ET May 5, 2017 News (Local, Regional, Thusoh Lahchom, Editorial, Blankfire)

ET May 5, 2017 News (Local, Regional, Thusoh Lahchom, Editorial, Blankfire)

477
0
SHARE

Manipur CM in govt. department jouse’a scam ho CBI ho kholchil na neisah go ta

Imphal, May 4: Manipur Chief Minister Nongthombam Biren Singh in corruption suh mang nading leh corruption anabol ho matdoh’a aum nading in government departments financial jouse Central Bureau og Investigation (CBI) ho khut na anape lut tan ahi. State government in Manipur Development Society (MDS) chungchang thu kholchil na anei nading uvin CBI apedoh tan ahi. BJP in campaign anabol lai’a corruption ho suh mang ding ahi ati utoh kilhon in Okram Ibobi Singh in Manipur sung kum 15 anapoh sung’a scams um ho kholchil na kinei ding ahi ati toh lhon in CBI in kholchil na anei nading in nganse na anei tan ahi. Aman aseibe na’a chun; hiche tobang corruptiong na ana nat kha congress MLA-BJP hung lut hojong jong lungset na kichan deh lou ding ahi ati.

MDS  chungchang thu’a CM in asei na’a chun; development project nga account hochu kimu doh in ahivang vang in hiche account ah chun detail la ema akisut lou jeh in Chief Secretary leh Principal secretary jong khol na kanei sah in ahin adih cheh figures ama nin jong amudoh jou hon poi ati.

MDS sung’a thil dih lou’a kimang leh funds ho unit khat na pat unit khat hoitah authorities hon asan peh lou akimudoh in state government in CBI hon aban ahin khol be ding uvin nganse na akinei tai tin Bien chun asei in ahi.

BJP 100 days work list’a mipi pachat theiding natoh khat jong apangpoi: MPYCC

Imphal, May 4: BJP lamkaina coalition sorkar in 100 days work list asemna’a hin mipi pachat theiding natoh khat jong apangpoi tin Manipur Pradesh Youth Congress Committee, President  E.Dayananda in tuni Congress Bhavan’a thuso miho akimupi na’a aseiye. Aman aseidan in BJP sorkar work list a hin Anti Tribal Bill ho toh kisaiya Churachandpur gamsung boina ho suhlhap na ding tohguon aumpoi ati.  Chuleh ILPS issue chungchang  jeng jong apanlou hi vangset umtah ahi tin E.Dayananda in aseiye.

Alangkhat’a  Manipur Pradesh Youth Congress, President , Amir Hussain in thuso miho heng’a aseidan in national Highway  lamlen pang’a thingnoi hon chele vahle ho le travel agency ho’a kon dandihlouvin kai adong jing’uvin ahi. Thingnoi ho hin commercial gari  ho’a kon kai adon’u keu hilouvin milham muona neilou ho jong asugim jing’uvin ahi. Chuleh BJP in tulaitah’a aboipi jing highway protection force semdoh na ding tohguon jong hi  100 days work list’a panglou ahi. BJP in Highway protection force semdoh ding tohguon work list’a apansahlou hi thingnoi ho’a kon gihna aumjeh ahiding ginchat aum’e tin Hussain in aseiyin ahi.

Manipur sung’a kolpheivah lhun louna kho jouse’n Dec. 2018 kah’a kolphemeivah amu ding’u ahi: Power Minister

Imphal, May 4 (DIPR) : Manipur gamsung’a kolphe meivah lhung nalou kho  jouse’n December 2018 masang’a kolphe meivah amuding’u ahi tin Power Minister Thongam Biswajit Singh in Ashok Hotel, New Delhi’a chelha State Power Ministers’ Conference a ahoulimna’a chun aseiyin ahi.  Aman aseidan in mijouse’n kolphe meivah amutheina ding’a hin transmitter tampi akitungdoh in , hiche natoh jong hi December 2018 masang’a kichai ding ahi ati.  Hetthei khat chu India sung’a tunigeiya kolphemeivah mulou khojat 4141 ahi’n, hiche lah’a 85 hi Manipur sung’a um kho ho ahi’uve.

State Power Minsiters’ Conference hi lhagup jouseh  le state government/union Territory  sung’a power minister hon amopohna gamsung cheh’uva power, coal , renewable energy le mining sector chanchin seikhomna’a aneiyu kihoulimna khat ahi.  Tuchung conference chu Union Minister of Power Piyush Goyal Chairman hinah’a chelha ahi.

Power Minister Biswajit Singh in  aseidan in tuchung conference chu gamsung’a cheng mi jouse’n 24X7 kolphemeivah amu theina ding’u policy semdohna ding’a kiguong ahi ati. Gamsung’a  cheng mi jouse’n kolphemeivah amutheina ding’uvin Ministry of New and Renewable Energy (MNRE) in Solar photovoltaic Lights (SPV)  70% subsidy a pehding tohguon jong aneiye. Manipuir sung’a Mega Solar Park khat semdoh ding tohguon kineiho jong Centre in phatsahna aneitai. Manipur sung’a mining resources ho jong explore bolphat ahitai tin Biswajit in aseiyin ahi.

