Gal kou tho hon anehdi mong ahi (Alonaje hung umlou cheh...

Gal kou tho hon anehdi mong ahi (Alonaje hung umlou cheh chehdi)

63
0
SHARE

Gal kou tho hon anehdi mong ahi
 (Alonaje hung umlou cheh chehdi)

Kinahna jeh a boina ham, kipa jeh a kin kibol ham, thina manna ham aumteng koiman ipi covid thu jong ahetphahji lou abah hi covid natna hi kikoutho tina ahi. Hiche hi Manipur sehseh jong hilou, vannoi muntin’a sohjing ahikitne. America a mivom khat police hon anatha khah jeh uva America khopi ho ah mipi kiphinna ana um’a mipi ahonhon/alom chang chang’a kijotna leh police to kijeptona ana um ahi. Hitobang mipi alom lom’a kititkhomna ho umjouva pat America a covid positive case hung hapun dehsetna kisei ahi. Russia khopi Moscow a mipi kititna thupitah ana umvang chu galjona ‘anniversary’ kipana kin thupitah khat anahi, India a kon sepai parade contingent khat jong gajao nalai ahi. Russia a jong hitima chun hiche kin kibol jouvin covid positive case hung hakalbe’a kisei ahi. Bengalore a jong August 11 ni’a mi khat nin Facebook a Muslim ho mah thei thu khat post anaboljeh in mipi alomchang’in analentho jeng’un jankho lhung’in police toh kinotona ananei uvin ipi covid, ipi social distancing thu ana umpoi. Bangalore khopi a jong covid positive case hijaja ahung kalbe e ti chomkhat jouleh ahung kiseidi hetsa ahikite. Eiho gam’a jong covid positive nisehleh tamtah tah akibejing vang’in kin (program/function) hojong akigong jing thou nalaiji’n ipi covid thule social distancing thu aumtheiji poi. Thina manna ahiteng lejong nople da umlouvin mipi themkhat beh kitit khomna aumjing’e. Tua jong Naga Peace Talk hi achaina hung kibol tahbah henlang Manipur phaicham mi ho deilou kinop tona khat hung umleh koi covid thu umlouva mipi alom chang’a moh lentho jengna hung umthei ahikitne. Kivenna ijat umjongleh mipi kititkhomna kiti hi covid natna koutho tobang ahin akou hon aneh diu hijeng ahi. Pel theilou ho thuchuom ahin chomkhat gah khongai thei hovang bolda photna pha ahi.

Imphal a kum 38 police khat covid natna jeh in athi hung kitipan jong hi akumtam jep lang ho bou natna hin ajouve (athhisah e) kiti adihloudan mutheina khat ahitai. Hichepa jong chu natna dang (pneumonia) a dammosa khat ahi vang akiti. Ipi hileh hospital a oxygen lhom jehleh aphatcha a oxygen kipehlou jeh a thi ahi tia jong kisei hi, oxygen hihen doctor hileh akivat tah jeh hithou thou ahi. India pumpia covid dammo ho jenna pang doctor 190 lang thilo u ahitai. Manipur a jong doctor, nurse leh Health worker agom’a mi 30 val lang covid natna akilah u ahitan  mijen di hi kivatpan ahitai. Hiche kahlah hin positive case atambe jing jeh in positive ho atumbeh a kikoina Covid Care Centre (CCC) a-ong mo cheh cheh tai. Adammo khat hospital a kipo jong hospital hon admit bolnom talou hi adammo hon hoilai ajot di hitam tijong lungkham umtah ahi. Police hon mi amat hojong test abol diu angai tah jeh a test abolteng uleh positive hiloi ana umji ahi. Hitobang positive ho jeh a police ho natna kilah khaloi um’a kisei ahi. Gampam’a kon inn hung kile alhom tah jeh a Quarantine Centre hi boina behseh ahitapoi. Tua aboina hi positive niseh a aja a sim akibejing tahjeh a akijenna diu Care Centre hi hung kivat ta, neh le chah gei phate kipejou talou ahi. Covid vaccine akisemdoh tai kiti vanga vannoi mipi dia choh thei ahung hina di hi lha 4/5 beh lut nalai di ahijeh in kivenna lampang gelkhohna aumlouleh dinmun hi hung hahsa jepjep nalaidi ahi.