ET May 8, 2017 News (Local, Regional, National, International, Thusoh Lahchom, Editorial,...

ET May 8, 2017 News (Local, Regional, National, International, Thusoh Lahchom, Editorial, Blankfire)

301
0
SHARE

Sah-solam gamkai hi Southeast Asia lutna ding kotpi’a kisemdoh ding ahi; PM Narendra Modi 

 Shillong, May 7: Sah-solam gamkai sung’a lamlen le infrastructure semhoi ding hi sorkar in agelkhoh pipen khat ahi tin Prime Minister Narendra Modi in tuni Bharat Sevashram Sangha, Shillong  a Centenary celebration a Video Conference mangcha in aseiyin ahi. Aman aseidan in sorkar  hin Sah-solam gamkai sung’a kolphemeivah kisuhna ding in na atong jing in chuleh tourist ho lungluttheina ding in jong natoh aboljing’e. Sah-solam gamkai hi Southeast Asia lutna ding kotpi’a kisemdoh ding ahi tin Modi in aseiye.

Sah-solam state ho suhtheng na ding’a asung’a cheng mipi ho panlahlou apoimo dan jong aseiyin ahi.  Sah-solam gamkai lah’a Swachh Survekshan 2017  top 100 a Gangtok bou pang ahi.Tukum hi Champaran Satyagraha kipatdoh kal kum 100 lhin na ahitolhon’a Gandhi in ivellah thengsel’a koiding ti’a kholhang anasap ho lunggil tah’a gelkhom ngai ahi. Centenary celebration ho hi Bharat Sevashram Sangha in thilpha ana bol ho geldoh na ding’a phat kiliemtah ahi.  BSS team ho hin natural disaster aso tengle mipi kithopina ding’a na atohji’u hi pachat ding’a lomtah ahi. BSS ana phutdoh Swami Pranavananda hin social division le inequality ho ana doudal jing ahi’n tu’a anung jui hon jong Swami Pravananda thuhil ho achepi jing ding’uvin PM Narendra Modi in temna aneiyin ahi.

PM in aseidan in sorkar hin Sah-Solam gamkai semhoina ding in sum tampi asulut jing in ahinlah gamsung a nen le boh atam’a ahileh sum kisulut ho hi pannabei hiding ahi ati. Sah-solam gamkai ho hi Southeast Asia lutna ding’a kotpi a semding kiti ahi’n, kotpi anet’a ahileh koima hunglut nomlou ding ahi. India gamsung hi resource tampi nei ihi’uvin phatah’a imanchah’a ahileh vaichatna ding umlou ahi. Chuleh sorkar  hin resources jouse kimangcha’a Sah-solam gamkai sung’a jong balanced development aumtheina ding’a pan kila ding ahi. Tourist ho hunglut theina ding’a hi lamlen hoitah aum masat ngai ahi. Hiche jeh hin sorkar in Sah-solam gamkai sung’a Dk.40,000 crore lut in lamlen akisem in chuleh railway project 19 jong akihongdoh in ahi.

Bandh kiladoh ta

Imphal, May 7: All Manipur Refresh Written Test Successful Candidate of Police Constable Male (2013 Batch) 2016 hon May nisim 7 jan-kim’a kon nidan 48 bandh akou aladoh tauvin ahi. State sorkar in aganna thei pen’a viva voce bol ding’a kitepna anei jouva bandh kikou alahdoh-u ahi.

Manipur Press Club’a Publicity Secretary in thuso miho akimupi na’a chun, 2013 batch ho’a ding sorkar in viva voce bol ding’a thuso anei jeh’a bandh kikou kiladoh ahitai, ati. Ahin, sorkar in May nisim 15 nikho kah’a viva voce abol louleh JAC candidate hon kiphinna sangtah abol diu ahi, tin gihna aneiyin chule hiche thu High Court’a kipehdoh na sorkar in thuso anei demna jong aneiyin ahi.

Binalakshmi Nepram  Columbia University mun’a Right of Indigenous People programme ading’a kou na chang

Imphal, May 7 : Manipur akon humanitarian, author, civil & gender rights activist Binalakshmi Nepram chu Columbia University, top American University based New York in May 22,2017 leh Right of Indigenous People programme ma pang ding in lhendoh na anei un ahi. Hiche kin hin 2007 kum’a UN Declaration on Right of Indigenous Peoples including Indigenous Women’s Movement chung chang thu kihou lim na anei ding’u ahi. Hiche kin na chun UN Headqualters vil jong anei ding chuleh kihou khom na jong Victoria Tauli-corpuz, UN Special Rapporteur on the Rights of Indigenous People, Dr. Chandra Roy-Henriksen, Chief of the Secretariat of the UN Permanent Forum on Indigenous Issues chujong leh UNICEF leh UN WOMEN ho toh anei ding’u ahi. Binalakshmi Nepram hin Chakma Chief & Barrister, Raja Devasish Roy,Chittagong Hill Tracts mi chuleh USA,Akwessane gam mi  Saint Regis Mohawk Tribe hotoh jong kihou khom na anei ding ahi. Hiche toh kilhon chun Nepram injong indigenous people’s history,culture,struggles, rights leh lands pertaining to Manipur and Northeast India where 90% of people are indigenous  chung chang thu ho Columbia University’a asei ding ahi. 2017 kum in United Nation Declaration on the Rights of Indigenous People (UNDRIP) kum 10 alhing na ahitan ahivang in Indigenous people chung chang thu hi tuchang in aboi jing jeng nalai in ahi. Indigenous people 370 million  lah’a  150 million hi Asia sung’a acheng uvin ahi.

Nepram hin aphudoh Manipur Women Gun Suriviors Network chuleh  Meitei numei lah’a ding New York,United Nations Headquarter mun’a thusei masapen jong ahi in ahi.

