‘Fake encounter’ a ngohna kinei commando mi 9 Chief Judicial Magistrate in...

‘Fake encounter’ a ngohna kinei commando mi 9 Chief Judicial Magistrate in kouna pe

177
0
SHARE

‘Fake encounter’ a ngohna kinei commando mi 9 Chief Judicial Magistrate in kouna pe

Imphal, Oct. 16(UNA): Chief Judicial Magistrate, Imphal West in October nisim 16 nikhon achesa January 14, 2012 nilhah a Mayai Lambi Junction Narankonjin Chandranadi Inter Village road mun, Wangoi Police station noiya Imphal West commando, Imphal East commando leh 18th Sikh Regiment hon akaplih Thangjam Thoithoi @ Anil Kumar, Thangmeiband Sinam Leikai ‘fake encounter case’ toh kisaiya police personnel 9 kouna anei uvin ahi.

CBI/SIT in police personnel ho douna a charge sheet asem jouva asem jouva kouna apeh u ahi’in, November nisim 4 nikho teng court anga adin diuva thupeh aneiyu ahi. Case charge sheet hi IO, SIT Manipur L Hangsing Additional SP, CBI ACB Imphal in thukholna anei jouva apehlut ahi. Charge sheet kisemkhum holah a Jamandar Laitonjam Bibekananda, s/o (L)Bijoy, Kongba Bazar a cheng, Sub Inspector Laikhuram Lenin, s/o (L)Ibotombi, Kongba Laikhuram Leirak a cheng, Head Constable Ronra Mataisang Shimray, s/o R. Khunshi Shimay, Ngainga kho, Ukhrul district a cheng, Head Constable Moirangthem Kiran, s/o Mani, Tentha Khunou Awang Leikai a cheng, Jamandar Arambam Sunder, s/o Okendrajit, Nagamapal Soram Leirak a cheng, Riflemen Nongthongbam Brajamani, Head constable Aribam Captain Sharma, Head constable Thokchom Amarjit, s/o (L) Babu, Kanto Sabal Leikai Leimakhong a cheng chule Constable Huidrom Indrakumar, s/o Mashuk, Singjamei Wangma Kshetri leikai a cheng ahiuve.

CBI/SIT in apehlut charge sheet a hi Lt Col. 18 Sikh Kamal Sajgotra, Arnia Jammu, Havildar Sarvjit, Kurukshetra Haryana leh Havildar Balijit, Raju Bela, Punjab gammi hi case toh kisaiya 18th Sikh Regiment a charge sheet kibol lou personnel ahi, tia asei ahi. CBI/SIT in apehlut charge sheet a hi Supreme Court in achesa July nisim 14, 2017 kum a thuso anei dungjuiya thukholna kibol ahi, ati. Supreme Court thupeh dungjuiya kum masa February nisim 17 nikho a Thangjam Thoithoi kitha thu a case kijihlut ahi. Thoithoi hi Imphal East leh West commando chule 18th Sikh Regiment hon Chandranadi leh Narankonjil khosung lamlen kom a atha u ahi’in, athipa hi meithal leh bomb phabep toh kimudoh tha ahi.

Thangmeiband Sinam Leikai a cheng athi Thangjam Thoithoi @ Anilkumar, s/o Sarat hi Khurai Chingangbam Leikai a apaneo kom a um ahi’in,  athipa apaneo Sorokhaiban Dhiren in asei dungjuiya January 14, 2012 ni a Thoithoi hin ajinu Kinetic gari chabi akilah a chule 2012 Manipur state assembly election a Khurai AC a Trinamool Congress candidate Leishangthem Yaima @ Sushindro inn a kache ding ahi, tia asei ahi.

Nilhah nidan 6.30 don a inn hung kile a, Yaima inn  a kache ding ahi tia gangtah a ngong o (muffler) akilah a achedoh kit hi inn kile lou ahitai. Candidate Yaima inn a agahol ule athipa aloi khat in inn gate chan kahung thah ahitai, tia asei ahi’in, hiche jouva apaneo in athipa phone abol leh police khat in ahinlah a, police station a aume tia aseipeh a, athi ahi ahing ahi thu hi asei lou ahi. Hung kipui uvin tia asei uva amaho jong insung mite toh acheu leh Wangoi police station alhun uva police hon thilong RIMS morgue a aume tia aseipeh u ahi.

Jamandar Laitonjam Bebekananda leh Sub Inspector Laikhuram Lenin min hi January 14, 2012 ni a Imphal West Commando Unit daily deployment chule Imphal West commando GD entre a kipe lou ahi, tia charge sheet a kisei ahi. Ajing nikho a Jamadar Bebekananda in Imphal West SP henga January 12 ni a Narankongjin jotna lamlen Mayai Lambi leh Chandranadi junction a kikaptona aum’e tia meichang kikap doh ho akhel peh diuva ngehna anei ahi.

