ET May 7 News (Local, Regional, National, International, Thusoh lahchom, Editorial, ET...

ET May 7 News (Local, Regional, National, International, Thusoh lahchom, Editorial, ET Taona)

342
0
SHARE

Buluna’a thi teni insung mite ex-gratia lakh 5 cheh kipe; Mijouse thakhat’a akhantou ding hi Sorkar thah tup ahi: CM

Imphal, May 6, (DIPR): ‘Mijouse thakhat’a akhantou ding hi sorkar thah tup ahi”, tin Chief Minister N Biren Singh in ‘Communal Harmony: Bridging the Gap” seminar’a aseiyin ahi.

Lamka Press Club, Churachandpur mun’a kibol seminar hi Editors’ Guild Manipur leh Manipur Hills Journalist Union in thakhat’a Directorate of Information and Public Relations lamkaina chule District Administration, Churachandpur tosotna’a abol ahi. Kum masa thilsoh’a vangset umtah’a milham 9 thi ho insung mite lunghempina thu aseiyin, “Achesa nikho’a bolkhel/suhkhel ho kingaidam uhitin, nam chom chom kah’a kivetda na umlouvin athah in kipan pha uhite”, tin aseiyin ahi. Boina suhlhap nading’a sorkar in tosotna leh kithungaito na angaichat ahi, tin aseibe’e.

Nam kikah’a lunggel kibah louhin tukhang sangtah’a atohkhah ahi’in, sorkar in boina hobou akhohsah thei ahipoi, ajeh chu khangthah lolhinna nei nom ho chung’a jong mopohna anei ahi, ati. District jouse’a ding’a sorkar in ‘special plan’ aneiyin, chule Churachandpur leh Pherzawl district’a khantouna machalna tohgon ho gangtah’a sorkar in velvetna aneiding ahi, tin aseiye. Chule Lamka Press Club building thah sah ding’in CM in kitepna aneiyin ahi.

Kin-gon’a Chief Minister in Indo-Myanmar gamgi, Behiang, Churachandpur district’a lha masa’a General Reserve Engineering Force (GREF) gari thingnoimi hon abulu na’a nikho-tha lo natong athi teni insung mite ex-gratia dangka lakh 5 cheh jong pehdohna aneiyin ahi. Technical session’a H Doungel, Ramkung Pamei, Dr Ibomcha, Sothing Shimray leh Peter Adani in resource person hina in houlimna anei uvin ahi.

Kin-gon’a Chairman, Hills Area Committee, T.T. Haokip, Parliamentary Secretary (MAHUD), N. Indrajit Singh, Parliamentary Secretary(Health and Family Welfare), S. Subhashchandra Singh, Parliamentary Secretary(IFCD) Lourembam Rameshwor, MLA (Singhat) Ginsuanhao, MLA (Thanlon), Vungzagin Valte, Commisioner, IPR, K. Radhakumar, Deputy Commissioner, Churachandpur, R. Sudhan, President, Manipur Hills Journalist Union, Sothing Shimray leh President, Editor’s Guild, A. Mobi Guest of Honour leh President in apang uvin ahi.

Govt. toh kisai natoh jouse’a Aadhar Card angaichat ding chungchang’a HTC in Govt. heng’a ngehna phabep nei

Moreh, May 6: Government toh kisai natoh jouse a Manipur Government in Aadhar Card ngaitei teiding ahitai ti thuphon anei nung vetchil ding’in Hill Tribal Council, Moreh in temna aneiyin ahi. Ajeh chu Aadhar kikap jonghi Moreh adeh’a thinglhang mite chenna mun ho aphahlou jong tampi aumin NPR format a avel vel’a register akibol vang’in ahithei pon chule inko (Household) 500 val biometric ahithei lou phat in dalhah in aum tauve ati. Hiche thu toh kisaiyin Census department leh akisaipi authority ho henga memorandum ijatvei ham kipelut ahitan ahinlah donse in akikoipoi ati.

Hiche toh kilhon chun Aadhar/biometric a anapang phalou ho akinthei lam’a lahna ding’a government in tohgon ahin neiding, akidalha/achang phalou ho Job-Card update boltheina dia Aadhar card hilouva Government in issue abol document ho manchah thei hiding, Aadhar card ahungkap kahseuva Bank Account honthei hiding, state/centre natoh holthei hiding, academic document ho tongkha louding, security check a kimangcha ID hojong manchah thei nalai ding tiho ahi.

Hiche keu hilouva Government toh kisai natoh jouse’a Aadhar Card kimangcha ding ahi kiti hi achanglou/apanglou ho akapchai teng’u le bou hithei panding, ijem tia temna kinei ho Government in donse a akoi loule Hill Tribal Council leh mipiten kiphinna jatchom chom kibol ding chule deilou thilsoh aumle Government in mo akipoh ding ahi tin Ginsei Lhungdimg, Vice President, HTC, Moreh, Mangminlien Singson, General Secretary, HTC, Moreh leh Victor Limthang, Secretary, Census & Statistics, HTC, Moreh in mipi leh Government heng’ah temna leh hetsahna ahin neiyuvin ahi.

Nengneikim leh Kaikholen kithana chungchang’a Chandel district sung kiloikhomna ho lungkimlou’u, Mo changho akinthei pen’a gotna peh dia kholhang sam’u

Chandel, May 6: Chandel District noiya um Molbem kho’a Nengneikim @ Shilla Haokip (20) s/o (L) Jamkhotil Haokip leh New Keithelmanbi Khupijang kho’a cheng Kaikholen Tuboi (28) kithana chungchang in All Tribal Women’s Organization Chandel District, Kuki Women Human Rights, District Women Committee-UNMM-Chandel, Molnoi Area Youth Union, Molnoi Area Welfare Council, Ching Tam Nupi Apunba Lup-Pallel, Centre for Women and Girls- Lhunajang leh Weaker Section Development Council hon hatah a anop louna’u ahinphong uvin ahi.

Tuni (May 6) jingkah lamchun Molnoi a um Molnoi Area Welfare Council Office a thuso miho toh kimutona khat ah Centre for Women and Girls Secretary Hechin Haokip in kiloikhomna dang thakhel in Nengneikim@Shilla Haokip leh Kaikholen Tuboi kithana hi thilsoh hi Pallel Area leh district sung kiloikhomna chom chom honjong demna sangpen kaneiyuve tin aseiye.

Tunaicha a Phaknung thilsoh jong bei loulaija hitobang thilsoh khat ahung umkit hi vangset umtah ahin hitobang natoh hohi koi hile avel a jomkit loudin temna aneiye. Numei chapang chung’a hitia kichatloh hi hansanna ahipon meidoi ho kilahna khat ahi ati. Delhi Nirbhaya thilsoh injong mo kichan mi 4 gotna pehdia um ahitauve ahinlah Manipur gam in vang numei chapang suse ho gotna akipe’e ti thu agingkha beh poi ati. Hitia gamsung numei chapang kisuse, kithat kiti hohi government leh mipiten ichangei a ihinthohbe nalai diuham tinjong state government leh gamsung mipite chouna aneikit in ahi.

