ET May 19 News (Local, Thusoh Lahchom, Editorial, Blankfire)

ET May 19 News (Local, Thusoh Lahchom, Editorial, Blankfire)

407
0
SHARE

Work Minister Th Biswajit in government quarter luo ho kholchil na ni 7 sung’a aneichai ding uva DC ho thupeh nei

Imphal, May 18 (DIPR): Work Minister Th. Biswajit in tunichun district 9 sung’a um Government Quarter luo ho verification leh indentifiaction ni sagi (7) sung’a DC hon achai ding uvin thupeh anei in ahi. Hiche kihou khom na’a  asei thupi pen uchu government quarter bahara’a umho chuleh aluo ho’a konna stock detail hoitah’a aum thei nading nga kibol ahi tin  Old Secretariat, conference hall mun’a kihoukhom na’a chun  ana sei un ahi. Chunaban in DC hon residential general pool quarter  ho akholchil ding’u chuleh amopo ho hetna neilou’a cheng ho jong ano doh ding in thupeh jong anei kit in ahi. State government natong hon bou phate cha’a quarter kipe ding ahin government quarter dung ho’a  bahara kikoi ho hi kinung vet lhah kit ding ahi. Public work deparment hon government quarter ho semphat na anei ding chunaban na district Head Quarter mun’a government quarter ding jong asah ding’u ahi chuleh hiche quarter ho kisah nading mun ho amopo Deputy Commissioner hon apeh ding ahi. Thinglhang hihen lang phaicham hijong leh Government quarter dung’a mopoh na neiho hetpeh louva chengho kholchil nakinei ding iti ham khat na mopoh na neiho hetpeh louva cheng  aum khah leh apoh nading uva thupeh kinei ding ajui lou uleh department daan dungjui ja achung uva action kila ding ahi ati.

Hiche kin’a chun Commissioner Works, K. Radhakumar: Chief Engineer Public Works Department, Ch. Tiken: DC chuleh Imphal East leh Imphal West jaolou’a district 9 representative hon  pan ana lauvin ahi. Hiche kihoukhom na’a chun district chom chom hon report apeh nao achun Kangpokpi district, Deputy Commissioner  in aseina’a  chun government quarter hojong kholchil na nei angai’e atin, Churachandpur district representative in aseina’a chun district sung’a government quarter umjouse kholchil na akichai tan chuleh semphat ding angai ho jouse jong akisem chai tai ati chuleh Bishnupur district representative aseina’a chun  tu tuhin survey akibol lai tah ahi atin Tamenglong district representative in aseina’a chun government quarter hohi daan toh kitoh lou in akilo gam me atin chuleh Senapati district representative in aseina’a chun government quarter 173 aum in ahin semphat ding ngaicha ngen ahitai ati.

NSCN-IM hon govt. quarter alo’uve ti’a Work Minister in DC ho kihoulimna a sei

Tamenglong, May 18: Tamenglong district sung’a um government quarter phabep NSCN-IM cadre hon aluo’uvin , avel’a chenghon jong thingnoi ho nodohna ding’a akinaipi pen Assam Rifles post a hehna lekha aselut theiyu ahi’n, ahinlah tunigei in hitobang thilbol ding hi alungsung’uva jong apengdoh hihlaiye tin Work Minister Th Biswajit in tuni Old Secretariat complex, Conference hall a DC ho kihoulimna’a aseiye. Dandihlouva government quarter toupha NSCN-IM cadre ho chungthu hi Union Ministry heng’a kipelut ding ahi tin jong aseiye. DC hon mipi ho ding’a kichat neilou hel’a pan alah diuvin Biswajit in temna aneiye.

Nilhahlam nidan 1 apat nidan 2 gei chelha kihoulimna’a chun  sorkar natong hon rent pelouva government quarter atoupha’u chungthu jong aseikhom’uvin ahi. Government quarter a cheng natong hon tunigeiya rent khatvei jong apehlou jeh’uva sorkar in  sum le pai lam’a lhahsamna tampi atuo ahi.

WW2 khang’a kisa thil ho mang cheh cheh

Imphal, May 18 : Battle of Imphal, 1994 tia kisei WW2 ‘a gal kisat hi kija’a, amu’a jong um ahi’in, gal kisatna’a mihem asang’a sim thi’a, inmun asang’a sim kisuse ahi. WWII ‘a lamlen leh lei tamtah British leh Japan sepai hon asah’a, tamtah tuchan’a um nalai ahi.

Ahin, tukhang’a hetna alhahsam jeh’a masang lai thi umho hi aloupina’a hetthem sang’a gamsung’a mun kipelou ahi. Heingang leh Achanbengei kikah’a Hamilton lei WW II ‘a kisa hi Allied sepai hon lamlhahna’a aman ahi. Ahin, vangset umtah in contractor ahilouleh government natong ho lei lui hi asuse pan tauvin ahi. Aban tah’a manthei lei chom khat kisa ahi’in, ipijeh’a hiche lei kisuse ahi koiman ajeh kicheh ahetlou ahi.

