Forest Minister Shyamkumar ‘disqualification case’ thu a Supreme Court in hearing nei

Forest Minister Shyamkumar ‘disqualification case’ thu a Supreme Court in hearing nei

179
0
SHARE

Forest Minister Shyamkumar ‘disqualification case’ thu a Supreme Court in hearing nei

Imphal, Jan 14(ET): Supreme Court triple bench in Forest and Environment Minister Th Shyamkumar ‘disqualification case a hearing abol uvin ahi.

New Delhi a kon kimu thulhut in hearing chaina hi Justice Rohintom Fali Nariman, Justice Hemanta Gupta leh Justice V Rama Subramania panna Supreme Court Judge thum umna triple bench in anei ahi’in chule thulhuhna hi kal khat ahilouleh kal ni sunga aphondoh diu tahsan ahi.

Special Leave Petition pe a MLA Keisham Meghachandra in thuso miho akihoupi na’a, Congress party in thudih a thutanna dinga phat alut vanga judiciary chunga tahsanna aneiyu ahi, ati. Hiche masanga Congress MLA K Meghachandra leh Md Fazur Rahim in Manipur High Court a petition apeh a, BJP lamkaina sorkar a Shyamkumar alut hi Tenth Schedule of Indian Constitution dungjuiya dan toh kitohlou ahi, ajeh chu amahi Congress ticket a election kaidoh ahi, tia aseiyu ahi.

July 23, 2019 kum a High Court in thutanna aneina’a, Andro MLA pa BJP lamkaina coalition sorkar a alut a minister a apan hi constitution toh akitohpoi, tia aseiya chule MLA pa disqualify bolna dinga Speaker in action alahlou hi adihpoi, ati ahi. Chule Supreme Court a petitioner ho ache thei diuva jong asei ahi. Hiche dungjuiya Meghachandra leh Fajur Rahim in MLA Shyamkumar douna a Supreme Court a SLP petition apeh kit ahi.

“High Court thuhilna Manipur Legislative Assembly Speaker Y Khemchand in ajui lou jeh a Supreme Court a athu kipodoh ahi. Keiho Congress party in dan dihlouva hunam a sorkar kisem katahsan pouve”, tin Meghachandra in aseiyin ahi. “Thudih a thutanna aumding kum thum kanga u ahitan, kachol u ahitai. Assembly Speaker in hiche case apohdoh loujeh a High Court a kon Supreme Court chan cheding tilou lampi dang kanei louvu ahi”, ati.

Alangkhat’a, Congress office thulhut in, BJP a lut a chule N Biren Singh sorkar tosot a Congress a kon hai MLA 7 ho chungchang thu a jong Supreme Court in pan alah vahding tahsan ahi, ati.

Ccpur a numei khat chem a kibulu; KNO/KLA in pan alapoi, tia kiloikhomna in suhthengna thuso nei

Imphal, Jan 14(ET): Churachandpur district a Tuesday jingkah a pasal khat in numei khat chem’a abulu e, tin thulhut in aseiyin ahi.

Akisukha numeinu hi Tuibong, Churachandpur a cheng Hoineinem @ Sofia (22), d/o Khama ahi’in chule mibulu pa hi Churachandpur a cheng Thenkhomang Haokip (35), s/o Siama Kholunphai ahi. Thenkholun hi KLA thingnoi hi ahi’in, vangsetna toh nu leh ngohna kisem khumpa hi kiheto lhon chule chengkhom lhon ahi. Sofia hi aluchang kisukha a, chule hehna asemna a chem a eibulu ahi, tia ngohna anei ahi. Ahivanga tuchan geiya thukholna dungjuiya numei nu hi pasal pa in mobile phone a ase khah ahi, tia kiseiya chule thukholna chelha jing ahi. Case akijihlut toh kilhon a themmona neiya kingoh pa mat nadinga natoh chelha jing ahi.

