ET May 9, 2017 News (Local, Regional, National, International, Thusoh Lahchom, Editorial,...

ET May 9, 2017 News (Local, Regional, National, International, Thusoh Lahchom, Editorial, Blankfire)

391
0
SHARE

Lokchao’a thingnoimi hon SF ho bomb’a bulu; sepai 2 thi, 2 kitongkha

Imphal, May 8: Tengnoupal district hopsung Lokchao munvel’a Monday jingkah nidan 5.50 don’a thingnoimi hiding’a ginmo hon bomb asuhpoh jeh uvin thilsoh’a 165th Territorial Army Battalion sepai 2 athi in chule ni akitongkha in ahi.

Sepai hohi gari’a ahung na uva thingnoimi hon bomb asuhpoh ahi. Gari mai glass ho thilsoh’a ase in chue gari kang amailang teni jong athep in ahi. Buluna thilsoh’a thi SF sepai teni hi Koubru Laikha, Kangpokpi district’a cheng Arjun Baral, s/o Tankanath Baral leh Lishipung kho, Senapati district’a cheng NK Veroso Hungyo (38), s/o (L) Katohei Hungyo ahilhon’e. Arjun Baral hi 165th TA B-Coy’a um ahi’in, Military Hospital, Leimakhong’a athisa kipolut ahi. Thi-long JNIMS morgue’a akoi tauve. Chule Veroso hi SHija Hospital ICU’a akijen na’a thi ahi’in, aluchang mun phabep kitongkha ahi.

Thilsoh’a kitongkha teni hi Kakching Tureal Wangma, Kakching district’a cheng Lance Naik, TA, Y Govind Singh leh Thangnaleikai, Churachandpur district’a cheng  Subedar, TA, Toijam Chandra Singh ahi. Buluna thilsoh hi gamkaiya um UNLF ho natoh hiding’a ginmo ahi.

Lokchao thilsoh CM leh Ram Madhav in demna neilhon

Imphal, May 8: Chief Minister N Biren in Monday nikhon Lokchai mun’a SF ho kibuluna thilsoh sangtah in demna aneiyin ahi.

“165 TA B. Coy ho Lokchao mun’a akibulu na thilsoh sangtah in demna kaneiye. Thilsoh’a sepai 3 kitongkha’a khat thi ahi”, tin facebook page’a CM in aseiyin ahi. BJP National General Secretary, Ram Madhav jong tu-le-tu’a Imphal khopi’a um ahi’in, buluna thilsoh’a pan la ho chung’a action sangtah kila ding ahi, tin aseiye. Sorkar in thilsoh kholna aneiding chule themmona neiho chung’a action khoutah alahding ahi, tin ANI thuso miho heng’a aseiyin ahi.

“Tuni’a thilsoh hi gelkhohna kinei ahi’in, aumngai dan in aumtan ahi. Kum seh leh Manipur gam’a sepai ho buluna thilsoh phabep aumin, hiche hohi gamkaiya umlou ho tohgon ahi. Thilsoh hi koi themmona ham ti kholna umding chule action sangtah kilading ahi”, tin Ram Madhav in aseiyin ahi. Security  lhahsamna um ‘em tia thudoh aneiyu chun Ram Madhav in, hitobang buluna thilsoh khatvei vei aum vang’a security kigotna hi lhingset ahi, tin adonbut’e. Buluna natoh hi koibol ham, ti kholdoh ding hi athupi pen ahi, tin aseibe’e. Chule gamsung’a thingnoi jeh’a boina suhlhap det nathei ding lampi sorkar in ahol’e, ati.

KNF in KRA donbutna nei, Boljang kithana chunga hilchetna neikit

Imphal, May.8: KNO/KRA in New Keithelmanbi area Boljang kho’a mi ni athanau chunga KNF in donbutna apehdia aseitolhonin, tunin Kuki National Front in Kuki Revolutionary Army donbutna le hilchetna aneijin ahi.

KNF Information & Publicity Secretary, LH. Stephen in KRA Information & Publicity Secretary, T. Simte thudoh ho donbutna aneina lekhathot’a, kiloikhomna min’a nahin thudoh ho khonunga nahetthem nadin mipi hetdin kahin donbut’e ati.

Amasapenin KNF (P) kiti aumpoi. Keiho hi  Nehlun in 1987 kum’a anaphudoh, Kuki thingnoi masapen Kuki National Front (KNF) chu kahiuvin nungteng le adih in neihin address ji tauvin tin tepna kahin neije ajehchu ikikou teng min dih’a kikouding ahi ati.

Namsunga kitha kimat akibol nompoi hijongle KRA in gal mi’a neihin sempeh jeh uva Satlhun le Ngamlet hin thina ato lo lhon ahi’n KNF tha hilouvin KRA in athi nading lhon nagon peh leleu ahijoi. Nathil bol nana toh ho’u hi lhang mipin ahetsoh kei ahin seithem ma suhdih thei ahitapoi hijongle lhangphong’a nahin dohtah jeh in mipi/lhang mi hilou ahethemlou ana um khah le tia donbutna hung kinei ahi.

KRA kiloikhomna ana um masangin Saikul, Churachandpur, Kangpokpi le Saitu kiti hohi KNF operational area anahi. I-namsung uva 90s laichun factional fight anapungin hijehchun  Churachandpur area ana kida lhan New Keithelmanbi leh Saitu, Kangpokpi, IT Road chule Bongbal area bouva anaki umin ahi. SoO ahung kilah phat in designated camp ahung umtan hijehchun factional fight ahunglhom’in, i-um um nau operational area a iboicheh-un ahi.