KRA in a cadre 2 kithana chungchang’a KNF hetsahna anei

Imphal, May 7 (UNA): Achesa May nisim 5, 2017 nikho Kangpokpi district noiya um Khoken kho a KRA cadre 3 jankhang kim a alupnauva kon’a kikaidoh’a chule 2 kithat a 1 kilhadoh thu chungchang’in T. Simte, Information & Publicity Secretary, KNO/KRA in thuphon ahin neiyin ahi. Amaho chu 2nd Lieutenant Jangkholun Haokip, KRA Army No. 30, 2nd Lieutenant Ngamlet Haokip, KRA Army No. 27 chule 2nd Lieutenant Satlhun Haokip, KRA Army No. 26 ahiuve ati.

Amaho thum hi KRA 2nd Lieutenant rank neicheh ahiuvin chule KNF/KRA jong Suspension of Operation (SoO) noiya umlhon ahigel e tinjong aseiye.

KRA cadre 2 atha jouphat uva ipi jeh a KNF in ama teni hi PRA ahi atiuva chule lunggel/tohgon (plan) phalou aneilhon’e tia ngohna anei ham tin thudoh jong ahinbol in ahi. Hiche toh kilhon chun ahunglhung ding May nisim 9, 2017 kah a KRA cadre teni kithana chungchang’a KNF in ajeh hilchetna phatah ahinpeh ding ahi tinjong aseiye. Ijem tia thuso kibol nahsah louva akikoile kimoh umthim louding ahi tin T. Simte, Information & Publicity Secretary KNO/KRA in hetsahna ahin neikit in ahi.

BMC simlai 4 in an-ngol kiphinna pan ta

Imphal, May 7: Biramangol College Sawombung’a simlai 4 in college thumna sorkar in anahsah loujeh in an-ngol kiphinna apan uvin ahi.

Thi chan geiya an-ngol ding’a kiphinna bol simlai hohi Mayengbam Angam, Secretary, Games and Sports, Ningthoujam Roshan, Magazine Secretary, Lairenlakpam Sophia, Secretary, Debate and Extension chule Yumnam Poonam, Secretary, Girls Common Room ahiuve. College union in asei dungjuiya vaipo aumlou jeh’a college’a regular class umlou ahitai.

Biramangol College hi state college luipen holah’a khat ahi’in, school’a mopohna nei kicheh aumlou jeh’a college hi amin mai maiya um ahi. College’a teacher ho achesa kum khat lo sang louva um ahi, tin simlai kiloikhom hon aseibe uvin ahi. “College’a regular Principal aumpon, chule teacher khatcha in class kitup tah in ala pouvin, simlai 2500 vel atohkhah ahi”, tin Amarjit, secy, Boys Common Room in aseiyin ahi. Sorkar in thumna agelkhoh loujeh’a simlai kiloikhom hon kiphinna abol ahi, tin aseibe’e.

Biramangol College simlai hon achesa Friday nikho nidan 1 don’a Education Minister office maiya ‘placard’ chom chom akidop uva kiphinna abol-u ahi’in, CM gate alhun uva police hon alamtin-u ahi. Simlai kiloikhom hon education minister leh authority hon thumna May nisim 8 nikho kah’a asanpeh louleh May nisim 9 nikho’a umdin second semester exam jong boycott bol ding’a gihna aneiyu ahi.

SC in transgenders thu’a thutan na anei Meghalaya leh Nagaland  in jui lou lai

 Shillong, May 7: 2014 kum ma Supreme Court in transagender ho hi hetpeh na kinei ahitai tia thutan na ana nei chu Government of Meghalaya leh Nagaland in tuchan in hetpeh na aneilhon hih lai in ahi. State mun chom chom leh Nort East sung’a ding nga Meghalaya leh Nagaland in tuchan in Apex Court in asei chu implement  abol lhon hih lai’e tin All Manipur Nupi Maanbi Association (AMANA) Secretary, Santa Khurai in Saturday nichun Shillong mun’a aga hetsah in ahi. Khurai hi transgender ho lah’a ding nga passport, aadhaar leh voter identity card mu masapen jong ahi. Manipur, Orissa leh state dang themkhat in court thupeh ajui un ahi ati. Manipur government in August 2016 kum chun 3000 transgender ho vetkol nading in Transgender Welfare Board ( TGWB) ana tung doh in ahi. Meghalaya government injong transgender ho hetpet na anei thei nading uvin AMANA leh Solidarity and Action Against the HIV Infection in India (SAATHII) in state-level workshop anabol uvin ahi. Hiche kin’a chun 23 legal service providers leh Meghalaya State Legal Services Authority (MSLSA) apang uvin hiche tailou injong Social Welfare, Education, Health, Home leh Law department hon jong pan anala uvin ahi. Shamakami akon transgender community members hon jong workshop machun pan ala un ahi.

SAATHII Senior Program Manager Biswa Bhusan Pattanayak asei na’a chun; Meghalay mun’a TGWB tundoh ding akingai to in ahi. Chuleh Meghalaya government in implement ahin bol thei nading nga TGWB hi monitoring body’a kipan sah ding ahi ati. AMANA leh SAATHII in aseidan in state sung mun chom chom’a transgender hohin suhgim akitoh jing jeng in ahi.Ministry of Social Justice noi in transgender hon social schemes 5 aum in ahi hiche ho chu pension to transgender parents, pre and post scholarship, pension scheme to transgenders (40-60 years) chuleh vocational traning ho hi ahi. Pension scheme hi centre in seh seh in ape in adang ho vang  hi centre leh state government  kitho in 75:25 in ape in ahi.Pattanayak in Meghalaya sung’a transgender um jat  government in hoitah’a survey abol ding avat nalai in ahi ati. Khurai in achai ding nga asei na’a chun Manipur’a beauty parlour leh make-up artists hi atam jon transgender ngen kalo gam tao vin ahi ati.