Alangkhat a KNO/KLA hon Thenkhomang Haokip thilbol hi social media WhatsApp group a kon kihedoh ahi, tin asei uvin chule thilsoh a KNO/KLA in pan ala pon, ama chungchang thu achom beh ahi, tin suhthengna thuso anei uvin ahi. Hiche thilsoh toh kisaiya koiman KNO/KLA asuhminset loudinga hetsahna thuso jong aneibe uvin ahi.

SSA leh RMSA jilkung hon Education (S) nokhum; fund lhahsam jeh a lo kipe theilou ahi, tia Director in suhthengna nei

Imphal, Jan 14(ET): Sarva Shikshya Abhiyan (SSA) leh Rashtriya Madhyamik Shikshya Abhiyan (RMSA) noiya natong jilkung hon lha gup lo amulou jeh u chule state sorkar in khohsahna aneilou jeh uva lunglhai louna vetsahna a Education (S) Directorate anokhum uvin, ‘cease work strike’ bol ding hetsahna lekha apelut uvin ahi.

Jilkung hohin Joint SSA and RMSA Teachers’ Association Manipur (JSRTAM) noiya Monday nikho a kon kiphinna apat u ahitan, state sorkar in lha gup lo eipe pouvin chule promotion leh regular a kilhenna ding facility chom chom eipe pouve, tia ngohna aneiyu ahi.

Strike bol dinga hetsahna lekhathot hi Director, Education (S) henga apeh u ahi’in, SSA leh RMSA jilkung hon amaho toh kibanga natong jilkung dang ho tobanga lo kituptah a amulou ahi, ati. Kiphinna akibol kahse a Education Department officer hon natong a eigel pouve. Teacher atamjo in gamsunga festival jouse a lo advance a amu vanga SSA leh RMSA jilkung hon hitobang phatchomna amu pouve, ati.

Education Director in September nisim 18, 2019 ni a (ad October 1, 2019) asodoh na Primary Teacher ho inter-Seniority list leh graduate teacher seniority list official order asodoh na a hi SSA leh RMSA jilkung ho ahop tha lou ahi. Jilkung hon lha gup lo sang louva anatoh u atoh u ahi’in, kibungkhenna ato u ahi. Thumna ho bulhit ahi kahse a jilkung hon anatoh ding atoh loudiu ahi, ati.

Vice President, JSRTAM, Nongmaithem Prakashchandra in thuso miho akimupi na’a, sorkar in SSA leh RMSA jilkung ho boina hi kum masa Christmas kah a asuhchen det diuva Association in thumna anei ahi’in, ahivanga state sorkar in aphat sunga pan alah loujeh a ‘cease work strike’ Monday nikho a kon pat ding tilou lampi dang umlou ahi, ati.

Association in tu masanga jong kiphinna abol ahi’in, Chief Minister leh Education Minister in kitepna anei jouva kiphinna kiladoh ahi. SSA leh RMSA jilkung hohi 2011 kum a kon regular basis a kila ahi’in, ahivanga natoh kum 9 alhin tah vanga lo kitup tah a kimulou, promotion jong umlou ahi. Lha sagi lha get lo akimulou jeh a jilkung hon khutdo banga kiphinna abol teng lhani lhathum ho lo bou ahopdoh u ahi, tin ngohna aneiyin ahi. SSA leh RMSA jilkung hohi ‘School Phagathani mission’ kingapna ahi, tin aseiyin chule sorkar in gelkhohna aneilou jeh a jilkung hon hitobang pan  alah ahi, ati. Alangkhat a Education (S) Directorate Th Kirankumar in SSA leh RMSA jilkung ho thumna asanpeh in, chule kiphinna abol u alahdoh uva, state sorkar toh kihouna a pan alah diuvin ngehna anei uvin ahi.

Education (S) Directorate Office, Lamphelpat mun a thuso miho akimupi na’a state sorkar in fund a hahsatna ato jeh a jilkung ho lo asuhchen theilou ahi, tin suhthengna jong aneiyin ahi. SSA leh RMSA hi centre leh state in 90:10 a fund abol ahi. Centre a kon fund hi kum khat a installment ni a apeh u ahi. Ahivanga SSA leh RMSA funding pattern hi Samagra Shiksha Abhiyan noiya 2019 kum a kon aum jouva kon centre fund share hi kisunem ahitai.