KRA founder, K. Hangshing chu UPF hin phutdoh lamkai khat anahin ama umlou nungin Saikul gamkai sung KNA ten loding ahin gouvin Kangpokpi geijin na hindel doh tauvin chulaitah chun KRA lamkai chengin KNF nahin bel’un hinlah KNF President Pu ST. Thangboi in UPF sunga umkhom akihin Pu K. Hangshing um tahih jongle KRA chu mangthei lou ding ahi anatin KNF hem le thal chule chapang ho ana sollin KRA toh kigom’in Saikul iga nung lo kit uvin tun lungmong sel’in designated camp jong Lhungtin a nanei tauve.

David Hangshing, a-upa khel dinga ahung kigot chun KNF Headquarter Haipi a ahungin lamkai chengin Pu K.Hangshing danin aki ngaiton imalam jousea ngailut nale khotona ana kichan in ahi. Hinlah David le Ngamthang Haokip chanu ahung kichen le Saitu Constituency sunga na thingnoi hinao hi KNF chunga hunam nahin boljing uvin tunin kitomona asohdoh tai.

Ngamthang Haokip in jong atungdoh le asondoh KNF ho dontalou in KRA joh hi KNF khellin ahin semin ahin mangcha jingtai. Ole English proverb in “Blood is thicker than water” kitikhu hichi hi aseina ham?

Saitu Constituency sunga New Keithelmanbi area a Tintong Battalion natiuvin hunam in nahin louvin KNF chapang le KNF ngailu jouse army hotoh nahin man un, pistol semthu toh KNF letter head army ho napeuvin, kho helou mi ijat hamkhat jail alut loi. Robert CAO, KNF jong army hotoh naki thouvin nana that uvin tuni geijin anungjui chapang ni jong meichang maha apu lhonin genthei tah in hinkho amang lhonne.

New Keithelmanbi area hi luolou akhoh na KRA dinga ipi um hitam? KNF dingin vang Nehlun, KNF founder pu hung pen na chule KNF hung kipatna ahijeh in amipin jong KNF angailu dehset in keihon jong kadalhah nom pouve.

Hichejeh hin, SoO Ground Rule toh kitoh louvin KRA in KNF operational area, New Keithelmanbi a Tintong Battalion aphutdoh uvin hem le thal atol lut un, hunam in gam atou pha uve tia athu’a akisei le KRA akihipoi, keihon kahe pha pouve PRA ahi natiuvin nakilep jiuve.

Hiche goh hilouvin aban nahin bol be kit uvin Saitu lhang a Ngamthang sopi ho recruit nahin bol’un KRA camp a training na peuvin Satlhun le Ngamlet hi hiche lah’a hung pangkha lhon anahi. New Keithelmanbi le Saitu- Kangpokpi Lhang a hi hiche recruit nabol thah houhi Ngamthang sepai/PRA tinbou akihei.

Saikul gamsunga KRA douna’a KNF in ipi kibol kha’a tunia hi ka umnau/katoupha nau gamkol sunga eidou diu galmi neisem dohpeh uva, training napeh uva gamsunga nahin lha lut jingu ham?

Ngamthang election kaina ding bou hi KRA boipi hitam? A itih a naum khah nalou’u Saitu Constituency sunga hibangse’a hi boina nasem jengu hitam? Nahin tungdoh kit uva anapang KNF jong nahin dou uvin, KNF umna gamsung nahin suboi uvin, KNF galmi ding nahol un ahi.Cham le lungmon aumna din New Keithelmanbi area hi dalha un lang, KNF gamsunga KNF galmi ding nasep jingu hi nga tauvin tia kahin ngeh kit’u ahi. Satlhun le Ngamlet chu mimal hina in akivet da na imacha aumpoi, ahi’n New Keithelmanbi lodinga nahin sollut jeh uva thina ato lo lhon ahijoi. New Keithelmanbi leh Saitu lhang a KNF dou dinga training napeh hou hi cham le lungmon adei ule organization koma ngaidam ahung kithum’u ngai ahi.

Tuchan’a nathil bol nana toh hou hi Nampi a dinga thilpha chom ahipoi, kihet kheltona ding le kinahna ding bou ahi. Kuki chapa nam ngailu thingnoi nahiu le na’um nau gam phaten huhtup uvin lang, gam nakeh nom ule kuki gam Naga ten atoupha nau gam ho khu keh jo uvin.

Ole jatdang namdang banga kibol’a ahat hat in gam loding natiu ham ahiloule New Keithelmanbi aki lolou le Ngamthang election kailou ding ahi natiu ham? New Keithelmanbi nahung lut masang uvin jong Ngamthang ana kison’in MLA ana hithou nai. Kitha kimat akideipoi New Keithelmanbi gam lunglhai sellin dalhaovin tin LH. Stephen in KRA adonbutna lekhathot chun aseijin ahi.

KNF (N) in Kpi District sung’a phaicham thingnoi hon thaopo gari akap’u demna nei; avel’a abolkitlou diuva gihna nei

Imphal, May 8: Tu masang jep a Kangpokpi minsiet sah na dia Phaicham thingnoi hon tanker ahung kap uva mona neilou le kho hephalou milham ho chunga lung linglaona thei natoh ahung toh uchu kiloikhomna in demna akineiye tin KNF Secy. (Home Affairs) Kennedy Kuki a kon kimu thuphon in aseiye. Hiche nakitoh hi Kangpokpi khopi a cheng hole adieh a Kangpokpi District kinuoise na ahi tin jong akilan ahi. Tua pat phaicham galguh bol hihen koi hijong leh kijana neitah a kalsuong’a natong din deisahna aki neije.