Minister Th Shyamkumar in Jiribam Horticulture office vil

Imphal, May, 7 (DIPR):  Forest & Environment, Horticulture & Soil Conservation Minister Th. Shyamkumar  in Sunday nikhon Jiribam’a horticulture office vetlhahna aneiyin, minister pa hi official leh thuso mihon akilhonpi ahi.

Progeny Orchard cum Nursery Farm jong vetlhahna aneiyin ahi.

Minister Th Shyamkumar in Borobekra Forest Beat office, Chaudrikhal range office, Kaiserpunji jong avil in, hiche mun’a hi Hmar nam-mi 400 vel cheng ahi. Laitaikhunou avil in chule New Durgapur Primary School, Lamtaikhunou mun jong avil in, vengsung leh khosung numei ho akimupi in ahi.

Khosung mihon har panna louo anche louhing atu diuvin thuhilna aneiyin, hiche’a ding’a fund Horticulture Department in apeh ding ahi, ati. Khosung’a kon haar (organic) pang louva kitu anche louhing leh thil dang dang ho sorkar in achoh’a organic outlet’a ajoh ding ahi, tinjong aseiye. Department in Lamtaikhunou khosung miho heng’a twi kholna mun asahpeh ding ahi, tin kitepna aneiyin chule sorkar scheme chom chom noiya phatchomna amu nading uva numei hon self help group asem diuvin jong aseibe in ahi.

PIA in Mumbai-Karachi flight jouse suspend bol

New Delhi, May 7: Pakistan national carrier PIA in Monday ni’a pat Karachi le Mumbai kikah’a leng huikong jouse alensah lou ding ahidan aphongdoh in ahi.  Hetthei khat chu Pakistan International Airlines (PIA)  hin kaal khat sung ‘a (Monday le Thursday) Karachi le Mumbai kikah’a huikong ni alenlut sah ji ahi.

PIA senior official khat in aseidan in hiche thulhuhna hi traffic volume anem jeh le huikong’a touding mi aumlou jeh’a  kisem ahi ati. Lahore-Delhi flight service vang angai bang’a chelha jing ding ahi. Geldohthei khat chu tulaitah hi Pakistan sepai hon Jammu and Kashmir sung’a India sepoy ni lol atanjou’u le  Pakistan authority in India mi Kulbhushan Jadhav thuguh pole ahi ti’a angoh’a capital punishment apehjeh’a India le Pakistan kikah aboilaitah ahikit’e.  Ahinlah PIA in aseidan in flight suspension hi gamteni kituomo jeh’a kibol ahipo’n ,  gel tobanglouva sum le pai akimulou jeh joh ahi tin suhthengna anei’uvin ahi.

Jet Airways in lenna dangkhat tat kha, tosetna lentah thilsoh peldoh

New Delhi, May 7:  Sunday sun’a Jet Airways lenna huikong leh lenna adang khat alendoh masang’a akitat to in, tosetna thilsoh lentah’a konin ahouidoh uvin ahi.

Jet Airways lenna 9W 603 hi Delhi’a kon Sri nagar jon’a leng ding ahi’in, thilsoh’a huikong tahsa neocha ase in ahi. Thulhut kimu dungjuiya lenna huikong hi nilhah 2.50 ‘a lengdoh ding’a um ahi. Srinagar jon ding Jet lenna huikong alha (wing) in lenna huikong adang khat alendoh kon’a atakhah ahi’in, passenger akitongkha aum’e, ti thulhut akimupoi.

AR hon NSCN(IM) mi 9 leh gal-manchah phabep man

Imphal, May 7: 36 Assam Rifles sepai hon May nisim 5 nikho’a Julukie, Pheren, Nagaland gam’a operation abolna uvin NSCN-IM thingnoimi 9 leh gal-manchah phabep aman uvin ahi.

Operation abol sung uva AK series Rifles 5, US made meithal 1, Shot Gun 1, pt 22 Rifle 1, Pellet gun 1, pistol 2, hand grenade 5, Radio set 1, meichang 300 chule NSCN-IM document phabep amat-u ahi. Akiman mi 9 holah’a mikhat hi self style Captain ahi’in chule mikhat hi Area Political Organiser, NSCN(IM) ahi.

Lalu leh Shahabuddin kihouna audiotape hi semthu ahi, tia RJD in sei; JD(U) in BJP tohgon ahi, tia ngohna nei

New Delhi, May 7 (ANI): Rashtriya Janata Dal (RJD) chief Lalu Prasad Yadav leh Mohammad Shahabuddin kihouna audiotape mipi hettheiya akitahlang jouva RJD in Sunday nikhon tape hi semthu ahi, tin aseiyin chule JD(U) in hiche hi Bihar sorkar lhahsam sah nading tohgon ahi, ati.

BJP hon Lalu douna propaganda anei ahi, tin RJD lamkai Manoh Jha in ngohna aneiyin ahi. “Audiotape hi sem thu ahi’in, BJP script writer ho thil bola hi, thukholna umhen. Lalu Prasad hi right-wing authoritarian lentah ahi”, tin Jha in thuso miho heng’a aseiye. Thilsoh KC Tyagi in demna aneiyin, Bihar sorkar tohkhah nading tohgon ahi, ati.

English thuso’a janhi nikho’a Lalu leh songkul’a um Mohammad Shahabuddin kihouna audiotape thu kivetsah ahi. Thuso’a chun tape alha uvin chule hiche hi Lalu Prasad leh themmo kichan MP pa kihouna ahi, tia kisei ahi.

BJP in Tripura sung’a alliance panglouva govt. asemding ahi ti’a Amit Shah in sei

 Agartala, May 7: BJP President Amit Shah in  tutu’a Tripura a vaihom ruling left Front party ahunglhung ding assembly election’a suhlha ding ahi tin aseiyin ahi.