Ccpur a hire ding gari phabep kiholmona chungchang’a Police hon abol diuva lom bollou

B.Lalboi Gangte

CCpur. May 4(ET):  Churachandpur District sung’a Innko 25 Gari 39 Hire a kimangcha guhmang ahina chung ah Gari 39 lah’in Gari 12 nung mudoh ahin tunichan’in aneihon amulou u Gari 27 ho mopohna nei Churachandpur  Police hon anahsah louna’u chung thu’a  Gari nei innko 25 hon tuni nilhah nidan 3:00 velchun thusoh lakhomho akimu piuvin February leh July 2016 kikah sung’a  Lamka a kipat Gari hire a manchah ding tin Agent Ningthoujam Openderajit Singh kum 39 S/O N. Khelenba New Bazar Bus Barking khut’a Gari 39 pehdoh in anaume tin Mang David in aseiye. Gari neite toh Agreement ana kijih in ahi, Gari hire man amulou phat’un Gari neihon Churachandpur Police ah Fir. No. 45(9) 2016 CCP-PS U/S 420/406/34 IPC  noiyin Complain anabol uvin ahi. Police Investigation toh kisaiya Ningthoujam Openderajit Singh  13 Sept 2016 nilhah nidan 6:35 chun New Bazar Hotel abolna mun’ah anaman uvin, thudoh aneinauva kon in Gari jouse Thounaojam Ningthem Singh S/O Th. Ibohal Singh, Luwangsangbam Mamang Leikai, Imphal East District anapehdoh dan ho aseiyin ahi. Hitoh kilhon chun 20 Sept 2016 nikhon Addl, SP Churachandpur jaonan  Manipur Police team hotoh Thounaojam Ningthem Singh  akimupiuvin Gari jong a aleitol ah mittah in agamu uvin, ni2 ni 3 jouteng leh Lamka Police Station a ahungthah ding’in thupeh ananeiyuvin ahi. Ahin tunichan in ahung kithahlut naipoi tinjong Mang David chun aseiye. Hiche kahlah chun Thounaojam Ningthem Singh in Gari chungchang thu Churachandpur MLA 2 leh Imphal East MLA 1 toh kihoulhahna kanei taove tin thuso ahinbol in ahinlah Gari neihon imacha akihet peh pon, hetphah in jong akineipoi ati.

Mang David in aseibena ah gari ho Thounaojam Ningthem Singh kom’a aum hi Police hon ahechil soh keiyuvin, I.O in Chief Judicial Magistrate (CJM) Court ah Petition akipelut in CJM in 19 Jan 2017 nikhon Warrant of Arrest  anasodoh in ahi. Thounaojam Ningthem Singh mat’a Court a polut ding hi Police ho mopohna ahin Thounaojam Ningthem Singh Churachandpur Police hon akin u abol tahlou jeh un 17 Feb 2017 nikhon CJM Churachandpur in I.O Report akou in kimanjou nailou ahidan I.O in Report apen ahi. Chuban’a 24 March 2017 nikhon CJM Court in I.O akou kit in I.O in aumna akihetlou naban’a akiman jou poi tin Report anapekit in chule Thounaojam Ningthem Singh hin akimat ding akihet phat in District Judge kom’a Anticipatory bail athum in ahin  Court in pompeh lou in reject ababolpeh kit in ahi. 20 April 2017 masang ngei’a CJM Churachandpur a kipelutding (Surrender) in thupeh aneikhum in ahin ama akipelut dehpon chule Police honjong aman kit dehpouve ati.

Police ho natohdan alungkim lou jeh un gari neihon Churachandpur SP akimu piuvin alungkim loudan ho aseiyuvin ahi.  SP in OC forward abol in akinthei lam’a Warrant hi tongdoh ding in thupeh aneiyin ahi. Ahin Police akon imacha malam kalsonna akimulou jeh in Minister V. Hangkhanlian kom’ah athu umdan ho alhut uvin chuin V. Hangkhanlian in Police ho ano in I.O in DTO jouse a ding in Lekha 18 March 2017 nikhon Gari mang detail leh Registration bolsah louding in lekha athot in, Police station jouse’a O.C ading Wireless Message 19 March 2017 nikhon akapdoh in uvin ahi.

Churachandpur Police in  Gari um na mun leh Gari koi Thounaojam Ninthem Singh aum najouse hechil set’a CJM Court thupeh Warrant nahsah lou’a koi’a tunichan’a akimat louna chung thu’a Gari nei ho Police ho chung’a alungkim theipouvin, Manipur Chief Minister hengah hiche chungchang thu CBI Inquiry lutsah a matdoh ahisohkei nading’un panpina athum un ahi. Gari neihon Fir. No. 45(9) 2016 CCP-PS U/S 420/406/34 IPC kibol’a  CJM in Thounaojam Ningthem Singh mat ahinading’a Court in Warrant asohdoh jou nung’a Churachandpur Police hon amatlou u hi nehguh aum jeh ahi ti photchet nakhat jong ahi ati.

Gari kigumang kumu nailou hochu Eco Sport, Bolero, Maruti Swift, Verna, Duster, Maruti Suzuki, Mahindra TUV 300, Eon Magna Swift Dzire, Scorpio, Sumo Victa, Safari Storm ahin Gari mantam ngen ahiuve. Gari akimudoh hojouse jong Police hon Credit akilah uvin, ahin Police ho akon’a kimandoh khat cha jong umlou ahi naban’a Gari ajoh naova kilah peh loi leh min achoh naova kon’a sum kile’a kiki lah loi leh gari chohon ahin pehdoh ngen ahive tinjong Mang David chun aseikit in ahi.

Thil joh numei hon CM heng’a ngehna thah neiyu

Imphal, May 4: Ima Panthoibi Street Vendors Union hon state sorkar heng’a ISBT, Khuman Lampak maiya kailhang asahpeh diuvin thumna thah Thursday nikhon anei uvin ahi.

