ET May 20 News (Local, Thusoh Lahchom, Editorial, Blankfire)

ET May 20 News (Local, Thusoh Lahchom, Editorial, Blankfire)

575
0
SHARE

Thingnoimi hon Kwatha kom’a sepai ho bulu; police commando 4 kitongkha

Moreh, May 19 (CNS): UNLF hiding’a ginmo mel hetlou thingnoimi hon Kwatha Lamkhai kom’a um sepai ho abulu uvin ahi.

Thilsoh’a Moreh Police station’a police commando 4 akitongkha in,  akitongkha holah’a mikhat alel in ahi. Akitongkha hohi SI Lalminthang Mangte, Imphal East Police Commando, Martin Star, Imphal East Police Commando, C/No 0915376, Sarungbam Gouahari Singh, 6th MR Rfn No 06210709 chule Naorem Bishwanath, 6th MR Rfn No 062010632 ahi.

Thulhut dungjuiya, Kwatha kho, Indo-Myanmar gamgi kom’a kin-gon’a pang ding’a Khurai constituency BJP MLA Leishanthem Susindro Meitei  kigo’a ahi. RoP ding’a Manipur Police Commando team ho Moreh police station’a kon Kwatha jon’a cheu ahi. Nidan 11.50 don’a mel hetlou hon Khuwangthabi leh Kwatha Lamkai kikah, Imphal-Moreh lamlen’a bomb asuhpoh uva, abulu-u ahi.

Sepai honjong alethuh uva, kikaptna’a mi 4 kitongkha ahi. Akitongkha police commando ho akom’a um Assam Rifles outpost’a gangtah in apolut uvin, hiche mun’a kon Imphal khopi’a lenna’a ahin poh-u ahi. Thilso namun’a sepai asol lut be uvin, chule MLA L Susindro jong sepai tamtah toh amun jon in ache uvin ahi. Thilsoh hi United National Liberation Front (UNLF) ho natoh hiding’in sepai hon ginmona aneiyun, ahin, hiche thu hi photchen hilou lai ahi.

CM in Kwatha kibuluna dem

Imphal, May 19: Tuni Tengnoupal district, National Highway-2, Kwatha Lamkhai vel thilsoh chungchang in Chief Minister N. Biren Singh in hatah in demna aneiyin thina toh police personnel ho chungah alunghemna thu jong aseiyin chule akitongkha ho kintah a adamdohna diu leh athiho insung mite hengah lhamonna thuthot jong aneiyin ahi. Hitobang natoh hi mimeidoi ho’a ahin amitakip in demdia lomtah ahi ati. Chule hiche natohna a panla hojong akinthei lam’a holdoh a achan diuva lom gotna jong kipeding ahi tinjong aseiye.

Imphal-Moreh pungkal 24 bandh kichai; Moreh CSO hon mipite chung’a kipathu sei

Moreh, May 19: Achesa May nisim 17, 2017 nilhah nidan 7:10 don’a Gamnom Veng, HTC Unit-V a bomb apokeh chungchang’a lunglhailou vetsahna a Impal-Moreh lampi nidan 24 bandh anakibol sung’a mipite honjong atosot jal uvin Hill Tribal Council Moreh, Kuki Students’ Organisation, Moreh, Youth Club leh Kuki Women Union & Human Rights Moreh in mipite chungah kipathu ahinphong uvin ahi.

Bandh kibol sungchun town sung’a dukan, hotel, school, office chule nupi ho anche johna lhang hojong akikhah sohkeiyin, lamlen jong athipdel in ahinlah Indo-Myanmar Friendship Gate No. 2 vang angaiya bang’in anakihong jing’in ahi. Phailang hinjon ding gari hojong Moreh town parking ah akinga den uvin, mipi kimanchahna hatah in atongkha in ahi. Hitobang thilsoh ahiloule gamsung khosung a chamna suboithei ahung umkit tengle hitia kithokhom jing ding’in temna aneikit uvin chule amitakip in limgeh cha’a hinkho amanjing diuvin Mangminlien Singson, General Secretary, Hill Tribal Council, Moreh leh Tinthang Haokip, President, Kuki Students’ Organisation, Moreh in kiloikhomna ho thakhel in temna leh hetsahna aneilhon in ahi.

