ET May 17, 2017 News (Local, Thusoh Lahchom, Editorial, Blankfire)

ET May 17, 2017 News (Local, Thusoh Lahchom, Editorial, Blankfire)

553
0
SHARE

CM in ni 5 chelha ding Shirui Lily Festival hondohna nei

Imphal, May 16: Chief Minister in tuni chun Shirui vangkho’a um Vangaya lentuol’a a nikho nga chelha ding Shirui Lily Festival hondohna aneiye. Kinguon a chun MAHUD Minister, Th Shyamkumar; PHED Minister , L Dikho; Parliamentary Secretary ho; NED Secretary, Ram Muivah , top ranking officer ho le kho haosa phabep in pan ala’uve. Kinguon a panla ho kiloikhom chom chom ho chun CM .Biren heng’a memorandum khatcheh apelut’uvin ahi.

Forest and Environment Minister Th.Shyamkumar in kinguon a ahoulimna’a chun, kinguon hin thinglhang le phaicham mi ho kah’a kingailutna ahinsemdoh ding ahi ati. Ukhrul hi gam hoitah ahi’n, sorkar in district sung environment venbitna ding’a pan lahthei chan kilading ahi tin aseiye.

CM N Biren in ahoulimna’a chun, State Bird “Nongyeen” le State flower Shirui Lily hi endanger species lah’a minchuong lhon ahi’n, gamsung’a cheng mipi hon pan hatah’a ilahlou’va ahileh hung mangthah lhon ding ahi ati.  Sorkar in Nongyeen le Shirui Lily venbitna ding’a bolthei chan kibol ding ahi. Kumkit a pat kinguon hi lenjo le thupijo’a kimang ding  Manipur pamlam’a kon mi hetthei ho le foreigner ho tampi jong kouna kinei ding ahi. Ukhrul district mama’a um Khangkhui cave jong tourist spot a semdohna ding’a NLCPR scheme noiya Dk.5 crore kikaidoh ding ahi tin CM N Biren in aseiyin ahi.

Ukhrul town’a festival mang dingin tourist tamtah akikhom in, Imphal leh Senapati’a kon festival ‘a pang ding’a che tamtah aumin ahi. Khangthah phabep Ukhrul chan cycle’a ache uhi CM Biren injong kidang asah dan thu aseiyin ahi.

KNLF/KNO in hilchet na bol

Lien S. Gangte

Ccpur, May 16: Kuki National Liberation Front (KNLF/KNO) akon thuphon chun asei na’ah achesa 16th May, 2017 nia Eimitimes a Tonglenlal @ Lalmoi in KNLF/KNO Cabinet mi ni-2 Boithang,  Ongunsat @ Gugun Haokip le Accountant Thangkholal Haokip terminate ahin bol hi hetpeh na umlou ahin, jachat umtah thilbol ahi tin thuphon chun aseiyin ahi. KNLF/KNO thuphon chun aseibe na’ah, Lalmoi hi nam Organisation lamkai ahin, a tohkhom pi chengse Govt. kom a sum deijeh a guhthim’a surrender bolding ana got tah jeh in koiman thulah lou’a ana koisa ahitan, hetpeh na umlou lamkai joh ana hitan ahi. Tukal KNLF/KNO sunga Organisation dang a jamding kisa le aloi agol hetlou a Govt. koma surrender policy gel aum kit a ahi leh KNLF/KNO Organisation in achan dia lom gotna kipe ding ahi tin Boithang Haokip, Organisation Secretary (OS) & Joint Monitoring Group(JMG), member KNLF/KNO in hetsahna ahin neije.

Chukit leh KNLF/KNO sungthu boina aum jeh in koi hileh don le kai thu kicheh kah’a Ongunsat @ Gugun Haokip, Finance Secretary kom tailou a koiman don le kai apeh thei lou ding, nahsah lou leh noise jeh a seingailou aum leh gotna kipe ding ahi tin hetsah na ahung kinei kit in ahi. Hiche thuphon hung kibol toh kilhon a koiman Tonglenlal @ Lalmoi leh anungjui ho tahsan lou a, thudih leh thutah chepi jing ding in temna ahung kinei e ti’n Boithang @ H.L. Kuki, Organisation Secretary, KNLF/KNO, Govt. of Zalen’gam ako’n thuphon chun aseiyin ahi.

