ET May 3 News (Local, Regional, National, International, Thusoh Lahchom, Blankfire)

ET May 3 News (Local, Regional, National, International, Thusoh Lahchom, Blankfire)

198
0
SHARE

Highway a lhai Oil Tanker driver holeh handyman ho security khousah ding’a CM in kitepna nei

Imphal, May 2, 2017 (DIPR): Tuni chun Chief Minister N. Biren Singh in Chief Minister Secretariat ah All Manipur Petroleum Products Drivers’ Association leh All Manipur Petroleum Products Transporters’ Association member ho kimupina aneiyin tulai kiphinna abol’u angah diuvin temna aneiyin ahi.

Association member hon hahsatna atoho’u aseichai jouvin CM in highway a lhai adeh’a oil tanker leh transporter o venbitna dia security khousah be ding’in aseiyin ahi.

Ijem tia driver holeh handyman hon boina ato teng’u le hotline number (24X7) 0385-2450214 a kihetsah to ding’in aseiyin chule hiche number hi DGP office a jong’a jing nikho’a kipat function hitading’in aphong kit in ahi. Chule Whatsapp facility nei hotline number thahkhat jong kihongdoh vahding ahitai ahi. Achunga kisei hotline number a hi driver holeh handyman hon national highway ho’a boina ato teng’u le direct a call abolthei’u ahi tin N. Biren in tuni meeting a chun aseiye. Hiche keu hilouvin government in petroleum product driver holeh handyman hodia insurance account jong honpeh ding chule annual premium jong State Government in apohdoh ding ahi tin kitepna jong aneikit e.

Chule duty bolpet a driver/handyman thina toh ho a-inkote ex-gratia leh natoh kipeding ahi tinjong Chief Minister N. Biren chun aseikit’e.

Manipur gammi petroleum tanker driver leh handyman hon Assam gam a engbolna atoho’u chungchang in Chief Minister N. Biren Singh in Assam Finance Minister Himanta Biswas Sarma phone a kon’in akihoupi in ahi. Hiche toh kilhon chun Himanta in Assam gam district chom chom a Superintendent of Police 5 toh joint meeting neiding’in kitepna aneiye tin Chief Minister N. Biren in association member ho hengah aseiye.

Oil tanker driver hon kiphin na pan tao

Imphal, May 2: Oil tanker kibulu na’a driver 2 kisuh khah najeh in (Oil tanker) gari tol hon Monday nia pat in gari toltah lou ding in kiphin na anapan taovin ahi. Driver hon athum’u thupi pen chu highway lampi’a  thingnoi ho um na mun lah’a security  hoitah’a koi ding ti hi ahi. Sunday ni’a kibulu nachu BJP-led government in office March 15 ahin tuh uva konna anivei channa alhing tang ahi.Driver khat in asei na’a chun; akithum ho akisuh bulhit tokah se’a hiche strike hi ki chejom jing ding ahi ati.

CRPF personnel hon neh leh chah ding hinpo gari leh oil tanker hohi Assam apat Imphal,state capital chan kihin jui ahi tin police ho’a kon kimu chun asei in ahi. Director General of Police L.M Khaute in asei na’a chun; hiche kibulu na thilsoh toh kisai in Kuki Revolutionary Army thingnoi mi 3 akiman tan ahi ati.

Khat lang’a thingnoi group khat People’s War Group in statement’a asei na’a chun; hiche oil tanker kibulu hi keiho bol ahi tin kiphon na ahi nei un toh kilhon in DGP thusei chu baseless ahi ati.

Labour Rights sensitize bolna ding’a Labour Mela kibol ding ahi: Th.Radheshyam

Imphal, May 2 (DIPR): May nisim 1 nikho chun youth Hostel, Khuman Lampak’a Consumer Affairs, Food & Public Distribution le Labourers’ Welfare Association guonna noiyin “Securing Decent Work for Sustainable Social/Economic Development”thupi mangcha in “May Day” ana kimang in ahi. Kinguon a chun Minister Th.Radheshyam Jin-gun in apang in ahi.

Th.Radheshyam in ahoulimna’a chun May Day hung kimang pat dan thusim kichehtah in hilchetna ape in ahi. Aman aseidan in May Day hung kiman pat hi 1886 kum’a Chicago a um natong hon 8 hour work day ahin thum’uva pat hung kipan doh ahi ati. Chuleh Chicago a natong ho’n kiphinna abolho’u chu Manipur sung’a jong 1939 kum’a Hijam Irabot Singh in ahin pohlut ahi.May Day nikho kinit hin Manipur sung’a um organized le unorganized sector  labour natong ho kipumkhatna ahinpohlut ding ahi. Labourer ho hin welfare scheme, social security, educatin, housing, recreation, water supply chuleh scheme dang dang ho kichehtah’a ahetgil’u ngai ahi. Labour hon central scheme ho ahetchen theina ding’uva Labour mela bol ding tihi sorkar in tulaitah’a aboipi thilkhat ahi tin Radheshyam in aseiye.

Labour ho hin Society khantouna ding’a panmun lentah aneiyu ahi. Chuleh Labour ho hin Labour Union aneilou’u jong poimo tah ahi. Ajeh chu Labour Union hin labourer ho gentheina ho le vangset tuona ho sorkar jah’a bailam tah’a apohlut theiyu ahi. Labourer ho gentheina ho suhlhapna ding’a hi concern authority le labourer hon kilungtohtah’a pan alahkhom’u ngai ahi.  Tutu’a labourer ho dinmun,  anikhotha’u chuleh thildang dang ho jong agangtheipen’a semtup ngai ahi tin Th.Radheshyam in aseiye.

Tuni kinguon’a chun Parliamentary Secretary Tourism & IT , Dr.Sapam Ranjan Singh, CAF & PD member ho chuleh Labourers’ Welfare Association lamkai ho’n pan ala’uvin ahi.  Kinguon a chun National Health Mission, Manipur makaina noiyin Voluntary Blood Donation Camp jong abol’uvin ahi.

