Frontline a pang nurse khat Covid-19 positive ahi kihedoh, natna nei agom...

Frontline a pang nurse khat Covid-19 positive ahi kihedoh, natna nei agom a 124 lhingta; Manipur mi gampam a tangden mi 22,419 val train 22 a hunglhung ahitai tia CS in sei

69
0
SHARE

Frontline a pang nurse khat Covid-19 positive ahi kihedoh, natna nei agom a 124 lhingta; Manipur mi gampam a tangden mi 22,419 val train 22 a hunglhung ahitai tia CS in sei

Imphal, June 4(ET): Churachandpur district hospital a natong, gamdang a kholjin kha lou nurse khat Novel coronavirus positive ahi’in, kholjin louva natna kilah Manipur a dinga amasapen ahi.

State Health Department in Thursday jan nidan 7 a thuso aneina a VRDL, JNIMS a mi 3 covid 19 positive ahi kihedoh ahi. Kangpokpi district mi kum 30 a upa pasal khat hi Mumbai a kon hung kile ahi’in, kum 22 a upa Imphal East district mikhat hi Delhi a kon hung kile ahi. Churachandpur district mi kum 28 a upa numei khat hi Pune a kon hung ahi’in, train a hung kileu ahi. Abon uva Covid Care Facility, JNIMS a achon u ahitai.

Hiche toh kilhon a gamsunga positive case 124 lhing a chule active case 86 lhing ahitai. Natna a kon mi 38 kijen dam ahitan, recovery rate hi 35.18 percent a kal ahi. COVID 19 control room in thuso anei nauva Thursday sun nidan 11 chan a VRDL, JNIMS a mi 13 (pasal 7 le numei 6) Covid 19 positive ahi kihedoh ahi.

Amaho hi Bishnupur (pasal 1), Chandel (pasal 1), Churachandpur (pasal 1 le numei 1), Kangpokpi (masal 1 chule kum 3 numei chapang khat panna a numei 4), Tamenglong (numei 1) chule Tengnoupal (pasal 3) hiu ahi. Bishnupur le Kangpokpi district mi hohi Mumbai a kon hung kileuva, Chandel le Tamenglong a hohi Delhi a kon hung kileu ahi. Tengnoupal hohi Pune a kon hung kile ahi’in, chule Churachandpur a mikhat hi Chennai a kon hung kile ahi. Chule nurse nu hi kholjin lou ahi. Abon uva Covid Care Facility, JNIMS a achon u ahitan, atahsa dinmun alel aumpoi, tin aseibe uvin ahi.

Assam gam Lamding le Badarpur kikah a railway track (train lampi) go kijom a ju in asuhset jeh a Jiribam railway station, Manipur jon a hung train ho Guwahati chan bou alhai sah tauvin ahi. Chief Secretary J Suresh Babu in asei dungjuiya, go aphat loujeh a train service boi ahi’in, June nisim 2 nikho a Jiribam hung lhung dinga kigong a Chennai a kon mi 1,028 kipohna train Guwahati a ki nga ahi, ati. Chomkhat jouva state sorkar in Assam a kon bus 44 lang hire abol a, train a hung ho gamsung a ahin puilhung u ahi, ati.

Mumbai a kon hung kile mi 1,639 touna train jong June 4 ni a Jiribam hung lhung dinga um ahi’in, Guwahati chan bou alhaisah u ahitai. Amaho poh nadinga state sorkar in Assam a bus 30 chule Imphal a kon bus 23 Wednesday nikho a asol ahitai, tin Chief Secretary thuson aseiyin ahi. Official hon asei dungjuiya, railway track sem phat nading chule Jiribam chan train alhai kit nadinga ni 10 tobang lut ding ahi. Achesa May 13 ni a gam chom chom a tangden gamsung miho train a ahin puidoh pan uva kon Jiribam a train 22 hunglhung ahitan, mi 22,419 val hung lhung ahitai. Chennai a kon train 3, Hyderabad a kon train 3, Delhi a kon train 2, Mumbai a kon train 2, Gujarat a kon train 2, Punjab/Chandigarh/J&K, Goa/MP, Vijayawada, Uttarakhand/Uttar Pradesh, Pune, Kerala, Jaipur le Haryana a kon train khat cheh hunglhung ahi.

