ET May 4, 2017 News (Local, Regional, National, International, Thusoh Lahchom, Editorial,...

ET May 4, 2017 News (Local, Regional, National, International, Thusoh Lahchom, Editorial, Blankfire)

293
0
SHARE

Education chungchang’a 2-Days Training programme hondoh hita

Imphal, May 3 (DIPR): Education Minister Th Radheshyam in tuni chun  Multipurpose Hall SCERT Complex, Lamphelpat  a nikho 2 chelha ding Training Programme hondohna aneiyin ahi. Kinguon chu “Equipping the Students to Face Challenges of 21st Century Education: Role of Teachers & Society” thupi mangcha’a kiguong ahi.

Radheshyam in kinguon’a ahoulimna’a chun gamsung education system semhoina ding’a hitobang training ho aphat phat’a guonlou apoimo dan aseiyin ahi.Training kibol hi jilkung hon lekha hil dingdan chom chom le athah thah ahetbe theina ding’uva kiguon ahi. Simlai ho hi lekha lam bou hilouva ahinkho sung’uva decision phatah tah le hoitah tah alah theina ding’uva kichuhna jong peh ngai ahi. Education kiti hi simlai hon exam a mark tampi pi ahinmu na ding’uva kihilna khu ahipo’n, ahinkho sung’uva boina atoho’u  akimaitopi theina ding’uva kichuhna pehdan joh kiseina ahi. Khangdong ho hi Education chungchang’a…

technology lam’a jong jilkung ho sang’a khantou ahita’uvin hiche jeh’a hi jilkung ho jong technology lam’a akihabol jep’u ngai ahi tin Radheshyam in aseiye.

Parliamentary Secretary Education K.Robindro Singh in ahoulimna’a chun simlai ho tilkhouna thu giltah tah aseipeh in ahi. Aman aseidan in tukhang simlai ho hi mipi lah’a dindoh’a thusei le houlim bolhah asa’uvin , hiche hi jilkung ho’n agelkhohjep’u ngai ahi ati.

Tuni kingon a chun Principal Secretary Education (S) Vineet Joshi le Thoubal, Imphal West, Wangoi le Kakching’a kon jilkungphabep le official phabep in pan ala’uvin ahi.

HSLC exam answer sheet vetna’a thil dihlou bol aumleh action kilading ahi: Edu. Minister

Imphal, May 3: Thokchom Radheshyam, Education Minister, Manipur in Board of Secondary Education Manipur (BOSEM) noiya kibol High School Leaving Certificate (HSLC) exam answer sheet vetna’a dan dihlouva thilbol aumleh kingaidam louding ahi, tin aseiyin ahi.

SCERT, Lamphelpat, Imphal West mun’ a ‘Teachers’ training programme’ a ahoulimna’a Education Minister in Principal secretary, Education (S) lamkaina’a answer sheet kivetna’a thil dihlou kibol ho kholna nei ding’a inquiry committee kisemdoh ahi, ati. Official ho dan dihlouva natong aumleh achung’a action khoutah kila ding, koima kingaidam louding ahi, tin aseibe’e. Secretary, BOSEM in thil dihlou abol’e, ti thu thuso mihon thudoh aneiyu Radheshyam in adonbutna’a, thukholna achelha in, athemmona akimudoh’a ahileh secretary chung’a action kilomtah’a kilading ahi, ati.

Hetthei khat chu Kangleipak Students’ Association (KSA) in BOSEM in HSLC Exam answer script avetna’a thil dihlou abol’e, tia ngohna aneiyu ahi. Peace and Freedom academy’a Math teacher T Amubi in CC Higher Secondary School’a answer sheet jouse athah’a akhel’e, tia simlai kiloikhom hon ngohna jong aneiyu ahi. BOSEM secretary in thil dihlou tamtah abol’e, tia KSA in ngohna sangtah anei ahi.

Heirok’a numei chapang 2 kisuse

Imphal, May 3: April nisim 14 nikho’a khangdong phabep in numei ni hunam’a ana suhset’u chungthu jong thip nailouvin tunaicha chun khangdong numei ni hunam’a kisuhsetna le kihenkolna thu khat ahung gingdoh kit in ahi.

Thulhut khat in aseidan in, numei chapang teni le asuse lhon pasalpa chu social media’a hung kihedoh’u ahi.  Amaho hi social media’a ahung kihetdoh nung’uva atahsa tah’a kimuto ding’a ana kitem’u ahi. Hitolhon chun April nisim 29 nilhahlam nidan 1:30 vel chun Heirok’a ana kimuto’uvin ahi. Pasal ho chu Alto Car Regn. No. MN05-A/3314  a hung tou’u ahi. Gari sung’a chu Johny Aheibam, 21, s/o Jayanta, Heirangoithong Aheibam Leirak le Elangbam Robi, 25, s/o E Ibodhen, Langmeidong Awang Leikai hung tou lhon ahi. Pasal teni chun numei chapang teni chu Kakching Garden ve ding’a apui lhon’a Kakching  a um Sarik Konjil a um farmhouse khat’a apuilut lhon’a asuhset lhon ahi.

Alangkhat’a numei chapang teni nu le pa hon thilsoh toh kisai in police heng’a hehna lekha ana seplut’uvin ahi. Ajing nikho chun Mayang Imphal Police Station a routine driving license check bol police hon pasal chapang teni chu ana mandoh’uvin ahi. Pasal chapang teni chu Police hon Thoubal Child Welfare Committee Chairperson Kh Jitendra khut’a ana pelut’uvin ahi.

Pasal chapang teni chu  Thoubal session judge maiya ana ding lholn in hiche jou chun May nisim 9 gei police custody a um ding in ana podoh ta’uvin ahi.

