ET May 6, 2017 News (Local, Regional, National, Thusoh Lahchom, Editorial,Blankfire)

ET May 6, 2017 News (Local, Regional, National, Thusoh Lahchom, Editorial,Blankfire)

297
0
SHARE

Chief  Minister N Biren Singh in PMBJP hondohna nei

Imphal, May 5 (DIPR): Chief Minister N.Biren Singh in tuni chun Jawaharlal Nehru Institute of Medical Sciences (JNIMS)  a Pradhan mantra Bhartiya Jan Aushadhi Kendra (PMBJK)  hondohna aneiyin ahi. PMBJK hondoh ahitolhon’a Manipur sung’a jong Pradhan Mantri Bharatiya Jan Aushadhi Pariyojana jong hondoh ahitai tithei ahi.

PMBJK hi neilou le gentheiho’n lou le ai manbai tah’a akilah na ding’uva kiguong scheme khat ahi.

Tuni kinguon’a chun CM N.Biren Singh Jin-gun in apangin, Union Minister of State for Chemical and Fertilizer Mansukh L.Mandaviya Jin-ja’um in apangin chuleh Family Welfare Minister L.Jayantakumar Kinneipa in apang in ahi.

Mihem  hinkho hi atepibai ahijeh’a Central Government in PM Narendra Modi lamkaina’a genthei chaga hon manbai tah’a lou le ai akichohtheina ding’uva PMBJK sheme ahinbol ahi. Scheme hi genthei le vaicha ho ding’a phachomtah ahijeh’a State government in khohsahna kineiya Mansukh L.Mandaviya toh kihoulimna’a akinei jouva Manipur sung’a jong hondohna kinei ahi. Pradhan Mantri Bhartiya Jan Aushadhi Kendras noiya hi mi vaicha hon  branded drugs ho toh composition kibang generic medicine ho manbai tah’a akichoh thei ding’u ahi. Kivaihopna ahoitheina ding’a  hi kitahna aum ngai ahi’n, council of Minister ho heng’a jong kitah tahle lunglut tah’a mipi na atoh ding’uvin temna kaneiye. Gamsung’a khantouna bulhingset aumtheina ding’a developmental work le project ho jouse aphat dungjuiya review kibol jing ding ahi tin CM N.Biren in kinguon a chun aseiye.

Genthei ho le middle class hon manbai tah’a kijenna anei ding’u hi Central Government bidoi lenpen khat ahi.  PMBJP noiya kihom ding lou le ai ho hi level chom chom’a patepna akibol jouva WHO in jong aphatsa ahita’n, mipi in lungsa’i h na anei’u angaipoi. Doctor ho’n jong migenthei ho ajen teng’u le  mantah tah’a kijoh branded lou le ai ho sang a generic lou le ai ho joh prescribe abol ding’uvin temna kaneiye.PMBJK kihon nom ho ding’a Bureau of Pharma PSUs of India (BPPI) in  Dk.2.5 lakh gei one-time financial assistance apeh ding ahi tin Mansukh L.Mandaviya in ahoulimna a aseiyin ahi.

Numei khat le pasal khat thilong kimudoh, TSA in demna nei

Kakching, May 5: Sugnu Police station noiya um Moltinchan leh Khumjang khoteni ah pasal khat leh numei khat athisa in akimudoh lhon in ahi. Thilong kimu numei nu chu Nengneikim@Shilla Haokip (20) d/o (L) Yamkhotil Haokip ahin Chandel district noi New Molbem kho’a kon ahi akiti. Janhi nilhah tiel nidan 6:30 velchun Nengneikim hi achenna inn a kon in anapotdoh in tujingkah a achenna inn toh metre 800 vel a kigamla Moltinchan kho munkhat a alongdamsa kimudoh ahi. Amanu hi alol ki-atna maha aumin chule akisuse ahidan jong akilang’e akiti.

Alangkhat a thilong khat kimukit chu Seikhokai Len Tuboi (28) s/o Doujaneh Tuboi akitin New Keithelmanbi a cheng ahin tule tua Khuijang a aloinu inkote kom a um ahi akiti. Atuhkhu lang’in thil gih khat a kivohna maha jong aumin ahi. Seikhokai Len hi janhi jingkah a New Keithelmanbi lang’a kache ding ahi tin anapotdoh e tin aloinu chun aseiye. Chule tujingkah Khumjang khomol a athilong anakimudoh ahi.

Aumtalou Nengneikim leh Seikhokailen umna khojong kinaicha ahi. Chule athilong lhon akimudohna mun jong km 1 tobang in akigamla e akiti.