Union in thuso aneina’a chun, hiche mun’a kailhang kihong hi mun kiliem hiding ahi, ajeh chu hiche mun hi thinglhang leh phaicham miho sumkol veina mun ahi, tin aseiyui. Achesa 2010 kum’a kon kailhang (market place) kisah nading’a thumna um ahitan, North Eastern Council injong 2014 kum’a hiche sah nading’a sum sanction abol ahitai. Ahivang’a, tuchan geiya natoh mutheiya umlou lai ahi. Chief Minister N Biren in khangthah ho gelkhohna aneiya chule thinglhang leh phaicham miho toukhom nathei dukan mun 1000 kihon nading’a thumna aneiyu ahi.

CM lamkaina’a Tamenglong le Noney District  a developmental project ho velvetna kibol

 Imphal, May 4 (DIPR): Tamenglong le Noney District  a developmental project  jouse vetkolna ding le government department ho lhahsamna suhbeina ding in tuni chun CM Secretariat a Administrative Secretary ho, District Administrator ho, Head of Department ho  le District Level Officer hon review meeting cum discussion anei’uvin ahi. Kihoulimna’ chu Chief minister N.Biren Singh in ana lamkaiya Cabinet Minister ho le Tamenglong district MLA teni in pan alah lhon ahi.

CM N.Biren in aseidan in special meeting kibol hi Hill district ho’a Government machinery hon na atohdan’u velvetna ding’a kibol ahi ati. Hitobang meeting hi district jouse’a jong hung kibol ding , sorkar lui in donlouva ana koi gamkai ho jong khantou machalna lam’a amachalna ding’uva pan kilading ahi. Hitobang meeting kiguong ho hin  thinglhang district sung’a posting a um government official ho’n anatoh na’uva hahsatna atoho’u suhbeina ding lampi ahinsem ding ahi tin jong aseiyin ahi.

Kihoulimna sung’a chun Tamenglong le Noney District Deputy Commissioner teni in district teni sung’a boina ho power point mangcha in kichehtah in atahlang lhon in ahi. Tamenglong DC, L.Kiran Kumar, MCS in aseidan in district hi State sung’a Backwardness Index a ato pen’a um ahi. Hitolhon chun gamkai sung’a infrastructure, power supply, health, education,banking sector chuleh lam chom chom’a  khantou machalna natoh chelhah joulou dan ho atahlang in ahi. CM in DC tohphon ngailhahna aneijou chun Commissioner, Works in Mini-Secretariat dinmun kholchil ding’a Joint Secretary,Works asol ding in thupeh aneipai in ahi.  Hetthei khat chu Mini-Secretariat hi 2011 kum’a chu ana kithensuo ahitan, ahinlah tunigeiya hi manlouva um ahi. Commissioner, Health and Family Welfare P.K.Singh in jong tunaicha’a 100 bedded a upgrade ana kibol 50 bedded district hospital dinmun jong kholchilna anei ding in thupeh aneiyin ahi. Hill district a posting a um DLO ho le official hon jong aposting mun cheh’u akijot cheh’uva anatoh’u lunglut tah’a atoh diuvin CM in temna aneiye. Administrative Secretary hon jong concerned Head of Department ho  regular tah’a na atoh diuva thu apeh diuvin thupeh aneiyin ahi. Chuleh tuni’a kihoulimna’a  athu’a aseikhom ho’u tohdoh ahidan photchetna review meeting aumkit tengle DLO ho le HOD hon ahin pehlut diuvin CM in thupeh aneiyin ahi.

Government School ho’a Lecturer 150 val Employee Identification Number kipe nailou

Imphal, May 4 : Congress government in achesa May 11, 2016 ni’a Government Higher Secondary School ho’a dia lecturer 707 val regularized abol vang in tuchan hin lecturer 150 val in amudiu va lom ho amu naipouvin ahi. Lecturer 150 val ho hi post ong aumpoi tia Employees Identification Number kipe lou lai ahiuvin, hiche chungthu toh kisaiya boina hi Directorate of Education (S) le Secretariat a Education official ho heng’a lhut ahivang in, boina hi tuchan’a suhlhap ahinaipon ahi.

Hinlah ginchat umtah thulhut kimu dungjuiyin; Minister le MLA ho toh kinai na nei jilkung ho chu April nisim 1 na konnin regular lecturer hon amudiuva lom facility jouse amukit uvin, hitoh kilhon’a jilkung khenkhat in alunglhailounau aphondoh jing vang uvin government in nahsah in aneipih pouvin ahi. Regular lecturer facility amu masang uva a natoh nauva konna retire ache nadiu anaicheh cheh toh kilhon in jilkung tamtah in alunggimnau jong aphongdoh uvin chule government in sihnei langnei tah’a thil abol hin gamsung’a themjilna lampang akhantousah louhel ding ahidan jong asei uvin ahi. Government in lecturer 150 val boina hi ahin gelkhoh diuvin jong tiemna aneiyun ahi.

  1. Salbung Ccpur a ‘Yamaha Showroom’ khat kihongdoh

B.Lalboi Gangte

CCpur. May 4(ET):  National Highway 150 lamlen pam’a um K.Salbung, Churachandpur District ah tuni nilhah lang nidan 2:00 velchun Mangneo Haokip in abol M/S Alal and Joshua Motors kiti Showroom khat hondohna aum in ahi. Yamaha  Showroom hondohna kingon chu Khaipao Haokip Chairman ADCC in aneiyin, Rev. Hemkhomang Principal DTS in pathen heng’a lhandohna aneiyin ahi.