Senapati’a CSO holeh Minister hon toukhomna nei

Imphal, May 3: NPO le Civil Society Organisation, Senapati lamkaina in May nisim 2 nikhon DRDA Conference hall mun’a toukhomna aumin, PHED, Printing & Stationery Minister, Losii Dikho, Tribal and Hill Areas, Fisheries Minister, N. Kayisii, leh Senapati ADC, Chairman ML Markson chule atohkhompi ho toukhomna’a apang uvin ahi.

Tribal Scheme chom chom noiya fund ho atam thei pen’a peh ding’in Tribal Development & Hills Minister Kayissi in kitepna aneiyin chule PHED Minister Dikho in Barak festival lamkai ho pachatna thu aseiyin, Barak vadung twi kholna kitup akisem’a ahileh gamsung pumpi twi pe’a pang thei chule tourist spot jong hithei ahi, tin aseiye. Barak Festival hi state festival’a hetpehna aumding thu jong toukhomna’a aseikhom uvin ahi.

State Cabinet in GST bill phatsahna neita

Imphal, May 3 (DIPR): GST Council in  gamsung pumpi’a Goods and Services Tax chepi ding tohguon aneitolhon in State Cabinet in tuni chun Section 173 le 174 dungjuiya ahunglhung ding 1st July, 2017 a kon Goods and Services Tax chepi pantah ding in thulhuhna aneiyin ahi.

GST council hin 31/3/17 nikho’a chu State GST bill  approved ana bol’a  State government jouse in jong achepi ding’a thupeh ana nei ahi.

Manipur State Goods and Services Tax Bill, 2017 dungjuiya hi intra-State supply jouse’a tax kilading amavang alcoholic liquor ho’a vang kilalou ding ahi. Tax kila hi 20% val theilou ding ahi. Tutadi’a vang petroleum Crude, high speed diesel, petrol, natural gas chuleh aviation turbine fuel ho chung’a hi Manipur VAT Act, 2004 dungjuiya tax kila nalai ding ahi.

EGM lamkaina’a World Press Freedom Day kinit: Thuso hin pan lentah alah ahi, tia K Radhakumar in sei

Imphal, May 3: State Information Centre, DIPR, Palace Gate mun’a “Promoting the media’s potential as a catalyser of peace and mutual understanding” ti thupi in World Press Freedom Day-2017 kin-gon Editors’ Guild Manipur lamkaina in amang uvin ahi.

IPR Commissioner Kangjam Radhakumar, Director IPR Meghachandra Kongbam, Secretary General, Editors’ Guild Manipur Yumnam Rupachandra leh President Editors’ Guild Manipur  Ahongshangbam Mobi Singh kin-gon’a Chief Guest, Guests of Honour leh President in apang uvin, commissioner Radhakumar in ahoulimna’a nikho hi press chamlhatna neiding athupi dan eigeldoh sah-u ahi, tin aseiye. Mipi in boina leh hahsatna ato ho sorkar hettheiya tahlang nading’a thuso mihon pan lentah anei ahi, ati.

Kivaihomna aphat’a akitup nading’a media panlahna thu Meghachandra Kongbam in aseiyin, chule media in atohding atohna’a hahsatna chom chom ato ho thu jong aseiyin ahi. AIR News Editor Dr. Aribam Ibomcha Sharma in media in chamna asem em, ahilouleh tukhang’a kisei thang gal asem ham, ti thu’a houlimna aneiyin, EGM Secretary Rupachandra in tukhang’a thuso dihlou leh alhem kisei jing hohi boina lenpen ahi, ati. ‘World Press Freedom Day’ hi thupi (sub-theme) thum noiya kimang ahi, tin aseibe in ahi.

UNESOSOC Meeting’a panla Dr. T.Lunkim leh Dr. Satkai Chongloi KSO in vailhunna kin neipeh

Imphal, May 3: Tunaicha United Nations Economic and Social Council (UNECOSOC) Meeting, UN Headquarters New York khopi a panla Dr T.Lunkim, Chairman KOHUR leh Dr Satkai Chongloi, Gen.Secy. KOHUR chu tuni’n Imphal ahung lhun lhon tolhon in,  Airport ah KSO lamkai cheng in lamtona aganei uvin ahi. Liemna togom in TTS Hall ah vailhunna maicham jong aneiyuvin ahi.

Pu Lunsei Touthang, Standing Committee KSO makaina noiyin vailhunna kin akimang in, Pu Paotin Lupheng, President KSO-GHQ leh Pu Jangmang, HTC a kon in houlimna jong aum in ahi.

Hetthei chu, mipi hetthei a Pu Dr T Lunkim leh Pu Dr S Chongloi vailhunna kingon nikho khatleh Kuki CSO makaina noiya umding ahin, tulha kichailam hidin ginchat ahi.

State Mission on Employment, Housing &  Drinking Water launch kibol ding

Imphal, May 3 (DIPR): 2017-18 kah’a gamsung’a cheng mipi ho employment, Housing le don ding twitheng pehding lunggel neipum in state cabinet in tuni chun  State Mission on employment , housing and drinking water  hondoh ding tohguon aneiyin ahi.

Hiche thulhuhna hi tuni  CM Cabinet Hall a CM N.Biren Singh lamkaina’a kibol State Cabinet Meeting’a asemdoh’u ahi. Hiche mission hi pillar thum-Community mobilization, Transparency, Universal Coverage- a kingam ding ahi.

Hiche mission’a kimangcha ding sum ho hi Central Governmentin sponsored abol scheme ho’a kon kikaidoh ding ahi.

Mission hi phase nga (5) a chelha ding’a kisem ahi. Chuleh mission noiya hi Insung 7,50,000 vel natohna kipeding Inn 86,000 vel kisading chuleh Insung 4,63,620 don ding twi theng kipe ding ahi.

Tohgon tohmolsona ding’a hi Governing Council khat in aboipi ding ahi. Governing Council hi CM in alamkai ding anoiya Executive Council  phabep umding ahi. Executive Council ho hi Chief Secretary le District Executive Council  in alamkai ding chuleh Deputy Commissioner concern in Chairperson tohmun atuh ding ahi. Mission vetup ding’a hi Cluster Level Monitoring Committee khat jong kisemdoh ding , hiche committee a hi concerned MLA in chairman dinmun atuh ding ahi. Ahunglhung ding June lhasung’a hiche Mission hi launch kibol ding ahi.