Thinglhang mi numei khat noisetah a bolna leh isuhset jouva thinglhang mi chonna lhongpi dan a leudi dol leu ding, sa thadi dol thading chuteng athu kichai tading tiho chule amopa chamlhatna kipe a achung’a ima gotna kipelou kitiho hi kintah a ngah ding ahi tia  Centre for Women and Girls Secretary Hechin Haokip in aseina banah hiche thilsoh a amo ho daan dungjui a gotna peh ngai ahi tinjong aseikit’e.

Forensic Science leh Post Mortem report dungjui a chaloh a hiche thu hi ahiding doltah a chaitheng ding ahin chule post mortem jong doctor khatseh bou hilou doctor phabep in team asem uva aboldiu, hiche chu video coverage jong aboldiu ahi tinjong aseibei.

Thilse bol’a pangho achandiu dol gotna akipeh loule hiche kiphinna leh kiloikhomna phabep ho lungkimlouna hi kijomjing ding ahin hijeh chun government injong hiche chungthu hi akinthei pen’a ahin suhfel ding’in kiloikhomna ho thalheng in Hechin Haokip in aseikit’e. Hitia melse tah a kithana ho chungchanga kiphinna hohi alolhinna ding’a pan kilajing ding ahi tinjong aseibe kit in ahi.

Chule Moltinchan le Utangpokpi Village Authority in jong Nengneikim le Kaikholen kithana thilsoh sangtah in demna aneilhon’e.

Thina toh teni Ex-gratia kipe ding ahi: Letpao Haokip

Imphal, May 6: Tuni (May 6) chun Khopijang kithana chungchang’a kisem JAC le GoM in kihoulimna aneilhon in hiche a chun Memorandum of Understanding aneilhon tan ahi.  Kihoulimna’a chun GoM thalheng in Letpao Haokip, IFCD & YAS Minister , DC Chandel, SP Kakching. SDPO Sugnu le SDO Chakpikarong in pan ala’uvin ahi.  MoU dungjuiya chu Nengneikim le K.Tuboi kitha chungthu phatah’a kholchilna um ding muona neiho guotna pehding chuleh athi teni insungmite ex-gratia pehna ding’a Minister pa’n pan hatah’a alah ding ahi. Civil Society organization ho’n investigating agency le District administration atosot ding’u tin jong MoU a chun akisun in ahi.

Minister Letpao Haokip tailou vin jong government officials dang hon jon MoU achun Krishna Kumar,DC, Chandel; S. Goutam, SP, Kakching; R. David, SDO, Chakpikarong leh A. Romendro Singh, SDPO, Sungnu hon jong soi abol uvin ahi.

Letpao Haokip in Sugnu sung’a um communities ho jouse in chamdel’a hinkho ama khom jing diu vin jong temna anei in ahi.

DBT le Financial inclusion velvetna  um

Imphal, May, 6 (DIPR): Deputy Chief Minister Y.Joykumar Singh in tunic hun Manipur sung’a Welfare scheme kibol ho toh ksai Direct Benefit Transfer (DBT) le Financial Inclusion jouse velvetna aneiyin ahi. Velvetna chu tuni Manipur Secretariat (South) Block , Conference Hall sung’a kibol ahi.

Velvetna kinguon’a chun  Rural Development, Social Welfare, Tribal Affairs & Hills le Schoo Education Head of Department hon pan ala’uvin ahi. Department hon tutu’a DBT mangcha’a welfare scheme ho lolhingtah’a aboltheilou’u hi thinglhang gamho’a banking facility aumlou jeh ahi.  Bank official hon jong thinglhang gam ho’a bank branch honding angaituo diuvin Joykumar Singh in temna aneiye.

State , Commissioner (Finance) V.K.Dewanggan in aseidan in  State sung’a hi tutu’a unbanked block 32 um ahi’n tutuhin block 21 khat’a bank branch honding tohguon achelha jing’e ati. Tukum June lha’a kon T.Vaichong, Phungyar, Nungba le Sangaikot’a  bank khat cheh kihongdoh ding ahi. Chuleh official hon Beneficiary bank account ho Aadar le Mibile  number seeding agangtheipen’a abolchai diuvin temna kaneiye tin Dewanggan in aseiye.

Tuni velvetna kinguona  chun bank official hon jong pan ala’uvina hi. Bank official hon aseidan un March nisim 31, 2017 nikho gei chun Saving Account 26,85, 430 akihongdoh in hiche lah’a chun 10,38,895 hi Aadhar seeded account ahi.  Scheme chom c hom’a beneficiary ho hi aguom’a 1,23,599 ahi’uvin amaho lah’a hin beneficiary 2,370 vel in bank account anei’uvin ahi.

BOSEM in achung’a ngohna kipe ho kholchil ding committee khat sem

Imphal, May 6:  BOSEM in aguong 2017 Pol-X themvetna’a  answer script vetlhahna chungthu’a boina ahilou le mipi lang’a kon tahsanlalna thu tampi akijah hi phamo akisa’n hitolhon chun mipi in BOSEM  answer script vetlhahdan ho chung’a tahsanna aneitheina ding’uvin Committee khat akisemdoh’e tin Principal Secretary [Education (s)] , GoM, Vineet Joshi a kon kimu thulhut in aseiye. Committee hin thusoho’a hung kiso ho kholchilna aneiding chule suhdih thei jouse suhdihna ding lampi aguong ding ahi. Chuleh thuso ho’a BOSEM chung’a ngohna kineiho adih’a ahileh, koi jeh hamtijong akholchil ding ahi. Committee hi member thum panna hiding ahi. Amaho chu L.Nandakumar Singh, Deputy Secretary (Edn-S)-Convenor; Ph.Nandakumar Sharma (Retd) JS (BOSEM)-Member chuleh Sh.Bimolchand, Member Board-Member  ahi’uve.  Committee hin kaal khat sung’a GoM heng’a report apehlut ding’u ahi.

POCIL team khat in BP-76 le 78 vetlhahna nei’u; Myanmar govt. in India gambeh metre 800 kilahlut

Moreh, May 6: Tuni (May 6) jingkah nidan 7:30 donchun People’s Organisation for Civil Integrity and Liberties (POCIL), Heirok President Khundrakpam Ibomcha Singh panna a mi 13 in asem team khat in Haolenphai toh kinaicha a um Indo-Myanmar Border Pillar (BP)-76 leh Tamil Temple Border Pillar (BP)- 78 vetlhahna aganeiyuve. Haolenphai haosapu anaumlou jeh chun asopi Paoboi Singson toh akilhon un BP-76 agavelha uvin hiche a chun masang’a anaumsa Border Pillar chu Myanmar government in abotdoh in December nisim 17, 2014 chun athah anaphutkit uvin tugei hin aum nalaiye tin Paoboy Singson in aseiye tin Khundrakpam Ibomcha chun aseiye.