Centre fund akisuhnem jeh a sum dinmun a hahsatna toh a state sorkar in boina ato ahi, ati. Promotion chungchang a Kirankumar in, hiche thu hi phatah a seikhom ngai ahi, ajeh chu SSA leh RMSA a RR a hi promotion a ding ‘terms and condition’ lhasam ahi, tin aseibe in ahi.

NIA in NSCN-IM fund kibol thu a Nagaland leh Manipur mun chom chom kholna nei

Imphal, Jan 14: National Investigation Agency (NIA) in Tuesday nikhon ‘terror funding case’ toh kisaiya NSCN-IM lamkai khat ajinu insung miho umna Dimapur leh Imphal a mun nga kholna anei uvin, dangka lakh 82.6 leh document phabep aman uvin ahi.

Agency in thuso anei dungjuiya Nagaland gam a um NSCN-IM thingnoi kiloikhomna a steering committee member hi a Alemla Jamir w/o Pungting Shirmrang insung mi (relative) ho inmun kholna aneiyu ahi. Alemla Jamir hi achesa December lha a New Delhi airport mun a dangka lakh 72 toh amat tha u ahi.

Alemla Jamir toh kinai insung miho inmun akhol nauva dangka lakh 82.6, dangka crore 3 lhing nei le gou chom chom document, diary, photo, smartphone 15, hard disk 1, pen drive 1, memory card 1, laptop 4 panna a digital device ho aman uvin ahi. Thingnoi toh kisai chule sum donna toh kisai lekha leh document chom chom jong aman uvin ahi, ati.

Case hi NSCN-IM thingnoi ho fund kibolna thu toh kisai ahi’in, sum hohi Alemla Jamir in Delhi a kon Nagaland gam a apoh ahi. Jamir hi tua jail a um ahi’in, Unlawful (Activities Prevention) Act noiya case kisemkhum ahi. NIA hon Shirmrang hi tua mat dinga ahol u ahi.

NSCN panna a Naga thingnoi kiloikhom hotoh India sorkar in kum som a sim val a Naga thu seilhah ding agot jing laiya NIA hon Alemla Jamir amat u ahi.

2006 Contract teacher (Hill district) thu thudih a suhcheh dinga TSA in CM henga petition pe

Imphal, Jan 14(ET): Thadou Students’ Association, General Headquarters (TSA-GHQ) in 2006 Hill district contract teacher ho ‘regularization’ chungchang a Chief Minister N Biren Singh henga memorandum apelut uvin ahi.

State sorkar leh All Tribal Students’ Union Manipur (ATSUM) in achesa March 31, 2006 kum a thinglhang gam a themjilna a angaicha ho bulhit nadinga Memorandum of Understanding (MoU) soi akai thu TSA-GHQ in petition apeh nauva avel a aseikit uvin ahi. Hill district a dinga achombeh a May 16, 2006 kum a contract teacher 1332 kilah thu ahi. December 2008 chan a amaho contract hi ‘extend’ nga vei kibol ahi.

Hetthei khat chu January nisim 31, 2009 kum a CM anahi O Ibobi Singh in Tribal Culture Festival, TRI, Chingmeirong a ahoulimna a teacher ho ‘regularize’ bol dinga kitepna ananei ahi. Kum thum jou, October 2011 kum a service regularize leh extension bolna dinga ‘physical verification’ anakou a chule teacher hi 772 a lhomsuh ahi.

November 2013 kum a Ibobi Singh in ATSUM chule state sorkar kihouna ana lamkaiya, TSA hon achesa kum nga sunga amaho appointment ahilouleh regular hisah nadinga thulhuhna kicheh ima umlou ham, tia thudoh aneiya, CM anahi Ibobi injong vacancy dungjuiya ‘regularize’ hisah dinga avel a kitepna aneikit ahi.