D.K. Thangboi Haokip CEO/Kangpokpi in Churachandpur district hi Manipur adia Second town ahin gamsung khantou sah nading’a Mangneo Haokip in Dealership hina lah’a  agon doh hi kipapi umtah ahi ati. Hiche Showroom hin Sub dealers hina Pakhangba Manipur akon’a  Authorize alah ahin Gari kijoh atuong (profit) alhom in  Gari khat in dangka 500/-  bou akimuji e ati. Imphal a ikichoh sang uva igam sung uva kijoh iki choh diu eiho ading’a olsam ahina ban’a khantou nakhat hiding ahi. Company dang hojong dealership ilah uva igam u lhunsah ding chule State sung’a product ho ilah uva eiho mama in ikijoh uva ikichoh diu  ahi tia aseina banah hiche Showroom a hin Servicing center jong akikoiye ati.

Showroom advertisement kibol pet ahin mitam tah in advance booking jong akibol tauve. Hitoh kilhon chun Chairman ADCC in gari 5 pehdohna aneiyin ahi. Chuleh Customers ho ading a bank loan akon’a jong kilah theiding ahi. Hiche hondohna kin’a chun Soiminlen CEO/ADCC leh Doujapao Haokip SDO/Tuibong jong apang lhon’e.

Congress in BJP donbut thei nading nga Coordination Committee semdoh ta

Imphal, May 4:  India sung’a ding nga party lenpen Congress leh Bharitiya Janata Party in Northeast India in kitet na anei jing toh lhon in  All India congress Committee in Congress lamkai hon BJP’s Northeast Democratic Alliance (NEDA) ho adonbut nabol thei nading uvin North East Congress Coordination Committee (NECCC) kiti aphut doh un ahi.  Assam leh Manipur Congress in anavaipoh na mun’a NEDA kitun doh kal hi kum khat alhing tan ahi. Report dungjui in NECCC lamkai holeh Congress Chief Minister honhin BJP hiche mun vel’a donbut thei nading nga hi lampi akisem jing un ahi. NECC kihou khom najong May lha kichai lang leh Meghalaya mun’a anei khom ding’u chuleh Congress vice president Rahul Gandhi jong hiche mun’a ahung ding in gichat na anei un ahi. Northeast India sung hi Congress te ding nga gal kul beh khat anahin ahi. Ahin 2014 general election chun Congress in Assam leh Manipur sung ana lhaso tan ahi. Hiche toh kilhon chun congress party dalha mi ana um kit jeh in Arunachal Pradesh’a jong BJP in vai ana hom lo kit tan ahi.Nagaland jong Democratic Alliance of Nagaland (DAN) leh BJP kitho khom in vai ahom kit un ahi.

AICC in sate sung’a lamkai ho jouse thuneina/thaneina kipe ding ahi tin gel lhah na anei utoh kilhon in Rahun Gandhi in Northeast sung’a congress ahung ding doh thei kit nading nga Northeast sung hoilai mun hijong leh tu lha akipat kholjin na anei pan ding ahitai tin All India Congress Committee (AICC)  senior lamkai khat in asei in ahi. Meghalaya Chief Minister Mukul Sangma jong NECCC convernor jong ahi in ahi. BJP hin 2018 Tripura leh Meghalaya polls ading in nasatah in kigot na anei pan taovin ahi. BJP National Presiden Amit Shah in May 6 nikho leh Tripura’a  ni 2 akholjin na ache nading nileh leh hin party ho kigot ding dan finalise abol ding ahitai.

Modern College simlai hon toumun kiphinna bol’u

Imphal, May 4: Modern College, Porompat sung’a avat teaching staff ho le infrastructure ho suh bulhit ahina ding in tuni chun Modern college simlai hon campus sung’a tou-mun kiphinna abol’uvin ahi. Modern College Students’ Union , finance secretary lui Chanam Amujao in thuso miho heng’a aseidan in , college sung’a thilkeu le jilkung bulhin lou hi concerned authority in asuhbukim ding’a avel vel’a ngehna ana kinei ahitan ahinlah tunigei hin concerned authority a kon donbutna kichehtah akimu naipoi ati. Authority concerned in ngehna kineiho nidan 24 sung’a asuhbulhit louva ahileh administrative block kot heh kihehkhum ding chuleh themvetna jong boycott kibol ding ahi tin Amujao in gihna aneiyin ahi.

Education Minister in Sainik School, Imphal vetlhahna nei

Imphal, May 4 (DIPR): Education Minister Th. Radheshyam in Thursday nikhon Sainik School Imphal, Pangei avil in chule kithopina kapeh ding ahi, tin aseiyin, ahin, tu dinmun’a kitepna kicheh kanei theipoi, ati.

Team official hotoh kakholjin hi survey kabol nao ahi’in, gamsung’a themjilna mun ho’a khantou machalna um em, ti boina thu chom chom vetlhahna kaneiyu ahi, tin aseiye. Detailed Project Report (DPR) kisem’a chule Centre sorkar heng’a themjilna mun ho machal nading’a kithopina thumna’a kipelut ding ahi, tin aseibe’e. Hiche’a ding’a district jouse’a simlai tamna school ho kihedoh masa’a chujouteng leh Centre in phatsahna apeh nading’a pehlutna kinei ding ahi, ati.

