ET May 22, 2017 News (Local, Thusoh Lahchom, Editorial, Blankfire)

ET May 22, 2017 News (Local, Thusoh Lahchom, Editorial, Blankfire)

774
0
SHARE

Cabinet meeting um; Tribal Martyrs ho ex-gratia lakh 5 leh asopi ho natoh peh dia phatsah

Imphal, May 21 (DIPR): Tuni (May 21) chun Chief Minister lamkaina’n Chief Minister Secretariate ah Cabinet meeting anaum in ahi. Hiche a chun gamsung’a thingnoimi surrender kibolho chungchang in kihoulimna ananeiyuvin ahi.

Akihoulhahna’u dungjui in Chief Minister N. Biren in thingnoimi surrender kibol ho masang’a stipend dangka 4000 anamu u chu tua kon’a kum 3 sung dangka 8000 amudiu ahitai ati. Dangka 8000 amulah uva dangka 2000 hi ration money a cheding ahi ati.

Government in thingnoimi surrender kibolho dia One time financial grand abol dangka 2.50 lakh a kipat lakh 4 kalding ahitan hiche sum hi kum 2 sung fixed deposit a umding ahi ati.

Rehabilitation camp a aumsung uva surrender kibol hohin Medical reimbursement  75%  chan  akibol  theidiu hiche keu hilouva tahsa le thepna (physical/education) lang’a lhinjouna neiho security force ho’a jong natoh amutheina diu lampi jong aume ati.

Tuni Cabinet meeting a chun Legal Advisor to Chief Minister N. Kumarjit Singh Advocate General of Manipur hiding’in phondohna jong aneiyuvin ahi. Chule media Advisor leh Coordinator to Chief Minister aumna ding’a ngehna anaum hojong anaphalpeh uvin ahi.

Media Advisor hin government natoh leh tohgon jouse mipi anga’a media thalah’a ahin hetsahji ding ahi. Chule Chief Minister khel a Coordinator  in government department hotoh kihoutohna aneidiu chule natoh hojong abolkhomji diu ahi.

Achesa August nisim 31, 2015 a Churachandpur a eimi anathi hojong asopiho State Revenur Department a Grade III/IV natoh pehdin jong kihoulhahna aneiyuvin ahi. Hiche keu hilouvin ex-gratia dangka lakh 5 chieh jong kipeding ahi tinjong kinoptona aneiyuve.

Tuni kihouna a chun ahunglhung ding June nisim 5-7, 2017 sung State Legislative Assembly kihouna neikit ding’in kiphatsahna aneiyuvin hiche a chu Manipur Goods and Services Tax Bill, 2017 pass kibolding ahi tin cabinet chun aseiye. Masang’a anakisei bang’a Imphal Municipal area ho tailouva adangse lha 6 sung  disturbed area hijing ding’in jong phatsah aneiyin ahi.

Alangkhat ah gamsung State Co-operative Department a Technical and Promotion (TP) Cell jong khanletsah ding’in tuni Cabinet chun phatsahna aneitan ahi.

Manipur Municipalities (11th Amendment) Bill, 2017 draft anakibol jong phatsahna aneiyin ahi.

Gamsung lamchom chom a khantouna ding’a Manipur Infrastructure Development Agency (MIDA) semdoh ding aphapoh uvin hiche agency hin a concerned Ministry a DPRs leh concept ho avettup diu chule fund chungchang jong aboipi diu ahi. Hiche agency hi Societies Registration Act 1986 noiya State Planning Department in ahin ahin boipi di ahi.

Hiche agency a hi Chief Minster ex-officio Chairman hiding ahi. Ahin lampi accident ho, revised ex-gratia, Army/CPMF/Assam Rifles personnel thina toh holeh a-insung mite ex-gratia ho’a vang state cabinet in a case dungjui a ahin vettoh ding ahi.

