ET May 3, 2020 News

ET May 3, 2020 News

62
0
SHARE

Gamsung mi Guwahati a tangden mi 84 ho Imphal khopi hunglhung ta; tuchan a Covid-19 symptoms nei umlou

Imphal, May 2(ET): State sorkar in Saturday nikhon Covid- 19 Lockdown jeh a Manipur Bhawan, Guwahati a tangden gamsung mi 84 (batch masa) ho ahin puilhung tauvin ahi.

Health official thulhut dungjuiya, mi 84 hohi Imphal alut masang uva Mao Gate, Senapati district a health expert hon abon uva ‘screened’ abol u ahi. Amaho hi state bus 4 a ahin poh u ahi’in, jingkah nidan 8.30 don a Mao hunglhung u ahi, tin police thulhut in aseiyin ahi. Ahung ho coronavirus symptoms neiya aumlou jouva abon uva Imphal khopi a alut diu kiphal peh ahi, tin health official in aseibe in ahi.

“Passenger ho screen akibol soh in, tuchan geiya Covid-19 symptoms neiya akimupoi”, tin Dr Sasheekumar Mangang in aseiyin chule passenger 84 hohi abon uva Imphal West a um government quarantine centre a akoiyu ahitai. Quarantine centre a jan khat umdiu chule pool khat a sample nga cheh umna a ‘swab test’ abol diu ahi.

Thulhut dungjuiya passenger 84 ho test bolna dinga agom a test kit 17 kimang ding ahi’in, pool sunga koi tobang positive ahi akihedoh a aumle koipen ham ti hetdoh nadinga pool khat a umkhom mi 5 ho abon uva test abol kit diu ahi. Test result hi Sunday nikho teng kiheding ahi. Chule health expert hon koihi ‘isolation ward’ a umsah a chule koihi ‘home quarantine’ bol ding ham ti thulhuhna aneidiu ahi.

Positive auma ahile Covid-19 nat jenna dinga kipe hospital ‘isolation ward’ a kijen pai ding ahi’in chule positive hiya ahivanga ‘symptoms’ neilou hojong isolation ward a kikoi ding ahi. Chule ‘negative’ result hi hohi dan dungjuiya nikho 14 lhing ama ama inmun a ‘home quarantined’ kibol ding ahi’in, natna achal louna dinga kivenna ahi.

Tu masanga Health Minister L Jayantakumar Singh in thuso miho henga, khopi len len a tangden gamsung miho agam a nungpui nadinga ‘special chartered flight’ gon peh dinga state sorkar in Aviation Ministry le Home Affairs Ministry henga phalna athum ahitai, tia anasei ahi.

India gam a Lockdown kal 2 kisuhsaobe; May 17 chan Lockdown umjom ding

New Delhi, May 2: Ministry of Home Affairs in Friday nikhon India gam pumpi a Lockdown kal ni chepi jom dinga aphat suhsaobe na thuphon anei tauvin, May 17 chan lockdown umjom ding tina ahi.

Tu masanga May nisim 3 chan Lockdown suhsaobe dinga thuphon anaum ahi. Ministry in thuso aneina a Disaster Management Act, 2005 noiya sorkar in Lockdown hi May nisim 4 a kon kal 2 aphat suhsaobe dinga Order asodoh ahi, ati. Achesa March nisim 25 nikho a Lockdown ana kikoi hi India a Lockdown masapen ahi.

MHA in Guidelines thah jong asodoh uvin, gamsunga um district hohi hop thum- Red zone (hotspot), Green zone chule Orange zone a akhen ahi. Green chule Orange zone a um district ho a Lockdown kikoi sunga ‘relaxation’ phabep umdinga phalna aneiyu ahi. Green zone hi Covid 19 case tuni chan a akisei louna district ho, ahilouleh achesa nikho 21 sunga case aumlou na district ho ahi.

Red zone hi case atamna mun ahi’in, district sunga active case akal dan, test le surveillance kibol dan hojong avet u ahi. Chule Red ahilouleh Green zone a jong umlou hohi Orange zone kiti ahi. Centre in achesa Friday nikho a Red, Green le Orange zone a um district ho list asodoh ahitai. List hi kal seh a velvetna umding ahi, tin Health Ministry in aseiyin ahi. State le UT in Red le Orange zone a district akoibe thei ahi’in, ahivanga MoHFW in red le orange zone list a apansah district hohi akhel theilou ding ahi.

