Finance Department in ST Post Matric Scholarship ‘Ban’ abol ATSUM, KSO-GHQ leh...

Finance Department in ST Post Matric Scholarship ‘Ban’ abol ATSUM, KSO-GHQ leh ANSAM in demna nei; kiphinna bol dinga gihna neiyu

117
0
SHARE

Finance Department in ST Post Matric Scholarship ‘Ban’ abol ATSUM, KSO-GHQ leh ANSAM in demna nei; kiphinna bol dinga gihna neiyu

Imphal, Nov 16(ET): All Tribal Students’ Union, Manipur (ATSUM), Kuki Students’ Organisation, General Headquarters (KSO GHQ) leh All Naga Students’ Association, Manipur (ANSAM) in November nisim 13 nikho a Finance Department in Post matric Scholarship for Scheduled Tribe (ST) 2018-19 simlai ho sum mu ding panna a ‘ban’ bolna thuso anei alungkhampi nau thuso anei uvin ahi.

ATSUM, KSO-GHQ leh ANSAM in thakhat a thuso anei nauva, Manipur gam pam a lekha sim simlai ho post metric scholarship ‘encashment order’ akisodoh vah louva ahileh November nisim 20 nikho a kon thinglhang gam a kiphinna kipan ding ahi, tin asei uvin ahi. Thinglhang gam a um tribal simlai ho kiloikhomna thum in thuso anei dungjuiya, ST ho a dinga post matric scholarship instalment masapen hi lha 4/5 masanga kisodoh ahitan, gamdang a um lekhasim ho dinga second instalment hi tua Finance Department in ‘Ban’ abol khum na a pang ahi, ati.

“Manipur gam pam a lekha sim simlai tamtah hin college fee, exam fee leh angaicha fee ho pehna dinga semester exam kipat masanga scholarship hi kingaina a aneiyu ahi’in, simlai tamtah in exam apeh theilouva umlo ding ahi”, tin KSO-GHQ, ATSUM leh ANSAM thuso chun aseiyin ahi. Ministry in second instalment a dangka crore 28 vel hi September lha a sanctiona bol ahitan, hiche sum hi October lha sunga akipeh doh ding hi ginchatna um ahi, ati.

“Sum sodoh ding sanga vangset umtah a state Finance department in ST ho a dinga kigong post matric scholarship panna a ‘encashment’ Ban bol dinga order asodoh ahi’in, hiche hi dihlou tah ahi”, tin asei uvin ahi. Simlai ho khohsahna kinei lou hi gelkhohna sangtah kipe ahi, tin thuso chun aseiyin chule August nisim 13 nikho a tribal simlai kiloikhom thum in Charted of Demands’ asemkhom hi akipe phat sunga tahso ahiding ginchat ahi, tin aseibe uvin ahi.

National Integration Tour a pang simlai hon Rashtrapati Bhawan a President Kovind kimupi

Imphal, Nov 16(ET): Indian Army hon National Integration Tour to Delhi and Agra agong uvin, Moirang, Kwatha leh Khumbi kho a kon simlai 18 leh staff member ni tour a apang uvin ahi.

Tour hi simlai hon India ahet nadiu ahi’in, simlai hon hetthei umtah institution ho avil uva chule India in economy, entertainment leh infrastructure a atohdoh ho vetsahna anei uvin ahi. ‘Todays’ Children, Tomorrows Future of the North East’ ti thupi a Tour kigong hi Indian Army hon thinglhang gam a kon chule insung gentheiya kon chapang ho boltheina semtoh peh nadinga abol u ahi.

National Integration Tour (NIT) team hon India President Ram Nath Kovind toh November nisim 16 nikhon phat ana mangkhom uvin chule simlai hon themjilna akhohsah uva, lolhinna dinga akihambol nadinga President in thuhilna aneiyin ahi. Rashtrapati Bhavan a jong simlai ho apuiyu ahi.

National Press Day kingon sung a Journalist mi 8 in Manipur State Journalist Awards 2019 kisanta

Imphal, Nov 16(ET): National Press Day 2019 kingon kimanna ah media hi apao jou lou ho chanvou phatah pedoh ahi e tin Information and Public Relations Minister Thongam Biswajit Singh tunichun aseiye.

Tukum National Press Day, 2019 cum Workshop hi “Reporting Interpretation – A journey” ti thupi a Imphal Nityaipat Chuthek DIPR office thah auditorium a kimang ahi e. Kingon kiman sung chun journalist mi 8 hon Manipur State Journalist Awards, 2019 chu akisan tauve.