Salpha ho May nisim 24 leh vui hita diu

 Imphal, May 21: May nisim 10, 2017 nia Union Govt. hetpih na noiya state Govt. le JAC-AATB hon May nisim 25 kah a Salpha ho vui dinga kinopto na anei utoh kilhon na May nisim 24 (ni 632 lhin ni) le Mata Dam a vui dingin phatsah ahi tai.

 Community-based organisation hole JAC-AATB hon Salpha ho vuidoh ding’a tohgon anei utoh kilhon in Salpha ho thina toh kimat a Joint Philanthropic Organizations ho koma um von le thil dang dang JAC-AATB khut a ahin pehdoh diuvin hetsah na anei uvin, chule sum a um jongle JAC account a ahin het diuvin jong thupeh anei taovin ahi.

 May nisim 24 nia Salpha ho vui na chu Rev. Lalropuia Presbyterian Church of India in anei ding, CBA, EBC, PCI , TP, NTBC le ZPCS Joint Choir hon lasah na anei diu traditional gun salute jong um ding ahi.

 Chule thivui na achu community-based organisation MPC, UZO, STC, TCU le YPA le adang dang ho jao ding ahiuve. (Source: NT)

MNP+ Thoubal  in ‘Intl. Candle Light Memorial’ bol

Thoubal, May.21: Manipur Network for Positive People (MNP+) Thoubal in Manipur AIDS Control Society lamkaina in conference hall, District Health Society, Thoubal mun’a 34th International Candle Light Memorial kin-gon abol uvin ahi.

“Ending AIDS Together” ti thupi’a kin-gon kimang ahi’in, Chairperson, Thoubal Municipal Council, Th Shyamo, MNP+ president Thoubal Ningombam Ranjit chule CMO Thoubal Dr Jayantakumar leh district program manager, DHST Chingangbam Basanta chief guest, president leh special guest in apang uvin ahi. Candle light service hi HIV/AIDS natna’a thi ho geldohna’a kimang ahi’in, athi ho jana vetsahna in ‘minute 2’ thipchet in aum uvin ahi.

Thoubal ART Centre’a mi 976 registration kibol ahi’in, hiche lah’a mi 547 hi ART noiya um chule adang se hi pre ART treatment kipe ahi. Alangkhat’a, MNP+ ‘a mi 846 register kibol ahi’in, hiche lah’a meithal 191 leh chapang 81 pang ahi. Thoubal district hospital in HIV/AIDS natna neiya, adeh’a naobop numei ho akhohsah diu angaichat dan thu jong asei uvin ahi.

Transfer & Posting policy thah kichepi vah ding ahitai ti’a Jayantakumar in sei

Imphal, May 21 (DIPR): Health Department noiya natong doctor ho le staff ho posting suhtup na ding’a sorkar in policy thah beh khat kisemding ahi tin Health Minister, L.Jayantakumar Singh in tuni Ukhrul District Hospital a doctor ho le staff ho toh akihoulimna’a aseiye. Aman aseidan in thinglhang gam’a posting a um medical staff ho hi atumpeh’a incentive scheme kisempeh ding ahi ati. Doctor ngaichat ahina mun ho suhdim na ding’a Manipur Public Service Commission in doctor ho recruit abol ding  chuleh flying doctor concept hi natoh’a pohdohna ding’a sorkar in pan kilading ahi ati.

Medical staff ho toh kihoulimna aneijou chun  simlai ho le youth wing toh kihoulimna aneikit in ahi. Simlai ho le youth wing in adei angai ho’u Minister heng’a aphongdoh’uvin, minister in jong simlai ho le youth wing ho ngaichat jouse suhbulhitna ding’a pan kalah ding ahi tin donbutna aneiyin ahi.

Simlaiho toh akihoulim jou chun Ukhrul District Hospital vetlhahna aneiyin ahi. Minister pa chu Parliamentary Secretary Khasim Vashum  le K.Leishiyo in akilhonpi lhon in ahi.