SP henga Jemadar in report apehlut dungjuiya aman AK rifle chang 9, SI L Lenin in AK rifle chang 7, constable R Mataisang Shimray leh Kiran in AK rifle chang 5 leh 4 cheh akap doh ahi’in, agom a chang 25 akapdoh u ahi. Thukholna aneibe nauva Imphal East Commando Unit deployment chart a Jemadar Arambam Sunder leh team ho a Nongthombam Brajamani, Aribam Captain, Thokchom Amarjit leh Huidrom Indrakumar hi Heikrumakhong a jan nidan 3 a kon jan nidan 8 sung duty a um ahi. Chule March 3, 2012 kum a Jemadar Arambam Sunder in SP IMphal East henga Mayai Lambi lamlen a January 12 nikho a kikaptona thilsoh a akikapdoh meichang ho akhel nading uva ngehna lekha apehlut ahi.

Report dungjuiya Jemadar in AK rifle chang 8, Aribam Captain in chang 6 chule Th Amarjit in meichang 7 akapdoh ahi. Charge sheet a 18th Sikh Regiment a army personnel – Major anahi Kamal Sajgotra,Havaldar anahi Sarvjit, Havaldar Baljit leh Lance Naik Ranvir in kikaptona a meichang phabep kakap uvin ahivanga chang ijat chet ham kageldoh thei pouve, tia aseiyu ahi.

Thukholna anei nauva January 14 ni a Jemadar Bebekananda in Chandranadi leh Narankonjil khosung lamlen a 10th Manipur Legislative Assembly election toh kisaiya Congress worker ho bulu nading tohgon neiya thingnoi ho avah le ti thuguh kamu e, tia aseiya, hiche thu hi Bebekananda in Jemadar A Sunder, CDO, Imphal East leh Major Kamal Sajgotra (Mayang Imphal COB 18th Sikh Regiment company Commander anahi) henga asei ahi. Ahivanga Imphal West Commando unit in hiche thu a thuguh kimuna receipt ahilouleh record/log akoilou ahi.

Jihtho a hehna hi Jemadar Bebekanda in ajih ahi’in, hiche jouva Mayai Lambi leh Chandranadi junction, Narankongjil kho jotna lang a police team kitho hon check point asem u ahi’in, jan nidan 7.30 don a gari neo a hung ni khol dinga gari angahsah got ule gari a neo a tou mikhat in meithal a akap uva, kikaptona um ahi. Minute 6/7 tobang akikapto nauva mikhat thi a chule thingnoi ho meichang in Rakshak gari jong akha e, tia aseiyu ahi. Athipa tahsa chunga 9mm pistol khat leh asakhao sunga grenade kimu ahi.

Charge sheet kipehlutna a post mortem report in Thangjam Thoithoi hi meichang 6 in akhah ahi’in, anung lang a kon, ama langa kon, aning a kon, achung chule anoiya kon meichang a akikapna maha aum jong asei ahi. Athi pa hin pistol hi akap mong ahinai ti photchenna ding umlou ahi. Chule kikaptona a pang sepai hojong akisukha umlou ahi.

Frisking a agom a team chom chom a kon sepai 16 in pan alah ahi’in, kinetic a mi ni tou ahi tia kisei ahi. Mi ni teni hi sepai ho atamjoh utoh kilhon a tha ngai louva bailam tah a atha jo theiyu ahi’in, team hon agom uva meichang 119 akap ahi. Thoithoi hi sepai hon hunam aman a akaplih ahi’in, kikaptona a kisei hi alhem ahi, tin thukholna anei nauva aseibe uvin ahi. Major anahi Kamal Sajgotra, Ex-Havaldar Sarvjit leh Havaldar Baljit, 18th Sikh Regiment douna a Section 6, Armed Forces Special Power Act noiya Prosecution sanction bol ding Ministry of Defence, India sorkar in anop pehlou ahi, tia charge sheet a kisei ahi.

State sorkar in commando personnel ngohna kisem khum ho athu sei dinga phatsahna anei ahi. Chief Judicial Magistrate in CBI/SIT in charge sheet apehlut hetpehna aneiya section 120-B/302/201 leh 34, IPC noiya Cril P case ajihlut ahitai. Court in November 4 teng ngohna kisem khum ho kouna apeh a chule CBI/SIT injong charge sheet toh kisai lekha ho apehlut dinga thuhilna anei ahi. Commando mi 9 leh Indian Army phabep chunga case kisem ahi’in, ahivanga IO in Indian Army phabep hi Union government in AFSPA dan noiya athu seina dinga phalna apehlou ahi, tia amaho douna a charge sheet apehlut lou ahi.