“Tripura sung’a tunigei hin electoral alliance akisem doh naipoi. Ahinlah BJP hin ama thahat na tah’a election atet ding CPI-M le Left Front in kum 25 vai ahopna asuhbei ding ahi” tin Amit Shah in thuso miho heng’a aseiye.

Shah  hi tumasangjep’a chu Tripura a ni 2 kholjin’a ana kalsuong ahi. Akholjin sung’a chun Bharatiya Janta Party  member ho kibulphuna akholchil in ahi. Tunigeiya party member ding’a amin pelut mihemlakh ni ahungval t olhon’a  Amit Shah in jong ahunglhung ding election’a kisuon na ahin nei ahi.

Shah in aseidan in United Progressive Alliance in kum 10 vai ahop sung’a chun Dk.12 lakh crore vel nehguh in aki thaimang in ahinlah BJP lamkaina National Democratic Alliance noiya tunigei hin chengkhat jeng jong achena kihelouvin akimang khapoi.

“Prime Minister Narendra Modi in asem development model hi  India sung’a cheng mipi le India polam a cheng hon ana san theilou’u ahi. Modi sorkar hin mi bol ngamlou tohguon tampi abol doh in , hiche ho lah’a demonetization jong khat ahi.  Modi lamkaina noiyin India in khat vei kap in satellite 104 akap doh in , hiche jeh hi tutuhin Satellite technology lang’a India jong  gamdang ho hetthei in ahung um’e” tin Amit shah in aseiye.

Amit shah in Tripura akholjin sung’a chun State Party luboh phabep in frontal body ho toh kihoulimna aneiyin ahi. Chuleh Kumarghat a jong mipi kikhop khomna’a thu aseiyin ahi.

Shah in aseidan in Left hi leiset chung’a pat kisumang ahitan Congress jong tu’a hi michen nalou Inn bang ahitai ati.Left in Tripura sung’a vai ahoplai chun numei chung’a khansetna, gamgi polam’a kon thingnoi ho adei phat phat le India sung hunglut, nehguh, Chit funds chule Political violence tampi ana um jing in ahi. Mihem 37 lakh chenna Tripura sung’a hin tutuhin khangdong natoh neilou lakh 8 aval in chuleh khangdong lakh 2 tobang tuhin government natoh lutna ding in akum’u aval tan ahi. Left Front vaihop theplou jeh in tutuhin mihem 65% vel BPL noiya aum’uvin ahi.

Pakisatan in Gilgit-Baltistan a cheng mipite sulinglau jing

Jammu and Kashmir, May 7: Jammu and Kashmir a um sepai hohin ahiding dol sang’in chamlhatna neitah in atohdiu dol sang’in ahabol joh tauve tin Union Minister Jitendra Singh in tuni (Sunday) chun aseiye. Jammu and Kashmir phaicham, South Kashmir a May lhabul tiel a police 6 kitha toh lhon in boina ahung sang cheh tan chule hiche toh kilhon chun munchom chom in milham 6 hinkho jong anabeiye.

Hapta 2 le 3 joule Jammu and Kashmir jong angaina bang’in hung umkit tante. Ahinlah nikhat nini masang chun hiche munvel ah boina leh hahsatna tampi analhung’e. Ahin tua toh tedin aphadon kiti chu ahitan chule para military hojong masang’a sang’in chamlhatna amube tauve tin Singh chun aseikit’e.

MoS  Jammu and Kashmir a nikho 2 kholjin ding’a ahungna ah Jammu and Kashmir jong India sung state dang jouse bang’a khantou machalna lampang ahin mano ding ahitai ati.

Alangkhat ah Pakistan in Gilgit-Baltistan a cheng mipite alung linglausah jing’e tin BJP lamkai khat chun aseiye. Pakistan government in hitobang’a chalohna aneihi asangpen a demthei ahi tinjong aseibei.

India sung’in cheng jongleu Muslim ho chung’a Pakistan in hichan geiya natoh aneithei hi lungdon umtah ahin hiche hi leiset chung mipite dinga mit hadohna khat jong ahi ati. Hichetoh kilhon chun Pakistan hin ajat/ahou kibahpi mi jong dem dehlouva galbol ahiuvin leiset chung lamkai hon ilo a pha ham ti gelkhoh angaiye ati.

Gilgit Baltistan leh PoK seh hilouvin Pakistan hin Baluchistan jengjong adempon amite asu genthei lheh jing’e ati.

India in Jammu and Kashmir a Eiffel Tower sang’a sangjo rail bridge semding

Srinagar, May 7: India in Jammu and Kashmir gam a leiset chung’a train lei (train bridge) sangpen ahin semdoh ding ahitan hiche hi akiboipi laitah ahi. Chule hiche lei hi Chenab vadung chung’a kido ding ahi. Hiche project a dia design hi Finland leh Germany a kon’a kila ahi. Hiche lei saodan hi 1.315 km ahin 359 metre a sang ding chule hiche hi London a Eiffel Tower sang’a metre 35 a sangjo ding ahi. Hiche lei hi Katra leh Banihal ahin Udhampur-Srinagar-Baramulla section noiya um ahi. Hiche munvel hi ling kiho hanta mun ahitoh kilhon in DRDO in phata in avetup jong’in ahi. Hiche lei sahna ding’a sum lutding jat chu dangka 12,000 crore vel hiding ahin tu le tun anatong mi 1,400 aum uvin March 2019 kah’a sahchei ding tohgon ahi.

Thinglhang langpeh a kisem ding lei hi steel kimangcha ding chule remote area langpeh kisah ding chungchang in UK based consultant David Mackenzie chun aseiye. Hiche munvel hi masang chun chele va le chule lamlhahna thei jong anahipoi.

Hiche lei sahna ding tohgon lah a chun lei avengtup jing ding’in aerial security jong akikoiyin online monitoring and warning system jong install kibol ding hichun passenger holeh train a aboi aum jongle kintah a hetdoh theina a pan ahinlah ding ahi.