Kiloikhomna chom chom’a kon member 56 ahung lut’e, tia NSCN-IM in sei

Imphal, May 21: NSCN-IM hon Naga thingnoimi kiloikhomna chom chom’a kon agom’a member 56 Naga ho khonung ding kingapna NSCN-IM ‘a lut ding ahi, tin asei uvin ahi.

NSCN-IM in thuso aneina’a chun, Steering Committee Executive, Cabinet Kilonser, Deputy Kilonser leh Head of Department ho panna’a Joint Council in mi 56 ho liemna aneiyin, chule achesa August nisim 3, 2015 kum’a kisem Framework Agreement hin kikhelna pha ahin pohlut ding ahi, ati. “Ahung kile honjong lamkai ho chung’a tahsanna leh kipeh thengna aneiyu thu asei uve”, tin NSCN-IM thuso chun aseiyin ahi.

“GPRN/NSCN (Unification) ‘a kon hung kile hon NSCN-IM vice president Gen (retd) Kholi Konyak, Ato Kilonser, Th Muivah, Kilo Kilonser, Rh Raising, Tatars, Head of Department leh lamkai luboh ho chung’a tahsanna aneiyu chule chamna hin polut thei ahiu atahsanna thu asei uvin, chule Unification’a um hi machalna aumpoi, tijong ahe uve, tin NSCN-IM thuso chun aseibe in ahi. ‘Kilo Kilonser (Home Minister), NSCN/GPRN Rh Raising in lamkai ho thalheng in cadre ho liemna thu aseiyin ahi.

RRM in Panting leh Essay competition bol

Imphal, May 21:  Royal Riders Manipur (RRM) in Ima Khunthokhanbi, DM College Gate, Thangmeiband mun’a Sunday nikhon ‘spot painting’ leh essay competition abol uvin ahi.

Kitetna hi 9 channa Mahousa Ima Lairembi Ningsing Tha- 2017 kin-gon noi ahi’in, achesa 2009 kum’a kon RRM in kum seh leh gam-leh-go, thingphung ho venna ding’a environmental campaign abol pan ahi. ‘Connecting nature to people’ ti thupi’a lhakhat lhing kin-gon kibol ahi’in, United Nations (UN) injong lhakhat lhing world environment day anit ahi.

Tuni’a kitetna’a simlai 260 vel in pan ala in, mi 9 essay competition’a apang uvin, adang se painting competition’a pang ahi. Class 3’a kon 5 chan, class 6 ‘a kon 8 chan Group A leh B category in akihom in, pachanna neiho jong aphongdoh uvin ahi. Group A’a Moirangthem Thoithoiba, Class 5 (Regular English High School) in first amu in, Juliana (KV, Lamphel) leh Khusi Aheibam (KV, Lamphel) anichanna leh athum channa in apang lhonin ahi.

Painting competition category B ‘a Martin Tongbram (Pitambara English School), Venish Keisham (Pitambara English School) chule Onia Konsan (Wangkhei High School) 1st, 2nd leh 3rd in apang uvin ahi. Chule essay competition’a Lukanand Kshetrimayum (Maria Montessori), Sapan Jennifer (Tiny Tots’ Unique School) leh Lairenjam Leibaksana (Shishu Nistha Niketan) 1st, 2nd leh 3rd in apang uvin ahi.

Kpi Auto Assn. in kiphinna nei ding’a gihna nei

Kangpokpi May, 21: Kangpopi Police Station kom a cheng Auto Association , Secretary Satgoulal Khongsai chu May nisim 21, 2017 nilhah Houin kai kikhen a ainsung mite leh KCC Senior Pastor T Lenthang hinpo a in hinjon chu Kpi Police Station Gate maiya VDF khat in ana kham in thudoh ana dong in Satgoulal chun inn na kache diu ahitai tin ana donbut in ahi. Chujouvin VDF pachun auto chu akeng’a apehto alhoto athon Satgoulal chu athal 3vei akaokhum in kakap ding nahi tin ana suboi jin ahi.