Centre in aphatcha in phatsah hih jongle akipe thil khat-leh-ni hi kumkhat sung’a phatsahna apeh’a district jouse’a chepi ahiding atahsanna thu aseiyin ahi. State sorkar in lolhingtah’a project achepi teng leh Centre in atosot ding hi tahsanna lentah kinei ahi, ati. School inspection abolna’a Minister pan ling kihot in atohkhah na hostel room, leh adang dang vetlhahna aneiyin ahi. Mopohna neihon inn sahna’a phatah’a na atoh diuvin Minister in temna aneiyin, chule thingphung phu be’a vetnom umtah’a sem thei ahi, tin ngaidan aseiyin ahi. Principal leh Vice Principal in Minister heng’a memorandum apelut lhonin ahi.

State Level Youth Convention kipan ta; Governor in khangthah ho tilkhouna nei

Imphal, May 4: ‘Role of Youth in Socio-Economic Development” ti thupi in Gandhi Memorial Hall, Imphal khopi’a ni-ni State Level Youth Convention, 2017 aumin ahi.

Governor Dr Najma Heptullah leh Executive Chairman, MASLSA chule Manipur High Court Justice N Kotiswor kin-gon hondohna’a Chief Guest leh president in apang lhonin ahi. Governor in ahoulimna’a Youth Convention kigon hi kilomtah ahi, tin aseiyin chule Convention in socio-economic khantouna ding’a khangthah hon pan alahna ding lampi akisem ding atahsanna thu aseiyin ahi. India gam’a khangthah hi mihem 27.5 % ahi, tin aseiyin chule khangthah hohi phatecha kichuhna ipeh’a ahileh gamsung ding’a gou loupitah ahi’in, akihil them louleh boina kipatna ahi, ati.

Hitobang Convention hi gamsung mun chom chom’a jong lamkaina khat noiya gon ding’a pha ahi, tin Governor in aseiyin chule state sorkar in Manipur State Youth Policy hi 2011 kum’a kon asem pan ahitan, khangthah hon gam gelkhohna aneiding, kichuhna peh nading, natoh nading’a thepna leh hetna peh ding chule adang dang jong policy’a pang ahi, ati. Justice N Kotiswor Singh in ahoulimna’a Youth Convention simlai leh khangthah ho ding’a gamsung dan hetna ding’a athupi dan aseiyin chule simlai hon India Constitution asim uva chule dan ho ahetthem diuvin tilkhouna aneiyin ahi.

Manipur State Legal Services Authority in society lhasam hon thudih’a thutanna amu nading, legal advice man beiya amu nading chule document gon nading’a manbeiya legal service apeh ahi, tin hetsahna jong aneiye. Youth Convention hi Service Bridge Agency in Manipur Legal Service Authority toh agon ahi’in, simlai tamtah in pan ala uvin ahi. Ni-ni State Level Youth Convention kibol sung’a lawyer hetthei tah tah leh expert ho resource person’a pang diu, ‘Legal Aids’ ‘Law Relating to Cyber Crime’ chule adang dang thupi’a technical session jong aboldiu ahi.

Japi in Irom Sharmila douna lungthim aneipoi: Maoist

Imphal, May 4: Thal choi kiloikhom Maoist Communist Party Manipur hon thuso aneina chun India Today journalist Renu Ratheesh in achesa May nisim 2 nikho’a India Today thuso’a Irom Sharmila leh Desmond Coutinho kichen ding thu ‘Rejected by her own people’ (agam-mi hon apampai) ti thupi’a thuso anei sangtah in demna anei uvin ahi.

“Hiche hi jouthu chule thutah selmang nading tohgon leh minset nading thu ahi. Vannoiyin Indian politics thenlou ahet ahi’in, Semi Feudal tia seithei khop ahi. Manipur gamsung in Okram Ibobi, Rishang Keishing, RK Ranbir, Irengbam Tompok leh adang dang insung mite khanggui amu ahi’in, sum ngailutna neiya NGO phabep in Irom Sharmila politics’a apuilut’a alamkai hi mi tamtah in adeilou ahi”, ati. Ahin, akichaina’a ama deilhen hi jana kipe ahi’in, vangset umtah’a election ajolou ahi, tin aseibe uve.

Election mai mai jeh’a agamsung mihon atosot lou/apampai tia kisei hi chapang thusei ahi’in, India thuso hon Manipur gamsung mi douna tohgon anei amusah ahi, tin Maoist hon thuso aneiyui. Kum 16 ‘solitary confinement’ a aum’a chu national media hoiya um ham, tin thudoh aneibe uvin ahi. Manipur gamsung’a boina- AFSPA, blockade, twilen leh ling kihot chule adang dang hohi media (national) in gelkhohna anei khahlou ahi, atiuve. ‘World Press Freedom Index Report’ a ‘transparency’ thu’a Indian Media hi gam 180 lah’a 136 channa’a apan hi avel’a geldoh sah ngai ham, tin demna thudoh anei uvin ahi.

Thudih’a natong lou thuso in Manipur gamsung miho chungchang thutanna anei hi nuijat umtah ahi’in, mijousen India gam’a election hi investment ahi, ti ahet’a chule candidate hon voter choh nading’a sum tamtah asuhmang ahi, tijong mijousen ahet ahi, ati. Indian Media in koiyin Irom Sharmila apampai ham, ti thupi’a online referendum la uhen, Manipur gam-mi 99.9% in ama tosotna apeh ding hi katahsan-u ahi, tin Maoist hon thuso aneina uva aseibe uvin ahi.

Tobacco product lakh 10 val ding kimandoh

Imphal, May 4: Imphal West Police Narcotic cell le Food Safety teni kithokhom in tuni chun Thangal Bazar area a checking drive ana bol uvin, hiche a chun tobacco product lakh 10 val manding Alu Gally a konnin ana mandoh uvin ahi.

