ET May 23, 2017 News (Local, Thusoh Lahchom, Editorial, Blankfire)

ET May 23, 2017 News (Local, Thusoh Lahchom, Editorial, Blankfire)

1216
0
SHARE

CM in Barak Spring Festival hondohna nei; NH-2 Semphat na ding’a Dk. 301 crore phatsah

Senapati, May 22: Ni-ni umding Barak Spring Festival Chief Minister Nongthombam Biren Singh in Senapati’a Monday nikhon hondohna anei tan ahi.

Kin-gon hondohna’a CM Biren in Senapati Mini Stadium lentol’a hondohna aneiyin ahi chule thinglhang leh phaicham kikah’a kiloikhomna dinmun ahoilou jeh’a kin-gon’a jin gun ding’a kouna apeh-u kidang asahna thu jong aseiyin ahi. Ahin, hitobang’a pan kila hin achesa phat’a boina ho suhdamna ahi ding chule kiloikhomna phattou na hiding ahi, tin aseiye.

Barak Spring Festival hi state festival’a sem ding lunggel anei thu jong aseiyin, chule Senapati ‘a numei ho thil-joh nading mun sahna ding’a dangka crore 10 peh ding’in jong aseiyin ahi. Chule thinglhang gam’a water supply scheme peh ding’in kitepna aneiyin, chule Impha-Mao national highway semphat ding’in jong aseiyin ahi. Martial Arts fighter lehh Super Fight League champion Kario Isaac, Karong, Senapati district’a cheng pa alolhin najal’a state police department’a sub-inspector post kipaman’a kipe ding ahi, tin CM in phondohna aneiyin ahi.

Deputy Chief Minister Yumnam Joykumar in kin-gon hi kitilkhou na thei tah ahi, tin aseiyin ahi. Barak Festival hongdoh ding’a district headquarter mun’a mipi tamtah in kipah tah in Chief Minister hunglhun angah uvin ahi. Biren Singh alhun lhun’a Naga nam pon chom chom nga kipa vetsahna in thilpeh in ape uvin, chule anche leh thei phabep jong ape uvin ahi. Naga nam nga in vetsahna chom chom anei uvin ahi. PHED Minister L Dikho, Tribal Affairs and Hills Minister N Kayisii, Parliamentary Secretary, MLA leh civil chule police official hojong apang uvin ahi.

Chief Minister in aseibena ah Mao-Imphal (NH-2) semphatna natoh jong dangka crore 301 lutding’in National Highway Infrastructure Development Corporation Ltd (NHIDCL) ngansena akipe joutan hitobangma chun Senapati leh Ukhrul jotmatna lampi (Tadubi-Tolloi) a ding’in dangka crore 64 akigong e ati.

KRA toh kinahna akineipoi: KNF

Imphal, May 22: Phat masangjep akon’a nam sepoy Kuki National Front (KNF) le Kuki Revolutionary Army (KRA) in japi lunglinglao natah’a thuso ho’a kidonbutna aneijing tolhonin, tunin Kuki National Front (KNF) in achesa nisim 13, Lhuphul 2017 nia KRA thuso donbutna aneikit tan ahi.

KNF Information & Publicity Secretary, LH. Stephen min’a thuphon kimun aseina’a, achesa nisim 13, Lhaphul a KRA Information & Publicity Secretary, T. Simte min’a ana kiso chungchanga Kuki National Front in phamo akisan, hetthem loujeh hite tin donbutna le hilchen na akineije ati.

Aman aseina’a, KNF le KRA in khankho neitah in nam na ana kitongkhom jingin ahi, ajehchu, KRA anaphutdoh Ngailut umtah Lhakehtasa Pu K. Hangshing Nam adia pan lakhom dinga kihouna ana kinei ahin hichu KNF in tunichan geijin akichepi jingin ngailutna sangtah akinei jinge.

Hiti ahijehchun, KNF le KRA kikah’a kitomo nathei, kinah nathei le kihetkhel nathei ijat anaum jongle Nampi dinga pankhom jing thei teina din pan akila jingin, thina chan kitona chung jenga jong lethuhna ima ana kineipon ahi. Hinlah, vangset umtah in KRA in alamkai pu’u (Lhakehtasa) K. Hangshing thu jui talouvin KNF chunga khut lha na ana neijingun ahi ati.

  1. Stephen in aseibena’a, KRA in KNF lamkai le Nam sepoy phabep chunga thina chan khut lha na anei goh’u hilouvin, KNF kiloikhomna le mipi kah’a Organizer a pangdia kinganse (Lhakehtasa) Lenlal Haolai chung jenga jong ngailutna beihel’in thina chan geijin khut lha na i-khopiu Kangpokpi mun’a ana neijun, suhmil mon aumin ahijeng vangin Nampi makho ding gelkhohna le ngailutna jallin setnan ana kilethuh pon ahi ati.

“Hichan geija kihetkhel nathei le kinah nathei aum nungjeng in jong suhmil thei akisumil’in, (Lhakehtasa) Pu K. Hangshing toh Nam ngailutna jalla kihouna masot in setna’a lethuhna ima akineipon, chumalah’ in kingailutah le Nam natong khom hina jallin KNF Operational Area Kangpokpi mun’a tuni chanin chamdel in akileng khomin ahi”, tinjong aseibei.

Hiche chungchon’in jong Nam natongkhom hina le kingailutna jallin KNF in ana kium nasa Saikul gamkai jong KRA ana kidalhah’a tunichan’a don le kai chule hunam’a mipi suhgimna imacha jong kineilou ahi ati.