Tuni chan’a lei ve’a che hon achesa  April nisim 5/6, 1994 jan’a 56 British Engineer, 58 Company Royal Engineers hon Leiutenant DG Jones command noiya lei asah thu kisei nalai ahi. Hamilton Bridge venna ding’a tuchan’a sorkar ahilouleh mopohna nei department in pan alahlou ahi. World Heritage site hohi UN in asem ahi’in, expert hon asei dungjuiya industry, lou kibol chule thingphung kiphu hin hiche ho atohkhah ahi, ati. Tu dinmun’a gamsung’a WW2 kidou/kisat na mun hi Nambol Maibam Lokpa Ching, Imphal War Cemetary, Kanglatongbi War Cemetary, INA, Moirang leh Kangla tilou adang ho mudoh hijou talou ahi.

RIMS , Lamphelpat Jubilee Hall a International Nurses Week kinguon ana chelha

Imphal, May 18 (DIPR): Tuni chun RIMS, Lamphelpat Jubilee Hall a “Nursing: A Voice to Lead-Achieving the Sustainable Development Goals” thupi mangcha in International Nurses Week kinguon ana chelha in ahi.  Trained Nurses Association of India (TNAI) le Student Nurses Association (SNA), Manipur State Branch in kiguom’a aguon kinguon a chun Agriculture, Veterinary le Animal Husbandry Minister V.Hangkhanlian Jin-gun in apang in ahi.

Minister  Hangkhanlian in kinguon a ahoulimna’a chun gamsung mipi ho damtheina ding’a nurse ho panmun apoimo dan le health care sector semhoina ding’a nurse ho panmun aletdan ahilchen in ahi. Nurses simlai hon ahikho’u le aphat manlutah ho’u genthei ho le damlou ho kithopina ding’a ahinpehdoh’u hi pachat umtah ahi’uve tin Hangkhanlian in aseiye.

Kin neipa a apang Parliamentary Secretary, Health and Family Welfare, Soibam Subhaschandra Singh in ahoulimna’a chun, tukum  a pat sorkar thah in Best Nurse kipaman pehding tohguon aneiye tin aseiyin ahi.  Deputy Nursing Superintendent, RIMS le Former Vice president, TNAI, Manipur Branch, Ng Binodini Devi in nurse ho tilkhouna aneiyin hitolhon chun nurse hon damlou ho asasah teng’u le mailhaisilsel’a asasah diuvin temna aneiyin ahi.

Director RIMS, R.K.Dinesh Singh, IAS, Director of Medical & Health Services, Dr. Karam Lokendro Singh, Former Deputy Nursing Superintendent, RIMS, Former Vice-President, TNAI, Manipur Branch in jong kinguon a chun pan ala’uvin ahi. Observation week sung’a lam chom chom’a kipman sang nurse ho Jin-gun le akikhom milen milhal hon kipaman ana hoppeh’uvin ahi.

Kuki National Front in kum 30 lhinna loupitah a nit’u

Kangpokpi, May 18: Kukite khonunga khankho ding gelna’a hem le thal mangcha a kal anasep masapen a kihe Kuki National Front (KNF) in tuni chun akiphudoh kal’u kum 30 lhinna loupitah in Ebenezer Camp, Natheljang, Kangpokpi District a ana nit’uvin ahi.

Hiche kingol a chun midang jao louvin KNF kiloikhomna sunga lamkai cheng le nam sepoy chengin bou pan analauvin, pilhing khat hinkho thudol’a kitilkhouna le, tule tua nam dinmun thu, KNF kiphudoh dan thusim le ipijeh a kiphutdoh ham chule ipi I atile KNF min’a nam na hichan kitong jing thei ham tiho ana seikhom un ahi.

Kuki National Front hi Lhaphul (May) nisim 18, 1987 kum’a Buma (tua Myanmar) gamsung Molnoi kho’a Lhakehtasa Nampi lunlai Pu Nehlun Kipgen in gam tum neiding tup le doi neija ana phudoh’a 1988 kum’a kum khat lhinna ana manpan’u ahitai.

KNF ana kiphutdoh tolhonin Manipur sunga Kukite lah she hitalouvin North East state pumpia Kukite lah’a hem le thal dom’a gamtum del dia kalsep masapen anahitan chule Kuki gamvah kiloikhomna ho pen na Nu in apangtan ahi.

KNF ana phutdoh Lhakehtasa Nampi Lunlai Nehlun Kipgen in gam le nam adia ahinkho anaphaldoh jounungin ST. Thangboi in KNF anamakijin phatche dungjuijin 2008 kum in Government toh SoO ana kaijun chujouvin Ningkum Lhadou (June) nisim 15 nin ‘Tripartite Talks’ UPF le KNO minin anei tauvin ahi.