Tutu’a hi Manipur sung’a educated unemployed youth 7 lakh vel um ahi. Chuleh Manipur sung’a Inn umjat hi 5.07 lakh vel ahi’n, hiche lah’a 1 lakh vel hi Governent service a kingai’u ahi.

Water supply lang’a Manipur hi state dang ho sang’a hatah a lhasam ahi. Gamsung’a um Inn jat lah’a 16% vel bou vin tutu’a hi don ding twi theng amu’u ahi.

Transport Department in 24X7 cell semdoh

Imphal, May 3: Transport Department in May nisim 2 , 2017 nikho’a  thupeh anei dungjuiyin Directorate of Transport Office’a cell khat akihongdohtai tin Dy.Director of  Transport (Admin) for Director (Transport), Manipur Dr.A.Chinglenkhomba Meetei a kon kimu thulhut in aseiye. Thulhut in aseidungjuya hiche cell a hi officer/staff phabep 24X7 touding’u amaho hi driving license verification le report compilation abol ding’u ahi. Cella touding officer ho le staff ho chu-KshKanto Singh, LDC , Directorate; S.T.Vaiphei, LDC, DTD (IW), Ph. Bijoykumar Singh, LDC, Directorate; Binod Raj, Checker , DTO (IW); Deepak Singh, Grade-IV, Directorate chuleh L.Bikash, Grade IV , DTD (IW) ahi’uve.

Tamenglong’a ‘news reporting course’ kipan ta

Tamenglong, May 3: Course Coordinator, State Institute of Journalism, DIPR Chongtham Noyon Singh in Wednesday nikhon Tamenglong District Information Office mun’a ‘7-Day Basic Course in News Reporting’ hondohna aneitan ahi.

President, Tamenglong District Working Journalist’s Union Ramkung Pamei leh President, Manipur Hills Journalist’s Union Sothing Shimray kin-gon’a president leh guest of honour in apang lhon in ahi. Training kibol hi thinglhang district’a hitobang training kibol athum channa ahi, tin Course Coordinator in aseiyin, kum masa’a Ukhrul leh Senapati district headquarter’a programme kimang ahi, ati. Chule Churachandpur district Headquarter’a jong 7 day basic course kibol vahding ahi, tin aseibe’e.

Participant hon lunglut tah’a pan alah diuvin temna aneiyin ahi. Ramkung in ahoulimna’a, Tamenglong district’a hitobang akibolna masapen ahi, ati. Akipatna hijong leh district sung’a journalism suhthou kit na lamppi hiding ahi, tin aseiyin chule department in thinglhang gam’a hitobang training program abol diuvin temna aneibe in ahi. Agom’a khangthah 29 in pan alah ahi’in, May nisim 9 nikho’a basic course khumkha hiding ahi.

Thao po gari hon pump’a thao pe loulai

Imphal, May 3: Petrol leh diesel pump’a peh ding’a kitepna aum vang’a oil tanker hon thao pump’a petrol ahilouleh diesel apehlou jeh uvin mi tamtah in thao amujou pon ahi.

Imphal-Dimapur lamlen’a thal-choi thingnoimi ho buluna thilsoh demna’a driver hon natoh angah-u ahi. All Manipur Petroleum and Drivers Association in natoh angah’a chule Chief Minister in thumna bulhit ding’a kitepna anei kahse’a thao pump’a thao pehlou ding’a kinoptona aneiyu ahi. Oil tanker lhomcha in thao pump’a thao ape pan tan ahi, khopi sung’a um thao kijohna pump atamjo kikhah nalai ahi.

Tuni nilhah kah’a oil tanker atamjo in thao pump’a thao apeh uva, mipi choh theiya aumding tahsan ahi. Malom Oil depot mun’a ni 22’a ding thao alhingset’a um nalai ahi. Hetthei khat chu achesa April nisim 18 leh 30 nikho’a Imphal-Dimapur lamlen, National Highway 1’a oil tanker ho meithal’a kap’a hi KCP thingnoi ho ahiuve. Police hon achesa April nisim 21 thilsoh toh kisaiya KRA thingnoimi 4 amat ahitai.

Driver 1 leh helper 1 thingnoi hon kaimang’a lhadoh kit tau

Imphal, May 3: Keithelmanbi leh Saparmeina kikah’a Wednesday sun nidan 11 don’in KNF(P) hiding’a ginmo thingnoimi hon truck driver leh helper khat akaimang uvin ahi.

Tiles kipohna truck hi Dimapur khopi’a kon Imphal khopi jon’a hung ahi’in, truck neipa heng’a dangka lakh 2 thumna aumjeh’a truck driver leh helper pa kikaimang ahi. Ahin, sun-kim nidan 12.10 vel in akikaimang teni alhadoh tauvin ahi.

Moreh College a Water Supply Scheme kihongdoh

Moreh, May 3: Border Area Development Programme toh kisaiyin tuni chun 26 Sector noiya 11 Assam Rifles hon Moreh College a Water Supply Scheme anahongdoh uvin ahi.

Hiche Water Supply Scheme HQ IGAR (South) kithopina noiya kisemdoh ahin chule akisemdoh Water Supply Scheme hin College a tui analhasam ji chu asuhbei ding ahitan, Assam Rifles ho natoh phat nachung’a Principal, Stduent le staff hon kipathu thot anei uvin ahi.

Gulchuh khat AR hon huhdoh

Imphal, May 3: Khangthah pasal gul in achuh khat tuni chun JAK RIF Battalion Patsoi Army Camp hon anahuhdoh uvin ahi.