  1. Stephen thuphon chun aseibena’a, UPF le KNO in kilungkhat tah’a Nampi dinga Central Government toh kihouna anei hi KNF in akitosot jingin, Nampi lungtup molso ahitheina teidin lengkhatna pankhom ding deina jallin koima kiloikhomna le koima operational aea suhboina akinei khapoi ati.

Hinlah, vangset umtah in KRA in policy jatchom chom khengin atohkhompi KNF Operational area hunam’a toupha teiding agong jingin, hem le thal mangcha’a KNF anaphutdoh (Lhakehtasa) Pu Nehlun Kipgen pen na le chenna gam New Keithelmanbi area KNF touphana gamkol’a Tintong Battalion ahondoh geijin jong setnan ana kilethuh pon ahi.

Amavang, SoO ground rules toh kikal anahitah jeh in, lamkai cheng kihoukhomna JMG Meeting a ana kipodoh’in dandih louva chon ahijeh’un, Tintong Battalion chu anunglah doh diuvin Government in thupeh ana neijin hinlah tunichan’in aladoh pouvin ahi.

“New Keithelmanbi gamkai sunga Tintong Battalion hi KRA in akinunglah doh ding hi ipilam ipilam adin akul’in, hijehchun, nam adia thilpha deina jallin KRA in Tintong Battalion hi akinunglah doh diuvin KNF in temna akineije”, tinjong LH. Stephen in aseibei.

Alangkhatna, PRA thu’a thudoh adonbutna’a, KRA in Government to kikah’a themchan nading’a asei abol chu se akisapon, hinlah mipi angsunga KNF mosona dingle minsetna dinga PRA thu kihetmosah tah’a asei hi phamo akisan, jachat umjong akisahpeh in avel’a mipi ngol bolna le joulhepna hi aneikit tah loudin jong temna akineije ati.

  1. Stephen in PRA thu’a hilchetna aneina’a, PRA hi KNF dou ding le suboi dinga kiphutdoh ahi tihi mipi koima ahai aumpon, aphutdoh ho le atoson hon 2017 General Election masanga chu Saitu AC mipi ho kom’a anaphondoh sau ahi ati.

Achesa Bulte nisim 6 nia vangset umtah’a kikaptona ana umchun, social media ho’a mipin KNF le KRA akikapto in KRA mikhat athi’e tia anaso chun, KRA lamkai hon social media maman KRA akipangpoi, KNF le PRA kikaptou ahibouve tia anaseiju chu japi nahet ahi.

Hijehchun, KRA in PRA chungchang thu hi kichehsel’a ahet ahijeh in avel’a PRA chungchang thu’a KNF minsetna ding akisei kit le koiphudoh ham, kon atosot ham ti thengsel’a mipi hetthei dinga kiphongdoh ding ahitai tinjong LH. Stephen thuphon chun aseibei.

PRA kiphudoh dan le kisemdan adihlouna ahetthem jeh’a PRA hin dalha’a KNF khutna hung kipelut G. Songlung khomi (Lhakehtasa) Holkam Haokip chapa Jangkholam Haokip le aloipa chu Tactical Headquarters, KNF in kipahtah in lemna ana kineijin ahi tin LH. Stephen in aseije.

Aman aseibena’a, Sopite nin ahin dalhah aloi agol PRA a pang nalai honjong Nampi makho ding gelkhohna le insungmi lungmong le lhamonga inchen khosah bolthei louva umho ngailutna jalla ahung kinungle uva KNF khutna hung kipelut cheh din temna akineije ati.

Hetdia kulkhat chu, KNF le KRA in kinahna le kihetkhelna imacha akineipon, kingailu tah le chamdel’a umkhom na Likong suhnoh Kaikong um ahibouvin, Nam adia natong khom ding le pangkhom dia khankho neitah’a chemasa Ngailut umtah Pu K. Hangshing toh kihouna masot ding hi Nam damna le machalna hiding ahi tinjong thuphon chun aseibei.

Moreh bomb pokeh chungchang’a UKLF in demna nei

Moreh, May 22: Tunaicha’a Moreh le akimvel mun phabep a IED pokehna chungchang’a United Kuki Liberation Front (UKLF) in demna le phamo asahna thu aphongdoh in ahi. Hetthei khat chu achesa May nisim 8 le nisim 20 kikah’a chu Moreh sung’a bomb nga ana pohkeh’a  sepai ni in thina atuo’uva  6 hatah a kisukha ahi. Vangsetna chung’a vangphat na khat chu ahileh bomb pokehna thilsoh’a chu milham khat jong ana kitongkhalou ahi.

Milham ho sumkolveina mun ahilou le milham ho kititna mun’a bomb supoh ho hin ameidoi dan’u aphondoh’u ahi tin UKLF a kon kimu thulhut in aseiye.

Hitobang natoh hin kiloikhomna sung’a kichat le tijat na ahinpohlut keu hilouva mipi kineh holna jong atohkhah ding ahi. Chuleh thilsoh chungchang’a muona neiho’n achonvalna’u agangthei pen’a akisuhtheng uva, ngaidam athum ding’uvin thulhut chun ngehna aneiyin ahi. Ihamti’a chonvalna neiho akimatdoh’a ahileh  lungsetna beihel’a atotohchet’uva guotna kipe ding’u ahi tin UKLF in gihna khoutah  aneiye.