Sum le thuneina lamdih louva aman jeh’a MPP in President Sovakiran nodoh ta

Imphal, May 16: President, Manipur People’s Party Nongmeikapam Sovakiran in sum leh thuneina lamdih louvin amang’e, tia ngohna aumtoh kilhon’a atohmun chule party membership’a konin Tuesday nikhon nodoh ahitai.

Tahsan umtah thulhut dungjuiya, Sovakiran in Tuesday nikho’a umding party central committee toukhomna jong aguh’a vohchon ding agot ahi, ati. Ama nodoh nading’a thulhuhna hi central committee hon kilungtoh tah’a aneiyu ahi. Tu masang’a jong central committee member ho toukhomna’a pang ding’a office’a ache ule, ‘meeting vohchon ahitai’ tia lekha kitah amu uhi kidang asah-u ahi.

President in notice (thuso) anei hi nahsah louva committee member hon toukhomna achejompi-u ahi. Hiche jouva Sovakiran ama office’a kon’a apuidoh uva, hunam’a toukhomna’a apan sah-u ahi. State Assembly election’a man ding party sum dangka lakh 50 alam louva mang’in committee in ngohna asemkhum in chule amatah vote jong ape poi, tin jong ngohna aneiyu ahi.

Mitobanglou hodia thil-le-lo hopdohna kingon kimang

B.Lalboi Gangte

CCpur, May 16 (ET):  New Mata, Teddim Road a um People Advanced in Social Service (PASS) ah Seiminthang Lenthang, CEO, MCS Ccpur Chief Guest hina noiyin mitobang lou ho (disabled person) din manbei in thilkeu hopdohna kingon anakimang in ahi. Seiminthang Lenthang hi Deputy Commissioner, Ccpur thakhel a hiche kin’a hungpang ahi. Cha cha Nehru Bal Bhawan a chapang hon vailhunna laa asauvin, Chief Guest pa’n thuseina aneiyin chule thilkeu hopdohna kingon anachelha’n ahi.

‘Disabled’ (achatmo ho) akiti sang’n ‘Differently Able’ (mitoh banglou) tijoh ding ahi tin Seiminthang Lenthang chun aseiye. Hiche (Differently able) paocheng jonghi leiset chung’in akimang’e ati. Disable akiti le amahohi kivetneo jeh’a kisei toh akilouve ati. Amaho vettupna ding’in Centre, State leh government department hon bolthei chan akibol in amaho dia quota masang’a 3% chu tua 4% ahitai tinjong aseikit’e.

Hitobang chanvou hohi NGO holeh Handicap Home honjong avetlel loudiu ijem tia mitobang louho chanvou chungchang adihlouva kibol aumle akisaipi authority henga thu alhut diuvin hetsahna aneikit in ahi.

Tunia mitobanglou ho thilpeh kipe hochu Artificial Limb manufacturing corporation of India (ALIMCO), Kanpur a kon’a kila ahin hiche hochu wheelchairs, crutch, hearing aids leh disable certificate ho ahi.

Tunia kingon chu Khuga Battalion Army honjong kithopina ananeiyuve.

Kingon a pan hungla jouse leh kithopina hinpe jouse chungah Esther Vaiphei in kipathu aseiyin ahi.

GM Hall a Adhaar card joh ho umtalou; mun phabep a vang aguh a kijoh nalai

Imphal, May 16: ISTv News Couple  in dandihlouva ADHAAR card kijoh dan ho ahintahlang tolhon in GM Hall’a Adhaar Card joh hon  anatoh’u angata’uvin ahi. Ahinlah Imphal khopi sung le akimvel’a um mobile station phabep a vang ADHAAR form akihom jing nalaiyin ahi. ADHAAR card kisem ding’a GM Hall hin juon miphabep in aseidan in form akihom jing analaiyin ahinlah guhthim in akibol’e ati’uvin ahi.