Android App. Development workshop kibol

Imphal, May 19: Manipur University Campus sung’a um Computer Science Department Seminar Hall sung’a  tuni chun nikho ni chelha ding Android Application Development workshop ana kihongdoh in ahi. Workshop chu Department le Tectron Technologies in kiguom a aguon lhon ahi.  Tuni kinguon a chun Dean of School of mathematical and Physical Science, Prof N Rajmohon, HOD of Computer Science, Asst Prof O Imocha le Asst Prof H Mamta in pan ala’uve.

Prof N Rajmohon in ahoulimna’a chun, 21st Century hi Century of Knowledge ti’a jong kihe ahitolhon in technology thah akipodoh jing in chule themjilna lam’a manchah ding technology hoitah tah jong aniseh in akisemdoh jing’e.

America le Gam khantou phabep in tulaitah hi mihem khat in mang aneiho record bolding tichan jong aboipi ta’uvin ahi.  India President lui Dr APJ Abdul Kalam in president atuhlaiya chu nano science develop bolna ding project le research phabep ana pandoh’e. Mobile application thah semdoh na ding’a Computer Science Department le Tectron Technologies in pan alah ho hi pachat umtah ahi tin Prof N Rajmohon in aseiye.

Priyokumar kikaimang lungkimlou vetsahna’a vengmi hon tou-mun kiphinna bol’u

Imphal, May 19: May nisim 17 nikho’a melhetlou hon  Huirem Priyokumar ana kaimang’u lungkimlou vetsahna’n tuni chun Heigaang Panthoibi Lampak a cheng hon tou-mun kiphinna anei’uvin ahi. Hetthei khat chu H Priyokumar chu Uripok khoisnam Leikai’a agang (uncle) dukan’a sum le pai ho SBI, MG avenue branch a deposit bolding’a achena’a melhetlou hon akaimang’u ahi.  Bank CCTV footage a kimu dungjuiya Priyokumar hi mikhat in bank a kon akoudoh ahi. Agari (Pleasure) jong park abolna mun a amudoh’uvin ahi. Priyokumar kaimang hon damsel’a ahinlhadoh diuvin Priyokumar nu in ngehna aneiyin ahi. Ihamti’a achapa in mikhat tou chung’a bolkhel ana neikhah ahijongle angaidam ding’uvin Priyokumar nu in temna aneiyin ahi.

Ccpur’a Annual Classification Range Firing 2016-17 khumkha hita

B.Lalboi Gangte

CCpur. May 19 (ET):  Churachandpur district in BSF/STC Satpal Choudhary Shooting Range, Mualkoi, Ccpur mun’a Annual Classification Range Firing (2016-17) agon Friday nikhon khumkhana anei uvin, hiche sung’a gal-manchah chom chom- AK 47, 303 rifle, SLR, postol chule District police in athah’a alah MP5 automatic Gun hojong kichuhna’a anei uvin ahi.

Kal khat lhing training programm’a ‘drill, mol man ding dan, chule ompho leh tahsa phatna ding’a exercise chom chom jong abol uvin, Ccpur SP Rakesh Balwal, IPS amatah in Friday nikhon pan ala in ahi. Ni-li meithal kap na (firing) kibol ahi’in, police personnel 500 val leh VDF personnel 500 val in pan ala uvin, chule pan la ho  Inspector/sub  Inspectors, Asst.Sub. Inspector, head constable, constable leh VDF tin akhen uvin, amaho lah’a meithal kap them pen pen ho DC, Ccpur R Sudhan, IAS in kipaman ape in ahi.