Jiribam a natoh lentah vettup nadinga pan la a District administration, Police, Transport, Health chule department dang dang State sorkar in pachatna sangtah anei ahi. Covid 19 test kibol jong sorkar in nikhat a 1400 chan bol thei dinga akalsah ahitai. Tuchan geiya JNIMS le RIMS laboratory a sample 11,653 test kibol ahitan, hiche lah a mi 124 positive hi a, hospital teni a kijen ahi.

Transport Council chule Transport association chom chom, driver le handymen hon atangden mi tamtah poh nadinga pan alah ujong state sorkar in pachatna sangtah anei ahi, tin J Suresh Babu in aseibe in ahi. May nisim 3 chan a, gamsunga institutional quarantine center chom chom a mi 6,353 um ahi. Mi 11,958 hi metro city a kon hung kile ahiuvin, Community quarantine centre a ni 14 um diu ahi.

State sorkar in Institutional Quarantine centre 17 le Community Quarantine Centre 770 ahon ahi.

Bishnupur district ‘Containment zone’ a phondoh ahitai, tia jouthu kithang thudih ahipoi, tia DC in suhthengna nei

Imphal, Jun 4(UNA): Covid 19 positive ahi kihedoh Municipal natong khat in Bishnupur a um JNV Institutional Quarantine centre asuhtheng jouva district a lhangphong tah a ava le akimu jeh a district pumpi ‘containment zone’ a akiphongdoh tai, tia social media a thu kisei thang Deputy Commissioner, Bishnupur in suhthengna aneiyin, thutah ahipoi, tin aseiyin ahi.

DC Neeta Arambam in thuso aneina a, thulamleng ahi’in, abul umlou ahi, ati. District sunga Municipal council chom chom a staff jouse hi quarantine centre sutheng le disinfect bol dinga ache teng ule PPE lhingset a kigon peh ahi. Akisei natong mikhat jong hin protective gear lhingset kibol a duty abol ahi. Amahi amit kom lah anat jeh a inmun a akichol nading phat akipe e, tia Chairperson, Bishnupur Municipal Council in asei ahi’in, hiche jeh a thulamleng kipan himaithei ahi.

Thulamleng ho suhtheng nadinga District Administration in mipa hi test akibol dinga thuhilna aneiya, tuni a kibol ding ahi, ati. Test kibol loulai mikhat social media a positive ahi tia akiseiya, insung mi le ama chungchang jouthu akisei hi dihlou tah ahi. Covid 19 toh kisaiya jouthu seithang aumle Section 54, Disaster Management Act, 2005 noiya gotna kipe thei ahi, tin thuso chun aseibe in ahi.

Covid-19 toh kisai jou thu seithang mikhat police hon man

Imphal, Jun 4(ET): Social media Facebook a jouthu akitahdoh jouva Bishnupur Police station a kon police team hon Thursday nikhon Lairikyengbam Makha Leikai, Imphal East a konin mikhat aman tauvin ahi.

Akiman mipa hi Pheiroijam Kripa Meister (53), s/o (L) Ph. Krishna Meetei, Nongada Awang Leikai, Imphal East a cheng ahi. Police thulhut dungjuiya, akiman mipa hin Luwangcha Pheiroijam Pareihanba kiti account a Municipal worker khat Covid 19 positive ahi akihetdoh jouva Bishnupur district abon a ‘containment zone’ dinga phondoh ahitai, tia jou thu chule abul umlou thu atahdoh ahi.

Jou thu hi akiseithang jouva mipi lah a kichatna le lung boina asodoh jeh a Bishnupur Police Station team hon OC, Bishnupur lamkaina chule Cyber Crime Unit, Imphal West kithopina a apet pet a athu akhol uva, thu tahdoh pa hi Pheiroijam Kripa Meister ahi ahetdoh u ahi, tin thulhut in aseibe in ahi.

Mipa hi in bahara a aumna Lairikyengbam Makha Leikai, Imphal East a kon anikho ma ma a amat uva, mopohna nei police station in angaicha action ho alah ahi.