India/Manipur official ho avil a ahung teng’u le hiche hitiho jonghi nahsah in akoiji pouvin twi lah’a songtum kiseplut tobang bep ahijitai tin Ibomcha in alung kimlouna aphong’in ahi. India gamsung metre 800 tobang hung sunglut a fencing cannel kilaigot jonghi akinthei pen’a Manipur government in aboipi ding’in ngehna aneiyin chule akibol kin loule Myanmar government in Manipur gambeh phabep alahlut ding’in aumtai ati. Hitia mi gam kikilah lut hi mi noisena hatjong ahina banah achesa March nisim 4, 2017 nikho’a Haolenphai saw mill ahin nungthah loulai’u chungchang jong geldoh agaiyin chule hitia natohna aneiyuhi India mite kinoisena khat ahin ahinlah Indian Government in ima hetphah in akoipoi tinjong aseikit e. GOI in India leh Myanmar relation hoisah ding bou agel in gamgi a chengho ding agel phapoi tin Khundrakpam Ibomcha Singh chun aseikit e.

Manipur a um civil society honjong leiset kihuhbit jingding ahi tia kholhang asaple leuhi tahsanna jong akensuh cheh cheh tan hijeh chun thinglhang gam a cheng hileh phai gam a cheng hileh thakhat a pan lahkhom angaikhoh tan achuti loule Manipur gambeh ijat hamkhat jong mangthah ding’in aumtai tin POCIL President in temna aneiye.

Achunga ngehna kineiho government in donse louva akoile kiphinna kibol ding ahi tinjong aseibei. Tule tua Tamil Temple a BP-78 jong hi semthu ahidan government natong honjong ahesoh keiyuvin ahinlah kihetmosah tah in aum nalaiyuve tinjong aseiben ahi.

PRA chungchang’a KNF in ngohna anei MLA Ngamthang Haokip in hilchetna leh suhthengna nei

Imphal, May 6: Eimi Times dated 6/5/17 a hungkiso “Mi 3 kiman, 2 kikaplih, 1 kihenden: KNF in kiphonna nei” kiti heading noiya ‘PRA hi masanga Congress Minister khat in ama election kaina dinga dangka crore 2 a meithal achoh a asem ahi tia ngohna anei…’ kiti chungchang in Saitu MLA Ngamthang Haokip in hilchetna ahin neiyin ahi. Hiche a chun KNF Information & Publicity Secretary LH Stephen in ngohna anei toh kisaiyin ama’n PRA kiti gamnoi kiloikhomna hi masang in ana kihe khapon chule tuchung’a ahung kisei ging chule aphutdoh a ngohna eiki neikhum hi nommo kasalheh in chule ana umkhah tah jongle kaki samkaina aumpon hiche hi keima political career minsetna ding’a kibol hiding ahi tin MLA Ngamthang Haokip in hilchetna aneiyin ahi. Term 5 jen election kahung kaidoh jonghi mipi leh Hao lhacha ho ngailutna jal ahin phung le chang chule thingnoi songnoi ho thahatna leh panpina jal a election kakaidohna aum khapoi ati.

MLA Ngamthang Haokip in aseibena ah election jonghi free and fair tah a mipi deilhen chu Pathen deilhen ahi ti songpum a katetji ahin i-nam u khantouna dingle machalna ding’a kabolthei top kabol ahin vangset umtah a nam khangdong 2 in thina ato lhon chungchang’a hin lunghempina kaneiye ati. Eimi ho khantou machalna ding kagel khoh laitah a hitia ginchat louva ngohna eikinei khum hi nommo kasalheh in chule hitiho boipi man in jong kaumpoi tinjong aseikit’e.

Gamsung leh nampi khantou machalna ding’a pangjing kahitoh kilhon in achunga kisei ngohna hotoh kaki samkaina ima aumpoi tin Saitu MLA Ngamthang Haokip in suhthengna ahin neiyin ahi.

KSO in boljang kithana thilsoh demna nei

Imphal, May 6: Boljang vangkho’a thingnoi kiloikhom khat in kiloikhom dang khat cadre ni athana thilsoh chu KSO General Headquarters in sangtah in demna aneiyin ahi.  Hetthei khat chu jaanhi jaan’a chu  SoO noiya um thingnoi kiloikhom cadre phabep in Khoken’a kon kiloikhom dang khat cadre thum ana kaidoh’uva ajing kah’a chu Boljang vangkho’a mi ni athisa’a ana kimudoh ahi.

Hitobang thilsoh ho hi’n SoO noiya um thingnoi kiloikhom ho kah’a kithana le kidouna ahinsodoh thei keu hilouva gamsung a chamna daltan’a jong hung pangthei ahi tin KSO in aseiye.  State government in jong SoO noiya um thingnoi ho kah’a kitha kimat ho asuhthip ding’a lomtah ahi. Ajeh chu SoO dan le mol dungjuiya thingnoi ho chaloh dan vet tup ding hi state government  mopohna ahi. Akithat to thingnoi kiloikhom teni jong hi anigel lhon’a SoO noiya um ahilhon in, ahitheiya ahileh khat le khat kijato tahle kingailu tah’a aum lhon’a pha ahi. Faction kah’a kitha kimat hin kivetda na le kiphulahtuona bou ahinpohlut ding ahi. “Mit khel’a mit, Ha khel’a ha” kiti hin mijouse mitcho asuoding ahi tihi faction teni’n ahet lhon angaiye tin KSO Gen.Hq , General Secretary Seiboi Haokip a kon kimu thulhut chun aseiye.

Chuleh aki kaimang mithum ho lah’a  Jangkholun Haokip jong agangtheipen’a lhadoh ahina ding in KSO Gen.Hq in ngehna aneiyin ahi.

 

Motbung Baptist Youth Fellowship (TBA-I) in kiphudoh kal kum 58 lhinna mang’u

Kangpokpi, May 6 : Motbung Baptist Church (TBA-I)  houbung’in May nisim 6, 2017 nilhah in “Pakai lampi sem jang’un” ti thupi mangchan Motbung Baptist Youth Fellowship kiphudoh kal kum 58 lhinna chu ‘Foundation Day Cum Musical Nite’ in houbung mipin ana mang uvin ahi.

Hiche kinguon achun S. Paolal M.A, B.D in ‘Pakai lampi semjang un’ John 1:23 a pansan khangdongte Pathen thu-a tilkhouna aneijin, Chule Local Artist, Vahshi Lhouvum, SK Lencha, Seijalen, Vahhoineng, Kimjoicy, Mary, Hekhol, Remy le Local Gospel Band The Mix ho akon Pathen vahchoi la ngeitahtah jong anasadoh uvin, Motbung CED ho akon Choreography vetnom umtah jong vetlhah na ana neijun ahi.

Hetthei khat chu Motbung Baptist Youth Fellowship hi Tongkhotinthang Lhouvum, President leh SL Paokhosei Secretary hina a May nisim 6, 1959 kum’a ana kiphutdoh ahi.

