ET May 18, 2017 News (Local, Thusoh Lahchom, Editorial, Blankfire)

ET May 18, 2017 News (Local, Thusoh Lahchom, Editorial, Blankfire)

596
0
SHARE

Tolthat ho kimat loujeh’a Sugnu-Chakpikarong lamlen kikhah

Imphal, May 17: Serou Lamkhai mun’a Wednesday jingkah’a konin Nengneikim Haokip leh Kaikholen Tuboi kitha lunglhai louna neiya mipi hon Sugnu-Chakpikarong lamlen akhah uvin ahi. Nengneikim leh Kaikholen thi-long hi achesa May nisim 5 nikho’a Moltinchan leh Khumjang, chandel district’a kimu doh ahi.

Thilsoh toh kisaiya kisemdoh JAC hon May nisim 14 nikho’a themmona neiho amat uva gotna apeh nading uva nidan 48 phat atep-u ahi. Niseh thuso’a JAC in thuso aneina’a chu, mopohna neihon thumna abulhit louleh JAC in kiphinna abolding ahi, tia gihna aneiyu ahi. Aphat kitep akichai jouva Serou Lamphai mun’a niso’a kon vengsung numei tamtah kikhom uva Sugnu-Chakpikarong lamlen atin-u ahi.

Bandh kibol jeh’a lamlen’a che gari hon hahsatna atoh uvin ahi. Sugnu police station’a kon police team hon boina aumlou nading’a thilsoh vetsuina anei uvin ahi. Kum 21’a upa Nengneikim @ Shiela hi akitha masang’a hunam’a kisuse ahi’in, chule Kaikholen hi aluchang thil gih’a avel vel’a akikhet jeh’a thi ahi.

JACAATB in UCM thuso nielkal

Imphal, May 17:  N Biren Singh lamkaina sorkar thah in gamsung’a boina chom chom ho suhlhapna ding’a pan alahjing laitah’a United Committee Manipur (UCM) in May nisim 15, 2017 nikho’a Manipur Press Club’a thuso miho heng’a Sixth Schedule hin Manipur gamsung asuhkeh ding ahi ti’a ahin sei hi vangset umtah le lungboi umtah khat ahi tin Joint Action Committee Against Anti-tribal Bills (JACAATB) a kon kimu thulhut in aseiye.

Thulhut in aseidan in phaicham a cheng hon sixth Schedule in gamsung asuhkeh ding ahi ti’a asei’u hi thinglhang mite chung’a vaihop ding adeijeh’u ahi. Thinglhang mite hin achenna gamsung’uva khantouna le administrative service ho kisuhtah’a amu ding’u adeijeh’uva Sixth Schedule chepi ahi ding adeisah’u ahi. Sixth Schedule hin Manipur gamsung asuhkeh sang’a avenbit joh ding ahi.  Thinglhang mite’n Sixth Schedule angeh’u  phaicham’a chengho ding’a aphat pet ahi’n, iham tin thinglhang mite hin kivaihopna lenjep hindei’u henlang hile Manipur gamsung keh tei ding ahi.  Sixth schedule hin thinglhang mite autonomy apeh ding chuleh Manipur territorial integrity jong avenbit ding ahi. JAC le Manipur Government kah’a MoU soi kaiya SoO a um thingnoi ho’n jong soi akai’uve ti’a UCM lamkai hon nahnoi kamhom thusei bang’a amoh seijeng’u hi jachat umtah ahi. SoO group hon  State Government toh MoU aneina’uva jong tupet tah’a JAC le tribal CSO hon Sixth Schedule angeh’u hi kipetheilou ding ahi ti’a aseiyu ahi.  JAC toh Government in MoU akineina’a hin thingnoi khat in jong soi akai po’n pan jong alapoi. UCM in Hill Areas Committee thaneina lahpeh ding le Indian Constitution Article 371C  suhmolphou ding aguot jing hi alelhah’a  alungsung’a ‘Manipur’ kiti  thucheng le ‘territorial integrity’ kiti thucheng hi phatah’a avel’a agelphat a pha ahi. Hiteng chuleh thinglhang miho’n jong akhonung ding’u ahin kigel thei ding’u ahi.  Union Government in jong thilsoh ho hi laam vet’a avetsang’a thinglhang miho gentheina suhbeina ding’a pan alah phat ahitai. “Development” minpu’a divide and rule policy chepi’a thinglhang mite jou lhep phat kichai ahitai. Tuchung MoU kikai hi achainapen ahipo’n, khonung geiya thinglhang mite’n rights aneiho’u le agam ago ho’u venbitna ding’a pan ahinlahpan na’u bou ahinalaiye tin JACAATB in aseiyin ahi.

Kitho khom leh kihetthem to hin lolhin na ahinpoh lut ding ahi tia Th. Biswajit in sei

Imphal, May 17 (DIPR): Public Works Departmen,Manipur makai na’a Public Works Department Office, Khoyathong conferene hall mun’a kingon ana um ahi. Hiche kingon na’a Work Minister Th. Biswajit in aseina’a chun; kihet to them leh  kitho/toh khom hin lolhin na ahin poh lut ding chuleh natong ho kikah’a  kihetthem tolou na aum teng khantou machal nalam asugang thei ji pon ahi ati.