NH 2 lamlen semphatna natoh chelha jing; Motbung-Kangpokpi kikah lamlen kisemdan Kuki Innpi, KPI lungkimlou

Kangpokpi, May 22: National Highway 2 (Imphal-Dimapur lamlen) semphatna natoh akipat tolhon’a chele vahle hon gentheina umlouhel’a ajuotna mun’u damsel’a alhun theina ding’u nikho ahung naitan ahi. Sorkar thah in lamlen semphatna natoh ahin bol na chung’a Kuki Innpi, Kangpokpi in akipana aphongdoh in ahi.

Ahinlah Motbung le Kangpoki kikah’a lamlen kisemphatna natoh hi lungsa’ih umtah khat ahi. Kuki Innpi, KPI in lamlen kisemdan vetchilna aneina’a chun blacktopping kibol ho achesot lou ding kichentah in amudoh in ahi. Lamlen semna natoh’a quality maintain akibol lou ding’a hileh agamkai mihon natoh  ahin kha ding’uvin akilang in ahi.

60-Singngat MLA Ginsuanhau Zou in Haijang kho’a ‘Langdong Haolai Hall’ hondohna nei

B.Lalboi Gangte

CCpur, May 22(ET):  Tuni (May 22) sunkim nidan 12:00 velchun Chairman MANIREDA Society & Hon’ble MLA Singngat  Ginsuanhau Zou in Singngat Sub-division hopsung’a um Haijang Kho ah Langdong Haolai Hall hondohna aneiyin hitoh kilhon chun Pastor. Onkho Haokip in pathen heng’a Hall thenso na aneiyin ahi.

Langdong Haolai Hall hondohna kin kichai chun Haijang kho miten 60-Singngat Assembly Constituency a Politician ho MLA term ni kaidoh hetkhah leh ana umkhalou ahin Ginsuanhau Zo in MLA term nichan ahin poh tah jeh in ama kipapi na kin leh Pathen angsung’a Vangthum peh nakin aneipeh uvin ahi.

Kingon sungchun Khotol haosa Alun Haolai in tuni’a Langdong Haolai Hall kihongdoh hi 2010-11 BRGF Fund dk, 5 lac Section kisadoh ahi ati. Kiche kisah nadoh jochan hind dk.7 Lac akisulut in sanction 5 Lac kibol nalah Bill delnan dk.50.000/- akisulut in, Dk,2.5 Lac hi MGNREGS khosung’a Fund hunglut ho divert kibol jeh’a tukum a kijou theng pan ahi ati. Hall hondoh ding akiti phat in Hall sahna ding’a sanction bol Ex- MLA Hangkhanpau phat  lai ahin, ama khutnung aban’a MLA hon ahon nomdiu ham tin akigel in hiche kihondoh nading’a Sitting MLA pu tepna aki neiyin aman jong khankho neitah in Kachapan asah chu apa keiman  kahondoh chu ipi aset na um di ham ati dungjui’a aman tuni’a ahondoh ahi ati. Haijang kho hi 1979 kum a anakisat ahin 1974 a kipat MLA Election um akipat tunichan’a MLA kaidoh kilop peh khosung mite hon kiti ana kihe khapon tuni’a  Haijang  khosung miten Maicham sempeh naleh MLA lop peh na kibol hin khatchang phat chom nading leh ngaichat deichat neijeh’a kibol ahi poi ati.

Hiche kin’a  EX-MDC/ADCC Tongkai Baite, leh Nehthang Mate,  chuleh Sitting MDC/ADCC Grace Jamnu, Ngamhao Touthang leh  Suonchinpao Guite hojong apang uvin ahi.

Grace Jamnu MDC/ADCC in ahoulim na,  Haijang kho hi Khankho nei tah’a khosa ahi, Tukhang in khangthah hon khankho nunkho helouvin imoh umjiuvin pu le pa ten khankho ana ngai thupi u hi manthah nadi umlou ahina khankho neitah a hin ding dan tukhang a khang thah hon ijui diu hi thilkhoh tah khat ahi tinjong aseiye. Haijang housa pan khankho ahet jeh’a tuni’a Langding Haolai hall aminsah hi thil thupi ahin  a-itih khang’a manglou di tina kitungdoh ahi ati.

Ginsuanhau Zou in ahoulim na, Haijang khohi achung anoi kisuh tonal eh kisuhkhom namun kho ahin hiche kho hi vangse lou di ahi ati, chuleh kho ahin tuhin inn 55 ahin Singngat Constituency sung’a kaki thanget pe kho khat jong ahi ati, Chuleh Development  fund eilou leh local fund um masa khat joh joh’a  Tuni’a kihongdoh hall sem hoipe nading eilou leh Lentol semhoi nading’a aman chah diuva dk,5 lac sanction kipeding ahi ati, Tahsan um kho leh thudih, nunkho khankho he kho chu suh pelhing ahi ding’a  pan kila ding ahi ati.

Mitam tah in Ginsuanhau Singngat MLA pa Lekha themlou tin neidem vin, neidem tah hih uvin lekha kana Kasim lou jehjoh ahi ati, Ipi jeh’a BJP kilut ham iti leh constituency sung mipi ho gilkil dangchah’a umlou nading leh gamsung’a development got nalou ding leh gamsung simphat nading’a kilut ahi, MANIREDA noiya 1st phase ading in Singngat Constituency ading in  Singngat, Behiang. Songdoh leh Sangaikot ho ading  solar light project akisim in jo ahiteng leh Centre ah DPR kipelutding ahi ati, chuleh Centre in alungtup chu 2020 kum akipat electric mang chata lou’a  solar vahding kiti hi achepiu khat ahi ati, Chuleh hiche Department akon’a Thinglhang district 6 ho gelkhoh masat hiding ahi ajeh chu Phaitol sung kolphe meivah kining tah’a vah soh ahi atai ati.