Thusoh umchan ajahphat un SP Kakching, S. Gautam Singh, SDPO Sugnu, Romen, OC Sugnu, P/S Membor Singh ahung un thilong kimuna munteni Forensic Expert hotoh ahung vechil uvin ahi. Hiche chungchang hin Sugnu Police in case khat ajihlut in thukholna jong apanpai ngal un ahi. Thilong teni jong JNIMS Porompat a Post Mortem ding’in anapophei tauve.

Hitobang thilsoh deilou vetsahna’n mipihon Sugnu Chakpikarong lamlen anating uvin ahi. Phat chomkhat jouva police hotoh ahung kihoutoh phat u nilhah nidan 3:00 velchun lamlen ana hongkit tauve.

Hiche thilsoh chungchang hin Thadou Students’ Association, Chandel District in alunglhai louna aphontoh kilhon in Government in hitobang thil phalou bol ho achan diuva lom gotna apehding in Michael Lamjathang Haokip, General Secretary (TSA-GHQ ) leh district chomchom a TSA kiloikhomna hon ngehna aneiyuvin ahi.

Igam sung khantou machal na ding’a Mipi leh Nam lamkai ho pankhom angaije: MLA 60-Singngat A/C

Lien S. Gangte

Ccpur, May 5: Ginsuanhau, MLA 60-Singngat A/C kipapi na kingon 5th May, 2017 jinglam midan 11:30 apat chun Singngat Bazar ah aum in ahi. Hiche kingon ahi’n Artist chom chom ho’a kon in lasah ngailhah na leh PWF Lailam Veng ho’a Lapawl ngaih lhah na jong aum in ahi. MLA Pu kipapi vetsah na in Haosa, Organisation chom chom ho’n kipa thilpeh peh na leh Pahvui oh sahna jong anei uvin ahi.

Ginsuanhau, MLA 60-Singngat A/C in holim anei na’ah, Election itet lai uvin BJP leh Congress in lam chom chom ah kilhai tet na ina nei uvin, election ana tet holeh mipi ho’n achesa ho ihaimil uva, tua BJP ngense ihung hi’u toh kilhon a lungkhat le thakhat a ipan khom diu ahi ati. BJP Govt. ijop uva BJP hi Govt. siemna’a iman lou uleh igam sung’a development toh kisai’a na deibang’a kitong theilou ding, Central Govt. BJP ahi na ban’ah, KNO/UPF apat inam lamkai ho deina bang a kal kisong ahi tin jong aseiyin ahi. KNO/UPF in Political demand kibang ahin nei taovin, igam sung khantou na ding’a mipi ho nam lamkai ho toh ipankhom diu ahi ati. Igamsung ah natoh ding tamtah aum in, Sangaikot TD Block jong Sangaikot Sub-Division in aki khel in, Songdoh Sub-Division jong maban naicha’a kihong ding ahi ati. Singngat PHC jong CHC in akikhel in, Operation Theatre jong hung um vah ding ahitai ati. Songdoh PHSC jong PHC hiding ahitai, Sangaikot PHC jong manthei hiding ahi tai ati. Behiang a Police Station jong Singngat Police Station toh dinnum kibang a kikoi ding, Gazzete Order jong asoh tai ati. Sub-Division jouse’n Development Work kibang chet’a amu diu ahi ati. Behiang Trade Centre ding jong Sanction aum loujeh in natoh achelha theipoi ati. Ccpur apat Singngat kikah lamlien akinlam’a semphat ding kidei jong leh BRO hon eipeh lhah lou jeh uvin, Director, Doner, New Delhi ah ngeh na lekha akipe lut in, tu’n BRO ho’n eipeh lhah phat uleh natoh kipan ding ahi ati. Tender jong akijou tan ahi ati. PMGSY noi’a lamlien siem na ding in Ccpur District ah lamlien 16 aki sanction, Singngat in 10 achang in ahi ati. CM Special Pakage noi a Singngat Khosung a ding in Dangka crore 18 leh lakh 14 CM in approved ka bol ding ahi ati. Secial Pakage chom chom a ding in dangka 88 Crore lakh 41,00000/- proposal akibol in ahi ati.