Guidelines thah dungjuiya lenna, train, metro chule inter-state gari ho lhai thei chomlou ding, kikhah jomding ahi. School, college le themjilna mun, training/coaching centre, hospitality service kiti hotel le restaurant ho, cinema hall, mall, gymnasium, sports complex, le mipi kikhopna dang dang le kin gon ho kikhah jom nalai ding ahi.

Train, air le lamlen a gari alhaiding hi ajeh phabep a kiphal ahi’in, tu naicha MHA in gamdanga tangden ho kipuidoh ding aphal peh ahi. Kin khoh louva mi che le va le hi jan nidan 7 a kon jingkah nidan 7 sunga phatah a kikhah ding ahi. Zone jouse a kum 65 le achunglang a upa ho, naovop numei chule kum 10 noilang chapang hohi dammona thu ahiloule kin khoh tilouva inmun a aumtup diuva kisei ahi.

Out-Patient Departments (OPDs) le Medical clinic ho red, orange le green zone a akihond ing kiphal ahi’in, ‘social distancing’ ajui diu ahi. Ahivanga Containment Zone noiya hiche hojong kikhah ahi.

Red Zone: Red zone, (containment zone pam) a activity phabep kikhah ahi. Cycle rickshaw le auto rickshaw, taxi le cab, intra-district le inter-district bus ho alhai ding kikhah a, sam tanna dukan, spa chule salon hojong kikhah ahi. Phalna akipe kin ho a bou mi le gari lhai ding kiphal ahi’in, gari len a driver tilou atampen a mi 2 touding chule gari neo a anunga kipo umthei louding ahi.

Angaicha khoh ho- lou, pharmaceutical, medical device, raw material ho panna a thil khoh ho kisemna unit, production unit le supply chain, IT hardware kisemna, jute industry chule packing material manufacturing unit ho kiphal ding ahi. Dukan achang a kihong, vengsunga dukan kihong ho jouse (mall le kailhang tilou) akihon ding thinglhang gam a kiphal ahi. Lockdown dan adangse hi kichejom pi ding ahi.

Orange Zone: Hiche zone a hi ‘Red zone’ a phalna kipe activity ho tilouva taxi le cab jong kiphal ding, ahivanga driver khat le passenger khat bou tou theiding ahi. Akiphal thil hoa bou inter-district movement kiphal ahi’in, chule gari len (four wheeler) a driver tilou atampen a mi 2 apoh diu chule gari neo a anunga mikhat akipoh theiding kiphal ahi.

Green Zone: Green Zone a hi India pumpi a kikhah a activity ho tilouva activity jouse kiphal ahi. Ahivanga bus alhaina a hi 50% passenger bou apoh theiding chule bus depot ho a hi 50% capacity bou kiphal ahi.

BJP a lut Congress MLA 7 ho douna a Congress in ‘disqualification petition’ peh dinga sei

Imphal, May 2(ET): Manipur Congress MLA 7 ho chunga hehna kisem May nisim 8 teng Speaker’s Tribunal in asei ding ahitoh kilhon a akhonung u dinmun seithei louva um ahi.

Opposition Congress in Saturday nikhon BJP a lut a chule BJP lamkaina sorkar tosot a MLA 7 ho douna a Supreme Court a ‘disqualification petition’ kipelut ding ahi, tin Speaker Y Khemchand ano in ahi. Party MLA Keisham Meghachandra Singh in hiche thuphon anei ahi.

Congress spokesman Ningombam Bupenda Meitei in, “Igam u Speaker in 10th Schedule jana apeh a Constitution ahuh phat ahi”, ati. Congress MLA Meghachandra le Fajur Rahim in ‘disqualification petition’ Supreme Court a asem jou tukum March lha a SC in Cabinet Minister anahi Thounaojam Shyamkumar Singh Minister hina alahpeh a chule Assembly a alut theilou dinga akha ahi. Hiche jouva Speaker Y Khemchand in Shyamkumar MLA ahina a kon ‘disqualify’ abol ahi.

 Congress in Keisham Meghachandra Singh versus Manipur Assembly Speaker and others case a hi SC in Speaker pa’n thulhuhna 10th Schedule noiya aneina dinga lhathum phat apeh ahi. MLA 7 hohi ‘disqualify’ kibol jong le N Biren Singh lamkaina sorkar hi ‘minority’ hideh loulai ding ahi. Member 60 umna House a BJP le akiloikhompi hon member 39 aneiya chule Congress in 20 anei ahi.