 

3 Bills jeh a thi leh akisukha ho tompon JPO in homdoh; Martyrs ho pumbuh kihal kit

Lien S. Gangte

Ccpur, May 22: Ahunglhung ding May 24,2017 nikho leh 3 bills jeh-a thina toh mi 8 ho vuina kin umding ahi tah jeh in May nisim 22, 2017  nilhah lam nidam 2:30 vel in Joint Philantropic Organisation (JPO), Ccpur in YMA Hmuia Veng munnah mithi 9 leh aha kisuh khah dehset mi 8 ho kommah tompon leh kithopina sum kidong ho achaina keidin pehdohna anei tauvin ahi.

Martyrs insung mi ho dangka 50,000/- cheh apeuvin chuleh aha kitoh khah mi 8 ho chu dangka 20,000/- cheh apeuvin ahi. Masang jong chun mithi ho insung mi ho kom’ah dangka lakh 5 cheh ana peuvin ahi.

Chuleh May nisim 22,  2017 jinkah nidam 2:00 vel chun Hiangtam Lamka mun’a um Salpha Pumbuh a 2-veina channa ding in hal in aum kit in ahi. Akimvel a um ho’n meikong amu phat uvin aphelmit man uvin ahi. Thusuo kisut chan in koiho khut nung ahi het ahi nai poi.

Alangkhat ah, Manipur Govt. leh JACAATB in kinop tuo na anei toh kilhon’a ahung lhung ding May nisim 24, 2017 jinglam nidan 11:00 apat Martyrs ho vuina kingon “Last Rites of the Tribal Martyrs” chu Lamka Public ground mun’a um ding ahi. Hiche kingon a hi Martyrs ho ja vetsah na’a Traditional Gun salute um ding, Martyrs insung mi ho ading leh akitongkha ho’a ding a taopeh na Rev. K. Hangnung, President, Baptist Partnership Ministry NTBCA in anei ding ahi. Chuleh, Vanlalrinliana, President, Mizo People Convention; Chinlunthang, President, United Zou Organizaion; B. Dongzalian Simte, President, Simte Tribe Council, H. Pauzacin, President, Tedim Chin Union leh T. Khailianthang, President, Young Paite Association ho’a kon holim na um ding ahi.

Moreh khopi a Nupi khat melhetlou hon kap lih; lunglhai lou vetsah na a nidan 29 bandh umding

Moreh, May 22: Moreh gate No. 2 ah May nisim 22, 2017 nilhah lam nidan 3:55 velin meilhei  nupi khat melhetlou pasal ni bike a hung kipo teni chun thal in ana kap lhon in ahi. Nupi nuchu Moreh hospital lhut ana hin hinlah damdoh jou talouvin ahinkho anabei tan ahi. Thina toh nupi nu chu Arambam Shanti Devi (45) W/o Arambam Ibobi, Moreh Ward No. 4 a pansa a Moreh leh Namphalong kikah a pot pole a pang chule Indo-Myanmar workers Forum a member jong ahi.

Hiche thilsoh lung lhai lou vetsah na a nidan 29 ( May nisim 22, 7:00 PM apat May nisim 23, 12:00 AM) Moreh Bandh umding ahi.

Chule thulhut kimu dungjui in Manipur Govt. akonna akingeh ho bulhit ahi masang se a thilong kila lou ding chule nidan 48 sung’a Police hon mithat ho amat doh lou uleh akhoh jo cheh a kiphinna kibol ding ahi tun jong Moreh Khopi sunga kiloikhom na Hill Tribal Council G/Secy.  M. Singson in akon kimu thulhut chun aseiye.

MCS officer khat sorkar in panmun lentah tuh ding’a ngansena anei jouva officer len hon suboi’u

Imphal, May 22: Manipur  sorkar in  January nisim 1 nikho’a Deputy Labor Commissioner panmun luo ding’a ngansena anei  MCS Grade,1 , P Sana hin official len ho leh department officer ho’a kon suhboina atuo jing jeh in tunigei hin apanmun aluo theipoi tin aloinu P Bokullei Devi in tuni achenna mun Langol Zone 4, quarter No.4, type A a thuso miho toh akihoulimna’a aseiye.

Deputy Labor Commissioner panmun hi Th Shullochana atohmun’a kon akichol’a pat a’ong’a ana um ahi. DP in tunaicha’a department chom chom’a panmun chom chom tuh ding’a MCS 9 ana lhendoh ahi’n, MCS 9 lah’a 8 ho hin atohmun cheh’u akijuot’uvin ahinlah P Sana hin alen alal ho’a kon doudalna atuo jing jeh’a tunigeiya atohmun aluo theilou ahi.  P Sana in atohmun aluo ding doudal ho chu Chief Commissioner of Labor Department, Additional Chief Secretary, Shuhel Akhtar  chuleh ama le ama Deputy Commissioner of Labor Department dan’a kisei E Tomba ahilhon’e. Authority concerned in hiche thu hi agangtheipen’a asuhlhap ding in P Bokullei Devi in ngehna aneiyin ahi.