Khaipao Haokip, Chairman, ADCC; K. Vungzalian, Ex-Minister, President, BJP Ccpur; Suanchinpau, MDC, Lungthul; Hempao Haokip, President, Singngat Kendra; Khupkhanhau, Chief of Singngat leh P. Tongthang, Special Contractor ho akon holim ngailhah na aum in ahi. Chuleh, 60-Singngat A/C  2017 MLA Electon a Polling Percentage sangpen a 3-na chan ho kipaman hopdoh na aum in, hiche achun akhat na 60/20-Lamlai Polling Station in kipaman dangka 50,000/- aki san in, polling percentage 84.57% ahi. A 2-na 60/18-Mongbung Polling Station in kipaman dangka 30,000/- akisan in, polling percentage 83.33% ahi. A 3-na 60/15 G. Monglian Polling Station in kipaman dangka 20,000/- akisan in, Polling percentage 78.40% ahi.

Mi 3 kiman, 2 kikaplih, 1 kihenden, KNF in kiphon na nei

Imphal, May.5: Kimat le kitha thilsoh khatna, jan hi jan khovah nailam nidan 2:30 vellin Kangpokpi District sunga mi thum ana kipuimang in jingkah khovah lhah in mi 2 athisan akimun, khat ana kiholmon ahi.

Hiche hi New Keithelmanbi area, Saitu Sub Division sunga um Khoken vangkho’a thilsoh ahi.

Puimang’a ana um mi 3 hochu khat KRA PRO ahi akitin ni athisa kimu teni chu PRA a Lieutenant le 2nd Lieutenant ahilhon’e akitin chule amaho chunga natong hi keiho kahiuve tin Kuki National Front (KNF) in tunilhah lamin kiphonna anei tauvin ahi.

Tujingkah khovah lhah’a meichang maha pu’a athisa kimudoh teni chu Satkholhun Haokip (35), s/o Letkholal Haokip, N. Songpijang village le Ngamlet Haokip (41), s/o Janglam Haokip, Thingbongjang village ahilhonin amani hi People’s Revolutionary Army (PRA) kiti non-SoO group khat’a pangin ngohna aumin ahi.

Alangkhatna tuchan’a apuimang ho khutna umdia ginchat um pahi Khoken vangkho’a cheng Jangkholun Haokip ahi akitin, amahi KRA a PRO ahi tinjong akiseije.

Athi teni longdapsa chu Police a analauvin RIMS morgue a Postmortem boldin ana koitauvin ahi.

Alangkhatna, hiche thilsoh to kimat in tuni nilhah lamchun UPF noija um Kuki National Front (KNF) in keiho natoh ahi tin kiphon na le ipijeh’a hitobang gotna achan’u ham ti hilchen na jong aneijun ahi.

KNF Information & Publicity Secretary, LH. Stephen a kon kiphon nale hilchetna thuthot kimun aseina’a, tujinga Khoken vangkho pamlang Boljang toh kinaina munkhatna longdapsa ni kimu chu keiho natoh ahin hiche a gotna kipe PRA gamvah Lieut. Ngamlet @ Alet, le 2nd Lieut. Satlhun @ Marcos hin gamsung suboi dinga organization thah PRA aphudoh lhon’a lhangsunga cham le lungmon umthei talouva nampi a dinga kigel jouse adou tahjeh’a achung lhon’a gotna ana kipe ahitai ati.

KNF thuphon in aseibena’a, New Keithelmanbi lhang(area) a KNF anapang akicholta sa ho chung jenga jong PRA hi engse le khanse tah in aumjing uvin, hijongle kiloikhomna in alhang lamkai ho le ainsung mi hou kom’a organization douna’a anatoh lhon angah lhon din avel vellin tepna ana kineijing ahi ati.

Hinlah, tumasang jep’a PRA gamvah mi ni Organization (KNF) khut a ahung kipehlut lhon nichun, Saitu lhanga boina ahin bolgot lhon le organization lamkai ho thading lungtup aneilhon ahin kihetdoh tan, hitobang lungput phalou aneilhon tahjeh chun Phai (Imphal) sung ahin dalhah lhon’a Kangpokpi District ahung lut lut lhon jan’a KNF Special Task Force (STF) hon ana suhbei ju ahitai tinjong aseibei.

Amani kitha hi koima changval chunga muthada na le engset man a Kiloikhomna  in abol ahipon, mipi sugenthei jing le organization douva apan lhon jeh’a thina chan atolhon ahitai tia KNF Thuphon chun asei tolhonin koi organization hijongle KNF Operational area a mipi sulung linglao leh organization douna’a natong aum le kimoh vet louding ahi ati.

Thuphon chun aseibena’a, PRA hi masanga Congress Minister khat in ama election kaina dinga crore ni a meithal achoh a asem ahi tia ngohna anei banjom’in, UPF leh KNO in Govt to Nam dinmun thu a kihouna jong kinei ahi tah jeh in mipi suboi thei mai mai non-SoO group PRA kiti hi a toson (sponsored) hon jong anungsun uva chule lhangsung mi ajao nalai hon jong nanung sun tah diuvin hetsah na ahung kineije ati.