57-Henglep (ST) A/C MLA kipapi na kingon um

Imphal, May 2: Loktak Project Area sunga kiloikhom na United Development Committee (UDC) makai na nuoi ah 1st May, 2017 nikho chun Loktak Project area sung’a um Tokpa Kabui mun’ah 57-Henglep (ST) A/C MLA, Chairman, Hill Areas Committee (HAC), T. Thangzalam Haokip kipapina leh Ankuong sokhom pihna kingon aum in ahi.

Hiche kingon toh kilhon a T. Thangzalam Haokip in ahoulim anei na’ah, Henglep Sub Divisional Office agang thei pen a suh hingding chule staff jong phate cha a akai nading akhohsa thu aseiyin ahi. Henglep mite kum 18 val jen kijopmat tona lampi aum lou hi thilkhoh tah khat ahi naban a MLA kakai masang a kipat kana gelkhoh pen le maban a katoh ding’a apoimopen(top priority) ahi, tin mipi ang a aphuong doh in ahi. Chuleh, Henglep Sub Division sung’a Govt. office function lou jouse ahiding bang a aum thei nading jong pan akila pantan amipi in jong aphatna ding a amitakip in mopohna inei uve ati. Every Person is Important (EPI) kiti Mijouse hi Apoimo soh keije ti thuchang hi PM Modi in gamsung khantou nading a chepi/jui ding ti keuseh hilou a keima mimal lungdei le chepi dia kachepi khat chu ahi,ati.Gamsung adeh a Henglep sung’a jong Minority/Majority tia kibung khenna le kamchang a jong sei tah Lou ding in mipite henga tiemna anei in ahi. VVIP culture jong Govt. in asuhbei toh kilhon a koima alentum aum tapon mijouse kibang ihi tauve,amitakip ipoimo soh kei uvin koima jat le nam,phung le chang a khentum umlou va igamsung u khantou nading a kingailu tah a khochen innchen semkhom ding hi Pathien lunglam jong ahi tin mipi asang aja kikhom khom lah a aseiyin ahi.

Lamphel Super Market’a ‘market shed’ athah sahna ding tohgon aum’e: Minister Shyamkumar

Imphal, May 2 (DIPR): Lamphel Super Market mun’a bazaar (market shed) tukhang’a toh kitoh sah nading tohgon aum’e, tin MAHUD Minister Th Shyamkumar in Tuesday nikhon phondohna aneiyin ahi.

Lamphel Super Market, Imphal West mun’a Lamphel Super Market Chaokhat Thourang Nupi Lup leh Khwairamband Bazar New Market Non-Licence Holders Association 7th Foundation Day kin-gon kimanna’a Shyamkumar in phondohna anei ahi. Market shed sahna ding thu’a Chief Minister N Biren Singh leh Council of Minister hotoh kihouna kanei ding ahi, tin Lamphel Super Market’a thil joh numei ho heng’a aseiyin ahi.

Chief Minister N Biren Singh lamkai phatah ahi, tin seiphatna aneiyin, chule Mao’a kon thil joh’a hung ho panna’a thil joh numei hon hahsatna leh thumna chule ngaidan anei hohi Chief Minister heng kalhut ding ahi, ati. Ase thei thil kijoh ho koina ding ‘cold storage facility’ ngai ahi, tin aseiyin chule Horticulture Department in Sanjenthong mun’a aganna thei pen’a organic outlet (dukan) hon doh nading’a tohgon anei ahi, tin aseibe’e.

Lamphel gamkaiya dan dihlouva gam kilah thu’a Minister Shyamkumar in, japi in gam leiset hi gamsung’a ahijeh’a venna apeh angaiye, tin aseiyin chule Imphal khopi akhantou teng lebou Manipur hi gam khangtou tia kisei theiding ahi, ati. Kailhang munvel athenjing nading’in mipi temna jong aneiyin ahi. Kin-gon’a H. Nutanchandra, Corporator, Ward No. 3, IMC; Ima S. Ibetombi, President, Lamphel Supermarket Chaokhat Thourang Nupi Lup; Ima Ibemhal, President, Non-License Holders Association, President, Mao Union chule thiljoh numei holeh vengsung miho jong apang uvin ahi.

Anglo-Kuki War Centenary Commemoration Committee ding kisemdoh

Imphal, May 2(ET): Kuki Inpi Manipur makai nale gontup na noiya Kuki namsung’a jalhang kiloikhomna chuom chuom Kuki Inpi Manipur, Kuki Students’ Organisation, Kuki Independence War Memorial Committee, Anglo-Kuki War Patriots Foundation, Kuki Research Forum, Kuki Women Union, Kuki Senior Citizen Welfare Forum, Kuki Women Organisation for Human Rights le Kuki Organisation for Human Rights lamkai cheng in Anglo – Kuki Gaal 197-1919 kum jakhat lhinna (Anglo-Kuki War Centenary Commemoration) kin mankhomna ding thu’a May nisim 1 ni chun Kuki Inn Imphal a kihoukhomna ana nei uvin ahi. Hiche a chun Anglo-Kuki War Centenary Commemoration Committee ding jong lhenna ana nei uvin ahi. Anoiya cheng hi Committee member ding’a lhendoh anahiuvin ahi.

Khaimang Chongloi – Convenor, Sominthang Doungel, Seikhohao Kipgen, NGamkholen Chiru, Paotinthang Lupheng, THanglalshon Baite, Hatnu Kipgen, Hoinu Haokip, Dr. Vumkhoneh Haokip, Haotinkhup Haokip, Thongkhokhup Kipgen, Sholun Touthang, Pahend Hangshing, Ngaineikim Haokip, Kimneihoi Lhungdim, Kakam Haokip le Kamkhohao Khongsai ho cheng ahiuvin chule akilhengdoh member ho hi amaho kah’a Portfolio akihop diuvin jong seilhahna anei uvin ahi.

Nemcha le Hangkhanlian in Kpi a ‘HenuKailhang’ sahna ding mun velha lhon

Imphal, May 2 (DIPR): Social Welfare and Cooperation Minister, Nemcha Kipgen in tuni chun Agriculture, Veterinary & Animal Husbandry Minister, V.Hangkhanlian toh Kangpokpi District a Henu (Ema) kailhang sahna ding mun vetlhahna aneilhon in ahi.

