ET May 24, 2017 News (Local, Thusoh Lahchom, Editorial, Blankfire)

ET May 24, 2017 News (Local, Thusoh Lahchom, Editorial, Blankfire)

1754
0
SHARE

Imphal khopi sung traffic signal chungchang’a ahiding doltah a natonglou official ho chunga action kila

Imphal, May 23 (DIPR): Imphal khopi sung’a kikoi traffic signal holeh CCTv ahiding bangtah a anabol lou official ho achan diuva lom gotna akipetai tin Chief Minister N. Biren Singh in aseiye. Chief Minister Secretariat Cabinet Hall a press conference kibolna ah Chief Minister in L. Sunita (AE & EE/ED-I for Phase-II anahi) leh L. Kumar Singh (SW chule tule tua SE/EC) hi atohna lhon’a kon’in suspend akibol tai ati. Chutima a chu government in hiche chungchang’a naatpha retired official ho tichu S. Lokendra Singh (So, PWD Electrical anahi), Kh. Yaima Singh (EE/ED-I anahi), Y. Devendra Singh (SE/Electrical Circle anahi), W. Kesho Singh (Chief Engineer anahi), M. Theimon Singh (Chief Engineer-Mech. & Elect-PWD anahi) chule M. Lokendro Singh (Chief Engineer, PWD anahi) ho chung’a jong daan toh kitoh a action kilading ahi ati.

Thil kibol dan hi hiche natohna a ngansena kipehon company ho kitetsah louva sum aum jouse mangcha’a thilkeu themcha bou chohdoh theina ding’a tohgon anakinei masa ahitai tin CM chun aseikit’e. Hiche thilbol a pang official honjong amona’u aphong uve ati. Hitia thil kibol hi mipi sum kimoh suhmang tobang ahi ati. Chule thil le lo kimangcha hojong quality hoilou ngen ahi tin CM chun aseikit’e.

Official hohin hiche natohna ding’in field survey/site ho vilna aneipouvin, sum lutding jat jong khottoh louvin Measurement Book a jong entry ima anabol pouve ati. Imphal sung’a CCTV camera ho koina ding chungchang hin Chief Minister in tuni chun enquiry committee in interim report apelut tauvin chule final report chu hapta khat sung’a kimuding ahitai tinjong aseikit’e.

Petrol le Diesel stock ninglhingtah in akikoinai: Karam Shyam

Imphal, May 23 (DIPR): Manipur mipi hon kilosetah le tijatna neitah’a petrol le diesel akichoh khollou ding’uvin CAF & PD Minister Karam Shyam in temna aneiye.  Tuni Secretariat South Block’a  thuso miho toh akihoulimna’a Karam Shyam in aseidan in, mipi in tijatah’a petrol le diesel akichoh khol’u hi Kohima’a landslide umjeh ahi’n, ahinlah tuhin landslide umna mun gari lhaina thei ding in semphat ahitan petrol le niseh kimanchahna’a poimo thildang dang po ding in truck 70 val  akipatdohta’uve.

IOC official ho’a kon kimu thulhut khat in aseidan in tutu hin NH a boina hung um jongleh Petrol ni sagi manding aumnalaiyin, diesel nikho som le sagi man ding aumnalaiyin, LPG nikho ni man ding aumnalaiyin chuleh aviation fuel jong nikho somle giet vel mandinga umnalaiyin ahi.

CAF & PD Minister Karam Shyam in tuni chun valley district Deputy commissioner ho toh kihoulimna aneiyin , hiche’a chun Manipur Conservation of Paddy Land and Wetland Act, 2014 khoutah’a chepi ahina ding in thupeh aneiyin ahi.  Minister in aseidan in hiche act hi tutu’a kichepi jing ahivang in mi phabep in  lou mun phabep Inmun’a ding  in ahomjing’e ati. Act sumolphou ho atotohchet’a guotna kipe ding ahi tin jong aseiyin ahi. Land revenue’a kon income kisuhtah’a ahunglut lou jong hi boina lentah khat ahijeh’a Insuon’a land revenue donna jong kibol ding ahi tin Karam Shyam in aseiye.

Hetthei khat chu tutu’a Land tax hi phaicham’a Dk.20 ahi’n chuleh thinglhang a Dk.10 ahi. Land tax jong hi aphat dungjuiya velvet ngai ahi’n, concern official ho toh kihoutohna akineijou teng le velvetna kineiding ahi tin Karam Shyam in aseiye.

Kaani lei bolhon kivahna ding’a natoh dang joh abol ding’uva Letpao Haokip in temna nei

Imphal, May 23 (DIPR): 41-Chandel AC sung’a um hon kaani lei sang’a sum le pai muna ding thingkeh dang joh atuna ding’uva haosa hon atilkhou ding’uvin IFCD and YAS Minister Letpao Haokip in temna aneiyin ahi. Hiche thu hi tuni Youth Hostel, Khuman Lampak a 41-Chandel AC haosa ho le CSO lamkai ho toh akihoulimna’a asei ahi.

Kaani lei bolho hin thildang dang  a jong sum tampi amutheiyu ahi. Chuleh Haosa hon jong kaani lei bolho sang’a thingkeu dang dang tu’a kivah ho joh gam apeh ding’uva pha ahi. Loubolnom lou ho’n jong gancha avul’uva sum tampi amutheiyu ahi tin Letpao Haokip in aseiye. Kinguon a panla haosa ho chun, loubolho’n thingkeh dang sang’a kaani joh bolding adeisahna’u ajeh aphongdoh’uvin ahi.