Hitobang kinoise na le mipi lung linglaona thei gamsunga natong ahung umkit leh kingaidam louding ahi. Alouthei louva natohna anei teiju angaile Phaicham sunga akitoh na diuvin jong hetsahna le tiemna ahung kineije. Ahin galmi kibang nei aki hijeh in KNF (N) komma ahung lut masat uva kihet thiemna aum a KNF (N) noija dan kikoi ajui bukim jou diu le bou Kukite chenna mun jouse hoilai chan hijongleh kipom peh diu ahi. Chuti louva tua pat phaicham thingnoi hihen atoson ho tichu amun a pansatna dia mun peho hijongleh akimatdoh leh achan kibanga achan dia lom gotna kipe ding ahitai. Kangpokpi hi District thah ahito lhonna cham le lungmuon umna pen district ahiding akideisah in ahi.

Chuleh, Tulai igam sung uva nuoise tah a Meilhei ten Rape le Murder eibol jingu toh kilhon in Muntin’a um Kuki chate adieh a Nungah ho ichih thei diuvin hetsah ahi. Eiju Kuki chate ikitup lou jeh uva ichung uva thilsoh aum teng CSO hihen Thingnoi kihi jong le mite masang a pansat a thusei lasah ahah ji in, hijieh KNF (N) in Kpi District sung’a…

chun tuni a kipat a KNF (N) in hoilai mun hijong le Kuki numei jatdang namdang golhang toh kivop khom aki to a, akimu le gih masat umlouva action hung kila ding ahitai. Nu le Pa ten jong chate nao te ikiven tup diuvin hetsah ahi, chuleh hiche organisation in koima dep nei louva hung kitham ding ahi jeh in keicha, keinao, keisopi, Keiphung keichang ti, hin gel kha aum nalou din isopi icha inao kiventup cheh u hite. Kuki nam pumpi nang jeh a aminset jing di akidei pon, Kuki Nam pumpi Nang jeh kei jeh a Jatdang Namdang te gin le ja achan di KNF (N) in akingai sang pen in ahi. Achesa phat ho a ithil to hou hi kihil nale chih thei nan mang cheh u hitin ahunglhung ding phat in kiveng them u hite. Minu Mipa koi hijong leh tua pat acha kiventup louva moh lha thang le jing nalai aum a nampi dia minsetna thei lhut ahung umkit khah leh chan kibanga gotna kipeh tha ding ahi. KNF (N) in Gamsung Namsung a Kuki chate ventup nadia natoh khoutah hung kibol nadinga Ja umtah2 Kuki CSO ho ahin Local Youth Club hon nasa tah a, neihin tosot diuvin jong tem na ahung kineije. Kuki Nampi mi ja le gin ichan thei na diuvin i-society u ikisuh tup lou u apoimo tai ti geldoh pum in ium na cheh uva pan lacheh din temna sangpen jong ahung kineije. I-Nampi kisem tup utin i-Namsung khantou machal na pan tao hite. Ei le ei kitha kimat a kito mo a society khang tou di ahitapoi. So0 group hon buoi na ijat nei jong leu hen athu a asei u tilou bol di ahe tapouvin jat dang namdang toh kidin te nathei tha anei tapouve. Ei society kah a Divide and Rule policy tilou boldi anei u hetdoh aum tapoi, hijeh chun hangsan tah le gin neilouvin inam le igam a din pan lacheh taote. Kuki Chate alam lou tah a hinbol le muset na nei ho kimai topi din KNF (N) kimansa’n aki um jing e. Numei chung a khansetna hihen Kuki nam mipi te chung a lom lou tah a khansetna nei aum kit leh amun le aphat toh kituoh a agang thei pen’a action hung kila pai jeng ding ahitai tin thuphon chun aseiyin ahi.

PDS thil bazar’a joh aumleh gotna sangtah kipe ding ahi: CAF&PD Minister

Imphal, May 8 (DIPR): Koitobang PDS thil bazar’a joh aumleh gotna kipe ding ahi, tin Consumer Affairs Food and Public Distribution Minister Karam Shyam in Directorate Complex (CAF & PD), Sangaiprou, Imphal West mun’a kin-gon kibolna’a aseiyin ahi.

Employees Union (CAF&PD) leh Directorate (CAF&PD), Manipur in Minister pa liemna leh retired hi’a employee ho lhahna kin-gon anei ahi. Kin-gon’a Chief Guest Karam Shyam in ahoulimna’a, Chief Minister N Biren Singh in PDS thil bazar’a joh ho gotna peh ding’a thuhilna gahtah anei ahi, tin aseiye.

Director in sepai hon alo complex sung’a mun-ong natong ho ding’a apeh ding’in Minister in temna aneiyin ahi. Chule department official hon mopohna akilah uva, angaicha ho alhinna theipen’a anchang apeh diuvin jong aseiyin ahi. Union Consumer Affairs, Food and Public Distribution Minister Shri Ram Vilas Paswan jong Lok Janshakti Party ma ma ahi’in, hiche hi phat gomkom’a iman uva, godown atamthei pen’a isah uva chule khantouna isemdiu ahi, tin aseiyin chule natong hon angaicha mipi ho ding’a na atoh diuvin temna aneibe’e.

Guest of Honour, Commissioner, CAF&PD, K Radhakumar Singh in japi in atahsan theina ding directorate sem angaiye, tin aseiyin ahi. Director, CAF&PD, Ranjan Yumnam in jong houlimna aneiiyin, department mopohna hi aphatcha National Food Security Act (NFSA) noiya beneficiary ho anchang hopding hi ahi, ati. Public Distribution System computerised kibol soh ding ahi’in, thil kihom adihlou vetsuina hiding ahi, chule Internet Enabled Point of Sale (POS) umna Fair Price Shop hi pilot basis ‘a kipodoh ding ahi, tin aseiye. Imphal East leh Imphal West’a Fair Price Shop 10 cheh hi pilot basis’a kipodoh ding ahi, ati.

Kin-gon’a retired employee mi 14 memento ape uvin, Principal secretary anahi (CAF&PD) BB Sharma, District Supply Officer, CAF & PD S.A. Halim, District Supply Officer-Imphal West, CAF & PD N. Jayanta Singh leh official dang dang hojong apang uvin ahi.