KNF nam sepoy chengin masanga  ST. Thangboi in Ponlap khaidohna aneijin, gam le nam dia ahinkho anaphal’a chemasa nam sepoy cheng le lamkai cheng geldohna le janan phatchom khat thipchet in ana kun cheh un, thalchanga jana pehna jong ana neijun chule Lapi jong ana sauvin ahi.

KNF President, ST. Thangboi in ahoulimna’a, KNF akiphutdoh kal kum lhinna anaman’u chu geldohna aneijin KNF hi doi le tup kichehtah neija nam dinga hem le thal choija kalsep masapen chu anahi ati.

Ipijeh’a KNF hi kiphutdoh’a ibol tunia hi nang le keijin hiche a hin nam natohna dinga pan ilahjing thei ham? tia lunggiltah’a ahoulimna’a, ST. Thangboi in tun gamkai chom chom akonin kiloikhomna thingnoi tamtah kiphutdoh tajongle atamjo doi le tup umlouva kiphutdoh ngen ahin amavang Kuki National Front hi doi le tup kichehtah neija, nampi khan khotona jalla kiphutdoh ahi ati.

Gam le nam adia ‘Tup le Doi’ kichehtah neija kiphuhtdoh ahi isuhmil loujeh uva tuni chan’a hi nam natohna a pan ilahjing uva, nam dinmun le nam khankho ding iseithei ju ahin, Pathen kathangvah’e tinjong aseibei.

Kukiten History ineijun, 1917-1919 a British te inadou uvin, Indian National Army (INA) a inapang uvin, India gamsung adeh’a Manipura  chengdin jatlhom te jong ihi pouvin “State” neithei khat jong ihiuve ti doi le tup lungput hin KNF anapendoh sah ahi.

KNF hi ihetma bangun amasapen ihiuvin, in chen na’a hi mi upa hi achonna adih’a ahin na adih le anaote jong aphai kiti ahi. Hijehchun KNF a nam natong hon nam natong ding hina le chonna a ihin uva ichon diu akul’e.

Tulaijin KNF sanga masajo’a kisei thingnoi kiloikhomna jong aumdapoi ajehpen tahdia kagin chat chu nam thu hi keihon seileu veng atijeh u hipen ding ahin, alungthim phatloujeh’u ahi. KNF hi nam natong khat hinan mi tahsan thei ihiu angaije chule min eipomthei ju angaijin hijehchun kum 30 ihung lhin uto lhonin hiche hi itoudel diu kadeije ati.

Tup le doi ineiju tolhonin 2008 kumin itup idoi hou Government henga lhutna theiding SoO ina neijun, 2008 akonin tuchan’a ihung chal chal’un tun Talks ineithei tauve.

KNF ideology le policy chu hita hihjongle Government toh ikihou theina diuvin tin tuchung election a pan ilah kit un, lolhing na le losam na umjongle government tahsan theijing ium tauve. Hiche tahsan na tolhon chun Government henga ana kichen agangtheipen a Interlocutor adeh’a SoO group hodia appoint aboldiuvin akiseijin amahon (Government) in Tulha (May) tijongleu ageipen a June lhasunga beh a Interlocutor hi appoint ahin bol tah diuvin katahsan in ahi.

“Interlocutor appoint bolsah a Government toh iki hounau hi gansah’a iboinau hi gangtah a suhlhap ding tihi tutu a idinmun u ahitai” tihi kaphongdoh nom’e ati.

Hijehchun ibol ingaitou hi doi le tup nei ihiuve, tunia igenthei nau le itohnau, nam adia ithi nau le ipanlah nau hi nung le athon hilou behding aga umtei tei ding ahi.

Kum phabep masang chun igam inam sung uva faction ahung chen, KNF hi faction che masapen chu ina hiuvin, chulaichun mi 7 bep bou ana kihitan, hijongle Pathen in thutah a vaihom’e ti kanatahsan in, tohkhompi ho kom’a KNF a nam natong dia kipehdoh lamkai cheng le chapang ho koima thilse bol ium pouvin, ihin nau le idamnau hi nam dia kipehdoh ihiuvin, hiche a hi Pathenin phatthei eiboh lou ule Pathen jong hou angaipoi tin kana gellin ahi tunia hi Pathen phatthei boh chang ihiuve ti hi ka photchen nom ahi.

Kisonglel hih un, KNF hi nam natong hi Pathen in atun le phatthei aboh kiloikhomna chu ahi. Alhum lhah umlou le doi le tup kicheh neilouva kiphutdoh kiloikhomna ihipouvin, nam le gamtum neidia doi le tup kichehtah neija kiphutdoh kiloikhomna ihijeh un, ihin nau, ichon nau le ikimanchah dan uhi nam mite santhei le pomthei din hingu hite tinjong temna aneijin ahi.

Kuki National Front Damsot hen tin thumvei asam un ahoulim akhumkhan ahi.