Train lampi keu hilouva keng’a lamlhahna thei footpath leh cycle trail jong akom tah a kisem ding ahi. Hiche lei a hi hui hatdan (wind velocity) hetdoh theina manchah jong kikoiding, hui 90 km chunglam a ahung kinun le train amacham a kikham jengding ahi.

‘Inspection and maintenance’ a ding’a khao (ropeway) jong kisem ding munkhat akisuh loulai aumjongle kintah a chaloh navahna ding’a angaicha dang dang hojong kikoiding ahi.

Hiche lei semna ding’a steel kimanchah ding jeh chu steel hin temperature minus 20 degree lang akhaang juvin chule huinun 250 kmph a hat jong adoudal joujeh ahi. Chule steel angaicha ding jat chu alhangpi a 24, 000 tonnes ahiloule hisang’a tamjo lutding ahi.

Naharlagun-Guwahati Shatabdi Express hondoh na kinei ta

 Itanagar May 7:  Railway Minister Suresh Prabhu in tuni chun Naharlagun-Guwahati Shatabdi Express hondoh naleh  Arunachal Pradesh’a Murkongselek-Pasighat broad gauge line  songphu najong anei in ahi. State sung’a lines thah 7 surveys kipat thei nading in Union Minister in NFR headquarter, Guwahati, Maligaon mun’a  video conference mangcha in ana phongdoh in ahi. Railway track Assam,Dhemnji district sung’a um Murkongselek apat Arunachal,East Siang district sung’a um Pasighat chan 26.15km hiche lah’a kon in 23.55 km hi state  railway station mun thum sung’a alut in hiche railway station thum hochu Sille, Rani chuleh Pasighat ahi tin official hon asei un ahi. 24 major leh 35 minor track lei (bridge) sep nading in kum masa chun dangka crore 414.85 sanctioned ana kibol in ahi. State sung’a reconnaissance engineering cum traffic survey hon line that 7 kipat nading nga asei nao mun hochu Lekhapani-Kharsang (25km), Itakhola-Seijosa (18), Doomdooma-Namsai-Wakro (96km), Dangri-Roing (60km), Deomali-Naharkatia (20km), Lekhapani-Miao-Deban (75km) chuleh Tinsukia-Pasighat via Simaluguri leh Kanubari (300km) hiding in asei un ahi.

Kejriwal in Satyendra khut’a konin sum-guh crore 2 akilah’e, tia Mishra in ngohna nei                                                                                                                       

New Delhi, May 7 (ANI): AAP sung’a boina aumjing laiya Delhi minister’a kon kinodoh Kapil Mishra in Kejriwal in Satyendra Jain’a konin sum-guh dangka crore 2 akilah’e, tin aseidoh in ahi.

Congress hon Sunday nikhon Delhi Chief Minister Arvind Kejriwal chungchang thukholna aum din’in Mishra thusei jouvin thumna anei uvin ahi. BJP hon Delhi CM apanmun’a konin hai hen, tin asei uvin ahi. Delhi Water Minister anahi Kapil Mishra in Sunday nikho’a Chief Minister Arvind Kejriwal in a-inmun’a dangka crore 2 sum-guh akilah’e, tia ngohna anei ahi. Mishra in aseina’a chu sum hi AAP lamkai Satyendra Jain in Kejriwal khut’a apeh ahi.

Hiche thu Lt Governor Anil Baijal heng’a kahetsah ahitan, investigation agency jouse kahetsah ding ahi, tin Mishra in thuso miho heng’a aseiyin ahi. AAP lamkai leh Delhi Deputy CM Manish Sisodia in ngohna hi jouthu ahi, tin nelkalna aneiye. “Ngohna anei hohi donbut kham jong ahipon, thutah umlou ahi”, ati. Mishra in Delhi LG heng’a photchenna kapeh ahitan, CBI leh anti-corruption wing heng’a jong kapeh ding ahi, ati.

Arvind Kejriwal insung mikhat gam leiset thu’a kinoptona hi dangka crore 50 ahi’in, Satyender in abolpeh ahi, tia Mishra in ngohna anei ahi. Kejriwal in dangka crore 2 sum’a akilah ahi, ati. Satyendra Jain in Kejriwal sum apeh hi kamu ahi’in, jan khovah’a ka imut theilou ahi, tin aseibe in ahi. AAP founder member kahi in, party’a kaum jing ding ahi, tin Kapil in BJP ajop dem, tia thudoh donbutna aneiyin ahi. Chule ‘tanker scam’ a pang mi phabep min ACB (Anti Corruption Bureau) heng’a kapehlut ding ahi, tia jong Mishra in asei ahi.

Amantulla Khan in Kejriwal lamkai lahpeh nading’a Vishwas in tohgon aneiye, tia ngohna thu asei jou tu naicha AAP sung’a boina um ahi. Mishra hi Vishwas toh naicha kiloikhom ahi’in, party’a kon apotdoh louna ding’a Mishra in pan sangtah alah ahi.

Kashmir buluna thilsoh’a thi mi 5 lhingta

Srinagar, May 7 (IANS): Kashmir Valley kibulu na thilsoh’a thi thingnoimi mi 5 alhingtan, Sunday nikhon akitongkha mikhat athi’e, tin police hon asei uvin ahi.

Saturday nikho’a Mir Bazar, Jammu-Srinagar highway, Kulgam district kibuluna thilsoh’a police khat leh milham 2 chule LeT thingnoimi khat jong thu ahi. “Lamlen tosetna thilsoh vesui ding’a che’a police ho meithal’a kibulu ahi”, tin police official khat in aseiye. Police honjong alethuh na uva LeT thingnoimi Fayaz Ahmad akaplih uva chule midang khat kitongkha ahi.