KNF operation area adalhah kahse uva PRA against a operation hi kinga louding ahi tia KNF thuphon chun aseitolhonin Nampi damna dinga kibol ahitah jeh’in koihijongle hiche thu a hi ihung kikum lou diuvin ngehna ahung kineije ati.

Nirbhaya gang-rape’a themmo kichan ho SC in thina chan gotna pe

New Delhi, May 5: Supreme Court in Friday nikhon 2012 kum’a New Delhi khopi’a Nirbhaya hunam’a kisuhset jeh’a thina chan ato na thilsoh toh kisaiyin themmona nei mi 4 thina chan gotna ape in ahi.

Achesa December 16, 2012 jan’a bus sung’a medical simlai numei khat pasal 6 in hunam’a asuhset’a abolgim’a chule akilhonpi aloipa jong avoh-u ahi. Themmo kichan mi 6 lah’a Ram Singh hi 2015 kum’a Tihar songkul sung’a ama-leh-ama kithat ahi’in, chule mikhat hi thilso pet’a akum chapang ahijeh’a kum thum jouva kilhadoh ahitai. “Thilsoh ‘a kitohkhahna asan dan leh themmona neiho chaloh dan kive’a court thutanna kitosot ahi”, tin Justice Dipak Mishra in aseiyin ahi. Delhi High Court leh trial court in mi 4 hohi thina chan gotna apeh ahitai.

“Themmona neihon numeinu hi nopsahna thil dan’a abol-u ahi”, ati. Court sangpen in athi numeinu loipa witness in akouvin chule thilsoh melset dan hi themmona neihon tu masang’a dan palkeh hih jongleh gotna ngaijang thei ahipoi, ati. Justice R Bhanumati in numei ho jana peh ding dan chapang ho hilna neiding ahi, tin aseiyin, chule themona neiho ukil’a pang AP Singh in society thuhilna nei nading’a thina chan gotna peh thei ahipon, hiche hi human rights palkeh ahi, tin nelkalna aneiyin ahi.

Vangsetna toh nu apa Badri Singh Pandey in thutanna chung’a akipana thu aseiyin ahi. Hetthei khat chu pasal 6 hohin numeinu tahsa sung’a thih ahet uva chule hatah’a akaidoh na uva agil geiya akaidoh-u ahi. Akitohkhah na’a kon damdoh jou louva Singapore hospital’a thi ahi, tia Nirbhaya kijenna Delhi Safdarjung Hospital’a doctor khat in aseiyin ahi. March nisim 13, 2014 kum’a Delhi High Court in mi 4 ho thina chan gotna apeh ahi. Doctor hon asei dungjuiya, numeinu hospital’a ahin pohlut uva hi a-oi sung’a agil 5% bou um ahi, tia aseiyu ahi. Trial court leh High Court in thina chan gotna apeh chouna’a themmo kichan mi 4- Mukesh, Pawan, Vinay Sharma leh Akshay Kumar Singh in Supreme Court ‘a ngehna aneiyu ahi. Hehna’a themmo kichan mi 4 ho ukil in AP Singh leh ML Sharma apang in, akisemphat nading uva phat peh’a, thina chan gotna lahdoh ding’a aseiyu ahi. Thilso kum 3 jou, 2015 kum’a Nirbhaya anu Asha Devi in achanu min dihtah aseidoh ahi. “Kachanu min Jyoti Singh ahi’in, amin seidoh ding jachatna kaneipoi”, tia asei ahi.

Kailhang’a aphat kichaisa dum thil tamtah akijoh’e: Food safety cell

Imphal, May 5: Bazar’a dum (tobacco) thil aphat kichai sa (expired) chule manufacture date kisem phatna machine phabep gamdang mikhat’a konin tamtah matdoh ahi’in, gutkha leh jarda bazar’a aphat kipe kichaisa tamtah akijoh’e, ti avetsah ahi.

State food safety cell consultant khat in asei dungjuiya, narcotic cell hon Ragailong’a inn-bahara’a cheng mikhat inn’a kon Thursday jan’a amudoh tobacco thil hohi expiry date kichai sa ngen ahi’in, chule kailhang’a dangka lakh 2 man val umding’a aseiyu ahi. Akiman thil ho neipa hi kum 39’a upa Jay Ram Bahadur ahi’in, Hetampur, Bhojpur district, Bihar gam-mi ahi. Chule atohkhompi hotoh amahin bazar’a expiry date kichai sa tobacco (dum) thil hohi sum-tong’a akijoh-u ahi.