Alangkhatna, Aaron Kipgen, General Secretary, KNF in ahoulimna’a, kum 30 sung hi nung vetleu hen geldoh ding tmapi ineidiu ahi. Nam ngailutna jeh’a nam natong dia ihung kiphal jeh uva Government sepoy khutna songkul tanga genthei hesoh ithoh nau tampi igeldiu, lungjin khoisatna, dipdap na le lungsatna tampi igeldiu ahi umin te hijongle Pathen mapuina jallin kum SoO le Tripartite Talks neipumin kum 30 lhinna imang theijun Pathen ithangvah un, lamkai lunlai ho jana sangtah ipeuve.

Nam adia ikphaldoh nau le ikipehdoh nau jalla mijousen amuthei lou aguh’a gim genthei hesoh tampi thoh pumin kum 30 ihung lhin tauvin hijehchun pilhing khat ihitah jeh un kum 30 jouva kon’a inatoh ilamlhahna diuva tilkhouna thu isei diu kadeije.

Mihem kum sim dollin kum 30 kiti hi mi pilhing khat tina ahitan, chule mihem hinkho’a kum 30 le 40 kikah hi “Tohgaso theina pen” kum chu ahin, hijehchun KNF kum 30 ihung lhintah ule “Tohga so panding” lunggel ngaito ineitah diu akul’e ati.

Kum 30 mipilhing khat lunggel ding chu, lungneng pan tading, lunggel sao aneitah ding, thil neo neova kisa biota louva thil thupi pi agelpan tahding, thupitah a lunggel aneitah ding ti ahijeh in, KNF kum 30 ihung lhintah uto lhonin tunia pat in nam dia inatoh nau hi neocha cha lunggel neitalouva nam dia thil thupitah tah le lentah tah inei pantah diu ahitai ati.

KNF hi pilhing khat ihitah jeh un, thil neocha cha a kimuhphun, phunchel tiho hi iboltah loudiu chule Christian ihi nauva, Bible Israel te aphunchel jeh uva kum 40 amahthah u thusim imu hou geldoh pumin kiloikhomna sung hihen namsung gamsung hijongle phunchel le chapang kitolchem banga thil neocha cha kimuhphun kitiho ingah diu ahitai.

“Kisei ngailouvin itup idoi asumol phou theijing asutang theija tijong ihet uva, kisei ngaitah a ikivaihom diu, pilhing khat hin’a kitosot thep tahding, kihetthem to kingai themto ithep tahdiu, ngailutna dihtah ineitah diu ahi.

Eiho society a mihem lungput jong ihetthem diu akultan hijehchun i-society uva ilungput dan u phaloutah ikichih thei diu le eihon nam natong hina’a ibol loubeh diu amavang hiche lungput suhtang ding ingaito diu chu, ” koiham khat chun thilthah lungthim thah aneija, aphading machalna ding khat ahetna ahile ipi kiloikhomna hijongle alamkai kidong talouva, hiche lunggel thah le hetna thah chu ama lamkaina a mapui ding ti lungput hi eiho society a natna lenpen ahin hijeh chun kikhentelna atam’e.

Eiho hi phung le chang neite, ichonnau va guinu thu neite hijognleu hen KNF hi nam adia hem le thal hin dom masa, gam le nam dia kalsep masapen hina’a Pathen phattheiboh chang uva nam na itohnauva hi KNF in phung le chang thu imacha iseilou diu ahi.

Nam iti teng leu Kuki hi ilunguva ichin uva ihinpi diu, kum 30 ilhin uto lhonin kikhanlhit louna lungput ho tobang neija thil neocha le phungthu changthu a kihetkhelna thei ho lamkai hihen chapang hijongle tunia kona hi ipailhah diu ahitai.

KNF General Secretary, Aaron Kipgen 18 Century laija American Civil War ‘First Bull Run’ kiti gal kon na che dia kigo, aji acha ngaitah sanga agam le anam ngailutjo Maj. Sullivan Ballou kitipan ajinu dia lekhathot ajih mangchan gam le nam ngailutna jeh a KNF a nam natong dia kiphaldoh lamkai ho le sepoy ho tilkhouna giltah jong ana neijin ahi.

KNF Home Secretary, Jangboi in Maicham asemtolhonin Pathen phattheiboh kiloikhomna ahi ti jallin “halleluiyah” thum vei asam’un akikhom chengin Maicham sekhomna jong aneijun Rev. Th. Kipgen, ex-Chaplain, Peace Camp Ebenezer in Pathen thudol’a houlimna le tilkhouna lhingset anei jouvin taokhomna aneijun ahi.

KNF lamkai dang dangin jong houlimna le tilkhouna thudol phabep aseijun chule lasa Minthang Hahat Kipgen le Lalam in jong atongso ngeitah lhon’a Pathen vahchoila san akikhom cheng ana suthou lhon lheh in ahi.

Ngailutna le Rising Day ankong sokhomnan kin khumkha anahi.