Letpao Haokip in ahoulimna’a chun. 41-Chandel AC sung’a kolphemeivah lhunlouna mun jouse kum nga sung’a kolphemeivah kipeding chuleh banking le internet facility jong kilhunsah ding ahi tin aphongdoh’e. Gamkai sung a primary health sub-centre umlouna mun jouse a jong primary health sub-centre khat cheh kikoilut ding chuleh mipi ding’a don ding twitheng jong kipe ding ahi tin Letpao Haokip in aseiye. Tuni kinguon a chun aguom in haosa le CSO lamkai 220 vel in pan ala’uvin ahi.

Kangpokpi District kimu nikho chu “Cleanliness Day” a mandia phondoh hita

Kangpokpi, May 23: Kum 45 val jouva Sadar Hills in Kangpokpi District min’a District pilhing ahinmu tolhon’a Kangpokpi DHQs khantou machalna ding khohsah a masot theina din Kangpokpi District HQs sunga cheng miten tunin Kangpokpi Town Committee makaina noijin kihoukhomna ana neijun ahi.

‘Public Meeting and Awareness on Kangpokpi Town’ kiti thupi noija mipi kihoukhomna  achun ADC Sadar Hills Chairman, Haokholal Hangshing, Vice chairman, Thangjakam Misao chule Khosung Upa Ngulkholam Haokip chu ‘Special Guest’ in ana pangun ahi.

Japi aja’a sim chungchon’a khosunga upa chingtheijin, Hou Lhacha, khangthah lekhathem, chule jin jaum tampin jong Community Hall Kangpokpi DHQs mun’a kihoukhomna’a chun pan analauvin ahi.

Japi kihoukhom kipat masangin Kangpokpi Town Committee in khosunga mi phabep kipa thilpeh le pachatna ana neijun ahi.

ADC Chairman Haokholal Hangshing in khosung angailut le akhohsah jing tolhon’a Kangpokpi DHQs makho ding gelkhohna’a tuni kin’a Special Guest a tomngaitah a apan jallin Melchihna (Memento) khat apeuvin chutobang ma chun Vice Chairman Thangjakam Misao jong ana peuvin ahi.

Amani chungchon’a Kangpokpi khosung ngailutna jalla thaselou hel’a ‘Chairman’ hina’a khosung‘Hi le Gao’ dou tampen Haokholien Guite, Kangpokpi Vaipo lui khat le khosung upa Ngulkholam Haokip, Kangpokpi khosunga Pastor posot pen, Rev. Seihpao Hangshing, Kangpokpi khosung then nading le jep hoi nadia gunchutah le vetjui theitah’a pan alajing Nehkholam Kipgen chule Journalist Kaybie  Chongloi jong anatoh u hetpehna le pachatnan melchihna thilpeh ana neijun ahi.

ADC Sadar Hills Chairman, Haokholal Hangshing in Kangpokpi khopi hi phatkhat chun vetjui theitah anahin, chitin namtin in ana bom’in, sumkolveina lam hihen ipilam hile khantouna ana machal lheh jengin hinlah phatchom khat jouva konin chitin namtin kikimdel’a ana umkhom hochu ana kithehdoh doh un chule khantouna lamjong nasatah in ana lhadai tan ahi.

Hiche phatlai chun Kangpokpi chu muntin le nam tin’in kingainan ana neitheijin society le gamsunga din kineppi umtah ina hiuve, hitobang dinmun chu tua hi inung lokit lou’u akultai tinjong aseibei.

Aman aseibena’a, tuhi khantou machal theina ding thu iseiphat u ahin, kihet khelna thei le kimuhphun nathei hoa kon ikangse diu phat ahitai ati tolhonin Kangpokpi khopi hi aneipa aneinu a gelna lungput ineiphat u ahitai ati.

District HQs neite a kigelna lungput inei loujeh un, Government thil le lo itchahna le depthem ding lunggel inei tapouvin, aneite in kigel leu hen hitobang lungput ineilou diu, gam le go, thil le lo ho isintup uva ivettup johdiu ahi ati.

Masangin i anati tajongle, District HQs ihitah jeh un, Department umdia lom jouse hung umding ahitan, Government gam ina lo houjong pehdoh ding lunggel inei uva, Government department hohi aumkim loiding joh ingaito diu akul’e.

Vice Chairman Thangjakam Misao in ahoulimna’a, District HQs a cheng/um hon then na lungput aneiju angaije, poldeh duh hinkho hi adalhah diu akul’e. Chule kipehdohna, hongphalna lungthim jong akendiu akul’in jalhang hop’a lunggel aneiju apoimoi ati.

Khosung Upa Ngulkholam Haokip in khantouna din Kangpokpi DHQs a cheng miho adeh’a khangthah ten penthahna aneiju angaijin kikhelna khat asemdoh diu akultai ati. Chule Khosung Upa Ch. Haozakam in khosunga japi chanvou avat ho adeh’a dohding twi lhahsam dan apodoh in ahi.

“Kangpokpi in ipi eibolpeh thei ding ham” tin lungput idalhah uva, “Kangpokpi dinga ipi kabol thei ding ham” ti lungput ikenphat u ahitai tin Rev. J. Lunkim, Chairman Kangpokpi Town Churches Fellowship japi tilkhouna aneijin ahi.