Kangpokpi a Henu Kailhang sahna ding natoh hi Veterinary and Animal Husbandry Department, Manipur mopohna noiya um ahi. Hitolhon’a Kangpokpi Ward No.14 a jong Veterinary and Animal Husbandry Department in Regional Cattle Breeding Farm khat ahon ding ahi.

Geldohthei khat chu Kangpokpi a Henu kailhang sahding hi CM N.Biren in kangpokpi akholjin ni’a ahoulimna’a chu ana sei ahi. Alangkhat’a BJP sorkar in district sung’a hitobang kailhang khat sahdoh ding tohguon aneina chung’a Nemcha Kipgen in akipana aphongdoh in ahi. Nemcha Kipgen le V.Hangkhanlian chu Sadar Hills Autonomous District Council, Kangpokpi in liemna ana nei in ahi.

MU a XVII Eimi Meet kinguon kimang

Imphal, May 2 (DIPR): Tuni chun Manipur University Centenary hll a xVII EIMI Meet, 2017 loupitah in ana kimang in ahi. Tuni EIMI meet chu “Peace, Love and Unity Among the EIMI” thupi noiya ana kimang ahi’n, Manipur University EIMI Welfare Society (MUEWS) in aguon ahi.

Kinguon a chun Agriculture, Veterinary le Animal Husbandry Minister, V.Hangkhanlian Jin-gun in apang in chuleh Asst.Prof. CSSEIP, Manipur University Dr.Thathang Vaiphei Kin neipa in apang in ahi.

Minister V.Hangkhanlian in kinguon’a chun gold medallist 2 le Ph.D.award phopdohna aneiyin ahi. Hangkhanlian in ahoulimna’a chun gamsung’a kingailutna, kilungkhat le kikhoto na aumtheina ding’a hi lamchom chom’a pan lah ngai ahi ati.Chuleh simlai ho hi khonung teng le nampi lamkai hung hiding’u ahijeh’a tu’a pat a lam chom chom’a aboltheinaho’u amanchah ding’uva poimo ahi.

Kinguon’a chun MU simlai hon vetnom um tah tah cultural dance ana vetsah’uvin, lasa them tah tah hon jong akikhom simlaiho chu la ngai tah tah in ai lhim bang in ana lhim uvin ahi.

Kinguon’a chun Addl. Principal Conservator of Forest, Dr.Khaizalian, CEO CCpur District Council Soiminlen, MCS, Principal, RK Sanatombi College of Teachers’ Education, Dr.K.P.Guite le Advocate Serto T.Kom in tribal simlai ho tilkhouna anei’uvin ahi. Kinguon a chun simlai 300 val in pan ala’uvin ahi.

Ebenezer V/A in thuphon nei

B.Lalboi Gangte

CCpur,May 2(ET):  Churachandpur khopi sung’a tulai khamnathei ne’a kingolsah boina bol atam naban’a Gucha alan jingtoh kilhon’in B. Ebenezer Village Authority in thuso khat ahinbol in hiche a chun May nisim 3, 2017 nikho akipat Koitobang B. Ebenezer gamsung leh akim vella khamnathei bol leh ajoh ah sumkol vei, nungah gollhang chonthanhui, gucha chuleh jaan muthim nung’a vahle a boina sem phal ahi tapoi akiti. Hiche hi mipi jouse hetding’a thuphon hung kinei’a achung a juidia dan kisem jouse hi koitobang kihetmosah leh nahsah mo’a juilou aum’a akimat doh le khosung dan dungjui’a Village Authority in achung thu kiseiding chukit leh dankal a achonnu ham chonpa ham akimat dohle gotna kipeding ahi tin Village Authority Chairman B.Ebenazer Lunsei Touthang in mipi ho hetsahna aneiyin ahi. Jing nikho a kipat mipi jouse in achung a kisei ho jouse juicheh dinjong tepna aneiyin ahi.

IFCD minister in Chadong khomite kihoulimpi

Imphal, May 2 (DIPR): IFCD Minister Letpao Haokip in tuni chun  Secretariat Conference Hall a chelha IFCD official ho le Mapithel dam in atohkhah Chadong khomite kihoulimna ana lamkai in ahi.

Kihoulimna’a chun Chadong khomite’n  Mapithel dam kisahjeh’a boina atoho’u atahlang’uvin , chuleh sorkar in kineh holna ding scheme tumbeh khat aguonpeh diuvin ngehna aneiyuvin ahi.Chuleh Minister le IFCD official hon khosung vilna aneiding’uvin jong temna anei’uvin ahi.

IFCD Minister Letpao Haokip in jong khomite kithopina thei chan’a kithopina peding’a sorkar hi guotsa ahi tin kihoulimna’a chun aseiyin ahi. Aman asebena’a chun Mapithel dam jeh’a boina toh kho miho khankho ding gelkhohna jal in sorkar in Works, Agriculture, Fisheries, PHED le CAF & PD Minister ho panna High Power Committee khat akisemdoh’e ati. Chuleh amatah in jong Mapithel dam in asuhkhah ho vilna aneiding ahidan jong aphongdoh in ahi.

Tuni kihoulimna’a chun IUFD Secretary Gopen Meitei, IFCD Chief Engineer Ksh.Pritam Singh, , SC/TC-I P.Ingocha Singh, EE/TPD-I Ibomcha Sharma le AE/TPC-I L.Tamocha Roy in department thalheng in pan ala’uvin alangkhat’a Chadong village authority lamkai ho chu Chadong Village Authority (R&R Committee)  Secretary Kahaosang Mahong in amakai in ahi.

Geldohthei khat chu April nisim 27 nikho’a chu IFCD Minister Letpao Haokip hin Mapithel in asuhkhah kho 17 vel haosa ho toh kihoulimna ana neisa ahi.

25 Assam Rifles in Stationery item phabep akithopi na chung’a MHJU in kipathu sei

Imphal, May 2: 25 Assam Rifles ‘Friend of the hill People’ in Military Civic Action Program noiya Manipur Hill Journalists’ Union (MHJU ) office a manchah ding computer desktop set, printer leh angaicha stationery item phabep a kithopina ahin neijal’in kipathu aseiyin ahi. Hitiho hinguong toh Defence PRO Imphal, Ajay Sharma, Commanding Officer 25-Assam Rifles,  Sanjay Kumar , Town Commander, Radha Krishan leh Pankaj Giri  ho chungah MHJU in kipathu aseikit in ahi.