Hiche tobang Auto Assn. Secretary pa le a insung mite chule Pastor khat  kisuhboi nahi jing nikho (May 22) jinglam nidan 9:00 masang’a athu akiseichet lou leh kiphinna kinei ding ahi tin Auto Association President le Secretary akon kimu thulhut chun aseiye. (Source: JN)

Tengnoupal’a bomb kisuhpoh jing KCA in demna nei

Imphal, May 21: Kuki Chiefs Association, Tengnoupal district in Moreh sub-division’a achesa ni phabep sung’a bomb thumvei kisuhpohna thilsoh demna anei uvin ahi.

Association Information and Publicity secretary in soi akaina thuso’a chun, mel hetlou mi phalou hon hitia meisan tah’a na atoh agelkhohna thu asei uvin ahi. District sung’a chamna ngailu mi holah’a boina kisem ahi, tin asei uvin ahi. Chule themmona nei hon hitobang dei umlou tah chonchan hi khonung’a abol lou diuvin temna jong anei uvin ahi.

KCA in apohnatna thu aseiyin, chule akitongkha police ho adam doh vahdiu in thupha athot uvin ahi. Chule state sorkar in themmona nei ho amat’a, Tengnoupal district’a cheng ho lungmong tah’a achen thei nading’a pan alah diuvin jong temna anei be uvin ahi. Hetthei khat chu achesa May nisim 17 nikho’a Gamnom Veng, Community Hall’a bomb kisupoh’a, hiche jou May nisim 18 nikho’a Parliamentary secretary Susindro convoy ho Kwatha leh Khudengthabi kikah’a kibulu kit’a, Saturday nilhah’a Moreh police station kom’a bomb kisupoh kit ahi.

Khoirom PHC’a doctor ho transfer kibol jeh’a gamkai miho lunglhai lou

Thoubal, May 21: Yairipok Khoirom Primary Health Centre ‘a doctor li um abon uva aban ban’a transfer kibolna thuso akisodoh jouvin Yairipok, Thoubal district’a mipi lunghanna asang cheh cheh in ahi.

Khosung mihon kum khat masang’a Manipur Health Services directorate in 24X7 service PHC ahon doh hi akipapi’a chule kinepna lentah anei ahi’in, ahin, hiche mun’a posting hi’a medical officer in-charge khat leh doctor thum abon uva transfer order kisodoh hin kinepna leh kipana jouse asuhmang ahi. Tuchan geiya amaho khel ding doctor koima centre’a kisol loulai ahi’in chule doctor duty’a che lou aum jeh’a gamkai mihon hahsatna ato ahi.

Vengsung mihon doctor ahin sol peh diuvin administration heng’a thumna anei uvin, chule attendant, nurse lhasam leh centre’a manchah kivat ho apeh diuvin jong thumna anei uvin ahi. Mopohna neihon health centre chungchang’a boina asuhlhap diuva khosung mihon temna anei utoh kilhon’in, ni-nga sung’a thumna nahsah ahi louleh kiphinna sangtah kibol ding ahi, tin gihna jong aneiyui. Centre dinmun hi vengsung mihon avel vel’a thuchen district health authority ho hetsahna aneiyu ahitan, ahin, gelkhohna aumlou jeh’a tuchan geiya anatoh’a ima kipodoh loulai ahi.