CM in bill 3 ho chungthu’a CCpur mipi heng’a ngaidam thum, MPCC Gen. Secy in demna nei

Imphal, May 8:  CM N.Biren in anti-tribal bill ho chungchang’a statement apeh hin gamsung’a thunoh baotam ahin semdoh ding ahi tin Manipur Pradesh Congress Committee, General Secretary, K.Meghachandra in Mau nisim 6 nikho’a Lamka Press Club’a kinguon khat’a ahoulimna’a aseiyin ahi. Meghachandra in aseidan in N.Biren hi Bill thum ho kisemlaitah’a drafting committee a jong pang ahi. CM in Churachandpur mite heng’a bill thum ho chungthu’a ngaidam athum hi’n ipi ako ahidem. Mipi in movement ahinchepi’u hi dihlou ham ahilou le Bill thum ho hi abul abal umlouva kisemdoh ham.  Manipur gamsung’a cheng Indigenous miho vengbit thei ding bill ho ahunglhung ding State Assembly  session’a hi kiseikhom ding ahi. Congress ding’a vang indigenous mite venbit le huhbit ding hi natoh lenpen khat ahi.

People’s Revolutionary Army (PRA) thu a MLA Ngamthang Haokip ama-le-ama ahung kiphonna Thu le Election thu a athusei ho donbutna

Imphal, May 8: Eimi Times  Lhaphul (May) O6,2017 -Vol. IV Issue 1085 na a KNF in PRA ho gotna akipeh najeh le ahung kiphu dan u thusim  kiseina a ama hohi Congress Minister khat in 2 Crore seng’a anasem doh ahi tithu kahin tahlang na’uvah tunin amin kipan loubeh MLA Ngamthang Haokip in hiche thu toh kisai a ahung kikao jeng hi phatah a igel leh, tehse hon paocham tuh a “Gucha del louvin ajam’e/Mijong ama le ama akiman ne” atiutoh akibang jeng in, thil jouse hi  Ngamthang in naki het kiu keuva aphalam nahin boldi ham akiti laitah in, Organization chou najoh in jou le nal tampi mangchan mipi muthei ding in thu jou nahin lhangsap le jing’e tin KNF,Secy, Info & Pub. LH Stephen’a kon kimu thulhut in aseiye. PRA toh na kisam kai dan hi Manipur mipi akeh khat val in kicheh sel’a ahet ahi tijong na suhmil louvin aphai, ajokhat touleh milah a jumval khan nate kitia PRA hotoh akiki houna voice recording leh video coverage ho jong nakithe thangpeh lou ahi tin thulhut chun aseiye.

Nangma support dinga 25th , Feb. 2017 nikho’a Vaichei Village Saikul Sub-Division khomun na patsa PRA Army Chief   (L) Ngamlet Haokip lamkai na noija KRA, KNO/KRA-U leh PRA mi 24 hung kitol uva, lamkah a chapang 4 in tahsa dam mo na aneijeh uva Nangma Quarter ahin jot uva, adang mi 20 in Khengjang Village Saitu AC ahin jot lut uva mi phabep in vote kilhah ni 4th March, 2017  nikhoa Stephen (KRA) lamkai na a Nangma (Congress) favour a vote namphu a alhah uva nisim 6 nia kikap tona ana um’a ngailut umtah Nam Sepoy (L) Kamkholun Hmar in ahin na anachan lo ahin, ahileh Stephen in Congress dia vote namphu a lhah leh thina anatoh pa hi nang jeh ahi louleh koijeh ham? Oleh Saitu AC sunga Congress Candidate adang khat tou um’a ham?

Chuleh New Keithelmanbi Area a 4th March, 2017 nikho a KNO/KRA, CO Jangkholun Haokip lamkai na a Bijang, Sehjang, Sinam etc kho ho a voters slip 40% achom uva Congress a dinga alhah uchu mipi koima ahai aumpoi. Ahileh nang in tunia hi thingnoimi kithopina beija  election kakai khapoi nati hi naki oi mong hinam? MLA kai doh hi  vote tam mu pen2 chu kaiji ahinai, amavang nangma  phat tamjo a thingnoimi kithopi  najal’a hung kaidoh jing na hijeh in tukal leh Hou Lhacha le mipi deija kaidoh kahi tihi hin hasei da tale chun nang din maimoh na lhom pen inte.

Chuleh jouva nalhep chapang, thal nachoisah Nam gollhang/Khangdong hinkho it-umtah ho damna ding joh nagelkhoh ngai hilou ham. Ahinkho’u Govt. Sepai khut a Mollien thei hokhu adam nadiu nagelkhoh ding joh a tiem nahi tin thulhut chun aseiyin ahi.

Thinglhang district’a Aadhar ‘a ding’a Biometric enumeration lah pat ding’a CM in thuhilna nei

Imphal, May 8 (DIPR): Chief Minister N Biren Singh in Cabinet Hall, Chief Secretariat mun’a Monday nikho’a thinglhang district’a Aadhar enrolment’a ding’a biometric kila amachal dan vetlhahna toukhomna alamkaiyin ahi.

Toukhomna’a Minister ho, Parliamentary secretary ho, MLA ho leh bureaucrat ho chule Hill sitrict’a DC holeh official hojong apang uvin ahi. Aadhar card semna ding’a Biometric enumeration (BME) hi MANITRON leh In-Media Computer in gamsung’a abol ahi. Phaicham’a toh tekah ding’a thinglhang district’a biometric enumeration rate hi hatah in anemjo’e, tin Chief Minister in aseiyin, chule thinglhang gam’a Direct Benefit Transfer (DBT) ‘a BME chepi ding’in aseiyin ahi.