Khosung miho in ahung lhung ding election boycott bol go’u

Tura, May 6: Kum 2012 election chun’a kho 10 sung’a lungboi na jeh’a kibung khen na ana umjeh in ahung lhung ding election kah’a suhtheng na anei lou uleh election boycott kibol ding ahi tin gih na anei un ahi. Hiche kihou lhah nachu Takurbilla mun C&RD blocks of Raksamgre, West Garo Hills leh Bajendoba,North Garo Hills (NGH) May 3 nichun anei un ahi. Hiche kho 10 hochu NGH mun vel’a um ngen ahi in ahi. Hiche lungboi na’a(confusion) na nei kho 10 hochu : Takurbilla (Garo Village), Takurbilla (Rabha Village), Darugre, Borjhora, Daporpitha, Sarapara, Namapara, Puranipara, Pokirmora leh Amtuli kho ho ahi uvin ahi. 2012 kum chun hiche kho ho hi electoral villages- Dadenggre Civil Subdivision under 44 Raksamgre LA, Constituency’a ding in anaphongdoh un ahi. Hiche kibung khen nahi mipi hetpeh na umlou va chuleh daan toh kitoh lou’a kibol ahi in ahi. Kapu kapa teu khang nga kon na Meghalaya state hung kisem doh’a pat Bajengdoba constituency mun’a vote ka lhah jing utoh kilhon in tun voter  thah 1400 tobang akihap be kit in ahi tin kihou khom na’a chun asei uvin ahi. Convenor,Sengnang Marak  in asei na’a chun; democratic rights mu nading nga pan nasatah’a kila jing ding ahi chuleh itiham khat na state in nasah’a akoi lou leh kachang uva vai kakihop ding u ahi ati.

AR Ex-Servicemen hon Rally nei

Imphal, May 6: Assam Rifles Ex-servicemen rally chu AR Churachandpur Sector ho gonna in 6th May, 2017 nikho chun DTC, Tuibong mun ah aum in ahi. Hiche rally ahin 200 Assam Rifles veterans, 45 widows of Assam Rifles personals leh Ccpur leh Bishnupur district akon Veer Naris ho apang uvin ahi.

Hiche kingon ahin, V. Hankhanlian, Cabinet Ministern Agriculture, Veterniary and Animal Husbandry; Brigadier Ajay Kumar, Commander 27 Sector Assam Rifles, Khaipao Haokip, Chairman, Autonomous District Council, Churachandpur, Colonel Sanjay Kumar, Commandant 25 Assam Rifles, District Council member ho chuleh, District Administrative Officers chom chom ho jong apang uvin ahi. Rally hun sung ahin, ex-servicemen ho’n pension toh kisai a boina chom chom anei hou suhlhap na ding in Stall chom chom aki hong in, Assam Rifles ah Ex servicemen insungmi ho’a ding in Medical camp, CSD Stall, Addhar card stall chuleh, District Administration, Agriculture Department, Horticulture Deparemnt leh Krishi Vigayan Kendra (KVK) ho’n Stall ahong uvin ahi. State Bank of India (SBI) leh Axis Bank hon jong stall ahong uvin ahi.

Chief Guest apang V. Hankhanlian, Cabinet Ministern Agriculture, Veterniary and Animal Husbandry in Neithinkip Haokip w/o Late Rfn/GD                     Lunminlal Haokip of 23 Assam Rifles, ama hi 2015 kum a chu NSCN (K) Counter Insurgency Operations ana thi ahi. Thangzagin father of  Late Rfn/GD                     L Ginlalven Ngaihte  of 13 Assam Rifles ho kipa thilpeh peh na aneiyin ahi. Chuleh, 49 widows of Assam Rifles Ex Servicemen Personals ho award pehdoh na Brig Ajay Kumar, Commander in anei yin ahi.

Assam leh Arunachal Pradesh gamsung’a AFSPA lha thum um be nalai ding

Itanagar, May 6: Assam gamsung’a thingnoi groups – ULFA leh NDBF in boina asem jing toh lhon in Friday nichun Home Ministry in Assam sung ‘disturbed’ mun ahi ati tohlhon in lha thum ma ding in Armed Forces ( Special Powers) Act (AFSPA) noi’a akoi tan ahi. Assam tailou vin jong Home Ministry in Arunachal Pradsh district thum : Tirap, Longding leh Changlang jong ‘distrubed’ mun ahi ati tohlhon in hiche district thum hojong AFSPA act noija ding in lha thum ma akoibe peh kit tan ahi.

Arunachal Pradesh district thum leh Assam gamsung jouse lha thum AFSP noi’a um ding chu May 3 leh kichepi pan ding ahi ati. Home Ministry in asei na’a chun; AFSPA, Assam sung’a lha thum kikoibe ding ahi ajeh chu state sung’a 2016 kum’a 75 vei thilsoh jeh’a milham 33 leh security personnel 4 in anathin chuleh akipui mang cases 14 jong hiche kum ma ma’a achun ana um in ahi ati. State sung’a 2017 kum sung hin thilsoh cases 9 aum tan hiche’a chun milham 4 leh security personnel 2 anathin ahi.

Home Ministry in aseibe na’a chun; thingnoi groups : NSCN (IM), NSCN (K), ULFA, NDFB leh adang in Arunachal Pradesh district thum sung’a boi na asem jing jeh uva AFSPA May 4 apat ding nga hung kikoi kha ahi ati. AFSPA Act hi Assam sung’a November 1990 apat’a anakikoi pan in chuleh Arunachal Pradesh district mun thum ma hi January 2016 na  pat anakikoi pan ahitai ati.

Chingmeirong’a athisa kimudoh nu ajite in atha hiding’a ginmo jeh’a ajipa inmun kibulu; vengsung’a kon nodoh tau

Imphal, May 6: Kum 17’a ypa R Lunglailu thina thilsoh’a ajipa Khunaijam Inaocha leh ateh-te insung in pan alah ahi, tia seiya mipi kikhom phabep in Chingmeirong Kabui Khul Mamang Leikai’a Inaocha inn asuse uvin ahi.

Photchen loulai thulhut khat in aseina’a chu indan (room) khat’a thisan mat na bedsheet kisel khat inn suse hon amudoh uve, ati. Alangkhat’a, Lunglailu kitha na thilsoh toh kisaiyin JAC akisem doh in, JAC in Inaocha leh a-insung mite vengsung’a konin anodoh uvin, inmun jong JAC phalna louva ajoh theilou diuvin gahna anei uvin ahi.

Inaocha, anu chule asopipa jinu Lamphel police station’a Friday nikho’a kipelut-u ahitai. Chingmeirong Kabui Khul mun’a Inaocha inmun asuhset jouvun toukhomna aneiyun, memorandum asem uvin Chief Minister leh Lamphel Police Station officer-in-charge heng’a apelut uvin ahi. Ginmo ho chung’a charge sheet akisem nading chule court in gangtah’a athu aseilhah’a themmona neiho thina chan gotna apeh diuva ngehna aneiyu ahi.

Inaocha te inmun chungchang’a, memorandum’a chun inmun kijoh ahilouleh kiman hi Chingmeirong Kabui Khul leh Chingmeirong Mamang Leikai authority ho hetna umlouva kiphal louding ahi, tin aseiyui. State sorkar in nithum sung’a thilsoh umchan asei uva chule lawyer hon themmona nei ho kihehna’a adin pi lou diuvin aseibe uvin ahi.

RRM in ‘plastic’ suhmang nading campaign pan ta

Imphal, May 6: Royal Riders Manipur (RRM) in Badminton Indoor Stadium, DM College mun’a lhakhat lhing environment campaign 9th edition of Mahousa Ima Lairembi Ningshing Tha-2017 apan tauvin ahi.