Official phabep in aseidan un Adhaar Card kisem nom hon internet’a form download abol theiyu ahi ati’uvin , hiche thu hi applicant phabep in hatah in anielkal ‘uvin ahi. Ajeh chu lekha simtheilou le computer thamje helou mikhat in hoilang’a kon form akilah ding ham tihi applicant phabep pansatna ahikit’e.  Authority concerned in hiche thu hi kholchilna aneilouva ahileh Adhaar card  semna ding form hi kailhang’a von kijoh dan’a muntin’a hung kijoh ding in aum in ahi.

Kpi a ‘National Dengue Day 2017’ kimang

Kangpokpi, May 16: Tuni (May 16) chun Kangpokpi district Deputy Commissioner Conference Hall ah ‘National Dengue Day 2017’ kingon lolhingtah in ana kimang in ahi. Hiche a chun CMO, DMO leh thepna chihna nei mi phabep in Dengue chungchang in houlimna aneiyuvin ahi. Dr. Henkhoneng Mate, DMO/Kangpokpi in Powerpoint slide mangcha’n ‘Dengue’ chungchang kichieh tah in vetsahna aneiyin ahi.

Tuni kingon a chun kihoulim khomna jong anaum e. Hitobang kingon hohi gamsung muntin leh thinglhang kuochong lang’a hatah a bol’a hiche natna chungchang’a Haosa, Chairman, Church leader hole khomite, simlai chapang ho chule amitakip hettoh sah ngai ahi tin T. Ranjit Singh, DC Kangpokpi district leh Balkrishna, ADC Kangpokpi district in aseilhon’e.

Kpi sung’a department kikim lou jeh’a mipi in boina tohjing

Kangpokpi, May 16: Athahbeh’a kisemdoh Kangpokpi District sung’a department akikimlou jeh in mipi in boina tampi atohjing’uvin ahi.

Angaicha Department jouse agangtheipen’a semdoh ahina ding in United Welfare Committee in ngehna aneiye. Kiloikhom President Nehkhothang Kipgen in tuni Manipur Press Club’a thuso miho toh akihoulimna’a chun, Kangpokpi district pilhinsahna ding’a sorkar in tohguon ahin nei hi kipa aum lheh in ahinlah department bukimlou jeh hin mipi in gentheina tampi atohjing’uve. Sorkar in department ho agangtheipen’a ahin suhbulhit ding in ngehna akineiye tin Nehkhothang Kipgen in aseiyin ahi.

Forest Dept. official hon don le kai alah ho’u department khut’a lhunglou

Imphal, May 16: Department of Forest in don le kaiya kon sum le pai amuho official phabep in ama sakhao’a akihet’u ahi ding ginchat na lentah aum’e. Hiche natoh hi top ranking official hon jong abol ding’u ginchat ahi. Thuso miho’n thuguh pole ho’a kon thu ajah dungjui’un Myanmar a pat Imphal gei Kuwa chang hinpo ho’a kon official hon don le kai alah ho  atamjo department khut’a alutpon ahi.Thulhut kimu dungjuiyin Myanmar a pat a Kuwa chang hinpo gari hi niseh le alhompen’a som tobang Imphal juon’a hung lhai jing’u ahi. Kuwa chang hinpo gariho’a kon department official ho hin Dk.3 lakh ahilou le Dk.10,000 vel kai le don’a alah jing’u ahi.  Thil’um dan hi ivet’a ahileh official hon aniseh’a sumguh aneh’u hi asang’a sim hitalouvin lakh lang jong hung val ding tina ahi. Imphal-Myanmar lamlen’a hi kuwa chang bou kipo ahipo’n thil dang dang tampi jong kipole ahi. Achuti’a ahileh official hon aniseh’a sum amu’u hi 4-5lakh kikah lang hiding ahi. Forest minister Th Shyamkumar in annual revenue a Dk.100 crore vel don doh teiding ti’a thupeh anei hi neh guh chahguh ho akisuhmanglou’va ahileh ahitheilou ding tina ahi tin Department official khat in thuso miho heng’a aseiyin ahi.