Kokta anoiya expiry date kijih semphat na machine, packat thah bol kit na manchah hojong indan sung’a kon amudoh-u ahi. Aphat kichaisa thil man tam tah’a kijoh hi ane ho tahsa tongkha thei ahi, ati. Narcotic cell hon thil kiman ho laboratory’a athot diu chule gamdang mi sumkol vei ho aleu sah diu ahi, tin consultant nu in aseiyin chule hitobang thil kijoh ho’a kon mipi akichih thei diuvin temna aneibe in ahi.

Kampang Khullen a cheng Ch. Mothil kivohna Village Authority in sangtah a dem

Imphal, May 5: KNA kiloikhomna hiding’a ginmo hon Ch. Mothil (25) s/o Konai, Kampang Khullen avohna’u chungchang in Kampang Khullen Village Authority, Tengnoupal in sangtah in demna thuphon ahin neiyin ahi. Achesa May nisim 2, 2017 jingkah nidan 10:40 vel’a thalchoi civil a kivon mi phabep gypsy 2 in Kampang Khullen a cheng Ch. Mothil ajeh beiyin akaidoh uvin voh kitin anavo uve tin thuphon chun aseiye. Hiche thalchoi mi phabep hochu Thadou paovin apao uvin KNA kiloikhomna hiding’a ginmo chiuvin chule blank fire jong 3 vei lang anakap uve tin Ch. Mothil chun aseiye. Ch. Mothil hi Kampang Khunou Primary School, ADC Chandel a Chawkidar a pang ahi.

Hitobang chamna tongkha thei natoh hohi hatah in demna kaneiyuve tin khomi thakhel in Kampang Khullen Village Authority in aseiyin akisaipi authority hon hiche chungchang ahin suhfel uva mona neiho gotna apeh ding’in temna aneiyin ahi. Chule kiloikhomna hengah hong khonunga hitobang natoh abolkit loudiuvin temna aneiyin district sung’a cham le lungmo aumtheina ding lampang joh’a kithokhom din Ch. Morung , Chairman in temna aneikit in ahi.

SCDRD in RIMS a thi mikhat chungthu tanlha; RIMS hospital Dk.11,05,000 leu ding

Imphal, May 5: Kum 10 masang’a doctor ho mitmo jeh’a ahinkho anachan mikhat tuni chun State Consumer Disputes Redressal Commission (SCDRC), Manipur in  achungthu seilhahna aneiyin ahi. SCDRC in thutan na nei dungjuiya RIM hospital in athipa insungmite Dk.11,05,000 lakh apeh ding ahi.

Hetthei khat chu athipa insungmite chun Dr.Naorem Sharatkumar , Head of Nephrology, RIMS,  Director of RIMS, Dr Y.Iboton le Managing Director, IHRC chung’a negligence case ana semkhum ahi.

RRM in lhakhat lhing ‘environmental campaign’ bol ding

Imphal, May 5: Royal Riders Manipur (RRM) in “connecting people to nature – keep your area green and clean, nurture nature, better environment; better tomorrow and save earth; save environment” ti thupi’a May nisim 6’a kon June nisim 5 nikho chan 9th Mahousa Ima Ningsing Tha-2017 kin-gon aman ding ahi.

Manipur Press Club’a Jeet Saikhom, General Secretary, RRM in thuso miho heng’a, achesa 2009 kum’a kon thingphung leh gam-mang venna ding’a Mahousa Ima Ningshing Tha kimang pan ahitai, tin aseiye. Public awareness campaign chule free health camp, thingnou phu na, poster leh sticker campaign, spot painting, essay competition, simlai ho trekking chule adang dang lha khat sung’a kibol ding ahi, ati.

Lhakhat kimang ding kin-gon khumkhana hi Game Village’a Royal Riders Manipur office mun’a June nisim 5 nikho leh umding, prize hopdohna leh green concert jong kibol ding ahi, tin Jeet Saikhom in aseibe in ahi.

IMC le JMC corporator phabep in BJP bel

Imphal, May 5: Congress Party corporator 14, Imphal Municipal Corporation Corporator 8 culeh Jiribam Municipal Council a kon councillor 6 in tuni chun BJP abel’uvin ahi. Hitolhon in Corporator 27 umna Imphal Municipal Corporation sung’a BJP in absolure majority aneitan ahi.

BJP hinbel ho vailhuna in tuni chun BJP Manipur Prdesh office, NityaiPat Chuthek’a  kinguon khat ana bol’uvin ahi. Kinguon’a chun CM N.Biren, Social Welfare Minister Nemcha Kipgen, Parliamentary Secretary Th.Seityabarta, BJP President Ksh.Bhabananda, General Secretary Nimbus chuleh party worker phabep in pan ala’uvin ahi.