Ahmad hi achesa August 2015 kum’a Udhampur highway’a BSF sepai ho kibulu na thilsoh’a pang ahi, tin official hon aseiyun, buluna thilsoh’a BSF 2 leh thingnoimi 1 thi ahi. Ahmad hi National Investigation Agency (NIA) hon mat ding’a ahol chule koitobang aman aumleh dangla lakh 2 peh ding’a thuphon jong um ahi.

Lalu leh Shahabuddin kihouna audiotape hi semthu ahi, tia RJD in sei; JD(U) in BJP tohgon ahi, tia ngohna nei

New Delhi, May 7 (ANI): Rashtriya Janata Dal (RJD) chief Lalu Prasad Yadav leh Mohammad Shahabuddin kihouna audiotape mipi hettheiya akitahlang jouva RJD in Sunday nikhon tape hi semthu ahi, tin aseiyin chule JD(U) in hiche hi Bihar sorkar lhahsam sah nading tohgon ahi, ati.

BJP hon Lalu douna propaganda anei ahi, tin RJD lamkai Manoh Jha in ngohna aneiyin ahi. “Audiotape hi sem thu ahi’in, BJP script writer ho thil bola hi, thukholna umhen. Lalu Prasad hi right-wing authoritarian lentah ahi”, tin Jha in thuso miho heng’a aseiye. Thilsoh KC Tyagi in demna aneiyin, Bihar sorkar tohkhah nading tohgon ahi, ati.

English thuso’a janhi nikho’a Lalu leh songkul’a um Mohammad Shahabuddin kihouna audiotape thu kivetsah ahi. Thuso’a chun tape alha uvin chule hiche hi Lalu Prasad leh themmo kichan MP pa kihouna ahi, tia kisei ahi.

Nigeria sorkar in thingnoi amat hotoh Boko Haram hon akaimang numei chapang 82 kilhehpi ta

Abuja, May 7 (PTI): Nigeria gam in Saturday nikhon Boko Haram thingnoimi hon kum thum masang’a akaimang simlai 200 holeh sorkar songkul’a um mi 82 kikhutlhet ding’a kihouna akineitai, tin asei uvin ahi.

Lha phabep jihadist hotoh toukhomna alolhing tai, tin president in aseiyin chule simlai mi 21 hi gamdang ho kithopina’a lha gup masang’a kihuhdoh ahi, ati. “Tuni’a Chibok numei 82 val alhadoh-u ahitai”, ati. Phat sottah kihouna akinei jouva security agency hon numei ho anungpui’a chule Boko Haram thingnoimi kiman hotoh kilheh to ahi, ati. Thingnoi hiding’a ginmo mi ijat kilhadoh ahi asei pouvin ahi.

Numei hohi Abuja’a Sunday nikhon President Muhammadu Buhari kimupi ding’in apui uvin ahi. Chibok numei ho chule Boko Haram in akaimang ho alhadoh nading uva president in avel vel’a kitepna anei ahi. Saturday nikho’a numei 80 vel ahin lhadoh-u ahi. Kihouna’a pang Shehu Sani in numei hohi atamjo damsel’a hung kile ahiuve, ati.

Lha ni/thum kihouna anei uva, tu masang’a mi 50 alhadoh-u ahi. Sorkar in tu’a hi adang ho huhdoh nading tohgon aneikit ahi. Boko Haram thingnoimi hon achesa April nisim 14, 2014 kum’a Government Girls Secondary School, Chibok anokhum uva, simlai numei chapang 276 akaimang-u ahi. Hiche lah’a mi 57 jamdoh’a, adang 219 hi ahen den-u ahi. Boko Haram lamkai Abubaker Shekau in Nigeria northeast’a Islamic state semding agot jeh’a 2009 kum’a kon mi 20,000 nailam in thina ato ahitai.

Chibok numei chapang tamtah kikaimang vannoiyin sangtah’a demna anei ahi’in, amaho hi video kisodoh’a Islam houva kipuilut ahitai, tia kisei ahi. Christian pastor khat chanu 2 jong akikaimang holah’a pang ahi’in, akilhadoh thu ajah chun kipana thu sangtah in aphong in, adang hojong ahin lhadoh diu akinepna thu aseiyin ahi. Boko Haram thingnoimi hon chapang akaimang uva, thingnoimi’a hunam’a apan sah jiu ahi. Boko Haram faction chom chom in amat midang 83 ho kilhadoh nading’a pan kilading ahi, tin Buhari spokesman Garba Shehu in aseiyin ahi.

France presidential election vote lhahna kipan ta; Macron leh Le Pen sangtah’a kitet

Paris, May 7 (IANS): Sunday nikhon France gam’a presidential election akipan tan, Independent centrist Emmanuel Macron leh far-right nationalist Marine Le Pen sangtah’a kitet ahi.

Jingkah nidan 8 in France gam’a polling station ho akihong pan in, jan nidan 7 leh kikhah ding ahi. Khopi len mun phabep’a jan nidan 8 chan vote lhahna umding ahi. Macron (39) leh Le Pen (48) hi achesa April nisim 23 nikho’a election round masa’a president ding’a kinem mi 11 holah’a hatpen lhon ahi. Macron hi liberal centrist ahi’in, business leh European Union (EU) toson ahi’in chule Le Pen in France gam masa ding, anti-immigration programme thu’a campaign abol ahi. France gam in domestic economy’a euro adalhah’a chule EU membership’a referendum bol ding amanu hin adei ahi.

Friday nikho’a opinion polls 5 in Macron in election hi 62-63’a ajo ding’a asei ahi. Macron in goljona anei leh France thusim’a ding’a Napolean ban’a president leh lamkai khangthah pen hiding ahi. Chule Le Pen in gol ajoleh France gam’a numei lamkai luboh masapen hiding ahi.