Kin-gon’a Ziit Saikhom, General Secretary, RRM in houlimna aneiyin, campaign hi United Nation in lhakhat lhing World Environment Day aman toh kisai ahi, tin aseiyin chule kho-leh-veng’a plastic kiman lou nading bidoiya campaign kibol ahi, ati. Plastic thil kimang lhomcha bou re-cycle kibol ahi’in, atamjo hi kipaiya, hiche hohin gam-leh-go atohkhah ahi, ati. Plastic thil kimang alhomna ding leh plastic’a kon gu phalou ho suhmang nading’a mipi tosotna ngaicha ahi, tin aseibe’e.

DM College mun’a poster leh sticker campaign abol uhi Lila Singh Khongnangkhong, Chingmeirong, Khurai-Lamlong, Kongba Bazar, Singjamei chule Imphal East leh Imphal West lamlen lai ho chan’a abol uvin, Badminton Indoor Stadium, DM College’a akinga uvin ahi. Mahousa Ima Lairembi Ningsing Tha-2017 hi June nisim 5 nikho leh RRM office, Games Village mun’a khumkhana kin-gon umding ahi.

‘Act East Policy’ thu’a seminar um

Imphal, May 6: Waikhom Mani Girls College,  Thoubal Okram mun’a “Opportunities and Challenges of Act East Policy to North Eastern Region” ti thupi in ni-ni national seminar akipan tan ahi.

Waikhom Mani Girls College leh Thoubal College in University Grant Commission noiya seminar agon ahi’in, Additional Director, Education (U) RK Yaiskul in chief guest hina in seminar hondohna aneiyin chule Centre in gamkai khantou machalna ding’a apohdoh ‘Act East policy’ hi mijousen ahetthem angai dan thu aseiyin ahi. Policy chungchang atamthei pen’a ihet uva phatchomna imu diu ahi, ati.

Manipur University professor E Bijoykumar in “Opportunities and Challenges of Act East Policies to North Eastern Region” ti thupi in phat amang in chule Dr Sanaton, Waikhom Mani Girls principal masa, tu’a principal Dr O Ibeton, W Ranjit, Thoubal College principal masa W Nipamacha jong kin-gon’a apang uvin ahi.

TDMPCDC  in RS election thu’a thumna thah nei

Imphal, May 6: Thoubal District MP Candidature Demand Committee in Outer Parliamentary constituency’a pang Thoubal ditrict Assembly constituency’a kon mikhat Rajya Sabha’a asol diuvin thumna aneiyun, constituency miho hin ama parliamentary constituency kilhenna ding thaneina kipelou ahi, tin aseiyui. Assembly constituency 8 lah’a khat hi’a Wabagai ‘a kon Haji Abdul Salam thi jeh’a panmun ong ahi’in, hiche jeh’a ahunglhung ding May nisim 25 nikho leh Rajya Sabha seat election umding ahi.

Outer Parliamentary constituency noiya um Assembly constituency voter 2.35 lakh vote pe theiya ahivang’a candidate’a ding theilou hohi Heirok, Wangjing Tentha, Khangabok, Kakching, Sugnu leh Hiyanglam ahi’in, abon’a hi Thoubal leh Jiribam district noiya um ahi. State sorkar in thumna asanpeh nading uvin toumun kiphinna jong abol uvin chule thumna nahsah ahilouleh Rajya Sabha election boycott chan kibol ding, kiphinna chom chom kipan ding ahi, tin gihna aneiyui. Lok Sabha election’a candidate ding’a adin theilou thu uva lunglhai louna aphong uvin ahi. Lok Sabha seat hi ST’a ding’a reserved kibol ahi.

Moreh College Women’s Hostel leh Indoor Sports Training kihongdoh

Moreh, May 6: Tuni (May 6) sunkim nidan 1:00 velchun Moreh Chikim Veng ah Moreh College Indoor Sports training leh Women’s Hostel hondohna kingon anaum in ahi. Tuni kingon a chun Dr. Mohammad Arif, Joint Secretary, University Grant Commission (UGC)-NERO, Dr. Raheijuddin Sheikh, Director, DDU, Centre for KAUSHAL, D.M. Community College, Imphal, Dr. SL. Lhunjapao Vaiphei, Principal Moreh College, Moreh, Lunjapao Haokip, Chairman GB, Moreh College chule T.S. Sanasam Secretary, GB Moreh College hon pan alauvin hiche a chun Dr. Mohammad Arif, Joint Secretary, University Grant Commission (UGC)-NERO chu Chief Guest in apang’in, Dr. Raheijuddin Sheikh, Director, DDU, Centre for KAUSHAL, D.M. Community College, Imphal Guest of Honour in apang in chule Dr. SL. Lhunjapao Vaiphei, Principal Moreh College, Moreh Functional President in apang uvin ahi.

Hiche Sports Training facility chu mi 1000 ket thei a kisa ahin ribbon chetan toh lhon in Moreh College Women’s Hostel hondohna jong anaum ngal in ahi.

Moreh College hi Asian Highway 01 komtah a um ahina banah Myanmar leh China toh kinaipen a um college khat ahi tin Chief Guest pa chun aseiye. Hiche college a hin Myanmar simlai tampin jong themjilna aneiyuvin ‘Education in right direction’ kiti hi tup le doi pipen hisah angaiye ati. Hitiho gelna a Myanmar langa honjong aloi apai, a-kho, a-veng chule a-insung mite seh hilouva agam (national) jengjong ahin dalhah uva hiche college ahinjot u ahi ati. Hijeh chun igamsung uva simlai hojong lekha lam seh hilouva kichep golseh ho’a jong tilkhou jing ding’a class room kisuhsel, indoor/outdoor stadium chule Women’s hostel kiti hojong angaikhohpen ahin hicheho sahna ding jong hung kingaito ding ahi ajeh chu India gam a hin numei lekha sim lampang hi akiha tilkhou pon hitobang lunggel ho suhbeina ding’a lunggel leh tohgon jatchom chom hojong kingaito ahi tinjong aseikit’e.

Assam leh Arunachal Pradesh gamsung’a AFSPA lha thum um be nalai ding

Itanagar, May 6: Assam gamsung’a thingnoi groups – ULFA leh NDBF in boina asem jing toh lhon in Friday nichun Home Ministry in Assam sung ‘disturbed’ mun ahi ati tohlhon in lha thum ma ding in Armed Forces ( Special Powers) Act (AFSPA) noi’a akoi tan ahi. Assam tailou vin jong Home Ministry in Arunachal Pradsh district thum : Tirap, Longding leh Changlang jong ‘distrubed’ mun ahi ati tohlhon in hiche district thum hojong AFSPA act noija ding in lha thum ma akoibe peh kit tan ahi.

Arunachal Pradesh district thum leh Assam gamsung jouse lha thum AFSP noi’a um ding chu May 3 leh kichepi pan ding ahi ati. Home Ministry in asei na’a chun; AFSPA, Assam sung’a lha thum kikoibe ding ahi ajeh chu state sung’a 2016 kum’a 75 vei thilsoh jeh’a milham 33 leh security personnel 4 in anathin chuleh akipui mang cases 14 jong hiche kum ma ma’a achun ana um in ahi ati. State sung’a 2017 kum sung hin thilsoh cases 9 aum tan hiche’a chun milham 4 leh security personnel 2 anathin ahi.