Government thah hin natong (employees) holeh Ministry kikah’a kijop mat theilou na ana um hohi thah jop toh thei na ding in pan nasatah in akila in Publis Works Department in hitobang pan hoitah alah nao chung ngah akipa na aphongdoh in ahi. Nort east sung’a ding’a Manipur hi technical field lam’a ding nga akhat na ahi in Central government in North east leh Jammu and Kashmir hi cham naleh khantou na aum thei nading in aha khoh sah lheh in ahi. Commissioner (work) K. Radhakumar in aseina’a chun; pumkhat hina department so nading’a hin kihetthem to naleh kithokhom hi angaicha pen ahi chuleh natong ahung lut thah honjong nasan nga senior ho chung nga kon na kihil anei ding uvin temna jong anei in ahi. Hiche kingon nachun Parliamentary Secretaries, Awangbow Newmai, L. Rameshwar chuleh Public works Department staff hon pan ana uvin ahi.

Transgender ho nu le pate’n achateho’u mihem bang’a asasah ding’uva Edn. Min in temna nei

Imphal, May 17: Indira Gandhi National Tribal University, Regional Campus, Manipur in tuni chun Tribal Research Institute, Chingmeirong  a Social Work department toh kitho in International Day Against Homophobia, Biphobia, Transphobia 2017 ana guong in ahi. Kinguon a chun Education Minister, Th Radheshyam; Humsafar Trust CEO, Mumbai, Vivek Anand; Director in-charge, Tribal University, Ngalengam; Advisor to Chief Minister, P Sharatchandra le Social Scientist, Dr Dhanabir Laishram in pan ala’uve.

Edn. Minister Radheshyam in ahoulimna’a chun, society khantouna ding’a transgender ho’n pan alahthei dan’u chungchang’a houlimna aneiye. Chuleh transgender ho nu le pate’n achateho’u mihem bang’a asasah diuvin temna aneiyin ahi.

Edn. Minister in Imphal College vil; College Principal in college a dia angaicha phabep phong

Imphal, May 17 (DIPR): Education Minister Th. Radheshyam in tuni (May 17) chun Imphal college infrastructure condition ho vetlhahna aganeiyin ahi. Campus sung vilna aneiyah chun college Principal leh staff hon anung ajui uve. Achesa 2014 kum’a Teddim Road kehletbe na ding’a college compound abeh neokhat kilah lhah’a kipat tuni Minister khat in hiche college ahungvil hi amasapen ahi nalaiye.

Principal leh staff hon hiche college a angaicha thil le lo ho Minister pa hengah alhut uvin chule hiche college a simlai hon Philosophy subject aumding adeisah’u toh kilhon in Minister pan ahin ngaito ding’in Principal in temna aneiyin ahi.

Teddim Road akehletbe jeh uvin college canteen, chowkidar quarter, student’s union room, numei pasal common room teni chule college mun phabep jong asetloi tin Principal in Minister heng alhut kit in ahi.

Minister in canteen chu chomkhat a dia college campus sung’a sahthei ahin ahinlah campus leh development dang dang ho ding’in college official hon angaicha jouse proposal ahinbol ngaiye ati.

Multipurpose hall 2 leh outdoor hall khat guotwi vat jeh’a manlouva um ahitai tia staff hon aseiyuvah chun Education Minsiter Th. Radheshyam in alungkimlouna aseiyin ahi.

Hiche college a simlai 2201 alhingtan hiche toh kilhon chun Principal in Minister pa hengah college classroom hojong smart classroom hisah theina ding’in temna aneikit in ahi. Chule college building jonghi kum 60 hungval ahitan semphat phat jong ahitai tin Imphal College Principal pa’n aseikit’e. Hetthei khat chu Imphal College hi 1952 kum’a anakisa ahitai.

Minster Nemcha Kipgen in Takyel a mitobanglou ho umna phabep vilna nei

Imphal, May 17 (DIPR): Minister of Social Welfare and Coorporation Nemcha Kipgen in Government Ideal School, Government Deaf & Mute School, Government Legal Aid Clinic/School leh Observatoin & Special Homes for Juvenile in conflict with law, Takhelpat ho vilna aganeina ah hiche mun hohi tulai khangtoh toh a semphat ding ahi tin aseiye.

Villhahna aneina ah Nemcha Kipgen in baang’a kon’a twivat ho, inchung’a kon’a guotwi vatlutna ho, common hall kisemdan leh amun ho, floor kiboldan, hostel building, kitchen, electricity, drinking water supply/tank  leh twinen lonna kisuhlou hojong vetlhahna aneiyin ahi. Observation & Special Home for Juvenile in conflict with law a fencing baang leh security post jong avelha’n ahi.