KNF(N) in Raising Day ana mang; juidia thupeh jong nei u

Imphal, May 18: Constitution of India framework nuoiya gamtum (state) semdoh ding lunggel nei pum in achesa May 18th, 1987 nikho’n Indo-Myanmar border Molnoi kho ah Kuki National Front (KNF) ana kiphutdoh in ahi. Hiche’a kon hem le thal hung kidom a gam le nam a dia movement dihtah revolution for separate Kuki State kiti hung kichepi ahitai tin GHQ Daitwi Camp a kon Gogou Vaiphei, Secretary, Inf. & Pub (KNF) in thuphon ahin neiye.

North Eastern States a dia history record lah a kimelchih hoipen le dihpen chu Kukite thusim hi ahi ati. Kukite hi namdang toh ikibahlounau (uniqueness) atam in ahi. Chuleh jalenna tah-a ilennau gam le lei ho, ithunei lhang jouse hi Colonial (Britist) lekhasun mihon alekhasut nauva record kitup tah in abol cheh un, vannoi in ahet ‘universal known fact’ ahitai tinjong aseiye.

Hiche thudih le thutah hohi tukhang hon ahet jing uva, dielkop banga akikop diu angaiye tin khangthah ho tilkhouna jong aneiyin ahi. Hiche movement hi tunigei in ache jingin, Manipur gam akon Separate Kukiland akimu masang se a kichepi ding ahi ati.

Hiche thuphuon hinbol Gogou Vaiphei in aseibena ah tu eiho dinmun toh kisaiya thupeh juiding phabep jong akisem e ati. Kukiland territory le capital city(s) gamkimvel a cheng hon aboldiu ule abolloudiu kinopna le kithulhuhna hochu: Akhatna KNF-N hetpehna louva outsiders, individual (gangster) or groups (militants) koi hijongleh gam sung mipi lunglinglao nathei natoh/tohgon ima ibol thei lou diu. Anina Offices, schools, colleges ahilouleh any worksite a namdang toh joldei/kingai kitiho ahithei chan a Kuki nungah ho akikangse din hetsah ahi. Hiche thupeh nitlou aumleh, anu apa geiya gotna kipe ding ahi.

Gamsung  haosa-upaho, intellectual ho, nam lamkai ho, patrons individual memberho, church elder ho jaonan tukum KNF-N Raising Day chu loupitah in akimang in ahi.

HAC Chairman in L. Phaijang kho’a School Building thah hondoh na nei

Lien S. Gangte

Ccpur, May 18: Thangzalam Haokip, MLA, Henglep, Chairman Hill Area Committee (HAC) in 18th May, 2017 ninglam nidan 11:30 chun L. Phaijang kho mun’ah South Point High School Building thah hondoh na aneiyin ahi. Hiche kingon ahin, Chief Guest in Thangzalam Haokip, MLA, Henglep, Chairman, HAC apang in, Functional President in Seilienmang Khongsai, EM, MDC, Khousabung apang in chuleh, Guest of Honour in Mangkhogin Haokip, IPS, SP, Bishnupur apang in ahi.

Hiche kingon toh kilhon in, Wel-Come Address seina DS Lamkholen, V/Chairman, SMDC in aneiyin ahi. Vanhmingthanga Sailo Principal in South Point High School thusim seina aneiyin chuleh, Thangtinlun Haokip, Chairman, SMDC in holim anei na’ah, L. Phaijang Area hi neclected area ahi dan aseiyin, hiche lhang’a chen ho’n Govt. apat Scheme hihen lang Govt. natoh na hijongleh ima mu ding aum poi ati. Hiche School building thah jong in alhang mipi ho gelkhoh na jal’a School Principal toh kitho a Pathien panpi najal a kisa jou ahi ati. Chuleh, aman hiche School khantou na ding gelkhoh na jal in MDC leh MLA kom ah Memorandum ape in ahi. Chief Guest in aseina’ah, ama bielsung’a  hitabang Private School building kilom tah aum thei na ding’a pan hinla Thangtinlun Haokip, Chairman, SMDC leh Vanhmingthanga Sailo Principal chung ah akipa na thu aphong in chuleh, hiche School khantou na ding’a pan na thei chan’a pan kalah ding ahi ati. Chuleh, Seilienmang Khongsai, EM, MDC, Khousabung in School toilet bol na ding’a kei ma pan thei na chan a ka pan ding ahi ati. Chuleh,  Mangkhogin Haokip, IPS, SP, Bishnupur in asei na’ah ei thinglhang mi ho’n thiemjil na inahsah uva, ichen khom piu jat dang ho iphah na ding uva thiemjil na lang’a hatah’a pan ilah diu ahi ati.

South Point High School hi 2011 kuma ana umpan ahi. Chuleh, Building thah sahna ahin dangka 28 lakhs val lut ahi dan thulhut aki mu’n ahi. Tu din mun in hiche School ahin School chapang 338 aum in, Teaching Staff 15 aum in, Non Teaching Staff 1 aum in, SMDC 11 aum in ahi.