2017 kum a Chief Minister panmun atuh jouva avel a ATSUM lamkai hon hiche thu apohdoh kit u ahi’in, gamsung sum dinmun alhahsam jeh a CM in teacher 150 bou regularize hisah dinga nopna aneiye, ti thu ahetoh u ahi. “CM in kitepna anei hohi ama phatchomna dinga mang aum’e, ti tahsan umtah thulhut akimu in, thinglhang a um simlai kiloikhom phabep in Chief Minister, Education Minister chule official dang dang ho henga akilheng 150 list a pan nading sum adong uvin, deilhen chom leh sumguh pehna anei uve ti akihe e. Chule regularization hi phase wise a abol diu, chule simlai kiloikhom ho mangcha a sum peho hibou phase masapen a pang diu ahi, ti thu jong mipin ahet ahi. Thulamleng gang a, jilkung holah a hetkhelna soh ahi’in, hiche hi phatah a kholding ahi”, tin memorandum a asei uvin ahi.

State sorkar in thulhuhna anei masanga Appointment abol pet uva anaum Rules & Regulations (RR) ho velvetna anei uva chule update abol diu, jilkung tukhang hetna toh kitoh ho alhen diuvin TSA in aseiyin ahi. Achuti louva ahileh ‘humanitarian ground’ a jilkung jouse regularize abol ule phajo ding ahi, tin aseibe uvin ahi.

Truck driver khat chung’a khutlha ASI khat suspend kibol; KSO in anatoh haisah ding’a thumna nei

Imphal, Jan 14 (ET): Kangpokpi Reserve line DHQ a posting Manipur police ASI Hitler in Senapati truck driver association ho chung a kilomloutah a khat alha jeh chun anatohna akon suspend hiding in SP Kpi in thuso anei tan ahi. Social media a kithethang akon achondan kihedoh ahi in truck khat kikham ding a thupeh anei akham lou jeh in car khat in ahin delpeh in adelphah phat chun driver pa chu avo in a pistol astdoh in akau khum in deilou bol a abol chu video kithengtha achun amuthei in ahi. Suspend ahi sung ahi aumna Kpi Reserve line DHQ phalna bei a adalhah theilou ding ahi.

Kuki Students Organization Sadar Hills in Reserve Line, Kangpokpi police a um ASI Th. Hitler Singh chonchan demna sangtah anei uvin, hitobang police officer umchan helou ho suspend kibol hi gotna nem val jo ahi’in, kal khat sunga anatohna a kon terminate bol ding ahi, tin asei uvin ahi. Koima chou hilouva meithal asadoh hi mipi hinkho tongkha thei ahi, tin KSO thuso chun aseiyin ahi. KSO Sadar Hills President, Thangminlen Kipgen in asei dungjuiya, ASI Th Hitler Singh chonna hi themmona neilou mipi ho hinkho tongkha thei bou hilouva Manipur Police department a dinga jong boina lentah ahi’in, hiche jeh a ama anatohna a kon haisah ding hi achonchan donbutna pha pen hiding ahi, ati.

Kuki Inpi Kangpokpi District in hiche chungchang a KSO Sadar Hills dinmun hetpehna anei uvin chule Hitler chonchan demna sangtah jong anei uvin ahi. Alangkhat a Kangpokpi Youth Union injong ASI Th Hitler umchan phalou demna anei uvin, hitobang suhkhelna nei police officer ho Kangpokpi town a umsah louding ahi, tin gihna anei uvin chule town sunga chengkhom nam jouse kah a lungmonna aumna dinga KYU in pan sangtah alah ahi, ati.

Ccpur road safety week chelha jing

B. Lalboi Gangte

Ccpur, Jan 14(ET): Traffic Control Police TCP CCpur in  January 13 akon 18, 2020 sung a Road Safety Week 2020 abol utoh lhon in tuni in jong ana chelha jing in ahi. Traffic Control Police TCP CCpur akon James Vaiphei, OC, TCP makai na team in khopi sung a gari tol ho in traffic dan phate a ajui thei nading uvin traffic board chom chom tahdoh na ana nei uvin ahi.