Home Ministry in aseibe na’a chun; thingnoi groups : NSCN (IM), NSCN (K), ULFA, NDFB leh adang in Arunachal Pradesh district thum sung’a boi na asem jing jeh uva AFSPA May 4 apat ding nga hung kikoi kha ahi ati. AFSPA Act hi Assam sung’a November 1990 apat’a anakikoi pan in chuleh Arunachal Pradesh district mun thum ma hi January 2016 na  pat anakikoi pan ahitai ati.

Facebook’a post khat abol jeh’a Cachar district,Police Officer khat suspend kibol

Guwahati, May 6: Deputy Superintendent of Police khat in facebook’a BJP MLA khat in tahsa’a(flesh trade)  kivei  nalam’a ngoh na ana nei thu facebook’a post abol jeh’a  sunpension ana kibol tohlhon in tuhin hiche toh kibang cheh thilsoh khat ahung um doh kit tan ahi. Thuso ho’a kon kimu dungjui in Cachar district mun’a Thursday nichun Naba Kumar Bora, Officer in charge of Lakhipur police station  chu Prime Minister, Assam Chief Minister leh top officials Assam police ho facebook dung nga dei lou/boi na ding thu atah doh jeh in suspended akibol kit tan ahi. Hiche masang chun hiche police officer pa hin social media dung’a transfer nading thu’a application ka submitted tan ahin higher authorities lam’a kon in order vang kamu poi atin ahi. Assam cop hon asei na’a chun facebook’a hung ki post chun higher authorities ho a service uva kon na ahai nading thu akisun joh in ahi ati. Social media dung’a ki post dungjui in Assam police hon hiceh police official pa chu suspended abol taovin ahi ati. Hiche toh kilhon chun facebook a ki post dungjui chun Deputy Superintendent of Police (DSP)  chu suspended akibol in ahi.DSP asei na’a chun BJP MLA nu hi tahsa’a (flesh trade) kivei nalam’a apang in ahi ati.

Art le Music machalna ding tohguon kinei ding ahi: Minister L. Jayanta Kumar Singh

Imphal, May, 6 (DIPR): Art and Culture Minister L.Jayantakumar Singh in tuni  Palace compound’a um Shri Bal Mukunda Dev Music College (SSDBMC)  a 55th Foundation Day kinitna kin’a ahoulimna’a chun gamsung Art and Music khantouna ding’a natoh ding lunggel aneidan aphongdoh in ahi. Jayantakumar in aseidan in Music hin mijouse khantum umlouva pao khat’a thu aseipeh thei ahi ati. Fold le traditional Music a hi ipu ipate’u chondan ho hetdoh thei ahi. Musician ho le Musicologists ho’n jong indigenous music ho chungchang’a research hatah’a abol diuvin temna aneiye.

Government of Manipur a kon team khat in Gurgaon (Gurugram) , Haryana’a um art & culture site vilna akineiyin tuhin hitobang site khat jong gamsung (Manipur) a semdoh ding lunggel akineiye. Sorkar in art & Music semhoiding tohguon aneina’a hi mipi in akithopi louva ahileh lolhinglou ding ahi tin Jayantakumar in aseiye.

Kinguon a chun Music College ho jana pahvui awpehna anei’uvin ahi. SSBDMC simlai hon music ngainom umtah tah ho akikhom mipi ho angaisah’uvin ahi. Hiche kichai chun Jin-gun’a pang Jayantakumar in Souvenir hondohna aneiyin chuleh  Manipur Fold Music Competition 2016-17 a pachanna neiho kipaman hoppeh na jong aneiyin ahi. Kinguon’a chun M.Lakshmikumar Singh, IAS, Commissione Art &Cultre le Dr.K.Sushila, Director, Art &Culture  Kineipa le Jin-ja’um in apang lhon’e.

Kuki Inpi Hall, Saikul a numei kiloikhomna hon awareness nei

Imphal, May 6:Tuni (May 6) chun Integrated Rural Management Association(IRMA), District Women Committee, UNMM chuleh Kuki Women Union, Saikul ho tohgon noiyin Kuki Inpi Hall, Saikul ah ‘Gender Based Violence’ thudol in kihoulimna anaum in ahi.

Hiche a chun Helam Haokip, Secretary, IRMA in Manipur gamsung a ani ania numei ho chunga khansetna apun jing hin agamsunga numei ho asulinglau in hiche hi thilkhoh tah ahitoh lhon’a numei ho thipbeh a umtalou a kipunkhom a doudal ding chuleh amopo hon jong numei ho venbitna ding tohgon ho  ahiding doltah a achepi teiding angaiye ati. Resource person a pang Lamneichong Haokip, Advocate in jong Legal Aspect lampanga numeite ho hetdia poimo tampi hilchetna anei in ahi. Discussion kichai in numei tampi in Phaknung gangrape case thua sorkar in agangthei pen a mona neiho gotna apeh a chuleh numeiho chunga khansetna apun jing suhtang ahina din kijotna/rally jong anabol uvin ahi.

No-fly list dan kisem hi hetthei ahipon, ‘ban’ kibolna phat sung kicheh hen, tia expert hon seiyu

New Delhi, May 6 (PTI): Government draft rules noiya ‘no-fly list’ dan hi airlines in bou ahet ding’a koilou ding ahi, tin expert hon aseiyun chule air passenger rights body in dan kisem hi het hilou chule gangtah’a kisem ahi, tin aseiyui.

Ministry of Civil Aviation (MoCA) in janhi nikho’a lenna suboi passenger ho chung’a dan phabep kisem phondohna aneiya chule ‘no-fly list’ ‘a pansah ding’a aseiyu ahi. Passenger dihlou tah’a chon hohi lhathum’a kon kum ni chule achunglang lenna huikong’a tou theilou ding’a kisei ahi. “Ahivang’a chonvalna category akhen houhi itobang ahi kiseilou ahi. Dan kisem hi hetthei ahipoi”, tin Sudhakar Reddy, founder leh national president, Air Passengers Association of India in aseiyin ahi.

Ban kibol aphat sung hi sorkar in asemding, airlines khut’a apehdoh louding ahi, tin industry expert hon aseiyun chule dan dungjuiya hinkho kilahna thei gihna boldoh ho hi kum 2 leh 3 chan ‘ban’ kikoikhum ahi. Chule airlines in achonval’a ngohna anei passenger ho thusei ho adih/atah ahi ti photchenna aum’a ahileh sorkar in passenger ho compensation apeh ding thu jong asei diuvin Amber Dubey, KPMG in aseiyin ahi. Chule itobang hi chonval ‘a kisim ham, tijong passenger ho hetsahna aneiyu angaiye, tin Reddy in aseiyin ahi.