Achunga kiminphah institution a lamkai luboh hon itobang hahsatna akimaitopi uvem chule bolding/tohding angaicha ho jihtho in hinpelut u hen tin Nemcha Kipgen in thuso miho akihoupina ah aseiye. Mitcho ho lekhajem hettheina machine ‘Braile’ jong athah khelding, hostel ho’a kimang lupna hojong manthei aumbeh tapon akinthei lam’a athah khelding ahi tinjong aseiye. Juvenile home a um simlai hojong angailut bol uva adamtheina diuva pan hatah a alah diuvin Social Welfare Minister Nemcha Kipgen in institution luboh ho hilna aneiyin ahi.

SC lawyer Ushap thusei hi abul abal umlou thu ahibouve: Khaidem Mani

Imphal, May 17: Supreme Court Lawyer Ushap Singh in thuso miho heng’a Irom Rojer case hi Manipur sung’a um lawyer hon alah lou’uva ahileh keima’n kalah ding ahi ti’a asei hi IPC Section 177 dungjuiya achung’a action kilathei ahi tin Senior Advocate Khaidem Mani in aseiye.  Hiche thu hi Khaidem Mani in tuni Cheirap Court Complex a thuso miho toh akihoulimna’a asei ahi. Aman aseidan in Lawyer Ushap Singh in ‘Manipur sung’a um Lawyer hon Irom Rojer case ala nom po’uve” tia aseihi abul abal umlou thu asei ahibouve.  Hiche thu kisei hi High Court Bar Association le All Manipur Bar Association in sangtah in demna aneiye tin Khaidem Mani in aseiyin ahi.

Maoist thingnoi mihon Labour department gihna nei

Imphal, May 17: Maoist Communist Party Manipur (MCPM) in Wednesday nikhon Labour and Employment Department, Manipur government noiya phatchomna mu ding hon amu diudol thil amu pouve, tin thuso anei uvin ahi.

Department in apeh card neiho hin dangka 10,000 amu diu ahi’in, thulhut dungjuiya mi 1000 val labour card kihom doh ahi. Ahin, card neiya mi phabep hi ‘natong’ (labourer) ahi pouve, ti hetdohna um ahi, tin Maoist hon asei uvin ahi. Awareness campaign kibolna ahi, tia department in dangka 30,45,000 alam louva aman ahi, tin jong ngohna aneiyui.

Department in labour card kipe’a worker ho min hi mipi hetthei ding’a ni sagi sung’in sodoh uhen lang chule working class ho ding’a kipe sum lamdih louva aman dan-u suhthengna neiyu hen, tin thuso aneibe uvin ahi.

KIM lamkai thah kilheng

Imphal, May 17: Achesa April nisim 20, 2017 nikho’a Thangkhosei Haokip in Kuki Inpi Manipur (KIM) President tohmun’a kon’a haina ananei toh kilhon in tuni (May 17) chun KIM in cabinet reshuffle anabol in ahi. Kuki Inpi Manipur kihoulhahna 1&2 dungjui in anoiya hohi lamkai kilhengdoh thah ho ahiuve. Khamliankhup Lianzaw (President/Inpipu), Lunpi S. Thangjom (Vice President, Internal Affairs & Election/Semang), Akhel Aimol (Vice President, External Affairs/Semang), Dr. Chinkholal Thangsing (Vice President, Administration/Semang), Lalrobul Pudaite (General Secretary/Thuchingpipu), K. Shatlen Kom (Joint Secretary/Thuching), Shokholun Mate (Information Secretary/Lhangsam), KC Guite (Legal Advisor), Thangkhosei Haokip (Advisor/Thumop). Amaho hi 2017-2019 changeiya ding’a kilhengdoh ahiuve.

Shirui Lily festival a chenom ho ding’a Transport Dept. in bus guong

Imphal, May 17: May nisim 16 apat nisim 20 gei chelha ding Shirui Lily Festival a panla  nom ho ding in Transport Department in Bus  ni aguong in ahi. Shirui Lily Festival a panla nom ho ding’a  North AOC a um Imphal Hotel maiya jingkahlam nidan 9:30-9:40 kikah’a Green Valley bus  khat kikham jing ding ahi. Bahara mikhat a Dk.100 hiding ahi. North AOC juon nomlou ho ahilou le juontheilou ho ding’a jong ISBT Deulahlane a jingkahlam nidan 9:45- 10 am kikah’a bus khat kinga jing ding ahi. Mi 42 tounathei bus teni hi Ukhrul a pat nilhahlam nidan 5 le hung kipandoh ding nilhahlam nidan 8:30 le Imphal hunglhungji lhon ding ahi.