Jwalamukhi battalion hon thingnoimi 2 man

Imphal, May 18: Senapati Brigade, Red Shield Division noiya Jwalamukhi Battalion in Leimakhong bazar’a achesa May nisim 14 nikho’a operation abolna’a thingnoimi 2 aman uvin ahi.

Akiman thingnoimi teni hi Kaminthang (26), s/o Songjalin Hangsing leh Limlenlal @ Reuben (26), s/o Thangjang ahilhon’e. Akiman teni hi ani lhon’a KRA(U) thingnoi ahi lhon in, 9 mm pistol khat, 9mm magazine chule 9 mm meichang 4 toh kimat tha ahi. Amani hi KRA(U) ding’a kai dong chule thil dang dang bol’a pang lhon ahi. Imphal West police station’a case jihlut ahitan, akiman teni jong police khut’a apedoh tauve.

 

WW2 Imphal Campaign Foundation

Imphal, May 18: Akiko MacDonald, Chairperson, Burma Campaign Society (BCS) in Thursday nikhon WW2 Imphal Campaign Foundation member ho loppeh na kin-gon abol peh in, achesa 2013 kum’a Foundation kiphudoh’a kon member ho tohphat hetpehna’a kin-gon kimang ahi. Akiko MacDonald hi May nisim 20 nikho leh Imphal War Cemetary leh maibam Lotpa Ching mun’a 73rd Commemoration of Battle of Imphal kin-gon’a pang ding’a hung kalsong ahi’in, member ho natoh hetpehna kin-gon Hotel Grande mun’a kimang ahi.

Labour and Employment Minister in Labour Department vil

Imphal, May 18 (DIPR): Labour and Employment Minister Th. Radheshyam in State Labour Department, Deputy Commissioner Office, Lamphel vetlhahna aneiyin chule Commissioner, Labour panna in mopohna nei official hotoh toukhomna aneiyin ahi.

Minister in achena’a office vetlhahna aneiyin, office dinmun umdan chung’a alunglhai lou na thu aseiyin, chule staff hon office mun hi a-inmun bang’a gelthei lou ding’a thudohna aneiyin ahi. Chule office mun hi ITI Complex, Takyelpat’a chon ding thu jong thudohna aneiyin, DC Complex’a department in thil asah ho dinmun jong ave in ahi.

Office kitup tah’a achelhah theina ding’a Minister in official hotoh labour law kitup tah’a chepi ding dan chule sorkar in ‘labourer’ ho ding’a agon scheme chom chom ho machal nading thu aseiyin ahi. Toukhomna’a tohmun neilou khangthah ho ding project chom chom, craftsmanship training, employment service chule adang dang thu jong asei uvin ahi.

11th Mayek Chatpa Numit’a Education Minister in lekhajem thupi dan sei

Imphal, May 18 (DIPR): Education, Labour and Employment Minister Th. Radheshyam pao leh lekha jem (script) hin society standard avetsah ahi, tin 11th Mayek Chatpa Numit, 2017 kin-gon’a chie guest apanna’a aseiyin ahi.

Meetei Erol Eyek Loinasilol Apunba Lup (MEELAL) in GM Hall, Imphal khopi’a abol kin-gon’a Minister in MEELAL website www.meelal.org jong hondohna aneiyin ahi. Meitei Mayek ‘a graduation simlai ho ding’a lekha umlou ahi’in, hiche hi softcopy’a website’a mijouse simthei ding’a kikoi ding ahi, ati. Meitei Mayek’a lekhabu sem ding angaichat dan thu aseiyin, Bengali lekhajem’a kijih hohi Meitei Mayek’a khel angaiye, ajeh chu chapang hon Manipuri Literature loupi dan ahet ding ahi, tin aseiye.

Kin-gon’a Dr. K. Sushila, Director Art & Culture, Dr. L. Mahabir Singh, Director Lanaguage and Planning chule official leh organising committee hojong apang uvin ahi. Chule Meitei Mayek competition’a lolhinna neiho Minister in kipaman ahop peh in ahi.

Singjamei Liwa Road a bomb pohkeh

Imphal, May 18: Jaanhi jaan nidan 11:30 vel chun Singjamei Liwa Road a cheng Wahengbam Shamu kiti mikhat inmaiya bomb khat ana pohkeh in ahi. Bomb chun Shamu Inmai lang asepse in ahi. Vangphat umtah in thilsoh’a chun athi amang chule akitongkha aum poi. Bomb chu koiyin asuhpoh ahi ding tugei in hetchen ahinaipoi.

Thilsoh toh kisai in tuni chun Singjamei Chinga Makha Liwa Road a cheng hon tou-mun kiphinna anei’uvin ahi.  Kiphinna neiho lah’a mikhat in thuso miho heng’a aseidan in, Liwa Road a cheng ho hin chamna akideiyin hitobang thilbol ho hin avel’a abollou diuvin temna akineiye tin aseiyin ahi.  Kiphinna a panla Ningthoujam kabita in aseidan in Wahengbam Shamu hi mona neilou mi ahi’n, muona neilou khat chung’a chongitlouna kibol hi thildihlou ahi ati.Chuleh thilsoh’a muona neiho agangtheipen’a akiphondoh diuvin temna aneiyin ahi.