Rev. Y. Haokip in, ‘Ipijeh’a America khu super power hithei ham’ ti thudoh ana donbut nauva imadang jeh ahipon kivaihomna hattah aneijeh u ahi ana tiuvin, hitobang chun eihon jong kivaihom na hattah ineiju angaije ati.

KWWO le KYU in Khosung ngailutna jalla natoh thilbolna ho’a mipin tumasang ihinda’u idalhah uva kitosot tona lungthim le panlah khom ding pungput ineitah diu angaije atiuve.

Kihoukhom kikhen’a Kangpokpi Town Committee Chairman, Chonkam Kipgen thuso miho kom’a ahoulimna’a, Kangpokpi District HQs khantou machalna gelkhoh’a mipi kihoukhomna kigong’a ahin, hiche tolhon chun kinoptona phabep jong akineijin chule Government in khantou machal tohgoh aneiho tosotna jochan’a kithopi din jong phatsahna akinei tai ati.

Kangpokpi DHQs khanto machalna dia mipin kilolna phabep aneiho chu- Kangpokpi DHQs khantou machalna din amichang cheh in pan kilading ahitai, Kangpokpi DHQs sunga Department jouse aumkim theina dia amichang cheh in pan kila ding ahi, Khopi Vadung ho’a latrine lhalut tah louding, a inson’in ama ama compound/area akisuh thengpan tahding, District Council in Khosung then nadia nen kholna asem dustbin ho ahinsuse kit akimatdoh le custom dungjuija achungthu kitan ding ahitai, Bazar area jousen nenkholna khatcheh akikoi cheh ding, Cemetery hi akhoh dungjuija KTC makaina gon be ding, Sathikam, anen ho vadunga paitah louding, Inson’a ama ama compound sung cheh’a nenkholna akisem cheh tah ding tiho ahi.

Hiche jouse chungchon’a, Khosung then na le damtheina lam chule vetjuithei le jepna din District pilhing kimuna nikho December nisim 8 hi “Cleanliness Day’ a mantah din phatsah akikhom mipin anei tolhonin KTC in phondohna jong aneitan ahi.

Hitobang public meeting le awareness program hi KTC in akhoh dungjuija ahin gon jingding ahitan, keng le kanga sopi ule nao jousen jong District HQs machalna ding le khantouna din asunga cheng miten tohgon anei hou chunga kithopi ding le pan lacheh din jong KTC Chairman in temna aneijin ahi.

COHSEM noiya Class XII exam result kiphong; 68.8% in pachanna nei

Imphal, May 23: Council of Higher Secondary Education Manipur noiya kibol Class XII exam result akiphong tan, tukum’a exam’a lolhinna neiya agom’a 68.8 % ahi.

Arts stream’a simlai 6322 in exam ape in, hiche lah’a mi 4416 alolhing in, Science stream’a simlai 19252 in exam ape in, 13198 candidate alolhing in, chule commerce stream’a candidate 565 ahi’in, hiche lah’a mi 373 alolhing in ahi. Arts’a Ngangom Jinita, Enlighten Hr Sec School, Sangakpham d/o Ng Ongbui Sanatombi Devi leh Ng Churchil Singh, Nambol Maibam Chingmang Bishnupur district top’a ahung lhon in, mark agom’a 454 amu lhonin ahi. Guneshwori Nongmaithem leh N Shanta Kumar (Kumbi Terakha) second position’a apang’in, mark 437 amu lhonin chule hiche school ma ma’a kai Thokpam Dolenchandra third position’a ahung’in, mark 437 amu in ahi.

Science stream’a Gurumayum Gopalkrishna Sharma (Inspire Science Academy, Ghari) s/o g. (o) Ajita Devi leh G. Gajendra Sharma (Lairikyengbam Leikai) top ahi’in, mark 483 amu’in ahi. Rajkumari Babysana Millennium Institute of Sciences, Sagolband Kwakeithel  Mayaikoibi d/o R.K. (o) Kunjarashi Devi Rajkumar Tikensana (Khurai Puthiba Leikai) top 2 ‘a apang’in, 472 mark amu in ahi. Takhellambam Jayananda Singh Millennium Institute of sciences, Sagolband Kwakeithel Mayaikoibi s/o T. (o) Lata Devi T. Gunamani Singh (Thoubal Achouba opp. AOC Thoubal) injong mark kibang amu in, second position’a mi ni aum lhonin ahi. Victoria Ngangbam Millennium Institute Of Sciences, Sagolband Kwakeithel Mayaikoibi D/O Anoubam Kiranmala Devi Ngangbam Bonobir Singh (Thangmeiband Yumnam Leikai) in mark 468 amu in third position’a apang in ahi.

Commerce stream’a Shap Makan Don Bosco Hr. Sec. School (Arts & Commerce), Maram. S/O Wonringla Makan Tharmi (Makan Koso, P O Shanshak, Ukhrul Dist) in mark 369 amu in top’a apang in, chule Vinod Thakur Don Bosco Hr. Sec. School (Arts & Commerce), Maram. S/O Sita Devi Harinder Thakur (Shangshak) in mark 354 amu in second position’a apang in ahi.