Lou lhou hon jatni’a income amu thei ding dan’u awareness programme ana um

Ccpur, May 17 (DIPR): Churachandpur,Pearsonmun Lamka kho sung’a um Krishi Vigyan Kendra mun’a tuni chun Participatory Meeting on Development Strategies for Double Farmer’s Income ti thupi mangchan kingon ana um in ahi. Hiche kin nachun Jingun’a ding in Minister Agriculture and Animal Husbandary, V. Hangkhanlian; President ading in Joint Director, ICAR Research Complex of NEH Region, Manipur Centre, Narendra Prakash chuleh Senior Scientist and Head KVK, Churachanpur, Lamka, Dr. Niranjan Lal apang uvin ahi. Minister in agriculture leh animals programme district sung’a lou natong ho ding nga abol ding dan  chung’a awareness abol peh nachung ngah  KVK chung’a kipa thu aphongdoh in ahi. Prime Minister Modi sevent strategies chun 2022 kum kah hi lou bol ho in jatni’a income amu thei nading thu hojong hetsah na anei in ahi. Minister in Churachandpur district lou bol ho kom in Jalkund Polysheet, Ginger leh groundnut decodicator hopeh najong ana nei in ahi. Hiche kin nachun DAO, Sericulture, DFO, NABARD, SBI Manager of churanchandpur, NYK, NECROMP, NGO, Khosung haosa ho,Farmer club ,progressive farmer chuleh Krishi Vigyan Kendra, Churachandpur honjong pan anala un ahi.

All Manipur Petroleum Tanker Driver Union in ngeh na nei

Imphal, May 17: Kangpokpi district, Changoubung mun vel la achesa nisim April 18 leh 30 nikho ni’a oil tanker kibulu jou apat tuni chan in boina ema suh lhap ma aum lou lai jeh in driver leh handymen hon  hahsat na tamtah atoh jing nalai un ahi.

Gah hetthei khat chu hiche melhet lou hon oil tanker ana bulu nao achun driver khat leh handyman khat jong anakisu khalhon in ahi. Hiche chung thutoh kitoh in All Manipur Petroleum Tanker Drivers Union in gari lhai ho boi na em umlou va phate cha alhai thei nading uvin mopoh nanei ho kom’a agang thei penna hiche chung chang thu hi asuh lhap peh ding uvin ngeh na anei in ahi.

Cultural Forum in kiphudohkal kum 59 lhinna nit

Imphal, May 17: Cultural Forum in tuni chun kiphudohkal kum 59 lhinna anit in ahi. Tuni kinguon a chun mi nga in Lifetime Achievement Awards akisan’uvin ahi. Kinguon a chun Education Minister Th Radheshyam Jin-gun in apang in Forum President Huirem Behari kinneipa in apang in ahi. Kinguon chu Lamyanba Shanglen a ana nit’u ahi. Forum in Padma Shri Award sang Laishram Birendrakumar le Wareppa Naba kipapi vetsahna’n citation khatcheh ape in ahi. Cultural Forum in category chom chom in mi nga Lifetime Achievement Award ape in ahi. Amaho chu traditional & folk Song category a kon Takhelchangbam Nganba Sharma, Sumang leela catefory a kon Hanjabam Nandakishore Sharma, Meitei Pung Category a kon Thokchom Keran, Khongjom Parva category a kon Shougaijam Shamu chuleh Amaibi (shaman) category a kon Laishram Ningol Soraisam Ongbi Baruni ahi’uve.

“Culture le literature hi society ding’a phatvet tobang ahi. Lekhabu sun khat lekha sut in mihem khat aka sah theiyin chuleh anuisah theiye. Lunglut tah’a lekhasim hin mihem khat tahsa le lungthim pohgih’a kon akicholdo sahthei ahi” tin Edn. Min. Th Radheshyam in kinguon a ahoulimna’a chun aseiye.

Karam Shyam in MDS demna nei; godown kisahna natoh agency chom peh ding’a sei

Imphal, May 17: Consumer Affairs of Food and Public Distribution (CAF and PD) Minister, Karam Shyam in Wednesday nikhon Bishnupur Chingning leh Sawombung mun’a godown kisa vetlhahna aneiyin ahi.

Manipur Development Society (MDS) in godown sana natoh alah hi gamsung mi ding’a vangset umtah ahi, tin aseiye. Godown kisahna mun vetlhahna umding, sorkar in sanction abol bang’a natoh achelhah louva ahileh themmona neiho chung’a action kila ding chule sorkar in natoh hi agency dang apeh ding ahi, ajeh chu MDS in project abon’a achai jou louding ahi, tin Karam Shyam in aseibe in ahi.

Godown kisah chailou hi sorkar in nahsah louva akoi louding, aganna thei pen’a akisah chai nading’a agency dang khut’a apehdoh ding ahi, ati. Chule Churachandpur leh Thoubal district’a godown kisahna natoh jong agency dang kipe ding ahi, tin aseiye. Godown kisahna mun avilna’a Minister in contractor ho heng’a phatah (quality neitah)’a asah uva chule aganna thei pen’a akisah chaiya ahileh kipaman peh ding’in jong contractor ho heng’a aseiye. Public Works Department (PWD) natoh amachalna chung’a kipathu aseiyin ahi.

Godown vilna’a K Radhakumar, CAF and PD Commissioner; Ranjan Yumnam, CAF and PD Director, Ksh Thoiba, Deputy General Manager, FCI, Regional Office Imphal chule official dang dang jong apang uvin ahi. Food Co-operation of India (FCI) noiya Bishnupur Chinging’a godown 5000 metric ton leh Sawombung mun’a 10,000 metric ton godown kisa team hon vetlhahna aneiyu ahi. Hetthei khat chu sorkar in district chom chom’a godown 15 sah nading’a tohgon anei ahi’in, CAF & PD Department in Thoubal, Churachandpur, Chandel, Tamenglong, Bishnupur leh Imphal East’a godown asah pan ahitai. Chule Chandel leh Tamenglong district’a godown sah nading gam leiset thu’a kinel baotamna aum jeh’a khongai ahi.

