Faction um teitei (Kuki Haosa hojong Faction chekit tau)

Faction um teitei (Kuki Haosa hojong Faction chekit tau)

60
0
SHARE

Faction um teitei
(Kuki Haosa hojong Faction chekit tau)
Society a kikhentelna kiti hi munjousea um ahijeh in tua Kuki society sunga kho haosa ho kiloikhomna a Group 2 ahung umdohgot jong angailoubeh leh aphatnadi kiti umlouhel ahivangin datmo thei ahipoi. Ahin kiloikhomna min maimai jeh a Faction che kiti hi nuijat le jachat umtah ahi. Policy, lunggel, natoh leh thildang dang jeh a kibung khenna um hile thukhat ahin kiloikhomna min jeh a kibungkhenna aumleh akitohtheilou te tina mong mong hijeng ahi. Akitohdi chu ipi hile kitohdi, akitohmo di chu min jeh a kitona umjongleh kitomona di kivatdeh loudi ahi. Kuki Chief Association ( KCA) a Kuki haosa ho kiloikhomna Kuki Chiefs Council (KCC) a kikhel chu Tengnoupal district Kuki haosa kiloikhomna hon kapompouve atiu keu hilouva khonung jongleh kipom loudi ahi ati nahlai u ahi. Tengnoupal district le Block level haosa hon aumsa KCA hi minthah (KCC) a kheldoh angaikhelpoi atiu ahin khel dia aphatlouna asei uho jong adih e tithei loi jong aum thouve.  Tengnoupal district haosa ho hiche min khelna a koulou leh jaolou jeh in KCA chu KCC a kikheldoh kahepha pouvin kapom pouve atiuleh aseidiumong ahi. Ahin KCA a govt nin hetpehna aneisa ahijeh leh mi khat le nin lamkai adei jeh a kiloikhomna min kikhel kipomthei ponte akitileh lamkai kichuna leh lamkai thah ho deilou jeh  bou tina hithei ahi. Mipi jouse huop dia kiloikhomna Kuki Inpi leh adangdang umsa ahijeh in haosa hon atuma kiloikhomna anei ujong ngaibehsehlou ahi. KCA hihen KCC hihen KCU (Union) hileh min nin ima apohlou ahi. Haosa ho Welfare kiloikhomna ham bepma kichai hileh KCA, KCC tia Manipur pumpi a dia Kuki haosa kiloikhomna jong khohtah hidehlou di ahi.
Haosa ho gamneipa, gamnei ho ahijeh uva gam le go thu ahiteng amaho phatsahna louva thil che hahsatna tam thou ahi. Ahin gam le nam pumpi tongkha thu le la aumteng haosa ho sehseh in gam ahuhbit thei ahidehlou jeh thingnoi thingchung kiloikhomna leh mipi panna louva haosa honbou achang uva ima aboldoh dehloudiu ahi. Haosa ho phatah a ahung kiloikhom uva thu le la jousea ahung kikum ujongleh Kuki Inpi hotoh kikal tona hojong hung umthei ahi. Among monga Kuki Inpi hi haosa inpi ho kiloikhomna ahi jong akitileh haosa hon atumbeh a kiloikhomna anei ujong ngaikhel ham  jong tithei ahi. Kuki Inpi hi Apex body ( kiloikhomna sangpen) a kisei ahijeh in haosa ho kiloikhomna hi Kuki Inpi noija um tina ahikit jeng jeh in haosa ho kiloikhomna Group/Faction hi Kuki Inpi in aseitoh a aphat jongleh suhlhapna (solution) khat umthei di ahi. Thingnoi ho,  houbung ho kikhenteldeh jong phakhopset ahin tua haosa ho kiloikhomna jong Faction ahung umpan hi mipi dia lohso umvaldi ahitai. Aumsa min khat kheldoh jong ngaikhohlou, khelmo jong hideh lou ahi. Association leh Council jeh a kiboinadi himhim umlou ahi.