Chule District wise pass percentage chu Bishnupur 52.89, Chandel 78.20, Churachandpur 68.84, Imphal East 56.63, Imphal West 71.84, Jiribam 73.55, Kakching 68.45, Kamjong 100, Kangpokpi 29.97, Noney 90.70, Senapati 70,66, Tamenglong 71,71, Tengnoupal 95.93, Thoubal 83.73, Ukhrul 66.31 ahi.

Subject wise pass percentage chu ahile, MIL Subjects: Bengali : 91.67%, Hindi : 62.50%, Hmar : 100%, Kom : 100%, Manipuri : 97.88%, Mao : 100%, Mizo : 100%, Nepali : 97.80%, Paite : 100%, Ruangmei : 85.24%, Tangkhul : 99.23%, Thadou-Kuki : 99.55%,  Vaiphei : 100%, Zou : 100%. Other Subjects: Accountancy : 79.53%, Alternative English : 92.51%, Anthropology : 87.14%, Bengali Elective : 100%, Biology : 85.02%, Biotechnology : 100%, Business Studies : 94.26%, Chemistry : 73.24%, Computer Science : 93.20%, Economics : 66.17%, Education : 88.24%, Engineering Drawing : 83.96%, English : 96.25%, English Elective : 96.30%, Geography : 83.38%, Geology : 78.13%, Hindi : 100%, History : 64.16%, Home Science : 88.86%, Manipuri Elective : 93.30%, Mathematics : 49.37%, Music : 100%, Philosophy : 65.83%, Physical,  Health Edn. & Sports : 92.77%, Physics : 76.21%, Political Science : 75.21%, Psychology : 99.24%, Sociology : 81.40%, Statistics : 63.83% ahin, Student enrolled le pass percentage chu : Arts : 6322(69.85%), Science : 19252(68. 55%), Commerce : 565(66.02%) ahi.

HSSLC themvetna’a pachang simlai jouse KSO-GHQ le GSO-GHQ in kipapi

Imphal, May 23: HSSLC 2017 themvetna’a pachanna nei simlai jouse KSO General Headquarter in kithangat pina le kipapina thu athot in ahi.  Adeh’a tuchung themvetna’a top a pachanna nei Kuki chapa le chanu thum ho chung’a akipana lentah aphongdoh in ahi. Amaho chu Michelle Chothe (4th Position), Thenhoi Kipgen (7th Position) chuleh Lalgouboi Vaiphei (9th Position) ahi’uve.

Hetthei khat chu achesa kum ni sung’a HSSLC passing percentage hi 61.05 le 6 5.22 ahi’n, tuchung a hi 68.81 ahinphah ahi. Kipa umtah khat chu ahileh tuchung themvetna’a chun government school le college hon hatah in ahin bolhoi’uvin ahi.  2016 kum’a HSSLC themvetna’a government themjilna mun ho’a kon themvetna’a pang simlai 100 lah’a 48.4 bou ana pachang’u ahi’n, tuchung’a chun 57.16 ahin pha in ahi. Hitobang a kikhelna aumthei hi State Education Department natoh hoijeh ahi tin KSO GHQ in department chung’a akipana aphongdoh in ahi.

Geldoh thei khat chu KSO hin COHSEM toh kitho’a themvetna’a guchat lachat bolho suhbeina ding’a pan nasatah’a alah jing ahi. KSO in hitobang thilho abolhi um mo man ahipo’n, khonung’a igamsung’uva kisonpi um chuleh nampi le gamsung hin jemhoi theiding mipilhing tampi semdoh ding lungtup aneijeh ahi.  Chuleh ahunglhung ding May nisim 27 nikho le Kuki Inn Imphal’a KSO guonna noiya career guidance workshop chelha ding ahi’n, workshop a hi tuchung themvetna’a pachang simlai jouse’n thonlou hel’a pan alah ding’uvin KSO GHQ in temna aneiyin ahi.

Chule Gangte Students’ Organisation, General Headquarter in tuchung’a pol som-le-ni (XII) themvetna’a lolhinna hin nei jouse chung’a pachatna sangtah aphongdoh in ahi.

Kiloikhom Information & Publicity, Ngam Gangte a kuon kimu lekhathot in aseina’ah, tuchung lolhinna hin nei jouse chung’ah kipathu sangtah akiphong’in, maban’a themjilna lam’a akal suonna lam uva jong tomngai tah a pan ahin lahjom jing’uva khonung’a nampi choisang ahung hi nadiuvin tiemna sangtah jong akineijin ahi ati. Chuleh losapna nei ho jong lungneo louva tu’a sang’a hoijo’a pan ahinlah uva lung lhadai lou diuvin jong tiemna sangtah akineijin ahi ati.

KNO in UTLA sung’a kihetkhelna ho sucham; lamkai namdet kitna jong nei

Imphal, May 23: Kuki National Organization (KNO) in alhaving noiya um UTLA sung’a kihet kheltona umho akinthei lam leh aphalam a suhchet ding lunggel aneijing toh kilhon in May nisim 21, 2017 nikho chun KNO Defence Secretary TS Haokip lamkaina’n Songsang kho ah Kuki CSO holeh kho haosa ho panna’n kihoukhomna ananeiyuvin, Kukite daan dungjui leh kiloikhomna deidan tah in chamdel in kihoulhahna ana neitauve.

Kihoulhahna dungjui chun KNO in Seipu@Ishael in alamkai hina abanjom nalai ding in namdetna aneikit in chule kiloikhomna dang dang honjong hiche thuhi ahetpeh diuvin hetsahna aneikit in ahi.