JNIMS Covid Ward Management Committee in Covid Care Bed 100 a kalsah dinga kilolna nei

Imphal, June 4(ET): JNIMS Covid Ward Management Committee in June nisim 3 nilhah nidan 4.30 a A-Block a Covid thu toh kisaiya JNIMS Director lamkaina a ’emergency meeting’ abol uvin ahi.

JNIMS hospital a Covid natna nei atam cheh cheh chungchang thu ahi. MS. Addl MS DD(A) DD(F), Dy. MS, Covid Ward Management Committee member ho kihouna a apang uvin, gamsunga Covid 19 case atam cheh cheh jeh a Covid 19 Ward a adamlou ho kijen nading lupna ngaichat ahi/kalsah angai dan thu asei khom uvin, kilol lhahna jong anei uvin ahi. Tua JNIMS Hospital a Covid Care Bed (Covid ward 40 le Covid ICU 10) umhi 100 (Covid ward 90 le Covid ICU 10) a kalsah dinga kihouna anei nauva kilolna anei uvin ahi.

Pahcha le Khamen kichep nopna a nei khangthah 7 police hon man

Imphal, Jun 4(UNA): Bishnupur District hopsung a um Kangmong a khangthah 7 hon pahcha Marigold le Khamen ho kichep nopna a amanjeh uvin Nambol Police hon tuni chun ana mandoh tauvin ahi. Akiman ho chu Longjam Othello Meitei (24), Naorem Somorjit Singh (24), Sorokhaibam Leishemba Meitei (19), Khaidem Malemnganba Meitei (22), Nongmaithem Robertjain Singh (20), Laishram Kumarjit Singh (23), le Naorem Dipinchandra Meitei (21) ho ahiuvin abon uvin Heigrujam Maning Leikai, Imphal West akon ahiuvin ahi.

Police thuso in aseina achun athilbol hou chu social media a athang in amauho matdohna ding in Imphal west cyber crime hotoh kitho in khangthah honchu a inmun cheh uva kon aga kimandoh e ati. Nambol police station a case khat joh akijihlut tan ahi. Pahcha asuhset nau chu Irengbam Maniyai Singh (48) honsung ahi in chule lampi pang a tomato kikoikhom ho chung a akichom lut uvin ahi. Social Media a kithethang video mujousen demna anei uvin achung uva akitopi action lading in jong asei uvin ahi.

Custom officer khat in ‘deposit’ sum lahdoh nadinga Dk. lakh 1 athumna video social media a kithang

Imphal, June 4(ET): Custom officer khat in Asst/Deputy Commissioner Customs Division, Chingmeirong office a che Advocate khat kom a cha don nading dangka lakh khat athumna camera a akiman doh in ahi. Gari kimat jeh a deposit kibol sum kilahdoh nading thu toh kisai ahi.

Thilsoh umchan abon a advocate Chongtham Victor in ama ID Victor Khaba a atahdoh a, social networking site a mutheiya um ahi. Video a hi Customs Division office a official khat in, ‘Gari lhadoh nadinga mi jousen kholsa ding sum apeh ngai ahi”, tia asei kija ahi. Thuso mihon advocate Chongtham Victor akihoupi nauva aman jong Custom officer Mohammad Abdul Hassan, Inspector in ama associate lawyer Amom Malemsemba henga sum lhangphong tah a athum ahi, ati.

Thilsoh umchan hi Advocate Amom Malemsemba in video a alahdoh a chule Victor in Facebook a upload abol ahi. Custom Inspector pa hin Malemsemba henga lim alah lou dinga jong asei ahi. Bus (regd. No. MN04P-0627) hi custom official hon lha phabep masanga sana phabep toh amat tha ahi. Hiche jouva dan dungjuiya dangka lakh 10 custom office a deposit abol u ahi’in, hiche lah a dangka lakh 5 hi kah dinga kisei ahi, tin Victor in aseibe in ahi.

Achesa Wednesday ni a Advocate Malemsemba jong nilhah nidan 3 don a Custom Division office a ache leh, refund bol ding sum a kon Custom Inspector in dangka lakh khat apeh dinga asei ahi. Video a hi Custom Inspector pa le advocate Malemsemba sangtah a akinel kal na lhon kimu ahi. Ipijeh a dangka lakh khat athum ham tia adoh le Custom officer pa injong gari kilhadoh nadinga mijousen sum apeh ahi, tia adonbut ahi.