Assam a cheng Manipuri hon Manipuri ham le pao School le college ho’a akithepchuh theina ding’uva pan kila ding ahi : Speaker

Imphal,May 16: Assam a cheng Manipuri hon Manipuri ham le pao School le college ho’a akithepchuh theina ding’uva pan kila ding ahi tin Speaker Y Khemchand in Ethno Heritage Council (HERICOUN) kiphudoh dal kum 15 lhinna kinguon a aseiyin ahi. Kinguon chu GM Hall, Imphal a kimang ahi. Tuni kinguon sung’a chun Khangminnasi Iramdam Manipuri 8th Edition hondohna jong anei’uvin ahi.

HERICOUN President, Longjam Ratankumar le Sahitya parishad, President, Assam Karam Ibohal in kinguon a chun pan ala lhon’e.  Managing committee in kinguon a chun Manipuri folk artist , Mangka Mayanglambam kipa thilpeh ape in ahi.

Karam Ibohal in kinguon a ahoulimna a chun Manipur pamlam’a cheng Mnaipuri hon apao’u kijilna ding mun aneilou jeh’uva hahsatna tampi atoho’u chungchang’a houlimna aneiyin ahi. Speaker Y Khemchand in ahoulimna’a chun, Sah-solam gamkai akhantou kahse’a India hi gamkhang tou kiti theilou ding ahi ati. Gamsung a cheng mipi hon khantou ding adei’uva ahileh lung le tha ajekhom’uva khantouna natoh ho atosot’u ngai ahi. HERICOUN in gamsung culture le tradition amanthailouna ding’a pan alah ho hi pachat aumtah ahi tin Y Khemchand in aseiye.

HERICOUN President, L Ratankumar in ahoulimna’a chun, Society sung’a khantou machalna pohlut ding hi mimal jouse  mopohna ahi ati. Ahinlah  khantou machalna pohlut theina ding’a hi State Government in ma akai ngai ahi. Gampam miho lutsahlouva asung’a cheng  jat le nam neocha cha ho machal na ding’a natoh jong hi khantou machalna natoh khat ahi tin L Ratankumar in aseiye.

Phaknung Gang rape case a muona neiho Ossification test bol ding’a Core Committee in ngehna nei

Imphal, May 16: Phaknung Gang Rape case a muona nei pasal nga ho tuni chun Juvenile Justice Board, Imphal East a athumvei channa ding in achungthu’u ngailhahna ana um in ahi. Hiche kahlah chun Core Committee Against Phaknung Gang Rape team in Takyel a a um Observation Home maiya kiphinna anei’uvin ahi.  Kiphinna neiho chun khansetna nei pasal nga ho kum tah tah le ossification test result mipi mutheiya tahlang ahina ding in ngehna anei’uvin ahi. Core Committee  , Convenor, Hellem in aseidan in, tunigeiya pasal nga ho kum akiphondohlou hi demding’a lomtah ahi ati. Chuleh authority concerned in pasal nga ho ossification test avol’a atotohchet’a guotna apeh ding in  Hellem in ngehna aneiyin ahi.

Mapithel Dam hi engineer ho mitmo jeh’a leak ahi: Y Thoiba

Kangpokpi, May 16: Mapithel Dam Downstream Affected People, Chairperson , Y Thoiba in tuni chun Manipur Press Club’a Mapithel Dam chungthu in thuso miho akihoulimpi in ahi.  Thoiba in aseidan in Mapithel Dam aselai tampi aum hi State government mitmo ahipo’n engineer ho mitmo na joh ahi.  Engineer ho mitmo jeh’a hi mipi in State government heng’a hehna aneijing ahi tin Thoiba in aseiye.

Tumukhong Awang Leikai Meira Paibi Lup, S Sumati in aseidan in Dam leak jeh hin avel’a cheng ho aniseh in kichatah in aum jing’uve ati. Dam kisah jeh hin nel loh ho le song chom ho’n sum aholtheitapo’uvin , amaho hi sorkar in kivahna ding lampi chomkhat asempeh’u ngai ahi tin Sumati in aseiyin ahi.

 

Moreh  Hospital a National Vector Borne Disease Control Programme kibol

Chandel, May 16: Tuni chun National Vector Borne Disease Control Programme, Moreh Sub-Divisional, Chandel guonna noiyin Moreh Hospital a National Dengue Day ana kimang in ahi.  Kinguon a chun Moreh DIO, S Priyo; Medical Officer, Moreh, S Kumar chule Medical Officer in-charge , PHC, MOreh, Kh Shanti in pan ala’uvina hi. Kinguon a chun Moreh sung a cheng jat le nam chom chom ho, ASHA natong ho, Doctor ho chule hospital staff hon pan ala’uvin ahi.