Toukhomna’a Chief Minister in MANITRON leh In-Media official hon thinglhang district jouse’a BME team asol diuvin thuhilna aneiyin, chule team 4-5 bou Imphal khopi’a adalhah diuvin aseiyin ahi. Chule thinglhang district’a ama ama MLA leh DC hon MANITRON leh In-Media official hotoh kihoutohna anei uva, kal khat sung’a khosung chom chom’a biometric alah pat diuvin aseibe in ahi.

Principal Secretary (Planning) leh Principal Secretary to CM, Vineet Joshi in BME leh Aadhar kilah vetsuina aneiding ahi. Chule DC hon Vineet Joshi heng’a kal khat sung’a BME schedule copy apehlut diuvin CM in thupeh aneiyin, amatah in nikhat hal’a thil che dan avetlhah ding’in jong aseibe’e. MLA, ADC member leh khosung mihon government official leh MANITRON chule In-Media natong ho kho chom chom’a biometric la ding’a alhun na uva tosotna apeh diuvin jong Chief Minister in ngehna aneiyin ahi.

KSO Henglep Block lamkai lhendohna um ding

Ccpur, May 8: Kuki Students’ Organisation (Henglep Block) office-bearer ho term kichai tolhon’a ahunglhung ding May nisim 20, 2017 ,Saturday, nikhole  2017-2020 kah’a lamkai mopohna poding lhendohna umding ahi tin KSO-CCP, El;ection Secretary NJ.Haoneo Baite a kon kimu thulhut in aseiye. Nomination file pelut nom hon May nisim 10-18 kikaha  min apehlut thei’u ahi. Chuleh withdraw bolnom hon May nisim 19, 2017 nikho masang’a abolding’u hiche nikho mama le hin scrutiny jong chelha ding ahi. Election hi Khousabung Community Hall, Churachandpur a ahunglhung ding May nisim 20, jingkahlam nidan 11 le chelha ding ahi. Ahunglhung ding election a lhendoh ding ho chu President, General secretary, Education Secretary, Finance Secretary chuleh  Seretary, Information & Publicity ahi’uve.

Candidate ho hi  Henglep Bloc/Unit executive member  kum khat beh ana pansa ahi ngai ding chuleh Recognized university khat’a Bachelor Degree hinchai mi ahi ngai ahi. Chuleh Political party khat pen pen’a active member hilou ding , central le state government noiya natong jong hilou ding chukitleh achungthu thengsel mi khat ahi ngai ding ahi.

Namsung’a kitha tuona thilsoh ho TYA in demna nei

Imphal, May 8: Nengneikim @ Shila Haokip c/o (L) Jamtil Haokip,New Molbem vangkho , Kaikholen Tuboi, New Keithelmanbi vangkho  Utangpokpi le Moltinchan vangkho’a athisa a kimudoh le  Satlhun, Chassad Avenue le Ngamlet Haokip kithana chungthu hi nampi ding’a damna ahipo’n kiloikhom in sangtah in demna akineiye tin TYA-GHQ, Secy Pub. & Propaganda Wing a kon kimu thulhut in aseiye.

I nampi sung’uva khat le khat kithatuona aum hi tijat umtah le jachat umtah ahi.Thilsoh chungchang’a hi State government in jong pan hatah’a alah’a hitobang boina ho avel’a asokitlouna ding’a pan alah ding in temna akineiyin chuleh muona neiho atotohchet’a guotna apeh ding in jong ngehna akineiye tin thulhut chun aseiyin ahi.

Gamsung dahkal 48 strike kibol ding

Imphal, May 8: Manipur Fire Service Department a Interview Viva-voce anachaisa hon thuphon ahin neiyuvin hiche a chun amaho chungchang hi akichet loulai jeh in government heng’ah temna leh ngehna tampi ananeiyuvin ahi. Chief Minister hengah jong Memorandum ijat hamkhat jong ana kipelut tan, kimuto ding akiti jongle phat eikipe khapoi tin aseiyuvin ahi.

Hiche toh kilhon chun All Manipur Fire Service appearing Candidate leh a-indung mite toh kihouna akineiyin hiche dungjui chun ahung lhung ding May nisim 10, 2017 kah a athu kichieh ahin phondoh loule nisim 11, 2017 a kipat pungkal 48 Manipur  pumpi General Strike kibolding ahi tin aseiyuve. Hichena ding’a hin candidate ho, kiloikhomna ho, a-insung mite leh mipite jong hichena ding’a pan lacheh ding’in temna ahin neiyuvin ahi.

Ni 2 chelha ding Parental Counselling kipan

Lien S. Gangte

Ccpur., May 8: Sarva Shiksha Abhiyan (SSA) -RTE, Ccpur  gonna noiyah, ni-2 chelha ding ” District Level 2-Days parental Counselling for Parents of Children with Special Needs (CWSN)” hondoh na 8th May, 2017 jinglam nidan 10:00 a pat chun Synod Hall, IB  Road mun’ah aum in ahi. District Level 2-Days parental Counselling for parents of Children with Special Needs hondoh na Chief Guest hina toh T. Goukhomang, ZEO, CCpur aneiyin ahi. Counselling sung’a hi Manneikim, Special Teacher; Premlata, Special Teacher; Anita Rani, Special Teacher; Girija, Special Teacher; Chongpi, Special Teacher; Rishikanta, Special Teacher leh T. Budhajit, Special Teacher ho Resource Person in apang uvin ahi.

Manneikim, Special Teacher in Identification of CWSN, Causes and Prevention, Benefits of Various Therapeutic Approach toh kisai a holim na aneiyin; Premlata, Special Teacher in Importance of Education for CWSN, Behaviour Management toh kisai ah holimna aneiyin; Anita Rani, Special Teacher in Role of Parent in Education of CWSN toh kisai ah holimna aneiyin; Girija, Special Teacher in Benefits and Provision under SSA for CWSN toh kisai ah holimna aneiyin ahi.  Chuleh, 9th May, 2017 nikho leh Chongpi, Special Teacher in Challenges face by Parents with CWSN and how to tackle them toh kisai ah holim na aneiding; Rishikanta, Special Teacher in Importance of Family Health and Medical Intervention toh kisai a holimna aneiding chuleh T. Budhajit, Special Teacher in Benefits of using technology toh kisai a holim na anei ding ahi.