Achai nikho’a firing command bol’a SDPO, Ccpur, Ghanadhyam Sharma in, tuni nikho’a pachanna first’a kon third channa hung hohin kipaman asan seh ahipon, hiche hi record’a kikoi ding ahi, tin kipathu aseiyin ahi. Annual Classification Firing Fist’a officer category ‘a kipaman sang hohi SI P Veven Gangte, Inspector RK Anil chule SI Ginzalal Khongsai (third)  ahi. Chule Constable holah’a kipaman Thangminlun Haokip in amu in, VDF holah’a thal-kap thempen Thangkhomang leh Ksh Pradeep Singh in amu ahi.

Kum masa’a boina chom chom jeh’a hitobang Annual Classification Range Firing ana kibol lou ahitai, tin thulhut in aseiye. Hiche hi hetman louva boina thilso na dinmun ho kimaito pi theina ding’a kichuhna kipehna’a kibol ahi. Firing kibol achani nikho’a DC, SP, Ccpur, Addl SP, SDPO, Ccpur leh Thanlon chule adang dang jong apang uvin ahi.

GoI, GoM leh UNC in ‘tripartite talk’ ban jom

Senapati, May 19 : UNC hon National Highway’a economic blockade abol thu toh kisaiya Manipur sorkar, India sorkar leh United Naga Council in DRDA conference Hall, Senapati district headquarter mun’a ‘tripartite talk’ banjom na anei uvin ahi.

Toukhomna’a kinoptona phabep anei uvin  ahi. March nisim 19, 2017 nikho’a anaum ‘tripartite talk’ a kinoptona kisem hi party jousen avel’a tuhdet ding’in kilolna aneiyu ahi. Chule hitobang toukhomna akisem kit teng leh Manipur sorkar in political level’a athalheng asol ding’in jong kinoptona anei uvin ahi. District thah kisem jeh’a boina ho seilhah ahi kahse’a Manipur sorkar leh United Naga Council in March nisim 19 nikho’a kisem kilolna ho jana neicheh ding’in jong kinoptona anei uvin ahi.

Lhakhat sung’a Senapati mun’a toukhomna maban nei kit ding’in asei uvin ahi. Toukhomna’a Gaidon kamei, President, UNC, S.Milan, Gen. Secretary, UNC, Seth Shatsang President All Naga Students’ Association, Manipur, Asha Wungnam, President Naga Women’s Union, O. Nabakishore Singh, Chief Secretary, GOM, Dr .J. Suresh Babu, Additional Chief Secretary (Home), GOM, K. Radhakumar Singh Commissioner (Works), GOM  chule Satyendra Garg, Joint Secretary (NE), Ministry of Home Affairs apang uvin ahi.

Education Minister in Ukhrul’a kholjin ding simlai phabep sol dohna nei

Imphal, May 19 (DIPR): Education Minister Th. Radheshyam in Shirui Lily Festival, 2017’a pang ding district get’a kon simlai 10 cheh panna ni-ni Field Exposure Visit to Ukhrul State Project Office, Sarva Shiksha Abhiyan Babupara mun’a Friday nikhon hondohna aneitai.

Ukhrul district’a kon simlai 10 ma in amaho hi Ukhrul District Headquarter mun’a abe diu ahi. Simlai hohi Sarva Sikhsha Abhiyan, State Mission Authority, Manipur official hon akilhon pi-u ahi’in, Ukhrul Higher Secondary School, Ukhrul’a jan geh diu, chule hiche mun’a simlai hotoh phat jong aman khom diu ahi. Simlai ho akipatdoh masang uvin Minister Radheshyam in hitobang field trip hi anopna seh hilouva thilpha hetdoh be na’a neiding ahi, tin simlai ho tilkhouna aneiyin ahi.