Legal Awareness um

Imphal, May 2: Songpeh Community mun’ah 2nd May, 2017 jinglam nidan 10:30 apat chn District Legal Service Authority, Ccpur leh Churachandpur United Club’s Organisations (CUCO) gonna noiyah Legal Awareness kingon aum in ahi.

Hiche ahin, Chief Guest in Mangkhothang Haokip, Chief of Songpeh Village apang in, Functional President in S.K. Mangang, President, CUCO apang in chuleh Guest of Hours in Satkhosei Haokip, Chief of S. Mongkot; Manglen Vaiphei, Chief of B. Pangmual Village; Yayang Haokip, Chief of Monglenphai Village leh Ayang Haokip, Executive Member, AMMUDO apang in ahi. Resource Persons P. Khankhanthuam, Advocate, Chairman, Collective Lawyer Trust, India leh Phulindro Konsam, Human Rights Activist ho’n Food Security Act (NFSA), Right to Education leh Protection of Children & Child Labour from Sexual Offense Act (POCSO) ho’a jiltil na anei uvin ahi.

Ukhongsang kithana thilsoh demna’a kijotna um

Imphal, May 2: Thoubal Athokpam mun’a Monday nikhon sepai hon themmona neilou milham ho chung’a jukham pum’a thil dihlou abol louna diuvin torch rally abol uvin ahi.

Thoubal Athokpam gamkaiya’a um club leh organisation chom chom in Athokpam Makha Leikai’a kon kijotna anei uva, Thoubal DC office gate’a chomkhat akingah uvin, hiche jouva police hon achesa April nisim 24 nikho’a Ukhongsang mun’a Kh Santosh akaplih-u akivuina mun lam jon in akijot uvin ahi. Hiche mun’a memorial service abol uvin ahi.

Meithal choi ho leh achoi ding’a lom hon mihem hinkho jana pe uhen, tin kin-gon’a pang mikhat in aseiyin chule hitobang mi hohin meithal’a midang gihna ahilouleh kap na thei lunggel aneiyu ahi, ati.

Food safety enforcement wing in Imphal khopi’a ‘drive’ bol

Imphal, May 2: Food Safety enforcement hon Masajid Road leh Thangal munvel’a Tuesday nikhon hetman louvin kholna anei uvin ahi.

Th Sunilkumar, Designated Officer, Food Safety and Administration jong drive’a apang in, tu masang’a chapang ho lol natna thei nehthei thil kikhah hojong tuni drive akibolna’a akijoh akimudoh in ahi, ati. Chule akikhah thil ho aman uvin ahi. Food Safety and Standard Act, 2006 noiya dan palkeh’a dukan bol ho chung’a action kila ding ahi, ati.

Natong alhahsam jeh’a tu masang’a drive ana kibol joulou ahi’in, tuhin department’a natong alhing tan, phaicham’a hitobang drive hi kibol jing ding ahi, ati. CSO leh japi in atosot diuvin Sunilkumar in temna aneibe in ahi. Imphal East, West, Thoubal leh Bishnupur district enforcement hon thakhat’a PK Singh, Food Safety Commission lamkaina noiya drive abol-u ahi.

Drive abol sung uva licence beiya kijoh thil ho amatpeh uvin, chule dukan phabep in drive akibol’e, ti thu ajah in dukan akhah uvin ahi. Dukan atamjo in FSSAI licence dan toh kitoh’a thil ajoh ahi. Chule Myanmar gam’a kon hin kipolut’a ‘expiry date sticker’ umlou thil tamtah jong team hon amudoh uvin ahi.

State Agricultural fair kipan ta

Imphal, May 2: Iboyaima Sumang Lila Shanglen, Palace Compound, Imphal-East mun’a Agriculture department in ni-li ‘state agricultural fare’ abol uvin, kin-gon’a Agriculture and Vetirinary Minister V Hangkhanlian in thepna nei holeh loubol mihon lousoh thil apunbe nading’a pan alahkhom angaiye, tin aseiyin ahi.

Gamsung mi 75% hi loubol mi ahivang’a, lou-soh thil lhom ahi. Anchang angaicha 11 metric ton hi loubol mihon atudoh joulou ahi, ati. Building leh factory kisah be be jeh’a phailei mun ho aneo cheh cheh in, hiche hi agriculture department leh loubol miho ding’a lungkham umtah ahi, tinjong aseiye. Hitobang dinmun’a scientific farming bol ding ahi, tin kouna aneiyin, chule Agriculture department in training leh awareness workshop abol ding ahi, ati.

Jason A Shimray, Commissioner, Agriculture in agricultural policy gamsung’a kisemdoh ding ahi, tin aseiye. Dr N Premjit, Vice Chancellor, Central Agricultural University (CAU), O Nabakishore, Chief Secretary chule gamsung mun chom chom’a kon loubol mihon kin-gon hondohna nikho’a pan ala uvin, tuchan geiya fare’a dukan 40 kihong ahi.

Ni 5 umding “e-waste management” workshop hondohna um

CCpur, May 2 : NIELIT Imphal in Monday nikhon Churachandpur Government College mun’a ‘E-Waste Management’ thupi in ni-5 Awareness Workshop apan tauvin ahi.

Workshop kihondoh na kin-gon’a R.Sudhan IAS Deputy Commissioner, Churachandpur District,  Ricky Vanlallawm, Principle, Churachandpur Govt.College leh  Th. Prameshwor Singh, Executive Direction NIELIET Imphal chief guest, guest of honour leh president in apang uvin ahi. R Sudhan in ahoulimna’a ‘gadgets’ leh electronic thilse ho pai ding athupi dan aseiyin, insung jouse’a e-waste (electronic thil se) um ahi’in, hitobang thil hohi re-cycle bol ding dan ihet-u angaiye, tin aseiyin ahi. Chule workshop hi aphatchom ding akinepna thu jong aseiyin ahi.