2016 kum’a Pakistan in niseh leh hem-kham apalkeh ahi: Home Ministry

New Delhi, May 7 (PTI): Achesa 2015 leh 2016 kum’a LoC, Jammu and Kashmir gam’a Pakistan in hem-kham apalkeh na thu niseh leh khat kija’a chule kum ni sung’a sepai 23 thi ahi, tin Home Ministry in RTI thudoh donbutna aneiyin ahi.

2012 leh 2016 kum kikah’a thingnoi natoh toh kisai thilsoh 1,142 aumin, sepai 236 leh milham 90 thi ahi, ati. Hiche phat sung’a, kikaptona’a sepai 507 jong athi’e, tin aseibe uvin ahi. 2016 kum’a Pakistan in hem-kham 449 vei apalkeh in chule 2015 kum’a 405 vei apalkeh ahi. Pakistan gam in aguh’a India douna gal abol ahi, tin Major Gen (retd) GD Bakshi in aseiyin ahi. “Pakistan in chamna thu asei vang’a atahsan pon, Kashmir thilsoh hi avetsahna-u ahi”, ati.

2015 kum’a sepai 39 leh milham 17 buluna thilsoh 208’a thi in chule kikaptona’a thingnoimi 108 athi’e. 2014 kum’a sepai 47 leh milham 28 athi in, kikaptona’a thingnoimi 110 thi ahi, ati. 2013 kum’a sepai 53 leh milham 15 athi in, thingnoimi 67 sepai hon akaplih uvin ahi. Tu’a hin chondan thah aumin, sepai hon thingnoimi ho umna mun aumkim seh uleh social media’a thuthot anei uva, akimvel’a cheng mipi ho kikhom uva sepai hon operation abol asuhboiyu ahi, tin Bakshi in aseibe in ahi.

Wipro in gihna thuthot amu jouva security khoutah’a koi

Bengaluru, May 7 (Zeenews): IT major Wipro in Saturday nikhon gihna lekhathot amu jouva konin office mun ho’a security khoutah in akoi tan ahi.

Police ho heng’a gihna thuthot akimu jouva hehna kisem ahitai, tin Wipro in photchenna thuso aneiyin ahi. Chule office mun jouse’a security gahtah’a kikoi ahi, ati. “Company operation asuhboi na aumpon, thukholna achelhah pet ahijeh in imadang kasei loudiu ahi, tin Wipro in thuso aneiyin, ahin, itobang gihna thuthot amu uham aseidoh pouvin ahi.

Ahin, police hon mikhat in dangka 500 crore thumna e-mail athot’a chule sum apeh louvu leh Wipro office mun hi Ricin (castor oil plant’a um gu) ‘a bulu ding’a gihna anei ahi, tin asei uvin ahi. Additional Commissioner of Police (Crime) S Ravi in thuso miho heng’a hehna hi cyber crime police station’a jihlut ahitan, thukholna achelha’e, ati. E-mail hi Friday nikho’a kithot ahi’in, ni 20 sung’a sum apeh diuva company heng’a kisei ahi.

Naxal hatna gam’a CM holeh lamkai luboh hon toukhomna neiding

New Delhi, May 7 (PTI): Naxal hatna gam’a Chief Minister hon civil leh police officer lamkai luboh ho Monday nikholeh akimupi diu ahi.

Chhattisgarh gam’a Maoist thingnoimi hon sepai ho abulu uva CRPF 25 in thina ato na thilsoh jouva toukhomna aneidiu hi Union Home Minister Rajnath Singh lamkaina hiding ahi. Toukhomna’a Naxal ho douding dan thu aseikhom diu ahi. Chhattisgarh, Jharkhand, Odisha, West Bengal, Maharashtra, Telangana, Uttar Pradesh, Madhya Pradesh leh Andhra Pradesh gam’a Chief Minister hon pan alah diuva kouna kipe ahi.

Naxal hatna district 35’a kon district magistrate leh police superintendent chule paramilitary force leh intelligence agency lamkai luboh hojong toukhomna’a pang diu ahi. Operation kibol ho kholtohna, boina hol doh ding chule vangsetna toh alhom thei nading tohgon lampi asem diu ahi. Sepai hon lamlen kisem ahilouleh khantouna natoh chelha ho avetlhah nauva thingnoimi hon lolhingtah’a sepai ho abulu hi boina sangpen ahi’in, hiche ho thu jong aseidiu ahi. Moaist ho buluna natoh 90% hi district 35’a lhung ahi, tin official hon aseiyun chule Maoist hohin gam 10’a um district 68 alo ahi, ati.

Thusoh Lahchom

 

Nalbari tuosetna

 Nissan Terrano gari  in tempo khat aphut khah jeh in naosen khat athin chuleh mi 7 nasatah in anakitong khan ahi.Akitong kha hochu apet pet in Nalbari Civil Hospital mun’a jen ding in anapo lut un ahi. Hiche thilsoh na mun chu Assam, Nalbari National Highway ahi.

Fake facebook ID

Assam sung’a um Bini Amin in Dr. Bikram Saikai min mangcha’a fake facebook account ahong in hiche account’a chun numei chom chom 24 toh relationship anei jeh in tumasang jep chun Diphu mun’a anaki man tai tin Assam regional thuso ho’a kon kimu thulhut chun asei in ahi. Dr. Bikram Saikai in ama min mangcha’a fake account kihon thu ahetdoh phat in Diphu police station nah hetna aganei in ahi. Hiche tohlhon chun Diphu police hon kholchil na anei nao achun Nagaon mun’a cheng Bini Amin chu anaman taovin ahi.