Quarantine centre a um drug addict ho phatah a akivetsui lou jeh a ‘expert’ hon alungkhamna thu sei

Imphal, June 4(ET): Khamnathei lou chule ju addict hi ho kibol dan chule Pheiyeng Community Quarantine centre a kal masa Wednesday nikho a mi phabep akimat thu a ‘expert’ hon alung lhai lounau thu asei uvin ahi.

Phaiyeng Quarantine centre (tua Don Bosco School in abol) gate kom a volunteer hon mi 2 aman uvin police khut a apedoh tauve, tia thulhut um ahi’in, Covid 19 dan dungjuiya ni 14 ‘community quarantine centre’ a um mi phabep drugs apeh got nauva kiman ahi, tia thulhut in asei ahi. North East Affairs a Shapam Lalit, spokesperson, Apunba Drug Rehabilitation Forum hon thu asei nauva, quarantine centre a khamnathei bol mi 4 aum thu kajah u ahitan, amaho hi centre volunteer hon phatah a ajen u hinam ti kahe pouve, ati.

Hospital a damlou kijen hotoh khamnathei bol ho kijen dan hi kibang lou ahi. Amaho hi khohsahna hatah a peh ngai ahi’in, ahiloule atahsa le alungput sangtah a atohkhah ahi. Alungthim boina asan a ahile angaicha lou boina sohthei, hiche jeh a centre a kon jamdoh uva, chule ama le ama kitha na chan gei thilsoh jong lhungthei ahi, tin Lalit in aseiyin ahi.

Holistic Vista Substance Use Disorder Treatment Care chief functionary le addiction expert jong hi a Lalit in, khamnathei bol hon khamnathei amu lou uva ahile Covid 19 guideliens ajui lou maitheiyu, hiche jeh a society boina moh sodoh thei ahi, tin aseiyin chule state sorkar in quarantine centre a um khamnathei bol ho dinga dan phatah asem diuvin temna jong aneiyin ahi.

Khamnathei pe (supply) a mi 2 akimat thu, Pheiyeng Gram Panchayat Pradhan Angom Shyamashakhi in photchenna aneiyin, centre a khamnathei bol mi 4 aumhi vangset umtah ahi’in, achombeh a treatment peh ngai ahi, ati. Khamnathei bol hihen lang hihih jong le centre a kon kinodoh theilou ahi. Chule aumna diu ni 14 sunga thilsoh aumle koiyin mopohna apoh ding ham? Amaho dinga hi state sorkar in achombet a unit agon peh ding ahi, tin aseibe in ahi.

Minister Jayantakumar in Kamjong le Kangpokpi district a ding Ambulance 2 cheh pehdohna nei; Covid 19 douna dinga sorkar in bolthei chan abol ahi, tia sei

Imphal, June 4(ET): Health & Family Welfare Minister L. Jayantakumar Singh gamsunga Covid 19 pandemic douna ding chule natna akilahson to louna dinga state sorkar in bol thei chan abol ahi, tin aseiyin ahi.

Medical Directorate office, Lamphelpat, Imphal a Kamjong le Kangpokpi district a ding Ambulance pehdoh na kin aman nauva Minister Jayantakumar in tua sorkar hin gamsung miho boina ahetpeh e, tin aseiyin chule mipin thumna anei jouse bulhit nadinga sorkar in ‘management’ a lhahsamna ato ahi, ati. Hijong le Covid 19 toh kisai boina thah ho suhlhap ding hi sorkar in akhohsah pen ahi, tin aseiyin ahi.

Second phase a Kamjong le Kangpokpi a dinga ambulance ni cheh pehdohna um ahi’in, district adang ho a jong hop ding ambulance adang um nalai ahi, ati. Hiche hi adeh a thinglhang district a um district health department in boina anei ho asuh ol jep nading ahi, tin ati. Health staff hon tomngai tah a na atoh diuvin temna aneiyin chule Covid douna a pan la a frontline worker ho apachatna thu jong aseiyin ahi.