Shirui Festival hi kumkhat’a khatvei kibol ahi’in, tuchung’a kin-gon hi sorkar in nam kikah’a chamna semna ‘a apanna ding’a hatah’a aboipi ahi. Field Exposure Visit hi SSA, SMA in simlai ho ‘exchange programme’ noiya abol ahi. Irilbung High School’a kon simlai 52 injong hitobang trip ma ma’a ding’a Friday nikho ma ma leh Imphal khopi adalhah diu ahi, tin State Project Director SSA/SMA leh Director, Education (S), Manipur, N. Praveen in aseiyin ahi. Team hohi Imphal khopi’a nilhah leh hung kile diu ahi.

Air Marshal PN Pradhan AVSM in DCIDS (OPS), HQ IDS panmun analuota

Imphal, May 19: Air Marshal PN Pradhan AVSM in Deputy Chief of Integrated Defence Staff (Operations), HQ IDS tohmun analuotan ahi. Amahi 1981 lai Indian Air Force a Transport lam’a pilot anahi. Transport squadrons a posting ahilaiyin operational role jouse adeh’a forward area holeh North-East leh J&K a ALGs ho injong pachanna sangtah tah ahin neiyin ahi. Amahi qualified Flying instructor ahina banah Boeing leh AN-32 aircraft ho injong pilot examiner panmun anatuh in ahi. Hiche keu hilouvin IAF a Embraer-135, BBJ leh C-130 chungchang’a hetgilna sangtah neimi ahi.

Air Marshal PN Pradhan hin command tenure 4 ananeitan hicheho lah’a chun Air Force Selection Board leh operational base ho injong command anatuh khatan ahi. Headquarters ah Assistant Chief of Air Staff (Transport and Helicopters), Assistant Chief of Air Staff (Personal Airmen & Civilians) tohmun hojong anatuh in chule Southern Air Command ah Senior Air Staff Officer panmun jong anatuh e.

Hichan geiya sangtah a pachanna ahin neitoh kilhon in government a kon’in January nisim 26, 2014 kum chun Ati Vishisht Seva Medal kipaman jong anakisan in ahi.

Agriculture Minister in department office ho vetlhahna nei

Imphal, May 19 (DIPR): Agriculture, Veterinary and Animal Husbandary Minister  V. Hangkhanlian in Friday nikhon Agriculture Office, Wangbal, District Agriculture Office, Thoubal, District Agriculture Office, Porompat, Imphal East leh District Agriculture Office, Lamphelpat, Imphal West avil in ahi.

Departmental office achena mun ho’a staff hon liemna anei uvin, Wangbal ‘a Minister pa’n Rice Research Institute, Rice Breeder House, Farm Science Centre, Krishi Vigyan Kendra kisahna mun vetlhahna aneiyin ahi. Office’a thil angaicha ho thu staff member ho dohna aneiyin, natong lhasam em, soil testing expert vat em, room kehlet be ngaiyem, fencing ahilouleh building semphat ngai yem, ti thudoh chom chom aneiyin ahi.

Department’a staff hon Agricultural Sector machalna ding’a pontho tah’a pan alah diuvin temna aneibe in ahi. Lamphelpat’a Agriculture Office Godown avil’a chun staff hon office chena lamlen semphatna ding’a akithopi diuvin temna anei uvin ahi. Fund dungjuiya hiche jong khonung leh kivetup ding ahi, tin Minister in donbutna aneiyin ahi.

HOD Dr Heramot in sumguh ane’e ti’a kanasei chu threat kamu jeh’a kasei ahi: Romesh

Imphal, May 19: JNIMS, Radio Diagnostic Department a attendant natong Ningombam Romesh in achung’a sumguh nehna case kibol anielkal in ahi. Aman aseidan in HOD Dr Heramot in sumguh ane’e ti’a kanasei chu threat kamu jeh’a kasei ahi ati. Dr. Heramot hin muona aneipoi. Amahin patient ho kom’a sumlah tah sang’a patient ho joh hatah’a akithopi jing ahi tin Romesh in aseiye.