MBOCWWBM chairperson kilhenna ding’a member hon ngehna neiyu

Imphal, May 17: Manipur Building and Other Construction Workers’ Welfare Board, Manipur MBOCWWBM member thum- A Premkumar Singh, L Bimolchandra Singh leh N Amusana Devi in Board Chairperson a-ong’a um akilhen nading’a mopohna nei authority ho heng’a thuso mangchan ngehna anei uvin ahi.

Member thum in soi akaina thuso’a chun, sorkar in notification apeh dungjuiya achesa December nisim 16, 2015 kum’a Board Chairperson ding’a Principal Secretary, Labour and Employment kilheng ahi’in, ahin, achesa April nisim 25 nikho’a kon hiche panmun hi a-ong’a um ahitai, ati. Chairperson panmun tuh ding hi deputy commissioner rank noi hida hen, tin aseiyun chule Central government nominee ho alhen diuvin temna aneibe uvin ahi.

Gari’a mi tat khat kiman ta

Imphal, May 17:  Achesa May nisim 15 jan’a Thoubal babu Bazar’a lamlen tosetna thilsoh’a mi tat kha’a jam pai paiya gari Thoubal police hon aman tauvin ahi.

Thilsoh’a kum 50 upa numei khat alu sangtah’a kitongkha ahi. Thulhut dungjuiya, police hon kholna anei nauva akiholmo Maruti Alto car diver hi Khurai Lairikyengbam Leikai’a um ahi, ti hetdohna anei uva, driver pa amat jou uva gari amat-u ahi. Gari tolpa hi Gurumayum Milton Sharma, s/o Indramohan ahi. Milton hi Imphal khopi’a ahung kile na’a Kiyam Amurijam’a cheng Samungou inneipi Huidrom Radhe jan nidan 7.25 don’a gari’a atakhah’a jam pai pai ahi. Numeinu hi tu-leh-tu’a Raj Medicity’a kijen ahi.

“Rights of persons with disabilities act, 2016” workshop chelha

Imphal, May 17: Handicapped Development (HD) Foundation, Manipur leh Centre for Community Initiative, Churachandpur in Manipur Press Club mun’a Wednesday nikhon “Rights of persons with disabilities act, 2016” thupi mangchan state level workshop abol uvin ahi.

Workshop’a Sapam Jasobanta, Secretary General, HD Foundation, Manipur in houlimna aneiyin, workshop hi President in phatsahna apeh persons with disabilities (PWD) Act, 2016 thuchen seikhom nading ahi, ati. PWD Act, 2016 hi akichepi’a kon’a PWD Act 1995 ‘a ‘equal opportunity, protection of rights, full participation act, 1995 hi dan (act) thah in akhel ding ahitai, ati.

Chule dan thah noiya tahsa tibukimlou ho insung miten athanei nau athum thei nading thuhilna umding ahi, tinjong aseiye. Hetthei khat chu PWD Act 2016 hi President in achesa December nisim 27, 2016 kum’a phatsahna apeh ahi.

Thangmeiband JAC in ju tamtah amat ho sumang-u

Imphal, May 17: ‘JAC against Drug and Alcohol’, Thangmeiband in Lamphel Super Market Complex, Imphal West’a ju kijohna mun kholna aneiyun, Tuesday nikhon hiche mun’a konin ju mantam aman uvin asumang uvin ahi.

Tu masang, achesa May nisim 10 nikho’a jong JAC in Thangmeiband Khomdram Selungba Leikai’a dukan khat kholna anei uva, beer bottle 36 leh IMFL chule gamsung’a kisem ju litre 65, agom’a dangka lakh 30 vel man amat uva, asuhmang-u ahi. Tuesday nilhah’a kiman ju ho jouse jong meiya ahal uvin ahi.

Gamsung’a ju kiphal lou (dry state) ahi’in, mun tamtah’a ju kikoi hin society apuimang ahi, tin volunteer Shivkumar Ahongshangbam in aseiyin ahi. “Society suhtheng nading’a ‘drive’ kibol jom ding ahi”, ati. Super Market Complex, Lamphel’a JAC in kholna anei nauva chun numei khat leh pasal khat jong ajudon pet tah in aman uvin, anilhon’a police khut’a apelut tauve. Lamphel Super Market hi society douna thilse kibol na mun soh ahitan, hiche hohi akisuhtheng louleh Imphal mun lentah atohkhah ding ahi, tin JAC in aseibe in ahi.

‘Intl. day on Homophobia’

Imphal, May 17: Tribal Research Institute, Imphal khopi’a Wednesday nikhon Humsafar Trust, Mumbai leh Department of Social Work, Indira Gandhi National Tribal University in ‘International Day on Homophobia, Transphobia and Biphobia’ kin-gon amang uvin ahi.