W District a thao laidohna ding Survey work kibol local club le meira paibi hon khah’u

Imphal, May 18: Khaidem Tampha Loukol, Lourembam Block, Imphal West District a thao laidohna ding survey work kibol ho local club volunteer ho le Meira Paibi kiloikhom hon akhah pan ta’uvin ahi.  Survey work chu Asian Oil Field Services in Oil India Ltd. toh kikhutjopna noiya abol ahi. Project manager, Sumit Mahajan in aseidan in survey work hi Centre le State Government in phatsahna aneijouva kibolpan ahi’n,  survey work kibolpat ding’a jong local club le meira paibi ho hetsahna kineisa ahi ati.

Khaidem Awang Leikai Meira Paibi, Secretary, Soram Memma in aseidan in survey work kibol ding thu hi tumasang in ana kihepha po’n, agam neipa A Premkumar bou in ana het ahi ati. Chuleh survey work kikha hi avel’a chengho achet achai ana kiseipeh masatlou jeh’a kibol ahi tin Soram Memma in aseiye.

Gamsung munchom chom’a driving licence check kibol jing

Imphal, May 18: Tulai gamsung gari accident ahat tahjeh in Transport Department in hiche ho ventupna dingle vetkolna ding’in tohgon phabem ahin neitan ahi. Chief Minister in Transport Department charge jong apohtha toh kilhon in ama level in jong kihouna akineitai tin M. Lakshmikumar Singh, Commissioner (Transport), Govt. of Manipur in thuphon aneiyin ahi.

Chief Minister pa thupeh dungjui in driving licence ho kholchilna special drive jong akibol pantai. May nisim 16, 2017 nikho driving licence kholchilna akineina ah Imphal West a kon’in 1, East a kon’in 2, Bishnupur a kon’in 45, Thoubal a kon’in 40 chule Churachandpur a kon’in 1, agom in fake driving licence 93 akimandoh e tin Commissioner (Transport) chun aseiye. Hiche natoh hi district chieh a Superintendent of Police honjong apat pai diuvin thupeh akineitan fake driving licence kimandoh hochu CID/Crime Branch a kipelut ding ahi tinjong aseiye.

Thusoh Lahchom

 

News Agency

Northeast News Agency kiti English News Agency thah May nisim 14 nikhon hondoh ahitan, Thongam Sunil Singh, senior journalist thuso editor hina’a hondohna um ahi. Agency commercial operation ahung lhung ding June nisim 5 nikho leh kihong pan ding ahi. Imphal khopi’a um thuso hi North East India pumpi’a um ding ahi.

LPG

Assam, Khatkhatti a kon LPG gapo ding in tuni chun LPG Bullet tanker 113 akipatdoh ta’uvin ahi. LPG poding’a kipandoh tanker ho kiloikhom chom chom in lamkah’a asuhboi lou ding in All Manipur Road Transport Drivers and Motor Workers’ Union in ngehna aneiye.

PDS

Tukum November a pat March gei hopding’a kikoi PDS rice quota ageina kihelouva aumna chungchang’a Consumers Club in alungkimlouna aphongdoh’e. Muona neihon lha ni sung’a a anchang guhdoh ho’u mipi ahop pehlou’uva ahileh legal action kilading ahi tin Consumers Club in aseiye.

NSCN-R

NSCN(R) in CFSB office, Mon Town, Nagaland gam’a Y Wangtin, Naga President leh P Tikhak Ato Kilonser lamkaina in 2nd Foundation Day amang uvin ahi. Kin-gon’a Y Wangtin leh P Tikhah Ato Kilonser, NSCN(R) in ahoulimna’a Naga ho kipunkhom ding leh chamna angaichat dan thu aseiyin, chule NSCN(R) ‘a pang thingnoimi ho liemna thu jong asei lhon in ahi. NSCN(R) officer, functionary leh thingnoi sepai tamtah kin-gon’a apang uvin ahi.

MASTEC

Manipur sung’a simlai ho tilkhouna ding in tuni chun Art and Culture Training Hall a nikho gup chelha ding motivation program na kihongdoh in ahi. Kinguon chu Manipur Science and Technology Council, MASTEC in aguon ahi. Kinguon a chun MU Vice-Chandellor lui HNK Sharma; Director, Science and Technology, Uttamchand Laishram ; MASTEC Director, Th Surendranth  le themjilna mun 13 a kon simlai 52 in pan ala’uvin ahi.