 

Chandel District khantou machalna ding’a ADC Chandel holeh mipiten toukhomna nei’u

Chandel, May 22: Chendel district khantou machalna ding’in Chandel ADC lamkaina noiyin district CSO leh kiloikhomna chom chom hotoh toukhomna khat ananeiyuvin ahi.

Tuni (May 22) Chendel district Headquarter a um Bazar Board Office toukhomna a chun Autonomous District Council Chandel, Chairman Lhukhosei Zou, Vice Chairman Th. Joy Lamkang, Executive Member-Education & PHED, Chairman Headquarter Bazar Board Chandel, Ts. Willingson, Executive Member, Tribal & Hills Affairs Morung, Executive Member Agriculture and Horticulture Ts. Kanlun, Advisor to Chairman Ch. Meshil @ Ranjit, ADC Chandel Member Morungphun, Khupnen, Chief Executive Officer Darshinsho Aimol, EO Ts. Kothar chule staff dang dang, Bazar Board, Naga Chiefs Association Chandel, Anal Chiefs Association Chandel, Maha Ar ea Chiefs Association, Anal Lenruwl Tangpi, Anal Sinnu Ruwl (Anal Women Union), Chandel, chule Bazar a dukan bolho jong apang uvin, lunggel seikhomna jong aneiyuvin ahi.

Kum tampi jou 2010 a election kibolna a kon’a Autonomous District Council kiphutdoh ahin ahinlah khamgahna aumjeh a Chandel District Headquarter a um Office a touthei louva Imphal Office joh a atoujeh uvin district sung khantou machalna natoh hojong deibang tah in achelha theiji poi atiuve.

BJP vaihomna hin thinglhang gam ho khohsahna akibe in hitoh kilhon chun Chandel district ADC Chairman, Vice Chairman, Executive Member ho chule member dang dang hojong Monshangpantha a um Office a tou uva mipi le district khantou machalna ding’a natoh hojong pontho tah a abolpan diuvin akikhom mipihon ADC ho hengah temna aneiyuvin ahi.

Chandel district Headquarter Bazaar Board in kailhang a Toilet, dustbin, twi lonna ding, donding le manchah ding twi hahsatna toh kilhonna handpump khat jong koiding in ngehna aneiyuvin ahi.

Khamgahna aumjeh a District Headquarter a office hung kikai theilou ahi tin ADC Chandel Chairman Lhukhosei Zou in aseiyin Manipur thinglhang gam jousea khantou machalna natoh ho hinpandoh ding chu District Council tailou adang aumpoi tinjong aseiye.

Centre leh State a BJP in vai ahop ahitan, Chief Minister injong thinglhang gamho akhohsah dang jong aseiyin hiche toh kilhon’a thinglhang gam a dia khantou machalna aumthei khahle tia Congress dalha’a BJP kanajop ahin Congress kavetda jeh leh kangilut loujeh ahipoi tinjong aseikit in ahi.

Chandel district Headquarter a twi ninglhinsah nadia natoh hojong jing nikho kon’a kipan ding ahitan chule adang dang angaicha natoh hojong hung kibolpan ding ahitai ahi.

Tuni toukhomna kichai chun Monshang Pantha a um ADC Chandel Office vilna aneiyuvin ADC Chandel noiya um department chom chom a natong hotoh jong akimuto uvin hiche a chun Offical holeh staff hon akisachaisa Office leh Quarter hojong hondohna neiding’in temna aneiyuvin ahi. Hiche keu hilouvin building lui hojong semphat ding, donding twi ninglhin sah ding, jotmatna lamlen semphat ding tiho chungchang in ngehna aneikit uvin ahi. Ngehna le temna ho suhbulhit ding akingaito laitah ahi tia aseitoh kilhon in ADC Chandel Chairman Lhukhosei Zou in official holeh staff hon kitah tah a na atohjing diuvin athumop kit in ahi.

Chujouvin DRDA Chandel Office vilna aneikit in hiche a chun official hotoh phat chomkhat houlimna aneikhom kit uvin ahi. MGNREGS, IAY leh scheme dang dang ho chungchang’a hung fund hojong pending umsah louva akinthei pen’a ahopdoh jeng diuvin official holeh staff ho hengah aseikit in ahi.

Thadou Inpi Tengnoupal District hondoh hita

Kangpokpi, May 22: Thadou Inpi GHQ makainan Lhaphul nisim 20 nichun Moreh S.Moljol vangkho’a Thadou Inpi Tengnoupal District phudohna le lamkai ding lhenna aumin, Thadou Inpi Tengnoupal District chu lolhingtah in hondoh in aumtan ahi.

TI-GHQ, General Secretary, Kamboi Kipgen min’a thuphon chun aseina’a, Thadou Inpi Tengnoupal District phudoh ahitolhonin lamkai ding lhenna jong ana umin, amaho chu- Seijathang Haokip (Chairman), Nehlam Kipgen (Vice Chairman), Jampao Haokip (General Secretary), Lenboi Lhouvum (Joint Secretary), Lalcha Lhouvum (Finance Secretary), Seija Singson (Treasurer), M. Paokholun Haokip (Information Secretary) ahiuve.

Akilhengdoh lamkai cheng chu term khat a din TI-GHQ President, YT. Thadou in Pathen henga taopehna le namdetna aneitan ahi.

Thadou Inpi Tengnoupal District hondohna kin chu Ngailut ankong khumkha anahi.