Biswajit in ahoulim na ah apao joulou ho heng a adihtah phongdoh chu media ho bou ahi in, journalist lolhing chu aumchan le anatoh a hetdoh thei ahi tolhon a journalist hon amopohna akihet cheh a chujongle panpi tum umlou hel a thilsoh ahina bangtah a phongdoh media chu mi tahsan chang ding ahi e, ati.

IPR Minister Biswajit in asei be na ah Manipur Inpi a thukisei chungchang kihou khom na media hon abolji jong mipi puikhel lou nading a ahi bang chet a seidoh angai in chule lolhinna ding a khonung musao na poimo tah chu media hon aneicheh a kultah ahi e, ati. Chule Manipur State Journalist Awards, 2019 kipaman sang ho chu Minister Biswajit in akipapina jong aphongdoh in ahi.

DIPR Director H. Balkrisna Singh in DIPR le private media hi thakhat kikhen thei lou mipi ding a na pha tong ahi in, hoijo cheh a mipi na atohjom thei nading a department in tohgon chom chom jong kipodoh jing ding ahi e, ati.

Kingon chu MANITRON le MANIDCO Chairman Yumnam Radheshyam in alamkai ahi.

Tunia Manipur State Journalist Awards, 2019 sang ho chu National Integration & Communal Harmony a best editor award kisan Sanakeibak Joint Editor Nepram Krishnamohon Singh, Science & Technology thu a kipaman kisan Hueiyen Lanpao  Staff Reporter Km. Ashem Babycha Devi, Parliamentary reporting kipaman kisan Sanakeibak Sub-Editor Taorem Bishwajit Singh,  The People’s Chronicle Reporter Sagolsem Bigyan, Poknapham Staff Reporter R. K. Bullu Singh, Hueiyen Lanpao Reporter Nomita Khongbantabam, Poknapham Staff Reporter Heigrujam Sadananda Singh chule ISTV News Video Journalist Khwairakpam Naoba ho ahiuve.

Kingon hopni na a chun senior journalist Pradip Phanjoubam in “Reporting- Interpretation: A Journey” chungchang in houlimna anei in abanle Sobhaphati Samom, Member All Manipur Working Journalists’ Union, Yumnam Rupachandra, Secretary General Editors Guild Manipur le Sothing Shimray, Member Manipur Hill Journalists’ Union ho se thuchom chom mang in kihilna alamkai uve.

Hiche kingon a hin DIPR staff le officer ho ban a state sung journalist ho apang cheh un ahi. Hetding chu kumsih November 16 hi National Press Day tia melchihthei tah a kimang jing ahi.

News natohna suh kichatna le kigihna umjongle hangsan tah a na toh thei nading a Press Council of India (PCI) hi ana kiphutdoh a gamsung pumpi a hiche nikho hi thuso miho nikho a kimang ahi.

Drug case toh kisaiya Moreh Police station OC Letkhohao Vaiphei ‘suspend’ hita

Imphal, Nov 16(ET): Moreh Police station a Officer in Charge a posting hi a Inspector Letkhohao Vaiphei leh police adang thum khamnathei kimat thu toh kisaiya police hon aman tauvin ahi. Achesa November nisim 12 nikho a achenna Moreh inmun a dan in akha khamnathei tamtah kiman ho asel akimudoh toh kilhon a kiman ahi.

Director General of Police in order aso dungjuiya officer in-charge, Moreh Police Station Letkhohao Vaiphei leh police adang thum kiman a chule duty bol loujeh leh thil dihlou bol jeh a court anga a adinsah uvin ahi. Thursday nikho a DGP LM Khaute in order asodoh na’a, OC, Moreh Police station Letkhohao Vaiphei hi Rule 66 Assam Police Manual part-III a tha kipe dungjuiya suspend kibol ahitai, tia kisei ahi.

Addl SP, Tengnoupal, SDPO/Moreh leh Moreh Police Station team ho panna a Th Vikramjit Singh, SP/Tengnoupal supervisor hina a executive magistrate, SDO/Moreh ho akisei inmun a cheuva inn neipa umna a November nisim 12, jan nidan 10 don a thukholna aneiyu ahi. Thuguh amu masat uva New Moreh, Ward No 9 a um inmun akhol u ahi.

Insung akhol nauva room khat a carton box 34 amudoh u ahi. Carton box khat ahon ule Ketamin Injection P (Ketamax *50) kiti amudoh u ahi. Box 34 a hi 30 Ml Ketamine Injection IP (50 mg/ml), Ketamax *50 tia kijih Ketamine injection IP bottle 10755 kikoi ahi’in, thil hohi Executive Magistrate umna a amudoh u ahi. Inspector Letkhohao Vaiphei leh police personnel adang thum ho Saturday nikho a court a apui uvin ahi.