“Mi tamtah in abolkhel leh abol khellou ahetlou ahi. Tamtah in huikong’a atouna masapen chule lekha helou jong um ahi. Dan hi gangtah’a kisem ahi”, tin Reddy in demna aneiyin ahi. Ahin, ban kibol khom hon committee heng’a ngehna anei thei ding’a dan kisem liemna aneiyin ahi. Tata-SIA airlines Vistara in dan kisem liemna aneiyin, hiche hi lenna huikong’a tou ho venna ding chule flight operation phatna ding ahi, ati. IATA (International Air Transport Association) in draft policy velvetna akineiyin, sorkar heng’a ngaidan donbutna kipe ding ahi, ati. Draft policy hi ni 30 sung donbutna leh ngaidan seina ding’a phat kipe ahi’in, hiche jou June nisim 30 nikho leh sorkar in amendment chaina asem ding ahi.

US Prez in houthu toh kisaiya thupeh anei Sikh American member khat in pachatna nei

Washington, May 6 (PTI): US President Donald Trump in ‘religious liberty’ thu’a thuso (executive order) apeh hin America gam’a nam jouse aven nom na amusah ahi, tin Sikh American member khat in aseiyin ahi.

US gam’a ‘hate crime’ akalbe jing hi mi phabep in President pa themmo achan ahi, tin Jasdip Singh, Sikh Americans for Trump founder in aseiyin ahi. President Trump in campaign abolna’a ‘hou thu’a chamlhatna’ peh ding hi aseikhoh pen khat ahi’in, mihem khat ama tahsan jeh’a gotna pehlou ding hi ama tahsan ahi, ati. Thursday nikho’a President Trump in ‘religious freedom’ soi kaina aneiya, hiche’a hi Treasury Department in political speech jeh’a houbung ahilouleh hou-thu’a kiloikhomna ho chung’a action alah louding’a thuhilna um ahi.

Rose Garden’a National Day of Prayer ni’a kouna kipe Sikh American amabou ahi’in, Singh in hou thu’a chamlhatna hi thupi tah ahi, ati. “Thu kisei thei leh kisei theilou hi sorkar in censor abol ding ahipoi. First amendment noiya mikhat chun thusei nading’a chamlhatna anei ahi”, ati. Houbung tobang kiloikhomna hon political speech asei theilou ding’a kisem Johnson Amendment lahdoh ding’a Trump in campaign abol laiya kitepna anei ahi. ‘Promoting Free Speech and Religious Liberty’ kiti executive order soi kaina anei ahi.

Pak-Afghan in hem-kham kouna aneitoh kilhon’a gamgi’a boina suhnem hita

Islamabad, May 6 (ANI): Chaman gamgi’a meithal kikap jeh’a Pakistan gam-mi 9 athi’a chule Thursday nikho thilsoh’a mi 40 akitohkhah jouvin Pakistani leh Afghan military official hon gamgi’a boina suhnem na ding’a kihoulhahna anei tauvin ahi.

“Pakistan leh Afghan Director General Military Operation in kihouna aneitai. Director General Military Opeartions (DGMO) Pakistan Army Major General Sahir Shamshad Mirza in Pakistan khosung’a meithal kikapna thilsoh demna aneiye”, tin Inter-Services Public Relations (ISPR) in thuso aneiye. Director General Military Opeartions (DGMO) Pakistan Army Major General Sahir Shamshad Mirza in gamgi hi kho kikah ahi’in, mun ong ahipoi, tijong hetpehna aneiye, tin aseibe uvin ahi.

Afghan DGMO heng’a sepai ho boina suhnem nading’a amaho gamgi’a aum diuvin Mirza in temna aneiyin ahi. Commander-level Border Flag meeting jong aneiyu ahi. Friday nikho’a Pakistan in Afghanistan Embassy Charge d` Affairs kouna apeh’a, alunglhai louna thu asei ahi. Afghan sepai hon Pakistan gam hopsung Chaman munvel meithal’a akap jeh uva numei leh chapang panna’a mi tamtah kitongkha ahi. Thilsoh’a Kali Luqman kho’a inmun phabep mortar chang in akhah ahi’in, akitongkha holah’a chapang thum pang’a, chapang ni hi sangtah’a kitongkha ahi.

Petrol pump’a electronic chips joh’a mi 4 kiman

Muzaffarnagar, May 6 (PTI): Police hon Saturday nikhon petrol alhing’a pehlou nading’a kimangcha electronic chips joh’a gang ho amandoh uvin, member 4 aman uvin ahi.

Lucknow police headquarter’a kon kimu thulhut chun operation abol na uva gang member 4 kiman ahi, ati. Akiman hohi Abbas, Arun Kumar, Ajay leh gajendra ahi’in, chip 1, remote control 8 chule dangka 1,83,500 toh kimat tha ahi, tin SSP Bablu Kumar in aseiye. Amaho hin petrol pump’a thao kijoh hohi alhing’a akite louna ding remote control electronic chip asem uva ajoh-u ahi, ati.

Thilsoh toh kisaiyin case jihlut ahitai. Achesa April 27 jan’a STF hon petrol pump sagi kholna aneina uva remote control chips akimang’e, tihi hetdohna aneiyu ahi. Official hon asei dungjuiya, hiche manchah jeh’a thao joh hon lhakhat’a hi dangka lakh 14 tobang sum-tong amu-u ahi. Chip hi dangka 3000 vel man ahi’in, thao hi 5%-10%’a akemsah ahi’in, wire ‘a kon remote control’a kisuto ahi. Remote control hi akisemtoh sa ahi’in, mikhat in thao litre khat akichoh leh, 940ml ahilouleh anoilang bou amu ahi.

May 18, 19 leh 22 nileh Delhi NDMC, SDMC leh EDMC mayoral election umding

New Delhi, May 6 (PTI): Delhi Lt Governor Anil Baijal in civic bodies hon apeh nikho phatsahna aneitoh kilhon’a tulha leh municipal corporation thum’a Mayoral election umding ahitai.

North Delhi Municipal Corporation’a May nisim 18, South Delhi Municipal Corporation ‘a May nisim 19 chule East Delhi Municipal Corporation election May nisim 22 nikholeh umding ahi, tin senior civic official khat in aseiyin ahi. Municipal corporation thum’a mayoral election bol nading nikho LG heng’a kithot ahi’in, nikho phatsahna anei ahitai. Election vesui ding presiding officer leh senior officer ho thu hi kingah jing nalai ahi”, ati.

MCD election achesa April nisim 23 nikho’a anaum’a, BJP hon goljona sangtah aneiyu ahi. Tu’a apot ding mayor thum hohi abon uva BJP ahiuvin, party in MCD hi achesa kum 10 avaihom ahitai. Kum masa April nisim 28 nikho’a NDMC mun’a Sanjiv Nayyar hi mayor ding’a lhendohna um’a chule SDMC leh EDMC mayor ding’a Shyam Sharma leh Satya Sharma kilheng doh ahi. Mayor post hi kum nga kilhah-u ahi’in, term nga um’a, amasapen hi numei ho ding’a reserve kibol, anichanna hi open, athum channa hi reserved category chule achaina teni hi open category ahi.