United Prayer Movement in kiphudol kal kum 21 lhinna kinguon bol

Ccpur, May 21 : 1996 kum’a Pastor LS Paul Hangmi in Ccpur Jacob taona moul a taona giltah aneijouva ana phudoh United Prayer Movement  in tuni chun kiphudohkal kum 21 lhinna kinguon loupitah in anit in ahi. Tuni kinguon a chun ‘Lomnaidaba Punshi Khongchat’ tia kiminvo gospel book  khat hondohna jong abol’uvin ahi.  United prayer movement hi tumasang’a chu United Prayer Movement for Nation (UPMEN) ti’a ana kiminvo’a phat chokhat jouva Quiet Corner India ministry toh kikhutjopna ahin neijo’uva United Prayer Movement for nation UPMEN ti’a amin hung kithahvuo ahi.

MPCC in anti-terrorism day nit

Imphal, May 21: Manipur Pradesh Congress Committee in tuni chun Prime Minister lui Rajiv Gandhi thi nikho geldoh jing na ding’a kibol Anti-Terrorism Day thupi tah in Congress Bhavan a anit in ahi. Kinguon’a chun CM lui O Ibobi, MPCC President TN Haokip, MP Thangso Baite, Congress MLA ho le Party worker hon pan ala’uvin ahi. Tuni kinguon a panla ho chun Prime Minister Rajiv Gandhi lim pahvui awpehna anei’uvin ahi.  Chuleh kinguon a panla ho chun terrorism douna’a panla cheh ding in kihahselna anei’uvin ahi.

Royal Riders in environmental campaign bolding

Imhal, May 21: 9th Mahousa Ima Ningsing Tha 2017 toh kisaiya Royal Riders of Manipur in May nisim 6 a pat June nisim 5 gei environmental campaign abol ding ahi. Campaign kibol sung’a  simlai pol-III a pat pol-VIII gei hon “Connecting People  to Nature” thupi ‘a painting competition jong anei ding’u ahi.  Pol-IX le Pol-X simlai hon jong ‘Plastic Hazard in Manipur’ thupi a essay writing competition aneiding’u ahi. Royal Riders of Manipur, President, RK Tombisana in aseidan in, awareness campaign  kibol hi milham ho adeh’a khangdong ho le simlai hon climate change chungthu agelkhoh theina ding’u bidoi neipum’a kibol ahi tin aseiyin ahi.

Konthoujam Ongbi in ISTV Discussion hour progamme  a panla ho kipa thilpeh pe

Imphal, May 21: ISTV Network  a nilhah lam nidan 8 le hung kisuo jing Discussion Hour Programme kibol dan chung’a lunglhai vetsahna in tuni chun  Department of Industry, Demonstrator, Konthoujam Ongbi Rani  in discussion  a panla jing resource person somle khat le anchor nga ho kipa thilpeh ape in ahi. Kipa thilpeh chu ISTV Network conference hall  a ana kibol ahi. Kinguon a chun ISTV Network, President, P Prafullo; Secretary , Kh Khogen; In-Charge of Discussion Hour, M Goura Meetei; News Producer BK  Meetei; Executive Member Kh Motilal, anchor ho le resource person hon pan ala’uvin ahi.

Konthoujam Rani thilpha abolna chung’a kipa vetsahna in  President P Prafullo in jong kipa thilpeh khat ape in ahi. Mipi hon discussion hour  phatchomn amuthei jal ‘un Secretary Kh Khogen in akipana aphongdoh in ahi.

Mun chom chom  a Hepatitis chungchang’a Awareness programme kibol

Imphal, May 21: Tuni chun Antarctic Higher Secondary School, Yairipok’a  MNP Positive Manipur le Antartic Higher Secondary School authority in Hepatitis chungchang’a awareness programme ana bol lhon in ahi. Kinguon a chun simlai 150 val in pan ala’uve.  Alangkhat’a  tuni mama chun Thoubal Sabal Tongba Kangjeibung , Community Hall’a Hepatitis chungchang’a awareness programme khat ana um in ahi. Kinguon a chun mi 80 vel screening test akibol in ahi.