TYA executive thah ho ngapdetna kinguon kibol

Kangpokpi, May 22: Janhi (May 21) chun Hmar Veng, Churachandpur’a Thadou Youth Association executive member thah ho ngapdetna kinguon ana chelha in ahi. Athahbeh’a kilhengdoh TYA  executive member ho chu Lhingpichong, Nengpichong, Lamneihoi, Chinneikim, Nemneihoi chuleh Lalsat ahi’uve. Amahoc heng chu Mangcha Chongloi, Speaker TYA-GHQ in kihahselna aneisah’uvin ahi.

Akilhengdoh member thah ho chu Helal Sitlhou, President TYA-GHQ; Thangminlen Haokip, Secy. General, TYA-GHQ le Mangcha Chongloi, Speaker TYA-GHQ in namsung’a tutu’a boina ho suhlhapna ding’a pan alahna ding’uva tilkhouna anei’u tolhon in TYA bidoi le lungtup ho  ahilchen’uvin ahi. Kin khumkha na ding in TYA-GHQ Speaker in pathen heng’a taona anei in ahi.

Awareness umlou jeh’a Tml dist. Sung thingkeh le gamsa kemjing

Tamenglong, May 22: Tamenglong district sung’a gamsa ho le thingkeh aniseh’a akemjing hi gamkai sungmiho’n awareness aneiloujeh’u ahi tin Wild life activist,  Daniel Marcus Pame le aloinu Galina Panmei in alhon’e. Daniel le aloinu hin achesa kum khat sung’a chu gamsa ho venbitna ding’a pan ahinlah jinglhon ahi. Amani hin kailhang dung’a kijoh vacha le gamsa ho sum le pai itchalou hel’a achoh ji lhon’a gamlah mama a agalhadoh ji lhon ahi. Chuleh gamsa le vacha phabep jong Zoo a ding in atohdoh lhon in ahi. Athilpha bolna chung lhon’a hin mipi a kon in seisetna le doudalna tampi atoh jing lhon in ahinlah amani hin japi seiset le doudal na jong ginglou hel in gamsa ho huhbitna ding in na atongjing lhon in ahi. Mipi in gamsa le thingkeh manlutdan ahetthem ding’u hi ahinkho lhon’a atup le adoi lhon lah’a alenpen ahi.

Edn. Min in Ukhrul sung’a um school phabep vil

Ukhrul, May 22: Education Minister, Th Radheshyam in tuni Ukhrul District sung’a um school ho avilna’a chun EGS Level’a kidomtou Myotang Primary School chu akisahna ding mun jong hilou mun khat’a ana kisah amudoh in ahi. Myotang  Primary School hi  Mayotang a kisalouva Longthang Hundung joh’a ana kisa ahi. Alangkhat’a Kharaphung Primary School  mol chungvum a akisah jong Edn. Minister in agamudoh in phamo asalheh in ahi. 2016 kum’a SSA noiya kisadoh School ho jong tunigeiyin natonglouvin aum’uvin ahi.  Kajari Pung High School compound jong avel’a cheng hon anehlut’uvin ahi. Edn. Minister chun Leishiphanit High School, Pettigrew College, Modern High School, Greenland Primary School le Tungrei Primary School jong agavil in ahi. Th Radheshyam in aseidan in, school kisa jouse hi SSA dan le mol to kijuiya kisa ding doltah ahi’n, SSA dan le mol juilou ho chung’a action kilading ahi ati.

All Manipur Assistant Election Supervisor DPC  Faced Candidate in gihna nei

Imphal, May 22: 2016 October lha’a ana kibol Assistant Election Supervisor a panla khangdong ho’n sakh sihtwi bang’a anga’u final selection result tunigeiya phondoh ahilou jeh in candidate ho’n lungdon ngahna in kiphinna bolding tin kilolna anei’uvin ahi. Hiche thu hi All Manipur Assistant Election Supervisor DPC Faced Candidate hon tuni Manipur Press Club’a thuso miho akimupina’uva aseiyu ahi. Amahon aseidan un, Final selection result hi May nisim 30 masang’a akiphondohlouva ahileh kiphin na khoutah kibol ding ahi ati’uvin ahi. Kiloikhom thalheng a thusei W Netaji in aseidan in hiche thu hi May nisim 15 nikho’a chu CM N Biren heng’a an akipodoh ahi’n, ahilah tunigeiyin donbutna kichehtah akimu naipoi ati.

Yairipok PHC a kon transfer kibol doctor ho thalheng akisol lou jeh’a mipi in gentheina toh’u

Thoubal, May 22: Thoubal district sung’a um Yairipok Khoirom PHC a kon doctor li (4) transfer kibol ho thalheng ding  akikoi lou jehin akimvel’a cheng miho’n gentheina simsenlou atoh’uvin ahi. Authority Concerned in hiche chungthu hi agangtheipen’a asuhlhap ding in akimvel’a cheng hon ngehna anei’uvin ahi.

Gamsung in International Day for Biological Diversity nit

Imphal, May 22: Biodiversity and Sustainable Tourism’ ti thuppi in Directorate of Environment in International Day for Biological Diversity Manipur State Film Development Society (MSFDS) auditorium hall mun’a amang uvin ahi.

Chief Guest ‘a pang Forest and Environment Minister Th Shyamkumar in nikho hi biodiversity ven ding tosotna’a kibol ahi, tin aseiyin, chule mihem hon thilsem (nature) ho aman dan hi gam-leh-go venna ding’a kilep toh thei louva um ahi, at. Environment Directorate in khovei’a kon gamsung mun chom chom’a mipi hetthei nading kin-gon agon diuvin temna aneiyin ahi.