Backward classes

Assam Chief Minister Sarbananda Sonowal in tuni chun kei government in backward classes ho hung khantou nading in lampi chom chom’a kithopi na kabol peh jing nge atin ahi. Programme khat seh seh sung in government in lou lhou mi plain tribe sung’a um holeh backward classes khantou nading in government in schemes jat chom chom leh farm mechanization schemes ho akipe jing nge tin self help group ho tractor ahop peh pet nachun Chief Minister in asei in ahi. Aman aseibe na’a chun; government lam’a kon na kithopi na kipe jing ding chuleh lou lhou hon jong ahithei  leh organic farming lang jong agel khoh ding uvin temna jong anei in ahi.

WY louchang kiman

Narcotic Cell, Imphal West hon Sunday jingkah nidan 5.3 don in  Langthabal Meitei Leikai ‘a mi 2 ‘a konin WY tablet kiti khamnathei louchang amandoh uvin ahi. Auto’a tou mi 2’a kon khamnathei lou kiman ahi. Md Ithemcha @ Samu (33), Sora Mamang Leikai’a cheng pa hi khamnathei packet 4 toh kiman’a chule Md Safiquer Rahman @ Boby, Sora Mayai Leikai’a cheng pa hi packet thum toh kimat tha ahi. Packet khat’a WY louchang 200 um ahi’in, chule akiman louchang hi ‘international market’ a dangka lakh 7 vel man ahi.

Editorial

‘Ching chatlo’

Tukum March 15 nia Pu N. Biren in Manipur Chief Minister dinga kitepna aneijou nidan ijat ham khat jouva BJP office Nityapat Chuthek maia public meeting na alhangsap thupipen khat chu ‘Ching chatlo’ ti ahi. Asei nompen chu, phat masa a Manipur government in thinglhang gam leh amite nahsah mo a akoijeh a kitona um lou, chuleh, kitahsan lelna um ahi. Hiche ho semphat na dinga tua athah a kisem Manipur government in thinglhang gam leh amite nasatah a khantouna leh imalam jouse a machalna aum theina dinga natoh kipan ding ahi, ti ahi. Hiche slogan toh kitoh in N Biren lamkaina Manipur Cabinet in thulhuhna aneiho lah a khat chu, phatkhat seh leh Cabinet meeting hi thinglhang district headquarter ho a nei jing ding ti ajaove. Government thutem toh kitoh in N. Biren hi thinglhang district mun phabep ah loupitah a lemna ana um tai. Amasapen in Ukhrul district headquarter ah loupitah in lem in ana um e. Aban ah, athah hung kisem Kangpokpi district headquarter ah loupina jouse toh mipi hon ana lem uve. Chuban ah, zanhi chun Churachandpur district headquarter ah Chief Minister pu lemna kin ana um kit e. Khonung le jong Chandel, Kamjong, Noney, Pherzawl, Senapati leh Tamenglong district headquarters ho jong aphah tei ding tahsan a um e. Tuchan in thinglhang gam aphah na jouse ah mi lungthim ajodan muthei ahi in, thilphalou vang ahi poi. Achena jouse ah nam/jat chuom chuom chengkhom ho ki lungtoh tah leh ki lungset to tah a chenkhom a ngaidan ana lhangsap e. Hiche banah, lhakhat a nikho khat (10th of every month) thinglhang a CSO lamkai leh haosa ho kimupi na phat ahin phongdoh kit in. Chuleh, a tahsa tah a thinglhang gam achot ti tahlou, scheme leh project jong ijat hamkhat thinglhang mite phatchomna dinga ahin phon keo hilouva, ahin tohdoh ding jong lamvet ahi jing e. Hitobanga thinglhang mite suhlunglhai na ding policy abol ho hi mijousen akipapi in, tuchan in koima aselam a sei aum hih lai e. Tulaitah a Manipur a cheng jat/nam chom cheh in demand ki banglou cheh anei jeh a boina umho toh CM in hitia ‘ngaikhoh’ tah a thinglhang gam leh amite dinga natoh jat chomchom, masanga ana umkhalou, ahin boldoh hi pachat louthei lou vang ahi.

 Govt masa a CM ho umchan toh igah te leh hitobanga thinglhang ngaikhoh a natong Manipur chief minister ana um khapoi tithei leuvin Biren in natoh ahin pan e. Hitobang natoh hi sot ding apal ding vang seingam hi pontin, aphat hunglhun ding nga jeng tilou imacha seingam hinai ponte. Hitobanga thinglhang gam leh amite ngailu tah dan a na ahung kitoh hi thinglhang mite dinga ‘kouna dah’ banga lah thei ahin, limgeh cha a thil umdan vetlou theilou dinmun ahi tai. Phat masa lama ithil to hou kitoh kit taponte ti thei hipon tin, phat masa a ithil to ho peldoh na dinga chingthei tah leh limgeh cha um phat chu ahi. Mi eiho sanga chingjo leh lunggel neijo ahiuvin, khatvei phatbol jeh a ipumpi uva kisunlhah ihin bolkhah ding uhi tijat um tah ahi. Suhlunglhai masat a vallhum ihung hikhah dingu vang kiven loutheilou ahi. ‘Ching chatlo’ (thiglhang lam ah kihei un) ati hi, ipi tup tah tah ham, chuleh ipi bol dia thinglhang gam a hung kihei lut puou ham tihi limgeh cha vet lhah jing ngai ding ahi. Masanga ithilto hou sanga khohjo ito kit tah lou nading uva limgeh cha um phat ahi. Ajehchu, tulaitah a Manipur a cham le lungmon a um theina dinga poimo pen chu khat-lekhat kijatona (Mutual respect) ahin, hiche aum masang in ipi kibol jong leh achaina/among lam jum thouthou ding hileh akilom e.

Blankfire

Hiche kiseileh mi in nommo santin, hiche kiseileh mi in jachatnale kijumsonan gellintin , hiche kiseileh mi in tahsanpontin , hiche kiseileh mi anuijabep inte ti geldohlouva seithei ahinai tia thu moh seisei jong hi umda theileh phadi ahi.