Internet umlou jeh’a Bishnupur SDO le SDC in certificate verify bolna a boina tampi toh jing

Bishnupur, May 16: Bishnupur DC in Digital India tohguon noiya E certificate kimangcha pan ding ahitai ti’a aseivang in tunigei hin SDO le SDC office in Internet connectin umlou jeh in certificate verify bolna le issue bolna lam’a hahsatna tampi atoh jing in ahi. Moirang SDO, Lokeshore in aseidan in Digital India hi Internet Connection aumlouva ahileh athisa tobang ahi ati. Chuleh authority concerned in agangtheipen’a Bishnupur district sung  a Internet connection aumtheina ding’a pan ahin lah ding in ngehna aneiyin ahi.

Sekta le Huidrom lei melhetlou phabep in suse; khomite’n mi thum man’u

Imphal, May 16: Jaanhi jaan nidan 9 vel chun melhetlou phabep in Sekta le Huidrom kijuotmat tuona lei (bridge) a kon thingpeh 20 vel ana ladoh’uvin vadung a ana pailha’uvin ahi. Thilsoh ‘a muona nei hiding’a ginmo mithum khomihon amandoh’uvin ahi. Thilsoh toh kisai chun Sekta le Huidrom khomite’n Lainingthou Achangba Laibung’a khoulimna anei’uvin ahi.  Kihoulimna’a chun khangdong mithum ho chu May nisim 19 masang’a Lei thahsep sah ding in thulhuhna anei’uvin ahi.

2nd State Level Yoga Olympian 2017 kingon ana kiman

Imphal, May 16: Directorate of Education School gonna noi 2nd State Level Yoga Olympian 2017 chu janhi chun Gandhi Memorial Hall, Imphal mun’a Director of Education S. Prabin leh Dr W Ananta main guests tenin hondoh na anei lhon in ahi. 2ne State Level Yoga Olympiad 2017 kitet na’a chun district 7 akon pasal leh numei 200 val in pan anala in ahi. Hiche kitet na’a chun Tentha High School akon M Malemnganba Singh in Upper primary Section pasal category  leh  numei catergory ading in Kendriya Vidyalaya, Langjing akon Devikarani Manoharmayum in Upper primary section ading in 1st position ana la lhon in chuleh Senior secondary school pasal category ading in Wanghei High School akon A Naresh Sharma leh numei catergory ading in Yumimacha High School akon Y Bala Devi in 1st position cheh ana la ho chu  Director of Education S. Prabin in hopdoh na ana nei in ahi. Hiche simlai chapang akilheng doh hochun June 18 to 20  leh NCERT, New Delhi gonna noi’a National Yoga Olympian 2017 na pang alah ding’u ahi.

Minister Letpao Haokip in stakeholder ho jouse chung’a temna nei

Imphal, May 16 (DIPR): IFCD leh YAS Minister Letpao Haokip in Bill thum State Assemby in kum 2 masang nga na pass jeh sopi mi 9 thina chung ngah stakeholder mopo ho jouse kom’a hiche chung thu suh lhap ma aum thei nading in temna anei in ahi. Hiche thu hi Minister Letpao Haokip in tuni Saikawt playground, Churachandpur mun’a  27th Hmar Martyrs’ Day observance cum closing ceremony of State level Hmar Martyrs’ Trophy 2017 mun’a asei in ahi. Churachandpur mipi te jouse in hiche mi 9 kivui doh lou lai ho final settlement ahithei nading in pan nasatah’a alah ding’u leh hiche’a kon na district in khantou nalam’a machal be na anei thei nading in hiche chung chang thu’a mopoh na neiho Mininster in temna anei in ahi.  Minister Letpao Haokip hin sport lam lunglut na anei naban’a State min’a ding nga National level chan jong ana kichem in chuleh State sung tichu block leh sub-divisional headquarter mun chom chom ma jong lentol kisem ding in jong asei in ahi. Aman aseibe na’a chun; Hon’ble Minister Narendra Modi in jong State government in 100 day programme achai teng leh National Sports University mun’a song phu na kin jong abol ding ahi ati.