Kin-gon’a president’a pang Shambhu Singh, Additional Chief Secretary (Forests and Environment, PHE, AR & DG-SAT) in ama hinkho’a atokhah thu ho aseiyin ahi. Kho hoitah hi gamsung in asuhset na’a pan lentah anei ahi’in, asuse’a themmona nei ahi, ati. Professor W Vishwanath Singh, Life Science Department, Manipur University resource person’a apang’in kin-gon thupi dan leh akipat dan thusim aseiyin, United Nations General Assembly in 2011-2020 kum hi United Nations decade on biodiversity tia phondohna anei ahi, ati.

Thoubal district hospital’a OT service kihong pan kit ta

Thoubal, May 22 : District Hospital Thoubal mun’a Operation Theatre Service Monday nikhon pat ahitan, kum 20 tobang OT service ana umlou ahi.

OT service akipat nikho kho’a LSCS leh orthopaedic natna nei khat Dr K Lokendro, Additional Health Director, H Ranjit, P Shyamsunder leh OT in-charge, district hospital, Dr H Subhashchandra panna in doctor team hon lolhing tah in operation abol uvin ahi. August nisim 28, 2013 kum’a district hospital kihong pan’a lhakhat’a operation 100 vel abol jing-u ai. Ahin, May nisim 1 nikho’a kon anesthetic thil aset jeh’a operation hospital’a kibol talou ahi.

Machine ho akisem phat jouva Monday nikho’a kon operation lolhing tah’a kibol pan kit ahi. Chule aphalou machine hohi gampam’a kon alah-u ahi.

Income tamna ding’a industry khantou sahding ahi: Th Bishwajit

Imphal, May 22: Commerce & Industries Minister Th. Bishwajit in gamsung income sem hoi nading’a industry machal sah ding agel thu Banana Fibre Development Centre kihon doh na leh ni—5 Novel Products thu’a Training Programme hondohna aneina’a aseiyin ahi.

CSIR-North East Institute of Science & Technology Branch Laboratory, Lamphelpat, Imphal mun’a kin-gon kibolna’a Bishwajit in Industry Department thupi dan thu aseiyin ahi. Banana Fibre Development Centre kihondoh hi loubol miho ga tamso cheh nading’a akithopi hiding ahi, tin aseiyin chule stevia kiti lou’a kimang tamtah atu diuvin aseibe in ahi.

Bamboo Chipping Mill sorkar in acho jing ding ahi, tin aseiyin chule cancer douna Dragon Fruit tu ding jong hatah’a asei ding ahi, ati. Revenue Minister Karam Shyam in kin-gon’a ahoulimna’a CSIR kibol hi mipi phatchomna ding ahi’in, kihinso nading, lousoh ga atam nading ahi, ati. Kin-gon toh kisaiyin CSIR-North East Institute of Science & Technology Branch Laboratory pamphlet jong hondohna anei uvin ahi. Director CSIR-NEIST Jorhat, Assam Dr. D Ramaiah injong Agro-Technology thu’a houlimna aneiyin, training programme’a mi 80 vel in pan ala uvin ahi.

Guru Pujah nikho’a thingnou tamtah kiphut; Guv’ in tilkhouna thu sei

Imphal, May 22: Guru Pujah toh kisaiyin Raj Bhavan mun’a Manipur Governor Dr Najma Heptulla leh Raj Bhavan staff hon Monday nikhon ‘Clean and Green’ Cleanliness and Tree Plantation Campaign abol uvin, agon’a thingnoi 210 atu uvin ahi.

Governor in thingnou masapen Raj Bhawan park’a atu in chule anichanna thingnou atu hi aumtalou Anil Madhav Dave, Minister of State (IC) Environment, Forest and Climate Change, India government min’a atu in ahi. Dave toh Governor Heptullah in Loktak Lake hi north east’a Lake lenpen’a sem doh nading’a pan alah ahi’in, ama geldohna’a thingnou (Bokul: Mimosops Elengi) atu ahi. Governor in thingnou kiphu athupi dan houlimna aneiyin chule Manipur gamsung hi ‘Clean and Green’ gam so ding’in aseiyin ahi.

Governor in park hi Children Park’a semdoh nading tohgon anei ahi. Gamsung’a lou’a kimang thingna louna (medicinal plants) chi chom chom 500 val um ahi’in, chule sahei pah ho ihe pha pouvin, chapang hon gam-leh-go angailut thei nading uva tuni’a kin-gon kibol ahi, tin aseibe’e.

Thusoh Lahchom

 

Community outreach

All Manipur Students’ Guardians organization leh Singjamei police station hon Monday nikhon Imphal Public School, Canchipur mun’a Juvenile Justice )Care and Protection) Act leh POSCO Act thu’a community outreach programme abol uvin ahi. Teacher leh class X simlai mi 200 vel in pan ala uvin, jin-gun’a AMSGO secretary N Ingocha, senior teacher Henry Singh leh officer in-charge, Singjamei Police Station apang uvin ahi.

Blood donation

Tuni chun Raj Medicity le JNIMS Blood bank guon na noiyin North AOC a um Raj Medicity sung’a blood donation camp ana kibol in ahi. Blood donation camp hi Corporate Social Responsibility Scheme noiya kibol ahi tin  Raj Medicity, Managing Director, H Rajen in aseiye.