Chingmeirong thilsoh’a athinu jipa in a-inneipi atha thu seidoh

Imphal, May 8: Chingmeirong Kabui Khul mun’a achesa May nisim 5 nikho’a a-indan sung’a athisa kimudoh numeinu inneipu in kajinu keitha ahi, tin aseidoh tai.

Athi nu jipa Inoucha (Zeenith), Chingmeirong Kabui Khul in police ho heng’a Sunday nikho’a ajinu atha thu aseidoh ahi. Thulhut dungjuiya, school’a kon hung kile’a ajinu atha jouva che kit ahi. Athi Lunglailiu Rongmei (18) hi Inoucha (Zeenith) toh kum khat nailam kicheng ahitai.

Alangkhat’a, R.Lunglailu kithana chungchang’a kisem Joint Action Committee in tuni chun Chingmeirong Kabui Khul’a  muona neiho chung’a action lah ahina ding in toumun-kiphinna anei’uvin ahi. Kiphin na’a chun numei kiloikhom le NGO natong phabep in pan ala’uvin ahi.

JAC , General Secretary JAC Dangmei Shyam in thuso miho heng’a aseidan in lunglailu that pa jong tuhi police khut’a aumtai ati. Hetthei khat chu  Lunglailu that hi koimadang hilouvin aloipa Zenith mama anahi’e. Chuleh thilsoh hi gamsung’a cheng mipi jouse’n jat le nam thu’a alah lou diuvin Dangmei in temna aneiyin ahi. Authority in May nisim 9 masang’a case status aphondohlouva ahileh milham kiloikhom jat chom chom toh kitho’a kiphin na jat chom chom kibol ding ahi tin Danmei in gihna aneiyin ahi.

An-ngol kiphinna nei simlai ho nungchon lou lai’u

Imphal, May 8: Biramangol College, Sawombung’a governing body umloujeh’a an-ngol kiphinna nei simlai li ho in tuni jong chun an-ngol kiphinna ana boljom’uvin ahi. Hetthei khat chu governing body election hi May nisim 1,2015 a chu ana chelha ahitan ahinlah tunigeiya hi formed kibol loulai ahi. Governing body formed kibollou lungkimlou vetsahna’a Magazine Secretary, Thangjam Roshan, Games & Sports Secretary, Mayengbam Angamba, Debate and Extension Secretary, Leiranlakpam Sophia le Girls’ Common Room Secretary, Yumnam Poonam in an-ngol kiphinna ahin bol’u ahi. Alangkhat’a Boys’ Common Room Secretary, Y Ajit Kumar in kiphinna ana neijeh  suhtang na ding in Police in hatah in pan anala in ahi. Ahinlah education department lang’a kon boina ho sulham ding mikhat jong ana kithah doh pon ahi. Simlai hon aseidan’un, Educationminister in college ahung vil le villou ding hi police personnel ho thu ahinpohsah ding’a lom ahipo’n, ama tah hung’a eihung kimupi ding’u doltah ahi ati’uvin a hi. Chuleh sorkar in jong boina ho suhlhapna ding’a pan alah ding in simlai hon ngehna anei’uvin ahi.

Alangkhat’a, sorkar a kon kimu thuphon khat in aseidan in Biramangol college’a principal le jilkung aumlou hi court a case khat pending’a aum jeh ahi ati. Simlai ho’n jong department jah’a pending a um case agangtheipen’a asuhlhap ding in ngehna anei’uvin ahi. Ipi hileh tugeiya thuchen aumlou jeh in Students Union in jing nikho le kipan ding semester examination boycott bolding in thulhuhna asem’uvin chuleh ngehna aneiho’u suhbulhit ahilou le kiphinna khoucheh cheh bolding in gihna anei’uvin ahi.

SP louchang Dk. 3 lakh man kiman

Imphal, May 8: Imphal West Narcotic Cell hon Monday jingkah nidan 11:00 don in Oinnam Sawombung Mayai Leikai, Sanjenthong kom’a cheng Md Abdul Sattar (38) a konin bazaar mun’a SP capsule (khamna thei louchang) dangka lakh 3 man, piece 7000 vel aman uvin ahi. SP louchang hi Atta kipohna sakhao leh plastic vom khat’a kipo ahi.

‘Transport drive’ kibol pan ta

Imphal, May 8: Imphal West police team holeh State Transport Department in thakhat in ‘drive’ abol in, gari lekha leh licence alhem hiding’a ginmo agom’a mi 2406’a amat peh uvin ahi. Thuso miho SP Narcotic Cell, Imphal West in akimupi na’a chun, police team hon Helmet umlouva gari kang ni tol ho douna drive jong apat ding ahi, tin aseiye. Gari neo (two wheelers) helmet beiya tol ho kiman’a insung miten helmet ahin choipeh uva, fine (leo man) apeh kahse uva kihen ding ahi, ati.

Minister Th. Shyamkumar Jiribam tour’a kon hung kile ta

Imphal, 8 May (DIPR): Forest & Environment, Horticulture & Soil Conservation, MAHUD leh Town Planning Minister Thounaojam Shyamkumar in ni 3 Jiribam district agavil chai Imphal ahung kile lam in tuni chun Nungba Assembly constituency jong ahinvil tha pai pai in ahi. Noney district, Nungba ah Minister in Forest department official hotoh department sung’a welfare programme thu houlim na ana nei khom un chuleh Minister in jong veng sung miho toh kihoulim najong anei khom pai pai in ahi. Noney,Longmai community hall’a Forest department hon Minister Shyamkumar loupi tah in anavai lhun un chuleh memorandum phabeb jong anape lut uvin ahi. Athum pi pen u chu ahileh Forest department guest house khat Noney’a koi ding, bio-diversity park  semdoh ding,nursery centre semdoh ding,package for horticulture and farming chuleh public toilet mun chom chom ma sem ding tihi ahi.