Hiche banned product ho chu dukan ho’a konna matdoh ahin chule akimatdohna dukan neiho chu ahile Bihar a kon ngen ahiuvin; Ganesh Kumar(25) s/o Hiralal, Telipati, Anil Kumar Gupta (25) s/o Sai Kapil, RIMS Road le Gudi Shah (22) s/o Kedar Shah, Telipati ho cheng ahiuvin ahi.

Gamsung’a Oral Cancer natnei ahung tam cheh cheh toh kilhon’a achesa 2013 kum’a konna chu government tobacco product ho joh le choh ding anaphal lou ahitan chule hitobang drive kibol lo na hi ahileh gamsung’a business bol hon tobacco product ho sumkol avei jeh’a ahidan Imphal West Addition SP Priyadarshini in aseiyin ahi. Tuni’a checking drive jong chu amathupeh na noiya kibol ahin chule gamsung’a tobacco product joh le choh chung chang hi phatea kivelha jing ahidan jong priyadarshini in aseibe in ahi.

BJP Mahila Morcha lamkai khat inn petrol bomb’a kibulu

Agartala, May 4: BJP Mahila Morcha General Secretary Papiya Datta’s inn chu thursday nin miphalou hon petrol bomb ah ana bulu un ahi. Ahin petrol apat hung kong doh mei chun room sung’a um curtains bou chu anaka lha in asung’a um insung mite vang chu koima anakisu kha pon ahi. Hiche thilsoh hi report kimu dungjui in West Tripura district, Rangjitnagar mun’a jingkah lam nidan 12:30am ahi akiti.Hiche thilsoh toh kilhon in Datta in Ramnagar Outpost mun’a hiche thil bol ding’a agin mo mi 5 leh CPM local MLA Ratan Das chung’a heh na lekha aga jih lut tan ahi.

NBSC- HSLC leh HSSLC exam 2017 May 8 leh kiphong doh tading

Kohima, May 4: Nagaland Board of School Education (NBSE) in HSLC (class-10) leh HSSLC (class-12) result phondoh nading nikho thu’a mipite  boi na ahin sutheng taovin ahi. NBSE result hi May 8,2017 sunkim don leh websites dung’a hung kilhadoh ding ahi. Thuso miho kom’a asei nao achun; board hon websites hetsah na ahin nei dungjui uvin result hi- nbsenagaland.com, exametc.com, indiaresults.com chuleh examresults.net na kivet thei hiding ahitai ati. Report dungjui in phat masa achun May 3 leh kiphon ding ahi ana kiti chu hitalou ding ahi ati.

Simlai chapang hon SMS dung nga akivet nom uleh anoiya kipe bang nga hi ajui ngai ahi:

1.HSLC (Class 10) Examination 2017: SMS – NB10<space>ROLL NUMBER to 54242

2.HSSLC (Class 12) Examination 2017: SMS – NB12<space>ROLL NUMBER to 54242

CAF& PD in thao kijohna pump chom chom kholna nei

Imphal, May 4: Director, Consumer Affairs Food and Public Distribution (CAF and PD) lamkaina’a team ni in Imphal East leh Imphal West district’a um thao pump chom chom ho inspection (kholna) abol uvin ahi.

Yumnam Ranjan, Director, CAF&PD Departemnt in, thao kijohna pump phabep in thao ahop loujeh’a mipin hahsatna ato ahi, tin thuso miho heng’a aseiyin ahi. Oil depot’a kon thao akilah jouva pump khah ho chung’a action kilading ahi, tin Ranjan in aseiyin chule oil depot mun’a ni 30 lhing man ding thao alhingset’a um ahi, tia suhthengna aneitoh kilhon in japi amoh lungjin louding’in temna aneiye. Petrol leh diesel aumjat hi vetlhahna umjing’a chule IOC in department heng’a hetsahna anei ahi’in, lunggim nading aumpoi, ati.

CAF & PD in thinglhang district panna’a oil pump ho’a drive aboljing ding ahi, tin aseibe’e. Team hon PCTC, M/S K Nilo Singh, M/S Uripok Energy Station, Highway Petroleum, Singjamei NRL oil pump chule adang dang kholna anei uva chule pump ho’a diesel leh petrol ijat um em, tijong avet jing-u ahi. Oil pump tamtah’a thao aum vang’a ‘thao aumpoi’ ti lekha atah uva kikhah ahi.

Thao neiya ahivang’a mipi hom nomlouva khah ho gotna kipeding ahi, tin Ranjan in aseiyin, chule gotna hi oil pump kikhah ahilouleh license kilahpeh hiding, gotna hi sorkar thulhuh dungjui hiding ahi, ati. Driver hon kiphinna aneiyu hi amaho ding’a kitepna phabep akisem jouva kisulham ahitan, Imphal khopi’a thao gari hung lhung pan kit ahitai.

4th Phase Mission Indradhanush toh kisaiya media sensitization programme kibol

Imphal, May 4: Mission Indradhanush 4th Phase tulha (May) nisim 7 a kon kibanjom ding ahi tin Director of Family Welfare, Dr K Rajo in tuni Famil Welfare Services, Conference hall’a media sensitization programme a ahoulimna’a aseiye. Kinguon’a chun State nodal officer of UN, Sarat Yadhav, State Nodal officer, Kh Nandakeshore le Additional director, Salam Abdul in pan ala’uvin ahi.

Kinguon’a Dr. K Rajo in ahoulimna’a chun, Mission Idradhanush mipi hon aphatchomna ahetdoh theina ding’uva hin  media ho’n mopohna lentah anei’uve tin aseiye. Mission Indradhanush 2nd Phase a chu natoh 53% vel ana kitongkhai ahi’n, avatnalai ho hi fourth phase a kitong chai ding ahi tin aseiye.