Gul in achuh pa chu Y Meghachanra Singh (25) s/o (L) Y Khogen Singh ahin chule amahi Bhobon Skills Development Centre , Langden Khunon, Lamshang a simlai ahi.

 Amahi gul in achuh joujouva chu 9 sector Assam Rifles hospital a pohlut ahin, hiche a chu ‘Anti-Venom’ drugs le ‘Blood Clot Test’ alhing’a anakibol ahi. Assam Rifles ho panlah nachung’a innsung miten kipathu jong ana phong uvin ahi.

Irom Sharmila leh British gam-mi Desmond Coutinho in golvah bol ding

Madurai, May 3: Manipur Iron lady tia kihe’a Irom Sharmila in ji anei ding ahitan, British gam-mi Desmond Kutino toh kicheng ding ahi.

Tu-leh-tu’a Irom Sharmila Madurai, Tamil Nadu gam’a um ahi’in, ani lhon’a Kerala gam’a golvah bol ding adeisah cheh lhon ahi. Irom Sharmila leh Desmond Coutinho hi achesa kum 8 kingai lhon ahitan, Bangalore khopi’a aum laiya Coutinho in Sharmila thu ajah ahi. Chomkhat jouva kimuto lhon’a kilungset lhon ahi’in, Manipur gamsung ding’a pan lahding Irom in agelkhoh jeh’a jinei ding anagel lou ahi.

Tu naicha election’a gol lelna anei jouva gamsung mihon apampai apohnat thoh ol nading’a Irom Kerala gam’a che kit ahi’in, Britain gam’a Coutinho aum jeh’a a-inn’a passport la ding’in ahung kile kit in, ahin, authority hon passport peh ding aphal pehlou ahi. Hiche jeh’a India gam’a golvah bol ding’a umlhon ahi. Sharmila tuhin Madurai’a aumin, ajiding pa jong Madurai lhung ahitai. Ahin, itih nikho leh kicheng lhon ding ham, ti aphat aseidoh lhon pon, hijong leh Irom ngailu’a Mayalayees hon Kerala gam’a golvah bol ding akipa dan thu asei uvin ahi.

NEC e-Office kihongdoh

Imphal, May 3: Dr.Jitendra Singh, Hon’ble MoS DoNER , Chairman in tuni chun Ministry of DoNER, Vigyan Bhavan Annexe, New Delhi’a kon Video Conferencing mancha in NEC Secretariat e-Office hondohna aneiyin ahi.  Video Conference a chun Navin Verma, Secretary, Ministry of DoNER, CK Das, Member, NEC, Ram Muivah, Secretary, NEC le Neeta Verma,  DIG, NIC in pan ala’uvin ahi.

e-Office hi National e-Governance Plan (NeGP) in aguon Digital Workplace Solution Mission Mode Project ahi’n National Informatics Centre (NIC) in ahin semdoh ahi. E-office hin sorkar natohna’a apoimo lou ho le phatman na bep natoh ho asuhbeiya  transparency, accountability, data security le data integrity asemhoi ding ahi.

Tutu’a e-Office application hi NEC Secretariat a File Management System, Knowledge Management System  le Leave Management System dungjuiya kimangcha ahi.

Ambari mun’a meikah jeh a inn 40 tobang kavam

Ambari, May. 3 : Thulhut kimu dungjui in Tuesday ni nilhah lam chun Guwahati,Ambari sung’a um SK Bhuyan Road mun’a mei kah jeh in inn 40 vel leh thil leh lo lakh ejat ham khat ana ka vam gam in ahi ahin hiche thilsoh’a  chun koima vang akisukha ana umpon ahi ati. District administration leh police ho seidan in; hiche meikah hung kipat nahi cylinder pokeh jeh ahi tin agin mo nao thu asei un ahi. Hiche mun vel lah’a cheng niseh’a neh kilo ho in athil leh alo’u khatcha jong ana kilah doh man pouvin ahi.

Report dungjui in;Nasir Hussain hin inn bahara mi tamtah akoi naban in daan toh kitoh lou in LPG cylinders jong akoi in chunaban in meiphel gari 14 tobang jong lampi neo jeh chun amun chu aphat chan analhun theipon ahi. Firemen hon hiche mei chu nidan 8:30pm vel in anaphel mit un ahi. Hiche thilsoh’a inn leh lou nei talou hochu Kamrup Academy School leh Assam Textile Institute mun akichol sah un ahi.

Kumbi lamlen vengsung mihon khah

Imphal, May 3: Achesa May nisim 1 nikho’a khangthah khat gari’a tatlih’a jam pai paiya gari tol pa koi ahi achungchang thu administration in apehdoh ding thumna in Thanga Assembly constituency noiya um vengsung mihon Kumbi lamlen, Hougrampat alamtin uvin ahi.

Moirang-Kumbi lamlen tosetna thilsoh’a kum 32’a upa Seram Basanta, s/o Momon thi ahi’in, vengsung mihon Moirangkhunou Hougrampat mun’a toumun kiphinna abol uva driver pa nidan 24 sung’a amat diuva phat ateppeh-u ahi. Seram Basanta thin a thilsoh toh kisaiya JAC jong kisemdoh ahi.

Thi-long Keibul police hon post mortem bol ding’a alah vang uva insung mite leh loi-leh-pai hon thumna bulhut ahi kahse’a thilong kila louding ahi, tia gihna aneiyu ahi.

Mizoram HSLC themvetna result phondoh hita

Imphal, May 3: Mizoram HSLC 2017 themvetna result phondoh ahitolhon in agom in simlai 72.17 % vel in pachanna aneiyin ahi. Themvetna’a chun Mizoram Serchhip khopi sung’a um Mariana High School simlai Laldintluanga in mark 500 lah’a mark 747 amutolhon in Mizoram topper dinmun achangtan ahi.  Laldintluanga hin English, Mathematics, Science, Social Science le Mizo  subject’a letter mark amu ahi.