Covid 19 natna nei atam cheh cheh jeh a UNACO School, Meitram, Imphal West hi lupna 100 umna Covid 19 hospital a khel dinga kigotna um ahitai, tin aseibe in ahi. Phungyar MLA K Leishio injong ahoulimna a, Kamjong district hi athah a kisemdoh district ahijeh a Myanmar gamgi a um akhangtou lou district khat ahi, ati. Kamjong district mihon lamlen phalou chule thinglhang mun hahsa ahijeh a che le va le na a hahsatna tamtah ato ahi’in, hiche jeh a District Hospital lhingset (full-fledge) le police station Kamjong  sem doh ngai ahi, ati.

Minister Jayantakumar in Ambulance apeh uva chule Kamjong Primary Health Centre tua Community Health Centre a akhel jeh a apachatna thu aseibe in ahi. Kin gon a Health Director, Dr K Rajo Singh, Additional Director ho le Deputy Director ho chule Medical directorate health staff hojong apang uvin ahi.

India a Covid-19 case thah 9,304 kimube; thina toh mi 6,075 phata

New Delhi, June 4: India a nikha sung’a Coronavirus case kimudoh sangpen ding in Thursday ni chun case athah 9,304 akimube tohlhon in tuhin agom a case 2,16,919 phatan chule thina toh athah a mi 260 aumbe tohlhon in 6075 aphatai tin Union Health Minister in thuphon aneiyin ahi.

India hi tuhin vannoiya Covid-19 case kisei tamna US, Brazil, Russia, UK, Spain le Italy gamho ban’a sagi (7) channan apang in ahi.

Helth Ministry thuphon in aseina a tuhin India sung’a covid-19 natna jeha kijen (active case) 1,06,737 aum in chule natna akon damdoh/akijendam mi 1,04,106 ahi’n recovery rate hi 47.99 in akal e tin senior official thuphon in aseiyin ahi.

Wenedsay jingkah akon thina toh mi 260 hohi Maharashtra akon mi 122, Delhi a 50, Gujarat a 30, Tamil Nadu a 11, West Bengal a 10, Madhya Pradesh, Uttar Pradesh le Telangana a mi 7 cheh, Rajasthan a 6, Andhra Pradesh a mi 4 leh Bihar, Chhattisgarh, Jammu and Kashmir, Karnataka, Punjab le Uttarakhand akon mi khat cheh ahi.

Maharashtra a thina toh mi atampen in tunichan a thi mi 2,587 ahin aban a Gujarat a 1,122, Madhya Pradesh 371, West Bengal 345, Uttar Pradesh 229, Rajasthan 209, Tamil Nadu 208, Telangana 99 and Andhra Pradesh 68 , Karnataka 53, Punjab 47, Jammu and Kashmir 34, Bihar 25, Haryana 23, Kerala 11, Uttarakhand 8 leh Odisha a 7 ahi. Himachal Pradesh, Chandigarh le Jharkhand a thina toh mi 5 cheh ahin Assam a 4, Chhattisgarh a mi 2, Meghalaya le Ladakh akon mi khat cheh ahi.

Thina tohho 70 per cent tobang hi natna dang nei jeh ahi tin ministry website in aseiyin ahi.

India sung’a case tamna pen Maharashtra a  case 74,860, aban a Tamil Nadu 25,872, Delhi 23,645, Gujarat 18,100, Rajasthan 9,652, Madhya Pradesh 8,588, Uttar Pradesh 8,729, West Bengal 6,508, Bihar 4,390, Andhra Pradesh 4,080, Karnataka 4,063, Telangana 3,020, Haryana 2,954, Jammu and Kashmir 2,857, Odisha 2,388, Punjab 2,376, Assam 1,672, Kerala 1,494, Uttarakhand 1,085, Jharkhand 752, Chhattisgarh 668, Tripura 468, Himachal Pradesh 359, Chandigarh 301, Manipur 118, Ladakh 90, Puducherry 82, Goa 79, Nagaland 58, Arunachal Pradesh 38 , Andaman and Nicobar Islands le Meghalaya 33 cheh, Mizoram 14, Dadar and Nagar Haveli 8, Sikkim 2 ahi.