Congress in tua BJP toh kiloikhom a party hotoh sorkar semding ginchatna aneiyu ahi. Hetthei khat chu Congress hi 2017 assembly elction a party tampen hi uva MLA 28 aneivang uva sorkar asem thei louvu ahi’in, seat 21 mu a BJP injong party dang dang toh sorkar asem ahi. Party in MLA 7 ho douna a case asem vah ding ahitai, tia Wangkhem constituency MLA K Meghachandra in asei ahi.

MLA sagi hohi- Oinam Lukhoi Singh, Wangoi, Kshtrimayum Biren Singh, Lamlai, Paonam Brojen Singh, Wangjing Tentha, Sanasam Bira Singh, Kumbi, Ngamthang Haokip, Saitu, Ginsuanhau, Singhat leh Yengkhom Surchandra Singh, Kakching ahi.

Ludo lo a kon mi 2 chemponga kisat

Imphal, May 2(ET): Janilhah nidan 7 vel chun Bishenupur district a Moirang Khunou ah mi phabep ludo a juar akichepnao ah akinahlouvin ahi. Juar kichem ho kikah a kinahna ahung umdoh chun alah uva mi khat chun chempong ahinkimat nin akicheppi mi ni asatnin ahi. Nasa tah a kisukha teni chu JNIMS hospital a pohlut ahilhonin doctor hon akisat khahna mun ho akhuipeh un thina a konin vang ahoidoh lhone.

 

MTDC Chairman chung’a demand leh gihna anei jeh’a 25 AR leh Police in HPC-D Cadres 11 man

B.Lalboi Gangte

CCpur.  May 2 (ET): Churachandpur khopi sung’a pansa Suspension of Operation noiya um Hmar Peoples’ Convention – Democratic (HPC-D) Manipur Region ho abusah nao mun 2 ah 25 Assam Rifles leh CCpur Police team in achesa May nisim 1 jankhang kim nidan 1 leh 2:00 am kikah in mi 11 anaman uvin ahi. Chuleh 25 Assam Rifles leh CCpur Police Team hon hiche nikho ma ma chun Nehru Marg aum Loicy Inn leh Compound sung’a Hostel ding’a kimang khat jong ana kholchil uvin ahi. Hiche mun’a chun Hmar People’s Convention-Democratic (HPC-D) active member 11 leh License um Double Barrel khat toh anaman uvin ahi.

Hiche toh lhon’a hiche thilsoh chung’a inn neipi Loicy in aseina’a Combined Security Team hon hetsah ima jong neilou chuleh Search warrant jong jaolou in insung’a thagum’a ahung lut uvin insung’a thilkeu jouse athethang uvin chuleh keima mimal sum Dk.12,000 leh ka personal file khat jong ana kichoi mang uvin ahi. Hiche thilsoh sung in Security force ho husan chun inn lhang’a um ho asulung linglao in chuleh kot akon hung dahdoh tophot anungsol lut uvin ahi. Chuleh Shiroy Kitchen kiti Fast Food joh’a achate toh khosa Melody dukan kot (Shutter) jong anasuse uvin ahi. Melody in aseina’a Security Force hon athal choi hou aload ging uchun numei chapang ho asuhlung linglao naban’a Assam Rifles hon thal jong anakap ging uvin ahi ati.

Alangkhat’a HPC (D) Cadres 11 kimat na inn mun neinu Loisy in aseina’a inn hi Hostel a kimang ahi in lock-down jeh’a chapang hon adalhah’u ahin lockdown hi achelhah jing leh inn bahara a sem ding’a kikoi ahi. HPC (D) Cadre khat in aseina’a Designated camp a um ding ti hijong leh Assam Rifle ho hetpeh na’a Designated Camp akipat hung kipot doh ahi in Lockdown jeh’a khopi sung’a kiki tangden kha ahi. Chuleh Cadres dang ho Rengkai, Sielmat leh mun dang dang’a umho dinmun hepha louva designated camp a kikhum den ding kiti hi thil hithei lou ahi ati. Hiche thilsoh nachung’a Thingchom kho’a HPC (D) Cadres ho umna jong Assam Rifles leh Police ho analut uvin hiche achun Cadre 4 anaman uvin ahi tinjong aseibei. Hetthei khat chu HPC-D thingnoi Cadres mi 11 kimat lona ajeh hi CCpur District Police akon thulhut kimu dungjui in achesa April nisim 25-26 nikho nilhah lam nidan 1:00 vel’a HPC-D Cadres hon Vungzagin Valte, Chairman MTDC and MLA Thanlon AC heng’a COVID-19 jeh’a Thanlon AC gamkai sung’a neh le-chah hahsat najeh’a ann-chang kihom ho HPC-D in quota ding leh sum demand ananei jeh uva kon kiman ahidan kichen tah in atahlang in ahi.