Numei khat kikaplih jeh’a Moreh’a bandh um

Imphal, May 23: Indo-Myanmar gamgi Tengnoupal district noiya um social organisation hon numei natong khat kitha douna’a nidan 24 bandh abol jeh uvin Tuesday nikho’a niseh kimanchah sangtah in atongkha in ahi.

Moreh town’a dukan leh business mun ho akikhah soh in ahi. Moreh Gate No 4 ‘a motorcycle tol’a melhetlou mi 2 in Santi Devi (47) meithal’a akaplih ahi. Moreh leh MNamphalong bazaar akikhah in, bandh toson hon gari kang lamlen mun chom chom’a jingkah’a konin ahal uvin, ahin, nilhah nidan 8 ‘a kichai bandh kibol sung’a thilse asoh’e, ti thulhut akimupoi.

Shanti kitha thu’a kisemdoh JAC in themmona neiho nidan 24 sung’a book akibol louleh kiphinna kibol jom ding ahi, tin asei uvin ahi. Ipijeh’a Shanti kithat ahi het ahipon, police hon thukholna anei uvin ahi. Meetei Council Moreh, Hill Tribal Council Moreh, Manipur Muslim Council Moreh leh Moreh’a um cso chom chom in toltha demna’a bandh abol khom-u ahi. Gamkaiya bomb kisuhpoh, sepai ho kibulu na thilsoh jeh’a Moreh’a cheng ho sangtah’a lunghang ahitan, chule state sorkar in boina asuhlhap theilou jeh’a jong lunghang ahiuve.

Moreh’a numei khat kitha UNLF in demna nei

Imphal, May 23: Thingnoi kiloikhomna United National Liberation Front (UNLF) in Tuesday nikhon Moreh’a natong numei khat Monday nilhah nidan 4 don’a akitha na thilsoh sangtah in demna anei uvin ahi.

Mel hetlou thal-choi mi ni in Moreh Premnagar mun’a Shanti akaplih ahi’in, M Sak-hen, Director, Publicity department in soi akaina UNLF thuso’a chun Shanti hi India sepai hon mi amanchah uva athasah-u ahi’in, hiche thu hi Moreh mihon jong ahet ahi, ati. Gamkaiya chamlhatna ding’a pan lahna suhthip nading chule japip lungthim’a kichatna aumna ding’a India sepai ho natoh ahi, ati. Manipuri mihon thilsoh sangtah in demna neiyu hen, ati. Chule Moreh tolpi’a cheng nam jousen jong themmona neiho gotna achan nadiu thumna’a pan la uhen, tin thuso chun aseibe in ahi.

 

CM in High Court’a ding CIS national core version 1.0 hondohna nei

Imphal, May 23: Chief Minister N Biren Singh in Tuesday nikhon CIS (Case Information System) National Core Version 1.0 Manipur High Court’a ding’a Auditorium, High Court’a hondohna aneiyin, hiche hi judiciary kivaipoh athen nading’a ahi.

Chief Guest CM N Biren in ahoulimna’a, “Nikho hi Justice Administration’a ding’a ni loupitah ahi’in, hoilai mun’a kon hijong leh court ang’a um case ho CIS National Core Version 1.0 ‘a kon thuchen het thei ahi”, tin aseiye. Justice thu hetna hi thinglhang gam jouse heng alhun aaangaiye, tin CM in aseiyin chule Judiciary natoh na’a sorkar kikum louding ahi, ati. Mipi in amacham’a thutanna aneina thilsoh atam be cheh cheh demna thu aseiyin, hitobang thutanna hi iumsah jom uva ahileh gamsung’a ‘Law’ apanna umlou ahi, ati.

Pangei mun’a Judicial Academy of Manipur kisemdoh ding ahi, tin CM in phondohna aneiyin, chule Imphal East, Thoubal, Bishnupur, Churachandpur leh Senapati district’a Family Court aphat tin’a kihong ding ahi, tin aseibe in ahi. Chule state sorkar in Court judge leh adang dang tam sah be nading’a Centre sorkar heng’a asei ding ahi, tinjong aseiye. Chief Justice, High Court, Manipur Rakesh Ranjan Prasad in houlimna aneiyin, Case Information System (CIS) hi paperless court hiding ahi, hiche hi mijousen internet mangcha’a thutanna thah ho, case machal dan chule pending case ho dinmun ahetthei nading ahi, ati.

Supreme Court of India Judge, Justice Madab B Lokur in kin-gon’a judiciary system machal nading tohgon thu aseiyin, CIS National Judicial Data Grid noiya Judiciary hi gang ding chule man lhom ding ahi, ati. Mobile application jong kihong doh vahding ahitai, tin Madan B Lokur in aseibe in ahi. “Manipur gam’a angaicha hardware ho chohna ding’a dangka 4.75 crore sanction kibol ahi”, tin aseiyin chule Manipur sorkar in Law Commission asemdoh ding’in temna aneiye.

Law and Legislative Affairs Minister L Jayantakumar Singh, Judge, High Court of Manipur, Justice N. Kotiswar Singh, Judge, Manipur High Court, Justice Kh. Nobin Singh, Senior Advocates, Bar Council of Manipur member leh Manipur High Court official ho kin-gon’a apang uvin ahi. Kin-gon’a Case Information System (CIS) manding dan Manipur High Court website’a vetsahna jong anei uvin ahi.