Japan gam in kolchu hoh re-cycle abol dan Ricky Vanlallawm in aseiyin, thil phalou ho recycle bol ding aloupi dan thuhilna in aneiyin ahi. Chule electronic thil se holeh insung’a kimangcha thil ho nen paina’a paikhom louding ahi, tin Th Prameshore Singh in aseiyin ahi. Electronic thil ho phailei ahilouleh hon’a ipai uva chule hiche’a ga thil ho ineh uhi mihem tahsa dammo nathei ahi, tin aseibe in ahi. Kin-gon hondohna’a sorkar natong 50 vel in pan ala uvin, chule technical session jong apan uvin pai uvin ahi.

Recent Coaching centre’a ‘vocational trade’ 30 hondoh hita

Imphal, May 2 : Recent Coaching Centre, Sagoltongba, Imphal West mun’a vocational trade 30 akihong doh in, vocational trade coaching centre hondohna kin-gon’a S Rajen, Deputy Chairman, State Planning Board & Chairman Handloom and handicrafts development Corporation Ltd chief guest’a apang in chule adviser, JAC for Upliftment of Recent Hr. Secondary School Chongtham Mohan Singh president’a apang in ahi.

BJP lamkaina sorkar in government department in sum amandoh ho vetsuina ding tohgon asem ahi, tin S Rajen in aseiyin, chule government school’a simlai alhom cheh cheh alungkhampi na thu aseiyin, adihlou ipi umham, ti sorkar in akhol ahi, ati. Chule government school khantou machal nading’a sorkar in bol thei chan abol ding ahi, tin aseibe’e. Kin-gon’a Ch. Ongbi L Bijentimala Devi, member, Adhyaksha, Mutum Ongbi Sanahanbi Devi, member, Zilla Parishad Awang Khunou leh S Joy Singh, President, JAC jong apang uvin ahi.

Forest guard candidate hon kiphinna nei

Imphal, May 2: Forest Guard 2016 exam’a lolhinna neiya candidate hon appointment order asodoh diu thumna in Tuesday nikhon kiphinna anei uvin, Forest department, Sanjenthong kom’a numei candidate 25 panna in candidate 255 vel in kiphinna abol uvin ahi.

Kiphinna bol ho thalheng’a mi phabep in Chief Minister akimupi thei diuvin security hon phalna ape uvin ahi. Hetthei khat chu forest guard exam result hi December nisim 23, 2016 kum’a kiphong ahi. Kiphinna bol mikhat in, angaicha document ho department heng’a akipehlut vang’a achesa lhakhat leh keh sung’a joining letter ima kipedoh lou ahi, tin aseiye.

KEDO in May day nikho’a 10th Foudnation Day nit

Imphal, May 2 (DIPR): May nisim 1 nikho chun Kanglei Economic Development Organisation (KEDO) in Khwairamband Ima Keithel, Imphal’a “10th Foundation Day cum May Day  Celebration” ana bol in ahi.Kinguon a chun Minister of MAHUD, Town Planning, Forests & Environment, Horticulture and Soil Conservation, Th.Shyamkumar  Jin-gun in apang in ahi.

Th.Shyamkumar in ahoulimna’a chun, khangdong ho hin economy semhoina ding’a mopohna lentah aneiyu ahi ati. Khangdong ho hin natoh ahinjachatpi lou teng’u le economy achamlouva hoijeng ding ahi.Achesa kum 15 sung’a hin sorkar in Khwairamband Keithel nulla luonna ding mun ho’a patta neilouva cheng mi tampi amudoh in ahi. Ahinlah tu’a vaihom sorkar hi masang’a ho tobang ahipo’n, hitobang patta neilouva dandihlouva chengho chung’a legal action kilading ahi. Gamsung thengsel’a koina ding’a hi mipi in civic sense anei masat ngai ahi. Chuleh Khwairamband keithel’a nen kipai ho suhtang ahitheina ding’a dustbin 200 vel mun chom chom’a kikoibe ding ahi tin Shyamkumar in aseiye.

Jin-ja’um a pang L.Susindro Meitei in ahoulimna’a chun, jaan’a natong KEDO worker ho ding gelkhohna jal’a sorkar in 24X7 toilet service apeh ding in ngehna aneiyin ahi. Aman aseibena’a chun KEDO worker ho hi Bandhan Bank toh kikhutjopna noiya Dk.20,000 cheh loan a kipeding’u chuleh numei mejoh ho jong angaichat dungjui’uva loan kipeding ahi ati. Khurai a jong dukan 500 vel umna market shed thah khat kisading ahi. Hiche market a hi kisuhthengna nikho khat umding ajing nikho chu kicholnga ni hiji ding ahi. Market suhtheng na natoh hi KEDO natong ho mama kiguoi ding’u ahi tin Susindro Meitei in aseiye.

Tuni kinguon’a chun Minister Th.Shyamkumar le parliamentary Secretary L.Susindro in KEDO worker Thokchom Sanathoi Mahindra Jeeto khat pehdohna aneilhon in ahi. Thokchom Sanathoi in Mahindra Jeeto hi don ding twi pohlena’a aman ding ahi. Sanathoi in Mahindra Jeeto hi KEDO Finance’a kon loan a alah ahi. Kinguon a chun KEDO annual souvenir hondohna jong aum in ahi.  Chuleh KEDO natong ho lah’a umchan hoipen le apontho pen teni kipaman le certificate hoppeh na jong anei’uvin ahi.

Manipur High Court suty kilhading

Imphal, May 2:  Ahunglhung ding May nisim 22, 2017 nikho’a pat June nisim 3, 2017 gei High Court of Manipur summer vacation kilhading ahi tin Registrat General , High Court of Manipur A.Guneshwar Sharma a kon kimu thuphon in aseiye. Summer vacation hi April nisim 26, 2017 nikho’a Full Court Resolution ana kisemdoh dungjuiya kilha ahi.Suty sung’a hi court sitting thumvei bou umding ahi. Hiche ho chu 22nd (Monday), 23rd (Tuesday) chuleh 24th (Wednesday), May 2017 nikho ho hiding’u ahi. Hiche nikho thum ho’a hi cause list’a ana kisunlut sa le notified ana kisolsa matter lui ho chungthu bou ngailhahna umding ahi. Civil le Criminal case toh kisaiya urgent matter umho 23rd May, 2017 (Tuesday) nilhahlam nidan 3:30 geiya kisunlut thei ding ahi. May nisim 22, 23 le 24 nikho ho’a hi jingkahlam n idan 10 a pat office kihongding nilhahlam nidan 4:30 le kikhah ding ahi. Suty sung’a hi limitation ho lhailou ding ahi tin thulhut chun aseiye.