Education Minister Radheshyam kin-gon’a Chief Guest in apang’in chule Dr Ng Ngalengam, Director in charge, IGNTU, Regional Campus leh Dr P Sarat, MLA leh CM Advisor president leh Guest of Honour’a apang lhonin ahi. Amaho tilou Dr. Dhanabir Laishram Social Scientist, S. Premananda Sharma Vice President BJP Manipur Pradesh Abiram Mongjam Joint Director MACS chule K. Saroja Deputy Director (training) Dept. of Social Welfare jong apang uvin ahi.

NERCORMP Project noiyah Tanky ki hong

Lien S. Gangte

Ccpur, May 17: NERCORMP Churachabdpur in a Poject kho’u Tuibong block noiya K. Salbung kho’a K. Salbung NaRMG ho Safe Drinking Water (Small) sah na ding in dangka 50050/- ana peh na ban uvah, K. Salbung NaRM_G hon dangka 25000/- chuleh, ECA houbung in dangka 21500/- ana tohdoh uvin, RCC water tanky lom tah ana lam doh uvin ahi.

Hiche tanky hondoh na D. Khaipao Haokip, Chairman ADC, Churachandpur in 16th May, 2017 jinglam nidan 7:30 chun Chief Guest hina toh hondoh na aneiyin ahi. Aman holim anei na’ah, NERCORMP in khosung kithopi na ding in sum kininglhing pejou hih jong leh asum kipe doh toh te’a khosung mipi’n na atoh jeh uvin khosung mipi chung leh Project Manager leh a team ho chung ah akipa na thu aphong in ahi. Chuleh, D. Khuala Vaiphei, Project Manager, NERCORMP Churachandpur in mipi ho pankhom na chung ah akipa na thu aphong in, K. Salbung khosung’a beneficiary inn 25 kihap be ding ahi tin jong aseiyin ahi. Chuleh, Khosung a lamkai, AWCA Chief Functionary, Supervising Officer ho chung ah akipa na thu jong aphong in ahi.

 Pumtulthang Lienzaw, EM, ADC Ccpur, Grace Zamnu, member ADC, Ccpur ho jong hiche kingon ahin ahung pang uvin ahi. K.Salbung hausa Pu DT. Haokip in holim na jong aneiyin ahi.

Mipite Nikho lolhingna chung’a Chuief Minister in akipa thuphon nei

 Imphal, May 17 (DIPR): Chief Minister N. Biren Singh in amasapen ” MIPI TE NIKHO” alolhin na chunga kipa thu ana phong in ahi. Chuleh Deputy Chief Minister, Council of Ministers, Chief Secretary, administrative secretaries jouse, department jouse a lamkai ho , Deputy Commissioners, SPs chuleh BDOs/SDOs ho chunga jong che nikho a mipi genthei na le hahsat naho ngai a apan jeh uvin kipa thu ahi phong in ahi.

Chief Minister pan asei be na a council of Ministers hon hiche mipi ho hahsat nale genthei naho hi agan nathei channa asuh lhap diuvin jong aphong in ahi. Chuleh ama ama department a official hon mipi te hahsat na thu peh na dinga hi mobile no. ahiloule email apeh diu ahi ati. Aman akitep na a gam vaipoh a kitoe na le thutah aum nadinga ama government in nasatah a pan laah ding daan jong asei inn ahi.

Hetding khat chu “MIPI TE NIKHO ” hi hiche government thah hin mipi toh government in gamsunga hahsat na le genthei naho suhlhap nadinga ana bol u ahi.

Maternal le Child Health awarness kinguon kibol

Imphal, May 17: Mipi  hon Maternal le Child Health awareness aneitheina ding’u le immunization aphatcha’a akikap theina ding’u lungtup neipum in tuni chun Hotel Imphal’a two-day workshop ana kihongdoh in ahi. Kinguon chu Hou lamkai ho panlahna’a ana kiguong ahi. Kinguon a chun Chief of Field Officer, UNICEF Office for Assan & North East States, Dr Tushar Rane; Director of Family Welfare, Dr K Rajo le Director of Health Services and Mission Director, NHM, Dr Karam Lokendro in pan ala’uvin ahi.

Minister L Jayentakumar in kinguon a ahoulimna’a chun, sorkar in naovop nupi ho neh le chah hoitah pehna ding in pan akilajing in chuleh lou le ai jong manbei in akihop peh jing’e tin aseiye.

Building & construction workers’ Welfare union in State convention bol’u

Imphal, May 17: Building le Construction workers’ Welfare Union in tuni chun Irawat Bhawan a nikho khat bou chelha ding state convention abol in ahi.  Kinguon a chun Deputy Labour Commissioner, E Tomba; General Secreaty, All India trade U nion Congress, Manipur State Unit, L .Sotinkumar; Central India Trade Union lamkai Sh.Shanta le Working Women Forum Manipur Y.Indrani in pan ala’uve. Kinguon a chun Sotinkumar in asut  17th World Trade Union Congress le 1st General Conference kiti lekhabu ni hondohna jong abol’uvin ahi.