CM N.Biren in kinguon a aseidan in, IMC le JMC corporator phabep in BJP ahinbelu hi PM Narendra Modi in khantou machalna naoh ho lolhingtah’a ahin boldoh jeh ahi ati. Aman aseibena’a chun gamsung’a  tobacco product a kiveiho, khamnathei’a kiveiho chuleh neh le chah lah’a thil thenglou hal ho gotna peh ahitheina ding’uvin concerned department  thupeh akineitai ati. Ajeh umlouva kikhah oil pump ho chung’a jong action khoutah kilading ahi tin aseiye. Khantoumachalna natoh ho hi District Administrator ho toh kitho’a kitongkhom ding ahi’n, sum le pai ho adihlou lam’a mangcha ho akimatdoh’a ahileh kingaidam louding ahi tin CM in khoutah in aseiyin ahi.

Bunglushin UP school a jilkung lhahsam jeh’a man. Commit. in atumbeh’a jilkung 4 guoi

Imphal, May 5: Education department in themjilna lampang semhoi ding tohguon anei jing vang in Samulamlan TD Block, Saikot A/C sung’a um Bunglushin Upper Primary School vang masang’a aumdan bang in aum jing analaiyin ahi. Management Committee in thuso miho heng’a aseidan in, themjilnamun a hi thilkeu bou hilouva jilkung jong hatah’a lhasam ahi. School upgrade ahung kiboljou’va bou jilkung thum anah nah’a hunglut’u ahi. Management Committee, Secretary , Talen David Kom in aseidan in jilkung  lhahsam jeh in Management Committee in atumbeh in jilkung li sum in akiguoi’e ati.

Security forces hon mun chom chom’a thingnoi le khamnatheiya kivei mi phabep mandoh

Imphal, May 5: May nisim 2 nikho chun Imphal East Commando le 39 Assam Rifles hon Lamlong kailhang’a frisking abolna’uva UNLF cadre khat amandoh’uvin ahi.  Akimandohpa chu Khurai Puthiba Sajor Leikai’a cheng Tenshubam Meiraba ahi.  Alangkhat’a hiche nikho mama chun Thoubal Dist. Commando ho Thoubal Mela lentuol kom’a UPK member khat amandoh in ahi. Akimandohpa chu Lilong Chingkham Awang Leikai’a kon Mohammad Sahit Ahmad ahi. Ama’a kon chun Police in kapthei nalai 9 mm chang nga, AK 47 chang khat le demand letter thum amudoh in ahi.  Hiche nikho mama chun Imphal West Narcotics Cell in Keishampat Hodam Leirak machin, Tiddim road a kon khamnatheiya kivei numei khat amandoh in ahi. Amanu chu Churachandpur Singhat vangkho’a kon Manuwamaching Kipgen ahi.

MAHUD Minister in NMC Nambol  Bazar semphatna natoh patdia thu pe

Imphal, May 5 (DIPR): Masang laija kipat anaumsa Nambol Bazar semphatna ding natoh apat diuvin MAHUD Minister Th. Shyamkumar in Nambol Municipal Council a official ho thupeh aneiyin ahi. Hiche thu hi Nambol Municipal Council (NMC) in Nambol Bazar, Municipal Hall a MAHUD Minister pa availhunna nauva asei ahi. Building thah semna ding tohgon hin kumkhat val phat ahinlah ding ahin hiche natohna ding’a NMC in asuhlut sum 40% MAHUD department in apohdoh ding ahi ati. Hiche bazaar hi phatah a akisemphat le district sung revenue hojong ahin pohdoh jouding ahi tinjong aseiye.

Hiche market building hin tulai kimanchahna ho tichu fire safety apparatus, twi donding, toilet chule dukan bolho touna ding room hojong apan angaiye ati. Hiche market building sahna ding plan jong Centre kithot ding ahi tinjong aseiye.

Lamlong, Kongba, Kwakeithel, Lamsang, Nambol, Bishnupur, Thoubal, Andro leh Yairipok a market building sahna ding phan leh proposal hojong Ministry of Urban Development, Government of India akithot chaitai ati.

Centre toh kihoutoh theina ding’in MAHUD leh PDA official hon market semphatna ding concept paper ahin ngaito ding’in thupeh aneiyin ahi. Kailhang mun’a Toilet ho apoimo dan aseitoh kilhon in hiche market building a toilet sahna leh asuhthengna a sum lutjat 40% MAHUD in apohdoh ding ahi tinjong aseibei.