Assam Rangiya Railway Station hi gamsung’a ding nga station thengpen lah’a 7 channa ding’a phondoh hita

Guwahati, May 19: Northeast Frontier Railways (NFR) zone noi’a um Assam Rangiya Railway Station chu gamsung’a ding’a railway station athengpen lah’a ding’a 7 channa ading in phondoh na akinei tan ahi. Hetthei khat chu kum masa’a chu Rangiya Railways Station hi 78 channa anahi in ahi. NFR zone sung’a um station holah’a ding in Silchar station hi anenpen ahi. Silchar station hin India sung’a 407 station lah’a ding in 392 channa in aum in ahi. Survey dungjui in Guwahati hi Northeast sung’a ding’a station lenpen chuleh A1 catergory station khatseh ahi naban in then nalam pang’a ahung khangtou lheh jeng in ahi. 2016 kum chun station then nalam pang’a 353 channa in anaum in ahin 2017 kum in vang 37 channa in ahung kal sang doh jou tan ahi.

Thusoh Lahchom

Khaidem Mayai

Jaanhi chun Khaidem Mayai khomi hon khosung community hall Asian Oil Services Ltd. in survey abolna chungchang’a kihoulimna anei’uvin thulhuhna thum asem’uvin ahi. Kihoulimna’a thulhuhna asemdoh ho’u chu; akhatna, Civil Society organization, NGO le expert ho toh kihoulimna akibolchai teng le bou Asian Oiil Services Ltd. in survey aboljom le aboljom theilou ding thu seiding ; anina, Oil Survey bol company hin Relevant document ahinpohdoh ding chule athum na, Survey in thil abol jouse mipi hetthei a atahlang ding tihi ahi.

Moreh CSO

May nisim 17 nikho nilhahlam nidan 7 vel’a Gamnom Veng Community hall, Moreh Ward No 2 a bomb pokeh chu Hill Tribal Council, KSO, MYC, KWU&HR Moreh in sangtah in demna anei’uvin ahi. Bomb pokeh na chung’a lungkimlou vetsahna’n milham kiloikhom ho’n Moreh khopi sung nidan 24 total shutdown ana bol’uvin ahi. Total Shutdown sung’a chun Namphalong kailhang jong ana kikhah in chuleh Imphal-Moreh lamlen’a jong gari ana lhaipo’n ahi. Total shutdown sung’a chun deilou um thilsoh vang  ana um poi.

Thingnoi 4 kiman

May nisim 16 nikho chun Imphal East Commando team khat in Nagaram, Imphal East a kon NSCN-IM cadre khat amandoh in ahi. Ama kon chun party letter head ni amudoh’uvin ahi. Alangkaht’a Imphal East Commando ho mama in Phaknun Sangomshang a kon KCP (MC) cadre khat amandoh’uvin ahi.  Police in akimandoh KCP (MC) cadre pa thudoh aneina’uva kon chun KCP (MC) ding’a natong nupa khat amandoh’uvin ahi.  Nupa teni chu Asem Romen le aloinu Asem Ongbi Ayeengbi Devi ahilhon’e. Amani’a kon chun police in .32 pistol le le achang ni amudoh’uvin ahi.

Kolphe meivah

Jaanhi nilhahlam nidan 2 vel chun Bishnupur District hopsung’a um Ngaikhong Khunou  loujao ‘a numei khat athisa in akimudoh in ahi. Athisa a kimudoh nu chu amin Thokchom Sanatombi Devi (50) w/o Thokchom Megha Singh ahi. Thulhut kimu khat in aseidan in Sanatombi chu loujao’a twilung luoh ding’a achena’a kolphemeivah gui akitohkhah a thi ahi. Thilsoh toh kisai in Ngaikhong Khunou a cheng hon Joint Action Committee khat asemdoh’un state government in compensation kilomtah apehna ding le Sanatombi insungmite sorkar natoh khat apeh ding in ngehna anei’uvin ahi.