Battle of Imphal 73rd Commemoration Day kinit

Imphal, May 21: November lha le Japan a lekha simnom ho ding’a seminar tumbeh kiguong ding ahi tin  Japan Ambassador Kanji Hiramatsu  in tuni Imphal’a 73rd Commemoration of Battle of Imphal kinguon kibolna’a chun aseiye. Kinguon chu Manipur Tourism Forum le 2nd World War Imphal Campaign Foundation in Department of Tourism kithopina pum’a Hotel Grande, Chingmeirong a aguon ahi.

Kinguon a chun CM N Biren, Parliamentary Secretary of Nagaland, C Apok Jamir  le Chairperson of Brahma Campaign Society, Akiko Mcdonald in pan ala’uve.  Tuni kinguon a chun souvenir khat jong athensuo uvin ahi.

Battle of Imphal le Kohima hi 2nd World war sung’a kikaptuona gimnei pen teni tithei ahi. Battle of Imphal a hin Japanese sepai sang som sagi vel in ahinkho ana tuoh’uvin ahi. Manipur le Nagaland a kon  delegate somni le nga vel Japan’a kholjin ding’a kouna kinei ding ahi tin Kenji Hiramatsu in ahoulimna’a chun aseiye.

Battle of Imphal hi March , 1944 June lha’a chu ana kisat ahi’n Japan in Maibam Lokpa Ching a ageldohjing na ding’a war museum khat asemding ahi tin CM N Biren in ahoulimna’a chun aseiye. Chuleh war museum semna ding’a hi Manipur sorkar in jong kithopina thei chan’a kithopina kipeding ahi tin N Biren in aseiye.

Kenji Hiramatsu in ahoulimna’a chun, Japan in Manipur gamsung sum le pai dinmun le social life semhoina ding’a pan nasatah alahding ahi  tin aseiye. Wangkhei AC, MLA, O Henry in jong kinguon a chun pan ala in ahi.

Medical profession a lunglut ho ding’a 3rd Gateway Abroad International Education kibol

Imphal, May 21: Tuni chun medical profession  lam’a lunglutna neiho tilkhouna ding in Nupi Lan complex a 3rd Gateway Abroad International Education  ana kibol in ahi. Kinguon a chun country nga’a kon le India sung’a medical institution a kon thalheng phabep in houlimna anei’uvin ahi.

Medical student hon alekhasimna’u institution recognized ahilou dan ahin kihetdoh’u thilsoh tampi ana um jing in hitobang ho avel’a umkitlouna ding’a tuni kinguon hi kibol ahi tin Member , Education Trust, Md Hakimuddin in ahoulimna’a chun aseiye.

Thoubal district’a ‘National Blindness survey’ kibol jing

Imphal, May 21: Health and Family Welfare Ministry, India government noiya Dr Rajendra Prasad Centre for ophthalmic Sciences, All India Institute of Medical Sciences (AIIMS) New Delhi in National Blindness Survey district chom chom 30’a abol ding ahi’in, 2015-18 kum sung’a hiding ahi.

Dr Y Chingsuingamba Meitei, Co-Investigator, National Blindness Survey leh Associate Professor, Opthalmology, Regional Institute of Medical Sciences, Imphal in thuso anei dungjuiya India sorkar in kum som seh leh gamsung pumpi’a Blindness Survey abol ahi’in, tuchung’a survey kibol jouva district 19 ahitan, Thoubal district hi 20 channa’a pang ding ahi, ati. Manipur gam’a survey hi RIMS, Imphal leh Health Directorate toh partnership hina’a kibol ahi.

Dr Suraj Singh Senjam, Associate Professor, Department of Community Opthalmology leh Dr Noopur Gupta, Assistant Professor, Dr Rajendra Prasad Centre for Opthalmic Sciences, AIIMS lamkaina’a Dr Laishram Usharani, Assistant Professor, Department of Opthamology, RIMS, Imphal in Thoubal district’a Blindness Survey abol ding ahi, tin Chingsuingamba in aseiyin ahi. Survey hi May nisim 18 nikho’a kipan ahitan, May nisim 28 chan abol diu, Thoubal district noiya um kho chom chom 50 chule khosung khat’a kon kum 50 chunglang mi 60 cheh amit avet (screening) diu ahi, ati.