Job-card neiho list velvet dinga Minister Biswajit in official ho thupeh nei; natong louho sum pehlou dinga jong sei

Imphal, May 2(ET): Rural Development and Panchayati Raj Minister Thongam Biswajit Singh in Gram Rojgar Sevak (GRS), Imphal East, Imphal West, Bishnupur le Thoubal in avel a ama ama gamkaiya job-card nei jouse list velvetna anei uva chule min kisemthu/alhem ho asuhmang/akah diuvin thuhilna aneiyin ahi.

Block Development Officers le GRS hotoh Panchayat Bhawan, SIRD mun a Mahatma Gandhi National Rural Employment Guarantee Scheme kichepi thu a kihouna anei nauva thupeh anei ahi. Thinglhang miho kihinso na a ol jep nadinga gamsunga MGNREGS hi athah a kipan kit ahitan, hijong le scheme akichepi na a Covid 19 Guidelines ho akijui soh nadinga khoutah a panlah ding ahi, ati.

Job-card neiya hi agom a 5.69 lakh lhing ahi’in, sorkar in State handloom and handicraft artisan ho a kon alah mask hi beneficiary ho ahop peh ding ahi. Hand sanitizer peh dinga jong aseiyin chule mopohna nei hon ama ama natohna mun a ‘social distancing’ akijui nadinga avettup dinga aseibe in ahi. Chule natohna a panglou beneficiary ho sum kipe louding chule hitobang min hohi beneficiary list a kon kah ding ahi, tin Minister pa in aseiyin ahi.

BDO hon Zilla Parishad, Pradhan chule Local Area line in MGNREGS noiya natoh alah a akichai joulou ho list apehlut diuvin jong aseiyin ahi. Report ho a hi ipijeh a kichai loulai ham tijong aseidiu ahi’in, aban a action akilah theina ding ahi, ati. Natoh akichepi masanga natoh thah jouse a ‘estimate’ agon diuvin official ho thuhilna aneiyin ahi.

Gamsunga scheme boina umlouva achelhah theina dinga ama ama bank chule akilhengdoh lamkai  hotoh Minister pa in meeting bol dinga aseiyin chule scheme hi bulhit set a alolhinna dinga ‘grass root level hon mopohna neitah a pan alah ding ahi, ati. Natohna mun a guidelines ho kijui nam ti keima tah in vetlhahna kanei ding ahi, ati.

BDO hon bank in passbook asodoh lou thu panna a boina ato hou thu Minister pa hetsahna anei uvin ahi. Meeting a Additional Chief Secretary MH Khan chule department official chom chom jong apang uvin ahi.

 