Thingnoi 2 kiman

Imphal West Police Commando hon tuni chun Chingmeirong Maning Leikai’a kon KCP (MC) cadre khat aman’uvin ahi. Akimandoh pa chu NIngombam Birjit , 44, s/o Brojen ahi. Alangkhat’a Imphal West District Special Cell le 6 AR combined team hon tuni jingkah’a Keirao le akimvel’a drive abolna’uva PREPAK cadre khat amandoh’uvin ahi. Akimandoh PREPAK cadre pa chu amin Mayengbam Sanathoi ,21, ahi. Ama hi Sekmaijin Khoidum a cheng Tarzaan chapa ahi.

Editorial

KIM lamkai leh danbu thah

                            Kuki Inpi Manipur (KIM) lamkai thah kilhenna chu ningkum bep anahin tukah-a President Thangkhosei Haokip in haina lekha apeh tolhon’a President thah lhenna ahung um hi asunglang’a ipi tohgon umham akihepon hinlah tutua lamkai hohi ivetleh pao khat tho ho kivaipohna (Inpi) hitalouva ‘Tribe’ phabep a-kon lamkai ajaosaosao hi KIM semphatna ahidi kinep umtah ahi. Abul’a pat KIM hi Thadou-Kuki pao tho ho kivaipohna tobang anahi jeh-a khangthah lekhathem phabep hon Manipur’a Kuki min’a kipunkhomna aumlouleh Politics lang’a chanvou munadi hahsante ti amudoh jeh uva ‘Kuki Reformation/Restructuring’ (Kuki semphatna/semtupna) ti ahinchepiuva ichan hamkhat hung machal u ahi. Tutadi a dia KIM lamkai panmun thupidom ho tuh hi Zou, Hmar, Simte, Kom ho ahung hitan amaho hin KIM hi ichan machalsahna lampi’a ahinpoh diuham, ahilouleh abang bang ahung hibepdem seithei ahidehpoi. KIM hi ‘Tribe’ khat (pao khat thoho) bou kivaipohna ahi tia Election umdi gei anajahda kha Kuki thingnoi loikhat ana umkhasa ahi. Hitia gelho seidan ahileh Kuki sung’a Tribe tamtah um ahijeh in Tribe jouse hihih jongleh atamjo beh KIM kivaipohna ah hungpang uhenlang lamkai panmun tuhna jong kihopna/kikhelna umjileh Kuki hi hung dih intin hung machal inte ti ahi. Alangkhatna lunggel neiho seidan ahikitleh Kuki noiya koi Tribe hileh KIM a hung pangnom/hung lutnom aumleh ‘welcome’ akibol’in koima akijahda khapoi, akikou kisan’a hungnomlou chu adasasa’a kijaosah theilou ahi ti ahikitne. Chuleh paokhat tho KIM kivaipohna’a um hohi kithutoh tah-a aum uva KIM chu asuh hat uva mi kineppi thei ahiteng tua ajaolou hojong hung jaonom taovinte ti ahi. Aseilang lang adihna chan umgel ahi. 2015 kum’a Manipur govt nin Anti-Tribal Bill 3 ahinpohdoh a pat ipi kisei jongleh Manipur thinglhangmi hohi Naga ahilouleh Kuki khat joh-joh akihilouleh Govt akon bitna leh phatchomna munadi ahahsatdan hetdoh anahie. Hiche akon’a Kuki hihen KIM hileh semphat a hatsah bedi ti hung umdoh ahi.

                          KIM semphatna dia chu ahoplen ngai ahi. Hichena dia tutua KIM Constitution (danpi) semphat dia kisei hi thildih ahi. Tribe tamtah, pao chuom-chuom tho ho kivaipohna khat chu atampen ho pao mandi ti lunggel pailhah a English pao hi ‘official language’ a neiya Constitution jong English a jih a, Meeting proceeding hojong English a sutdi hi KIM semphatna dia ABC hidi ahi. Mi masa jep ho khang’a Thadou pao/Kuki pao a ‘Meeting Proceeding’ jihteidi tijeh a ana kiboikhasau ahidan kihilna’a neidi ahi. Pao kiheto thei ngen kiti jongleh Kom leh Hmar langho Thadou/Kuki pao helou tam ahi. Chuleh tua kihamanten thucheng ho – Kumpipa, thuchingpa, lhangsampa, thumop-pa, etc. ho hi Kuki Tribe tamjon amanlouheldi ahijeh in kitonapen leh abailampen dia President, Secretary, Information Secretary, Advisor, etc. itile kichai jeng louham! Chuleh tua KIM lamkai thah hohin ama mimal (individual) bepma KIM jao hilouva a-Tribe u kiloikhomna hojong KIM a ahinpuilut lou uleh KIM hi Kuki Tribe ho kigopkhomna leh kivaipohna ahi ti hahsa thou thoudi ahi.

Blankfire

Program kimanna khatna touna di eiki kopeh louleh touna a ongnai tia moh tou jeng kiti hi ei le ei kijumsona sohthei ahi. Chuleh min thusei di le lasa dia eidei mong hinam ti jong gellouva thusei lasa dia moh dindoh jeng jong bolda a phatah ahi.