Numei chapang suse a kingoh khat police hon vengtup jing

Guwahat, May 2: Numei chapang khat suse’a kingoh Suman Uddin police hon avengtup jing uve tin Silchar a mi tampi’n National Highway-53 ana tingtan uvin ahi. Hiche chapang nu hi inn a achang’a aumpet’a asuhset ahi tin aveng mihon aseiyuve. Chapang nu’n thilsoh umchan a-inkote henga aseidoh phat in vengsung mipi ho ahung soujah jeng uvin Suman Uddin chenna in bulu ding anakijot phei uve. Police hon atohding dol’u tonglouva  Suman Uddin apanpi jing’u le kiphinna jong khoucheh a kibol ding ahi atiuve.

Huipi kinung in chenna Inn 4 suse

Imphal, May 2: Achesa May nisim 1 nilhah’a huipi kinung in Kangchup gamkai Kharam Vaiphei kho a chenna inn 4 jen anasuse in ahi.

Chenna inn ho chu huipi in ana semlhuh ahin vangphat umtah khatchu hiche thilsoh a hin athi amang akiseipon ahi.

J&K gam’a sum kipohna van kibulu thu’a Hizbul Mujahideen hon kiphonna nei; Bank natong teni CRPF hon atha ahi, tia seiyu

Kulgam, May 2 (ANI): Pakistan gam’a um Hizbul Mujahideen thingnoimi hon Kulgam district, Jammu and Kashmir gam’a police 5 leh bank natong 2 kitha na sum kipohna van kibuluna thilsoh’a kiphon na anei uvin ahi.

Hizbul spokesperson Burhanuddin in kiphonna aneina’a chun bank natong teni keihon kathat pouvin, amani hi Central Reserve Police Force (CRPF) hon akaplih ahi, tin aseiye. “Gari hi sum chomna ding’a kibulu ahipoi. Sum alhingset kaneiyui. Bank natong teni kitha demna kaneiyun chule amani hi thingnoimi ho hilouva ahin kilhonpi’a CRPF sepai hon akaplih ahi, tihi suhthengna kaneiyu ahi”, tin Burhanuddin in aseiyin ahi. Thingnoimi hon themmona neilou Kashmiri ho abulu ngaipoi, tin aseibe in ahi.

Jammu and Kashmir gam’a sum kipohna van khat thingnoimi hon abulu’a, chule bank natong nil eh CRPF sepai 5 athi thilsoh jouva Hizbul hon thuso aneiyu ahi. Athi police hohi Sub inspector Mohd Yousaf, Farooq Ahmad, Ishfaq Ahmad, Mohammad Qasim chule Muzaffar Ahmad ahi’in chule bank natong security guard teni hi Javeed Reshi leh Muzaffar Ahmed Laway ahi.

Rahul Gandhi in Gujarat gam’a election campaign panta; BJP goljo ding’a kitepna nei

Dediapada, May 2 (PTI): Gujarat gam’a Congress vice president Rahul Gandhi in Monday nikhon election campaign apat in, chule state assembly election’a BJP gol jo ding’in kitepna aneiyin ahi.

Gujarat gamsung tribal tamna mun’a rally abolna’a chun Gandhi in ‘Mann ki Baat’ programme bo’a Modi demna aneiyin, PM in mipin ama thusei bou angaidin atahsan in, mipi awgin ngaiding atahsan poi, tin aseiyin ahi. “Congress in tu election hi thaneina lhingset’a atet ding chule Narendra Modi leh BJP agoljo ding ahi”, ati. Tukum kichai leh state assembly election umding ahi.

“Congress in mipi awgin ngaiding atahsan jeh in ‘Mann ki Baat’ a eima chang ngaidan kisei hi atahsan poi. Sorkar akisem teng mipi thusei kingai masa ding, hiche dungjuiya na kitong ding ahi” , ati. “Ashok Gehlot lamkaina Congress team akilheng in, hiche mun’a election tet ding’a hin kisol ahi. Congress in gol ajo leh sorkar hi mikhat’a bou hilouding mijouse’a hiding ahi”, tin aseiye. “Modi hi slogan thah pohdoh bou athem in, BJP vaihomna noiya akikhel umlou ahi”, tin ngohna aneiyin chule demonitisation hi prime minister in ichan’a thaneina aneiyem, ti vetsahna ding’a bou abol ahi, ati.

Amul cooperative movement’a loubol Gujarat numei ho pachatna thu aseiyin, Australia leh New Zealand gam’a dairy company honjong India gam-mi numei ho akitetpi ngamlou jeh’a Indian market’a hung lutlou ahi, ati. Chule Vibrant Gujarat Summit hi marketing’a ding’a manchah ahibouve, tin aseibe’e. “Nam khatcha in Vibrant Gujarat aphatchompi lou ahi. Mi 10-15 vel (marketing’a ding’a sum pe’a) inbou aphatchompi ahi’in, koi ahiu nahet-u ahijeh’a amin-u kasei louding ahi”, ati.

Patel hon quota thumna’a kiphinna anei thu jong Gandhi in aseiyin ahi. “Patidar khat in kachate themjilna kitup kape joupoi, tin kaheng’a aseiyin ahi. Modi toson’a Patidar hon hitia asei leh phatchomna hi koiyin amu ham lungdon umtah ahi”, ati. Education system pumpi hi Modi leh BJP loi mi 10-15 in alosoh kei ahi, ati. “Modi in 2014 election’a chun kum seh leh tohmun crore 2 sem ding’a kitepna aneiyin, achesa kum khat sung’a mi lakh khat inbou tohmun amu ahi. Tukum’a koiman amu loulai ahi”, tin demna aneiyin ahi.

North Korea in ‘nuclear test’ bol kit ding’a kigotna nei

North Korea, May 2 (ANI): North Korea gam in nuclear gal-manchah test kibol jom ding ahi, tin aseiyin ahi.

