetup jou jep ahi. Gam 193 a Covid-19 case million 2.3 val kisei ahitan, US gam a natna nei mi 728,293 hiya, natna jeh a thi 38,244 lhing a,  vangsetna toh sangpen gam hiu ahi.

“Vannoiyin thakhat a COVID-19 adoukhom ahi’in, pandemic chunga goljona umtei ding ahi”, tin PM Modi in Twitter a aseiyin ahi. Indian Navy a sailor (natong) mi 26 jong Mumbai khopi a natna aneiyu photchenna um ahitai. INS Angre, Western Naval Command a um personnel ho hiu ahi’in, INHS Ashwiniin Mumbai naval hospital a quarantined abol u ahitai.

Chule nat kisei pat na China gam a coronavirus case athah 27 kiseiya, 1,566 lhing kit ahitan chule natna jeh a thi mi 4,632 lhing ahitai, tin National Health Commission (NHC) official hon asei uvin ahi. India in tukal sunga Domican Republic (DR), Caribbean a HCQ louchang 200,000 athot doh jouvu ahitan, April nisim 15 nikho a Delhi-Mumbai a kon Blue Dard Flight a athot u ahi.

India gam a April nisim 1 nikho a kon COVID-19 case hi amasang a toh tekah dinga 40% a nemsuh ahi. Centre in ‘social distancing’ le lockdown’ kikoi hi aphachom e, tia asei ahi. US gam a case kisei chule natna jeh a thi tampen ahitai, tia Baltimore a um University in asei ahi.

US a COVID-19 natna jeh a mi 38,000 val athi a chule niseh a natna jeh a athi kisei atam vanga US in agamsung a natna akisei louna chule mihem alhom chenna mun a sumkol veina ahondoh pan u ahitan, President Trump in ‘phase thum lhing guideline’ asem noiya hondohna aneiyu ahi.

Manipur a Covid-19 case ani channa pa result Negative hita

Imphal, April 18(ET): Covid-19 Common Control room akon thulhut kimu in aseina achun Manipur gamsung a ding a covid-19 vei ani channa pa chu RIMS hospital a kijen jing ahitoh lhon in tuni chun a test result Negative in ahung sohdoh tan ahi. Thulhut in aseibena achun a result chu RIMS leh JNIMS hospital a VRDL a test kibol ahi in negative in ahung sohdoh tan aban ki test na a Negative ahi kit leh hospital akon inmun a kijen ding a kisoldoh ding ahitai ati. Hetthei khat chu ama pa hi Lilong Haoreibi a cheng ahi in Delhi a Muslim ho khompi a aga jaona aa hin veikhah ahi.

In ahung kinungle jou chun ahung dammo pan tan Porompat Muslim road a um Peace Hospital and Research Institute ah March 20 ni chun ana ki admit in March 22 ni chun RIMS ana lut in ahi. Aki jen masat na hospital a staff 18 ho jong quarantined aki bolsoh kei uvin sample jong test abol soh kei uvin abon in negative ahiu vin ahi. March 11 nikho a Air Asia flight a ahin toukhompi ho jouse jong a result uh negative ahisoh kei in ahi.

Manipur gamsung a ding a Covid-19 vei masapen hiding a kihedoh Thangmeiband a cheng khangthah nu jong April 12 nikho chun JNIMS akon in mun a kijen ding in ana kilhadoh tan ama nu chu UK akon hung ahi. Common Control room thuso in aseibena achun RIMS leh JNIMS hospital ah emergency service akihong jing in Dialysis service jong aki hong jing in in hinlah a khohbeh louho hospital lhut khel khel ngai lou in mun a jendam thei chan jen ding ahi dan jong asei in ahi. Chief Secretary in review meeting abolna achun State Health Department hon natna douna ding a pan alahna chung uva kipathu sangtha in aphong in ahi.