St Paul HS School simlai Akash Jyoti Sahoo  in agom in mark 473 amu in ani channa in apachang in chuleh  Aizawl school’a kon Janam Supriya in mark 469 amu in athum channa in apang in ahi.

State Education official hon jong simlai ho’n alhangpi’a abolhoi na chung’uva alungkimna’u aphongdoh’uvin ahi.

Vaison KWU Unit Hondoh na le Solar lamp hopdohna um

Ccpur, May 2: Kuki Women Union (KWU), Koite Lui Block, D. Vaison Unit hondoh na le 25th Assam Rifle in Solar Lamp hopdoh na kingon 2nd May, 2017 jinglam nidan 10:00 apat chun aum in ahi.

Hiche ahin, keynote address seina Hevah, T. Champhai, Secy. KWU Koite Block in aneiyin chuleh, KWU, D. Vaison Unit lamkai ki lhenna Khoneng, President, KWU, Koite Block lamkai na in aum in ahi. Lamkai thah lhendoh’a um ho, President ding Lheijalam of Theisonjang, V/President ding Ngahboi of Patlen, Secy. ding Nengpi of L. Khonom, Prayer Co-Ordinator ding Chichin chuleh, Information Secy. ding Chongneo of Zolen ho ahiuve. Lamkai thah ho Pathien a vangthum peh na leh D. Vaison Unit hondoh na Rev. D. Alun Haokip, Chief of D. Vaison in aneiyin ahi. Chuleh, lamkai thah ho kihahsel na Khoneng of Tollen in aneipeh in ahi.

Alangkhat ah, 25th Assam Rifle in Solar Lamp hopdohna aneiyin ahi. Hiche kingon ahin Major Pankaj Giri, Major Radha Krishnan, Major Narinder Sharma leh Col. Sanjay Kumar ho ahung jaouvin ahi. Major Narinder in asei na’ah, 25th AR in North East India ngai khoh na len tak akineiyin chuleh, khangthah ho Army a ahung lut thei na ding uva pan hatah’a kila jing ding ahi ati. Chuleh, Major Radha Krishnan in khangthah ho genthei na leh hahsat na kithopi ding’a kimansa’a 25th AR kimansa’a kium jing ahi ati.

7th Pay Commission: Cabinet in pension plan thah approve bol; central govt. pensioner 55 lakh vel in phatchompi ding

New Delhi, May 3: Union Cabinet in Wednesday ni chun 7th CPC (Central Pay Commission) in pay le pensionary benefit chung’a benefit chungchang’a recommendation abol ho approved aboltan ahi. Hetthei khat chu June, 2016 a chu 7th CPC in  2016-17 sung’a additional financial outgo ding’a Dk.84,933 recommend ana bol chu implement bolding’a phatsahna ana nei ahi.

Modification proposed ana kibol chu January nisim 1, 2016 nikho’a chu ana kimangpan ahitai. Cabinet in increase approved abol tolhon’a hi annual pension bill bouva Central government in Dk.1,76,071 crore asuh lut ding ahi.

7th CPC in pre-2016 pesioner le family pensioner ho chungchang’a revision bolding’a recommend abolho jong cabinet in asanpeh in ahi.  Revision dungjuiya hi centre in 2016-17 sung’a Dk.5031 crore vel asuhlut be ding ahi. Pre-2016 pensioner ho pension revised bolding hi second formulation a pension ana kipe ho 2.57 factor a multiply kibol ding, hiche dungjuiya chu kipeding’u ahi.

7th CPC in recommend abol dungjuiya  revision hi Pension Payment Order (PPO) dungjuiya revised bolding ahi. CPC in recommend abol procedure hi amasa’a ana kimang sang’a scientific  jo le rational jo ahina ban’a case jouse’a manchah thei hijo ahi. Committee in revision bolding dan athah ahin semdoh hi live pension case tampi kholchilna aneijouva ahin semdoh ahi.

6th CPC in disability pension ho percentage-based regime’a pension anapeh thalheng’a slab-based system joh chepi ding ti’a 7th CPC in recommend abol jong Cabinet in asanpeh in ahi.  Slab-based system chepi ding hi Defence Forces ho’n hatah’a ngehna anei dungjui’uva chepi ding’a thulhuhna ahin nei’u ahi. Ajeh chu percentage-based regime achejom jing’a ahile retire hung che ding ho disability pension hi hatah’a hung khesuh ding ahi.

2019 Lok Sabha election’a ‘Modi wave’ douna ding’a ‘grand alliance’ kasem ding ahi: Lalu Yadav

Bihar, May 3 (Zeenews): Bihar chief minister anahi leh RJD chief Lalu Prasad Yadav in Lok Sabha election kit teng BJP jo nading’a ‘grand alliance’ kasem ding ahi, tin aseiyin ahi.

Rajgir mun’a RJD worker hotoh toukhomna’a Lalu Prasad Yadav in ‘Modi wave’ lamtin ding dan tohgon aseiyin ahi. Bihar Chief Minister leh JDU lamkai Nitish Kumar toh kakikah lhon’a boina ima aumpoi, tin aseibe in ahi. “Lok Sabha election teng leh Bihar gam’a um Mahagathbandhan (grand alliance) tobang kiloikhomna kasem ding ahi. Nam thahat doudalna’a ding’a tukum August lhat leh RJD in rally lentah abol ding, Mamata Banerjee, Akhilesh Yadav, Sonia Gandhi, Nitish Kumar, Biju Patnaik leh adang dang kouna kapeh ding ahi. Bihar gam’a nam thahat goljo na vetsahna umsa ahitan, asung’a eiho ngaidan kibah louna iseilhah uleh goljona umkit ding ahi”, tin Lalu in thuso miho heng’a aseiyin ahi.