Traffic board ana kitah doh ho chu gari neo khamna ding, alen khamnading tiho ahi. Lampi a u-turn bol na ding le bol lou na ding chule nikho sung a gari che na thei ding le che nalou thei ding ho chung a jong board ana tah uvin ahi. Jing nikho le road safety week toh kisai a Peace Ground, tuibong  akon Lanva lei chan rally nei ding in jong phatsah na ana nei uvin ahi.

Safety week toh kisai a numei two wheeler rally peace ground akonkinei ding chuleh ahunglhungding January nisin 16 nikho le walkathon Peace ground apat public ground chan kibolding ahi akiti. Traffic board kitah doh ho koima ding a chom ahi lout oh lhon in TCP in mipi ho ang a ajui cheh ding uvin jong temna ahin nei uvin ahi.

India Volunteers Ambassador dinga gamsung mi Monika Ingudam kilhengdoh

Imphal, Jan 14(ET): National Youth Icon Award winner hi a gamsung mi Monika Ingudam chu India Volunteers Ambassador dinga lhendohna anei tauvin ahi.

New Delhi khopi a Manoj Kumar Dash, CEO, Integrated Volunteer Network in Monday nikho a Ingudam hi India Volunteer Day ni a lhendohna anei ahi’in, society a pan alahna ho hetpehna aneina ahi. Wangkhei Konsam Leikai a cheng kum 25 a upa volunteer nu hi Abujam Babita chanu ahi’in, kin-gon a ama kipapina jong anei uvin ahi.

Ingudam hi India Volunteers Mission toson leh machal sah dinga kilhengdoh ahi’in, kal khat sunga ‘volunteer’ natoh nidan 2 chule kum khat a nidan 100 lhing gamsung khantouna dinga atoh u ahi. India Volunteer Day hi January nisim 13 nikho a kimang ahi’in, gamsung khantouna dinga pan la a India volunteer jouse jana a kimang ahi.

Integrated Volunteers Network (IVN) in January nisim 13 nikho hi Deshbandhu College, Delhi University a India Volunteers Day tia aman ahi. India volunteer jouse hin kum seh’a thingphung khat atu ding, pollution atin ding- plastic thil aman louding, yoga leh neh pha khohsahna apeh ding, twi leh mei aman them ding, numei, chapang, tehse, gancha, sa chule gam le go ho jana apeh a chamna asem ding ahi.

Development professional hi a Ingudam hin tua hi ActionAid India a na atoh ahi’in, achesa kum 5 sung UN SDG bulhit nadinga pan alah jing ahi. YouthKiAwaaz a Climate Action fellow ahi’in chule International Youth Society toh India gam a dinga Youth Ambassador a jong pang ahi.

 

ADC Sadar Hills Chairman Haokholal Hangshing in Saparmaina Public Ground hondoh na neita

Mangneo Touthang

Imphal, Jan 14 (ET): Aaron Kipgen, Spokesperson UPF in tunin gamsung ngailut najal’a phat sot tah sumle pai thale jung lut’a anasem Saparmaina Public Ground chu Haokholal Hangshing, Hon’ble Chairman ADC Sadar Hills in hondohna ananei toh lhon in Rev. Ngulkhopao Kipgen in Pathen heng’a lhandohna ananei tan ahi. Kingon achun Jin-gun in Haokholal Hangshing Hon’ble Chairman ADC Sadar Hills, Jin-ja-um in Lunthang Haokip Hon’ble ADC chuleh Kindei chom in Aaron Kipgen Spokesperson UPF leh Hemant Pandey IPS, SP Kangpokpi in anapang uvin ahi. Chuleh kingon achun Calvin, President ZRA, Kaisei Sitlhou, Hon’ble EM ADC Sadar Hills, Lamkholen Kipgen, Hon’ble EM ADC Sadar Hills leh Chongpu Kipgen President DSA Sadar Hills honjong pan anala uvin ahi.

