Florida ‘gay’ nightclub a kibuluna thilsoh um; alhom pen’a mi 50 thi,...

Florida ‘gay’ nightclub a kibuluna thilsoh um; alhom pen’a mi 50 thi, 53 kitongkha

234
0
SHARE

Orlando, Florida (CNN): Pulse ti’a kiminvo gay (pa-le-pa kikoi) nightclub khat’a chun alhom pen’ah meithal’a kibuluna in mi 50 athi’n ahi, tin Orlando Police Chief Mina in Pathenni chun aseiye. Chuleh agom’a mi 53 chu akitongkha’n kijen din ana podoh uvin ahi. Hi che thilsoh’a mona nei pa police hon akaplih uvin ahi, tin Mina in thuso miho heng’ah aseiye.

Police luboh in aseina’ah, “Hiche buluna tohguon nei pa hi phatah’a kiguotna nei ahi ding ginmo ahi’n, ama’n assault tobang rifle, handgun leh galmanchah dang akichoi din ginchatmo aum’e” ati.

Police in CNN jah’a ana seina’ah, ginmo umpa hin apohkeh thei thil-le-lo jong akipoh din ginmo ahin, atahsa keo hilouva ama gari a jong akikoi hi din ginmo ahi, tin aseije. Ahin khonung’a khuolchilna aneinung’un U.S. official hon apohkeh thei thil-le-lo amudoh lou dan’u asei uve.

Mina in aseina’ah, kikaptuona thilsoh  jong an aum’in, hiche’a chun alhom pen’in  police officer ko (9) in pan ala’n, officer khat in akikhuh kevler helmet chu meithal chang in anakhah jeh chun amit akitohkhah in ahi, tin Dadnny Banks, special agent, Florida Department of Law Enforment’s Orlando bureau a in-charge in aseiye.

Meithal kidop’a night club buluna nei pa hi Orlando khomi ahipoi, tin Mina in aseiye. Buluna nei pa chu amin Saddiqui Mateen (29) ahin, Fort Pierce a kuon ahi. Achenna hi Orlando southeast ahin, hiche thilsona mun’a kuon miles 120 vel’a gamla ahi.

Orlando authority hon aseidan’un, hiche thilso hi ‘domestic terror’ ahi tin asei uve.
Khuolchilna nei ho’n mibulu pa hi Islamic terrorist ho toh kisamkaina nei hidin aginchat dan’u asei uvin, ahin tuhin hiche mibulu pa hina chet chu asei ahah nalaije, tin Ron Hopper, assistant special agent, FBI’s Orlando bureau a in-charge in aseiye.

Hiche kibuluna thilsoh chu jinglam 2 am vel’a suoh ahitan, meithal choi mi khat chu club sung’a ana lhailut’a chujouva chu ‘hostage’ tobang dinmun ahin phah ahitai, tin Mina in aseiye.

Thulhut kimu’n aseina’ah, Pulse club sung’a chu Mateen Saddiqui in meithal mangcha’n agom’ah mi 50  ana kaplih’in, chuleh agom’a mi 53 ana kitongkha’n ahi, tin police in aseiye. Governor heng’a Orlando city a ‘state of emergency’ umsahna ding’a ngehna kinei ding ahi tin Police luboh in aseiye.