Nepal PM

Tu-le-tu a Nepal Prime Minister Pushpa Kamla Dahal Prachanna in tu hapta sung’a haina lekha apeh-a,  Govt. thah semding Nepali Congress, Sher Bahadur Deuba a-ot ding ahitai. Hiche hi kum masa laija local election kichai tengle CPN in Nepali Congress mun a-ot ding chule Nepali Congress in Govt asem ding tia kinoptona anei dungjui uva ushpa Kamla Dahal in Wednesday nikho leh Inpi a haina lekha apeh a Sher Bahadur Deuba a-ot ding ahi tai. (Source:NT)

Ju kiman

Additional SP Priyadarshini Laishram lamkaina’a Imphal West police team hon Monday nikho’a GP Womens’ College gate maiya operation abolna uvin ju tamtah aman uvin ahi. Thulhut kingah jing nalai ahi’in, ahin, tuchan geiya hi thulhut dungjuiya police team hon India gam’a kisem ju truck khat amat-u ahi.

Hepatitis

Thoubal, May 23: Tuni chun MNP+, Mailand, CSR Project le Kabrang Hill Village, Thoubal District in kitho in one-day hepatitis awareness program abol lhon in ahi. Kinguon a chun MNP+ Spokesperson L Bimol in houlimna aneiye.

Tongbram Shyamkumar

Phadibi Road Students Club le Phaidibi Road Women’s Development Organization, Utlou in tuni chun MCS, Tongbram Shyamkumar kipapina le vailhunna kinguon abolpeh in ahi. Kinguon a chun Utlou Gram Panchayat, Th Basanta; DMO, Bishnupur, L Rishikanta le Th Nabakeshore in pan ala’uvin ahi. Kinguon a chun Th Basanta in khangdong ho lekha lam’a alunglutna ding’uvin tilkhouna aneiyin ahi.

Editorial

Moreh leh akimvel’a Bomb pohkeh jing

                                       Achesa ni phabep sung’a Tengnoupal district sung Moreh khopi leh akimvel’a Bomb khulah lah-a kilha jeng hi ipipen doina ahitadem ajat-jat gelthei in aumdoh e. Kwatha jotna lampi a Bomb a kibuluna chu Indian Army holeh Police Commando ho kibuluna mong ahidung juiyin athi elh akitongkha jong India Army (Territorial Army) leh Manipur Police Commando ho ahiuve. Hichu thuchuom ahitai. Ahin Moreh kholai sung’a Bomb khulah lah-a kilha hovang sepai/police ho thanadi ti ahiloudidan chu mi umpetna bomb kisupoh hilou, mi umloupet hoa kisupoh ahi. Hichu mi suh gichatnadi leh gihna ham hidi chuleh abolhon hilai mun (kho le veng) a-jong ka um un kanopnop kabolthei uve ti tahlangna khat jong hidi ahi. Kuki thingnoimi ho hidiuham, phaicham thingnoimi ho natoh joh hidiham ti jong kkhat ahitan, akoi hileh kiphonna neijong umkitlou ahi hi akhohna ahi. Angaina’a chu kiloikhomna khatnin hitobang natoh aneileh keiho kahiuve tia kiphonna aneijiuva ajeh jong aseitha jiu ahi. Tua hi koima kiphonglou ahi. Bolho akiphonlou jeh uva hitobang natoh hi mi meisan ho natoh ahi tia demna nei tamji ahi. Kuki thingnoi hon jong khatvei lang chun mi khat le ni ‘compound’ sung’ah bomb (hand grenade) anaseplut un hichu sum demand thu to kimatna nei ahijin abolhon jong kiphonna ananei uve. Ahin tulah a bomb pokeh matchetdan hi ipi kibolna hitam asunglang’a ahe umjongleh hiche ho natoh ahimong’in ajeh jong hiche ahi tia seithei umkitlou ahi. Hiche jeh-a hitobang natong hon hiche nikho kah-a kiphonna aneilou uleh tia Civil kiloikhomna Imphal-Moreh lampi (NH-2) bandh boldia gihna neiloi jong um ahi.

                                 Moreh khopi sung’a bomb ging hohi Security Forces (Assam Rifles leh Police commando) ho chouna ham, ahilouleh Security Force ho Mogeh khopi sung’a tam koulut theina di ‘policy’ (lungthim/duha) ham tia geldan neiloi jong aum’e. Moreh a Police Commando ho ana kitollut uchu phaigam thingnoimi ho suhthipnadi ti anahin ahinlah amaho (commando) ho khopi sung alutjou uva pat bomb pokeh hi kinon jepmin akilang’e. Hijeh a chu akhosung’a cheng mipi hon kitoh tah-a pan alah uva asunglang thuguh aumkhahleh khuoldoh a tahlangdi ti ngaito joh a phadi ahi. Hitobang umchan natoh kadeipouve tia bandh hamkhat bol chu phachomloudi, bandh akichai teng angaingai hidi ahi. Moreh khopi sungleh Moreh lampi hi sumkol veina lang’a munhoi munpha ahijeh-a khopi sung chenglutdi kigo jong tam cheh cheh, police leh Army hojong khopi sung’a toudi leh Moreh lamlen’a toudi thanom tam jing, mipi hon kiphinna’a hiche lampi kha di ti jong thil ngeh khat muna bailampen’a ahanei jep jep u ahi.

Blankfire

Ima helou honjong mi thusei ladom henlang thil he honjong ahelou ho ipilampi khat ah kaseipeh theidem ti umleh mimal inchen louchen hihen, kho le veng kivaipohna hihen, society pumpi chedan hileh ajeje umdi ahi. Ima helou ho kichihsahpen, aheho jong kichihsah cheh chu hoia ba!