State Nodal Officer of UN, Sarat  Yadhav in aseidan in Mission Indradhanush 4th phase kitup tah le lolhingtah’a achelhah theina ding in State Task Force akisemdoh in ahi ati.

ADCC Chairman in Office lopanta

Lien S. Gangte

Ccpur., May 4: Khaipao Haokip, Chairman ADCC Office Renovation jotheng ahi toh kilhon in 4th May, 2017 nikho chun Office mun alopan tan ahi. Hiche kingon ahin, Rev. LB Angam, Executive Director, ECA in ADCC Chairman Pathien a vangthumpeh na aneiyin ahi. Chuleh, atoh khompi ADmCC noiya Dept. chom chom ho’n kipa thilpeh pehna jong anei uvin ahi. Khaipao Haokip, Chairman ADCC in khantou naleh  machal na aum thei na ding’a lung khat leh thakhat a pankhom angaithu aseiyin ahi.

ADCC Chairman kilhen na 22nd May, 2017 nikho chun Chief Minister Conference Hall mun’ah ana um in, hiche achun Khaipao Haokip, MDC, Kholmun chu Chairman ADCC ding in lhendoh in ana um in ahi. Chuleh, aman ADCC Chairman ding a kihahsel na 24th May, 2017 nikho chun Classic Hotel, Conference Hall mun’ah ana neiyin ahi. ADCC Chairaman thah Khaipao Haokip in asei na’ah, ADCC in ahina bang tah’a thanei na (Power Devolution) anei thei na ding’a pan hatah’a kalah ding ahi tin aseiyin ahi.

Chuleh, Bungmuol a MDC ho quater ding sahna leh ADCC Office compund a Conference Hall akinlam’a sahjouva aum thei na ding’a pankila ding, Nenpo gari (Sanitary Truck) Municipal Area/Town Area sung bou hilouva, mun chom chom a alhai thei na ding’a pan kalah ding ahi ati. Chuleh, ADCC noiya Govt. School um ho’a thiemjil na hatjo leh phajo aum thei na ding’a pan kila ding ahi tin jong aseiyin ahi.

Thiemjil na toh kisai a KSO-Singngat Block in DC, Ccpur/CEO, Chairman ADCC kimupi

Lien S. Gangte

Ccpur, May 4: Kuki Student Organisation (KSO), Singngat Block in 4th May, 2017 nikho chun Singngat Block noiya Govt. School ho’a thiemjil na hoijo leh phajo aum thei na ding in R. Sudhan, IAS, DC, Ccpur; Soiminlian Lengen, CEO, ADCC leh Khaipao Haokip, Chairman, ADCC ho akimupi uvin ahi. Chuleh, ama ho kipapi na in Nampo’n khat cheh silpeh na jong anei uvin ahi.

Khaipao Haokip, Chairman, ADCC; Soiminlian Lengen, CEO/ADCC leh R. Sudhan, IAS, DC, Ccpur ho’n KSO-Singngat Block ho thiemjil na toh kisai’a pan alah nao akipapi thu aphong uvin ahi. KSO-Singngat Block in Thiemjil na avetsui naotoh kisai’a a panpi thei nao lam cheh’a panpi ding in kitep na jong anei uvin ahi. Chuleh, CEO, ADCC in Singngat Block noiya Govt. School jouse Education Survey bol ding in jong tepna aneiyin ahi.

Thusoh Lahchom

BJP vice-president

February le March lhasung’a Thangmeiband A/C sung’a hopdoh ding anchang tunigeiyin akimu naipoi tin BJP Vice-President Jyotin  Waikhom in alungkimlouna aphongdoh in ahi. Waikhom in a In-mun’a thuso miho akimupina a aseidan in , local MLA in Thangmeiband A/C sung’a anchang 3200 Quinton ahopdoh na evidence jong aum in ahinlah mipi ho tunigeiyin anchang mukhat jong amu naipo’uvin ahi. Hiche thu hi authority concerned in akhol chil ding in ngehna aneiyin ahi.

Narcotic drive

Narcotic Cell, State Police department in Thursday nikhon Thangal Keithel leh akimvel’a khamnathei thil kholna in ‘drive’ abol uvin, dan in aphal louo khamnathei thil tamtah aman uvin ahi.

Numei 1kiman

12 Assam Rifles hon Imphal-Moreh lamlen, Khudengthabi’a kholna anei na uvin numei khat’a konin ‘World is Yours’ tablet 1823 packet 9’a kichun’a kisel amandoh uvin ahi. Thulhut dungjuiya akiman numeinu hi Nemneifel (38), w/o Th Henmuanlal, Churachandpur’a cheng ahi’in, Maruti Eco gari (registration number MN01S 6031)’a ache na’a dangka 9.11 lakh man lhing khamnathei louchang kimandoh ahi. Police khut’a akiman louchang hotoh apedoh tauvin ahi.

School van in tosetna toh

Poiroukhongjin Kaina mun’a Thursday sun’a simlai ho kipohna school van in tosetna atoh in, thilsoh’a Nawa Sindam Sang’a kai simlai thum akitongkha uvin ahi. Thulhut dungjuiya, akitongkha simlai ho Yairipok community health centre’a apolut tauvin ahi.