State Surveillance Officer, IDSP, Manipur in aseina achun JNIMS hospital a sample 18 test akibol kit toh lhon in tuhin Manipur gamsung a Covid-19 natvei aum tapon tuhin Home Quarantine leh Government Quarantine a mi 5969 aum uvin amauho lah ahin mi 5861 ho chu gampam akon hunglut ahiuvin mi 12 chu foreign gam akon ahiuve. Tuhin Home quarantine leh Govt. quarantine a um akigom in mi 507 hon aum ding phat sung uh achai tah jeh un lha ong ahi tauve. Tuni chun Mao gate leh Jiribam akon gampam mi 206 leh 114 ahung lut uvin abon uvin screening akibl sohkei un ahi. Moreh, Behiang, Sinzawl, Tusom leh Kamjong akon koima ahunglut thulhut akijapon ahi. Tuni chan in gampam akon Manipur gamsung hunglut mi 1,92,335 screening aki bol tan ahi.

 

NE gam mihon kibungkhenna ato thu a ATSUM in PM Modi henga memorandum pe; ‘Racism’ douna a Brand Ambassador lhen dinga temna neiyu

Imphal, April 18(ET): All Tribal Students’ Union Manipur (ATSUM) in North East gam mihon khopi mun chom chom a umho kithetna le kisuhgentheina ato thu a Prime Minister Narendra Modi henga memorandum apelut uvin chule ‘Racism’ douna a Brand Ambassadors alhen diuvin temna anei uvin ahi.

Covid-19 pandemic jeh a vannoi pumpin boina leh hahsatna ato pet a India khopi len len ho a North East gam mi hon coronavirus natna chungchon a jat le nam a kithetna ato hou jong adou kit u ahi, ati. India khopi a um Northeast gam mi atamjo hi ‘semi-skilled’ le ‘unskilled worker’ ahi’in, lha lo asan uhi kivahna a aneiyu ahi. Ahivanga sorkar in lockdown akoi jeh a amaho dinga akihinso natheiyu lampi jong kisutan ahitai.

Vareiyo Shatsang, President, ATSUM le Seiboi Haokip, General Secretary, ATSUM in soi akaina memorandum a Centre le state sorkar in dan asem ho jana kipe a, gamsung miho mopohna gam mi dihtah hina a aum um nauva umden u ahi. Vannoiyin pandemic virus douna a gal asat laiya eiho sopi ho virus lah a aum nau chunga ‘Racism’ jeh a gentheina athoh kit u ahi, ati.

Covid-19 pandemic masanga ‘Chinki’ le ‘Momo’ kiti thucheng hi Northeast gam mi ho ‘mongoloid’ toh akilo jeh uva, amaho chouna a kimang thucheng ahi’in, tua hi melput jeh a gamkai miho hi khopi a cheng hon ‘Corona’ tia akou uva, thetna sangtah aneiyu ahi. Khopi chom chom a hitobang thilsoh aum thu kija ahitan, inmun a kon gamlha tah a umho dinga kipampai na ahi.

Gamsung mi ma ma in Northeast gam miho hitia dihlou tah a abon hi gamkai mi jouse dinga lungnatna ahi. Sorkar in Covid-19 douna dinga abolthei chan abol laiya, ‘racism’ suhmang nadinga jong pan lhingset alah diuvin jong asei uvin ahi.

Northeast gam miho huhna ding chule ‘Racism’ douna dinga Brand Ambassador lhendoh ding chule gamsunga pathen banga kigel Film Star hon pan alah diuvin asei uvin ahi. Racism douna Ambassador dinga film industry a minthang tah tah ho lhenna chule Racism douna a TV a athu hill hang ding pha asah dan u ngaidan asei uvin ahi.

Simlai chule anatohna a kon kihaisah ho sum le pai chule angaicha khoh ho a kithopi dinga jong asei uvin ahi. Private sector a natong tamtah company in anatoh alha sah ahitan chule simlai honjong kihinso nadinga angaicha thil ho kichoh nadinga gentheina ato u ahi. Gamdang a tangden simlai le natong ho kithopi na dinga helpline tamtah akisemdoh vanga hahsatna toh atamjo henga kithopina lhung lou ahi. Hiche jeh a agilkel ho an peh nadinga pan la a state government/NGO/Civil society organization in North East gam mi ho kijahto pi nadinga alhen diuva temna kinei ahi, tin memorandum a aseibe uvin ahi.