Thusoh Lahchom

Japan Ambassador

India-Japan Ambassador Kenji Hiramatsu Battle of Imphal WWII 73rd Anniversary mang ding’in Imphal khopi ahung lhung in, Khurai, Imphal East mun’a WWII ‘a Japan sepai hon bomb asuhpoh jeh’a thina toh ho jana pehna aneiyin ahi.

Athisa kimu

Achesa May nisim 17 nikho’a kon kiholmo Heingang kho-mi kum 26’a upa khangthah pa Heingaiching mun’a Sunday nikhon athisa in akimudoh in ahi. H Priyokumar, s/o Manichandra hi Uripok’a dukan abolna mun adalhah’a SBI Imphal Branch, MG Avenue’a sum deposit bol ding’a achedoh jouva kon kihol mo ahi. Insung miten asei dungjuiya, bank’a akinaipi mikhat in akou ahi, tin aseiyin, hiche nikho’a kon a phone switch off’a um’a ahivang’a achena gari hi bank pam’a akingah na mun’a kimudoh ahi.

Pasal khat kikhailih

Tuni chun Uripok Sorbon Thingel a khangdong pasal kum 24 khat Insan’a aumna Indan sung’a ana kikhailih in ahi. Khangdong pa chu amin Huidrom Ibungo ahi’n, Langmeidong Mamang Leikai a cheng ahi.  Amahin tutu’a Kumbirei kailhang’a pharmacy khat a na atoh ahi. Police in a Indan sung’a chun suicide note khat jong amudoh’e.  Police in thilsoh toh kisaiyin case khat asunlut in kholchilna jong apantan ahi.

Longmai BJP

Longmai BJP worker hon tuni chun Nungba Mandal , Longmai a Nungba AC BJP MLA vailhunna kinguon abolpeh’uvin ahi. BJP Manipur Pradesh , Vice-President Adim Pamei in kinguon a achun pan ala in ahi.

An-chang kihom

Singjamei Assembly Constituency a cheng hon achesa lhagup sung anchang anamulou ho’u tuni chun MLA , Y Khemchand lamkaina in akihompan tan ahi.  MLA Y Khemchand in aseidan in tutu’a vaihom sorkar hin milham ho’n amu ding’u anchang ho aphatcha le alomtah’a kihop peh jing ding ahi ati.

Brahmpur Social Club

Yaiskul Constituency sung’a non-local hon Rani Phee achoh’uva constituency sung mama miho heng’a ajohson’u  suhbeina ding’a  tohguon kineiding ahi tin Parliamentary Secretary of Finance, Th Seityabrata in tuni Brahmpur Social Club’a vailhunna kinguon a ahoulimna’a chun aseiye.  Tuni kinguon a chun Brahmpur social club in Th Seityabrata heng’a constituency sung’a avat le alhinglal ho jouse aphongdoh in ahi.

Editorial

Khangthu miho hetsah

“Theilou Koljang toni lep banna,

Ging deng deng’e Japan lenna huilen kong

Pego lhemlhei saigin bang

Mao deng deng’e van thamjol Japan lenna

Amao deng deng’e Japan lenna mongmo,

Vailou kon sunsot selung hem tante.