Minister Shymkumar in asei na’a chun, infrastructural development chung chang thu’a hin CM N. Biren Singh toh kihou khom na kinei ding ahi chuleh dangka crore 150 sanctioned hung kibol lah’a chun Central Government in thinglhang khantou nading nga ahipeh ahi.Noney district mun’a King chilly (u-morok) leh oranges atu thei nading uvin Minister in loulhou miho government lam’a kon na kithopi na kipe ding ahi ati.

North Korea in US gam-mi 1 hen den kit

Seoul, May 8 (AFP): North Korea gam in ‘melma natoh’ bol’a ngohna anei US gam-mi khat ahen den kit uvin ahi.

Kim Hak Song kimat toh kilhon’a Pyongyang in US gam-mi amat mi 4 lhing ahitan, gamsung teni hi Pyongyang in abol nuclear test jeh’a kinelkal jing ahi. Kim Sunday nikho’a kiman ahi, tin Korean Central News Agency (KCNA) in aseiyin ahi. Ahin, Kim hi Pyongyang University of Science and Technology (PUST) kiti evangelical Christian in asemdoh institute’a natong ahi, tin aseiyun, 2010 ‘a kihong doh institute’a American faculty member phabep um ahi.

State department official khat in Washington ‘a America gam-mi kimat demna sangtah aneiyin ahi. “US gam-mi ho venna peh ding hi Department gelkhoh pen ahi. US gam-mi North Korea’a akihen den’e, ti thulhut akimu teng Pyongyang’a um Swedish Embassy toh pan kilakhom ahi”, tin State Department official in aseibe in ahi. Kim hi university ‘a natong akiman anichanna ahi. US gam-mi Tony Kim (Kim Sang-Duk) jong achesa April nisim 22 nikho’a North Korea in amat’a, airport mun’a amat-u ahi.

North Korea gam in achesa kum 10 sung’a US gam-mi phabep amat’a songkul’a akoi uva chule US president ahilouleh official luboh ho akholjin teng ule bou alhadoh jiu ahi. US gam-mi Otto Warmbier leh Korean-American pastor Kim Dong-Chul jong North in amat’a, songkul’a akoi ahi. Pastor pa hi kum 10 songkul’a tang ding’a thutanna aneikhum uva chule Warmbier hi kum 15 songkul’a um ding’a thulhuhna aneiyu ahi.

J&K gam’a athi thingnoimi pa lhahna’a mihem asang’a sim kikhom; police pa thi-opna kin-gon’a lhomcha bou pang

Srinagar, May 8 (Zeenews): Kashmir gam’a sepai hon akaplih Hizbul Mujahideen thingnoimi lamkai Fayaz Ahmad Aishwar thi-lhahna kin-gon’a mihem asang’a sim in pan ala uvin ahi.

Thulhut dungjuiya thingnoimi hon meithal akichoi uvin, Kulgam district’a Sunday nikho’a thi-lhahna kin-gon’a ‘gun salute’ abol uve, ati. Saturday jan’a thingnoimi hon Kulgam’a police khat leh milham 3 akaplih-u ahi. Km 10’a gamlha mun’a thingnoimi hon akaplih police ho thi lhahna kin-gon’a insung mite leh tohkhompi lhomcha bou apang uvin ahi.

Police ho lamlen tosetna thilsoh velha ding’a ache na uva thingnoimi hon abulu uva police 1 leh milham 3 akaplih ahi’in, kikaptona’a thingnoimi 1 thi ahi. Thingnoimi hohin police ho alol’a amat’a meithal lahpeh ding ago masa uve, tin thulhutu in aseiye. Police thulhut in aseina’a chun 2015 kum’a BSF ho bulu na’a pang Fayaz Ahmad Aishwar hi aman’a aumleh dangka lakh 2 kipaman peh ding’a kisei ahi. Athi thingnoimi Ahmad’a kon pistol leh magazine, meichang 8, grenade kimudoh ahi.

Kum masa’a Hizbul Mujahideen lamkai Burhan Wani kitha jeh’a Kashmir Valley’a lha-nga lhing boina um ahi. Hiche’a kon thingnoimi ho japi in sangtah’a atosot kitahlang ahi.

Thusoh Lahchom

Red Cross Day

Leiset chung mun chom chom’a kimang bang intuni chun Manipur a jong World Red Cross Day ana kimang in ahi. MG Avenue’a kimang kinguon chu “Every Where for Every One” thupi mangcha’a kibol ahi. Kinguon a chun Red Cross Movement hin phutdoh Jean Henry Dunant lim pahvui awpehna abol’uvin hitolhon chun Society in asem audio cassette khat jong hondohna aum in ahi. Tuni kinguon a chun lim sut kitetna le extempore speech kitetna jong abol’uvin ahi. Pol-II a pat Pol-VI kikah ho lim sut kitetna’a chun St.Joseph School’a kon D.Vevish Keisham in akhatna’a pachanna aneiyin ahi. Graduate-Post Graduate Ex-tempo speech kitetna’a chun Manipur University a kon Niketa Khwairakpam in akhatna’a pachanna aneiyin ahi. Kinguon a chun  Indian Red Cross Society, Manipur State Branch, RK NImai, Gen. Secretary, Dr.Y.Mohen le member phabep in jong pan ala’uvina hi. Dr.Y.Mohen in ahoulimna’a chun  Red Cross Society hung kiphudoh dan hilchetna aneiyin ahi. Chuleh RK Nimai in ahoulimna’a chun Red cross society in leiset pumpi’a cheng mijouse khentum neilouva kithopina apeh dan ho hilchetna aneiyin ahi.