Tughlakabad mun’a ‘gas leak’ jeh’a simlai 200 hospital’a kipolut

New Delhi, May 6 (Zeenews): Saturday nikho’a school mun kom’a ‘gas leak’ jeh in Rani Jhansi Sarvodaya Kanya Vidyalaya, Tughlakabad, Delhi’a kai simlai 200 vel hospital’a apolut uvin ahi.

Simlai hohi hospital chom chom mun 4’a kipolut ahi’in, Delhi gamsung Tughlakabad munvel’a depot’a gas a leak jeh’a damlou ahiuve. Thuso miho heng’a vice principal, “Simlai phabep in mit leh lol thah asei jeh uva hospital’a kipui ahi”, ati. Depot hi school kom’a um Railway Colony’a um ahi. DCP (Southeast) Rombil Baniya in sangtah’a dammo aumpoi, tin photchenna aneiyin ahi.

Jingkah nidan 7.35 don’a gas leak ahi’e, tia kouna kija’a, fire-tender gari sagi in thilso namun adellut ahi, tin Delhi Fire Services senior officer in aseiyin ahi.

Thusoh Lahchom

 

Huipi jeh’a Mi 6 thi chuleh inn 2,500 suse

Thursday ni jan leh Friday ni jinkah lam’a gelchang,huipi leh go nasatah’a akitho jeh in Assam gamsung’a mi 6 numei jao nan athi in ahi. Chuleh inn 2,500 tobang asuse in mi 12,000 nasatah in atongkha in ahitin official akon kimu chun asei in ahi. Inn kisuhset na tam na pen chu Kokrajhar district ahin Assam state Disaster Management Authority official hon report apet dungjui uvin 1,400 alhing in ahi ati chuleh mi 7,200 tobang atongkhan ahi. Adang 1,100 inn hochu Golaghat, Tinsukia, Dibrugarh, Darrang chuleh Karbi Anglong district ho ahi uvin ahi. Official hon asei na’a chun; mi 4 in thi na atoh in khat pa chu keh in ase jeh ahi ati. Athi ho lah’a mi thum mi chu Mohan Sasoni (Karbi Anglong), Hiren Barua (Tinsukia) chuleh Hasmat Ali ( Bongaigaon) achai napen pa hi keh in ase lih pa chu ahi in ahi. Unofficial report dungjui in mi 6 athin hiche lah’a chun numei khat apang in hiche nu min chu Pinky Barua akitin ahi. Hiche numei nu hin anao teni inn chim in adelpha huhdoh ding nga achena na hung thi den ahi tin akiseiye.

Northeast

Northeast India sung Arunachal Pradesh, Assam leh Meghalaya’a  go leh huipi  hatah’a kitho ding din mun in aum in ahi. Chuleh Nagaland, Manipur, Mizoram, Tripura, south Madhya Maharashtra, south interior Karnataka leh Kerala gamsung ho’a jong kolphe leh keh hung lhung ding injong aum in ahi.

 

India leh Bangladesh

Meghalaya ah tuni chun BSF hon gampam mi ho border gamgi’a ahung lut jing jeng ji jeh uvin border fenced dung nga alarm system koi tah ding in Director General K K Sharma in asei in ahi. Gamdang toh gamgi ahi jeng vang in tuchan in jong fenced kikai lou na mun jong tamtah aum nalai toh kilhon in hiche fenced kikai lou nalai ho’a technological lampang kimang chading ahitai tin Sharma chun BSF’s 8th Annual Medical conference achun asei in ahi. Kum khat masang chun BSF hon hiche border’a pat hung lut chuleh gancha dung’a kivei ho mi 16 tobang jong ana that taovin chuleh kum 3 masang in BSF hojong mi 4 tobang anathi taovin ahi.

 

NSCN (K)

Thulhut kimu dungjui in Saturday nichun Arunachal Pradesh’a Khonsa mun vel in security forces hon  NSCN(K) thingnoi 2 anaman un ahi. Kohima based Defence PRO Colonel Chiranjeet Konwer in asei na’a chun; DAO DIVISION noi in Khonsa Battalion Assam Rifles hon south Arunachal Pradesh ,Kunsa mun’a kholchil na ana nei nao’a Lt Wanphai Wangsa leh Cpl Kekho Homku ana mandoh un ahi. Thingnoi mi teni hin khosung nga kai adon lhon na mipi te asuh ling lou jeh’a kiman ahi tin Defence PRO chun asei in ahi. Security forces hon hiche thingnoi teni kom’a chun 9mm leh 7.65mm pistol amudoh un ahi. April 8 ni’a Laju kiti mun’a Lt Kijen Rongshang ana’u chu achesa lha khat sung’a ding nga Khonsa battalion hon senior cadre thingnoi amat’u hi ani vei channa ahitan ahi.

Editorial

Death to rapist Cum-murderer

                Rape and murder has occurred in Manipur too with increasing frequency. The latest such incident is reported to have occurred in Sugnu area in the evening of May 4 last. Something needs to be done to control, if not totally prevent, such barbarity. In a land where rape and murder has become a routine occurrence despite advocacy for stringent punishment for such heinous crime there should be no second opinion with regard to the price to be paid by the rapist-cum-murderer – such inhuman and barbaric “human beings” should not deserve a life of any form but should be put to the gallows. This is what the apex court of the country thinks is the right penalty for the 2012 December Delhi gang rape case where a group of men including a “minor boy of 17” not only raped a girl but killed her in such a barbaric manner. This “Nirbaya rape and murder” is a high profile case and caught the attention of the whole nation. But there are several such heinous cases of rape and murder in the country, some even unreported in the media. Manipur does not lag behind when it comes to this type of crime where a girl/woman is not only raped but murdered too. Murdering a rape victim is double crime and the perpetrator(s) commit such double crime to hide the first crime of rape. The witness to such crime, if any, is murdered too. This could be the case with regard to the rape and murder of a tribal girl in Sugnu area two days back. If rapist and murderers (if caught) have to pay with their lives then nobody will like to lose his life for a physical gratification and pleasure of a few minutes (not even or an hour or a day).

                  The absence of stringent penalty for rape and murder must have contributed to the ever increasing incident of such crime. Rapist and murderers do not go scot free of course. They are tracked down somehow and put behind bars. Putting such criminals in jails is a civilized and human way to give a chance to such perverts to reform themselves and lead a good life afterwards. This is as per the law of the land too. However, such benign law has seemingly failed to deter others from resorting to such crime. Therefore a strong and “scary law” could be the only deterrence to keep such heinous crime rate at bay and for this death penalty seems to the only way. Life imprisonment for rape alone could be reasonable. Life term in jail could also be thinkable for murder. But when both the crimes are committed on the same victim there should be no second opinion on the price to be paid by the culprit(s) and it has to be death. For, no one commits such crime unknowingly. Harsh punishment to harsh criminals alone could prevent heinous crime such as rape and murder combine.

ET Taona

Van’a um kapau Pathen midangin gancha tha a ithalouna diuleh ka kho ka gam u huhbitna dia Nam chemjam le Nam pummei kadop sausau uhi keiho le keiho kikah a thisan sona leh thunei kichuna a kaman louna diuvin lungthim le chihna neihin peloichel jeng diuvin kahung tao uve amen