Blank fire

Naga miphalou themkhat in Assam-Nagaland gamgi kom Golaghat sung’a um Merapani khosung’a thal akap khum jing jeh un gamgi kom dung’a cheng hon kichat naleh lungling lou na atoh gam taovin ahi. Kho sung’a um mipi ho seidan in; Naga miphalou mi 4 Gorbasti kho sung’a ahung lut uvin ema thu jong sei lou in blank fire ahung bol jeng uvin ahi ati. District administration hon thilsoh umdan ahet nung uvin jong tuchan in pan eilah hu pou ve tinjong aseibei. Achesa May 1 nikho ni injong Naga miphalou themkhat ma ma in Gorbasti akon kilometers 1 dung nga kigam lha Selseli vadung kom lah’a  jong thal ahung kap jing uvin ahi ati.

Kangla

Chief Minister OSD le Forest & Environment official hon tuni chun CM N Biren thupeh dungjuiyin Kangla’a maintenance natoh chelha ho vetchilna anei’uvin ahi.  Inspection team chun kangla sung’a Thangapat natoh tunigeiya akichailou dan ho agamudoh uvin ahi. OSD, Ch Maipak in Thangpat natoh tunigeiya akichai thenglou na chung’a alungkimlouna aphongdoh in ahi.

Editorial

Ni 100 sunga govt in tohding aphondoh

Govt in hahsatna ato thei ho

Pu N. Biren lamkaina a State Government in ni 100 sunga atohdoh ding ahin phondoh ho ivet leh thanop a um naban ah, ahin tohdoh kah u ngalel lel aum jeng e. Development project 57 government in ni 100 sunga tohdoh ding agon ho hi ivet leh thil phachom ngen ahin, mipi dinga phatchomna ahung hitei ding jong tahsan a um e. Hiche project ho hi atamjo government masa a lamkai ho thilgon ahi/ahilou thuchuom in kikoi taleh, hitobang natoh ding ahin phon doh uhi pachat umtah ahiuve. Centre a BJP government chedan abah leh State a BJP lamkai government hin jong aphondoh ho tohdoh na dinga machalna ahin nei ding hi tahsan umtah khat vang ahi. Chuleh, BJP lamkai government hin asei tobang uva na atoh u hinam tihi tuchung hi a patepna masapen hiding ahin, ipi ahung ti ding hetnop umtah ahi. Ni 100 sunga tohdoh ding aphondoh uhi thuhjep a ivet leh ahahsa ding vang tambehseh lou ahi. Vetsahna in, Grade III leh Grade IV natoh kilahna a interview umtalouding ti chu ha boipi ngailou, recruitment notification a suhchai thei ahi. Adang tamtah jong gazette notification ahilou leh order khat so a hijengthei tamtah aum e. Building/infrastructure sahbe ding ti jong hi sanction order bola, contractor ho no hat a hithei thil ahi.

Ahinla, ni 100 sunga tohdoh ding lah a jao, healthcare staff ho posting hoptoh ding, adeh a thinglhang gama health centre a staff umlouna ho a staff hoptoh (rationalize) ding kiti hi  government a dinga ‘challenge’ (patepna) lentah ahi ding tahsan a ume. Ijeh in em iti leh, ipi department staff hileh koima thinglhang a posting che ding nom ji lou ahi. Phaicham mi ho bou thinglhang a chenomlou ahi pouvin, ei thinglhangmi govt natong koima thinglhang a posting ding thanom aum poi. Vetsah na in, thinglhang khoneo khat a kon govt service hin kimu lekhathem khat chu thinglhang a khosah den ding gel pontin, geljong I gelji pouvin ahi. Hitobang employee ho lunggel chu, phai sunga ji-le-cha toh chen a, chate sem ding ti lungtup inei ji uve. Hiche hi mi tamjo chungah dih inte tingam ahi. Thinglhang a penga, hung seilen ho bon agama notoh (service) bola umden ding idatthei lou uleh, apen apat amukhah lou gama chu itidana koi chu thanom tah a posting che ding ham ti hi gelkham alhing e. Hiti ho kahlah a government in thinglhang gama posting ahin hoptoh ding kiti hi thil hahsahtah vang hiding ahi. Tulai govt employee ho hi aneopen apat alenpen chan a koima political backing bei umbehseh talou ahin, hijeh a hi staff rationalization hahsa cheh ding ahi. Phatah a staff mun jouse a hoptoh a, kigol tah a umsah ding iti leh Minister/MLA hon “ama hi kami-kasa ahi” ati uhi angah u ngai ding ahi. Staff khat thinglhang ham, mun dang ham khat a posting a kisol nung lahdoh thei hi alhangpi a MLA/Minister ho bou ahi jiuve. Minister/MLA khat in lhakhat sunga transfer/posting dinga UO/DO letter a sut hi file khat in akat maimai ji poi tihi mijousen ihetsau ahi. Tun jong health care staff phaicham a posting ho thinglhang ah sol taleu, Minister/MLA ho tailou adang koiman asollou nading angaito louhel ding ahi. Hijeh chun staff (medical hihen department dang dang hijong leh) rationalization hi government in atah tah a bolding ati mong mong leh Minister/MLA hon transfer/posting dinga UO/DO letter sut angah u ngai ding hileh akilom e. Chuleh, thinglhang mi govt service bol jouse thinglhang cheding (posting ding) a thatnop pi uva, akisol banga thanom tah leh mi vetjui thei dinga na atoh u ngai ahi dan avel a geldoh kit angai e.

Blankfire

Muntin gamtin a kikum lele hojong hinom / thanop aumthou nan ahinlah koiham khat te kin akiti tengle vang ilim ilai gakimusah dingjong ngap aum hihbeh e.