Monday nikhon Pyongyang in nuclear test agup channa hi lamkai pa’n pha asah phat phat’a bol ding’a kigosa um akihi, tin thuso aneiyin ahi. US President Donald Trump in achesa Friday nikho’a North Korea in ballistic missile launch abol demna aneiya, China jana kipelou ahi, tia asei ahi. North Korea in China deisah jana pelouva lolhingtah ahilou vang’a missile patepna anei ahi”, tia Trump in asei ahi.

North Korea in hitobang patepna abol louna ding’a China in pan sangtah alah ding’a Trump in hatah’a asei ahi. Alangkhat’a, China Foreign Minister Wang Yi in UN Security Council toukhomna’a, “Peninsula mun’a nuclear thu’a boina hi China khut’a um ahipoi”, tia adonbut ahi. “Tuhi toukhomna sem kit phat ahi”, ati. US Secretary of State Rex Tillerson in adonbutna’a US gam in North Korea toh toukhomna asem louding ahi, tia aseiya chule thilse abol uhi toukhomna’a kidonbut louding ahi, tia asei ahi.

Prez Trump douna’a US gam’a asang’a sim in May Day nikho’a kijotna nei

Seattle, May 2 (PTI): May Day nikhon President Donald Trump in ‘immigration leh labour’ policy abol doudalna in mihem sangsom’a sim in gamsung’a boina sem louvin kiphinna abol uvin, ahin, Pacific Northwest’a boina phabep aumin ahi.

Chicago lamlen’a kiphinna bol ho akijot uvin, White House gate’a ‘Donald Trump hai hen’ tin thumna anei uvin ahi. Ahin, police hon Portland, Oregon mun’a kiphinna bol ho alamtin uvin, smoke bomb leh thil dang dang officer ho ase khum jou uva, boina kipan ahi, tin aseiyui. Amai kitom leh avom’a kivon mi 20 val akiman’e, tin police hon aseiyun, chule dukan mun phabep window jong akisukeh’e, ati.

Seattle mun’a mithum aman uvin, mikhat hin song ase jeh ahi. Washington khopi Olympia mun’a police hon kiphinna bol ho ano uvin, phabep in bottle asep uvin, officer ho pepper spray akap khum uvin, chule gophel’a akap uvin ahi. Thilsoh’a officer 2 akitongkha in mi 10 aman uvin ahi. Oakland, California gam’a, human chain sem’a kiphinna bol mi 4 aman uvin ahi. Mun phabep’a boina aum vang’a, atamjo’a kiphinna boina umlouvin achelha in ahi.

“Gamdang’a kon hung chenglut hohi setna bol (criminal) hotoh kibang’a akikoi hi pohnat umtah ahi”, tin kijotna’a pang Mary Quezada in aseiyin ahi. International Workers’ Day nikho’a kiphinna hi US gam’a president thah tupna’a kibol ahi. Trump in office atuh ni 100 alhin’a immigration enforcement akehlet be’a chule US-Mexico gamgi’a bang sah ding’a thupeh apeh’a, US gam’a Muslim gam 6 ‘a kon gamsung miho kholjin theilou ding’a dan asodoh ahi.

 

Ola taxi tol khat in numei khat hunam’a luppi ding go

Bengaluru, May 2 (Zeenews): Kal masa chun Ola taxi’a tou numei khat in inn ajotna’a driver pa’n hunam in ana bol kit in, numei chung’a khansetna thilsoh hi thip theilouvin aumin ahi.

Police hon thilsoh hi Thursday jingkah nidan 2.15 don ahi’in, Koramangala leh Begur lamlen kikah thilsoh ahi, tin aseiyui. Numeinu hi laa sa ahi’in, hehna asemna’a chun driver pa’n lampi achom jep ‘a che hite ati’in, lampi chom’a eipuiyin, munthip kalhun lhun uvin, eiman in ahi, ati. Car’a kon hung jamdoh’a, kithopina athum’a hatah’a apen jouva driver pa jam mang ahi.

Clinic khat kalhun’a kaloi hon eihung lah kanga ahi, tin aseiye, Police hon case ajihlut uvin, driver pa mat ding’a ahol jing uvin ahi.                Alangkhat’a, Ola in police ho thukholna kitosot ding ahi, tin aseiyui. “Customer’a kon thu kajah jah uvin Ola platform’a kon driver partner kasumang tauve. Customer ho venna pehding hi keiho gel sangpen ahi’in, hitobang chonna hi kamoh vetlou diu ahi. Thukholna’a police tosotna lhingset kapehdiu ahi”, tin asei uvin ahi.

China Communist party phabep in Dalai Lama sum’a kithopi pe

Beijing, May 2 (PTI): China gam’a ruling Communist Party hon official phabep in Dalai Lama sum’a akithopi uve, tin aseidoh uvin ahi.

Senior discipline inspection official khat in party official phabep in 14th Dalai Lama sum’a akithopi’e, tin demna aneiyin, hitobang’a na kitong hin separatist douna’a party panlahna anoise na avetsah ahi, ati. Party official phabep in political thu agelkhoh poi, tin Wang Yongjun, discipline watchdog lamkai, Tibet in aseiyin ahi. Communist Party of China (CPC) in thuso asodoh na’a chun 2016 kum’a Tibet Discipline watchdog in 2014 kum’a party official 15 in Dalai Lama akithopi thu ajih uve, tin Global Times thuson aseiyin, ahin, official hohi atohna mun leh amin aseidoh pouve.

Dalai Lama hi 1959 kum’a China gam’a kon India gam’a hung jamlut ahi. Wang in CPC in abol thuso’a chun, mi phabep in 14 Dalai Lama sum’a akithopi uvin, underground organisation’a apang uvin, gamdang’a thuguh ape uve, ati. China gam in 14th Dalai Lama hi political exile ahi’in, China gam’a kon Tibet hi hou-thu’a khen ding tohgon anei ahi, tia ngohna anei ahi.

Kum 81’a upa Tibet hou lamkai pa ahung kile ding thumna’a achesa kum phabep sung’a monk atamjo panna’a Tibet gam-mi 120 val ama-leh-ama meiya kihal lih ahitai.