Kikapto

Tamenglong district noiya um Chingkhoulung kho’a Assam Rifles holeh Zeliangrong United Front (ZUF) thingnoimi ho akikapto uvin ahi. Monday jingkah nidan 9.30 don’a kikapto-u ahi’in, ‘minute’ phabep akikapto uvin, ahin, thilsoh’a akitongkha ahilouleh vangsetna toh aum’e, ti thulhut aumpoi.

General strike

Thoubal district MP Candidature Demand Committee hon Kakching leh Thoubal district’a May nisim 10 jingkah nidan 5’a kon phat teplou general strike bol ding’in asei uvin ahi. Committee in thuso aneina’a chun, Lok Sabha election’a atet/adin ding kiphal louva Outer Manipur Parliamentary Constituency noiya um assembly constituency 8’a kon candidate khat Rajya Sabha candidate’a nominate abol diuva thumna aneiyu toh kisaiya phat teplou strike kouna aneiyu thu asei uvin ahi.

Block Level

Nehru Yuva Kendra (NYK) Ccpur gonna noiyah 8th May, 2017 jinglam nidan 10:30 apat chun Dorcas Mini-Auditorium, New Lamka mun’ah Lamka TD Block noiya um Youth Club chom chom ho’a ding in Block Level Neighbourhood Youth Parliament kingon aum in ahi. Hiche kingon ahin, H. Doungel, Youth Co-ordinator, NYK/CCpur in keynote address seina aneiyin, Resource Person DC, Ccpur R. Sudhan, IAS lamkai na in Skill Development tawh kisai ah Group Discussion anei uvin ahi.

 

Editorial

Pheichunga sa kisem

Insung khat, ucha-pacha kinah hi koima bollou leh koima bol khahlou ahipon, hiche hi phat khat ahiloule phatkhat leh midang chungah jong ana lhung ji e. Insung/ucha-pacha leh thisan khat, sopi khat chuleh pao-le-ham kibang sunga kinah hi angaina mong ahi. Tehse hon ‘kamsunga lei le ha bon kipetto ji’ ana tiuve. Insung khat jeng jong koima 100 lah a 100 kitoh tah a chengkhom um behseh lou ahin, thisan kibah/sopi khat hi man a koima kimoh to jeng lou ahi ti mijouse hetsa ahi. Hitobang a ucha kah, sopi kah a kinahna/ki hetthemmo na ho hi eiho lah ahi tam dehset jong ahi pon, midang chenkhompi lah a lhom chom jong ahi deh poi. Ahinla, vangset umtah in eiho lah a hitobang insung kinahna hi ‘a val’ (extreme) jep ahung bang ji in, thil khohtah ahi. Tulaitah a chenkhompi jatdang namdang hon ha eu a ei eu laitah uva insung kinah-kibao ‘natna’ in eihin phah jing uhi masang ivet leh athim jen jun jeng in, ajoleh I hinman (existence) ujong nasatah a ahin tohkhah thei ahi. Kitha-kimat hi kinah-kibao umjeh ahin, athu hung kipatna jong umtei inte. Tuni hin koi chu mo a, koi chu them ham ti sut sau a ngai pon, ei-le-ei kah a kinah na hi ngahdoh ahitheilou jong leh, guhthima ngahdoh ding dan akoi jousen I ngaito ding uva dei umpen tah ahi. Chenkhompi nam/jat dang hon hitia ei ho insung kah a kinah-kibao ihin bol uva, kitha-kimat ihin bol uhi I nunglam uva pat akhut u eibeh khum uva, ei nuisat u ahi ti avel in geldoh kit uhite. Mi kinoise be sah leh ki muset be sah thei ahi ti jong geldoh jing ute.

Khonunga I bon uva, I nam pumpi uva i phatchom na ding uleh mi gin le ja hina ding ho joh ha boipi angaikhoh dan hi koi jousen I hetsau ahi in, avel in geldoh kit cheh ute. Bible in ‘Nam/gam khat jong amaho leh amaho aki dou jing uleh dingdoh ponte’ ati hi athah in geldoh kit uhitin, I panna thei cheh uva, nampi phatchomna ding a lung-le-tha jetkhom hithei ta lou ham? I nam uhi I vangset dan u tiding hitan tin, pu-le-pa ten amaho khanga hangsan tah leh napha tamtah ana tohdoh hou jong tukhang in Government chom chom in ei hetpihnom behseh tapouve. Vetsahna in, Kuki ten vannoia a phatlaiya dinga ahatpen a kisei British te ina dou nau, Kuki Gal (Kuki War of Independence) 1917-19 tiho bang Manipur khangthu a gallen loitah ana kisei chu tuchan in government akon hetpehna ima umlou tobang ahi nalaiye. Namdang ho achih jeh uvin, khangthu/history akisem hoisel uvin, a phat laia koiman ima a anagellou (hetphah a jong ana um lou) ho pou tuhin ‘hero’ akiso gam taovin, government in hetpehna jong a them them in ana bolpeh taove. Pu-pa gamlei ana huh na a ahinkho chan hon tua I umchan uhi a lhagao uvin hin veleu, lungdam hihbeh jeng unte! Nampi khankho lenjo avel a igel cheh kit dingu hi mijouse mopohna ahi.

Blankfire

Custom hoitah neite kahi tia ei le ei kah a ikiboltole ngeplah lah jeng, vohchal tuh 5, selpi loichal hija-ja kiki tito, midang to kikah ahiteng vohchal tuh 5 a min i-custom ahijui sehseh lejong chungnunna sangtah chang’a kikigela kilunglhaiji kit jeng.