RJD lamkai Yadav in Prime Minister Narendra Modi demna aneiyin, mipi ajoulhep’a chule vaicha genthei ho machal nading ima atoh lou ahi, ati. “Modi leh Yogi politics kasuhmang ding ahi”, tin aseiye. Chule Modi leh Yogi hin Hindu Rastra semdoh nading’a RSS agenda bou ajuilhon ahi, tin ngohna aneiyin, RSS leh BJP lamkai luboh ho demna’a Lalu in Hindu Rashtra lamkai ding’a Brahmin ahilouleh Dalit koi angaito ham seidoh uhen, tin aseiyin ahi. Nitish Kumar leh Congress in thil lenjo ding gelkhoh na’a ngaidan kibahlouna anei asuhlhap ding’in Lalu in temna aneibe in ahi.

 

 

J&K gam’a thingnoimi hon rifle 5 chom

Srinagar, May 3 (IANS): South Kashmir gamsung Shopian district’a um police post thingnoimi hon abulu uvin, guard ‘a hiche mun’a um ho service rifle nga achom peh uvin ahi.

Police thulhut dungjuiya Tuesday jan’a thingnoimi ho guard post, district court complex’a lut-u ahi. “Guard mi 2 thingnoimi hon atha jo jou uva service rifle nga ajampi-u ahi”, ati. Kulgam district’a thingnoimi hon police 5 leh bank guard 2 atha uva, service rifle 4 achom-u thilsoh jou ahi.

 

China gam’a tunnel pokeh jeh’a mi 12 thi

Beijing, May 3 (AFP): China lhang-lhumlam gamkai’a high-speed tunnel apokeh jeh in natong 12 athi’e, tin Wednesday nikho thuson aseiyin, chule mihuhdoh na natoh pan hon nidan 14 val asohcha um em, ti ahol uvin ahi.

Tunnel (leinoi lampi) ‘a gas lut jeh’a pohkeh ahi’in, Guizhou province mun ahi’in, thilsoh’a mi 12 akitongkha in chule 12 ma atangden in ahi. Tunnel mun’a asohcha um em, ti mihuhdohna natoh pan’a mihem 2,000 val in kholna anei uvin, Wednesday jingkah nidan 4.45 alhin in operation anga tauvin ahi.

Tosetna thilsoh iti kipat ahi kholna aneijing nalai uvin, chule tunnel hin coal seam ajot pa ahi, tin thulhut in aseiye. China gam in high-speed rail building hi kum som val asah ahitan, km 17,000 val ahi. China gam’a industrial natohna’a tosetna thilsoh hi umjing ahi’in, ‘safety regulation’ lhasam ahi. Achesa 2015 kum’a government statistics peh dungjuiya, China gam’a natoh na mun’a mihem 66,000 in thina ato ahi.

 

 

IS hon Syria gam’a refugee camp bulu; mi 32 thi

Damascus, May 3 (ANI): Islamic State of Iraq and Syria (ISIS) thingnoimi hon Syria gamsung Hasakeh province ‘a um refugee camp abulu uvin, thilsoh’a mi 32 athi in chule tamtah akitongkha’e, tin amun’a um thuson aseiyin ahi.

UK gam’a pansa’a Syrian Observatory for Human Rights lamkai Rami Abdel Rahman in Iraqi refugee camp mun’a suicide bomber mi 5 tobang in bomb asuhpoh ahi, ati. Iraq gam’a IS ho thahatna mun’a kon mihem asang’a sim Syria gam’a jamlut ahi. Thulhut dungjuiya, athi leh akitongkha holah’a chapang phabep apang in ahi.

Iraq gamsung Mosul lhumlam gamkai hi ISIS gam hopsung ahi’in, Syria gam’a coalition sepai hon hatah’a anokhum jing uva, athaneina gam asuhneo cheh cheh ahi.

(Blast in Afghan capital Kabul kills four, wounds 22: Officials)

Kabul khopi’a RSM gari kibulu; mi 4 thi, 22 kitongkha

Kabul, May 3 (Reuters): Wednesday jingkah in Kabul khopi’a NATO lamkaina Resolute Support Mission ho military convoy suicide bomber hon abulu uvin, thilsoh’a mi 4 athi in chule mi 22 akitongkha’e, tin Afghan khopi public health officer in aseiyin ahi.

Buluna thilsoh’a gamdang sepai akitongkha um em, ti apet pet’a hetchen ahihih laiyin, bomb hattah nang jou ding’a kisem sepai ho kipohna gari kibulu ahi.

 

 

Ginmo mi phabep kimu jeh’a Pathankot’a operation chelha jing

Chandigarh, May 3 (Zeenews): Punjab Police leh security agency dang dang hon Pathankot leh Gurdaspur district’a Wednesday nikhon operation lentah abol uvin, gamkaiya ginmo um mi 4-6 akimu’e, ti thulhut amu utoh kilhon’a operation abol-u ahi.

Operation thulhut kimu chan in achelha jing in ahi. Gari sung’a mi 6 vel kimu ahi, tin Punjab police officer khat in thuso miho heng’a aseiye. SUV gari hi phat chomkhat jouva munkhat’a kidalha ahi’in, chule gari registration plate hi thukholna anei jou uva semthu ahi, ti ahetdoh uva chule gari hi Vijaynagar munvel, Jammu gam’a mikhat chem avetsah uva aguhpeh-u ahi, tihi hetdohna um ahitai.

January 2016 kum’a Pathankot Air Force base thingnoimi hon abulu uva chule July 2015 kum’a Gurdaspur district sung’a um Dinanagar mun thingnoimi hon abulu jouva Gurdaspur leh Pathankot district teni’a security agency ho kiging tah’a umjing-u ahi. District teni hi ani’a Pakistan gamgi’a um ahi’in chule boina thilso jingna Jammu and Kashmir gam toh kinaicha ahi. Achesa Tuesday nikho’a Scorpio SUV’a tou mel hetlou mi phabep in Gurdaspur district’a kikoi police barrier asuhkeh jou uva operation kipan ahi.