Kpi CSO hon CQC umding phatsah na nei u

Kangpokpi, May 2(UNA): Kangpokpi district sung a mipi kiloikhomna ho in district Deputy Commissioner in Community Quarantine Centre (CQC) smeodh ding chungthu a kihtopina ana thum chu sanpeh na ana nei uvin ahi. Hetthei khat chu achesa April nisim 30 nikho a Conference Hall, DC office Kangpokpi a joint emergency meeting ana kikou na a district DC nu in lamkai ho ang a CQC semdoh ding chungthu hetsah na ana nei ahi. Hiche meeting achun Thangminlen Kipgen, President, KSO-Sadar Hills le KSO block level lamkai  Twilang, Island (Phailengmol), Saikul, Bungpi le Moltam  chule Machun akon ho, President, Liangmai Naga Council le tribe chom chom Vaiphei, Gangte, Komrem le Gorkha ho akon lamkai ho in jong panlah na ana nei uvin ahi.  Hiche joint meeting chu Lalithambigai Kalidas, IAS, DC Kangpokpi in an akou ahin, MLA le district administration makai na noi a CQC semna ding chung a mipi kiloikhomna ho le kho haosa ho panlah ding ngaidan hetsah na ana nei ahi. Phat ahung um tah loutoh lhon a DC nu in kiloikhomna hoc hung a kithopina ngehna ana nei ahi. DC nu ngehna chu kiloikhomna lamkai ho in ana ngai to jou uvin, KSO Sadar Hills President, Thangminlen Kipgen chu CSO palai a pang ding a lhendoh na ana nei utoh lhon in, gampam akon hung ho ina quarantine kibol ding a phal peh na amu ule khosung ho a quarantine centre hondoh na ding toh kisai in kihou khomna ana nei uvin ahi. Meeting achun medical department in staff vat na chung hahsat na ato ho u govt in kihtopina thei channa kithopina apeh vang uva genthei na ato jing nalai dan u thu tahlang na ana nei uvin ahi. Alangkhat a CSO lamkai ho in district administration natoh na chung a kipa thuseina ana nei utoh lhon in hiche natna toh kisai a mipi kiloikhomna ho in pan lah na thei channa alah ding dan u jong hetsah na ananei uvin ahi. Kiloikhomna lamkai ho in Kangpokpi le Tadubi chuleh Kaorng ho a MLA le minister ho in Kangpokpi medical department manchah vat h le thil le lo avat ho avet sui peh ding uvin jong temna ana nei uvin ahi.

Myanmar in Covid-19 chungchang a thutah asel jeh a gamgi akikop pi ho akichih thei ngai

Imphal, May 2(ET): Myanmar toh gamgi kikop a India gam a um Manipur, Nagaland, Arunachal Pradesh le Mizoram in gam kinaipi Myanmar in Covid-19 case data ho a thutah aseidoh loujeh a Indo-Myanmar gamgi hi khoutah a akha ngai ahi.

Health le Sports Ministry in asei dungjuiya Republic of Union of Myanmar in website a thuso anei dungjui uva agamsung uva Covid-19 jeh a thi mi 6 bou hinalai chule natna nei mi 151 hi a, mi 31 adamdoh e, ati ahi. Sorkar in hiche data apeh uhi atahsan lel ahi. Ajeh chu MNTV kiti Myanmar gam  aum television in April nisim 27 nikho a Myanmar gam a natna jeh a thi 44 alhingtai, tia asei ahi.

Thulhut dungjuiya athi jouse hi ‘quarantine’ a kikoi ahi. Mandalay General Hospital a mi 325 ‘quarantined’ abol uva, hiche lah a mi 183 hi ‘negative’ ahi jeh a asoldoh u ahitai. Aumden holah a mi 7 hospital a achesa April 24 ni a thi a, April 25 ni a mi 5 thi ahi. April 27 ni a natna jeh a thi 44 lhing ahitan, athah ho pum a 47 lhing ahitai.

Mandalay General Hospital a doctor hon athi hohi Covid-19 pandemic toh kisai ahipon, natna chom chom aneiyu jeh ahi, tia asei ahi. Diabetes, High blood pressure, cancer,hepatitis C, brain inflation, lung disease, TB ho jeh ahi, tia Dr Dundu, Chief Medical Officer, Mandalay General Hospital in asei ahi’in, April 28 ni a adamlou numei khat Sanya San Tun Hospital, Taunggyi a thi ahi.

Hospital a thi hohi Aungmyatasan, Changmyatasi, Mata yar, Moeguat, Kyatpyin Tapatkyin, Pwinoolwin, Sinkyai, Kawlin le Chanayetasan a kon hiu ahi. Myanmar gam a achesa March 24 ni a Covid case masapen kihedoh ahi’in, Manipur gam a case akihetdoh nikho toh kitoh ahi. Manipur gam a natna nei teni damdoh a Covid 19 nat umlouna gam hi ahitan, ahivanga Myanmar gam a case tam jing a, Kalay kiti Chandel district a kon gamlha lou mun le Tiddim state (Behiang, CCur a kon 157 km a gamlha) mun a case athah kihetdoh be ahi.

Manipur, Nagaland, Arunachal Pradesh le Mizoram hi Myanmar toh 1640km lhing gamgi kikop ahi’in, phabep fencing kibol a chule phabep phatah a anga tup u ahi. Ahivanga akinga namun ho a jong Myanmar gam miho bailam tah a galkai ahijeh a lungmonna thei hilou ahi. Myanmar toh gamgi kikop a state hohi achihthei ngai ahi, ajeh chu Myanmar langa kon natna ahung kipohlut nathei dinmun um ahi.