Gamdang a tangden mi 12,000 val sorkar in sum thot ta

Imphal, April 18(ET): State sorkar in gamsung mun chom chom a tangden gam mi (Manipur miho) khatvei kithopina peh dinga thulhuhna anei jouva BJP lamkaina sorkar in tuchan geiya mi 12,561 account a dangka 2000 cheh athot ahitai.

https://tengbang.in/ a registered kibol mi 16,172 lah a verification akibol jouva mi 12,561 bank account a dangka 2000 cheh athot u ahitan, adang avat hojong sorkar in kithopina apeh ding ahi.

COVID-19 jeh a jail a um mi 69 lhathum ‘parole’ a lhadoh tau

Imphal, April 18(ET): Supreme Court thupeh dungjuiya gamsung in songkul a um agom a mi 69 alhadoh tauvin, hiche holah a hi Sajiwa Jail a um mi 64 le Central Jail, Imphal a um mi 5 pang ahi.

Songkul a kihen hohi Manipur Court in High Powered Committee recommendation dungjuiya lhathum Parole a alhadoh ahi’in, Committee hi Justice Kh Nobin Singh chairman hina noi ahi’in, Dr Suresh Babu, IAS, Chief Secretary le P Doungel, IPS, Addl. DGP (Prisons) member a pang ahi.

Akilhadoh ho se hi ama ama mopohna District Police in lockdown aumjeh a ama ama chenna inmun chan athah uve, tin Superintendent of Manipur Central Jail, Sajiwa, S Touthang in aseiyin ahi.

Delhi khopi sung a Manipuri nurse Covid-19 vei nu a result negative hita

New Delhi, April 18: Max hospital, Delhi a covid-19 natvei jeh a kijen Manipur gammi nurse a natong khat chu test nivei akibol chan in a result negative ahi thu thulhut chun aseiyin ahi.Chule achengkhompi a insungmi 9 ho jong test akibol uvin a result uh negative ahisoh kei in ahi. Tuhin Manipur gammi Delhi kho sung a hiche natvei jeh a kijen mi 2 aum nalai uvin ahi. Khat chu Max hospital a kijen nalai ahi in khat chu Cancer hospital Delhi a kijen ahi.

Voter list a jaolou ho jong Anchang amuthei nading uva CM in lampi angaito ding a UPF in ngehna nei

Imphal, April 18: United Peoples’ Front (UPF) Manipur hon Chief Minister N. Biren Singh heng ah voter list a jaolou hon jong govt. in achang ahop ho achanna thei ding uva CM in lampi ngaito ding in ngehna anei uvin ahi. Aseibe nauva chun Constituency sung a MLA hon ahop nauva in bahara a cheng ho achangpha ji pouvin Media mangcha a kithopina tamtah vei asei nung uvin jong phatchomna aum deh pon CM akikum ding in asei un ahi.

Alangkhat ah Grace Colony Langol a cheng numei khat in aseina achun lockdown jeh a akhuo uh ache theilou thu asei in chule akhosung mihon jong aluding aphal peh pouvin chu chungchon ah tua aum nauva nehding jong anei tahlou thu asei in chule achohna ding dukan ho jong akihon lou ban ah sum munathei ding natoh jong aumlou thu asei in ahi.

State Government in potdohna a Mask kitom cheh dinga mipi ho hetsah kit

Imphal, April 18(ET): Special Secretary (Home) Govt. of Manipur in aseina achun achesa tulha April 10 nikho a thuphon kibol toh lhon in koi hileh pamlang a pot hon Mask akitom cheh ding uva kisei chu jui jingding ahi in mask choh ding ngatho sang in inmun  a kisem hijong leh manthei ahi in hiche hi natna akon kiven nading leh natna suhthang louna ding a mask beh teitei ding kiti ahi in mipi hon juicheh a natna akon kiveng leh dou cheh ding in avel in temna aneikit in ahi.

Barak lei setjeh a gari kitangden

Noney, April 18: Thulhut khat in aseina achun nitin ngaichat po Imphal khopi sung lutding truck 20 tobang chu Barak lei aset jeh in Sibilong kho (NH 37) ah aki tangden e ati. Lei a Iron Panel khah aset jeh a tangden ahiuvin chule kho phatlou jeh in semphatna natoh jong achelha jeng theipon hinlah gari neu ho alhai jing e ati.