Editorial

District 7 thu kiseinalai

(Manipur Govt hi UNC ho kai lele thei ham)

                                       Centre thalheng jaona’a Manipur govt leh United Naga Council (UNC) hon ningkum a district sagi (7) kisembe chung thua anivei channa kihouna chu Senapati district headquarters ah anei kit un UNC hon asei ngainai u aseijing nalai uve. Hiche kihouna chu UNC ho kinepna bang in ‘political level’ ana hikit tapon, amaho dinga ‘lolhinglou’ tia lahthei chu ahi tadi e. Govt of India leh adeh deh a Govt of Manipur hi UNC hon anop nop alothei ahipon, chuleh amaho thu thua akaile le thei Govt ahipoi ti vetsahna khat ahi tin jong lah thei inte. UNC in agenda thupi pen a asei jingu chu ‘District rollback’ (district thah kisemho nung lahdoh) ding hi ahi. ‘District rollback’ bolding tia a suhdukul doh leuleu a apen-pen vang uva, thil hithei ahilou chu UNC leh Naga civil society organization hon ahaimo ujong hiponte. Hinla, hiche thu hi amaho movement khat hinjing nadinga Govt of India leh Govt of Manipur akhaokhi nao khat a aman u ahi tivang kicheh tah in akimu theiye. Amaho demand (district rollback) mu dinga a ki tahsan lou jeh uva ‘Manipur Govt toh kijopna suhtan (severance of ties with Manipur)’ avela ahin sei kit u hitei inte. Hiche kihouna’a athulhuh nau lah a point 2 na chu kihou kit teng Manipur Govt in political level a palai ahin sol ding ti ajao kit e. Manipur government hi UNC ho khutbeh dungjui a hung lam ding ham tihi aphat alhin masang a seingam vang hiponte. Ahinla, thil umdan leh huinun dan ivet leh athumchanna kihouna jong ‘political level’ ahi ding vang tahsan umlou hel ahi. District rollback ahung kibol a, Naga ho khongbeh dungjui a Manipur government ahung lam ding vang thil hithei lou ahi. Ajeh chu, iham tikhat a Manipur government district rollback thua ahin thujo khah uleh, Naga ho dinga ‘Greater Nagalim’ jong ahisa/musa hung hiding ahijeh in, UNC leh Naga civil kiloikhom ho deibanga Manipur Govt ahung chaloh ding tahsan aum poi.

                                 Hiche kahlah a UNC in Senapati a meeting anei naova Manipur govt toh kijopna neilou ding (severance of ties with Govt of Manipur) tia anaphon doh u avela ahin pechah kit uhi ipi lam ahin ko ding ham vetnom umtah ‘drama’ ahung hiding tahsan ahi. Tulaitah a BJP lamkaina Manipur Govt a hi Naga People’s Front (NPF) jong jao ahi. NPF MLA li (4) lah a khat Cabinet Minister chuleh adang thum ho Parliamentary Secretary ahiuve. NPF kiti hi UNC toh thakhat tithei ahin, hijeh chun Govt support abol ahin ladoh diuvem, ahilouleh NPF chu UNC toh akimat poi ahinti diuvem khat joh joh hung hiding dan hileh akilome. A langkhat ah, Congress MLA phabep BJP a achoplut jeh uvin BJP hon jong government kisemtil laiya NPF ho a ngaichat bang uvin ngaicha tapon te. Centre leh Manipur govt hin dinmun kichieh alah a hangsan tah a thu asei phaat ahitai. Achutilouleh kihouna umbebe laisea onadi akhoh cheh cheh ahin kiboldoh lhon thei ahi.

Blankfire

Lamkai khat hidi hi moh kilop loudi ahe, lamkai min khat kipoh kiti chu mopohna lentah jong kikipoh tha ahilam geldohdi akhohle kikipohlel thei hinalai ahi. Ihetna le imihinan ata hinam tiho jong ei le ei kigel masatjep di ahibouve