 

PM Modi in Kedarnath temple’a taona anei jouva Patanjali Research Institute hondohna nei

Dehradun, May 3 (Zeenews): PM Narendra Modi in Wednesday nikhon Patanjali Research Institute, Patanjali Yogapeeth, Haridwar hondohna aneiyin, damtheina ding’a kivenna ding’a mipin thenna akhohsah ding’in temna aneiyin ahi.

Nikho kipat til’a PM Modi in Lord Shiva ding’a kisa Kedarnath Temple mun vilna anei ahi. PM Modi in ahoulimna’a Baba Ramdev leh Patanjali Yogapeeth insung chung’a kipa thu aseiyin, chule Ayurvedic lou hi ngaicha ahi, ati. Sorkar in policy thah apodoh in, hiche’a hi damtheina ding lam chom chom pang ahi. Baba Ramdev jeh’a vannoiyin yoga hetnom na anei ahi’in, gamsung’a Yoga revolution ahin pohlut jeh in achung’a kakipah’e, tin Modi in aseiyin ahi.

Jingkah’a Baba Kedarnath ‘darshan’ kachan hi kavang apha lheh’in, India gam-mi phatthei boh hi katahsan in, hiche hi kathahatna ahi, ati. Kin-gon’a Uttarakhand CM Trivendra Singh Rawat in houlimna aneina’a chun PM pachatna thu aseiyin, ahinkho pumpi hi gamsung ding’a apehdoh ahi, ati. Narendra Modi PM ahi laise’a, ilhahsam loudiu ahi, tin Ramdev in houlimna aneiyin ahi. ‘Rashtra Rishi’ noiya India kikhel ahi, tin aseiyin chule Yoga minthang cheh nading’a India pumpi’a iche diu ahi, ati.  PM Modi hi Rashtra Gaurav leh Vishwa Nayak ahi’in, vannoi mitvet’a India adopsang ahi, tin aseibe in ahi.

Patanjali Research Institute hongdoh ding’a PM alhun chun Yoga guru Baba Ramdev in alamto ahi.  Kedarnath’a achena’a PM in mipi masang temple maiya houlimna aneiyin, temple’a thempu hon Kedarnath temple lim kisem (miniature replica)  thilpeh in ape uvin ahi. Military chopper’a Kedarnath temple ‘a che ahi’in, chule akholjin nading hi janhi nikho’a Twitter’a hetsahna anei ahitai. Kedarnath Temple’a Modi PM ahi jouva kon achena masapen ahi. Kedarnath mun’a kisem medical centre jong vetlhahna aneiyin, hiche mun’a um medical team hojong akimupi in ahi.

 

Gas field thu’a kinelkal na jeh’a India in Iran gam’a kon thao achoh jat kemsah ding

New Delhi, May 3 (Reuters): India gam in Iran gam’a kon thao kisem loulai (crude oil)  kum masa’a sang’a lhomjo lah ding’in tohgon aneiyin, hiche hi natural gas field thu’a India leh Tehran gam kikah’a kinelkalna aumjeh ahi.

India in state refiners- Hindustan Petroleum, Bharat Petroleum, Mangalore Refinery leh Petrochemicals Ltd leh Indian Oil Corp heng’a Farzad B natural gas field ‘rights’ Iran in apeh louvu leh thao alah-u akemsah diuva thupehna anei ahi.  Iran gam’a kon thao cho holah’a India hi China gam ban’a client lenpen ahi’in, kum masa’a thao 510,000 bpd achoh ahi. 2017/2018 kum’a state refiners hon thao apohlut asuhnem hi kum masa’a sang’a ajat thum’a lhomjo ahi, tin thulhut in aseiye.

Essar leh HPCL-Mittal Energy Ltd (HMEL) in kum masa’a 120,000 bpd leh 20,000 bpd choh nading contract hi avel’a athahsem kit ahi. Hiche thu’a oil ministry chule refiner hon thuso anei loulai ahi. Ahin, India gam’a um refiner jousen Iran gam’a kon thao achoh jat suhnem ding agot ahideh poi. Reliance Industries in Iran gam toh kum sagi sung Forozan crude oil 30,000 bpd choh nading’a kinoptona soi akai ahi. India in agom’a thao angaichat hi 4.6 million bpd ahi’in, United States leh China gam ban’a thao kimang atam napen ahi.

Thusoh Lahchom

SEACO

South East Asia Cultural Organisation in auditor Thokchom Shamo Meitei, Heinoubok thi lunghempina thuso anei uvin ahi. SEACO kisemdoh til’a Shamo in pan lentah alah ahi, tin aseiyun, chule insung mite lhamonna thuso anei uvin ahi.

Silver Jubilee

Peacemark Vision High School in Laii khosung, Senapati district’a Silver Jubilee amang uvin, kin-gon’a PHED Minister L Dikho, Chairman ADC Senapati ML Markson leh ex-chairman ADC Senapati LK Kasaso jin-gun’a apang uvin ahi.

Thilong kimu

 Khuman Lampak sports complex sung’a um twi lonna nullah’a pasal khat thilong Wednesday jingkah in akimu in ahi. Mipa hin jeans (blue) leh jacket vom chule sandal (blue) akivon ahi, tin thulhut in aseiyin, athipa hi koi ahi het ahihih laiye.

Gari gu khat kiman

Sulabh complex, BT Road kom’a police hon gari gu ding’a ginmo Riyaj Khan (26), s/o (L) Abdul Gaffar aman uvin, Borayanbi Khunjao Palli, Moirang, Bishnupur district’a cheng Riyaj Khan hi Suzuki access (MN01Z 7113) gari toh kimat tha ahi. Thilsoh toh kisaiyin City Police station’a IPC 379 noiyin case jihlut ahi’in, thukholna achelha in ahi.