Tuni kingon a chun Parliamentary Secretary Dr. S. Ranjan Singh (MLA of Konthoujam A/C), BJP lamkai Th. Chaoba Singh, MAHUD official ho, PDA leh NMC official ho chule district councilor phabep  jong apang uvina hi. Kingon masang chun Minister Shyamkumar in Nambol Municipal Council leh Nambol Bazar vilna ananeiye.

Muslim numei triple talaq (divorced) hon interim pension muta diu

Guwahati, May 5: BJP-led Assam government in policy thah  Assam sung’a um Muslim numei hon ‘triple talaq’ (divorced)  na neiho government in interim pension peh ding hi policy thah noi’a chun aum in ahi ati. Lha masa’a state draft population policy anakiphongdoh chu Health Minister Himanta Biswa Sarma in Thursday nichun akikhel ahitah dan mipi te ana hetsah in ahi.

Hiche draft chu population leh women empowerment policy’a khel ahi na chung chon ah cha ni kal val ahilouleh daan in aphal louva akum lhing lou lai’a jinei chuleh daan in aphal louva akum lhing loulai’a government natoh na nei ho kham na anei taovin ahi.

 Muslim numei divorcee ho ding nga skill upgradation kibol peh ding chuleh triple talaq jeh’a hahsat na toh numei nu insung miho pension kipe ding ahi tin Sarma chun asei in ahi. Communities sung’a divorcees leh numei achang nga umho skill-based themjil naleh natoh na kipe ding ahivang nga interim pension vang kipe lou ding ahi ati.

Muslim bodies sung’a um All India Muslim Personal Law Board (AIMPLB) in hiche chung chang thu’a hin demna anei un ahi. Ahivang in Prime Minister Narendra Modi in hiche tobang  thilpha kibol na’a dem na ahin nei uhi adih lou ahi tin phondoh na anei toh lhon in Muslim hon hiche tobang thil hohi political lens lampan’a alah lou diu vin jong asei in ahi.

Centre in  Representation of The People Act chuleh Assam MPs leh MLAs hin tet ho’a ding injong   two-child norm introduce amend bol ding nga kisei ding ahi tin State government chun asei in ahi.

Thusoh Lahchom

 

Hui-le-go kitho

Thulhut kimu dungjui in Thursday nichun Golaghat mun’a huipi,gelchang leh go nasatah’a akitho jeh in inn leh lou tamtah asusen in ahi.Chu naban’a  mi 2 athin chuleh mi 11 nasatah in ana kitong kha in ahi. Athi lah’a khat  chu Sarupathar aum Pinking Karuwa  akitin khat chu ahileh Kokila kho sung mi ho ahin koi ahi hiche kisut chan hin hetdoh ana hinai pon ahi.

Louchang toh kimat tha

Thoubal police in tuni chun Thoubal Moijing’a kom khamnatheiya kivei mikhat amandoh in ahi. Akimandohpa chu Abdul Hassan @ Boi ahi. Police in ama’a kon chun SP capsule chang 713 amudoh in ahi.

Kum 8 chapang khat kisuse

Thulhut kimu dungjui in Tuesday nichun Sikkim gamsung’a kum 42 a upa khat in numei chapang kum 8 khat asuh set jeh in Melli Police hon anaman taovin ahi. Hiche thilsoh hi Tuesday sunkim ma hiche numei chapang nu school’a kon na ahung kile na’a thilsoh ahi. Melli Police hon section 341/354 of IPC read with Section 8 of the Protection of Children from Sexual Offences Act, 2012 noi’a suh lut na anei taovin ahi.

ULFA(I)

Upper Assam Tinsukia district mun’a Thursday nijan chun ULFA(I) thingnoi ho hiding nga ginmo miphabeh in grenade’a inn khat abulu  jeh un insungmi mi 2 anakisu kha’e tin official thulhut chun asei in ahi. Report kimu dungjui in hiche thingnoi hohin upper Assam district,Kakopathar  kho sung’a  Jogider Singh chen na inn ase khum’u ahi ati.Hiche kibulu na’a chun Jogider leh achanu Rinki Singh ana kisu kha lhon in apet pet in hospital’a kijen ding in apo lut pai ngal un ahi.

Social service

AMSU member hon Kangla mun’a Friday nikhon social service camp abol uvin, May nisim 3 nikho’a kipan Youth Leadership camp khumkhana anei uvin ahi. Simlai kiloikhomna’a volunteer hon Kangla kimvel suhthengna aneiyun chule thingnoi chom chom jong atu uvin ahi.