Department chom chom in ahahsat nao consolidate report apeh ding’a Minister Losii Dikho in sei

Imphal, May 15:  Tuni chun DRDA conference hall mun’a District level officer kihoukhom na’a chun Tribal affair and Hills/fisheries Minister N. Kayasii leh PHED/ Printing and Stationeries Minister Losii Dikho tenin jong pan anala lhon in hiche keu hilou vin district ADC members holeh district level officer tichu SP Senapati, Social Welfare dept., MSPDCL, Dist. Treasury office, district hospital, SDO/ BDOs, Water Supply dept. hon jong pan anala uvin ahi. Hiche kihoukhom nachu Athem Muivah, Deputy Commissioner in alamkai in ahi. Hiche kihoukhom na’a chun district level officer hon hahsat na ato ho jouse Minister in amopo officer ho kom’a consolidate report ahin submit ding uvin hetsah na anei in ahi. Minister Losii Dikho in officers ho pachat na apeh toh lhon in hill districts dung nga posting kipe ho hin kibol gimna’a gel lou va hiche sang nga chu kipah tah leh thanom tah’a  atoh joh ding uvin temna anei in ahi.

Thusoh Lahchom

 

KNT

KNT Mopoh nanoi a anakigong  Pathen lungtoh Nam mite ihi nadiu le Namsung a boina um lou a chamle lungmonga ichen thei nading uvin An-ngol taona anakigong in tuni (May 13) chun Elijah Prayer Mount a Pathen jal in lolhing tah in anakimangchai tai.

Police khat athisa kimu

Chalwa police station, IT Road, Kangpokpi district’a Manipur Police sepai khat Tuesday nikhon athisa in akimudoh in ahi. Thulhut dungjuiya athipa hi Taphou kho’a cheng Letginlen Hangsing @ Lelen ahi’in, thi-long post mortem bol ding’a apo tauve.

Political party thah

Neiphiu Rio leh Chingwang Konyak lamkaina’a Nagaland a political party khat kisem ding ahitan amin chu ‘Nagaland Democratic Party (NDP) hiding chule symbol chu saipi (elephant) hiding ahi. Chule ahunglhung ding phat sung’a party formation jong kiphongdoh ahitai.

UNLF

Moreh’a kon km 4’a gamlha Tamu Ward no 9’a inmun khat’a Tuesday jingkah in IED bomb ni apohkeh in ahi. Jingkah nidan 1.30 don thilsoh ahi’in, akitongkha aumpoi. Thilso pet’a inn neipa umlou ahi’in, inmun hi UNLF thingnoimi hon phat phabep kiselna mun’a aman-u ahi.

IGNOU

Director, IGNOU, Arunachal Pradesh, Dr Joseph Kuba Daniel Monday jan in Tampha Hotel’a aumna room sung’a athisa in akimudoh in ahi. Iti thi ahi hetchen ahihih laiyin, thi-long post mortem bol ding’a apo tauve. Dr Joseph hi Maram, Senapati district’a cheng kum 50 vel mi ahi’in, suty’a hung ahi’in, chule aphat hi aloi apai te vilna’a anei nom ahi. Churachandpur’a kon JNU’a atohkhompi aloi ho akimupi jouva hung kile’a Imphal khopi’a um hotel mun’a lhung ahi, tin thulhut in aseibe in ahi.

NSCN-R

May nisim 15, 2017 ni in Nagaland a Thungsai Khiamungam Chapa anu phungmin la leh NSCN-R Cadre Vivito Zhimomi Sema chu kaidong hiding’a ginmo jeh in aloihon ana kaplih uvin ahi. Amahi Hoishe kho mi ahin Dimapur Central jail, 4th mile koma pansa ahi.

Meika

Boko, Sontoli Bordia Nayapar mun’a mei kah jeh in thil leh lo lakh ejat ham khat ana kavam tan ahi. Hiche mei kong hung kipat nahi LPG cylinder leak jeh hiding in aginmo nao thujong asei un ahi. Vangphat um tah chun akisu kha athi vang ana um pon ahi.