Pakistan BAT in India sepai 2 lol atan jouva India sorkar in Army ho thuneina pe ta

New Delhi, May 2 (IANS): India gam hopsung Krishna Ghati sector, Poonch district, Jammu and Kashmir gam’a aguh’a hunglut Pakistani Border Action Team (BAT) hon Monday nikho’a India sepai 2 lol atan’a chule mikhat atohkhah jouvun Pakistan gam ama deilam tah’a kimaitopi ding’a Army ho chamlhatna akipe tan ahi.

Pakistan BAT natoh hi sorkar in sangtah’a demna aneiya chule Army hon adonbutna ding’a thaneina apeh ahitai, tin TOI thuson aseiyin ahi. Alangkhat’a, Defence Minister Arun Jaitley in PM Modi tuni leh thilsoh toh kisaiya akimupi ding, lamkai tenin phulah ding dan thu aseikhom lhonding ahi. Indian Army patrol ho kibulu hi tohgon kisem toh’a operation ahi, tin thulhut in aseiyin ahi.

Pakistan gam in lunghanna thei na atoh hin gamsung teni kah’a kiloikhomna asuse cheh in ahi.

Km 778 lhing Line of Control, J&K gam’a India sorkar in phulah ding’a kitepna anei jouva kon kikaptona thilsoh apunbe in ahi. India gam hopsung metre 200 val lut’a kibuluna hi Pakistan Army chief General Qamar Javed Bajwa in Sunday nikho’a LoC avil jou ahi, tin Army thulhut in aseiye. Thilsoh donbutna’a India sorkar in Army ho thaneina leh chamlhatna apeh’a chule sepai teni hi aliem’a kithi sah louding ahi, tia Arun Jaitley in asei ahi. Alangkhat’a, Army honjong phulah ding’a kitepna aneiyu ahi. LoC sector chom chom’a kikaptona aum’e, tin senior officer khat in aseiye. Monday ni thilsoh’a Naib Subedar Paramjit Singh (22 Sikh Regiment) leh head constable Prem Sagar (200 BSF Battalion) Pakistan sepai hon alol atan peh ahi. “Hitobang thilsoh hi gal laiya jong koiman abol lou ahi.

Khantou louna natoh ahi”, tin Jaitley in aseiye. Alangkhat’a, Pakistani Army hon India sepai ni lol kitan thu hi keiho kahipouve, tin nelkalna anei uvin ahi. “Pakistan Army hon LOC’a hem-kham apalkeh pon, ahilouleh Buttal sector (India in Krishna Ghati sector tia ahet) ‘a BAT in hitobang thil abol poi. India ngohna hi jouthu ahi”, tin Inter Services Public Relation (ISPR) in thuso aneiyin, hijong leh Indian Army hon thuso hi photchenna aneiyu ahi.

Thusoh Lahchom

RIMS thupeh

RIMS Director, RK Dinesh Singh in department luboh ho jouse thupeh aneiyin, ama ama department/unit’a attendance register natoh nikho jingkah nidan 10 kah’a Dean office’a apehlut diuvin thuhilna aneiyin ahi. Department’a natong ho attendance vetsui nading’a hitobang thuso anei ahi.

Breast cancer

Dr Ajit Lukram lamkaina in Shija Breast & Thyroid Clinic leh Lions Club Imphal Leimarol in Wangoi CHC mun’a May nisim 1 nikhon ‘breast cancer’ man beiya kivetna leh awareness programme abol uvin ahi. Kin-gon’a thepna nei hon pan ala uvin, chule OPD kivet nading leh Shija Hospital’a manlhom’a mammogram kilah nathei booklet jong ahom uvin ahi.

NSP

Minority simlai ho scholarship scheme thum ho’a Renewal application seplut simlai hon  pending/un-verified ahile ahilou akivet chet theina ding’u NSP 2.0 portal avel in akihongdoh tai tin Director/MOBC Manipur Kh.Dineshchandra Singh a kon kimu thulhut in aseiye. Hitolhon’a themjilnamun hon Online Renewal application ho scrutiny/verification May nisim 10, 2017 masang’a akichet chil thei ding’u chuleh District/State/UT Department hon May nisim 25, 2017 masang’a akivet chil thei ding’u ahi.

Gamsa kap kiman

Thulhut kimu dungjui in Tuesday nichun Baksa,Simola mun Bongaon ah Army leh police kitho in kholchil na anei nao’a gamsaa kap mi 5 ana man doh un ahi. Akiman ho min chu Kamaleswar Basumatary, Peter Islari, Nileswar Islari, Goliath Basumatary leh George Hajowary ahi uvin ahi. Ama ho kom’a chun rifles 3 jong anamu doh un ahi.

‘Oorja’

May nisim 1 nikho’a kon Khuman ampak Main stadium mun’a ‘Oorja’ Football Talent Hunt Tournament 2017’ akipan in, May 1’a kon 10 (ni som) umding football Hunt Tournament’a team hoita tah kitet diu ahi’in, kin-gon hi 9 Sector Assam Rifles in IGAR(S) lamkaina’a agon ahi. Manipur Governor Dr Najma A Heptulla kin-gon’a Chief Guest in apang in, Yumnam Joy Kumar Singh, Deputy Chief Minister leh Letpao Haokip, Youth Affairs and Sports Minister Guest of Honour’a apang in ahi.

‘Furniture fest’

Kairembikhok Sabal Lampak, Thoubal district mun’a ni 15 lhing Furniture Festival hondoh ahitan, kin-gon hi Kairembikhoh Students Union leh Club lamkaina’a furniture festival committee in agon ahi. Festival hondohna’a Sangaiyumpham Zilla Parishad nominee, Zanab Khan, advisor, KSUC, Laishram Amarjit leh Wangbal Gram Panchayat pradhan nominee, Huidrom Doren jin-gun’a apang uvin ahi. ‘Save Our Entrepreneurship and Identity’ ti thupi noiya KSUC in festival agon ahi, tin convenor, organising committee in aseiyin ahi.

Blankfire

Tapkong houlim leh totna tilouva mipi masanga houlimna neiho hin ei le ei kiseiphat sanga mi joh iseiphatleh min angainom ahi. Amale ama kiseiphatna umteiji hohi koiman angainom behlou ahibouve.