ITI

Skill Development and Entrepreneurship Ministry in ‘Enhanching sill development infrastructure in NE States and Sikkim’ ti thupi’a scheme North East gamkaiya ITI athah 22’a asemdoh ding ahi. ITI athah 22 holah’a 5 hi Assam gam’a umding, Arunachal Pradesh gam’a ITI 4, Tripura le Mizoram gam’a 3 cheh, Manipur leh Meghalaya gam’a ni cheh chule Sikkim gam’a ITI khat umding ahi, tin official hon aseiyui. ITI 2 hi underup-graduation ahop ding, chule ITI 5 hi Supplementing Deficient Infrastructure noiya ahi. Ama ama state sorkar khut’a hiche’a ding’a dangka 1149.47 lakh kipe ahitai.

Editorial

Bitna lampi (Highway): BJP govt in eipe jou nadiuvem?

Imphal-Dimapur highway lah a thao po gari (tanker) driver ho chunga khansetna jeh a hiche highway a thao-po gari ho lungmongtah a ahung lut ngamlou uhi thil khohtah ahi.  Tuchung tanker driver ho ki attack hi hiche highway a dinga amasapen jong ahi pon, achaina ahi ding jong tahsan aum deh poi. Tupet a thil umdan hi ivet leh ‘thilkhohtah’ ahi ti tailou seiding atam behseh poi. Hiche lampi hi nomlou in sedehduh jeng jong leh, Manipur leh gamdang ki komtona umsun ana hi jeh in Manipur a dinga hinna lampi (life-line) ahi tin jong akisei jing e. Ahinla, hiche lampi a chele-vahle ho ban ah, thil-le-lo po gari ho chunga sosetna achelhah jing hi thilkhohtah ahi. Hiche tobang thilsoh jing hi Manipur government in jong ahetmo ahipon, lampi semphat ding leh a chele-vahle ho bitna ding ima abollou tobanga aum jing hi akhoh jocheh khat ahi. Lampi set jeh a toset toh a hinna ijat manga, itobang gentheina mipi hon ato hitam ti jong koima hetmo ahi poi. Manipur government in hiche lampi semphat ding leh achele-vahle ho bitna peh ding tin vel tamtah kitepna ana neita jeng jong leh tuchana natoh a ima apohdoh jou lou hin thil lentah khonunga ahin suhset be ding tijat umtah ahi. Hitobang hahsatna tamtah ho kahalah ah, loikhat in highway atoupha na chan u ‘politics’ bolna a mangloi jong a umda kit pon. Gah hettheipen ding in khangthu a dinga asotpen hidinga tahsan um blockade chu ningkum November lha apat tukum March chan hiche highway jaona highway teni ah UNC hon ana bol uve. Hitiho thilso jeh in hiche highway hi aphalou lama amin akithan keo hitalouvin, loikhat a dinga thina lampi asoh in, loikhat dinga dipdapna lampi asoh tai.

            Koi kiloikhomna hihen, ipi tup-le-doi nei hijong leh highway blockade bolho hi koima pachat ahi pon, chuleh, highway a chele-vahle ho lampi chom chom a sugenthei leh thil jatchom chom manga amaho chunga khanset bolho hi koima jousen itheida pen u khat ahi. Chuleh, a gam mipi leh achele-avahle hon lampi phatmo jeh a genthei hahsatna ato nau kumkho jong hi asotval tai. Government hin mipi genthei dan leh hahsat dan hi kihetmosah in koisot da ta henlang, aganna thei lama lampi (Imphal-Dimapur highway) hi asemphata, chuleh, avhele-vahle jouse dinga bitna (security) apeh hi mipi leh gam dinga thilphatah hiding ahi. Government thah ahung um toh kilhona tulaitah a mipi kinepna hi Imphal-Dimapur highway hi jolpet a koiding, hiche lampi a achele-avahle ho jouse chunga engset bol leh a chatval ho koi group hijongleh umsah louding. Hiche lampi hi thina lampi hilouva, ‘hinna’ leh ‘kinepna lampi’ hisah ding hi BJP government in amasanga challenge lentah um dan a akigela, mipi deibanga na atoh ding hi gamsung mipi kinepna chu ahi tihi ajading a lom hon jau hen!

Blankfire

Thepmona nei nei hitam, khohelou lou hitam hunamin akisusen akithatne kiti umjing , ole kitha kimat kipuimang, hunama thilbol kiti hi mijousen sports dana alah hitam, ipi hileh kichep phalou kiti hi beng ngah a ngahdoh a pha ahi.