All India Building and Under  Construction Workers Act hi Manipur gamsung’a jong chepi ding’a phatah ahi. Natong ho health assurance jong Dk.1 lakh beh ahi ngai ahi. Centre in beneficiary list a kon job card natong phabep min akah hi revoke abol’a , job card worker ho alhompen’a nikho somgup vel natoh apeh ding’a pha ahi tin Sotinkumar in ahoulimna’a aseiyin ahi.

World Hypertension Day ahitoh lhon na Sky Hospital in free camp bol

Imphal, May 17: Sky Hospital, Porompat in World Hypertension Day ahitoh kilhon in free heart camp ananei in ahi. Camp hi Sky Hospital,Porompat leh Manipur Heart Care Foundation kitho khom lhonna anabol lhon ahi. Hiche camp mah chun free hypertension, diabetes check leh ECG test jong anabol un ahi. Mihem tamtah hi heart attacks leh heart diseases akon na kiven jie ahetlou jeh uvin genthei/thohnat na athoh jing uvin ahi. Chuleh hitobang natna nei hon aphat cha check up ache jing’u ngai ahi tin Manipur Heart Care Foundation,President chun hil na tohgom in temna anei in ahi.

Khurai Assembly constituency mun’a nala suhtheng jeh’a inn khat kisuse kha

Imphal, May 17: Tuni chun Khurai mun’a nala (drainage) suh theng na ananei nao in Thoudam Lekendro inn chu nala toh akinai jeh chun a inn chu anasuh chim peh khah toavin ahi. Hiche thilsoh hi jingkah lam nidan 11:30 Imphal west, Kongpal Iranpham Thongkhong kom’a soh ahi. Khurai Assembly constituency in  go juh seh leh nala kisuh lou jeh’a twi leh na aum jing ahet ahitoh kilhon na Khurai Kendra Development Association in go ahung ha juh masang nga nala ho sutheng soh ding ati’u ahi. Vangset um tah in nala kisem dan ahoi lou jeh chun nala ning khat ahung ke lhah phat chun Lokendro inn chu ana suh lhuh khah ahi. Amun na um ho’a kon na kimu thulhut dungjui in hiche nala (drainage) hi government masa lang hon kum 3 masang nga anasep’u ahi ati chuleh hiche nala kisem na’a chun avai feet 12 leh asan dan feet 9 sung in thih(iron) khat jong ajao pon chukeu hilouvin slab kilhei jong khat cha aum poi ati uvin ahi. Hiche thu toh kisai in Khurai Kendra Development Association, Athokpam Thomas in hitobang nala sem na’a anapang ho gotna kipe ding ahi ati.

Thusoh Lahchom

Dengue Day

District Health Society, Imphal West in Regional Health and Family welfare Training Centre, Lamphelpat mun’a Wednesday nikhon National dengue Day anit uvin ahi. Kin-gon hi vector born disease natna suhthip nading’a kibol ahi’in, kin-gon’a houlimna nei hon Dengue natna asodoh dan chule akiven nading ho thu asei uvin ahi.

MU contractor

Manipur university Campus sung’a natoh chelha ho bill pending a aumjeh’a lungkimlou vetsahna’n tuni chun Manipur University Contractors’ Association in campus sung’a tou-mun kiphinna abol’uvin ahi. Kiloikhom, President, L.Gojen in aseidan in 2014 kum’a pat University semhoina ding’a natong contractor hon bill pending’a aumjeh in boina tampi atoh’uvin, hiche thu hi authority concerned heng’a jong avel vel in hetsahna akineitai. Ahinlah authority concerned lang’a kon tunigeiyin donbutna kichehtah akimu hihlaiye.  Authority concerned in pending’a um bill ho agangtheipen’a ahin lhadoh louva ahileh contractor jouse’n natoh kihaisanding ahi tin L.Gojen in gihna aneiyin ahi.

Bus kibulu

 Miphalou themkhat in Demow, Sivasagar mun a jaan a bus lhei khat song in ana sep uvin  mi tamtah ana kitongkha in ahi. Akitongkha holah a chapang khat jong ana jao in ahi. Akitongkha hochu Demow Model Hospital a ana kilhut in ahi. Police hon hichu thu toh kitoh hin khol chil na ana nei pan taovin ahi.

AR

Nambashi leh akimvel’a um khosung mihon Kashung Khullen block, Ukhrul district’a um E Coy, 17th Assam Rifles, Kashung outpost in achesa May nisim 14 nikho’a ‘medical camp’ abol uva chule man beiya mi jenna leh lou-leh-ai chule kichep golseh’a kimang thil ho man beiya ahop peh jeh uvin kipathu aphong uvin ahi.

Mihem’a kivei

Suwalkuchi police in mihem kiveina a ana kipui mangkhat UP mun a Muzaffar Nagar a ana hudoh uvin ahi. Aki pui mang pahi Baksa district, Labdanguri apat ahi akiti. Amanu hi Hajo district, Dampur akon Mukul Ali kiti khat in mihem akivei ho koma ana johdoh ahi. Suwalkuchi police hon Mukul chu ana man taovin ahi.