 

Edn. Policy chungchang’a workshop kibol

Chandel, May 23: School Headmaster, Headmistress, Deputy le  Assistant Inspector hon Education policy chungchang’a sustainable approach aneitheina ding’uvin tuni chun District Council Administration, Chandel in Panchai Village Community hall’ a workshop khat abol in ahi.

Kinguon a chun Lalramsang Infimate, Addl. Deputy Commissioner, Chandel le Ts. Kothar, Addl. CEO, Autonomous District Council, Chandel in Jin-gun le Jin-ja’um touna aluo lhon in ahi. Technical session a chun Resource Person Bd.Maria, Asst. Professor in government school’a themjilna lampang  akhehsuh jing semphatna ding’a Head Master/Head Mistress in panmun alah ding dan ahilchen in ahi.  ST.Luckson Anal, Co-ordinator, Gospel Friends in society ding’a kiphaldohtah a natoh ding dan aseiyin ahi.

Galmanchah ho igamsung mama’a semna ding tohguon akichepi jing’e: Dr Subhash Bhamre

New Delhi, May 23: Government hin gamchom’a kon galmanchah choh ngaitalouva eima in ingaichat dungjuiya semna ding in pan hatah in akila jing’e tin Minister of State for Defence Dr Subhash Bhamre in tuni Indian Air Force (IAF) le Confederation of Indian Industry (CII) in aguon seminar a ahoulimna a aseiye.

“DPP (Defence Procurement Procedure) category sung’a hin Buy Indian-IDDM (Indigenously Designed, Developed and Manufactured) ti’a kiminvo  procurement category thah khat akikoilut’e. Hiche hin defence galmanchah ho igamsung mama’uva semdohna ding lampi ahinsemhoi be ding ahi.Private Industry ho toh long term basis a na akitoh theina ding in’ Strategic Partnership’ khat semdoh ding tohguon jong achelha jing’e” tin  Dr Subhash Bhamre in aseiye.

Strategic Partner semdohna ding’a hin lam chom chom’a kon expert ho aki koukhom in task force khat akisemdohtai tin jong Dr .Subhash Bhamre in aseiye. Chuleh  Capital acquisition jong private sector le public sector undertaking ho’a ding in kibangchet in akikoiyin, hiche hin defence galmanchah ho semna ding’a private sector/firm ho lunglutna apeh ding ahi. Policy thah dungjuiya hi public le private industry jouse in thaneina kibang aneiding’u chuleh  custom duty jong kibangchet’a apeh ding’u ahi. Chukitleh  ‘Make in India’ lolhingtah’a achelhah theina ding in tumasang’a galmanchah import kibolna’a custom duty ana kilalou chu tu’a pat’a kilapan ding ahitai tin Bhamre in aseiye.

Chief of Air Staff, Air Chief Marshal BS Dhanoa in  ahoulimna’a chun,” IAF modernized bolding tohguon hi ‘Make in India’ alolhintheina ding le gamsung’a galmanchah semho’n thil thah thah ahinpohdoh theina ding’uva kibol ahi” tin aseiye. Aman aseibena’a chun, tutu hin IAF in radar le galmanchah phabep India sung’a akisempantan , hiche galmanchah ho IAF in jong akimangchapantai ati.

Kinguon a chun CII National Defence Committee member, Pratyush Kumar in jong  houlimna aneiyin ahi.

MAHUD Minister in Imphal khopi sung cleanliness drive chelha ding’a sei

Imphal, May 23: Tuni (May 23) chun MAHUD Minister, Th Shyamkumar in Govindaji Temple semphatna natoh villhahna aganeiyin ahi. Temple semphatna natoh hi lhakhat sung’a jotheng hiding ahi ati. Vilna aneisung’a chun Govindaji Temple Board Chairman in-charge N. Barish in akilhonpin ahi. Compound sung’a garden leh parking lot jong kisemding ahi ati.

Alangkhat a Imphal khopi suhtheingna lampang toh kisaiyin Minister pa’n Imphal area sung drive kichelha ding lamlhahna (footpath) a dukan bolho jong hithei talouding ahi ati. Hiche keu hilouva lampi pam’a alam louva gari khaam hojong phal hitalou ding ahi tin MAHUD Minister Th Shyamkumar in aseiye.

Kwakeithel Bazar a SBI branch khat kihongdoh

Imphal, May 23: Tuni (May 23) chun Chief Secretary O. Nabakishore in Kwakeithel Bazar ah State Bank of India Branch thahkhat hondohna aneiyin ahi. Hiche kin a chun Chief General Manager of SBI, LHO, North East Circle, Guwahati, PVSLN Murthy, Commissioner of Information Technology Sumant Singh, IGP Clay Khongsai leh SBI official tampi jong apang uvin ahi. Hichelai mun’a Branch kihondoh hi mipi tamtah phatchomna hiding ahin chule tulai hi banking system hatah a ahung khantou toh kilhon’a tunia kingon kibol hi thil angaicha khohpen khat ahi tin O. Nabakishore chun aseiye. Chule SBI authority honjong gamsung’a banking service system phatah a achalhah sah diuvin temna aneikit in ahi.

ACC ‘a hehna kisem ho akisem jouva kon kiladoh theilou ahitai: ACC

Imphal, May 23: OSD, Anti Corruption Cell, Manipur, P Gojendro Singh in gamsung mihon ama ama phatchomna ding hilouva gamsung phatchom na ding’a hehna asem diuvin temna aneiyin ahi.