Atui theikhong tabang ging deng deng,”

Ging deng deng’e Japan lenna huilen konggin

Hiche la hin Kuki te leh Japan te kiguijopna ei geldohsah dingu tahsan umtah ahi. Thusim lui hetdohna thei pu-la, pa-la (folk song) tamtah I neihou lah a khat ahin, tulai ‘pop culture’ a khangthah ho hin ipi kiseina ahi jong helou tamtah um intin, upa-tehse (Khanglui) hon hiche la hi agah jeh uva lunghel jong beida ponte. Hiche la hin thusim lui tamtah eiphohdoh peh dingu tahsan umtah ahi. Adeh a Kuki te leh Japan te hi kigolcha ahi dan avel a eigeldoh sah dingu kinep umtah ahi. Eimi te hi thusim haote ihidan u akoi jousen ina sei jiuvin, hinlah, I thusim u mi hetthei a koidoh hi I lhahsam nao lentah khat ahi. Pu-pa khanga vannoija ki sei minthang British te ina dou nao jong ahiding bangin mi het in I tahlang jou naipouve ati thei nalai in, thil khohtah ahi. A chesa kum ijat masang ham apat in Imphal ah ‘Japan gal’ tia kihe World War-II laija kidouna ana umna ‘Battle of Imphal’ hetjingna manna kin ana um jing e. Tukum in jong hiche kin a jao dingin Ambassador of Japan to India, Kenji Hiramatsu Imphal ah ahung e. Eimi te leh Japan te kithona ho chu seidoh leh hetphah ana hibehseh ji tapoi. Hiche tilou jong I thusim u vannoi hetdinga lom ho ahiding banga het ahilou hi tu-khang leh khang hung um nalai dinga I son-le-pah hou dinga thil khohtah hung hiding ahi. Khangthusima  pu-le-pa te contribution ho ahiding banga I tahlat jou nailou jeh uvin, akhat khat in phat khat khat leh kamchuh lhaonan ei nei jiuve tijong I haimo u ahi poi.

I thusim u ahiding banga mihet ahi theilou na ajeh lah a khat chu – I khangthusim (history) u hi midang (jat/nam dang) hon eisut peh pat u ahi jeh a ahi bang chet ana sutdoh joulou uhi ahi. Aban leh, I thusim u eiho hetdan a I research  scholar hou in ahin sutdoh uho jong political patronage umlou jeh a notthap a um jong beida ahi poi. (Vetsahna in ningkum chun, eimi civil organisation phabep khat in Manipur Govt kom ah Dec 19 hi Kuki War of Independence Day/general holiday in eiphondoh peh uvin tia ngehna ana bol u ahi.) Political patronage kicheh tah um henlang, Dec ni hi Kuki War of Independence Day tin kinit leh I thusim u hi mihon ahetbe keo hilouva, ei ho chunga engset bolnom ho leh I thi/mahthah dingu boipi a kisaboi ho I jo nau khat hitei ding ahi. Hijeh chun, eimi civil society organisation ho, research scholar ho leh politician ho lungthim kihethem tah natoh phat ahi mong mong tai. Eimi politician/Minister/MLA hon jong gamsung/namsung sem hi lampi, tuineh, chuleh infrastructure tamtah gamsunga pohlut bou hi ‘natoh’ dana agel lou diu deisah ahiuve. I pu-le-pa thusim hoitah tah leh thupi tahtah ho hi ‘official’ tah a hetpehna a um thei nading jong hi I nam lamkai hou bana eimi politician/Minister/MLA hon pan alah uva, hiche tahso nadinga hi mopohna thupi pen nei ahi dan u avel a akihet dingu deisah ahiuve. Chuleh, civil organisation ho jong insung thu ho pouva milah a kinah-kisel ngaotin, I pu-pa teo hatna thu joh milah a nasa jo cheh a lhangsap dan ngaito tao te.

Blankfire

Tulai hi thil leh mihem ajat jat um ahitai. Masanga chu humpi akitileh gammanga gamsa lah a ahatpen leh kichat neilou bou kihe ahin tulaia hi humpi jatjat um ahitai. Hiche holah a theida umpen leh atampen chu Social Media Tiger (Facebook leh WhatsApp Humpi) ho ahiuve. Hitobang humpi hohi ameisan kitdan uchu amin dihtah jong aseidoh ngamlou u ahi.