Training

District Immunization Officer, Tengnoupal in tuni chun Medical Officer, ANM leh Female Health worker, Moreh ho’a ding in Mission Indradhanush noi’a Immunization leh training programme anabol peh uvin ahi.

Bomb pohkeh

May nisim 17, 2017 nin Moreh Ward No. 2 Galngam lentol kom’a IED khat anapoh keh in ahi. Moreh Police, CDO chule Assam Rifles hon amun ana dellut pai uvin thilsoh achun athi, akisukha vang aumpon, akom’a community Hall vang themkhat asepsen ahi. Hiche thu kijih chan hin koi khutnung chule kon ipi jeh a abol ahi thuchen het ahi hih laijin ahi.

 

Editorial

Sum kilah loicheng jeh

(Nengneikim leh Kaikholen that ho kiman loulai)

                            Achesa May 5 ni jingkah-a Sugnu kom’a Nungah khangthah Nengneikim Haokip leh upa naolhang Kaikholen Tuboi athisa’a ana kimudoh lhon chu tu ni som val jouva jong mithat ho akimatdoh loulai jeh-a hiche thua ana kisemdoh JAC in athah beh-a kiphinna’a Sugnu-Chapikarong lampi bandh ahinbolkit hi govt toh kinoptona ho suhbulhinglouva aumjeh tina ahi. Kinoptona lah-a chu akithat teni luongman govt nin apeh, govt natoh (service) jong kipedi, chuban’a mithat ho matdoh-a achandiudol gotna pehdi ti ho ahi. Thiluong vuidohna aumkal chu athu khohsahna umjilou abahji jeh-a JAC tamtah in kiphinna’a ‘demand’ kibol ho suhbulhit ahikah-a thiluong kilaloudi tia pang chah kheh loi umji ahi. Mithi chu vuidohloiya athu olseidi ti hi mihem hina dol’a ahidi mong khat jong ahi. Nengneikim leh Kaikholen hi akithat ahi ti kihe, numeinu deh-deh hi hunam’a kichepna’a kinei nung’a kithat hinalaiya kisei ahi. Post Mortem Report iti kijih am ti anungjui leh akhuol umnam, chuleh mithatpa (ho) koi (koikoi) hia ham ti leh ipi suhkhel aneilhon jeh-a hitia kibol lhon ham, kinoisena thengset jeh ham ti kiboipi hinam ti hi khatna’a gel di ahi. Aban’a mi suse leh mithat hohi hetdoh hia kihuhgo ham ti jong geldi ahi. Mithat dia ginmo umpenpa (main suspect) jong amin leh alim, ajamna (akiselna) mun ho Social Media a kithethang nung’a matdoh ahiloulai hi datmo umtah ahi. Govt jong hin mi kitha sehleh luongman dit (peh) leh athite kitopina’a govt service bolpeh bou ahetna mithat ho matdoh a gotna pehna lampang khohsahna aneilou laise’a mithat miman ho dia kitil khouna hidi, khansetna, kithana ho pungdi ahi. Govt hin athi amang le avangse te akithopia boina sohdi khat chu asolouna dia pan alahdi mong ahi. Ahin mithat ho akimatna achandiudol gotna pehlouva aumjing laiseuva “mi kithat nintin govt nin aluongman penahta” ti lungput neina dia tilkhouna dan’a umdoh ahitai. Hiche kithana thua kiphinna in Chandel Sugnu gamkai bandh ana umpai chu gangtah a Govt toh kinoptona khat ana um jeh chun mipi (JAC) kiphinna chu ana kiladoh a thiluong jong Post Mortem jouva vuidoh anahie.

                           Kithana khat asoteng Govt akon’a khohsahna aum’a kihoulhahna khat aumpai chu thilpha tah ahinai, ahin mithat ho gotna akipehlou laisea chu sum/paisa toh luong (hinkho) kilheh tina hijeng, miphalou khatnin mi atha jeh-a govt sum moh leuleu jeng tina hidoh gam sihseh ahitai. Sugnu lang kithana thu hi agimnei tah loi ahivang’a nam sepai leh Civil kiloikhopmna loikhat hon “ei le ei” themmo kichanna tobang’a tukal koima midang toh kidei ki-ngai umloudi, jan noiya jukham le jonva umloudi tia kigahna thuphon bol loi jong aum’e. Ei le ei kisuhtupdi chu ahinai. Ahin hitobang kithana aumteng kiloikhomna jatjat hon demna thuphon bou bol hilouva mona neiho akimatdoh tokah-a pan kiladi ahi ti jong um ngai ahi. Sugnu thilsoh thu bou ahipon Kuki sung’a athi amang akithat aumteng sum le sel’a thu kichai jengji tobang ahina hi sot ahitai.

Blankfire

Thuseinadi chance khat imu poupouleh ihet jouse seijengdi tiloi atame. Jing le thai a mundang khat, kikhopna khatna seidi jong kikhet domdi ti jong gel ngailouham. Ole thu itamsei mana min thu le la aha hetlheh in thusei athem lheh e eiki tinte kiti ahidemla kihetalou.