Editorial

Mipi Nikho atum’a a-um ngaidehlou

                               Bolkhahlou athah beh-a kibol N Biren govt nin apohdoh “Meeyam gi numit” (mipi te nikho) tia Chief Minister (CM) a-pat DC le SP ho gei mipi hon akimupi hi thil thahbeh khat ahivang’a ichan hung phachom diham, ichan hung kichejompi diham akihepoi. Hiche hi thil hoitah khat ahivang’a hoitah-a ivetleh mipi thalheng dia mipin atundoh MLA/Minister ho dia jachat umtah khat hithei ahi. Ajeh chu mipi hon CM jangpet (direct) a akimupidi ahahsatna atam jeh-a mipi lamkai jatjat ho um, hiche mipi kiloikhomna lamkai hon ama ama MLA ho kom’a aboinau leh adei u angaichat hou alhut diudol ahi. Tua hitobang kibol hi mipi hon CM, DC leh SP ho kom’a athalheng uva um a-local MLA hon hiche khuche eipepouvin eibolpeh pouve tia ahehthei (complaint) u tina jong ahi. Aphatna khat chu mipi hon hiche khuche kadei uvin, neipeuvin tia CM, DC le SP ho kom’a alhut teng uleh govt lang’a kon akipesa khat ahikhah a akinehmang ana umkhahleh hung kihedohdi tina ahi. Tulai thil chedan hi govt lang’a kon mipi phatchomna mudidol hohi govt officer holeh MLA hoto kihouthei loikhatnin bou amaiphah-a mipi khutna lhungdi dol ho atamjo lhunglou ahi. Hiche ‘mipi nikho’ a govt vaipo le officer gaki mupi hohi atamjo CM le DC hoto kimaitoa kihoukhalou, akom anaivel’a gaki thah khalou loi hidi ahi. Ajeh chu CM leh DC hoto kihe’a kihouthei le kimuto jing ho chu hitobang kimuto nikho’a aga kimupigot khel diu tahsan umlou ahi. Mipi nikho ahinai tia mi tamtah in CM leh DC ho akimupi jingdi jong hahsa di, kimupiu henlang anop agot u kisei jongleu chutitah a phachom vengvung ahidi jong tahsan ha umlou ahi.

                            Civil mipi kiloikhomna kitiphot nin mipi phatchomna dia aphat le nikho dung juiya DC office apat CM office geiya lekha aselut uva kipei kumlhung jiu ahin govt injong hiche ho avetpeh a boldidol ho abol sohkeileh kiphinna hojong umji loudi ahi. Hijeh-a hi hitoabng nikho kipodoh hi govt hi mipi a dia um ahi ti vetsahna dileh mipi hon thunei vaipo ho a-ngamsungna dia kibol hidi ahi. Alamkhatna govt nin minphat aholna jong hidi ahi. Mipi injong geldohdi khat chu hitobang nikho aumnai tia eima chang phatchomnadi ho gasei di hilouva mipi lah-a mi honkhat beh phatchomnadi thu galhut di joh ahi. India a Democracy chedan hi mipi’n atundoh MLA/MP ho vote pe’a asondoh a pang mipi ho tahbah injong akimupi hahsa, vote hol laileh mi chibai bol toh khurum abol jah-jah vang uva election akaidoh jou teng uleh akotmai uva mi aki ngasah uva abang chu akimupi lou u ahi. Hiche’a hi MLA hojong thepmo moh chansah thei ahilouna chan chu ahileh MLA kom’a mimal phatchomnadi sum le thil thuum tamkit ahi. Mipi hon jong ahidibep MLA ho komn’a seiya MLA hon jong amipi ho kimupi jing photleh hitobang mipi nikho tia atumbeh-a bol (nei) ngaikhel lou ahi.

Blankfire

Jou le nala kivah theilouna nikho hung lhung henlang mijousen natoh a bou kivah di hilevang bu ngol tam thouvinte. Ahin jou le nala kivah hojong moh lup lup hidehlou jousei leh nal lele jong natoh khat ahithou jeh a tohman amuthou u tidi himai inte.