ACS officer  3 kiman

APSC Chairman  lui Rakesh Paul Inmun’a kon APSC themvetna’a panla mi thum answer sheet akimudoh jouvin Assam Civil Service (ACS) officer thum Tuesday ni chun amandoh’uvin ahi. Akimandoh ACS officer ho chu Circle Officer Helam  Bhaskar Jyoti Devasarma , Nalbari Circle Officer Bhaskar Dutta chuleh Patharighat Circle Offficer Amit Sarma ahi’uve. Amaho thum chu Dibrugarh Police in amatdoh ahi’n, tutu’a hi thudoh aneilaitah’u ahi. Amaho thum hi Wednesday ni nilhahlam nidan 2 le court’a ding diu ahi.

UPLA mi 3 kiman

Numei khat jaonan May nisim 3 (Wednesday) nikhon Police hon United People’s Liberation Army (UPLA) mi 3 Khelmati, Moran a anaman uvin ahi.  Amaho a kon chun .22 pistol, 7.62 pistol achang 13 mudoh ahi. Akiman ho chu Kangru Terangpi, Longri Teron leh Bijay Ingti ahive.

Editorial

Press Freedom Day

1993 kuma United Nations in ana phondoh apat in kum seh leh May 3 hi World Press Freedom Day tin leiset gam jouse ah ana kimang jing e. Ni dang banglou in hiche nikho hi cholngah/holiday in aki nit pon, ahinla, press natong ho itobang a zalen (freedom)  uham tiho sut khom nan ana kimang ji e. Hiche nikho hi Imphal ah jong Manipur government media department, tichu, Directorate of Information and Public Relations (DIPR) gonnan aki mang e. Hiche nikho kiman na jeh pen hi press zalenna (freedom) kipapina, itobang a press hon a zalennau amanthei uva, itobang a press zalenna kilahpeh go ho akon kiven a, chuleh, press natong ho atohpet uva a hinkho ana chan ho jabolna peh tiho ahi. Chuleh, hiche nikho hi mipi ho in press zalenna asuhboi lou na ding uva awareness peh a, chuteng press natong ho jong amaho chonna dan (ethic) vala achon lou na ding uva athah a kigelna phat phatah chu ahi. I hetsa mabang uvin, eiho Indian constitution ahin ‘Freedom of Press’ ti mong kichehtah aum lou vang in Article 19 (1) (a) a ‘Freedom of Speech and Expression’ ahin freedom of press a hoptha e tihi Constitution ana sem ho seidan leh tuchan a mijouse pomdan ahi. Hiche freedom/zalenna hi mi masahon jong hatah a ana gelkhoh uva, mipi kivaipohna (democracy) phatah a achelhah thei na dinga hiche zalenna hi poimo tah ahi ti ahetpinau ana hi. Press freedom I sei jing lai uva ngaito um mama khat chu eiho lah a ‘Press’ kiti hi iti ihilchen diu ham tihi ahi. Internet/smartphone khang ahi tan, imalam jouse a khantouna aum bang in thusoh (information/news) kipeh tona leh kijahmat na hi a machal lheh tai. Masanglai in ipu-ipa teu vin boldan jatchom chom mangin thusoh (information) ana kipeto jiuve. Vetsahna in, gal a um ding teng, ‘thingkho le malchapom’ mang in lhang ana sam jiuve. Hiche khang chu hung kichai in, lekhajem ihin manthei phat uvin, letter-press mangcha a lekhabu leh lekha a kiso nitin/lhatin thusoh (newspaper/magazine) ho ihin mang kit uvin. Aban in phone, aban in mobile phone tin aban ban in aphat dungjui in ahung kikhel jing e. Hiche thusoh kipehtoh dan leh kihetmatna ahung machal dan hi lunglut tah a sut kham set apha e. Tulai internet khang ahin leiset ningkah khat a thuso khat jong apet pet in mobile/smart phone akon in iki peson thei tauvin, mijouse ‘press’ natong ahi tithei khang chu I lhung taove. Hiche internet akon thil phachom tah, natoh jangkhaitah a toh thei ahi jing laiyin, hiche phatchomna hi ahilou lam a mang loi jeh a case tamtah jong umda ahi poi. Internet mandan ithepmo jeh uva, kum 2015-16 sunga government in nivei tah internet phat chomkhat khat ana ‘ban’ uchu geldoh thei ahi.

Hiche dinmun ihi jing lai uhin, niseh thusoh lakhom/sodoh a pang ‘pressmen’ ho panmun a dau chompon, angaina bang in aloupi jing uve.  Tuni Press Freedom Day iman utoh kilhon a ibon uva ina kigel cheh ding uva dei um chu, ei ho (adeh a eimi ho) lah a press freedom um nam? Press a natong ho a chan diuva lom zalenna chu ijabol peh cheh u hinam? Press natong hon jong a zalennau amankhel nau um kha em? tiho dohna hi I chang cheh uvin khatvei gah kidong leu hen, I dinmun u ichan ahi gah hetdoh thei ahi. Ipi jeh a eiholah a niseh thuso (daily newspaper) hi phat sottah inei thei lou uham? ti donbutna jong igeldoh maithei diu ahi. Press natong ho hi sepaiho ahilou leh organisation dang ho banga hiem-le-thal ahilou leh thuneina (power) neilou, ‘pen’ seh seh a khosa ahi u athah a ihetpeh kit uva, gamsung semna dinga apanlah dan u hetpeh a, tosot hi mi khangtou leh gam khangtou ho umchan ahi ti athah a igeldoh u angaiye. World Press Freedom Day iman utoh kilhon in, mijousen ipan nathei cheh uva, press natong ho zalenna suboia pang talouva, a zalennau jabola, I tosot joh diu hi I lunggel lhuh nau hileh phachom lheh inte. Chuleh, Press natong ho jong ama ho chon ding banga chon u hinam ti hi akigel ngai ahi.

Blankfire

Masangjep geija chu forein che akitileh mitamtah in agelsangdan chu aseiji bei anahin tulanga vanghi foreign a um, foreign che akitileh mi kongsop le naodon loi, khutdoa cheloi jong atamtah jeh a forein kiti jong hi athupina lhasam ahitai.