Hehna sem’a mikhat in hehna asemkhum hotoh kihoutoh na kaneitai, tia hehna asem alahdoh kit jouva ngehna anei ahi. ACC Manipur in thuso aneina’a chun, Cell in hehna ho alah hi hehna sempa boina suhlhap nading seh ahipon, gamsung’a nehguh suhmang nading jong ahi, tin aseiye. Chule hehna hi Cell’a khatvei akisem jouva kon ama ama department in thukholna apat ahi, ati. Phat chomkhat jouteng department in athil mudol ho ACC heng’a apehlut ahi’in, report akimu jouteng athu hi Chief Secretary lamkaina Screening Committee ang’a kipelut ahi, tin aseiye.

NIA court in NC Hills scam’a themmo kichan mi 15 ho gotna phongdoh ta

Guwahati, May 23: Special NIA court in Tuesday nikhon NC Hills, Assam gam’a themmo kichan mi 15 chung’a gotna thutanna aneitan ahi.

Juwal Garlosa, Niranjan Hojai leh Mohit Hojai hinkho lhung keiya songkul’a tang ding’a NIA court in thutanna aneiyin, chule RH Khan, Partha Waris, Jibangsu Pal, Fazendra Hojai, Debasis Battacharya leh Jayanta Ghosh kum 10 songkul’a tang ding’a thutanna anei uvin ahi. Alangkhat’a, Babul Kemprai, Sandip Ghosh leh Karuna Saikia jong songkul’a kum 8 umding’a court in thutanna anei ahi.

Dangka 1000 crore lhing NC Hill scam’a abon uva court in themmo achan ahi’in, thutanna hi thingnoimi chule government officer dan dihlouva natong ho ding’a lunggimna lentah ahi. Dima Hasao district machal nading’a kum phabep masang’a sum sanction kibol ho thingnoi ho phatchomna ding’a akiman chah jeh’a court in mi 15 ho Monday nikho’a themmo achan ahi. Monday nikho’a kinel kalna akichai toh kilhon’a court in Tuesday nikho’a gotna phondohna anei ahitai.

Case masa teni No RC 01&02/2009/NIA/DLI hi kal phabep masang’a kijihlut ahi’in, court in Dima Halam Daoga-Jewel (DHD-J) thingnoimi Niranjan Hojai, Juel Garlosa, chief executive member of the North Cachar Hills Autonomous Council anahi, Mohet Hojai, atohkhompi Golon Daulagapu, government officer RH Khan, Karuna Saikia, Jibangsu Paul chule contractor ni Phajendra Hojai leh Jayanta Ghose themmo achan ahi.

Hawala operator Malsawmkimi leh Vanlalchana jong gal-manchah joh’a court in themmo achan ahi’in, thukholna’a dangka crore khat asum’a chule gal-manchah tamtah jong mun ni’a kimandoh ahi. Phat chomkhat jouva DHD-J thingnoimi pa bail’a hungdoh’a politics lut ahi’in, social welfare department officer RH Khan songkul’a umjing ahi.

Barak Spring festival khumkha hita

Imphal, May 23: Chief Minister N Biren Singh in Monday nikho’a hondohna anei ni-ni umding Barak Spring festival Tuesday nikhon khumkha ahitai.

Kin-gon khumkhana’a Major General Suresh Kumar, YSM GOC chief guest’a apang’in, DC Senapati Athem Muivah president’a apang in chule tribe lamkai chom chom in pan ala uvin ahi. Festival hi chamna vetsahna ahi, tin Maj Gen Suresh in aseiyin, tukhang ho khonung kipana ahiding akinepna thu asiyin ahi.

Thusoh Lahchom

Shooting Competition

 Khuman Lampak Shooting Range a Manipur Rifles association tohgon noiya kibol 27 Channa All Manipur Shooting Competition a chun Ajay Huidrom in category 2 in first position analatan ahi. Hiche competition a hin Unit 5 a kon numei pasal agom in mi 183 in pan alauvin ahi. 25 meter men Individual Centre Fire Pistol NR, in Ajay Huidrom in first position alan ahi. Ajay Huidrom hi Imphal West District Rifles Association a kon ahin point 276 amujouvin ahi. Imphal Public School a kon Jupiter Asem in second position alan chule point 247 amun ahi. Chule third position chun Y. Rohoso apang’in aman point 240 amujouve.

Moreh thilsoh

Tulai Moreh khopi sung’a boina aumjing hi mi khonkhat Act East Policy doudal jeh hiding’in Chief Minister N. Biren Singh in aginmona thu aseiyin ahi. Hiche thu hi Manipur High Court a kingon kimanna khat a asei ahi. Tunaicha a Moreh town sung’a thilsoh hohi ginmo theitah ahi ati. Hiche chungchang thu hi Union Home Minister hengah lekhathot akibol tai tia aseitoh kilhon in jing nikho Churachandpur a tribal martyr ho lhahna kingon a apanthei apantheilou jong aseithei naipon ahi.