Hiche toh lhon’a Aaron Kipgen, Spokesperson UPF in houlimna aneina’a Nam kito ding ahilou leh thingnoi ho kilungkhat  tah’a adin khom ding uvin mipi asei jing toh lhon’a ken jong USYC hi hat henlang mun dang dang tichu Kangpokpi Youth Club, Motbung Youth Club hobang’a ahat ding uvin kana tijing in ahi. Hinlah Kuki Society sung hi ivetleh mun jouse ahin alen lam hilouvin aneo lam joh’a kipunkhom ding akithanom jo in ahin lentah’a kipunkhom ding iti teng leh mi aum jipon ahi ati. Chuleh Namsung’a kingailut ding kipunkhom ding igel khoh uva ahileh ahung kipatna ding kho haosa hon lhangsung khat kiloikhomna che hoina ding leh hatdoh na ding ahipou leh eima ho khosung kiloikhomna ho apehdoh uva alen jepma kiloikhom ding ahin gel teng uleh District dang dang’a um nam chan khompi hotoh kivaihom ji dan hung kihe ding ahi. Chuteng acham louva nam kipumkhat na hi hung um theibep ding ahi tin ahung kikhom haosa upa gamkai mipite heng’a atahlang in ahi. Aman aseibe na’a Ground semdohna ding’a ana kithopi Assam Rifles, DIPL hole ground semdoh na ding’a amun hinphal doh Saparmaina haosapu chung’a akipa nathu jong aphongdoh in ahi.

Alangkhat’a Saparmaima Public Ground hondoh leh thensona akinei toh lhon in Muvanlai le Kuki Supporting Club in kichep vetnom umtah kick off chu ananei lhon in Muvanlai in KSC chu 2-1 in goljo na ananei lhon in ahi.

CAA hi Bible a sahem kisei sang a tijat um jo ahi: Lal Thanhawla

Aizawl, Jan 14: Congress president le Mizoram chief minister lui Lal Thanhawla in Citizenship (Amendment) Act (CAA) hi hou le beh toh kitoh lou beh Mizoram a dia phamotah Bible a 666 sahem number kisei sang a tijat umjo ahi e tin jannichun aseiye. Hiche thu hi Aizawl a Congress Bhavan hondohna aneipet a Lalthanhawla in ILP umna Northeast le Mizoram a CAA chelou ding chu BJP makaina NDA government in adeidan in abol jeng e, ati.  Chule Lalthanhawla in CAA le uniform civil code pohdoh ding ati hi thildang hilou in gamsung a Hindu Rashtra luidoh ding BJP tohgon ahibouvin hiche hi kilungtoh sel a Mizoram mipi in doudal cheh ding in jong temna aneiye. Mizoram Rajya Sabha member khatseh Ronald Sapa Tlau in jong danthah kipodoh chu demna anei in chujongle vaihom MNF jong alungkham lheh tai, ati.

January kichai teng Cabinet panmun tuh kikhel maithei

Imphal, Jan 14(ET): Cabinet Minister khelna dinga Chief Minister N Biren Singh in Centre a BJP lamkai ho a kon phatsahna amu’e, tin tahsan umtah thulhut in aseiyin ahi. Thulhut dungjuiya N Biren Singh sorkar noiya Cabinet Minister li hi BJP MLA chule BJP a kon Congress MLA in akhel ding ginchat ahi. Centre a lamkai hon koi khel ding ham tihi avetjing nahlai ahi’in, ahivanga thulhut in BJP worker leh Chief Minister in recommendation apeh agelkhom diu ahi, ajeh chu gamsunga BJP thahat sah ding akhohsah u ahi, ati. Centre in CM BIren natoh tahsanna aneiya chule atohkhompi ahethem ding cabinet ngaichat ahi hi ahetthem ahi. Thulhut chom khat in Cabinet kikhelna a hi NPP Minister 2 leh BJP Minister 2 kikhel maithei ahi, tin aseibe in ahi.