Rhino

Nagaon police hon Monday nikhon gamsa Rhino kap’a che mikhat operation abolna uva aman uvin ahi. Sa kap pa hi Rafiqul Islam (32), Hatipara kho, Rupahihat’a cheng ahi’in, Rupahihat leh Huria police station’a kon police team hon operation abolkhom na uva Juria Sutirpar munvel’a Islam amat-u ahi. 303 rifle meichang kap loulai 15 leh silencer a-inn tom leinoiya kisel kimudoh ahi, tin police hon aseiyui. Police hon asei dungjuiy Rafiqul hi tu masang’a jong Rhino phabep kikap na’a pang ahi. Lha phabep masang’a Jakhalabanda Police hon .303 rifle leh meichang 5 toh anamat-u ahi. Rupahihat police station’a tu-le-tu’a police hon thudohna anei uvin ahi.

SEACO

South East Asia Cultural organisation (SEACO) in June nisim 11 nikho leh temple pilgrimage agong in ahi. SEACO in gamsung in ana jui pathen dihtah umna temple venna ding’a hitobang kin-gon agon jing ahi’in, tourism industry machal nading’a hitobang hohi adopsang jing ahi. June nisim 11 kin-gon’a mipi apan nading’a temna anei uvin ahi.

Gari gu kiman

Janhi (May 22)  in gari gu khat police hon Lilong Ushoipokpi mun ah ana man uvin ahi. Hiche gari gupa chu amin  Md. Qutubuddin @ Riyajuddin (30) S/o (L) Rahimuddin Lilong Chingkham Makha apat ahi. Achunga police hon case Fir no.28 (1)2017 u/s 379 IPC ana pan khum taovin chule ama a konna T-shape master key khat,two wheelers 3 (Activa-1, Dio-1)  investigation kibolna a kon in   ana mudoh uvin ahi.

Editorial

Senapati a Sum kibunglha kit

                                       Senapati khopi’a ni 2 chelha a-ngavei channa ‘Barak Festival’ a dia Chief Minister (CM) N Biren in dangka Lakh 50 apeh ban’a Senapati district sung’a khantou machal natohna ho dia dangka Crore 202 (lakh sang ni le ni) peh dia aphondoh chu Festival hi pansatna’a kineiya district a sum alomchang’a bulhahdi tina ahi. Ukhrul district a ana kimangkhalou ni 5 lang Shirui Festival kimanna’a jong chun Ukhrul district khantouna din dangka a Crore-crore a sim’in State govt nin pehdin anaphongdoh in chuban’a hiche Festival manna di seh-seh-a sum kipe jong chu a Lakh-lakh a sim ahi. Hiche hi Naga te lungholna khat hidi ahi. Ajeh chu Shirui Festival jong chu Ukhrul district Naga hon eibolpeh un tia State govt kom’a athum u hilou, CM pa tah in “iboldiu ahi” tia anaseiya kon lha 2 sung’a kibol jeng ahi. Barak Festival hi amasapen hilou, Senapati district a Naga Tribe chomchom hon golnop keu hilouva kipunkhomna mun (platform) khatna anei u ahi. November/December langleh anakibolji hiche Barak Festival May lha a hung kibol jong hi State govt lungthim leh tosotna lut ahidan kilang ahi. Phat sot tah Congress in Manipur govt anapoh chu Manipur Naga te Egypt gam’a Israel chate um ana kibahsah jeng’u ahin tua BJP govt ahung kitundoh tolhon’a hi State govt injong Naga te lungholna dia amasapen’a kipa golnop lang khohsah-a hiche’a kon’a mihem le mihem kikah-a kimai ngalna leh kinaina lungput (emotional integrity) ahung umdohdi ti ahi. CM jingun’a kikouna khatna chu thu ngei-ngei seidi bou hilouva alomchang’a sum ijat hamkhat munathei ti jong hijeng ahi. Ahin CM jong chun ajeh beileh State govt phatchomna loudia dangka a-crore-crore a sim abuhlhah kitloudi ahi. Hiche kin hoa sum peh dia kiphongdoh hohi State govt aphongdoh leh ape’a apan vang’a a-sum podoh chu Centre govt mama hithou ahi.

                             Barak Festival jong hi khoveiya pat State Level Festival khat a mandi ti jong CM in aseiye. Kum masa langpeh-a Senapati district Karong kho a-kon National Level a Mixed Martial Arts Champion Issac Kareo jong CM Biren in Police Sub-Inspector post pehdin aphong’e. CM sei jouse le akipehdohna jouse Naga ten kipa aum’e tia anop pehdiu hinam ti jong um nalaidi ahi. Barak Festival Committee ho thusei ho chu asunglang’a akijep um mama, CM houlimna jong chutima ahikitne. Barak Festival akitivang’a ‘politics’ lut tah ahi mutheina chu Festival Committee hon “India govt leh Naga ho” kihouna thu aje u, PM Modi vailona’a hiche kihouna State govt in atosot dia “indirect” a asei (a-ngeh) u ahi. CM injong mihem umlaisea boina thu (issue) umdi mong, ahia seitoh a “chen khomdi/hinkhomdi” ahi ti chu Manipur keloudi thu “indirect” a aje kit ahi. Sum kibunglha (kibunglha-go) hi “paisa hallo (sum nei nungle’n) titheila hung hiloudi ahijeh in ichan hung phachomdi hinam seithei ahipoi.

Blankfire

Ikhopi houva nam sepai leh security force ho atambe laisea chamna um mo cheh cheh, meithal le bomb gin kiha jah cheh cheh, gamkai dang khatna jong thingnoi akina akitohmo umlou vanga kitha kimat umthou kit, ipi chu chamna hitam het thei ahijou tapoi.